الأحد، 17 أكتوبر 2010

الشاب السيس وأساليب ابليس



لغاية وقت قريب كنت فاكرة ان شاب سيس يعني مش متحمل المسؤلية أو بيدي على بنت شوية وطبعا لا بيحصلوا رجالة ولا بنات بيبقوا حاجة كده ملهاش معنى المهم بدأت اقرأ للكاتبة مروة رخا كتاب اسمه الدنيا خيارة وبتنشره على حلقات نشر الكتروني علشان معترضة على ظلم دور النشر كلهم المهم في الحلقة الأولى كانت بتتكلم عن الشاب السيس ومن صفاته اللي قالتها : -كلام مروة رخا باللون الأحمر وكلامي باللون البنفسجي


"
ماشى – أو قاعد - مع مراته و بيبصبص لكل ما هو مؤنث و فاكرها خفة دم و روشنة."

وأنا بتجيلي حالة من الغثيان لما أشوف واحد بالشكل ده متجوز ومراته زي القمر وعينيه هتطلع ع اللي رايحه واللي جايه أو حتى يكون بيتكلم في التليفون مع مراته أو خطيبته وتلاقيه بيبص لواحده تانيه خالص وبيعاكسها !

ملقح على النت ليل نهار و مشغل اسطوانة الزوج المظلوم:
"أصل أنا اتجوزت و أنا صغير ... أصل أبويا كان نفسه يفرح بيا ... أصلى ما كنتش فاهم الدنيا صح و لا عارف احتياجاتى إيه ... أصل مراتى مش فاهمانى ... أصلى رومانسى ... أصلى محتاج للحب و الاهتمام ... أصل مراتى جسمها اتبهدل و اهملت نفسها ... يا ريتنى قابلتك من زمان ... أنتى اللى أنا بـ أدور عليها ... أنا بـ أحب أتكلم معاكى ... أنا عمر ما كان ليا فـ الشات و الكلام دا غير لما عرفتك ... ربنا قال مثنى و ثلاث و رباع ... و الله أعلم النصيب فين"
وأضيف عليهم كمان أصل أهلي غصبوني ع العروسة ، أصل جوازنا كان تقليدي ، انتي الوحيدة اللي بتحس بيا ، انتي البطيخة اللي بترطب على قلبي في الصيف ..... الخ وطبيعي ان كل ده يترد له في اهل وبيته وأولاده لأن داين تدان وربنا يمهل ولا يهمل


قالع الدبلة و عامل فيها جيمس بوند أو لابس الدبلة و بيقول عليها صراحة: "أنا مش باضحك على حد ... و بعدين أنا راجل" في الحالة الأولى فكرني بتامر في عمر وسلمى 2 بيقول لسلمى مراته أنا خنتك حوالي 5 ، 6 مرات بس واللي زي ده عمره ما بيتعدل وهيفضل يخونها طول عمره ويغنيلها انا خونتك امبارح ! أما التاني فهو أهون شوية من الأولاني على الأقل مبيكدبش ويعيش دور مش دوره وده ميمنعش انه خاين برضه

بيتحرش بالسكرتيرة و الموظفات فى الشغل ... يا تلاغيه يا هيقطع عيشها . ومش بس كده ممكن حتى يكون مدرس او دكتور جامعة او طبيب ويبقى سيس ومتحرش

واللي فات ده كان كلام مروة رخا وتعليقي عليه أزود انا بقى شوية صفات للشباب السيس

بيحاول يتقرب من البنت ويشوف اهتمامتها ايه ويناقشها فيها ويوصل لها ان هو فتى الأحلام الأول وده المتحرش المثقف

في كمان الشاب السيس اللي مالوش غير في البنات المحترمة يعمل رهان مع اصحابه انه هيوقعها في دباديبو دباديبو واول لما يلاقي انه حسرة عليها يا حسرة عليها ما جت رجليها ما جت رجليها تاخد اسوأ مقلب ممكن تعيشه في حياتها

