يوم من أجمل أيام حياتي

طبعا كلنا بتحصل لنا منغصات لو ركزنا فيها بنشوف اليوم كله مش لذيذ لكن المفروض نسيب الحاجات المش لذيذه تخبط دماغها في الحيطة ونركز في الحاجات الجميلة اللي حصلت في يومنا وبالتالي في عمرنا كله

النهاردة نزلت كالعادة من غير الكتكوتة علشان كانت عند الميكانيكي - ومع بابا برضه- وطبعا الانسان لما بياخد على راحة وعربية ورفاهية بيبقى متمرمط من غير العربية دي وطبعا كنت متأخره على المحاضرة بسبب المواصلات الجميلة المهم كان نفسي الاقي تاكسي وفات حوالي 3 دقايق وانا بستنى تاكسي واحد ومفيش وكأن كل التاكسيات انقرضت وطبعا كنت متغاظة ان المحاضرة المفروض بدأت وانا لسه مروحتش الكلية وفجأه لقيت 3 تكسيات وقفوا قدامي وانا أختار :) يا ربي فرحت بجد ( الحمد لله)

رحت الكلية لقيت محاضرتنا اتأجلت ساعة فرحت اكتر اني هلحق المحاضرة من أولها وكان عندي كورس تنمية بشرية في المكتبة وكده المحاضرة اتأجلت ومش هحضر الكورس في معاده لكن كان عندي يقين اني هروح الكورس من أوله وقد كان الكهرباء قطعت في المدرج – هو مدرج صغير- والجو كان حر جدا ومع ذلك المحاضرة كانت رائعة كانت محاضرة دكتر حمدي شاهين والحقيقة لولا محاضرات دكتر حمدي ودكتر اسلام اعتقد اني مكنتش هقدر اكمل في الكلية
واخدنا المحاضرة وخلصنا قبل معاد كورس التمية البشرية ب3 دقائق ولحسن حظي ان الكلية جنب المكتبة اللي فيها الكورس ووصلت الساعة 2 بالضبط في ميعادي :)

في الكورس شوفنا جزء من فيلم ل الممثل ايدي مورفي وكان بيقول لإبنه الصغير متستسلمش وخليك قوي ابنه عمره حوالي 4 او 5 سنين وبعدها جت أغنية غاية في الروعة بالانجليش طبعا عن تحقيق الأحلام وعدم الاستسلام والايمان بأحلامنا والسعي للحصول عليها
وحصلت كذا حاجة في الكورس رفعت من معنوياتي منها اننا كنا بنتقسم جروبات والمستر قسم الجروبات ومطلعتش مع زميلتي دعاء اللي قاعدة جنبي فمسكت ايدي وقالت للمستر ليدي معانا الا ليدي
يااااااااه معقول حد اتعرفت عليه امبارح ويحبك في الله كده؟ الحمد لله
ده غير اني الحمد لله استفدت كتير من الكورس ده وطورت حياتي للأحسن

رجعت من الكورس يادوب دخلت البيت وأكلت معلقتين من الغدى عالسريع وبابا قاللي يلا هننزل علشان عيد ميلاد خالتو النهاردة – خالة بابا –

وهي الكابيرة دلوقتي كل الجيل اللي قبل جيل بابا الله يرحمهم لسه بس طنط ليلى ربنا يبارك في عمرها – خالة بابايا –
وعند طنط ليلى كان هناك بناتها وأطفالهم
والأطفال هما ( جومانا ودينا وسارة وخالد ) دينا وسارة وخالد كلهم في الحضانة وطبعا مش بيروحوا الحضانة وموضوع الغاء الحضانات ده عمل ازمة عند معظم الأطفال وخلاهم زهقانين

دينا كانت كل شوية تسألني مالك بس؟ كنت بقولها عايزة أنام يا دينا
دينا : نامي
أنا : انام ازاي وانا قاعدة معاكو
دينا : عادي نامي وانتي قاعدة
انا : هو انتي بتنامي وانتي قاعدة ؟ ولا بتنامي في السرير
دينا : بنام وانا قاعدة وضحكنا احنا الاتنين
وده كان كلام دينا معايا كل 5 دقايق

واللي كان مش مخليني أكلم أي حد الا هو خالد عنده خمس سنين بس ما شاء الله متحسش انك بتكلم طفل بجد شعلة ذكاء ربنا يحميه

