الخميس، 8 أكتوبر، 2009

شخصية رائعة أثرت في حياتي





كلام قبل الموضوع



يبقى الحال على ما هو عليه وعلى المتضرر اللجوء لأقرب بحر علشان يشرب منه نياهاهاهاهاهاها بس والله بجد من جوه اعماقي القلبية وحشتوني



الحمد لله الكمبيوتر اتصلح وبقى 100 فل وتمناشر لكن النت هو اللي فصل عندنا نوهائيا وكل يوم الشركة تقوللي هيجي بكرة او بعده وانا الأن أحدثكم من عم حتاتة نت كافيه القابع بمكتبة هشتكنا وبشتكنا يا ريس مكتبة مبارك الحبيبة



وأقولكو ايه ولا ايه انا حاليا في ارض الوطن العامر والزاخر وبحمد لله رحت الكلية امبارح والنهاردة وطبعا مأخدناش أي حاجة من أول الأسبوع الا النهاردة أخدنا محاضرة لدكتر اسلام



واحكيلكو شوية عن محاضرات دكتر اسلام وما تفعله في نفساوياتي من سنة أولى وانا بتعلم كتير جدا من محاضرات دكتر اسلام الصادي لأنها محاضرات أكثر من رائعة مش بس دراسة لكن كلنا بنحس بفيض من المعرفة والأدب والشعر والتجارب الحياتية والمرح كمان وبعتبر محاضرات دكتر اسلام كنز من الكنوز وكمان قررت اني أدخل قسم لغة انجليزية من كتر ما انبهرت بشخصية دكتر اسلام وطريقة شرحه الرائعة لأني كنت شهادة معادلة وكنت محتارة ما بين اعلام وانجليش لكن بعد ما حضرت محاضرتين لدكتر اسلام قررت اني هدرس أداب اللغة الانجليزية وصليت صلاة استخارة وتوكلت على الله



تاني محاضرة حضرتها لدكتر اسلام اتطردت من المحاضرة والسبب اني رنيت على زميلتي علشان اقولها ان في محاضرة واطلعي للمدرج فالدكتر لمحني وانا بلتفت وببص يمين وشمال علشان بدور على زميلتي فحس اني مش منتبهة للمحاضرة مع ان كان لسه مبتداش في الشرح ومع ذلك اتطردت من المحاضرة وقاللي كلمة عمري ما هنساها lecture is lecture الترجمة الحرفية المحاضرة هي المحاضرة لكن معنى الكلام ان وقت المحاضرة للمحاضرة وبس فمش لازم أفكر في حاجة تانيه

طبعا مش ممكن انسى احساسي لما طلعت من المحاضرة مطرودة وفاكرة اننا كنا في رمضان ومش هحكيلكو تبعات الموضوع ده اني كرهت الكلية واني تعبت صحيا ونفسويا وقررت مش هروح الكلية تاني وبالخصوص مش هحضر محاضرات دكتر اسلام لكن مع كلام كل اللي حواليا اني هشيل المادة ولازم احضر علشان انجح حضرت المحاضرات بس اللي كنت بتفاجئ بيه ان كل حاجة بقرأ عنها وأي تسائل في نفسي كنت بلاقي اجابته في محاضرات دكتر اسلام وكنت ببقى مستغربة جدا وفرحانه في نفس الوقت لدرجة ان دلوقتي مش بقدر أفوت ولا محاضرة لدكتر اسلام وبابايا كان مسافر القاهرة علشان العلاج وبابا سافر فعلا يوميها وكان المفروض أسافر معاه بس حضرت المحاضرة لأن بابا عارف اد ايه حبي للمحاضرات دي وأد ايه بستفيد منها

حتى اليومين دول بقرأ عن سمات المجتمع الحديث وسمات الانسان في العصر ده وان الشر هو المسيطر على الانسان في العصر الحديث ولما حضرت المحاضرة النهاردة لقيت انها بتتكلم عن نفس الموضوع وان دراستنا هتكون عن نفس الموضوع ان شاء الله :)



