الجمعة، 17 سبتمبر، 2010

فضفضة لابد منها



الحقيقة معرفناش نقول ايه اصل انتي كلامك كله شخصي :) ومش بنعرف نرد ونقول ايه
يا اعزائي لا تقلقوا اطلاقا مش مطلوب منكم انكم تقولوا اي حاجة بس المطلوب منكم بجد بعد ال10 دقائق او اقل او اكتر اللي هتاخدوا فيها من وقتكم وتقرأوا كلامي تطلعوا بحاجة من كلامي سواء الحاجة دي قيمة او فكرة او حتى احساس ولو ده محصلش يبقى لازم فورا متقرأوش أي حاجة مش مفيدة لأن الوقت أغلى من الذهب ولو راح منقدرش نرجعه تاني.
وبالنسبة لطريقة كتابتي فمش أنا اللي مخترعاها في مدارس في الأدب اسمهم المدرسة الرومانسية ومدرسة شعراء المهجر ومدرسة أبوللو وغيرهم كتاباتهم ذاتية وكل اللي بيكتبوا بتبقى كتاباتهم فيها بعض الذاتية بس الفرق انهم مبيتكلموش عن نفسهم بشكل مباشر.

النهاردة جربت امشي من غير كعب ومع ان الكعب اللي بلبسه مش مؤذي ويعتبر زي الشوز العادي بس عالي شوية الا ان وأنا لابسة الشوز العادي كنت حاسة ان عندي فلات فوت زي بالضبط لما الغني بيبقى في مستوى عالي وبعدين بينزل فبيبقى مش قادر يتأقلم أما الفقير فمعندوش اللي يخسره وفي العصر المبارك اللي احنا فيه كلنا فقراء الى الله .

الحساسية زادت عليا النهاردة في الهايبر معقول كل الكمية دي من البشر حاطين برفيوم قوي وفي وسط الخليط المعقد ده من الروائح بيعلن مناخيري احتجاجه التام وبيقفل بيعاقبني - الدكتور قاللي ابعد عن الملوثات - هو البرفيوم والتكييف ملوثاااااااااااات !


الهايبر النهاردة كان زحمة اوي علشان خلاص بعد بكرة المدارس ومليان أطفال بيختاروا شنطهم وزمزمياتهم وأقلامهم وكشكولاتهم ولحد السنة اللي فاتت انا كنت زيهم - سبحان مغير الأحوال- وسمعت طفل بيجادل مامته في الشنطة اللي هتشتريها ليه وبيقولها هو انتي اللي هتروحي بيها المدرسة ولا أنا فكرني بالذي مضى واختياري لشنطة المدرسة بالذات أي نعم أنا مكنتش اجرؤ ارد على مامتي كده بس كنا غالبا بنوصل لحل يرضي جميع الأطراف واحساس غريب تملكني النهاردة في وسط الأدوات المدرسية معرفش ده اسميه احساس تعود ولا فراق ولا حنين ولا ايه انا بجد مش عارفه
اندمجت في وسط الكتب اللي في الهايبر وكان في كتابين ناوية اجيبهم من اخر مرة رحت فيها الهايبر وفي هوجة الكتب الجديدة ملقيتش الكتابين وحسيت بزعل على الكتابين وبعدين سبت ركن الكتب ورجعتله تاني على امل اني الاقي الكتابين اللي بدور عليهم وفعلا لقيت واحد
برتكولات صهيون والتلمود وفرحت اوي اني لقيت الكتاب من كام سنة كنت في مسابقة في اللغة العربية وبعدين موجهين اللغة العربية اتكلموا عن التلمود كان عمري وقتها بالكتير 14 سنة واول ما رحت معرض الكتاب اللي كان في راس البر لقيت الكتاب وجبته بس محدش وافق اني اشتريه لأني كنت صغيره والمعلومات اكبر مني !!!!!!!!! اما دلوقتي فأكيد أقدر اقرأ أي حاجة
الكتاب التاني بابا فاجئني بيه انه موجود قاموس اكسفورد انجليزي انجليزي عربي فرحت بيه اكتر ما فرحت بأي كتاب وبالرغم ان القواميس الالكترونية استخدامها اسهل من القواميس العادية لكن انا بحب قاموس اكسفورد