طول ما احنا قاعدين كان بيقوللي بصي هغنيلك ومش أي اغاني دي أغاني هو مألفها وقتيا ارتجال
في أغنية بتقول وحشتييييييني وبتوحشييييييييني يا وحشااااااني
بصي بقى انتي قرعة دي أغنية تانيه :) ودي رسالة موجهه لحبيبته الأولانيه ياسمين

وغنى لي أغاني تانيه كتير وقبل ما نمشي من عند طنط بشوية صغيرين خالتو بتقول له هتتجوز دينا يا خالد؟ قال لها لأ أنا مش هتجوز الا المزة ؟ فخالاته قالوله مين المزة دي يا خالد قالهم رد مكنتش متوقعاه خالص : ليدي مش هتجوز غير ليدي فأنا رديت عليه وقولتله مين؟ قاللي انتي (شكل خالد عينه بتوجعه تقريبا) :)

وبابا قعد يهزر معاه ويقوله مش موافق فقال لبابا بص انا هتجوزها من غير ما توافق
وساب الكلام مع بابا وفضل يبص لي لدرجة اننا كلنا قولناله مالك يا خالد ؟ وبعدين كنت بكلم جومانا فجه خالد مسك ايدي

فأخدت ايده وقولتله شوفت بقى ايدي وايدك شبه بعض بس ايدي كبيرة شوية وايدك صغنونة
قاللي أيوة بصي بقى أنا هجيبلك فستان فرح جميل أوي وهتجوزك
قولتله : جواز كده على طول من غير خطوبة يا خلودة
قاللي : نتجوز الأول وبعدين نعمل خطوبة فضحكت

ولما جيت أمشي قام وسلم عليا وقاللي الوصايا العشر

1- انتي كده عسولة اوعي تطخني ( من التخن يعني) لكن ممكن تخسي شوية وتبقي زي جومانا

2- خدي بالك من شنطتك

3- خدي بالك من هدومك

4- خدي بالك من موبايلك

5- بصي خدي بالك من كل حاجة

وانا خارجة حدفلي بوسة في الهوا كمان ( اطفال رومانسية جدا) بيتهيألي لو كنت مخطوبة فعلا مكنش خطيبي هيبقى رومانسي كده رومانسية ممزوجة بالبرائة

الحمد لله اليوم ده كان جميل فعلا ويارب كل أيامنا تبقى جميلة بس احنا نركز عالجميل اللي فيها ونسيب أي حاجة مش جميلة

دماغ نام ننا هو

اليومين دول بقرأ في رواية ربع جرام للكاتب عصام يوسف وهي بتتكلم عن تجربة 5 شباب مع المخدرات والقصة بتدور على لسان صلاح أحد أبطال الرواية

المهم اني وصلت لصفحة 150 والرواية 635 صفحة ولغاية دلوقتي الرواية بتتكلم بشكل من وجهة نظري يحبب الشباب في المخدرات يعني المخدرات بتخلي الانسان موده حلو وبتخلي الدنيا جميلة وبتخلي الانسان فرحان وبيضحك وكمان بيكسب ماتشات الكورة والأفظع انه بينجح في الثانوية العامة وكمان بينجح في الكلية وبيجيب تقدير جيد مع انه بيشرب حشيش كل يوم !!

المهم أن صلاح أو صاصا بدأ شرب سجاير وبيرة من وهو عنده 7 سنين – طبعا كارثة- ومحدش أكتشف الموضوع ده والجروب دلوقتي في العشرينات ومتسجنوش ولا مرة ولا قفوا في ولا كمين ولا حد تعب فيهم أو عمل حادثة ودخل أوضة العمليات فمنفعش يتبنج من كتر المخدرات اللي اتعود عليها ولا موقف من دول الا مرة واحدة لما عاطف اتمسك مرة وهو بيشرب حشيش فصلاح راح يخرجه من القسم وكان هيتحبس معاه وكمان الاشارة لبهاء انه بدأ يدخل سكة ادمان البودرة

لكن لغاية دلوقتي مفيش حاجة رادعة تبين ان المخدرات دي لعنة من لعنات الزمن وإنها مصيبة وكارثة عالعموم خليني مع الرواية لحد باب الدار

لما استعرت الرواية من المكتبة أمينة المكتبة قالتلي خدي بالك هتعيطي كتير من الرواية دي بس لغاية دلوقتي رد فعلي الاستغراب والضحك على بعض الكلام اللي ابطال الرواية بيقولوه وهما مسطولين ده غير احساسي بالأسى عليهم لكن متأكده ان حياتهم هتتغير للأسوأ

وفي حاجة تانية غير المخدرات بتعمل دماغ عالية جدا وبتخلي الانسان يهييس أخر تهييس ويبقى مش فاهم حاجة و رد فعله بطييييييء جدا ألا وهي قلة النوم .

