حاجة حلوة

اليومين دول بجد نفسي أكتب حاجة حلوة – شوكولاته- :) نفسي أقول خبر حلو سواء عام أو خاص وبحلم كتير اليومين دول اني كاتبه بوست عالمدونة مكون من صورة وسطر واحد بس I am going to London :)دي خامس سنة يبقى نفسي اسافر انجلترا بعد 4 سنين في الكلية درست حاجات كتير عن بريطانيا ومن كتر ما كنت بفكر فيها كنت بحلم اني فعلا زورتها عندي احساس قوي اني هكتب البوست ده قريب مع ان لسه مفيش أي دليل يقول اني ممكن اسافر لندن بس متفائلة انه في خلال 2011 ان شاء الله هزور انجلترا وده حسب قانون الجذب وحسب تفائلوا بالخير تجدوه

قانون الجذب بيقول اننا عاملين زي المغناطيس بنجذب كل حاجة بنفكر فيها بإحساس قوي سواء سلبي او ايجابي

اللي عايز يعرف اكتر عن قانون الجذب يشوف فيلم the secret وعلى فكرة في ناس بيعارضوا قانون الجذب لكن لو فكروا شوية هيلاقوا ان قانون الجذب في أدلة كتير عليه في ديننا

نفسي أشتري digital camera وشوفت امبارح أسعار الكاميرات ومعجبنيش الا أغلى واحدة فيهم :) علشان فيها كل المميزات اللي انا عايزاها وأكتر صورها نقية وعالية جدا وبلوتوث وتصوير عادي وفيديو وtouch screen واللي عرفته لما بحثت عنها عالنت فيها GPS وممكن تدخل على النت منها لو في شبكة Wireless

الدنيا علمتني طالما هشتري حاجة يبقى اجيبها صح حتى لو غالية يا مجيبهاش قلبي بيقولي هاتي الكاميرا وصوري كتير ناس وأماكن يمكن متشوفيهاش تاني وفي نفس الوقت عقلي بيقوللي انا مش محتاجة الكاميرا بشكل مُلح كل الحكاية اني بحب التصوير جدا وممكن أجيب الكاميرا ومصورش بيها كتير! أنا محتارة بشكل كبير جدا ياللي جيبتو كاميرات قبلي وصادفتكم مشاكلي تنصحوني بإيه وايه احسن نوع في الكاميرات؟

حد يصدق؟! مطرش الجرجير تامر يا حوستي أخد جائزة احسن مطرب في افريقيا أحسن ايه ؟!!!!!!!!!! مطرب !!!!!!!!!!! ازاي يعني مطرب منين وهو يعني ايه مطرب اصلا ده لما بيغني لايف بينشز نشاز ملوش أخر ده غير كلمات اغانيه الهايفه زي دماغك خليها تاكلك وأمثلة تانيه كتيرانا ساعات بسمع تامر في فرح مثلا في الشارع او الهايبر لكن مش بسمعه مخصوص يعني الجائزة دي ملهاش غير تفسير واحد أدفع اكتر تكسب اكتر

• بطلت اشوف برنامج اوبرا وينفري مع انه اخر موسم ليها لأنها مبينة أمريكا زي يوتوبيا ولأنها بتخليني أقارن بيننا وبينهم

صحيح أمريكا فيها مميزات كتير ومرتبطة بالحلم الأمريكي كل ما تشتغل اكتر كل ما تكبر اكتر لكن برضه امريكا فيها عنصرية وتمييز واللي مش مصدق يشوف فيلمين pursuit of happiness وفيلم

My name is khan ولو في فرصة يقرأ في الأدب الأمريكي لغاية لما يقدر يروح امريكا ويشوف الكلام ده صح ولا غلط !

* بطلت كمان اشوف البرامج الحوارية لانها بتسوء سمعة مصر بجد مش أي كلام وبتجيب احباط واكتئاب خصوصا 48 ساعة و90 دقيقة والحياة اليوم

• هو ليه كتير من مدربين التنمية البشرية بيقلدوا أ- ابراهيم الفقي !

* هي الدنيا ضبابية ومش مفهومة في وطننا العربي ولا أنا اللي شايفة كده بس يعني لو حبيت اعرف الأماكن اللي بتقدم منح دراسية هعرفهم ازاي؟ ولو حبيت أجيب شجرة عيلتي لسابع جد برضه مش هعرف اسأل مين ؟!

طيب هما قفلوا الدستور ليه وقفلوا القنوات الدينية دلوقتي ليه ما نفس القنوات بقالها كام سنة بيعملوا كل اللي بيعملوه في منهم متشددين جدا والاعلانات التجارية المضللة والشات المستفز وشوية معلومات دينية مفيدة طب اشمعنى دلوقتي ؟! وكمان عايزين يقفلوا الفيس واشمعنا الفيس ما في تويتر وبلوجر كمان

الهي اللي يقفل الفيس يقعدله في عينه وف عافيته قادر يا كريم

كل ده يثبت شعار المرحلة _ الشفافية _ *_*

* من شوية كنت بكلم زميلتي في الكلية كانت رايحة شغلها اللي من غير مرتب علشاننا لسه خريجين جداد وكل شغل محتاج خبرة فأي مكان بتقدم ورقك فيه بيقولولك حاجتين هنتصل بيك ولو اتصلوا بيك يبقى العمل بدون أجر شهرين تلاتة – استهبال يعني- فبتقوللي كانت راكبة الميكروباص فواحدة سألتها انتي بتشتغلي ايه قالتلها مترجمة بتقوللي نظرتها ليا وكلامها معايا اتغير واحترمتني اوي وقالتلي انتي راكبة ميكروباص ليه ما تجيبي عربية بدل المرمطة دي وبصتلها على انها بخيلة :) وتقدر تجيب كل يوم عربية :) صحيح الصيت ولا الغنى