زميلاتي في الكلية هيتقابلوا الأحد الجاي علشان يستلموا مستخرج من الشهادة وأنا طبعا مش هكون معاهم والنهاردة اتكلمنا كونفرانس
وقالولي هتنزلي مصر امتى ! السؤال ده بيجنني فردت زميلة من زميلاتي يا بنتي دي بتحب الغربة ! قولتلها الغربة غربة النفس مش المكان وبعدين مشكلة اللي بيسافروا انهم اغراب جوه وبره بلدهم فالغربة مش حاجة جديدة عليا
طيب هما عرفوا منين اني بحب الغربة ! عاشوا معايا ولا شافوا حياتي ولا هو اي حد سافر بره البلد يبقى بيمشي على دهب والدنيا بتمطر عليه ألماس ومرتاح وكأنه في الجنة طالما بره بلده :(


هناك 17 تعليقًا:

موناليزا يقول...

"واحساس غريب تملكني النهاردة في وسط الأدوات المدرسية معرفش ده اسميه احساس تعود ولا فراق ولا حنين ولا ايه انا بجد مش عارفه "


سميه حنين لأيام جميلة ماعدتش هنرجع تانى

أميرة علي كوكب مهجور يقول...

ليت الشباب يعود يوما فين ايام الزمزميه :((

غير معرف يقول...

مايعرفوش ان الغربه سوده
بالنسبه ليا
ااااااه
كيكى عووووووو

فراشة يقول...

معه انه بوست ميعيطش بس كنت قربت أعيط ... اصلي بتجنن لما أشوف عروض الكشاكيل ولاالاقلام والالوان والشنط ياه

ع فكره انا مدمنة اقلام وكشاكيل :)

انا مش بعرف أمشي بكعب :(

الف سلامه ياقمر ربنا يشفيكي شفاء لا يغادر سقما

هتنزلي مصر امتى ؟
سؤال غلس جدا ع فكرة مع اني سألتهولك :)) بس خلاص مش هساله تاني
فعلا بيعصبني بس لما حد مثلا بيكلمني كل اسبوع يسألني السؤال دا ... ما انا لو أعرف هقول ع طول ههههههههههه

الغربه آه منها الغربه محدش حاسس بينا والله يا ليدى غير اللي بيتغرب فعلا وبيسافر وفعلا اللي بيرضى بغربه برا عشان وهو جوا برضه متغرب فمبقتش فارقه معاه برا ولا جوا

ها نقول ايه دنيا
وحشتيني قوووووي جدا خالص (بوسه)

حَـبآيـۃْ.بـטּـدۉڷ يقول...

يـآآآآآه ده الواحد على كده يحمد ربنا عالمخروبه اللي بنروحها دي :D

حنين ايه بس ؟ ده انا هطلع م الثانويه بس وعمري عمري ما هحنلها ابداً .. دي عذاب وتعب والله .. :(

بالنوسبه للغربه .. محدش بيحس بيكي غيرك إنتي .. فعلاً احنا لما كنا بره بردو كان كل اللي ف مصر مفكرين اننا عايشين ميت فل وعشره ..

اينعم العيشه مريحه ومطمأنه .. لكن مش كل متغرب مستريح ومش كل اللي قاعد ف البلد مستريح برضه !!

محدش عاجبه حاله وحالة غيره اللي بتحلاله فعلاً !! :(

FAW يقول...

أنا بحب قوي أتفرج علي محلات الأدوات المدرسية . . ببقي نفسي أشتري أقلام و كشاكيل و أساتيك و برايات , أكتر حاجه كنت بحبها في الدراسة
يا سلااااام , ولا ريحة الكتب الخارجية الجديدة , ريحتها بس إنما الكلام اللي فيها يع !!
طب والله أيام حلوة D:

قلم رصاص يقول...

دي يمكن المره السابعه مش عارف ليه كل ما ادخل مدونتك ،الفايرفوكس يهنج ويقفل مع انه قوي جدا ومبيعملهاش مع اي سايت .. الاااااااا مع مدونتك بس
!

