الأحد، 27 سبتمبر، 2009

لتعارفوا ...

بسم الله الرحمن الرحيم

في البداية انا بعتذر علشان مش عارفة اتابع أي مدونة من المدونات علشان الكمبيوتر والنت عندي بعافيه شوية والكام اليوم الجايين مش هيبقى عندي كمبيوتر اساسا بس يارب ميكونش فات المعاد ويقولولي هنضحي بالكمبيوتر علشان ليدي تعيش :) انا بكتب دلوقتي والكمبيوتر عامل دوشة وبيفتح صفحات لوحده والنت بيهييس فبقالي شوية كتير بكتب في البوست


كنت محتارة أوي يا ترى أتعرف بالناس وأكون اجتماعية ولا كفاية أوي الناس الغريبة اللي شوفتهم في حياتي ومتعرفش بأي حد
المهم من فترة مش كبيرة أنا مش بصاحب حد زي كده اللي عايزني يجيلي انا مبروحش لحد :) يعني معظم صديقاتي عالنت او زميلاتي في الكلية أو أي كورس بروحه هما اللي بيطلبوا مني نكون أصدقاء وبالتالي مفيش أي مشكلة بنكون أصدقاء المهم مكونش أنا اللي طلبت الصداقة مع اني مكونتش كده اطلااااااقا ماما بتحكيلي وانا بيبي عندي 3 او 4 سنين اني كنت بصاحب الناس في الميكروباص او لما نكون راكبين اتوبيس ومسافرين وكنت بعزمهم كلهم على عيد ميلادي :)

المهم فعلا بدأت أقرر اني لازم اتغير وايه يعني اللي هيحصل لما أتعرف بالناس بس مشكلتي كانت حاجة واحدة حســــــــن النيـــــــــــة واللي بتوصل للسذاجة أحيانا يعني مثلا انا الحمد لله مش بكدب يبقى كل الناس زيي هيكدبوا ليه يعني ؟؟ انا بثق في الناس بسرعة يبقى كلهم طيبين وهكذا وفضلت اخد مقلب ورى التاني واكتشف الماسكات ماسك ورى التاني بس اللي زعلني مش اني أكتشفت كدب ونفاق ناس وثقت فيهم واعتبرتهم اخواتي لكن اللي ضايقني بجد انهم نزلوا من نظري بعد ما كنت بحترمهم وبقدرهم واللي ضايقني اكتر اني حتى مش ممكن أكلمهم تاني في يوم من الأيام الا لو حصلت معجزة واللي يضايق أكتر وأكتر انهم عمرهم في حياتهم ما هيعرفوا انهم كدبوا عليا او غلطوا في حقي لأني ببساطة انا اللي اكتشفت كذبهم فهما من وجهة نظرهم مكذبوش :)
وعلم النفس الاجتماعي بيقول ان المخطئ يلومه كل الناس الا نفسه وأن اكتر المجرمين والقتلة في العالم كانوا بيقولوا انهم بريئين وانهم معملوش حاجة غلط !! انا طبعا مش بقول ان الناس دول مجرمين او قتلة لكن اعتقد ان الكدب والنفاق بيساووا القتل بالضبط

وطبعا لازم أقول اني برضة عرفت ناس كويسين في حياتي وعرفت ناس كويسين عالنت وان عالم النت الكبير مغيرش فيهم ومخلاهمش كدابين او منافقين وموضوع النت ده عايزاله بوست اتكلم عنه بالتفصيل ان شاء الله

المهم في أية جميلة جدا في سورة الحجرات الأية رقم 13
قال تعالى : " يأيها الناس إنا خلقناكم من ذكر وأنثى وجعلناكم شعوبا وقبائل لتعارفوا إن أكرمكم عند الله أتقاكم "

فمعنى لتعارفوا ده معنى جميل جدا وأنا نفسي اتعرف بكل الناس بس للأسف في حواجز كتير بتمنعني

أولها حاجز الخوف يا ترى هيتقبلوني ؟ يا ترى هكون اضافة ليهم؟ يا ترى هيكونوا ناس كويسين ولا هاخد مقلب ينضم لأخواته المقالب اللي اخدتها في ناس كتير طلعوا عكس ما تخيلت

تاني حاجز مش مخليني أشوف صديقاتي المدونات او أحضر لقائات مدونين التخييل -لصديقات النت - يمكن طريقة كتابتي في المدونة خلت كتير من متابعين المدونة يتخيلوا اللي بتكتب الكلام ده بشكل معين وأنا مش كده يعني مثلا كلمت كذا بنوتة مدونة وكل بنوتة كانت متخيلة شكلي حاجة تانيه خالص يعني كل واحدة فيهم كانت متخيلة شكلي بطريقة ههههههه طب انا اعمل ايه انا ليا شكل واحد بس مش 100 شكل

وأخيرا هتوحشوني الأيام الجايه وعايزة ارائكوا في موضوع لتعارفوا وأدينا بنتعارف

ملحوظة : هكون متابعة كل الردود ان شاء الله من الموبايل

هناك 18 تعليقًا:

شوكولاتة يقول...

