الثلاثاء، 28 سبتمبر 2010

مش كل بني أدم انسان 1


" وانا ويايا بعيش زي المليونيرات وأحلم وانا معييش ملعنش الأزمات " ده كوبليه من أغنية لمدحت صالح وشريف منير كانت بتيجي زمااااان أيام طفولتي والأغنية دي بشكل أو بأخر غرست فينا كجيل ان الفلوس فائدتها الأساسية علشان تجيب اللي صاحبها محتاجه علشان تعيشه في مستوى كويس وعلشان هو اللي يتحكم فيها مش هي اللي تتحكم فيه .

على مدار دراستي كانت مُدرسات الإنجليش مثل يحتذى بيه في كل حاجة في اللبس ومعاملة الطلاب وخفة الدم والثقافة

دائما مدرسات الإنجليش كانوا شيك وحلوين – حتى لو محطوش مكياج- ومرحين حتى انا فاكرة في سنة من سنين ثانوي كنا مسميين مدرسة الإنجليش " باربي " ده طبعا غير البيرفيوم بتاعهم اللي كان بيهفهف ع المدرسة كلها ولا لما تدخل على أوضة مدرسين الإنجليش يا سلام تلاقي بقى صور للطبيعة وصور أطفال متعلقه في الأوضة وكتب تشارلز دكنز وشكسبير وارنست همنجواي وغيرهم موجودة في مكتبة صغيرة في الأوضة

ده غير معطر الجو برائحة الورد أو التوت والفراولة اللي بيستقبلك أول لما تفتح باب اوضة المدرسات ويا سلام لو رحت أوضة مدرسات الإنجليش ساعة الفسحة وتشوف مدرسات الإنجليش كل واحدة جايبة كرواسونايه ومعاها مج نيسكافيه أو حتة بيتزا وعصير فريش حاجة كده تحسسك انك في فرنسا من فرط الرقة والجمال ويمكن ده من الأسباب اللي خلتني أدرس انجليش ان كان نفسي ابقى من الناس الجميلة اوي دي

درسلي انجليش مدرسات من جنسيات كتيييييييير هنديات على عمانيات على عراقيات على اردنيات على مصريين ومكانتش الصورة الرقيقة دي بتختلف برغم اختلاف جنسياتهم نفس الشياكة يمكن مدرسة وحيدة من مدرسات الإنجليش كلهم اللي كانت مستقوية ومفترية علشان كنت رافضة اخد مجموعة أو درس عندها لأني مكنتش محتاجة دروس اصلا بس هي فضلت ورايا لغاية لما اخدت درس معاها مع باقي الفصل – مرغم اخاك لبطل – بس ده ميمنعش انها كانت شيك شيك يعني الشعر اللي متظبط عند الكوافير واللبس المنسق والشيك والاكسسوار اللي لايق على اللبس حتى في الجامعة الدكاترة والدكتورات كانوا شيك جدا من ناحية اللبس

نقدر نقول عليه زمن الفن الجميل لأن اللبس والظهور بمظهر جميل فن - دي كانت الصورة أيام دراستي اما الصورة دلوقتي -

يتبــــــــــــــع علشان انتوا بتضايقوا من الرغي الكتير :)

هناك 15 تعليقًا:

Lady E يقول...

انا الأول انا الاول هييييييييييه

Tears يقول...

اكيد بتكلمى على مدرسات انجليزى مش فى مصر او على الاقل مش دلوقتى

حاليا لا فيه تسريحات و لا برفانات و لا شياكة و بصراحة بقى شكل الشارع غم

Lady E يقول...

Tears : ايوة يا Tears انا بتكلم على مدرسات الإنجليش لما كنت في المدرسة

اما مدرسات حاليا هتكلم عنهم البوست الجاي ان شاء الله

مصر كانت في وقت من الأوقات باريس وهوليوود الشرق بس دلوقتي الصورة اتغيرت تماماً

نورتيني

عمرو يسرى يقول...

طب ليه بتكبرى نفسك اوى كده وتقولى انه كان على ايامك الموضوع ده انتهى من سنيييييييييييييييييييييييييييييييييييييييييييييييييييييييييييييييين كتيييييييييييييييييييييير اوى

nody يقول...

فعلا مدرسات الانجلش كان ليهم مذاق خاص

انا فاكره مدرسه تربيه عملى عندى فى الاعدادى كانت رائعه الجمال والشياكه

وماتعزيناش فى حالنا بقى علشان انا مدرسه عربى

ويارب تكونى لسه فكرانى

momken يقول...

انا مستنى الباقى

بس علا عندك حق فى فعلا ناس كدده ربنا خلقهم منهتى الجمال

وبيضفوا على حياتنا بعض الانسانيه الجميله

دمتى فى منتهى الاخلاص لهن

استمتع جدا باطراف حروفك

تحياتى

sony2000 يقول...

لااااااااااااا كلمي
مستنظرا:)

أميرة علي كوكب مهجور يقول...

الكلام ده فين ؟
حدنا في البلد ؟ :))
بس سيبك انتي اللوك جديد عاجبني جدا و الالوان :D

حنين الذكريات يقول...

السلام عليكم
طبعا لو كل معلمة عرفت انها قدوه للتلاميذ كانوا بقوا كلهم زي معلماتك من شياكه فى المظهر الخارجى والداخلى لو يعرفوا كان بقى حالهم أفضل بكتير
هما السبب فى التخلف اللى فيه البشر
التدريس موهبه قبل مايكون ثقافه ربنا يلطف بالتلاميذ وطلاب الجامعات من معلميهم اللى كلهم كلاكيع نفسيه

Lady E يقول...

عمرو يسرى : شكلك مضايق أوي م الموضوع ده ومأثر في نفسويتك

Lady E يقول...

nody : طبعا فكراكي يا قمرايا انتي واختك العسولة وده يوم يتنسي يارب يتكرر

أجدع ناس :) مفيش مانع اننا نبقى زيهم أو عالأقل نحاول

نورتيني

Lady E يقول...

momken : يؤسفني ان باقي الموضوع مش هيكون بالصورة الجميلة دي

متشكرة جدا على الإطراء

دي شهادة أعتز بيها

دمت بخير

Lady E يقول...

sony2000 : وانا هستنظر رد فعلك ع الجزء التاني

Lady E يقول...

أميرة علي كوكب مهجور : هههههههههه تصدقي في جزء منه حدانا في البلد ولما نتقابل ان شاء الله هقولك فين :)

تسلمي علشان انتي بس عيونك حلوين فشايفاه حلو

Lady E يقول...

حنين الذكريات : وعليكم السلام ورحمة الله وبركاته
معقول المعلمات مش فاهمين انهم قدوة !!!! ازاي ده كده يبقو لغوا تفكيرهم هما مش عارفين انهم بيقعدوا مع الأطفال اكتر ما الأطفال بيقعدوا مع اهلهم يعني تأثير المدرسين على الأطفال تأثير مضاعف

اكيد كلامك صحيح يا حبيبتي طول عمري بقول ان المدارس والكليات المصرية بتسبب التخلف العقلي بس مامتي مش مصدقه :)

موافقة جدا على ان التدريس موهبه مش عند أي حد وقدرة على العطاء والحب ربنا بيمنحها ل اللي يستحقها

اللهم أمين

نورتيني وسعيدة جدا بتعليقك يا حبيبتي