في كمان الشباب السيس اللي عندهم عربيات وبيستقصدوا أي بنت ماشية بعربية عالطريق بيزنقوا عليها وبيغلسوا عليها والحكاية دي حصلت معايا كتيييييييير جدا وكذا مرة كنت هعمل حادثة بسبب الغباء ده لكن ربنا ستر والحمد لله لكن في بنات بيعملوا حوادث وبيتبهدلوا وممكن توصل للموت بسبب ان واحد كان بيغلس عليها بعربيته على اساس انهم في لعبة اتاري او لعبه عالكمبيوتر ولو العربية اتقلبت بيها او نزلت في النيل مش هتموت ولا حاجه هتطلع صاحية زي الكارتون وهقولكم قصة حصل فيها كده فعلا لبنت مرة كنت رايحة أشتري ميك اب من هايبر وبعدين لقيت البنت اللي واقفة هناك وشها لونه متغير –شبه اللمونة- وعنيها محمرة وحالتها كرب طبعا مكنش ينفع مسألهاش مالك وأخفف عنها وحكتلي انها وهي جاية الصبح الشغل عربية شباب زنقت عليهم وصاحبتها هي اللي كانت سايقه وفجأه العربية هجمت عليهم فالبنت بتفادي العربية فلبست في شجرة والعربية اتقلبت بيهم هي قعدت في المستشفى عملولها الاسعافات الأولية وركبولها محاليل وصاحبتها دخلت العناية المركزة من كتر الاصابات اللي فيها !

المواطن الاساسية للشاب السيس بتلاقيه في الجامعة والنادي وفي الرحلات خصوصا لو قعد جنب بنوتة حلوة في الطيارة وفي الهايبر وبيكتروا أوي جدااااااا عالنت لأنهم بيرسموا صورة تانيه تماما عنهم وبيلاقوا الهبلة اللي بتصدقهم ! كنت زمان مؤمنة ان الدنيا نقية ولطيفة والصدق بيرفرف عليها وممكن اتنين يحبوا بعض من النت لكن اتضح لي اخيرا ان في مرضى نفسيين كتير بيستخدموا النت علشان يعيشوا حاجات مقدروش يحققوها في حياتهم الواقعية

في الشاب السيس اللي يزرع الأرض ورد للبنت ويفهمها انه ملاك وناقصله جناحين ويقولها عادي مظهرك ميفرقش معايا وانا بحترم المرأه ودراستك لازم تكمليها وأنا بشجعك طبعا أو أسلوبك في التدوين خطير ده انتي ولا طه حسين العرب وشكسبير عصرك وأوانك وفأجه بعد الخطوبة وكتب الكتاب تيجي البونيه تبص تلاقي عكس كل اللي كان بيتقال لها حصل البيه عايزها لو مكانتش محجبة تتحجب ولو محجبة تتنقب وبيحجر على أحلامها قبل ما تشوف النور ويحبطها ويقولها هتعملي ايه بشهادتك يعني ومدونتك دي يا انا يا هي انتي عايزاهم يقولوا على مراتي مدونة وبتكتب وعندها رأي وبتتناقش وفجأه تلاقي نفسها لبست في الحيطة وتبدأ تتنازل لأنها حبت المحروس بسلامته وبقى اسمها على اسمه

وفي بقى السيس اللي يستعطف البنت لغاية لما يصعب عليها ويدخل لها من حتة حبيبته ماتت او سابته او ظروفه صعبه وهو شاب مكافح أو أهله مضطهدينه أو ظروفه كويسه جدا بس يا حرام مش لاقي اللي تحبه لشخصه مش لمكانته او لفلوسه كل ده طبعا مبيبقاش حقيقي

ده ميمنعش ان في شباب كويسين وزي الفل بس انا لغاية دلوقتي مشوفتش ولا واحد منهم ! وبدأت أصدق فعلا أن الرجولة الحقيقية نادرة أوي – هبقى متفائلة وأقول نادرة مش هقول انقرضت :)

But you're just a boy
You don't understand
And you don't understand, oh
How it feels to love a girl
Someday you wish you were a better man

You don't listen to her
You don't care how it hurts
Until you lose the one you wanted
'Cause you're taking her for granted
And everything you had got destroyed
But you're just a boy

If I were a boy by Beyonce

هناك 14 تعليقًا:

Ahmed Mustafa - zema يقول...

قليلا ما استفز للتعليق على موضوع

لكن هذا الكلام استفزني فعلا للتعليق عليه

قطعا معك كل الحق فيما تقولين
لكن انظري سيدتي لبنات جيلك
انظري لمن تصادق كل شاب بدعوى الاخوة و الصداقة و الحرية
انظري لمن تبيع مشاعرها و من الممكن جسدها فقط لرغبة مكبوته داخلها

و لا تقولين انه نادر جدا
فمثلما تجدين الرجل الحقيقي نادرا
اجد المرأة المصرية نادرة جدا

و المرأة المصرية هي من تحترم وجود الرجل في حياتها
هي من تقدرة و تحترم كونه شرقيا عربيا يعي تماما مفاهيم العرف و الدين بلا تتطرف

يندر ان تجدي مرأة مناسبة و رجل مناسب في ظل مجتمع يحاوط به التدني الثقافي من كل جانب

فلا تظلمي الرجل على حساب المرأة
فكلاهما يلام على ما حدث في هذا المجتمع

اعذريني ان اطلت التعليق
و اعذريني على شدة الحديث

طاب سردك سيدتي
و تقبلي مروري

Tears يقول...