وكمان من كتر فرحتي بالمحاضرة حضرت محاضرة دكتر اسلام مع سنة تالتة مع اني مش شايلة المادة السنة اللي فاتت لكن علشان محاضرات دكتر اسلام مش هتتعوض وفعلا هفتقدها جدا بعد التخرج ان شاء الله


طبعا مش عارفة أتكلم بشكل يرقى لمستوى علم وثقافة دكتر اسلام بس ده كلام بسيط بيعبر عن انسان عظيم اتعلمت منه كتير حتى لما اتطردت من المحاضرة اتعلمت احترام الوقت وان لكل وقت خصوصيته ولكل مقام مقال هو الدرس كان صعب شوية كتير لكن علمني واستفدت منه جدا وعلى فكرة انا جبت في المادة اللي اتطردت من محاضرتها جيد :)



والحقيقة من سنة أولى وانا دلوقتي في الليسانس نفسي أقول لدكتر اسلام بجد حضرتك علمتني كتير واستفدت كتير جدا من كلامك ومن محاضراتك اللي بتكون منتدى أدبي رائع وفيه كتير من الجواهر ده الى جانب تمكن حضرتك من اللغة الانجليزية فبتبقى المحاضرة دراسة وشعر وأدب وكمان لغة بنستفيد جدا منها


بجد حضرتك اروع نموذج لدكاترة الجامعات اللي يستحقوا كل الاحترام والتقدير



ربنا يكرمك ويرضى عليك وينفع بيك ويحفظك من كل سوء وجزاك الله عنا كل خير وباقة الورد دي مهداة لحضرتك



هناك 17 تعليقًا:

akeed يقول...

اتشرف باول تعليق

akeed يقول...

فعلا جميل انك استادتى من التجربة مع هذا الدكتور انا نفس الموضوع سبب تعلمى الكمبيوتر واجادتى له دكتور فى سنة اولى فى الجامعة عقدنى من الكمبيوتر و كل كلامة انجليزى و احنا فى كلية تجارة عربى و الانجليزى مش بدرجة انه يشرح محاضرة فى الكمبيوتر كلها انجليزى و قررت اننى اتحداه فاخذت اتعلم الكمبيوتر و اجيدة حتى حصلت فى هذه المادة على تقدير جيد جداً وحتى الان احدث نفسى بان سبب تعلمى للكمبيوتر هو ذلك الدكتور اللى عقدنى اول سنة فى الكلية .

فكرتينى بذكريات الجامعة

تحياتى

شاب فقرى يقول...

جزاه الله كل خير

ويارب يوفقك والنت يعود مرة اخرى للحياة فى بيتكم

تحياتى للدكتور الفاضل إسلام

وتحياتى ليكى

شاب فقرى

عاشقة الأحزان يقول...

السلام عليكم

ربنا يطمنا عليكى يارب وكل سنه وانتى طيبه وان شاء الله تنورى مدونتك من تانى

وكل شىء خير

تحياتى لكى على هذا الموضوع الاكثر من رائع
ربنا يكرمك يارب
مودتى

احساس طفلة محبة للرومانسية بس واقعية يقول...

ما هو المفروض ان كل دكاترة الجامعة ايجابين بيعلموا طلابهم وبيتواصلوا معاهم بس العكس هو اللى بيحصل ونادرا لما تلاقى دكتور بالشكل دا وبجد بتكون قيمة كبيرة لحياتنا
جميل انك تستفيدى منها

وحشانى على فكرة وشكل انا وانتى ومعظم المدونين هنروح عند اقرب بحر وهنشرب مع بعض
اصل كلنا زى حالاتك كدا وتختلف الاسباب وتبقى النتائج معظمنا مش موجودين :)

يارب تكونى بخير
احبك فى الله
تقبلى مرورى

الشعب لابد له من حكومه تشكمه يقول...