اوووووووووووووووووووووووووعى السرييييييييييييييييييييييييع

أووووووووووووووووووووووووول تعليق عند ليدي حبيبتي

شوكولاتة يقول...

محدش يحوشني سيبوني اعلق براحتي
ياهووووووووووووووووووووووووو

ايه الروقان والفضا ده

شوكولاتة يقول...

اعلق تاني ولا أروح أقرا وأجي
طب أنا رايحة أهوه بس أوعو حد يعلق قبل ما أجي
نيهاااااااا

شوكولاتة يقول...

إيه ده يعني مش أنا بس اللي بشرب مقالب بالهبل كده كل يوم
بس على فكرة مابيشربش مقالب كتير كده إلا الطيبين اللي زي حالاتنا
أنا أحيانا بقول نفسي أتعلم شوية لؤم وخبث كده ينفعوا ومايضروش بس مابعرفش علشان أنا ربنا خلقني كده

بوست جميل ياليدي ياقمر وإن شاء الله ما تأخريش علينا
تحياتي

الشعب لابد له من حكومه تشكمه يقول...

مممممممممم تعرفى انى بقالى 5 سنين مصاحبتش حد:(اه والله مش عارفه ليه؟
بس بقابل ناس واتعرف عليهم وبحبهم ويحبونى بس مش بيدخلو فى مرحلة الصداقه اللى انا اعرفها تقريبا اكتفيت بأصحابى اللى بقالى9 سنين اعرفهم وفى واحده بقالها15 سنه صاحبتى فزى ما انتى شايفه انى من النوع اللى بحب الصداقات طويلة الامد اللى بجد يعنى, وللاسف بقيت مش بلاقى النوعيه دى:(
بالنسبه لصداقة النت وبما انى جديده فى العالم ده لانى للاسف طول عمرى مش من النوع اللى بكلم ناس معرفهاش بحب اتعامل فيس تو فيس,بس لما عملت مدونه واتعرفت عليكى وعلى ناس جميله اتمنيت انى اعرفهم على الطبيعه لانى مش بعرف اكون انطباعات من على النت ومش بكون فكره مسبقه عن حد للاسف انا لما بتعامل مع حد لازم اكون شيفاه وشايفه عينه وهو بيكلمنى وريأكشناته(تخيلى انى مش بعرف اتكلم فى التليفون مع اصحابى كبيرى 5 دقايق وبعدين اقولهم ياتيجو يا اجيلكو لكن رغى فى التليفون مش بعرف:(

بالنسبه باه انى مثلا متخيلاكى بشكل وكده زى مقولتلك مش بكون حكم مسبق ولا انطباعات لازم اشوف الانسان ادامى واتعامل معاه :)
والف سلامه على النت ان شاء الله يخف ويكون كويس:)

بـــــسمة انـــــــــور يقول...

هتوحشينى ياليدى ياقمر

مش عارفه بس حاسه ان الحواجز اللى انتى عملاها دى حواجز خيليه من عندك نتى محاولتيش اصلا تتخطيها وتجربى هتعرفى ولالاء بس ممكن تكونى خايفه تاخدى مقلب
انا ياااااااما اخدت مقااااالب والداهيه انها لها كانت من ناس كنوا اغلى حاجه فى حياتى وقتها
بس مش معنى كده انى هبطل اتعامل مع الناس.....الانسان ببعه كائن اجتماعى مينفعش ميتعرفش على حد ومينفعش يعيش فى صومعه لوحده وان نفع فمش دايما هيبقى صح
ليه انتى متبقيش حسنة النيه بالدرجه اللى توصل للسذاجه يعنى اتعلمى ازاى تبقى ضد المقالب وبضمانات مدى الحياه كمن ههههههههههههه
اما بالنوسبه للنت ده فده العالم اللى متاكده ان مفيهوش غش ولا كدب كفايه اوى انهم ناس بيحبوك وبيخافو عليك ودايما بيتمنولك الخير مع انك لاتعرفيهم ولاهما يعرفوك

بس كده كفايه ايه الرغى ده

ربنا يعافيلك كمبيوترك يااوختى

لا تـــشـــتــــاق يقول...

هتوحشينا
وانا مش هطلب منك نكون اصدقاااء ههههههههههه
اما نشوف اتغيرتى ولا لا
ههههههههههههههههههههه
متغيبيش اوك

norahaty يقول...

اهوه حكاية
كل واحد متخيل
شكل التانى على النت
دى ولما يشوفه يلاقى حاجة
تانية :اهو دى بقى اللى مخوفانى
ومخليانى مابروحش لقاءات المدونين
مع انى نفسى وعينى حتطلع عليهم
حتى شوفى عينى طالعة ازاى؟

norahaty يقول...