وأعراض قلة النوم بالليل – وبقول بالليل لأن النوم بالليل مفيد اكتر من النوم بالنهار مليون مرة-

1- عدم التركيز خالص في أي حاجة وكإن الانسان ماشي في حلم مش حقيقة
2- التهتهه في الكلام وعدم الذكاء اللغوي اختيار ألفاظ مش لايقة على المواقف المختلفة
3- عدم الاحساس بالراحة واحساس بالارهاق والتعب
4- عدم الفهم والاستيعاب البطيء
5- الكسل وعدم الرغبة في الكلام والمناقشة
6- العصبية
7- اللامبالاة بالمواعيد

والحقيقة قلة النوم بالليل بقت موجودة عند ناس كتير ونسينا أن البركة في البكور وان الطاقة الحيوية اللي بتخلي الانسان نشيط وفي مود حلو ومنتعش وفرحان بتكون في اعلى تركيز ليها الفجر

وعلى رأي الشاعر :

فما أطال النوم عمرا ولا قصر في الأعمار طول السهر

زيارة بقرار جمهوري

السلام عليكم ورحمة الله وبركاته

تنتابني حالة من السعادة وأحس ببهجت وصفاء وسعيدة ومسعود وسعد وكل الأسماء اللي بتدل على السعادة
وأشعر أن لي جناحين وأحلق بهما في السماء حيث الغيوم والسحب والنجوم والقمر والشمس معاهم اشمعنى هي يعني؟

الدنيا كلها فرحانة وبتحتفل معايا والسبب محاضرة النهاردة غير انها محاضرة دكتر اسلام الصادي وغير اني من أشد المعجبين بالمحاضرات دي زي ما قولتلكو ووصفتلكوا البوست اللي فات فأخيرا جمعت قوايا وتشجعت ورحت سألت دكتر اسلام على أسئلة في الدراسة وكمان قولتله اني كتبت عنه في مدونتي المتواضعة وفورا دكتر اسلام قاللي انه عايز يلقي نظرة عالمدونة وأول لما سمعت الكلمة دي حسيت اني رحت لعالم تاني كله ناس بتضحك وفرحانة وأطفال بفساتينهم الوردية الجميلة وبلوناتهم والسما صافية والورود الجميلة في كل مكان ومبقيتش موجودة في المحاضرة حتى مش فاكرة قولت ايه لدكتر اسلام
رحت الدنيا الجميلة دي ل لحظات ورجعت بسرعة من الدنيا دي وقولت لدكتر اسلام دي حاجة تسعدني والحقيقة اني كان نفسي أقوله دي حاجة انا محلمش بيها أساسا وحضرتك تشرف مدونتي ودي حاجة أتمناها بجد ولولا ان المدونة كانت مغلقة مؤقتا للتحسينات كنت كتبت لينك المدونة ل د. اسلام لكن لسه هنتظر للأسبوع الجاي ان شاء الله فبالله عليكي يا ساعة بالوقت اجري
انا بجد فرحانة ان د. اسلام اللي قرأ لعظماء الأدباء والشعراء في العالم هياخد من وقته ويقرأ post أو اكتر في مدونتي

وده بيدل ان في دكاترة في الجامعات المصرية لسه بخير ولسه في تعليم ولسه في انسان بيحترم الطلاب اللي بيدرسلهم وأن الصورة لسه حلوة ومش قاتمة أوي زي ما كنت شايفاها

شخصية رائعة أثرت في حياتي

كلام قبل الموضوع

يبقى الحال على ما هو عليه وعلى المتضرر اللجوء لأقرب بحر علشان يشرب منه نياهاهاهاهاهاها بس والله بجد من جوه اعماقي القلبية وحشتوني

الحمد لله الكمبيوتر اتصلح وبقى 100 فل وتمناشر لكن النت هو اللي فصل عندنا نوهائيا وكل يوم الشركة تقوللي هيجي بكرة او بعده وانا الأن أحدثكم من عم حتاتة نت كافيه القابع بمكتبة هشتكنا وبشتكنا يا ريس مكتبة مبارك الحبيبة

وأقولكو ايه ولا ايه انا حاليا في ارض الوطن العامر والزاخر وبحمد لله رحت الكلية امبارح والنهاردة وطبعا مأخدناش أي حاجة من أول الأسبوع الا النهاردة أخدنا محاضرة لدكتر اسلام

