الأحد، 10 أكتوبر، 2010

لسه بضحك زي زمان


امبارح عرفت اني لسه بضحك من قلبي زي زمان بالرغم انهم قفلوا جريدة الدستور - أيوة ما هو لما كل اللي بيكتبوا كويس فيها يمشوا يبقى اتقفلت- الهي ينكد ع اللي بيحبوا ينكدوا عالناس طيب واحدة زيي بره بلدها كانت بتستنى اليوم يعدي بفارغ الصبر علشان يجي اليوم اللي بعده وتشوف المقالات اللي في الدستور تعمل ايه علشان كانت بتحب الجريدة وكلمتها الأمة مصدر السلطات - جمع سلطة- تقريبا لأن الطماطم غليت فمبقاش ينفع ان الأمة تعمل سلطة فيها طماطم فقفلوا الدستور - والمقالات وخصوصا مقالات عمر طاهر كانت بتفرحها وبتديها أمل وبترسم على عيونها وقلبها ابتسامه منه له منه لدرجة اني في يوم من ذات الايام اتمنيت اني اكتب في الدستور مع كل العمالقة اللي بيكتبوا فيها
تجاوزت الأزمة لأن الحياة موقفتش وأكيد الكُتاب قادرين انهم يعملوا جريدة تانيه كويسة
وتجاوزت برضه كلام واحد متخلف قال لي : شهادتك دي متنفعش ببصلة ! يعني أنا ادرس 4 سنين وفي الأخر واحد لا يفقه أي شيء يقوللي شهادتي متنفعش وكليتي ملهاش لازمة :) وبرضه لسه بضحك
أصل الدنيا فيها 80% تافهيين و20% بس اللي ممكن نحترمهم وناخد بكلامهم ويأثر فينا
المهم من يوم ما سافرت وانا مفتقدة الكتكوتة بغبااااااااااااء ف امبارح بابا اخد عربية عمي عمرو والعربية 4<4 اوتوماتيك فأنا كان نفسي اسوقها وأمشي بيها شوية المهم بابا وافق بعد اقناع رهيب لأن العربية مش عربيتنا ووقفنا في مكان واسع وفاضي علشان أمشي بالعربيه وكان فيلم كوميدي أولاً كأني عمري ما مشيت بعربية في حياتي لأنها عالية ولأنها أوتوماتيك ولأنها مش بتاعتنا فمش مدية الأمان وهخاف اخبطها من كل ناحية زي الكتكوتة ولأننا بالليل كنت مرعوبة وأنا ماشية بيها يعني انا بلاقي الناس بتقول العربيات الأوتوماتيك اسهل من العادية وأنا بالنسبة لي العكس :) المهم كل ما كنت بخاف من الطريق كنت بفرمل وبابا قاعد جنبي ف وانا بفرمل كذا مرة كنت انا وبابا هنخبط في ازاز العربية وكنت انا بضحك بهيستيريا مش متخيلة ان بقالي 3 سنين بسوق ومش عارفة أسوق العربية دي ومرعوبة بالشكل ده وكنت ماشية بيها على 20 اومال لو على الطريق العام وبسرعة كبيرة وحبيت أفرمل هعمل ايه
طبعا اللي فوق دي مش صورة العربية بس زيها والطريق شبه الطريق اللي كنت ماشية فيه :)
بالصدفة وأنا بدور على أفلام أجنبية علشان أشوفها لقيت كل المنتديات اللي وقعت تحت ايدي منتديات خليجية وكمان المنتديات اللي بتتكلم عن السفر بره والمنح والجامعات حزروا فزروا خليجية برضه وأغلبهم كمان سعوديين ! مع ان معلوماتنا عن السعودية انهم بلد مقفولة بس البلد المقفولة دي بيطلع منها امريكا كل سنة للدراسة 10000 طالب ! منهم طلاب بيطلعوا بعثات كاملة يعني نفقاتهم كلها على حساب الدولة
المهم انا غيرت بصراحة وعلشان نصيحتين غاليين عليا وبعمل بيهم الأولى : لازم تدي رأيك في كل حاجة بتقرأيها أو بتشوفيها أو بتسمعيها
والتانية : لازم علشان تطوري لغتك تسمعي انجليش كتير من مصادر مختلفة - اكيد منها الأفلام- فهتكلم عن فيلم عجبني جدا اسمه أميرة الثلج أو Ice princess الفيلم بيحكي قصة بنوتة مهووسة بالفيزياء بتحب الفيزياء جدا وفي نفس الوقت بتحب التزلج على الجليد ومدرس الفيزياء بيشجعها انها تعمل مشروع علشان تاخد منحة جامعة هارفرد في الفيزياء وفعلا بتقرر ان مشروعها هيبقى عن التزلج على الجليد وبتكتشف في الوقت ده انها بتحب التزلج على الجليد للدرجة اللي خلتها تتعلم بسرعة جدا وتتطور وكمان تدخل مسابقات وتفوز فيها وتقرر يوم مقابلتها في هارفرد للمنحة بتاعتها انها مش عايزة تدرس فيزيا وعايزة تبقى رياضية محترفة وهتتعرض لصعوبات كتير - كلنا بنتعرض ليها بس في اللي بيجتازها لو كان حلمه بجد وفي اللي بيستسلم- يعني من الصعوبات عدم موافقة مامتها على انها تكمل في التزلج ع الجليد وتسيب منحة هارفرد وده تفكير معظم اهلنا اللي بيحبوا يشوفونا في نمط معتاد منخرجش عنه ومنها كمان قلة الفلوس وقلة الوقت ودي حاجات البطلة
تغلبت عليها ده غير كمان قصة الحب الجميلة بين البطل والبطلة اللي مش هقول أسمائهم لاني غالبا مبحفظش اسماء الممثلين في الفيلم :)
الفيلم يستحق المشاهدة خصوصا من الناس اللي بتسعى لتحقيق أحلامها وتقييمي ليه 7 من 10
ودي أغنية من أغاني الفيلم بحبها جداااااااااااا :