وتعرفى برضه
انى كنت زيك
لازم الناس
هى اللى تبدأ
بالتعارف عليا
بس صراحة اتغيرت
الدنيا والحياة
والسفر غيرونى
كتيررررررررررر

norahaty يقول...

وبعدين هى
شوكولاته عاملة
دوشة ليه كده؟
وياريتها جايبة
معاها حتة شوكولاته
الا سيباها عندها
فى مدونتها.
شوكولاتة ياحبيبتى
مفيش حد احسن من حد
انت التعليق الاول
انا التعليق ال8
ولا يهمنىىىىىى
هههههههههههههه

شفقة هانم واحسان بك يقول...

وحشتينا موووووووووووووووووووووت
كل سنة وانت طيبة

شاب فقرى يقول...

وووووووووووووووو

التعليق دا بقى هيكون على اقسام

القسم الأول :

أول حاجة زى ما فى الحلو زى ما فى الوحش
هقولك على كلمة واحد صاحبى قالهالى

قالى تعرف يا شاب انته لو صاحبت 200 واحد هيطلع منهم واحد كويس فاهمك وفاهمه وكويسين سوا
مش معنى كدا ان الباقى وحشين ولكن معناه انكم مفهمتوش بعض

يعنى قصدى ان لو طلع لك صديقه كويسة من بين 200 صديقة
شوفى هتقعدى مع الصديقة دى مدة قد ايه
قد تكون تلاتين سنة

تخيلى تلاتين سنة تستاهل انك تتعبى وتتعرفى على متين شخصية

القسم التانى :

مش مهم الشكل
المهم المضمون
انا الفترة اللى فاتت لما كنت فى سفر مع صحابى كلهم اجمعوا ان جوايه طفل صغير محبوس لانه مش عارف يخرج للحياة

لكن اللى يشوفنى يستغرب

شكلى ميديش على طفولة خالص

طول بعرض وشكل محترم جدا وحركات

ودا راى كل الناس فيه والحمد لله

فمش تفرق

المهم روحك وانتى بتقابلى الناس

تحسى انك مبسوطة وفرحانه بالتعارف

احضرى لقاءات المدونين

اتعبى شوية

الصداقات صعب اوى الواحد يحصل عليها

تعرفى

انا قضيت فترة كبيرة جدا زيك كدا

اكتر من سنة
وانتهى بيه الحال وحيد
لحد ما قلت يارب

لقيت ربنا ساعدنى بجروب أصدقاء ممتاز والحمد لله

يستاهلوا اى حاجة وكل حاجة

يارب يكون افكارى وصلت لك

ولى عودة مرة اخرى فى القراءة التانية للبوست مادام هتغيبى ويارب الغيبه مش تطول وبانتظار عودتكم

شاب فقرى :)

كيكى عوووووو يقول...

يارب اعلق

كيكى عوووووو يقول...

يارب اعلق

أحمـــــــــــــد أبو العلا يقول...

التعارف ده شئ جميل
بنعرف ناس جديده واشخاص وطباع مختلفه
نختلف ونتفق ويدي للحياه بهجه وحركه

يعني من اللحظه اللي قررت اتابع فيها مدونات الناس واتعرف عليهم, اضافت حركه جديده لحياتي

التعارف هيقابلنا بناس كتير
فيهم الحلو وفيهم اضافات لسلسة المقالب اللي مش هتنتهي

بس العمليه لازم تستمر ديه سنه في الحياه

يعني طول مابنقابل ناس حلوه مش هيكون معناه ان كل الناس حلوه
وبرضه طول مابناخد مقالب مش هيخلينا نيأس ونقول كفايه ناس كده

ربنا خلقنا مجتمعات وشعوب بينا اختلاف كتير وقال ان التعارف سبب للاختلاف

ديه سنه من سنن الحياه

أميرة علي كوكب مهجور يقول...

التعارف ده حاجة حلوة جدا واننا يبقا لينا اصحاب مش كنا متوقعين دخولهم في حياتنا


اما بالنسبه للمقالب فالحياه فيها الحلو وفيها الوحش ومش معقول هنوقف حياتنا عند الوحش بس واللي بيسيب او بيغدر بحد كان بيحبه او بيحترمه هو الخسران


سلامه النت وصلحيه علشان مفتقداكي مش لاقيه حد ارخم عليه في ساعات الليل المتأخرة:)

عاشقه الرومانسيه يقول...

مشكلتك انك حساسه قوى
وبتخدى كل الامور على اعصابك
وزى ما انتى قلتى
مش كل الناس وحشين
وفى حياتك ناس كتير حلوه
انسى الوحشين واتعلمى منهم
واهتمى بالكويسين وعيشى بكل صدقك معاهم

hager za3bal يقول...

لازم ندخل وسط الناس وندوس بنزين ونندمج وسطهم .. عشان وسط الالف الوحش نلاقي واحد حلو ..

وحشاااااني