الأربعاء، 27 أكتوبر، 2010

حاجة حلوة



اليومين دول بجد نفسي أكتب حاجة حلوة – شوكولاته- :) نفسي أقول خبر حلو سواء عام أو خاص وبحلم كتير اليومين دول اني كاتبه بوست عالمدونة مكون من صورة وسطر واحد بس I am going to London :)دي خامس سنة يبقى نفسي اسافر انجلترا بعد 4 سنين في الكلية درست حاجات كتير عن بريطانيا ومن كتر ما كنت بفكر فيها كنت بحلم اني فعلا زورتها عندي احساس قوي اني هكتب البوست ده قريب مع ان لسه مفيش أي دليل يقول اني ممكن اسافر لندن بس متفائلة انه في خلال 2011 ان شاء الله هزور انجلترا وده حسب قانون الجذب وحسب تفائلوا بالخير تجدوه

قانون الجذب بيقول اننا عاملين زي المغناطيس بنجذب كل حاجة بنفكر فيها بإحساس قوي سواء سلبي او ايجابي

اللي عايز يعرف اكتر عن قانون الجذب يشوف فيلم the secret وعلى فكرة في ناس بيعارضوا قانون الجذب لكن لو فكروا شوية هيلاقوا ان قانون الجذب في أدلة كتير عليه في ديننا

نفسي أشتري digital camera وشوفت امبارح أسعار الكاميرات ومعجبنيش الا أغلى واحدة فيهم :) علشان فيها كل المميزات اللي انا عايزاها وأكتر صورها نقية وعالية جدا وبلوتوث وتصوير عادي وفيديو وtouch screen واللي عرفته لما بحثت عنها عالنت فيها GPS وممكن تدخل على النت منها لو في شبكة Wireless

الدنيا علمتني طالما هشتري حاجة يبقى اجيبها صح حتى لو غالية يا مجيبهاش قلبي بيقولي هاتي الكاميرا وصوري كتير ناس وأماكن يمكن متشوفيهاش تاني وفي نفس الوقت عقلي بيقوللي انا مش محتاجة الكاميرا بشكل مُلح كل الحكاية اني بحب التصوير جدا وممكن أجيب الكاميرا ومصورش بيها كتير! أنا محتارة بشكل كبير جدا ياللي جيبتو كاميرات قبلي وصادفتكم مشاكلي تنصحوني بإيه وايه احسن نوع في الكاميرات؟

حد يصدق؟! مطرش الجرجير تامر يا حوستي أخد جائزة احسن مطرب في افريقيا أحسن ايه ؟!!!!!!!!!! مطرب !!!!!!!!!!! ازاي يعني مطرب منين وهو يعني ايه مطرب اصلا ده لما بيغني لايف بينشز نشاز ملوش أخر ده غير كلمات اغانيه الهايفه زي دماغك خليها تاكلك وأمثلة تانيه كتيرانا ساعات بسمع تامر في فرح مثلا في الشارع او الهايبر لكن مش بسمعه مخصوص يعني الجائزة دي ملهاش غير تفسير واحد أدفع اكتر تكسب اكتر

  • بطلت اشوف برنامج اوبرا وينفري مع انه اخر موسم ليها لأنها مبينة أمريكا زي يوتوبيا ولأنها بتخليني أقارن بيننا وبينهم

صحيح أمريكا فيها مميزات كتير ومرتبطة بالحلم الأمريكي كل ما تشتغل اكتر كل ما تكبر اكتر لكن برضه امريكا فيها عنصرية وتمييز واللي مش مصدق يشوف فيلمين pursuit of happiness وفيلم

My name is khan ولو في فرصة يقرأ في الأدب الأمريكي لغاية لما يقدر يروح امريكا ويشوف الكلام ده صح ولا غلط !

* بطلت كمان اشوف البرامج الحوارية لانها بتسوء سمعة مصر بجد مش أي كلام وبتجيب احباط واكتئاب خصوصا 48 ساعة و90 دقيقة والحياة اليوم

  • هو ليه كتير من مدربين التنمية البشرية بيقلدوا أ- ابراهيم الفقي !

* هي الدنيا ضبابية ومش مفهومة في وطننا العربي ولا أنا اللي شايفة كده بس يعني لو حبيت اعرف الأماكن اللي بتقدم منح دراسية هعرفهم ازاي؟ ولو حبيت أجيب شجرة عيلتي لسابع جد برضه مش هعرف اسأل مين ؟!