جاي على بالي أغنية : احلم معايا ببكرة جاي ولو مجاش احنا نجيبه بنفسنا نفضل نحاول في الطريق كتر الخطاوي تدلنا على حلمنا
يارب حقق احلامنا

تفاصيل بسيطة

" مش عارف هل بتقصدي حد معين مريتي بتجربة معاه للدرجة اللي توصلك لهذا الحد من الغضب اللي ربما أكون حسيته في كلامك لدرجة وصفك الشباب عالنت بإنه سيس " جزء من تعليق على البوست اللي فات لمدون بحترم كتابته وفكره لكن الواضح انه مبيحترمش حد لأنه سألني سؤال شخصي مش فاهمه هيستفيد ايه لما يعرف اجابته يعني هيضره بإيه أو هيفيده بإيه؟ ومين اللي ادى لحضرته الحق يسألني ويتدخل في اللي ملوش فيه في حياتي الشخصية !!!!!!!!!! ويعمل اسقاط على شخصيتي وهو ميعرفنيش اصلا الا من خلال مدونتي اللي ضايقني فعلا ان المدون ده المفروض من كتابته يتفهم انه مثقف على أي حال يا أ-محمد ناصر الدين الهلالي Please in your next comment try to show some respect or please do not comment or read my blog at all

في بوست عند شاب فقري بيقول كتير من اللي عايزة اقوله كفى ووفى فعلا إلى غير معرف

------------------------------------------

بفكر انزل مصر بعد العيد بس عايزة حوالي شهر علشان ارتب حياتي تاني في مصر

يوم هاخده في التنقل ما بين مطار داخلي ومطار دولي ومواصلات لغاية لما اوصل لبيتنا

واسبوع علشان نعمل صيانة للكتكوتة لأني سايباها تعبانه أصلا وكمان البطارية هتتشحن لأن بقالها كام شهر مشتغلتش وأسبوع زيه لغاية لما نظبط البيت وأفضي شنطتي

دايما في الأفلام بشوفهم اول لما يوصلوا من السفر بيشيلوا كل حاجاتهم من الشنطة وانا مش كده انا بحب احتفظ بشنطتي وبالتيكت بتاعها وباخد اللي بحتاجه منها وخلاص

وعالأقل شهر علشان أرجع الانترنت وشهر كمان لغاية لما أزهق وابقى عايزة أسافر تاني :)

هنا وحيدة وهناك وحيدة مش فارقة كتير لكن اللي فارق معايا بجد

لما كنت بحس الاحساس اللي انا حساه دلوقتي كنت بروح رأس البر ع اللسان أقعد قدام البحر ساعة ساعتين وأروح النيل أجيب أيس كريم كاساتا فانيليا متقطع فيه فواكه ومش ممكن انسى ايس كريم الليمون

وفي الطريق بسمع موسيقى هادية أو أغاني رومانسية وبرجع تاني متفائلة ومرحة

في مصر بتصل بكيكي وتفضل تقوللي ما تيجي بقى وأقولها يا بنتي اجي ايه بس هو سهل كده ما تيجي انتي

تقوللي ياريت

بقعد عالنت 24 ساعة بيسرق وقتي بطريقة غريبة لكن هنا بتحكم في الأوقات اللي بدخل فيها النت ودي حاجة مضايقاني :(

مع ان الصورة الكبيرة مش رائعة الجمال لكن فيها تفاصيل بسيطة بتسعدني ^ أشيائي الصغيرة^

منظر الشمس وهي داخلة أوضتي الصبح ومش مخلياني اعرف انام ،

الهوا اللي جاي من شباك أوضة بتطل على راس البر من بعيد ،

بوكس اند بينز بكل حفلات التوقيع والأمسيات اللي بتعملها ،

كوك دور المنصورة وأكله اللذيذ

كورسات التنمية البشرية وأمسيات مكتبة مبارك والجيم وحواديت البنات هناك

كورس الموسيقى اللي نفسي أدرسه

ودبلومة الترجمة اللي محتارة فيها اخد ترجمة فورية ولا ترجمة تحريرية ولأ اسيبني من الترجمة وأخد لسانيات وصوتيات كل ده في بلدي برغم ان الصورة اللي يشوفها من بعيد يلاقيها سودا لكن فيها شوية الوان حلوة

على رأي جدتي الله يرحمها رب هنا رب هناك

كل اللي بيفرق بس بين مكاني هنا ومكاني هناك تفاصيل بسيطة

الشاب السيس وأساليب ابليس

لغاية وقت قريب كنت فاكرة ان شاب سيس يعني مش متحمل المسؤلية أو بيدي على بنت شوية وطبعا لا بيحصلوا رجالة ولا بنات بيبقوا حاجة كده ملهاش معنى المهم بدأت اقرأ للكاتبة مروة رخا كتاب اسمه الدنيا خيارة وبتنشره على حلقات نشر الكتروني علشان معترضة على ظلم دور النشر كلهم المهم في الحلقة الأولى كانت بتتكلم عن الشاب السيس ومن صفاته اللي قالتها : -كلام مروة رخا باللون الأحمر وكلامي باللون البنفسجي

• " ماشى – أو قاعد - مع مراته و بيبصبص لكل ما هو مؤنث و فاكرها خفة دم و روشنة."