واحكيلكو شوية عن محاضرات دكتر اسلام وما تفعله في نفساوياتي من سنة أولى وانا بتعلم كتير جدا من محاضرات دكتر اسلام الصادي لأنها محاضرات أكثر من رائعة مش بس دراسة لكن كلنا بنحس بفيض من المعرفة والأدب والشعر والتجارب الحياتية والمرح كمان وبعتبر محاضرات دكتر اسلام كنز من الكنوز وكمان قررت اني أدخل قسم لغة انجليزية من كتر ما انبهرت بشخصية دكتر اسلام وطريقة شرحه الرائعة لأني كنت شهادة معادلة وكنت محتارة ما بين اعلام وانجليش لكن بعد ما حضرت محاضرتين لدكتر اسلام قررت اني هدرس أداب اللغة الانجليزية وصليت صلاة استخارة وتوكلت على الله

تاني محاضرة حضرتها لدكتر اسلام اتطردت من المحاضرة والسبب اني رنيت على زميلتي علشان اقولها ان في محاضرة واطلعي للمدرج فالدكتر لمحني وانا بلتفت وببص يمين وشمال علشان بدور على زميلتي فحس اني مش منتبهة للمحاضرة مع ان كان لسه مبتداش في الشرح ومع ذلك اتطردت من المحاضرة وقاللي كلمة عمري ما هنساها lecture is lecture الترجمة الحرفية المحاضرة هي المحاضرة لكن معنى الكلام ان وقت المحاضرة للمحاضرة وبس فمش لازم أفكر في حاجة تانيه

طبعا مش ممكن انسى احساسي لما طلعت من المحاضرة مطرودة وفاكرة اننا كنا في رمضان ومش هحكيلكو تبعات الموضوع ده اني كرهت الكلية واني تعبت صحيا ونفسويا وقررت مش هروح الكلية تاني وبالخصوص مش هحضر محاضرات دكتر اسلام لكن مع كلام كل اللي حواليا اني هشيل المادة ولازم احضر علشان انجح حضرت المحاضرات بس اللي كنت بتفاجئ بيه ان كل حاجة بقرأ عنها وأي تسائل في نفسي كنت بلاقي اجابته في محاضرات دكتر اسلام وكنت ببقى مستغربة جدا وفرحانه في نفس الوقت لدرجة ان دلوقتي مش بقدر أفوت ولا محاضرة لدكتر اسلام وبابايا كان مسافر القاهرة علشان العلاج وبابا سافر فعلا يوميها وكان المفروض أسافر معاه بس حضرت المحاضرة لأن بابا عارف اد ايه حبي للمحاضرات دي وأد ايه بستفيد منها

حتى اليومين دول بقرأ عن سمات المجتمع الحديث وسمات الانسان في العصر ده وان الشر هو المسيطر على الانسان في العصر الحديث ولما حضرت المحاضرة النهاردة لقيت انها بتتكلم عن نفس الموضوع وان دراستنا هتكون عن نفس الموضوع ان شاء الله :)

وكمان من كتر فرحتي بالمحاضرة حضرت محاضرة دكتر اسلام مع سنة تالتة مع اني مش شايلة المادة السنة اللي فاتت لكن علشان محاضرات دكتر اسلام مش هتتعوض وفعلا هفتقدها جدا بعد التخرج ان شاء الله

طبعا مش عارفة أتكلم بشكل يرقى لمستوى علم وثقافة دكتر اسلام بس ده كلام بسيط بيعبر عن انسان عظيم اتعلمت منه كتير حتى لما اتطردت من المحاضرة اتعلمت احترام الوقت وان لكل وقت خصوصيته ولكل مقام مقال هو الدرس كان صعب شوية كتير لكن علمني واستفدت منه جدا وعلى فكرة انا جبت في المادة اللي اتطردت من محاضرتها جيد :)

والحقيقة من سنة أولى وانا دلوقتي في الليسانس نفسي أقول لدكتر اسلام بجد حضرتك علمتني كتير واستفدت كتير جدا من كلامك ومن محاضراتك اللي بتكون منتدى أدبي رائع وفيه كتير من الجواهر ده الى جانب تمكن حضرتك من اللغة الانجليزية فبتبقى المحاضرة دراسة وشعر وأدب وكمان لغة بنستفيد جدا منها

بجد حضرتك اروع نموذج لدكاترة الجامعات اللي يستحقوا كل الاحترام والتقدير

ربنا يكرمك ويرضى عليك وينفع بيك ويحفظك من كل سوء وجزاك الله عنا كل خير وباقة الورد دي مهداة لحضرتك

لتعارفوا ...