طيب هما قفلوا الدستور ليه وقفلوا القنوات الدينية دلوقتي ليه ما نفس القنوات بقالها كام سنة بيعملوا كل اللي بيعملوه في منهم متشددين جدا والاعلانات التجارية المضللة والشات المستفز وشوية معلومات دينية مفيدة طب اشمعنى دلوقتي ؟! وكمان عايزين يقفلوا الفيس واشمعنا الفيس ما في تويتر وبلوجر كمان

الهي اللي يقفل الفيس يقعدله في عينه وف عافيته قادر يا كريم

كل ده يثبت شعار المرحلة _ الشفافية _ *_*


* من شوية كنت بكلم زميلتي في الكلية كانت رايحة شغلها اللي من غير مرتب علشاننا لسه خريجين جداد وكل شغل محتاج خبرة فأي مكان بتقدم ورقك فيه بيقولولك حاجتين هنتصل بيك ولو اتصلوا بيك يبقى العمل بدون أجر شهرين تلاتة – استهبال يعني- فبتقوللي كانت راكبة الميكروباص فواحدة سألتها انتي بتشتغلي ايه قالتلها مترجمة بتقوللي نظرتها ليا وكلامها معايا اتغير واحترمتني اوي وقالتلي انتي راكبة ميكروباص ليه ما تجيبي عربية بدل المرمطة دي وبصتلها على انها بخيلة :) وتقدر تجيب كل يوم عربية :) صحيح الصيت ولا الغنى

جاي على بالي أغنية : احلم معايا ببكرة جاي ولو مجاش احنا نجيبه بنفسنا نفضل نحاول في الطريق كتر الخطاوي تدلنا على حلمنا
يارب حقق احلامنا

هناك 43 تعليقًا:

R-H-S يقول...

انجلترا اللهجه بتاعه الانجليزي بتاعتهم فظيعه بيدوسوا اوي علي الكلمه علشان اجمع بيقولوا ايه الواحد بيحتاج يركز اوي مع اللى بيقولوه ....ان شاء الله تسافري هناك وتحكيلنا عن التجربه
طالما بقي رايحه انجلترا شوفي الحلقه الجميله من برنامج التجربه اللي قدمها احمد العسيلي في لندن
http://www.youtube.com/watch?v=rvaskGV8YzU

http://www.youtube.com/watch?v=wutMwO5_Kcw


اما بالنسبه للكاميرا انا هموت واجيب واحده بس فعلا غاليين اوي والامكانيات اللي قولتيها دي هبلتني اكتر نت وجي بي اس ايه دا دي تجيلها بكام دي؟

اوبرا وينفري دى شدتني اوي مع اني متابعتهاش غير من فتره قريبه فقررت ادور عليها او انكش وراها اشوف ايه الست دي واللي يخلي كل الناس تتكلم عنها اوي كدا في امريكا وهنا كمان
زي مني الشاذلي كدا ههههههههه
كل الناس عارفه تقريبا ان امريكا مش هي المدينه الفاضله خالص دا باين من كل حاجه بتعملها من حروب وسجون و وووو
بس قوه كبيره ف العالم

تحياتي

VOltaa يقول...

قانون الجذب بيقول اننا عاملين زي المغناطيس بنجذب كل حاجة بنفكر فيها بإحساس قوي سواء سلبي او ايجابي

,
طب انا بفكر فى مليون جنيه وعمارة ابنيها وتقدير امتياز فى الكلية وجيتار وسجاير دنهيل بدل العادية اللى بشربها
وبدلة سودا علشان شكلها شيك وكوتش جديد D:

يارب قانون الجذب يشتغل ولو اشتغل هجيبلك الكاميرا واسفرك لندن على حسابى
P:

اللى حصل مع صحبتك بيحصل لكتير
انا اما بقول لحد انا فى تجارة انجليزى اول حاجة يقولهالى .. ياغنى !
امال لو قلتله انى فى ستة اكتوبر مثلا ولا الجامعة الامريكية هيقولى ايه
هههههههه

,
بحب اقرا بوستاتك
لزيزة كده D:

sony2000 يقول...

ربنا يحققلك احلامك ياحببتي
ياااارب
اللهم امين:)
سيبك من تمورا دا حد خنيييييييق
وبحس كتير انو بيمثل
بصي...انا لما بحب اريح نفسي
بسمع فيرووذ
بجد بروح لعالم تاني:)

Ramy يقول...