وأنا بتجيلي حالة من الغثيان لما أشوف واحد بالشكل ده متجوز ومراته زي القمر وعينيه هتطلع ع اللي رايحه واللي جايه أو حتى يكون بيتكلم في التليفون مع مراته أو خطيبته وتلاقيه بيبص لواحده تانيه خالص وبيعاكسها !

• ملقح على النت ليل نهار و مشغل اسطوانة الزوج المظلوم:
"أصل أنا اتجوزت و أنا صغير ... أصل أبويا كان نفسه يفرح بيا ... أصلى ما كنتش فاهم الدنيا صح و لا عارف احتياجاتى إيه ... أصل مراتى مش فاهمانى ... أصلى رومانسى ... أصلى محتاج للحب و الاهتمام ... أصل مراتى جسمها اتبهدل و اهملت نفسها ... يا ريتنى قابلتك من زمان ... أنتى اللى أنا بـ أدور عليها ... أنا بـ أحب أتكلم معاكى ... أنا عمر ما كان ليا فـ الشات و الكلام دا غير لما عرفتك ... ربنا قال مثنى و ثلاث و رباع ... و الله أعلم النصيب فين" وأضيف عليهم كمان أصل أهلي غصبوني ع العروسة ، أصل جوازنا كان تقليدي ، انتي الوحيدة اللي بتحس بيا ، انتي البطيخة اللي بترطب على قلبي في الصيف ..... الخ وطبيعي ان كل ده يترد له في اهل وبيته وأولاده لأن داين تدان وربنا يمهل ولا يهمل

•قالع الدبلة و عامل فيها جيمس بوند أو لابس الدبلة و بيقول عليها صراحة: "أنا مش باضحك على حد ... و بعدين أنا راجل" في الحالة الأولى فكرني بتامر في عمر وسلمى 2 بيقول لسلمى مراته أنا خنتك حوالي 5 ، 6 مرات بس واللي زي ده عمره ما بيتعدل وهيفضل يخونها طول عمره ويغنيلها انا خونتك امبارح ! أما التاني فهو أهون شوية من الأولاني على الأقل مبيكدبش ويعيش دور مش دوره وده ميمنعش انه خاين برضه

بيتحرش بالسكرتيرة و الموظفات فى الشغل ... يا تلاغيه يا هيقطع عيشها . ومش بس كده ممكن حتى يكون مدرس او دكتور جامعة او طبيب ويبقى سيس ومتحرش

واللي فات ده كان كلام مروة رخا وتعليقي عليه أزود انا بقى شوية صفات للشباب السيس

بيحاول يتقرب من البنت ويشوف اهتمامتها ايه ويناقشها فيها ويوصل لها ان هو فتى الأحلام الأول وده المتحرش المثقف

في كمان الشاب السيس اللي مالوش غير في البنات المحترمة يعمل رهان مع اصحابه انه هيوقعها في دباديبو دباديبو واول لما يلاقي انه حسرة عليها يا حسرة عليها ما جت رجليها ما جت رجليها تاخد اسوأ مقلب ممكن تعيشه في حياتها

في كمان الشباب السيس اللي عندهم عربيات وبيستقصدوا أي بنت ماشية بعربية عالطريق بيزنقوا عليها وبيغلسوا عليها والحكاية دي حصلت معايا كتيييييييير جدا وكذا مرة كنت هعمل حادثة بسبب الغباء ده لكن ربنا ستر والحمد لله لكن في بنات بيعملوا حوادث وبيتبهدلوا وممكن توصل للموت بسبب ان واحد كان بيغلس عليها بعربيته على اساس انهم في لعبة اتاري او لعبه عالكمبيوتر ولو العربية اتقلبت بيها او نزلت في النيل مش هتموت ولا حاجه هتطلع صاحية زي الكارتون وهقولكم قصة حصل فيها كده فعلا لبنت مرة كنت رايحة أشتري ميك اب من هايبر وبعدين لقيت البنت اللي واقفة هناك وشها لونه متغير –شبه اللمونة- وعنيها محمرة وحالتها كرب طبعا مكنش ينفع مسألهاش مالك وأخفف عنها وحكتلي انها وهي جاية الصبح الشغل عربية شباب زنقت عليهم وصاحبتها هي اللي كانت سايقه وفجأه العربية هجمت عليهم فالبنت بتفادي العربية فلبست في شجرة والعربية اتقلبت بيهم هي قعدت في المستشفى عملولها الاسعافات الأولية وركبولها محاليل وصاحبتها دخلت العناية المركزة من كتر الاصابات اللي فيها !