ربنا قادر يعقل كل واحد و يهديه

الشاباب بيقلد بعضه للاسف

mrmr يقول...

تعرفى انا مكنتش اعرف يعنى ايه سيس
لكن عرفت
وده حال شباب كتيررررر قوى فى بلدنا
من بدايه سن الاعدادى الى الجامعه
اصل الدنيا اتقلب حالها

تصبحى على خير

VOltaa يقول...

كترو اوى الشباب من النوعية دى
بيسببولى حموضة والله

ربنا يبعدكم عنهم


:)

أميرة علي كوكب مهجور يقول...

في انواع كمان اكتر من كده بكتيرررررررر الشباب السيس منتشر في كل مكان صحرا ان كان او بستان

ما احنا قولنا يا جماعه حبه راحوا في الحرب و الباقي في العباره والشويه اللي فضلوا راحوا في حادثه المقطم

عليه العوض ومنه العوض :))

محمد ناصر الدين الهلالى يقول...

إحم إحم ..

حلو الموضوع ده يافندم وإن كنت أظن أننى المقصود به لما فيه من تجريح للجنس اللى أعتقد - مجرد إعتقاد يعنى !! - انى بانتمى اليه وأمثله حتى هذه اللحظة ومش عارف هل بتقصدى حد معين مريتى بتجربة معاه للدرجة اللى توصلك لهذا الحد من الغضب اللى ربما أكون حسيته فى كلامك لدرجة وصفك للشباب على النت " بالسيس " ؟!والرجولة نادرة ؟ طب ممكن سؤال أخوى ؟ هى الأنوثة هى اللى حاضرة ؟
صحيح فى نماذج سيئة جدا من الشباب لكن فى نماذج أكيد مشرفة ولاننا مش هانختلف فأنا لازلت من مؤيدى الأولد سكول اللى بتقول إن " الراجل .. راجل" حتى ولو بديل حصان و " الست .. ست " حتى ولو عزقت بالفاس فى الغيطان !! أما عن التحرشات فربك ستار حليم إذا كان فى المنطقة العربية تحرش فهو فى أوروبا والدول المتقدمة فيرب فاضح فى الإستريت العام والعياذو بالله والبنات هناك تُدفع لهذا دفعا بسبب ماتنسبيه اليوم لشبابنا العربى المحافظ ، لما اللى بيتنحنح لبنت على الشات نقول عليه سيس ، أمال اللى لامؤاخذة دايس فى كل حاجة فى أمريكا وأوروبا نسميه إيه ده ؟ الحمد لله إننا لم ولن نصل لهذه المراحل المتقدمة من الإنحلال الأخلاقى . عجبنى الموضوع فحبيت أشارك برأيى لانه من الموضوعات اللى شغلانى فعلا .. تحياتى لقلمك الشكسبيرى وافكارك الطه حسينية :)

محمد ناصر الدين الهلالى

Lyssandra يقول...

حلو البوست أوي :) تسلم الأيادي يا ليدي

كل ده بيحصل وألعن من كده

Lyssa

يوميات شحات يقول...

شكرا على البوست

MaNoO يقول...

دى فعلا بعض صفات الشاب السيس وماخفى كان اعظم ومعاكى ان الرجوله بقت نادره جدا جدا طبعا دى فى الاول مشكله الشباب نفسهم بس برده معاها مشكله مجتمع وانحدار اخلاقى واسلوب حياه مش بتاعنا وبنحاول نتعايش فيه عشان كدا كله بيطلع عكس ثقافتناوتربيتناالسيس كتير وكتروا فعلا ولكن برده المحتمرين موجودين حتى لو قلوا فى زمنا دا يكفى انهم موجودين مش عجز ولا حاجه بس ربما القليل منهم دا هو اللى ينشر الثقافه المحترمه بين الناس
بوست حلو فعلا تحياتى دائما

Ramy يقول...

يا نهار ابيض

و لا اسود بقى

دا انتى شردتينا تماما (:

ليه كدة بس

بس صدقينى مش الكل

الأغنية جامدة جدا

و السر كان اكبر من انه يكشفوا دلوقت (:

هههههههههههه

الكلام الأنجليش واقعى جدا

م. حجاز يقول...