بوست دسم جدا جدا (:

أولا ربنا ينولك اللى فى بالك و تسافري لندن (:

بس أنت عندك حق فى قانون الجذب دة

انا مجربه شخصياً (:

ثانياً معنديش أى خبرة فى الكاميرات (:

بس انا بقول لو فى الأمكانية لشراء هذه الكاميرا ممكن

بس المشكلة ان كل يومين بتطلع امكانيات جديدة بس الأمكانيات اللى بتقولى عليها دى ممتازة

هتغنيكى عن حاجات كتير و هتسعدك مش بس فى التصوير

اللى احنا المصريين مهملينوا جداً

ثالثاً بالنسبة لجايزة تامر بقى ممكن تكون علشان اكثر مبيعات

طب ما فيلم ولاد البلد الرهيييييب متصدر البوكس اوفيس بتعنا (:

رابعاً متفق معاكى جداً ان أمريكا لديها من العنصرية ما يكفى العالم كله

و لكنه الحلم الأمريكى ):

خامساً البرامج الحوارية هاجم و أشتم أكتر تشتهر أكتر

و سلملى ع الديمقراطية (:

سادساً مش كل الدول العربية دة بس فى مصر

أحنا تايهين خلقة (:

نلاقينا الأول بس

سابعاً الناس ملهاش إلا المظاهر

و بالذات فى مصر المحروسة

ربنا يحقق أحلامك (:


تحياتى

يوميات شحات يقول...

بالتوفيق إن شاء الله

همسات وبحــ الحياه ــر يقول...

اووول تعليق ولا ايييييه

همسات وبحــ الحياه ــر يقول...

احم احم

هههههههههه

البوست جميل اوى
علفكرة طول ماانت عندك حلم وبتعيشى عشانه هتحققيه

تصدقى كنت بفكر فى عقل بالى كدا يعنى ايه قانون الجذب
هتفرج على الفيلم :)

عارفه انا كمان بفكر زيك كدا فى موضع الكاميرا
بموت فى التصوير وبقول عايزة اجيب كاميرا بس فى نفس الوقت بقول ممكن لما اجيبها متصوريش كتير ومش هتستفيدى
بس عندى الحاح جامد وحاطاها فى الخطه :)

بقولك صحيح
هو انت حاطة اغنية احلم معايا ازاى
يعنى انا برضو نفسى احط اغينة كدا حد لما يدخل المدونة يسمعها بس مش عارفه :)
وبعدين تعالى هنا
هو انت مخاصمانى ولا ايه هههه
بقالك فنرة كدا لابتيجى تزورى القصه ولا دموع الفمر كدا :):)
دمتى بكل خير جبيبتى

وجهة نظري يقول...

عن الكاميرا الديجتال أنصحك عن تجربة، أهم حاجة تركزي عليها هي كام بيكسل، أظن دلوقتي حوالي ١٢ بيكسل .... ممكن ١٠ بيكسل تؤدي الغرض كفاية إلا إذا كنت بتتكلمي عن تصوير متقدم لكن تصوير أماكن و مناظر سياحية ١٠ بيكسل كويس أوي. الحاجة التانية الميموري فالكاميرا كام .... مش أقل من ٢ جيجا أبداً. الحاجة التالتة حتنقلي الصور فين وإزاي؟ إذا لابتوب يبقى يو إس بي أو بلوتوث واليو إس بي أسرع دلوقتي، فلو عدم وجود بلوتوث يوفر فالسعر يبقى ملوش لازمة. انما لو محتاجة تنقلي الصور مباشرة ل فليكر مثلاً من الكاميرا يبقى محتاجة الحاجات التانية إلي تخليكي تعملي كونكت. الحاجة الرابعة هي ان العدسة تكون ماركة معروفة، ممكن تدوري اونلاين بس أشهرهم كارل زايس. بصي، فالكاميرا بذات، اشتري كاميرا بجودة الكاميرا، إنت محتاجة تصوري كويس مش محتاجة إمكانيات موبايل.



أما عن مطرش الجرجير زي ما قلتي، فدا المنتج الأساسي لشعب فقد التربية نتيجة حاجات كتيرة مش مكان مناقشتها هنا، ولكن متستغربيش إنه يكون أحسن مطرب في مصر أو أفريقيا، هو الكلام بفلوس؟ أنا كنت بقول لصحابي أهو د المطرب إلي تسمعه وتقول "شفيتم" زي مايكون الواحد خارج من الحمام.

وجهة نظري يقول...

أسف نسيت، البرامج الحوارية مش بتسيء لسمعة مصر، مجتش على دي يعني مافي 100 حاجة بتسيء لسمعة مصر..... إنما البرامج دي قربت تكون بتسيء لسمعة إلي بيتفرج عليها، على أساس انها بتفترض إن كل المشاهدين أغبياء، و إن كلمة توديهم وكلمة تجيبهم. كل الافلام والبرامج والأغاني والإعلانات والجرايد والمجلات (في إيه تاني؟) عندهم نفس الفرض دا، فالواحد يحترم نفسه ويقاطعهم بدل ما يسيء لسمعته.

أميرة علي كوكب مهجور يقول...

انا بقا نفسي اسافر تركيا :))
الكاميرا مش عارفه انصحك بحاجه لاني مش بفهم فيهم اصلا :))
انا مقتنعه جدا بقانون الجذب
الاغنيه دي انا بحبها اوي حمزه ده ليه شويه اغاني متفائلين كده

Tears يقول...