اخيررررررررررررا ظهرتى على الساحه..
الحمد لله على السلامه ياجميله وحشتينى والله...
ربنا يرجعلك النت بالسلامه..
بالنسبه للدكتور بتاعك دايما فى كل كليه هتلاقى دكتور معين بيمثل كتييييييييير جدااا لطلابه.انا كان فى دكتور عندى كان كل يوم وقبل المحاضره ومن غير ميدى محاضرات ولا يتكلم عن الاخلاق ولا ينصح كان يدخل يكتب زى حكمة اليوم كده ,وكل يوم تتغير مره تكون آيه قرآنيه ومره تكون قول مأثور يحمل فى معناه الكثير.كنا كل يوم نستنى ونشوف هو عاوز يوصلنا ايه انهاردا..

mohamed ghalia يقول...

جميل الإعتراف بالفضل والجميل
ربنا يكرمك ويوفقك
يلا شدى السنة دى

أحمـــــــــــــد أبو العلا يقول...

حمدلله على السلامه يالييييييييييييييدي

يارب النت يتصلح

عجبني بجد كلامك اوي

معنى كده ان الرجل ده قدر يفرض اسلوبه وشخصيته حتى لو فيه موقف حصل معاه شخصيا

Sometimes يقول...

بجد بحبه اوى
عارفه يا ليدى
كانت دايما الصفحة اللى بكتب فيها محاضرته بتكون مليانه
وخصوصا ابيات الشعر
كانت منتقاه فعلا
وحشنى جدا
ووحشتنى ايام الكلية
:)

ووحشتينى

عاشقه الرومانسيه يقول...

شكل الورد يخبلللل
ههههههه
يابختك يادكتور اسلام


عايزاكى البوست الجاى تكتبى عن دور الدكتوره دودو فى حياتك
نياهاهاهاهاها


نتكلم جد؟
اوك
انا متفقه معاكى جدا ان المُدرس او الدكتور فى الجامعه
بيكون له دور كبير فى تشكيل شخصيه تلاميذه
والناس اللى بتتلقى منه العلم
وبيكون له دور اكبر انه يحببك فى الماده او يكرهك فيها عمرك كله


كان عندى مُدرس فى ابتدائى تخيلى ؟
كرهنى فى مادته لحد النهارده مش بحبها
يعنى من ابتدائى يعنى من اكتر من حوالى 20 سنه وانا مش بحب الماده بسببه
(:




انتى بقى مختفيه فين؟
وحشتينى جدا
حمد الله على سلامتك
هتيجى اللقاء يوم السبت ولا لأ؟
انتى كده فى مصر يعنى مش ليكى حجه
(:

شوكولاتة يقول...

أنا كان عندي معيد زي كده كان اسمه دكتور هشام بس للأسف سافر دلوقتي ولو أنتي في آداب جامعة القاهرة أو عين شمس هتكوني عارفة دكتورة أماني أبو الفضل أكتر شخصية محترمة قابلتها في حياتي كلها بجد مالهاش حل

ربنا يوفقك في الليسانس وتجيبي تقدير حلو زيك كده

Bent Men ElZaman Da !! يقول...

عاجبنى اوى انك معتزه بدكتور عندك فى الكليه كده
عمرى ما حسيت الاحساس ده ناحيه اى دكتور عندنا فى الكليه الحمدالله :D
بس انتى حساسه شويه انه لما يطردك تتعبى نفسيا وصحيا وتقررى مش تحضرى
هو اتكلم بزوق اوووى وعشان يعلمك حاجه
يعنى توقعى من دكاتره تانين مايكونش بنفس الزوق ابدا
ربنا معاكى يا قمر وتخلصى على خير

شفقة هانم واحسان بك يقول...

بجد ما اجمل الاعتراف بالجميل لاستاذك العزيز
وفعلا "من علمنى حرفا سرت له عبدا"
بس انتى وحشتينى اوى اوى وياريت تبقى تفتكرينى زى دكتور اسلام
شفقة

Nostor Azzuro يقول...