المواطن الاساسية للشاب السيس بتلاقيه في الجامعة والنادي وفي الرحلات خصوصا لو قعد جنب بنوتة حلوة في الطيارة وفي الهايبر وبيكتروا أوي جدااااااا عالنت لأنهم بيرسموا صورة تانيه تماما عنهم وبيلاقوا الهبلة اللي بتصدقهم ! كنت زمان مؤمنة ان الدنيا نقية ولطيفة والصدق بيرفرف عليها وممكن اتنين يحبوا بعض من النت لكن اتضح لي اخيرا ان في مرضى نفسيين كتير بيستخدموا النت علشان يعيشوا حاجات مقدروش يحققوها في حياتهم الواقعية

في الشاب السيس اللي يزرع الأرض ورد للبنت ويفهمها انه ملاك وناقصله جناحين ويقولها عادي مظهرك ميفرقش معايا وانا بحترم المرأه ودراستك لازم تكمليها وأنا بشجعك طبعا أو أسلوبك في التدوين خطير ده انتي ولا طه حسين العرب وشكسبير عصرك وأوانك وفأجه بعد الخطوبة وكتب الكتاب تيجي البونيه تبص تلاقي عكس كل اللي كان بيتقال لها حصل البيه عايزها لو مكانتش محجبة تتحجب ولو محجبة تتنقب وبيحجر على أحلامها قبل ما تشوف النور ويحبطها ويقولها هتعملي ايه بشهادتك يعني ومدونتك دي يا انا يا هي انتي عايزاهم يقولوا على مراتي مدونة وبتكتب وعندها رأي وبتتناقش وفجأه تلاقي نفسها لبست في الحيطة وتبدأ تتنازل لأنها حبت المحروس بسلامته وبقى اسمها على اسمه

وفي بقى السيس اللي يستعطف البنت لغاية لما يصعب عليها ويدخل لها من حتة حبيبته ماتت او سابته او ظروفه صعبه وهو شاب مكافح أو أهله مضطهدينه أو ظروفه كويسه جدا بس يا حرام مش لاقي اللي تحبه لشخصه مش لمكانته او لفلوسه كل ده طبعا مبيبقاش حقيقي

ده ميمنعش ان في شباب كويسين وزي الفل بس انا لغاية دلوقتي مشوفتش ولا واحد منهم ! وبدأت أصدق فعلا أن الرجولة الحقيقية نادرة أوي – هبقى متفائلة وأقول نادرة مش هقول انقرضت :)

But you're just a boy
You don't understand
And you don't understand, oh
How it feels to love a girl
Someday you wish you were a better man

You don't listen to her
You don't care how it hurts
Until you lose the one you wanted
'Cause you're taking her for granted
And everything you had got destroyed
But you're just a boy

If I were a boy by Beyonce

لسه بضحك زي زمان

امبارح عرفت اني لسه بضحك من قلبي زي زمان بالرغم انهم قفلوا جريدة الدستور - أيوة ما هو لما كل اللي بيكتبوا كويس فيها يمشوا يبقى اتقفلت- الهي ينكد ع اللي بيحبوا ينكدوا عالناس طيب واحدة زيي بره بلدها كانت بتستنى اليوم يعدي بفارغ الصبر علشان يجي اليوم اللي بعده وتشوف المقالات اللي في الدستور تعمل ايه علشان كانت بتحب الجريدة وكلمتها الأمة مصدر السلطات - جمع سلطة- تقريبا لأن الطماطم غليت فمبقاش ينفع ان الأمة تعمل سلطة فيها طماطم فقفلوا الدستور - والمقالات وخصوصا مقالات عمر طاهر كانت بتفرحها وبتديها أمل وبترسم على عيونها وقلبها ابتسامه منه له منه لدرجة اني في يوم من ذات الايام اتمنيت اني اكتب في الدستور مع كل العمالقة اللي بيكتبوا فيها
تجاوزت الأزمة لأن الحياة موقفتش وأكيد الكُتاب قادرين انهم يعملوا جريدة تانيه كويسة
وتجاوزت برضه كلام واحد متخلف قال لي : شهادتك دي متنفعش ببصلة ! يعني أنا ادرس 4 سنين وفي الأخر واحد لا يفقه أي شيء يقوللي شهادتي متنفعش وكليتي ملهاش لازمة :) وبرضه لسه بضحك
أصل الدنيا فيها 80% تافهيين و20% بس اللي ممكن نحترمهم وناخد بكلامهم ويأثر فينا
المهم من يوم ما سافرت وانا مفتقدة الكتكوتة بغبااااااااااااء ف امبارح بابا اخد عربية عمي عمرو والعربية 4<4 اوتوماتيك فأنا كان نفسي اسوقها وأمشي بيها شوية المهم بابا وافق بعد اقناع رهيب لأن العربية مش عربيتنا ووقفنا في مكان واسع وفاضي علشان أمشي بالعربيه وكان فيلم كوميدي أولاً كأني عمري ما مشيت بعربية في حياتي لأنها عالية ولأنها أوتوماتيك ولأنها مش بتاعتنا فمش مدية الأمان وهخاف اخبطها من كل ناحية زي الكتكوتة ولأننا بالليل كنت مرعوبة وأنا ماشية بيها يعني انا بلاقي الناس بتقول العربيات الأوتوماتيك اسهل من العادية وأنا بالنسبة لي العكس :) المهم كل ما كنت بخاف من الطريق كنت بفرمل وبابا قاعد جنبي ف وانا بفرمل كذا مرة كنت انا وبابا هنخبط في ازاز العربية وكنت انا بضحك بهيستيريا مش متخيلة ان بقالي 3 سنين بسوق ومش عارفة أسوق العربية دي ومرعوبة بالشكل ده وكنت ماشية بيها على 20 اومال لو على الطريق العام وبسرعة كبيرة وحبيت أفرمل هعمل ايه
طبعا اللي فوق دي مش صورة العربية بس زيها والطريق شبه الطريق اللي كنت ماشية فيه :) بالصدفة وأنا بدور على أفلام أجنبية علشان أشوفها لقيت كل المنتديات اللي وقعت تحت ايدي منتديات خليجية وكمان المنتديات اللي بتتكلم عن السفر بره والمنح والجامعات حزروا فزروا خليجية برضه وأغلبهم كمان سعوديين ! مع ان معلوماتنا عن السعودية انهم بلد مقفولة بس البلد المقفولة دي بيطلع منها امريكا كل سنة للدراسة 10000 طالب ! منهم طلاب بيطلعوا بعثات كاملة يعني نفقاتهم كلها على حساب الدولة
المهم انا غيرت بصراحة وعلشان نصيحتين غاليين عليا وبعمل بيهم الأولى : لازم تدي رأيك في كل حاجة بتقرأيها أو بتشوفيها أو بتسمعيها
والتانية : لازم علشان تطوري لغتك تسمعي انجليش كتير من مصادر مختلفة - اكيد منها الأفلام- فهتكلم عن فيلم عجبني جدا اسمه أميرة الثلج أو Ice princess الفيلم بيحكي قصة بنوتة مهووسة بالفيزياء بتحب الفيزياء جدا وفي نفس الوقت بتحب التزلج على الجليد ومدرس الفيزياء بيشجعها انها تعمل مشروع علشان تاخد منحة جامعة هارفرد في الفيزياء وفعلا بتقرر ان مشروعها هيبقى عن التزلج على الجليد وبتكتشف في الوقت ده انها بتحب التزلج على الجليد للدرجة اللي خلتها تتعلم بسرعة جدا وتتطور وكمان تدخل مسابقات وتفوز فيها وتقرر يوم مقابلتها في هارفرد للمنحة بتاعتها انها مش عايزة تدرس فيزيا وعايزة تبقى رياضية محترفة وهتتعرض لصعوبات كتير - كلنا بنتعرض ليها بس في اللي بيجتازها لو كان حلمه بجد وفي اللي بيستسلم- يعني من الصعوبات عدم موافقة مامتها على انها تكمل في التزلج ع الجليد وتسيب منحة هارفرد وده تفكير معظم اهلنا اللي بيحبوا يشوفونا في نمط معتاد منخرجش عنه ومنها كمان قلة الفلوس وقلة الوقت ودي حاجات البطلة
تغلبت عليها ده غير كمان قصة الحب الجميلة بين البطل والبطلة اللي مش هقول أسمائهم لاني غالبا مبحفظش اسماء الممثلين في الفيلم :)
الفيلم يستحق المشاهدة خصوصا من الناس اللي بتسعى لتحقيق أحلامها وتقييمي ليه 7 من 10
ودي أغنية من أغاني الفيلم بحبها جداااااااااااا :

