الخميس، 24 سبتمبر، 2009

من كل بستان وردة


ملحوظة النت عندنا خنيق خنيق خنيييييييق واييييييييييه


طبعا انا بحب اغاني فيروز جدا جدا جدا ومعلق معايا اليومين دول أغنيتها كنا نتلاقي وخصوصا الكوبليه اللي بيقول

يا سنيني اللي راح ترجعيلي ارجعيلي شي مرة ارجعيلي

وانسيني ع باب الطفولة تا أركض بشمس الطرقات

يا سنين اللي راح ترجعيلي ارجعيلي شي مرة ارجعيلي

وردي لي ضحكاتي اللي راحوا اللي بعدا بزوايا الساحات

يا سنين اللي راح ترجعيلي هترجعيلي يعني هترجعيلي
والا هطلع المطوة وأغوزك نياهاهاهاهاهاها (دي من عندي مش من فيروز)


غريبة الناس أغنية من جمالها مش عارفة اوصفها وكمان الكليب بتاعها حلو جدا - لو كنت عملت خاطر ليوم حلو عشناه في كده معقول يا ساتر مفيش كده في الحياة -

خير اللهم اجعله خير بفتح شنطة منسية النهاردة لقيت فيها اييييييييييه؟؟؟ لأ مش دهب ومورجان وياقوت أحمدك يااااااارب

لقيت كشكول كنت بذاكر فيه أيام الثانوية العامية وكاتبة أشعار وحكايات قرأتهم وانا مبتسمة مع ان أيام ما كنت كاتبة الحاجات دي كنت بكتبها وأنا مخنوقة وسبحان الله الأيام دول - بكسر الدال- في خواطر حسيتها أوي وأنا بقرأها وكإني لسه كاتباها دلوقتي
فعلا كل حاجة بتروح وبتتنسى في حياة الانسان الا الذكريات والعمل الطيب والكلمة الطيبة - ناس طيبين جدا جدا جدا الصراحة -


بفرح أوي لما الاقي زميلاتي في الكلية مهتمين بيا وكل شوية بيسألوا عليا وبيبعتولي ايميلات مع ان انا رخمة ومش مهتمة بيهم نفس الاهتمام ويا سلام لما عملت مقلب في دودو زميلتي بعد النتيجة وقولتلها مش هكون معاكو السنة الجاية يا عيني البونية اتخضت وازبهلت وكانت هتعيط وقالتلي حرااااااااام والله حراااااااااام - فكرت اني هعيد السنة - ودودو مأخدتش بالها اني بقولها السنة الجاية مش السنة دي لأن طبيعي اننا هنتخرج السنة دي ان شاء الله ومش هكون معاهم السنة الجايه :)

كلمة مش ممكن انساها قالتهالي هبة صديقة الطفولة اول ما دخلنا الكلية سوى قالتلي احنا احسن من طب يا بنتي فقولتلها يا سلاااااااام قالتلي طبعا الدكتور بيطلع يشتغل دكتور لكن احنا ممكن نبقى مترجمين أو صحفيين او حتى مدرسين يبقى احسن من طب ولا مش احسن - ههههههه وجهة نظر- وبالتالي من جمال الكلية هبة سابت الكلية من اول شهر واتجوزت وقعدت في البيت وده ان دل على شيء فيدل ان فعلا كليتنا أحسن كلية في الدنيا :)

الموسيقار الرائع عمار الشريعي خريج كلية الأداب قسم انجليش
الممثلة الجميلة اثار الحكيم خريجة كلية الأداب انجليش برضه
الممثل الوسيم أحمد عز خريج كلية الأداب انجليش
وأخيرا كلها كام شهر ان شاء الله وتنضم لكل الرائعين دول ليدي خريجة كلية الأداب انجليش :)
أخر كلية كنت ممكن اتصور اني أدرس فيها ف يوم من ذات الأيام ومع ذلك دي رابع سنة ادرس فيها بس يارب مطنشش محاضراتها زي السنة اللي فاتت





هناك 12 تعليقًا:

أحمـــــــــــــد أبو العلا يقول...