اكتر حاجة عجبتنى حبك للشيكولاته :))

The illusionist يقول...

ينفع اكون انا الاول

The illusionist يقول...

مش انا الاول شكلى بس قرييت كل حاجه كل حاجه كل حاجه

يا ريت تروحى لندن ومانشتر وبولتون كمان

بس لما تزوريها عليكى والصور

لو هتسافرى لندن

يبقى الكاميرا دى لازم تبقى معاكى

والهوايه بصراحه ان متمش تأديتها بالشكل المطلوب والادوات المريحه

يبقى ملهاش لازمه

مش هلعب كوره سله بمضرب يعنى واقول ده المتوفر

وصوباح الخير علينا وعليكى وعليكوم

بنجاواتى يقول...

طيب لو هتروحى انجلترا ربنا معاكى وما تنسيش ان فى ناس هنا بيتمنوا يروحوا هما كمان يعنى لما ربنا يكرمك زى ما "كرم مطاوع" ابقى افتحى باب الهجرة لاحتلال انجلترا من قبل الشعب المصرى حتى تتحول الى مملكة لا ترى الشمس هههههههههههههههههه

طبعا موضوع المنح الدراسية والكلام ده فى بلدنا الحبيبة هى شئ هلامى خيالى غير واضح ويتم فى السكرتة وكانه من الاسرار الحربية

انا شايف انك تجيبى الكاميرا الحمرا دى نوعها كويس ومش بتبهت مع الزمن :D

تحياتى

غير معرف يقول...

ااااااااانتى خلتينى منشكحه جداااااا
بكلامك ده وكذا بوست فات
وصورك واحلامك
بصى انتى كلك كده حته بنبونيه حلوه ليا وخلاص@@@
كيكى عووووووو

فراشة يقول...

انا جيت ولقيت بوست جديد هيييييييييه

يارب لو خير ليكي انك تسافري ل لندن يارب تسافري :)

أما عن الكاميرا انا عندي واحده بقالي 3 سنين مش عايزة اقولك كنت هتجنن واجيبها بجد والمشكله اني مكنتش أعرف فيهم قوي لسه
فجبت واحده باناسونيك (lumix)
7 ميجا هي حلوة بس اللي انتي مختاراها أحلى حسب المواصفات اللي انتي كاتباها بتاعتي اكبر عيب فيها انها الفيديو فيها بدون فلاش ومفيش فيها توقف مؤقت ولا زووم فيديو بعد ما تبداي تسجيل ودون انا شايفاهم حاجات مهمه ومكنتش اعرف ان ممكن كاميرا فيها بلوتوث :)
بس دلوقتي نفسي اجيب واحده من بتوع المحترفين D: اللي ينفع نركز على جزء واحد الباقي يبقى فلو شويه دا

المهم سيبنا من تامر وربنا يهدي الناس ويفوقنا من غفلتنا

وسيبنا من البرامج الحواريه انا مبطلاها من سنتين كدا بكتئب بصراحه

فعلا المترجمين تحسي انهم حاجه كدا ماشاء الله مركز كويس

ربنا يوفقك يا قمري ويخليكي ليا ومبسوطه اني جيت هنا وعلقت كمان :))

MaNoO يقول...

تفاؤل اهه ايوا كدا بقى زهقت من الناس بتاع التشاؤم دى
ان شاء الله روحى لندن وامنتك نظاره واى نوع برفان لانى بحب الحاجات دى
الكاميرات الديجيتال انا جاتلى هديه بصراحه محاولتش فيها بس انصحك تجيبى حاجه غاليه وطبعا تبقى من مكان مضمون
مطرب الجرجير بقى ماخدتش احس مطرب دا اخد مطرب العام واحسن مطرب دى واخدها عمرو بس هو ضجه وكدا لانه اول مره وهو كمان راح استلم الجايزه مع انى والله ولا اعترف بيه فى سوق الشعبى حتى
الناس بتقلد الفقى لانه اول واحد واحنا من عادتنا بنكسل نتميز وبنكسل نتعب شويه
القنوات والحاجات دى بقى هسيبها للناس بصراحه حاسس انى عندى فتره زهق من المشاكل اه وعلى فكره الترجمه دى حاجه كويسه جدا بس هيا عايزه شويه تعب وتعرفى فين المكان اللى يستحقك بس

عايزين بوست منور زى دا كل فتره كدا تقبلى تحياتى

mohamed يقول...