مش كل بني أدم انسان 2

ملحوظة : محدش يسمع الأغنية اللي في الفيديو الا لو كان متأكد انه مش هيكتئب أي حد هيجيله احباط أنا مش مسؤلة

بداية الأسبوع يوم السبت اللي فات زرت مدرسة خاصة كلها مصريين في الأول دخلت على الإدارة لقيت البنوتات اللي في الإدارة – عمانيات -لابسين اللبس التقليدي في صلالة وهو العباية السودا ولبسهم متناسق وشيك ولايق عليهم وأول لما خرجت من باب الإدارة كأني رحت عالم تاني مليان كائنات خرافية قاموا من عالسرير لبسوا أي حاجة وراحوا المدرسة والمفروض انهم مدرسات

في مدرسات شعرهم باين ومنكوش وفي مدرسات لابسين عبايات سودا بقالها يجي عشر سنين عندهم هي والحجاب اللي فوقيه وكلهن لابسين لبس المفروض حتى ميلبسهوش في البيت لان صلاحيته انتهت من زمان

وكلهم لابسين عبايات سودا منتهية الصلاحية – تقريبا ده اللبس المعتمد في المدرسة المعفنة دي – على فكرة معفنة دي مش شتيمة لكن أقرب كلمة توصف اللي شوفته

المدرسين المصريين اللي بيدرسوا للجيل الجديد مش فارقه معاهم الصورة الحلوة ليهم عند الطلاب

مش هتكلم عن المدارس اللي دخلتها في مصر بتكلم عن مدرسة خاصة شوفتها هنا ! بس مدرسينها للأسف مصريين من قاع المجتمع المصري

الغريب بقى انهم بصولي انا على ان انا اللي غريبة مش هما ! ونظراتهم ليا خوفتني بصراحة كنت حاسة انهم عايزينني اختفي من قدامهم وكأنهم بيقولوا مين الرايقة اللي لابسة جينز وجاية المدرسة دي والله أعلم لولا لبسي والميك اب الخفيف ونضارة الشمس كانوا افتكروني طالبة في المدرسة مش متخرجة من كلية أد الدنيا :) أو كانوا مرعوبين اني اكون مدرسة معاهم لأن لو الأطفال عملوا مقارنة هتبقى مش في صالحهم :) طبعا خرجت من بيت الرعب ده بسرعة

أما المدير بقى فكان لابس تيشيرت وبنطلون بقالهم 10 سنين برضه وجرافات مش عارفه جابها منين لونها زتوني مترب وأول لما اتكلم قدامي كان نفسي أقوله – سبحان اللي خلى أشكالك مديرين مدرسة –وعلشان كلامي ميتفهمش غلط انا مش بترييق عليهم انا بس بسأل هما ليه كده !