بسم الله الرحمن الرحيم

في البداية انا بعتذر علشان مش عارفة اتابع أي مدونة من المدونات علشان الكمبيوتر والنت عندي بعافيه شوية والكام اليوم الجايين مش هيبقى عندي كمبيوتر اساسا بس يارب ميكونش فات المعاد ويقولولي هنضحي بالكمبيوتر علشان ليدي تعيش :) انا بكتب دلوقتي والكمبيوتر عامل دوشة وبيفتح صفحات لوحده والنت بيهييس فبقالي شوية كتير بكتب في البوست

كنت محتارة أوي يا ترى أتعرف بالناس وأكون اجتماعية ولا كفاية أوي الناس الغريبة اللي شوفتهم في حياتي ومتعرفش بأي حد المهم من فترة مش كبيرة أنا مش بصاحب حد زي كده اللي عايزني يجيلي انا مبروحش لحد :) يعني معظم صديقاتي عالنت او زميلاتي في الكلية أو أي كورس بروحه هما اللي بيطلبوا مني نكون أصدقاء وبالتالي مفيش أي مشكلة بنكون أصدقاء المهم مكونش أنا اللي طلبت الصداقة مع اني مكونتش كده اطلااااااقا ماما بتحكيلي وانا بيبي عندي 3 او 4 سنين اني كنت بصاحب الناس في الميكروباص او لما نكون راكبين اتوبيس ومسافرين وكنت بعزمهم كلهم على عيد ميلادي :)

المهم فعلا بدأت أقرر اني لازم اتغير وايه يعني اللي هيحصل لما أتعرف بالناس بس مشكلتي كانت حاجة واحدة حســــــــن النيـــــــــــة واللي بتوصل للسذاجة أحيانا يعني مثلا انا الحمد لله مش بكدب يبقى كل الناس زيي هيكدبوا ليه يعني ؟؟ انا بثق في الناس بسرعة يبقى كلهم طيبين وهكذا وفضلت اخد مقلب ورى التاني واكتشف الماسكات ماسك ورى التاني بس اللي زعلني مش اني أكتشفت كدب ونفاق ناس وثقت فيهم واعتبرتهم اخواتي لكن اللي ضايقني بجد انهم نزلوا من نظري بعد ما كنت بحترمهم وبقدرهم واللي ضايقني اكتر اني حتى مش ممكن أكلمهم تاني في يوم من الأيام الا لو حصلت معجزة واللي يضايق أكتر وأكتر انهم عمرهم في حياتهم ما هيعرفوا انهم كدبوا عليا او غلطوا في حقي لأني ببساطة انا اللي اكتشفت كذبهم فهما من وجهة نظرهم مكذبوش :)
وعلم النفس الاجتماعي بيقول ان المخطئ يلومه كل الناس الا نفسه وأن اكتر المجرمين والقتلة في العالم كانوا بيقولوا انهم بريئين وانهم معملوش حاجة غلط !! انا طبعا مش بقول ان الناس دول مجرمين او قتلة لكن اعتقد ان الكدب والنفاق بيساووا القتل بالضبط

وطبعا لازم أقول اني برضة عرفت ناس كويسين في حياتي وعرفت ناس كويسين عالنت وان عالم النت الكبير مغيرش فيهم ومخلاهمش كدابين او منافقين وموضوع النت ده عايزاله بوست اتكلم عنه بالتفصيل ان شاء الله

المهم في أية جميلة جدا في سورة الحجرات الأية رقم 13
قال تعالى : " يأيها الناس إنا خلقناكم من ذكر وأنثى وجعلناكم شعوبا وقبائل لتعارفوا إن أكرمكم عند الله أتقاكم "

فمعنى لتعارفوا ده معنى جميل جدا وأنا نفسي اتعرف بكل الناس بس للأسف في حواجز كتير بتمنعني

أولها حاجز الخوف يا ترى هيتقبلوني ؟ يا ترى هكون اضافة ليهم؟ يا ترى هيكونوا ناس كويسين ولا هاخد مقلب ينضم لأخواته المقالب اللي اخدتها في ناس كتير طلعوا عكس ما تخيلت