السلام عليكم
بالصدفة شفت المدونة بتاعتك ، وبجد عجبنى أسلوبك وحسيت انك فعلا مطلعة كتير
بس كان ليا تعليق على موضوع قرأته فى وسط كلامك كان عن الفرق بين الدراسة فى كليتك وفى الجامعة الأمريكية....
أنا معاكى ان كلامك مضبوط وبالأخص هنا فى دمياط ( انا من دمياط على فكرة)لانى لاحظت ده مع خطيبتى فى دراستها ، كانت لخبطة وحفظ كتير وتتضيع وقت فى حاجات مش هيستفيدوا منها ومواد بتظهر فجأه فى آخر الترم وكنت بستعجب فعلاَ من أسلوب الدراسة ده والمعاناة اللى هما فيها .... لكن مش معنى كده ان كل كليات مصر كده
انا مثلاَ كنت كلية زراعة وكان فيها كل المميزات اللى انتى اتكلمتى عنها فى الجامعة الامريكية يعنى من أول يوم فيها وكل طالب ليه دكتور مرشد أكاديمى ليه بيقعد معاه ويفهمه نظام الكليه والدراسة ولو مش فاهم أى حاجه أو محتاج مساعده ممكن يرجعله فى أى وقت و الدراسة بنظام الساعات المعتمده والمرشد الأكاديمى هو اللى بيفهمنا النظام ده غير ان الدراسة نفسها كانت ممتعة والدكاترة على مستوى عالى وكانت بتوصل فى بعض الأحيان انهم يجيبوا دكاترة من ألمانيا غير انهم كانوا بحركونا فى البحث والاطلاع ..
ممكن تكون مش الكليات كده بس ده ما يمنعش ان فى كليات كويسه

اسف ان اسلوبى مش منظم لانة كتبت بسرعه وبجد المدونهة بتاعتك تحفة

mrmr يقول...

بوست جميل
ربنا يوفقك وتحققى احلامك طبعا مش كلها
بعض منها لانه ليس كل ما يتمناه المرء يدركه وبعدين ياروحى تتصدمى كده حرام علشان تبقى مهيئه نفسيا لتحقيق بعض من الاحلام

انا مش عجبنى فى الموضوع كله غير الشيكولاته اصلى بمووووووت فيها
ابقى اعملى حسابى فى حته وحياتك
دمتى بخير
وتصبحى على خيررررر

FAW يقول...

لو كلامك صح يبقي أنا هروح فرنسا إن شاء الله . . بس بجد نفسي يبقي نفسي أروح مصر
تامر حسني إستخدم أكتر فكره بتقضي علي فنان وهيشوف نتايجها . . الإنتشار
وفعلا أمريكا صورتها فخيالنا تحفه واللغه محدش مبيحبهاش بس فعلا كلها عنصريه مش بس مع الأديان لأ ومع العرق كمان
بوست جميل
تحياتي . .

قلم رصاص يقول...

البوست دا جميل اوي اوي بجد ريح مزاجي جدا وغير مودي مش عارف ليه

المهم

ان شاء الله اقرأ لك بوست I am going to London قريب جدا

وانا رغم عدم معرفتي بقانون الجذب دا بس يظهر ان القلوب عندها بعضها بيني وبين القانون دا لأني مؤمن بحاجه زي كدا بيني وبين نفسي قبل ما اعرف ان فيه تفسير للحاله دي بيلخصها مايسمى قانون الجذب دا

وان شاء الله هنزل فيلم The secret واشوفه زي الاتنين اللي فاتوا اللي بجد أشكرك على التنويه عليهم في البوست قبل قبل اللي فات

وان شاء الله تجيبي الكاميرا بتاعتك قريب فعلا ياتجيبي صح باتصبري لما تجيبي صح
..منطق ممتاز ..الجوده شعار المرحله تعبنا من الصين وعمايلها فينا

أما المحروس وبسلامته نجم الجير فحدثي ولا حرج انا كرهت الغنا والحمدلله معدتش بشمع اغاني بسببه وبسبب اشكال ضاله اخرى ..بس حابب اشكرهم بردو انهم ساعدوني ابطل بسرعه رغم اني كنت مدمن ناس فنها محترم مقارنه بيهم
..فافعلا يبدو ان الدفع اكتر بيعمل عمايله..ماعلينا

محدش ينكر ان امريكا فيها عنصريه بس مش لوحدها مصر نفسها فيها عنصريه بس العنصريه هنا نسبيه ماهو الاضطهاد الفكري دا شكل من اشكال العنصريه بردو
بس انافاهم قصدك من العنصريه في ثوبها الأساسي القائم على التفرقه بين الأعراق زي البيض والسود ..فعلا الفيلمين دول جسدوا معاني الوضع دا في امريكا بشكل جميل جدا
pursuit of happiness
&
My name is khan