بيتهيألي مفيش مبرر انهم يبقوا بالشكل المقزز ده وذنب النشأ الجديد ايه لما يتخضوا كل يوم كده لما عينيهم تشوف موتى على هيئة بشر ده حتى هنا التوكيلات العالمية للملابس مش غالية أوي بغباء زي مصر يعني ماكس وسبلاش وغيرهم في حاجات مناسبة فيهم طيب ايه حجتهم بقى انهم يبقى شكلهم غريب كده ليه البخل ده !

في فئة من المصريين مبيحبوش يصرفوا فلوسهم خاااااااالص وده بيظهر على شكلهم للأسف وغير كده كمان بيقولوا على الناس اللي بتحب تعيش حياتها وتستمع بالفلوس الحلال اللي عملتها من شغلها انهم سفهاء وبيحقدوا عليهم وبيحسدوهم

لو حد هيفكر ان المرأه العاملة لازم تكون مبهدلة يبقى احسن لها تقعد في البيت ولو حد هيفكر ان المحجبة لازم تبقى مبهدلة يبقى مش فاهم حاجة

مش فاهمة الناس بتبقى بخيلة ليه عايزين يحوشوا ويعملوا مشروع أو يبنوا بيت او يعملوا أي حاجة برضه لازم يستمتعوا بحياتهم مش يحوشوا كل فلوسهم ويمشوا في الدنيا شكلهم غريب وصحتهم بايظة ده حتى اللبس الشيك بينعكس على النفسية وبيدي راحة وثقة في النفس والأناقة والشياكة غريزة في الإنسان بدليل اوقات كتير بتلاقي الأطفال بنات وأولاد واقفين أدام المراية وبيقلدوا الكبار وبيتسرحوا وبيحطوا بيرفيوم وبيلعبوا بالميك اب :)

نفسي أفهم بس الناس دي ضامنين عمرهم ساعة واحدة بس علشان يبقوا بخلاء بالشكل ده هيستمتعوا بحياتهم امتى ؟

مش كل بني أدم انسان 1

" وانا ويايا بعيش زي المليونيرات وأحلم وانا معييش ملعنش الأزمات " ده كوبليه من أغنية لمدحت صالح وشريف منير كانت بتيجي زمااااان أيام طفولتي والأغنية دي بشكل أو بأخر غرست فينا كجيل ان الفلوس فائدتها الأساسية علشان تجيب اللي صاحبها محتاجه علشان تعيشه في مستوى كويس وعلشان هو اللي يتحكم فيها مش هي اللي تتحكم فيه .

على مدار دراستي كانت مُدرسات الإنجليش مثل يحتذى بيه في كل حاجة في اللبس ومعاملة الطلاب وخفة الدم والثقافة

دائما مدرسات الإنجليش كانوا شيك وحلوين – حتى لو محطوش مكياج- ومرحين حتى انا فاكرة في سنة من سنين ثانوي كنا مسميين مدرسة الإنجليش " باربي " ده طبعا غير البيرفيوم بتاعهم اللي كان بيهفهف ع المدرسة كلها ولا لما تدخل على أوضة مدرسين الإنجليش يا سلام تلاقي بقى صور للطبيعة وصور أطفال متعلقه في الأوضة وكتب تشارلز دكنز وشكسبير وارنست همنجواي وغيرهم موجودة في مكتبة صغيرة في الأوضة

ده غير معطر الجو برائحة الورد أو التوت والفراولة اللي بيستقبلك أول لما تفتح باب اوضة المدرسات ويا سلام لو رحت أوضة مدرسات الإنجليش ساعة الفسحة وتشوف مدرسات الإنجليش كل واحدة جايبة كرواسونايه ومعاها مج نيسكافيه أو حتة بيتزا وعصير فريش حاجة كده تحسسك انك في فرنسا من فرط الرقة والجمال ويمكن ده من الأسباب اللي خلتني أدرس انجليش ان كان نفسي ابقى من الناس الجميلة اوي دي

درسلي انجليش مدرسات من جنسيات كتيييييييير هنديات على عمانيات على عراقيات على اردنيات على مصريين ومكانتش الصورة الرقيقة دي بتختلف برغم اختلاف جنسياتهم نفس الشياكة يمكن مدرسة وحيدة من مدرسات الإنجليش كلهم اللي كانت مستقوية ومفترية علشان كنت رافضة اخد مجموعة أو درس عندها لأني مكنتش محتاجة دروس اصلا بس هي فضلت ورايا لغاية لما اخدت درس معاها مع باقي الفصل – مرغم اخاك لبطل – بس ده ميمنعش انها كانت شيك شيك يعني الشعر اللي متظبط عند الكوافير واللبس المنسق والشيك والاكسسوار اللي لايق على اللبس حتى في الجامعة الدكاترة والدكتورات كانوا شيك جدا من ناحية اللبس

نقدر نقول عليه زمن الفن الجميل لأن اللبس والظهور بمظهر جميل فن - دي كانت الصورة أيام دراستي اما الصورة دلوقتي -

يتبــــــــــــــع علشان انتوا بتضايقوا من الرغي الكتير :)

الحل السحري

بعد البوست اللي فات اتأكدت من كلام الشاعر أحمد شوقي الله يرحمه ان المصائب يجمعن المصابينا وكلنا مرينا بالكلاكيع والمنفسنين في حياتنا المهم نبقى أقوى ومنسمحلهمش يأثروا على احلامنا وطموحنا ناخد استراحة بقى من الحاجات اللي تضايق
---------------------------------------------