هناك 34 تعليقًا:

VOltaa يقول...

الاتوماتيك سهللللللة حرام عليكى
:p

والفيلم ده شفته وعجبنى
وفكرنى بنفسى
بس انا كنت مهووس بالبرمجيات و كنت لاعب كرة سلة

والحمدلله لا حصل ده ولا حصل ده ودخلت تجارة فى الآخر

ههههههههههه

صباح الفل :)

FAW يقول...

فيلم جامد والممثلة عسل قوي وإسمها michelle_trachtenberg
بس أكيد مش فاكر إسمها في الفيلم. . D:

Timo.. يقول...

زماااان...ييجي من 14 سنة كنت باتابع الدستور..
واتقفلت برضه..
وبعد توقف سنتين رجعت تاني..
والسيناريو بيعيد نفسة بس بشكل تاني..!!

"الدنيا فيها 80% تافهيين و20% بس اللي ممكن نحترمهم وناخد بكلامهم ويأثر فينا"

عجبتني قوووي الاحصاءية دي.. وانا اللي كنت متشائم وفاكرهم 5% بسس (';' )

Timo.. يقول...

وبعدين ازاي تسوقي على 20 ومش عاوزة تخافي..؟
ده اسمه تهور :) :)
الحمد لله ان ربنا ستر (';' )

Ramy يقول...

أنا معاكى طبعا

فى خسارة جريدة الدستور

أو بالمعنى الأصح كتابها اللى بنتابعهم

هى حالة الرعب فى السواقة جاتلك علشان بس انت خايفة عاليها

(:(:

مفيش مقارنه بينا وبينهم خالص هما بيحاولوا يرتقوا بنفسهم و احنا بنجاهد ان احنا ننزل بمستوانا فى الحضيض

الفيلم انا شفته و عجبنى جدا جدا على فكرة

بس انا زيك فى ألزهايمر (:


الأغنية جميلة و الكلمات رائعة


أختيار موفق

Tears يقول...

مش بس الدستور و ابراهيم عيسى ده قبله حمدى قنديل و عمرو اديب و بثينة كامل و بيحاولوا مع دعلاء الاسوانى و كله فى سبيل التوريث

فراشة يقول...

حبييتي حبيبتي

اولا وحشتيني جدا جدا والغربه وحشة قوي عشان بتعدني عن الناس اللي بحبها :(

ثانيا .. مبقراش جرايد لو صدفه وعديت جنب بتاع الجرايد بجيب ميكي جيب هههههههه

السعودية فعلا بيسافروا بره كتير جدا
ابن صاحب الشركة اللي بابا فيها بيدرس هندسة ف امريكا وكان بيسفره من وهو ف ثانوي يعيش مع اسره امريكية عشان يتعلم لغه صح

انا بمووووت ف الفيم دا بحبه جدااا جدااا بدرجه ممكن اشوفه كل يوم حللتي الفيلم زي ما انا شايفاه :)

مبروك ع الضحكة اللي من القلب ويارب متتحرميش منها ابدا

بحبك يا عسولتي

قلم رصاص يقول...