كنتي السبب في اني اشوف الفيلم الأول وهو البحث عن السعاده للرائع ويل سميث
أما الفيلم التاني للنجم الهندي شاروخان فانا كنت شايفه من فتره وفعلا بجد كان خيال ..رغم ان فيه شباب كتير مش بيحبوا السينما الهنديه بس انا واحد من الشباب اللي بعشقها ومش بتأحرج أقول كدا من وانا طفل لحد النهارده..والله بجد بيعملوا دراما رائعه جدا قدرت تحجز لنفسها اسم على الساحه العالميه خلت الفيلم الهندي علامه مميزه في دنيا الفن السابع

مش المصريه...! اللي كانت في الخمسينات كتفا بكتف مع السينما الامريكيه ايام العمالقه فريد شوقي والمليجي وزكي رستم وكل الناس الحلوه دي الله يرحمهم

بخصوص بقى برامج التوك شو وتأثيرها السلبي واشاعة الاحباط بين الناس مقدرش انكر دا بس للأسف هما مش بيجيبوا من عندهم حاجة دا الواقع في أبسط صوره للأسف وهما مجرد مرايه بتعكس الواقع دا بكل بساطه بل احيان كتيره بيساعدوا على حل مشاكل من خلال احراج المسؤلين على الهوا والضغط عليهم وياما شوفنا

وانا ضد جدا قفل اي منبر اعلامي وزعلت جدا على القنوات الدينيه لأن فيهم اللي اتظلم وخطابه معتدل بجد وناس عارفه ربنا

بخصوص المنح الدراسيه هجيب لك موقع متميز عندي في المشاركه الجايه ان شاء الله

تقبلي مروري وتحيتي

قلم رصاص يقول...

اتفضلي الموقع دا متميز فعلا وممكن يجيب نتيجه كويسه

http://scholarshi.ps/arabic/

وفيه كمان برنامج الابتعاث الخارجي من مؤسسة محمد بن راشد المكتوم الإماراتيه
وباسمع كل خير عن الراجل دا انه مؤمن جدا بتشجيع الشباب العربي من المحيط للخليج على البحث العلمي وبالفعل بيدي منح دراسيه كتيره سنويا للشباب العربي في كبريات الجامعات العالميه

دا الرابط بتاعها جربي تراسليهم مش هتخسري حاجة وتابعي

http://www.mbrfoundation.ae/Arabic/Knowledge/Pages/Fellows.aspx

اتمنى لك التوفيق

تقبلي تقديري وتحيتي

Antika يقول...

هاقولك حاجة غريبة جدا !!
انا دخلت النهاردة عندك عشان اسأل عليكى لان بقالك فترة كتيرة مابتكتبيش

كنت حاطة المدونة بتاعتك ف المدونات الـ متابعاها بس مش فاهمة ايه الـ حصل ومابقاش يوصلى اى جديد !!

هاقرا الـ فاتنى بقى D:

عاجبنى كل حاجة ف البوست ده على فكرة ! D:

بالنسبة للكاميرا .. انا خدت خبرة جامدة ف الموضوع ده بالنسبة انى كنت باعمل دراسات ف الكاميرات بقالى شهور عشان اجيب بتاعتى D:

ممكن ارشحلك دى
Samsung WB650
لطيفة جداا كـ بداية ف التصوير
ولو ماكملتيش .. هاتبقى معاكى ف اى وقت تحتاجيها فيه
ومش صعبة ولا مكلفة زى الـ SLR
فيها برضو GPS بس مفيش wireless

سيرش بقى وعيشى حياتك D:
هاتلاقى reviews كتير جدا عنها ف مواقع الكاميرات ويوتيوب ومنتدى كدة اسمه dvd4arab

على فكرة كان عندى نفس المشكلة انى خايفة ماكملش وارميها D:

بس قولت لو بعد ما جيبتها لقيتنى مش هانفع او مش هاكمل ممكن اديها لاى حد

لكن لو ماجيبتهاش هافضل حاطة ف دماغى انى كان ممكن اطلع صور كويسة جدا لو معايا كاميرا D:

ويا رب تروحى لندن :):)

Lady E يقول...

