السبت، 24 يناير، 2009

مواقف طريفة


ولأن الامتحان اللي جاي بعد كام ساعة أخر امتحان وختامها مش مسك خالص بصراحة و هينكد عليا فقلت افرفش البوست ده وبلاش نكد مش هيبقى كل حاجة فيها نكد يعني
كل المواقف حصلت معايا النهاردة لما كنت على الطريق السريع :
النهاردة وانا ماشية على الطريق السريع وفأجه لقيت قدامي سرب من الجموايس بيعدي الطريق واعمل ايه اعمل ايه فرملت العربية واديتهم كلاكسات علشان انبههم وقعدت اقول يالهوي يالهوي يالهوي يالهوووووووووووي يا عيني الجموايس شكلهم سمعوني وانا بستغيث كده فسرعوا من خطواتهم وجريوا (كإنهم بشر) بس برضوا عدوا قدامي ووقفت على اخر لحظة في حين ان باقي العربيات والموتوسيكلات عدو من وسط الجموايس عادي يخبطوهم مش مشكلة بقى وبعد الخضة دي قعدت اضحك على منظر الجموايس وهما بيجروا علشان يعدوا الشارع وحسيت انهم حسوا بيا وانا مخضوضة
وكان في لجان كتير على الطريق النهاردة وكل شوية اقول هيييييييييييه هيسألوا على الرخصة بتاعتي اخيرا بقى ليها لازمه
واجهز الرخصة والاقيهم بيقولولي اتفضلي يا فندم يا سلااااااام مع ان العربية اللي قدامي كانوا موقفينها طب اشمعنا بقى
المهم في لجنة من اللجان اتفاجئت بيها وكعادتي مكنتش رابطة الحزام وفضلت اربط في الحزام وانا داخله على اللجنة والامين شرطة وزميله شافو اني مش لابسه الحزام وقلت عليه العوض اكيد اخدت مخالفة ويا عيني هدفع خمسين جنيه وفضلت نفسي تلومني المهم عديت لقيتهم برضه بيقولولي اتفضلي يافندم (تقريبا انا مهمة ومش عارفه ) المهم مشيت من اللجنة ولبست الحزام وفضلت ابوسه واقوله يا حبيبي يا حزام
يا حبيبي يا حزام
والعربيات سريعه جدا فاكرين انهم ماشيين فوق السحاب مش ماشيين في طرق مكسرة يعني انا كنت ماشية على 120 وفي عربية جت عملت زوووووو من جنبنا معنى كده انه كان ماشي على 150 مثلا
ولا لوحات الارقام الجديده بتاعت العربيات حروفها مش مفهومه وممكن تتفهم غلط يعني مثلا واحد كان مكتوب على عربيته (و ط ي) يعني لو قرأناها بالفتحة ممكن تكون واطي وهما نسيو الالف ودي ااقل كلمة ممكن تتفهم من الحروف الغريبة دي ده في حروف تانيه بتكون كلمات افظع

-----------------------------

زي ما توقعت الامتحان ده اصعب امتحان انجليش مر عليا من يوم ما دخلت الكليه وبقول انجليش علشان امتحانات الفرنساوي في الكلية السنين اللي فاتت كانت بنفس صعوبة امتحان النهارده
كلنا خارجين من الامتحان واجمين ومتنحين من الامتحان والسيد الضاكتور جاب اسئلة هو لاغيها
واللي زاد وغطى ان ايدي اليمين كانت بتوجعني جدا قبل الامتحان ومش عارفه من ايه فكل ما كنت بحاول اكتب كانت بتوجعني جدا وانا حاليا بكتب بإيدي الشمال عاااااااا


هناك 28 تعليقًا:

Sometimes يقول...

هههههههههههههههههه
حلوة الكلمة اللى مكتوبه علبى العربيه دى
مبروك يا ليدى
يارب يكون فعلا ختامها مسك

كيكى يقول...