كل سنه وانتي طيبه ياليدي
وان شاء الله السنه ديه تتخرجي وتنضمي للقائمه

شوكولاتة يقول...

وادي العظماء زادو واحدة علشان بعد كده تقعدي مع صحابك وتتفشخري وتقولي أنا في الكلية اللي اتخرجت منها شوكولاتة
انتي آداب انجليش بصرة انا برضو آداب انجليش والله أنا قبل ما أخشها كنت بعتبرها احقر كلية في الدنيا بس دلوقتي لأ دي أحسن كلية في الدنيا كلها أنا مع رأي هبة جدا إحنا يابنتي ممكن نشتغل أي حاجة إن شاالله نشتغل نفسنا
كلية كده بتخلينا موثأفين

مابتجيش ليه من زمان تزوريني خلاص بقى احنا بقينا زمل

عاشقه الرومانسيه يقول...

تعرفى انى انا كمان كتير بافتح كشكول ذكرياتى واتامل فيه
والله بحس انى بارجع بالزمن لورا
وبكون سعيده جدا

THE illusionist يقول...

الف ل سنه وانتى طيبه ياليدى
عيد سعيد ومتاخره جدا انا عارف
وحشانا جدا جدا
انا لقيت زيك على فكره كشكول من ايام الثانوى
وفرحت قوى برضه عشان لقيت فيه حاجات فكرتنى بايام حلوه قوى
الذكريات بتبقى حلوه قوى
بس بعد ما تخلص

اقصوصه يقول...

اممم

ما في احلى من الذكريات

فعلا ما يخطر فبالنا غالبا

ان احنا بتنتهي بنا الامور بهالطريقه

تكون توقعاتنا واحلامنا مخالفه

والواقع يكون شي غير :)

تامر علي يقول...
أزال أحد مشرفي المدونة هذا التعليق.
Mo7ammed يقول...

كل سنة وانتى طيبة

وبإذن الله هتعدى متخافيش

أميرة علي كوكب مهجور يقول...

والله يابنتي انتي فيكي حاجة لله انا كل شوية لما اجي ابدل الشنطة الاقي ورق كنت كاتبة فيه حاجات و راميهابس غاليا الحاجات المفقودة دي بتكون كأيبة مش عارفة ليه :)



وهتعدي السنة دي لا تقلقي اي خدمة في التاريخ:) اخيرا هلاقي حد اعمل عليه استاذه ياسلااااااام:)

الشعب لابد له من حكومه تشكمه يقول...

زمان كنت افتح اى شنطه او اى كراسه او اجنده الاقينى كاتبه فيها خواطر ليا او احداث او اى حاجه تخصنى لما عديت المراجل دى كلها لقيتها هى هى مفيش تغيير فقررت انى اققطع كل الكلام ده:) بس تقريه وانتى بتضحكى:)
فيروز باه دى حبيبتى حبيبتى حبيبتى

كيكى عوووووو يقول...

نسيت تقولى العبقرية الفذة القنبله الموقؤته كيكى بجاجااا خريجة اداب ع ما تفرج!!!
اسكتى عاااااا النت عندنا يوم 30 هيروووووووووووووح عااااااااااا
الواد عزل بتاع النت!!!
وتبقى الذكريات يا نونتى ياااااااااااه تصدقى عماله افتكر حاجات كتير بينا وع فكرة ديدى بتوصلك السلام كتير عندى عشان انتى قفلتى غير معروف

لا تـــشـــتــــاق يقول...

يلا ياجميل اتخرج واشتغل واعمل كل الى في نفسك وان شاء الله ربنا يسهل الحال وكلوا يبقي تمام

I'm The CraZy One يقول...

kol sana w 2nty tayeba


w rowayet rob3 gram men a7ssan ma2aret bgd too7fa 5alasiiha besoor3a :D