مبروك الجهاز السليم

وعقبال النت

وتحياتى للدكتور اسلام

غير معرف يقول...

انا بقا من يوم دخولي الكليه لحد الان وانا حاليا بالليسانس مش بحضر
لحد ما قابلت دكتوره لملني ابو الفضل بجد اعتبرتها زي ماما صحيح مش كان ليا تعامل شخصي معاها بس بجد اتمنيت انها تكون مامتي انا بحبها اوي اوي وهي اللي خلتني حضرت محاضرات السنه دي وبجد ذاكرت حسيت ان انا لو نجحت هفرحها بس بجد انا نفسي اتكلم معاها بس للاسف مش معايا رقم موبايلها ولا حتي ميلها

غير معرف يقول...

انا بقي دكتور اسلام ساب في قلبي جرح كبير لأنه اصبح بالنسبة ليا نقطة سوداء في حياتي لأني طوال حياتي كنت طالبة مثالية وكنت مثل يحتذي به الي ان جاءت الصدمة الكبري وانا في الليسانس عندما رسبت في مادته ووقفت علي درجة فقط للنجاح مع العلم انني احصل علي تقدير عالي كل ترم في مواده ولماسألت وحاولت اتظلم وجدت حولي الكثير والكثير شيلين المواد بتاعته ترم اول وتاني لأنه استحلف لكل الدفعة بدون اي سبب او حتي ذنب ساعتها بس حمدت ربنا انها جات علي ترم واحد وليس ترمين ولكن سبب حزني ان فرحتي بتخرجي انطفت بدون اي سبب افعله بل ربمايكون السبب هو انني ذاكرت بضمير وكنت واثقة في نفسي زيادة عن اللزوم لدرجة انني لم اكن اتخيل في يوم من الأيام اني ممكن اشيل مادةلأنني كنت بذاكر دائم لدرجة ان كل من يعرفني زهل اني شيلت مادة وقيل لي بالحرف الواحد لو مكنش انتي تنجحي مين بقي اللي ينجح ولكني كنت ضحية حلفان وعندالدكتور اسلام اللي حلف انه يسقط الدفعة ربما يكون بسبب ولد طئش استفزه ولكن الدكتور اسلام الله يصلح حالة اكتفي بلفت نظر وسقط 260 فقط وطبعا كنت انا منهم علي اي حال الحمدلله انها جات في مادة ايه بقي رأيك في الدكتور اسلأم لسه حلو وعجبي؟

Lady E يقول...

عزيزتي الغير معرفة رقم 2 : أنا أيقنت كامل اليقين أن موضوع النجاح والرسوب في الكلية بتبقى قدر أكتر منها مذاكرة وخصوصا في جامعة المنصورة اللي أكيد انتي درستي فيها غير كمان الروتين اللي بيفرضه نظام التعليم على الدكاترة يعني لو الدكتور أخطأ في التصحيح وحب يصحح خطأه هيتحول للتحقيق وهياخد جزا
سيبك من الامتحانات لأن كلنا مأخدناش حقنا زيك مش بس في مادة دكتور اسلام لكن في كل المواد لكن انا بتكلم على دكتور اتعلمت منه كتير اخلاقيا وثقافيا وكنت بحب محاضراته وبستفيد منها جدا
انتي بتهتمي بالجانب الدراسي بس ومش بتهتمي بجانب التعلم الحياتي مش الأكاديمي فدي مشكلتك مش مشكلتي
وبالنسبة لسؤالك اللي فيه سخرية في الأخر وختمتيه بعجبي فإجابته أيوة بحترم دكتور اسلام وهفضل احترمه برغم اني اطردت من محاضرة ليه ومجبتش تقدير كويس في مواده بس استفدت جدا من محاضراته ولو كتبت مواقف كتير رائعة ليه حصلت قدامي أو معايا شخصيا هحتاج مدونة تانيه

مقدرة جدا كلامك وبحترم وجهة نظرك ومفيش انسان اجتمعت كل الأراء عليه