يالييييييييييييييييييييييييييدى ياجامدة
************
ايوة يانونتى عديتى الكبارى خلاص ومحدش هيقدر يكلمك بعد كدة**وش بيغمز**
بقيتى عاملة زى اسماعيل يس
فتشنى فتش**
عشان نبقى نهرب البضاعة معاكى ونبيع ونكسب
لولوولىىىىىىىىىىىىىىىىىىىىى
وبقى لينا ضهر
*****************
يارب الامتحان يجئ سهل وان شاء الله خير ابقى رنى علية طمنينى يانونتى
وخدى بالك من الجواميس
اموااااااااااااة
عوووووووووووووووووووووووو

Tamer Nabil يقول...

كل شىء جايز فى الايام الحلوة دى

المهم عملتى اية فى الامتحانات

ربنا يوفقك

وبالنجاح

تحياتى

Desert cat يقول...

اولا الف سلامة على ايدك
انتى بجد عسل موتينى من الضحك على منظر الجواميس
بالنسبة للجان يارب تفضلى مهمة كدا على طول ومش حد يرخم عليكى

Sometimes يقول...

اللى تخاف منه ما يجييش احسن منه
الحمد لله انك خلصتى على خير يا ليدى
بقولك اقرى تعليقى على البوست اللى فات

e_emy يقول...

هههههههههههه

كل ده

بس اهم حاجه انك خلصتى امتحانات
الف مبروووووووووووك
عقبالى يارب ):

والف سلامة ايدك يارب تكونى احسن

*:

ادم المصرى يقول...

الف سلامه على ايدك والحمد لله ان ربنا عداها على خير

ولكن ابقى توقعى بعد كدا

كيــــــــــــارا يقول...

هههههههههههههههههههه يخربيت فقرك

والله بنتوتي عثل

*****************

الف سلامه لحبيبه قلبي ومش تزعلي علي الامتحان وان شاء الله خير

فكرتيني بيوم اما دفعه علم نفس الدكتوره قالت لهم دا ملغي ودا ملغي ودخلوا الامتحان لاقوها جابت الملغى ومش جابت اي حاجه من المقرر واللي نجح اللي مش حضر المحاضره اللي قالت فيها علي الملغى

حسبي الله ونعم الوكيل

معلش يابسبس وان شاء الله خييييييييييير

قولي يااااااارب وانا هدعيلك ياقمر

Reem يقول...

المهم انه تكوني من الناجحين

على فكرة شكل مدونتك ماشاء الله حلو ورقيق اوي

تقبلي مروري

بنوتة يقول...

مدونتك شكلها جميل جدا ةأسلوبك في الكلام سلس وجميل وطبعا ضحكتينى جدا وألف سلامة على ايدك
تحياتى ليكى

hager za3bal يقول...

كالعاده
زي العسل يا ليدي وموتيني من الضحك
:))

سلامتك ياجميل
ومتفكريش في حاجه بقي ان شاء الله من الناجحين
المهم
انك خلصتي

دمتي بكل خير وود

تحياتي

blue-wave يقول...

ههههههههههههههههههههههههههه
والله انتى عسل
ومواقف جميله فعلا

Lady E يقول...

Sometimes : ههههه الحقيقة الكلمة مكنتش حلوة خالص يعني منظره ايه اللي راكب عربيه ومكتوب على عربيته حروف زي دي

وبالنسبة للامتحان فمكنش ختامها مسك خالص بالنسبة للدفعه كلها كلنا اتصدمنا منه لله الضاكتور بس ان شاء الله ربنا مش هيضيع تعبنا

نورتيني يا قمرايا
دمتي في حفظ الرحمان

Lady E يقول...

كيكى : اومال ايه يا كتكوتتي حد يقدر يكح معانا هههه قال يعني انا مكنتش خايفة اخد مخالفة علشان مكنتش رابطة الحزام

وبالنسبة للبضاعة ماشي هنهرب شوكولاته كادبوري :) ولاني بحب الشوكولاته ف هاكلها كلها ومش هنبيع ولا هنكسب نياهاهاها

وبعدين انتي متأكده انك دعيتيلي يا كيكي ؟؟
اومال لو كنتي دعيتي عليا كان الامتحان جه ازاي عاااااا

mohamed ghalia يقول...