لاتقلقي على كُتاب الدستور ان شاء الله يعملوا حاجة احسن منها لأنهم هما اللي عملوا الدستور..وهيجي اليوم اللي نقول فيه : والله وعملوها الرجاله !

اما عن احترام الناس لخيارات الاخرين فدي من أبشع الأمراض المجتمعيه في مصر وان دلت على شيئ فبتدل على تسطيح للأمور والاهتمام بقشور الحياه ومظاهرها الفارغه دون النظر للجوهر والقناعات الشخصيه

فلا تتأثري من قريب او من بعيد بالعكس دايما زي مابيقولوا: الشجره المثمره دائما تقذف بالحجاره

Go ahead

وعجبني اوي ربطك بين السُلطه وسلَطة الطماطم ^_^

لكن حكاية العربيه الهيدروماتيك ضحكتني اوي خصوصا انك بتقولي كل دا وانتي ماشيه على 20 ههههههههههههه

لا بالعكس الهيدروماتيك أسهل بكتير لكن هي القصه في تعودك خصوصا ان العربيه ضخمه مش زي الكتكونه بتاعتك


انا معرفش الفيلم دا Ice princess بس اسمه شدني بصراحه خصوصا انه من خلال كلامك فيه قصة تحدي ..وانا باحترم جدا الفيلم اللي فيه قصه ما او فكره او رساله ..دا اللي باتشجع انزله واشوفه

خصوصا اني بردو من هواة مشاهده السينما الأمريكيه فقط (اعتزلت العربيه) حتى عشان هضم اللكنه الامريكيه اللي بحبها فوق الوصف عن البريطانيه المكلكعه

على فكره قريت البوستين الاخيرين بتوع ليس كل بني ادم انسان .. واحييكي عليهم

تقبلي مروري وتحيتي

mrmr يقول...

مش بس الدستور
وما خفيا كان اعظم
ياترى الدور على مين

تصبحى على خير

أميرة علي كوكب مهجور يقول...

متهيالي الدستور هترجع تاني ودي زوبعه في فنجان

اللي قالك شهادتك ملهاش لازمه
خدي نفس وقوليله انت حمار ياحمار

الفيلم شكله حلو عاجبني الكليب اوي :))

The illusionist يقول...

انا بقول صباح الخير

مشوفتش الفيلم حسب اعتقادى الشخصى

والسواقه على عشرين اجمل من المشى على الارض

وسواقه العجل اجمل واجمل

غير معرف يقول...

وووووووووووووووو
ححححححححححححححححح
شششششششششششششششششش
اااااااااااااااااااا
نننننننننننننننننننننن
ىىىىىىىىىىىىىىىىىىىىى
كيكى
عوووووووووووووووووووو

miada ref3at.. يقول...

"الدنيا فيها 80% تافهيين و20% بس اللي ممكن نحترمهم وناخد بكلامهم ويأثر فينا"

ههههههههههههه تصدقى فعلا..انا ازاى فاتت عليا حاجه زى دى..زودى بقى على التافهين دى (ومتخلفين)..


وياما سمعنا كلمة كليتك دى مش هتعملك حاجه واجتهادك فيها مالوش لازمه..
انتى فكرك هتشتغلى بشهادتك؟
كلام اهبل..


انتى دخلتى فى كذا موضوع فى بعض بس انا ارتحت لكلامك وقررت انطلك هنا كل شويه ههههههههه..تسمحيلى بده؟..

م. حجاز يقول...

المهم انا اتحيرت دلوقتى انا من ال 20% ولا من ال80% والله ده سؤال يستحق الدراسة

بس الفيلم جميل واحلى حاجه فيه تحقيق الحلم

وبالنوسبة للدستور لا اراكم الله مكروها فى عزيز لديكم

مدونتك جميلةيارب نفضل نضحك زى زمان

safa7_karmooz يقول...