حاجة غريبه فعلا .. جربته كام مره مفيش فايده .. وفاتت ايام وايام وكل فتره الاقيكي منزله بوست جديد.. وادخل الاقي زي مايكون حد بيطردني والمتصفح يقفل ههههههههههههه

قلت يمكن صاحبة المدونه اللي مش عاوزاني اقرأ موضوعاتها ..^_^

طلعتي مظلومه لأني لجأت لعدوي اللدود عشان ادخل مدونتك الا وهو الانترنت اكسبلورر .. ورغم اننا اعدا(أنا والاكسبلورر) إلا انه واجب علي شكره فقد اخرجني من المأزق !

كل سنه وانتي طيبه
وعيد سعيد طبعا متأخره بسبب الكلام اللي فوق دا ^_^

نرجع للبوست الاخير

مش عيب اننا نميل للذاتيه في الكتابه فهي كما قلتي احدى المدارس المعروفه في الكتابه وحتى ولو لم تكن مدرسه فانا شايف انها مش عيب طالما الكاتب ملتزم القواعد العامه .. ومش عيب ان الواحد يعبر عن نفسه بطريقته .. ماهو اصل الموضوع مش زي صالون الحلاقه(سوري يعني) احلق للزبون على مزاجه عشان اضمن يجيني تاني .. لاء الموضوع مختلف ودي ازواق وانا مش مفروض اكتب عشان حد معين انا مفروض بعبر عن نفسي وباكتب للجميع !

فاظن مفيش قلق من الناحيه دي ودا رأيي المتواضع .

الحنين لفترة الدراسه خصوصا الجامعيه حتى لوالانسان مكانش شايف نفسه فيها ، بيكون جميل اوي .. ولكن هي دي سنة الحياه .. مراحل وبنعيشها!

زمان وانا طفل كنت لما ابص لواحد عنده 20 سنه اقول لنفسي : ياااااااه دا كبيييييير وعجوز اوي .. سبحان الله النهاردة الواحد بيقابل ناس فوق التلاتين بيحسهم لسه عيال لتفكيرهم وتصرفاتهم!


سؤال على الهامش:

هو ايه الهايبر دا ؟

(وش مكسوف من الجهل بالأشياء)

كل سنه وانتي طيبه مره تانيه
وترجعي مصر بالسلامه

ميرام يقول...

ههههههه
تصدقي انا عندي نفس مشكلة الكعب والفلات ...(:

وحشتيني ياليدي
تحيتي

Lady E يقول...

موناليزا : يا ساتر يارب ليه كده يا موناليزا لازم نكون متفائلين
أجمل الأيام لم تأتي بعد
أيام ما كنا في الدراسة كنا متبهدلين مش أيام جميلة ولا حاجة
هو بس جو الأدوات المدرسية بيعجبني

Lady E يقول...

أميرة على كوكب مهجور : خلينا دلوقتي نمشي في الشارع بزمزمية وشوفي الناس هيقولوا علينا ايه :)

Lady E يقول...

كيكي حبيبتي : أغلس حاجة في الغربة اني مش عارفة ارغي معاكي براحتي وأصعب حاجة في الغربة اني مفتقداكي بغباء

Lady E يقول...

فراشة : لا يا فراشتي تعيطي ايه بس مش معايا مناديل :) وأنا مدمنة كتب :)
ايوة في أنواع من الكعب مبينفعش أساسا نلبسها لكن في أنواع كويسة وبنت حلال

اللهم أمين يا فراشة بس خلاص الحساسية ملهاش علاج الا الصبر عليها والحمد لله

ههههههههه ولا يهمك السؤال بيضايق لما يتسأل كتير على فكرة مضايقنيش لما سألتيهولي

محدش هيحس بالغربة الا اللي جربها مهما اتكلمنا مش هيحسوا

اموااااة

Lady E يقول...

بندولاية : ههههههههههه بالنسبة ليكي يا قمرايا لازمن ولابندق تحمدي ربنا على الثانوية العامية مينفعش غير كده لكن انا لو قالولي ارجعي سنة رابعة كلية مش ثانوي كمان تاني هرفض وبشدة :)

معاكي في موضوع الثانوية العامية بس انتي فيها دلوقتي ولازم تستغليها علشان تحققي حلمك
اقهريها ومتسمحيش لها انها تقهرك

لا يحك جلدك غير ظفرك وموضوع العيشة مريحة ومطمئنة في الغربة دي متاخديش الصورة من على الوش

محدش عاجبه حاله ده كوبليه من أغنية صح :) علشان كده اهم حاجة في الدنيا الرضا بالمكتوب مع الطموح للأحسن

Lady E يقول...