تاني حاجز مش مخليني أشوف صديقاتي المدونات او أحضر لقائات مدونين التخييل -لصديقات النت - يمكن طريقة كتابتي في المدونة خلت كتير من متابعين المدونة يتخيلوا اللي بتكتب الكلام ده بشكل معين وأنا مش كده يعني مثلا كلمت كذا بنوتة مدونة وكل بنوتة كانت متخيلة شكلي حاجة تانيه خالص يعني كل واحدة فيهم كانت متخيلة شكلي بطريقة ههههههه طب انا اعمل ايه انا ليا شكل واحد بس مش 100 شكل

وأخيرا هتوحشوني الأيام الجايه وعايزة ارائكوا في موضوع لتعارفوا وأدينا بنتعارف

ملحوظة : هكون متابعة كل الردود ان شاء الله من الموبايل

من كل بستان وردة

ملحوظة النت عندنا خنيق خنيق خنيييييييق واييييييييييه


طبعا انا بحب اغاني فيروز جدا جدا جدا ومعلق معايا اليومين دول أغنيتها كنا نتلاقي وخصوصا الكوبليه اللي بيقول

يا سنيني اللي راح ترجعيلي ارجعيلي شي مرة ارجعيلي

وانسيني ع باب الطفولة تا أركض بشمس الطرقات

يا سنين اللي راح ترجعيلي ارجعيلي شي مرة ارجعيلي

وردي لي ضحكاتي اللي راحوا اللي بعدا بزوايا الساحات

يا سنين اللي راح ترجعيلي هترجعيلي يعني هترجعيلي
والا هطلع المطوة وأغوزك نياهاهاهاهاهاها (دي من عندي مش من فيروز)

غريبة الناس أغنية من جمالها مش عارفة اوصفها وكمان الكليب بتاعها حلو جدا - لو كنت عملت خاطر ليوم حلو عشناه في كده معقول يا ساتر مفيش كده في الحياة -

خير اللهم اجعله خير بفتح شنطة منسية النهاردة لقيت فيها اييييييييييه؟؟؟ لأ مش دهب ومورجان وياقوت أحمدك يااااااارب
لقيت كشكول كنت بذاكر فيه أيام الثانوية العامية وكاتبة أشعار وحكايات قرأتهم وانا مبتسمة مع ان أيام ما كنت كاتبة الحاجات دي كنت بكتبها وأنا مخنوقة وسبحان الله الأيام دول - بكسر الدال- في خواطر حسيتها أوي وأنا بقرأها وكإني لسه كاتباها دلوقتي
فعلا كل حاجة بتروح وبتتنسى في حياة الانسان الا الذكريات والعمل الطيب والكلمة الطيبة - ناس طيبين جدا جدا جدا الصراحة -


بفرح أوي لما الاقي زميلاتي في الكلية مهتمين بيا وكل شوية بيسألوا عليا وبيبعتولي ايميلات مع ان انا رخمة ومش مهتمة بيهم نفس الاهتمام ويا سلام لما عملت مقلب في دودو زميلتي بعد النتيجة وقولتلها مش هكون معاكو السنة الجاية يا عيني البونية اتخضت وازبهلت وكانت هتعيط وقالتلي حرااااااااام والله حراااااااااام - فكرت اني هعيد السنة - ودودو مأخدتش بالها اني بقولها السنة الجاية مش السنة دي لأن طبيعي اننا هنتخرج السنة دي ان شاء الله ومش هكون معاهم السنة الجايه :)

كلمة مش ممكن انساها قالتهالي هبة صديقة الطفولة اول ما دخلنا الكلية سوى قالتلي احنا احسن من طب يا بنتي فقولتلها يا سلاااااااام قالتلي طبعا الدكتور بيطلع يشتغل دكتور لكن احنا ممكن نبقى مترجمين أو صحفيين او حتى مدرسين يبقى احسن من طب ولا مش احسن - ههههههه وجهة نظر- وبالتالي من جمال الكلية هبة سابت الكلية من اول شهر واتجوزت وقعدت في البيت وده ان دل على شيء فيدل ان فعلا كليتنا أحسن كلية في الدنيا :)

الموسيقار الرائع عمار الشريعي خريج كلية الأداب قسم انجليش
الممثلة الجميلة اثار الحكيم خريجة كلية الأداب انجليش برضه
الممثل الوسيم أحمد عز خريج كلية الأداب انجليش
وأخيرا كلها كام شهر ان شاء الله وتنضم لكل الرائعين دول ليدي خريجة كلية الأداب انجليش :)
أخر كلية كنت ممكن اتصور اني أدرس فيها ف يوم من ذات الأيام ومع ذلك دي رابع سنة ادرس فيها بس يارب مطنشش محاضراتها زي السنة اللي فاتت