علشان نعرف حياتنا كويس لازم نقرب أوي من نفسنا وعلشان نقرب من نفسنا لازم ندخل جواها ونعرف أكتر عنها
عندي الحل السحري لمعرفة النفس والقدرات نجيب ورقة فاضية أو صفحة وورد فاضية :) ونعمل قوائم
ونبدأ بقائمة للحاجات اللي انجزناها في حياتنا – اهم انجازاتنا-
قائمة طويلة لأحلامنا وطموحاتنا – مش أقل من 101 هدف روحاني ومادي وجسدي وعلمي -
قائمة بأحسن صفاتنا وأكتر حاجة بنحبها فينا
قائمة للناس اللي بنحبهم ومنقدرش نستغنى عنهم وأدوارهم رئيسية في حياتنا – لازم نسأل عنهم لو كانوا بعيد عننا -
قائمة بالأشخاص والأحداث اللي احنا ممتنين لهم
قائمة بأكتر حاجات بتعملها وبترفع من روحك المعنوية وبتسعدك – في حدود المقبول محدش يشرب سجاير ويكتب ان دي اللي بتفرحه ! -
وأخيرا قائمة بالكلمات الانجليش او أي لغة تانيه بنعرفها
أنا عملت كل القوائم دي مش كلهم مرة واحدة ونتائجهم سحرية وبتحفز بجد
-------------------------------------
" احنا بندن أيوة ف مالطا جايز مرة نصلح غلطة لما هننطق كلمة حق" امبارح كنت في مدونة only hope وسمعت أغنية عجبتني أوي وربنا ما يوريكوا لما بتعجبني أغنية بفضل اسمعها كتييييييييييير كتقليد انها عاجباني وفرحانه بيها الأغنية اسمها كلمة حق لفريق بساطة وحبيت اشاركها معاكو وده لينك الأغنية : http://www.mawaly.com/music/Basata+Band/track/44949

وتستمر المعاناة

المشهد الأول : بشوف في التلفزيون حفلة الويلكم بارتي بتاعت الجامعة الأمريكية اللي بتتعمل كل أول سنة للطلاب الجدد بيعرفوهم بالجامعة وبالطلاب اللي بيدرسوا في الكلية

المشهد في كليتنا : مجرد طلاب تايهين مش عارفين يروحو فين ولا يعملوا ايه و بعد شهر من الدراسة والحياة لسه ضبابية ومفيش جدول نزل بالمواد والكتب منزلتش

مشهد الساعات المعتمدة : الكليات اللي بتعتمد على نظام الدراسة بالساعات المعتمدة انت اللي بتختار المواد يعني ممكن تاخد مواد من سنة تانيه واولى مع بعض وتختار المواد اللي تدرسها والدكتر اللي بيشرحها ليك ولازم تعرف الدكتور ده مؤهلاته ايه وبيتعامل ازاي مع الطلاب - ده لو في جامعة أجنبية-

المشهد في كليتنا : في سنة اولى مستنيين طول النهار الدكتر انه يتكرم ويتعطف ويحن علينا علشان يشرح لنا المحاضرة ومن حقه يضيع لنا وقتنا عادي جدا وأهلنا موافقين ان وقتنا يضيع وبيقولوا ما كل الكليات كده - معلش اصبروا اصلكو تاني دفعة في الكلية-

المشهد التاني الدكتور بيقول للطلاب : مطلوب منكم تعملوا أبحاث وتطلعوا وتقرأوا وتتفاعلوا دي حياتكم وده مستقبلكم ولازم تبقو متميزين

المشهد في كليتنا : احفظو المكتوب ده زي اسمكم انا عايز بصمجيه مبتفهمش قدامي !

المشهد التالت : طبعا ممكن تستفسري عن أي حاجة ايه اللي مفهمتيهوش بالضبط؟

المشهد في كليتنا : مش مطلوب مننا اننا نشرحلكو حاجة ! كويس أوي ان احنا بندي الخطوط الأساسية في المحاضرات

المشهد الرابع : انتو هتاخدوا الشهادة وتشتغلوا وتبقوا أشخاص فعالين في المجتمع

المشهد في كليتنا : انتو هتاخدو الشهادة وتقعدوا في البيت أو حد لاقي شغل اليومين دول

المشهد الخامس : كلكم متميزين ومبدعين وجاوبتم كويس في الامتحان

المشهد في كليتنا : كلكو تستاهلوا السقوط ............... قابلوني لو فلحتو

طيب عايزين طالب اتعرض لكل السلبيات دي وقابل ناس بيروقراطيين و .... ومنفسنين وكلهم امراض نفسية وقابل 2 او 3 بس كويسين يعمل ايه
طالب اتخرج لقى نفسه ماشي في الضباب مش فاهم أي حاجة في اي حاجة ولا عارف ايه علاقة دراسته بسوق العمل طب بلاش دي لو عايز يقدم ماجيستير في جامعات تانيه يعمل ايه او عايز يعمل اي حاجة يعمل ايه

انا عايزة افهم بجد احنا اتعلمنا ؟ هو التعليم ده اسمه تعليم ؟ انا مش زعلانة على الكلية ولا كان نفسي اكمل دراسة فيها لأني كنت هاخد الماجيستير وبرضه امشي في الضباب والله مكنتش هتفرق وكنت هضيع كمان كذا سنة في حياتي من غير اي فايدة
انا اخترت الأختيار الصح حتى لو كان الأصعب وحتى لو كل الناس فضلوا يلوموني انا مش فاهمه ليه الناس بقو محبطين اوي كده ليه كل السلبيه دي ليه لما تلاقي نفسك فرحان ومتفائل يقولولك الدنيا سودا والحياة منيله مش كفاية اتعلمنا او اتعلمت تعليم جامعي مينفعش ببصلة كمان زعلانين اني ضيعت الفرصة علشان اكمل في الدايرة المفرغة
انا اسفة هطلع من الدايرة المفرغة ولو رجعتلها مش هرجع طالبة