الاوتوماتيك انا بعشقه اكتر من المانيوال لانى مش بحتاج اركز مع الدبرياج وقرف الفتيس خصوصا وسط الزحمة...غير كده سواقة العربيات الكبيرة اسهل...بس تبقى عارفه ابعادها :D

***

الفيلم ده عبقرى بجد...بس مش لكلا الناس :)

نهر الحب يقول...

نقلتينى من السلطة
للفور باى فور
للدستور
انتى دماغك مزحومة بس الحمد لله انك بتضحكى ولسة جميلة من جوا

نهر الحب يقول...

ايناس
بجد انتى وحشانى ونفسى اشوفك جدا
فى لقاء اخر الشهر اتمنى انك تقدرى تجى وسلامى جدا لسمسمة سوما
سلمى لى عليها خالص

سالت عليكى قالوا انك مسافرة

Lady E يقول...

VOltaa : ما هي سهلة لكل الناس بس مش سهلة بالنسبة لي

لسه قدامك الفرصة تاخد كورسات برمجة وتكمل في لعب كورة السلة مع كلية التجارة ده لو بتحبهم بجد

صباح الورد

The Queen يقول...

السواقة عموما متتنسيش حتى لو قعدتي فترة متسوقيش زيي كده ، بس الاتوماتيك فعلا سهلة لكن مش ممتعة ..

بالنسبة للفيلم اعتقد اني محتاجة اشوفه لاني مش قادرة اعمل اللي عيزاه وشكلي كده هعمل حاجه تانيه حبتها من فترة يعني تغيير مسار في الحياة

بشكرك جدا وتحياتي لك

MaNoO يقول...

بالرغم من ان البوست كله على بعضه فىيه حاجات كتير تخلى الواحد يتنكد زى الدستور والطماطم والشهاده لكن طريقه طرحك و اسلوب الضحك بتاع موقف العربيه ماثر على كتابتك كلها بس برده هنفضل متفائلين بالرغم من كل حاجه

حنين الذكريات يقول...

أحلى مافى الموضوع انك ضحكتى من القلب
وعلى فكره دى مش أول مره تسوقى عربية أوتوماتيك بس الظاهر انك كنتى خايفة علشان العربيه امريكانى واللى قبلها كانت يابانى حتى مشيتى بيها على الطريق العام وكان الكلام ده فى بداية الفرحة برخصة القيادة قبل الحوادث اللى بتجعل القلب رهيف وخواف حتى وهو بيسوق على 20جمدى قلبك مينفعش الخوف مع السواقة
بالنسبة للجرايد فلم أثق بأى منها لأنها فقدت مصداقيتها منذ ان بدأ المرتزقة الكتابة بها رغم أن اول قرأتى كانت للصحف
أحب الافلام الهادفه مثل الذى تتحدثين عنه رغم قلة متابعتى للأفلام الاجنبيه
دامت لنا كتاباتك التى تسعدنا

Lady E يقول...

FAW : بتعاكس البونيه هنا في المدونة
متخلينيش اندهلك البودي جارد بتوع المدونة :)

كويس مش انا لوحدي اللي مش بفتكر اسامي الممثلين في الفيلم :)

Lady E يقول...

Timo.. : السيناريو اتكرر تاني بس معتقدش ان الدستور هترجع تاني لأن ابراهيم عيسى رافض يرجعلها

هههههه على كده انا متفائلة بقى ومصدقة انهم 20% الحياة بالضبط زي الهرم اللي في قمة الهرم هما اهم ناس في حياتك وطبعا بيكونوا قليلين جدا

ما هو التهور ده علشانها مش عربيتي و4.4 :)

الحمد لله :)

دمت بخير

Lady E يقول...

Ramy : احنا خسرنا الدستور مش كتابها لأن الدستور كانت مجمعة كوكبة جميلة من الكتاب في مكان واحد لكن دلوقتي كل واحد منهم في مكان

هو للأسف ده حال ناس كتير بس برضه في ناس كتير بيحاولوا يرتقوا بنفسهم لأن الرغبة في النجاح ارادة شخصية قبل أي حاجة

ههههه بعد الشر علينا من ألزهايمر هي أسماء الممثلين مش مهمة أوي :)

الأغنية فعلا جميلة وكلماتها ملهمة اوي ياريت كان عندنا أغاني بالعربي كده لكن للأسف نادرة أوي

دمت بخير

Lady E يقول...