العيد عيدنا وهنعيد

أيون العيد عيدنا وهنعيد غصب عن أي حد وأي حاجه ممكن تضايقنا ومش هنلتفت لأي حاجه مزعلانا

لو رزقك ضيق بس صحتك الحمد لله كويسه يبقى انتا ف نعمة كبيرة أوي ومش مضطر تروح لدكاترة يدفعوك دم قلبك ويستغلوك ويقرفوا فيك ويزهقوك والخ الخ الخ ومش مضطر تاخد دوا غالي وبمواعيد محدده ومش بتعاني ودي نعمه تستحق انك تفرح بيها وتعيد

لو عندك شوية مشاكل صحية في غيرك نايمين على سراير بيقولو عليها بيضا ومش بيقدروا يتحركوا ومش بيقدروا حتى يساعدوا نفسهم لأ وكمان أخر الاخبار ان في ناس مش لاقيه سراير أصلا يبقى انتا احسن بكتير من غيرك وتستحق انك تحس بالعيد

لو اكتشفت كدب وخيانة وغدر وندالة صديق أو قريب أو حبيب ف لسه في 80 مليون غيره وأكيد في ناس جنبك وبيحبوك وبيساعدوك على تخطي ازماتك وانتا كسبت نفسك وبعدت عن غدره وكذبه وهو خسر احساسك بيه وحبك ليه يبقى برضه لازم تفرح وتعيد وتنفخ بلونات كمان

لو متوفقتش في دراستك او شغلك يبقى حاول وحاول وحاول وأكيد هتنجح وتوصل لأن لكل مجتهد نصيب واسعى يا عبدي وانا اسعى معاك وخليها على الله وبطل تنكد على نفسك وتحرم نفسك واللي بيحبوك من العيد

لو ضاعت منك حاجه جميله ف حياتك فتاكد انها لو كانت استمرت مكنتش هتفضل بجمالها وأكيد الجاي أحلى وأجمل بكتييييييييييير حتى لو لسه مش باين ولا شعاع من نوره فمسيرك هتشوف النور وهيملا كل خليه من خلاياك حب وفرحه وأمل ف اوعى تضيع عيدك لأنه مش هيرجع تاني

الدنيا مش بتستمر على حال الحزن بيتبدل فرحه والليل أخره نهار والشده بعدها فرج وطظ ف أي حاجه واي حد مضايقنا او بيفكر انه يضايقنا لأن داين تدان وربك يمهل ولا يهمل يبقى هنقعد نعيط ونكتئب ونبكي على اللبن ف البسكوت ليه خلاص عديها وعيد بقى وحس بالعيد وبلاش نضيع عيد ورى عيد هو يعني ف عمرنا كام عيد ده عمرنا كام سنه بنقضيها في السريع ومش هنقضيه فنكد علشان حاجات وناس متستاهلش

كل سنة وانتم بخير وكتير منكم طيبين وشوية كتير شوريرين :)

وبمناسبة عيد الفطر الكميل كل تعليق يجيب معاه كحكايه وبيتي فورايه وبسكويتايه وشوكولاتايه بالمره :)

وتهنئة خاصة بالعيد لمامتي وبابايا وخالتو اولا
وكيكي وأميرة على كوكو مهجور وشيما وخالتو المصريه وخالتو ستيتة وانوسه عاشقة الاحزان ودودو عاشقة الرومانسية واحساس طفله وديدي اللي وحشتني وselfmeaning وdrama queen و هاجر زعبل وموني و محاسن صابر وبسمة انور وشوكولاته والانجينير ويوسف وللطيوبين الي متابعين مدونتي اما الشوريرين فملهمش تهنئة

انا صار لازم ودعكم

مساء وصباح الخير والسلام عليكم وهاي _ في تحية أكتر من كده _ أي خدعه :)


حد شاف القمر النهاردة ؟ القمر النهاردة ليه طعم تاني حسيته مكسور وحزين وبيبكي ما علينا مش موضوعنا


انا جايه النهاردة علشان أقول اني ان شاء الله مش هكتب بوستات جديدة في المدونة فترة لسه محددتش هي اد ايه يمكن يوم يمكن اتنين يمكن اسبوع او اسبوعين يمكن شهر بس اكيد مش شهرين نياهاهاهاهاها ف ليا رجاء عند صحباتي الانتيخ متعملوش زي المرة اللي فاتت وتقلقوا عليا وتقلقوني عليكوا هي حاجه لذيذة لما تحس ان حد مهتم وبيحبك وبيقلق عليك وانا بحبكو جدا بس محتاجه اقعد شوية مع نفسوياتي واحسم شوية حاجات جوايا واحدد هرجع للبسبوسة امتى ان شاء الله وكذا حاجه تانيه ومش هقفل موبايلي لكن مش هستخدمه تمام؟ علشان محدش منكن يزعل مني