FAW : من احلى الحاجات في الدراسة شكل الكتب والكشاكيل واختيار الأقلام والشنطة والمقلمة والفرحة بالكتب الجديدة

ممكن طالما بيبقى نفسك تشتري أدوات مدرسية تشتريها وتديها لطفل لسه في المدرسة أكيد هيفرح بأي حاجة بسيطة حتى لو قلم رصاص شكله حلو
وتبقى اشتريت اللي نفسك فيه وفي نفس الوقت فرحت طفل

الكتب الخارجية أحلى من الكتب العادية بس بالنسبة للكلام اللي فيها :) فأكيد يع لأنه تعذيب مش تعليم

Lady E يقول...

قلم رصاص :يبقى المشكلة في الفايرفوكس مش في المدونة أكيد :)

أهم حاجة ان حضرتك علقت أخيرا في المدونة بعد غياب

يا بخت من بات مظلوم ومبتش ظالم :)

وانت طيب وبخير وصحة وسعادة

في كذا طريق في الأدب منهم انك تكتب اللي على مزاجك ومنهم انك تكتب على مزاج الناس وممكن تجمع بين الاتنين

كان عندي نفس النظرة وانا طفلة مكنتش متخيلة اني ممكن اوصل للعشرينات لكن موضوع النضوج مش بالعمر ممكن تلاقي طفل بيفهم او حد وصل للخمسينات او الستينات ولسه موصلش للنضوج الفكري والنفسي

اجابة ع الهامش

الهايبر كلمة بالانجليش بقت مستخدمة في العربي معناها
سوبر ماركت كبير جدا عادة بيكون خارج المدينة زي كارفور أو هايبر ون أو مترو
وده تعريف الكلمة في القاموس
hypermarket : a very large supermarket that is usually outside a town

مفيش داعي للكسوف اطلاقا لأن كل انسان عالم بأمور وامور لأ يعني انا معنديش معرفة بالقانون زيك وكمان مش عارفة موضوع الربح من النت اللي في مدونتك وأكيد هسألك فيه

شكرا

Lady E يقول...

ميرام : عاش مين شافك يا ميرام

وانتي كمان وحشتيني اوي

ويلكم باك

قلم رصاص يقول...

لاء بقى وش مكسوف من الجهل الناتج عن عدم تنشيط الذاكره بما لذ وطاب..^_^

أصل سبب دا ان العبد لله من المحسوبين بشدة على محبي الانكليزيه(دا مجرد تأكيد بس اني بحبها) ، وخصوصا اللكنه الامريكيه .. واعتقد ان مصطلح الهايبر دا موطنه الاساسي امريكا .. !

بس انا اهتمامي بالغه بيتركز في اكبر جانب منه بحكم تخصصي القانوني والاقتصادي الى جانب السياسه على الاصطلاحات المتخصصه في المجالات دي أكتر..

اه طبعا مفيش شك ، الانسان عدو مايجهل والحمدلله على نعمة التطلع .
___________
ايوا فعلا العيب طلع في نسخة الفايرفوكس اللي كنت مشغلها وقتها Version 3.6.9 اتضح ان فيها فعلا مشكله برمجيه عشان كدا شركة موزيلا نزلت تحديث للبرنامج بعدها بكام يوم وبقت الفيرجن 3.6.10 .. ومستقره الى الان الحمدلله ودي ميزه لهذا العملاق انه كل اسبوعين على الاكثر بينزل تحديث ..!

واسف على الاطاله في المسائل التقنيه!!


لكن ان كان لحضرتك اي استفسار في الحاجات دي ، تحت امرك وبكل سرور...

موضوع الربح من الانترنت قديم وانا اعرفه من زمان بس مكنتش واثق من جديته .. لكن دلوقتي نظرتي اختلفت ليه لأنه أصبح واقع مفروض على الحياه الالكترونيه اللي هي بلا جدال أصبحت تشكل جزء كبير جدا من حياتنا.....

فلما جددت عهدي مع الدخول في الموضوع دا وبعد تغير نظرتي واقتناعي بيها .. اصبحت واخدها بشيئ من الجديه لعلها تفتح افاق جديدة للشباب

واسف على الاطاله مره تانيه

تقبلي مروري وتحيتي