Tears : وده اكبر دليل ان بلدنا بلد ديموقراطية وحرية اتكلم زي ما انت عايز وشوف ايه اللي هيحصلك

Lady E يقول...

فراشة : قطعتي بيا لما نزلتي مصر يا فراشتي هترجعي السعودية امتى بقىىىىىىى عااااااااااااا :) وحشاني بجد

ثانيا : هههههههههه ايون عارفاكي

احسن حاجة ان اللي عايز يتعلم لغة يتعلمها من أهلها ده لو يقدر يسافر لأن الدراسة حاجة وممارسة اللغة حاجة تانيه

الفيلم يستاهل يتحب

اللهم أمين انا وانتي والناس كلها

وانا كمان

ربنا يفرج ازمة النت عندك قادر يا كريم

Lady E يقول...

قلم رصاص : اللي مزعلني على الدستور انه كان مكان متجمع فيه كُتاب كتير موهوبين والتجربة دي هتاخد وقت كبير على ما تتكرر تاني الدستور مكنتش مجرد جريدة لكن كانت دليل ان ممكن يكون في فمصر مؤسسة كل اللي فيها موهوبين وبيحبوا بعض

في اي مكان بتلاقي ناس تقلل من شأنك علشان جواهم نقص معين بيعوضوه لما ميحترموش اختيارات الأخرين وببساطة هما تافهين ومش فاهمين
أكيد في البداية اضايقت بس بعد كده ضحكت :)

طبعا السٌلطة هي اللي مهمتها توفر السلطة للناس :)

كنت ماشية على 20 وحاسة اني طايرة :) واكيد طبعا فرق كبير بينها وبين الكتكوتة

الفيلم فعلا فيه تحدي ونجاح وبيشجعني جدا لما بشوفه وفي فيلمين رائعين زيه واحد اسمه pursuit of happiness
و man of honor الفيلمين كمان فيهم تحدي وكفاح ونجاح والاتنين قصص واقعية
في أفلام عربي كويسة زي مثلا ولاد العم عجبني جدا لكن الأغلبية بتضييع وقتك فيهم

والانجليش البريطاني والأمريكي الاتنين بيكملوا بعض الانجليش البريطاني عريق والانجليش الأمريكي متحضر وسريع

شكرا على رأيك

دمت بخير

Lady E يقول...

mrmr : ايه التفاؤل ده كله يا مرمر :)

وانتي من اهل الخير

Lady E يقول...

أميرة علي كوكب مهجور : هما كسروا الفنجان يا مرمر ابراهيم عيسى مش عايز يرجع الدستور تاني ومفيش دستور من غير ابراهيم عيسى

هههههههههه اخدت نفس وقولت الأكتر من كده في سري :) اصل الحمار بيفهم ويعتبر اذكى الحيوانات وصبور لكن في بشر للأسف مبيوصلوش للحمار

شوفيه وأكيد هيعجبك

Lady E يقول...

The illusionist : يسعد صباحك ومسائك

فاتك كتير ولو مشوفتش pursuit of happiness
و man of honor يبقى فاتك كتير جداااااااااااا

مش دايما على فكرة سواقة العربية بتبقى احسن من المشي لكن ركوب العجل متعة بجد فكرتني بالمصيف والعجل اللي ليه سنادات والعجل اللي ليه دريكسيون كأنه عربيه :)

Lady E يقول...

كيكي : وانتييييييييييييييييي اكتتتتتتتتتتتتتتتتتتتتتتتتتتتتتتتتتتتررررررررررررررررررررررررررررر عااااااااااااااااااااااااااااا

Lady E يقول...

تاااااااااااابع باقي الرد على التعليقات

Lady E يقول...

miada ref3at.. : أهلا بيكي يا قمرايا

ما هما تافهين والتفاهه بتبقى مجمعة مجموعة حاجات كتير منها التخلف

كلام اهبل فعلا والا كلنا مكناش دخلنا كليات
الدراسة هي الأساس اللي بيتبني عليه كل حاجة بس مش كل حاجة ولازم تتنمى بالكورسات والخبرة في الشغل

اسمحلك طبعا يا جميلة المدونة مدونتك وتشرفيني في أي وقت

Lady E يقول...

م. حجاز : تصرفات الانسان وحاجات كتير هي اللي بتحدد هو من ال80% ولا من ال20% وفعلا ده سؤال مهم جدا بس اجابته اهم

اللهم امين

دمت بخير