بالنوسبة للمدونة انا أسفة يا ديدي انا شيلت الغير معرف ودي خطوة كنت مأجلاها من فترة واتمنى انك تعملي اكونت علشان تتواصلي معايا في المدونة لأني بحب تعليقاتك وكلامك وانتي من اصدقاء المدونة الغاليين بالنسبة لي

وكمان شيلت الموديريشن بس ده ميمنعش ان اي كومنت هتضايقني لما ادخل عالمدونة هحذفها وعلى فكرة انا مش بمسح تعليق الا لو كان مضايقني سواء اسلوبه مش حلو بالنسبة لي او مجاملة زيادة عن اللزوم وانا مش بحب المجاملة الOVER

وأخيرا ده بوست مفتوح لأي حد عايز يقول اي حاجه عن المدونة والبوستات اللي فيها


كل سنة وانتم طيبين وعيد سعيد - كده انا اول حد يهنئكم بالعيد - هيييييييييييييييه

دمتم في حفظ الرحمان

الصبر مفتاح الفرح

الصبر مفتاح الفرج والفرح كمان
زمان وانا طفله كان عندي قصة اسمها الصبر مفتاح الفرج والدنيا كانت مبهدله ومعانده ابطال القصة لكن هما كانوا أقوى منها وكانوا بيصبروا لغاية لما ربنا سبحانه وتعالى ساعدهم وكافئهم على صبرهم واتبدلت حياتهم من تعب ومشقة واحباط لسعادة ورضا وكانوا متقبلين الحياه بروح جميله أوي

الحقيقة انا مش فاكرة تقاصيل القصة بس فاكرة اني لما كنت بضايق او بزعل كنت بقرأ القصة دي وكنت بحبها اوي
ولاحظت ملحوظة صغنونة في القرأن الكريم لقيت في أيات كريمة كتير بتتكلم عن ثواب الصابرين ومكانتهم الكبيرة عند ربنا سبحانه وتعالى وانهم فائزين وربنا سبحانه وتعالى بيبشرهم بخير الدنيا والأخرة وقتها عملت وقفة مصرية :) بس مع نفسي ورجعت شوية فلاش باك ولقيتني فعلا افتقدت الصبر في كذا موقف اتعرضت ليهم وكذا موقف لسه هتعرض ليهم ويارب مفقدش صبري فيهم لأن الحياه كلها امتحانات للصبر وربنا سبحانه وتعالى يجعلنا من الراضيين والصابرين

ومع موضوع الصبر كنت بقرأ في القرأن الكريم فكان في سجدة فسجدت وفي سجودي افتكرت شخص ما عمري ف حياتي ما كرهت شخص زيه وعلشان محدش يتخض ده واحد ربنا سبحانه وتعالى خلاه ضاكطور و حطه في كليتنا علشان يختبر صبرنا والمتابعين لمدونتي هيعرفوا انا بتكلم عن مين حتى اسمه مش عايزة اقوله ولقيتني بدعي وبقول اللهم لا تمتني حتى تريني ثأري في فلان واللهم ارني ثأري في من ظلمني وبعد الدعاء ده اتخضيت قلت يا نهار ابيض طب ما انا ممكن حد يكون بيدعي عليا نفس ذات الدعاء وخفت بجد ولذالك اتمنى ان اي حد ظلمته يقوللي انتي ظلمتيني لأن كده ارحم من انه يدعي عليا

ويارب ربنا سبحانه وتعالى يرزقنا الصبر والرضا لأن من رأيي المتواضع أن الصبر والرضا هما أهم حاجتين في الحياه
وعلى فكرة الرضا مش معناه اني مكونش انسان\ة طموح\ة لكن الرضا انك تكون بتسعى لتحقيق احلامك وطموحاتك ومع ذلك متقبل نفسك ومتقبل حياتك ومتوكل على الله سبحانه وتعالى ومؤمن ان مبيخدش الروح الا اللي خلقها وان رزقك مش هياخده غيرك

شوية ملاحيظ بره الموضوع: النهاردة تسعة تسعه تسعه 3 تسعات
حد شاف القمر امبارح بجد كان جميل جمال ملوش مثال :) انا بحب القمر جدا جدا جدا