R-H-S : فعلا اللهجة الانجليزي البريطاني اصعب شوية من اللهجة الانجليزي الأمريكي وفي فروقات كتير بين النطق وبعض الكلمات في اللهجتين

يارب ربنا يستجيب منك

بجد شكرااااااااااا ع الحلقتين انا كنت شوفت نهاية الجزء التاني في برنامج التجربة حلقة احمد العسيلي في رمضان وعجبني جدا وكنت لسه هدور عليه عالنت لكن انت سبقتني وجبت اللينكات فبجد مرة تانيه شكرا

بنفس سعر الموبايلات الحديثة لأن امكانيتها قريبة أوي من الموبايل واللاب

هههههه بالضبط زي منى الشاذلي
هي مذيعة واحدة بس اللي ناقشت نفس مواضيع اوبرا وقالوا عليها بتسوأ سمعة مصر " هالة سرحان"
أوبرا من الشخصيات المشهورة جدا في امريكا وبرنامجها بيناقش حاجات كتير جدا مهمة بس مشكلتها انها منحازة بشكل بشع لأمريكا وقصة حياتها بؤس وكافحت كتير لغاية لما وصلت لمكانتها وهي أغنى مذيعات العالم حاليا

قوة كبيرة بس مش في كل حاجة يعني عندك مثلا الصين سحبت من امريكا قوتها في الصناعه وبعدين امريكا قارة مش مجرد بلد ومؤسسات مش أفراد فلازم تبقى قوة

دمت بخير

Lady E يقول...

VOltaa : حلو تفكيرك ده بجد بس يا ترى بتعمل ايه علشان توصل انك تعمل اللي في تفكيرك ? وواثق انك هتوصل لأفكارك دي في يوم من الأيام ولا بتفكر فيها وبتقول انا عايز كل الحاجات دي بس هي مستحيلة؟

التفكير حاجة مهمة جدا وبيجذب فعلا اللي انت محتاجه ونفسك تحققه ومؤمن بيه لكن انت كمان لازم تسعى لتحقيق أحلامك ومتنساش ان ربنا سبحانه وتعالى بيقول في حديث قدسي : " انا عند ظن عبدي بي فليظن عبدي بي ما شاء "

وبالنسبة لقانون الجذب فمش هيقولك شبيك لبيك على طول يعني انا مثلا دي خامس سنة ابقى عايزة ازور فيها انجلترا وتاني سنة ابقى عايزة اشتري كاميرا بس متمسكة باحلامي وواثقة انها ان شاء الله هتتحقق

تصدق حسستني اني من جيل الجدات أصل على أيامي الولاد كانوا بيستخبوا لما بيشربوا سجارة واحدة وكانوا مبيقولوش انهم مدخنين :) لكن الزمن اتغير تقريبا :)

ربنا يرزقك بكل اللي بتتمناه وبجد شوف فيلم the secret لأنه هيعرفك اكتر بقانون الجذب لأني عايزة مدونة تانيه علشان اتكلم عنه

ههههههه الصيت ولا الغنى :) انت من الأحرار يا فولتا انضميت لفريق اللي بيقولوا عليهم اغنيا ربنا يستجيب ونبقى اغنيا فعلا :)

Thank you

Lady E يقول...

جاااااري الرد

Lady E يقول...

sony2000 : وانتي كمان يا حبيبتي
اللهم أمين

أينعم

يا سلام على ذوقك فيروز فعلا اللي بيسمعها بيروح لعالم خيالي فيه طرب بجد وموسيقى وكلمات وصوت خرافي

Lady E يقول...

Ramy : أيوه لاني طبخته بسمنة النخلتين :) علشان كده دسم :)

أولا : اللهم أمين ربنا يتقبل منك

ثانيا : من قال لا أعلم فقد أفتى :)

حاليا دي احدث امكانيات موجودة في الكاميرا ولو الناس تقدر قيمة التصوير مكانوش سابوا ولا ذكرى حلوة ولا ثانية جميلة ولا ناس بيحبوهم ولا مكان رائع الا وصوروه

ثالثا : يا خسارة البوكس اوفيس بتاعنا لما فيلم زي ده يبقى اول واحد !

رابعا وخامسا: كلام سليم

سادسا : في كل الدول العربية لأني حاليا في واحده منهم وفيها توهان برضه هو مش بدرجة التوهان اللي في مصر بس في برضه

اللهم أمين وليك مثل ما دعيت ان شاء الله

Lady E يقول...

يوميات شحات : تسلم

ربنا يكرمك

Lady E يقول...

همسات وبحــ الحياه ــر : :)

انتي الأجمل يا هموسه

جميل ان في بنوتات كتير بيحبوا التصوير
ان شاء الله تجيبي الكاميرا بتاعتك قريب

بالنسبة للأغنية ففي كود علشان تشغليها ع المدونة ومش هعرف ابعتهولك في التعليقات لأنه بيكتب خطأ ومبيرضاش يبعت التعليق ف ابعتيلي ايميلك او اكونت الفيس وهبعتلك الكود والخطوات اللي تعمليها علشان تشغلي اغنية عالمدونة

طبعا مقدرش اخاصمك يا قمر انا متابعاكي

وانتي كمان يا حبيبتي
نورتيني

Lady E يقول...