عشان بس تعرفى انك شخصية مهمة فى المجتمع
والف مليون سلامة على ايدك
وبعتذر لأنى مكنتش متابع عشان إمتحناتى
دمتى فى حفظ الله

ABOALI يقول...

ان لم تبتسم فلن يبتسم لك احد


يعنى ان لم تخرج انت نفسك من صفحات الهموم والاحزان
ولم تحاول كتابة اسمك فى ملاحق الفرح والابتسام

ستعيش عيشة اظنها عيشة البؤساء

وهذا ما فعلتيه انتى لذا لك التحية عليه

بس ليا بعض العتاب
فى سرعتك بالسيارة 120 كتييييييييييييير واحده طفله زيك مش عاوزه تكبر
اقل حاجة علشان تفضلى طفله
سرعتك لازم تكون 200
مش عارف ليه مافكرتيش فى كده
ههههههههههههههههه

والله يعطى فرص وفرص
والحزام فى يوم سيتم ضبطك متلبسه بيه


تحياتى

Lady E يقول...

Tamer Nabil : اكيد طبعا كل شيء جايز اليومين دول

والحمد لله الامتحان عدى وبحاول انساه علشان منكدش على نفسي

شكرا لتعليقك يا تامر

Lady E يقول...

Desert cat : تسلمي يا قمر

نورتيني

Lady E يقول...

Sometimes : يارب يكون كلامك صح يا نونا

انا كنت فاهمة البوست اللي فات عندك في مدونتك مش عندي :)))))) معلش بقى كنت لسه طالعة من الامتحان ومهيسة لكن فهمت اخيرا وقرأت ردك يا قمرايا

متشكرة جدا يا جميلة

Lady E يقول...

e_emy : يااااارب تخلصي الامتحانات على خير وتكون امتحاناتكو احسن من امتحاناتنا

والحمد لله ايدي احسن دلوقتي

نورتيني يا احلى ايمي

Lady E يقول...

ادم المصرى : الله يسلمك من كل شر

واتوقع بعد كده ايه؟؟

Lady E يقول...

كيــــــــــــارا : وحشتييني وبلاش بنتوتي دي هتكبري نفسك عالفاضي خليها اختك الكبيرة :)

الله يسلمك يا حبيبتي ومنهم لله الدكاترة الي زي دول بجد يمهل ولا يهمل

وعارفة من زمان محدش قاللي بسبس شكرا يا نونا بجد انا بحب الاسم ده

نورتيني

Lady E يقول...

Reem : ياااارب يسمع منك ربنا

وانتي عيونك حلوين علشان كده شوفتي مدونتي حلوة

نورتيني

Lady E يقول...

بنوتة: شكرا يا قمرايا على كلامك الجميل واحاسيسك الرقيقة

نورتيني

Lady E يقول...

hager za3bal : تسلمي يا قمرايا

وسعيدة ان البوست قدر يضحكك

نورتيني

Lady E يقول...

blue-wave : ايه ده مين عسل دي

انا ليدي مش عسل

نورت يا دكتر بلو ويف

Lady E يقول...

mohamed ghalia : مش كده برضه اكيد مهمة

والله يسلمك من كل شر

ومفيش داعي للاعتذار علشان كلنا كان عندنا امتحانات وطبيعي انك متكونش متابع في فترة امتحاناتك ويارب تكون حليت كويس في الامتحانات

Lady E يقول...

ABOALI : ههههه بالنسبة للسرعة فمستحيل اعرف اجيب 200 بالكتكوتة لأنها رقيقة ومتستحملش يا عيني وكمان مستحيل على الطرق الجميلة اللي بمشي عليها :)

والحزام هتضبط متلبسه بيه على اساس انه مخضروات ولا ايه :)
لا انا حرمت مربطش الحزام وبقيت بربطه لما نكون مسافرين لكن لما اكون جوه البلد فمستحيل اربط الحزام