فضفضة لابد منها

الحقيقة معرفناش نقول ايه اصل انتي كلامك كله شخصي :) ومش بنعرف نرد ونقول ايه
يا اعزائي لا تقلقوا اطلاقا مش مطلوب منكم انكم تقولوا اي حاجة بس المطلوب منكم بجد بعد ال10 دقائق او اقل او اكتر اللي هتاخدوا فيها من وقتكم وتقرأوا كلامي تطلعوا بحاجة من كلامي سواء الحاجة دي قيمة او فكرة او حتى احساس ولو ده محصلش يبقى لازم فورا متقرأوش أي حاجة مش مفيدة لأن الوقت أغلى من الذهب ولو راح منقدرش نرجعه تاني.
وبالنسبة لطريقة كتابتي فمش أنا اللي مخترعاها في مدارس في الأدب اسمهم المدرسة الرومانسية ومدرسة شعراء المهجر ومدرسة أبوللو وغيرهم كتاباتهم ذاتية وكل اللي بيكتبوا بتبقى كتاباتهم فيها بعض الذاتية بس الفرق انهم مبيتكلموش عن نفسهم بشكل مباشر.

النهاردة جربت امشي من غير كعب ومع ان الكعب اللي بلبسه مش مؤذي ويعتبر زي الشوز العادي بس عالي شوية الا ان وأنا لابسة الشوز العادي كنت حاسة ان عندي فلات فوت زي بالضبط لما الغني بيبقى في مستوى عالي وبعدين بينزل فبيبقى مش قادر يتأقلم أما الفقير فمعندوش اللي يخسره وفي العصر المبارك اللي احنا فيه كلنا فقراء الى الله .

الحساسية زادت عليا النهاردة في الهايبر معقول كل الكمية دي من البشر حاطين برفيوم قوي وفي وسط الخليط المعقد ده من الروائح بيعلن مناخيري احتجاجه التام وبيقفل بيعاقبني - الدكتور قاللي ابعد عن الملوثات - هو البرفيوم والتكييف ملوثاااااااااااات !


الهايبر النهاردة كان زحمة اوي علشان خلاص بعد بكرة المدارس ومليان أطفال بيختاروا شنطهم وزمزمياتهم وأقلامهم وكشكولاتهم ولحد السنة اللي فاتت انا كنت زيهم - سبحان مغير الأحوال- وسمعت طفل بيجادل مامته في الشنطة اللي هتشتريها ليه وبيقولها هو انتي اللي هتروحي بيها المدرسة ولا أنا فكرني بالذي مضى واختياري لشنطة المدرسة بالذات أي نعم أنا مكنتش اجرؤ ارد على مامتي كده بس كنا غالبا بنوصل لحل يرضي جميع الأطراف واحساس غريب تملكني النهاردة في وسط الأدوات المدرسية معرفش ده اسميه احساس تعود ولا فراق ولا حنين ولا ايه انا بجد مش عارفه
اندمجت في وسط الكتب اللي في الهايبر وكان في كتابين ناوية اجيبهم من اخر مرة رحت فيها الهايبر وفي هوجة الكتب الجديدة ملقيتش الكتابين وحسيت بزعل على الكتابين وبعدين سبت ركن الكتب ورجعتله تاني على امل اني الاقي الكتابين اللي بدور عليهم وفعلا لقيت واحد
برتكولات صهيون والتلمود وفرحت اوي اني لقيت الكتاب من كام سنة كنت في مسابقة في اللغة العربية وبعدين موجهين اللغة العربية اتكلموا عن التلمود كان عمري وقتها بالكتير 14 سنة واول ما رحت معرض الكتاب اللي كان في راس البر لقيت الكتاب وجبته بس محدش وافق اني اشتريه لأني كنت صغيره والمعلومات اكبر مني !!!!!!!!! اما دلوقتي فأكيد أقدر اقرأ أي حاجة
الكتاب التاني بابا فاجئني بيه انه موجود قاموس اكسفورد انجليزي انجليزي عربي فرحت بيه اكتر ما فرحت بأي كتاب وبالرغم ان القواميس الالكترونية استخدامها اسهل من القواميس العادية لكن انا بحب قاموس اكسفورد

زميلاتي في الكلية هيتقابلوا الأحد الجاي علشان يستلموا مستخرج من الشهادة وأنا طبعا مش هكون معاهم والنهاردة اتكلمنا كونفرانس
وقالولي هتنزلي مصر امتى ! السؤال ده بيجنني فردت زميلة من زميلاتي يا بنتي دي بتحب الغربة ! قولتلها الغربة غربة النفس مش المكان وبعدين مشكلة اللي بيسافروا انهم اغراب جوه وبره بلدهم فالغربة مش حاجة جديدة عليا
طيب هما عرفوا منين اني بحب الغربة ! عاشوا معايا ولا شافوا حياتي ولا هو اي حد سافر بره البلد يبقى بيمشي على دهب والدنيا بتمطر عليه ألماس ومرتاح وكأنه في الجنة طالما بره بلده :(