وجهة نظري : أهلا بيك

ربنا يكرمك متشكرة جدا على معلوماتك اللي فادتني وأنا ببحث عن أحسن كاميرا

بشاركك نفس الرأي عن مطرش الجرجير وبرامج التوك شو والميديا عموما بس لسه في قلة قليلة اللي بتحترم عقلية الناس
وأنا كمان بدأت في مقاطعة برامج التوك شو بس لما بشوفهم بالصدفة بجد بحس ان الاعلام تدهور جدا

شكرا على وجهة نظرك

Lady E يقول...

أميرة علي كوكب مهجور : ربنا يكرمنا ونسافر سوى ان شاء الله :) ما هي لندن على أول قائمة البلاد اللي عايزة ازورها وتركيا من ضمنهم :)

حمزة فعلا عبقريته في الكلمات والألحان الهادية والجميلة

دمتي بخير

Lady E يقول...

Tears : بحبها جداااا :)

Lady E يقول...

The illusionist : ايه ده انت عارف كل ده في انجلترا :) بتذاكر من ورانا ولا ايه :)

أيون هو ده الكلام

صباح الورد وصباحك سكر زيادة

Lady E يقول...

بنجاواتى : كرم مطاوع ده ممثل !

المنح بتبقى كده علشان الكوسة

هههههههه ربنا يسهل وأجيبها ان شاء الله أو أجيب الأحدث منها

Lady E يقول...

كيكي حبيبتيييييييييي : تسلميلي يا كيكتي يا رقيقة

الكلام الرقيق ده محدش يقوله الا لو كان في رقتك وجمال قلبك يا انتيمتي

Lady E يقول...

فراشة : بحب دعوتك دي جدا يا فراشتي لكن في سفري ل لندن بالذات انا هروح ان شاء الله ويارب يبقى خير ان شاء الله

نصائح مهمة جدا يا فراشتي ربنا يكرمك هخليها في بالي وانا بشتري الكاميرا ان شاء الله

هتجيبي الكاميرا اللي نفسك فيها بإذن الله وابقي صوري كتير وورينا احلى صور

اللهم أمين

الانسان بشخصيته وتعامله مع الناس يا فراشتي مش بمركزه

وانا مبسوطة انك جيتي هنا وعلقتي كمان :)

Lady E يقول...

MaNoO : بس كده يا مانو ميغلوش عليك بس عايز نضارة شمس ولا عادية :)

الله يسهلو عقبال ما انا كمان اجيب الكاميرا بتاعتي :)

شكرا ع المعلومة بتاعت مطرش الجرجير

وكل حاجة في الدنيا عايزة مجهود وشوية تعب مش بس الترجمة وفي ترجمات رفعت أصحابها وفي ترجمات تانيه ودتهم ورى الشمس :) ربنا كريم

ان شاء الله اول لما أشوف نور هكتب بوست منور :)

دمت بخير

Lady E يقول...

mohamed : وعليكم السلام

تسلم كلك ذوق

أهلا ببلدياتي
انا كنت بتكلم على الفرق بين كليتي والجامعات التانيه المتطورة بشكل عام مش بس الجامعة الأمريكية

ربنا مع خطيبتك وتخلص كليتها على خير لو مكنتش لسه خلصت دراسة

يمكن حظك كان حلو - يا بختك- ودخلت كلية فيها تعليم بجد بس انت مقولتش كليتك كانت في اي جامعة وكانت خاصة ولا حكومية

Lady E يقول...

mrmr : طول ما فينا حياة مفيش حلم مستحيل يا مرمر المهم نعمل اللي علينا
ومتقلقيش في احلام في حياتي متحققتش فعلا فعارفه موضوع ليس كل ما يتمناه المرء يدركه بس الحقيقة كل الأحلام اللي متحققتش أتحقق بدالها احلام احسن منها

ربنا يكرمك وتحققي احلامك يا مرمر يا جميلة

بس كده وعندك محل شوكولاته لأحلى مرمر

وانتي من أهل الخير يا حبيبتي

Lady E يقول...

FAW : ده مش كلامي دي سنة كونيه الحلم اللي بيبقى نفسك فيه أوي وبتسعى لتحقيقه بيتحقق

عن تامر ما طار طير وارتفع بتفاهه الا كما طار وقع

عن أمريكا فيها العبر بس ممكن تنجح هناك

شكرا

Lady E يقول...

قلم رصاص : ما شاء الله تعليقك كفى ووفى

شكرا على موقعين المنح

ربنا يكرمك وفي ميزان حسناتك ان شاء الله

Lady E يقول...

Antika : تسلميلي يا جميله هعتبر السلام وصل :)

ثانكيو على اقتراحاتك في الكاميرا

الموضوع محير فعلا وقدامي اختيارات كتير وكلهم أحلا من بعض :)

يارب :)

نورتيني