أنا أول مره أدخل المدونة
الموضوع جميل جدا ونقدك تمام لكن انتى بتتكلمى عن الشباب السيس
ومش كل الشباب سيس ولا حاجه ولا نادرين ولا حاجه فى ناس محترمه كتير ومش معنى اى حد بيعاكس بقى سيس ما هو اصل المعاكسة دى من زمان اوى
بس الاشكال اللى انتى قولتى عليهم اشكال مش طبيعيه وسيس ولاد سيس
بس فى بنات سيس اكتر من اللى الولاد نفسهم وهما اللى خلوهم يعملوا كده
وانا والله اعرف واحد صحبى بيقولى انه بيحب اربعه فى وقت واحد والاربعه عارفين كده وعارفين ومتأكدين قبل منه انهم بيقضوا وقت

ربنا يرحمنا
مدونتك جميلة وتسلم ايديكى على طرح الموضوع

iـــــــــــsــــــــــlــــــــــــaـــــــــm يقول...

متفق معاكى تماما

بس مختلف فى ان الرجوله بقت نادره او انقرضت

كل حاجه كويسه موجوده زى زمان بس الوحش اكتر وللاسف بيكتر عشان كده مبنشوفش الكويس

انا سعيد ان انا اول تعليق

وخليكى حياديه واتكلمى كمان على الانفلات الرهيب فى اخلاق البنات
مهو الوحش بيكتر هنا وهنا
مش فى شىء واحد بس

تحياتى ليكى

Lady E يقول...

Ahmed Mustafa - zema
Tears
mrmr
VOltaa
أميرة علي كوكب مهجور
محمد ناصر الدين الهلالى
Lyssandra
يوميات شحات
MaNoO
Ramy
م. حجاز
iـــــــــــsــــــــــlــــــــــــaـــــــــm

شكرا ليكم

قلم رصاص يقول...

اتفق معاكِ في بخصوص هذا النوع من الشباب السيس اللي بجد شخصيا مكنتش اعرف معناه.

وعجبني التشخيص الدقيق لهذا الكائن الغريب(الشاب السيس) سواء من مروه رخا او منك

خصوصا الوصف دا لأنه جديد:

"بيحاول يتقرب من البنت ويشوف اهتمامتها ايه ويناقشها فيها ويوصل لها ان هو فتى الأحلام الأول وده المتحرش المثقف "

حلوه المتحرش المثقف دي !!!

واتغاظت جدا من الشباب المتهور على الطرق السريعه واللي حياة غيره عادي بالنسبه مش فارقه..أعوذ بالله من دي ناس.

لكن اسمحيلي اختلف معاكِ في نقطه رغم اتفاقي في الجزء اللي فوق

دايما التأثير الأكبر في حياة الانسان وانطباعاته عن الحياه وعن الاخرين بيكون مصدره المحيط بتاعه والناس اللي اتعامل معاها وشافها بس ودي الحقيقه المجرده.

بمفهوم المخالفه للكلام دا ، اقدر اقول ان جهل الانسان بمحيط الاخرين وظروفهم والناس اللي لم يتعامل معاها ، لايعطيه القدر الكافي للحكم عليهم حتى وان كانت لديه انطباعات راسخه عن نفس الجنس دا اللي اتعامل معاهم في محيطه هو.

عاوز اقول باختصار، دعينا من التعميم لأنه فيه ظلم بين وخلط للأمور
الحقيقه دايما نسبيه وليست مطلقه فنحن لاندرك كل الأشياء في حياتنا

هل الحياه في امريكا زيها في مصر؟
هل عادات البوذي وتقاليده كعادات المسلم او المسيحي؟

انا ضد فكرة التعميم ، بتحسسني بالقهر النفسي والظلم

هل تنكرين وجود بنات على نفس نمط الشاب السيس هذا؟

وهل معنى ذلك انني كرجل لدي فكره سيئه عن كل البنات لمجرد أن بعضهن سيئ الأخلاق؟

انا مقدر حقك في الثوره على هذه الأشكال عند الرجل .. ولكن لاتسلبينا نفس الحق في الثوره على نفس النوعيه من البنات وهن للأسف كثر أيضا

وأحييكِ بأمانه على طرح الموضوع
لأنه مهم جدا من اجل تسليط الضوء على أمراض المجتمع سواء كانت في المحيط الأدمي أو الحوائي

تقبلي مروري وتقديري