الثلاثاء، 20 أكتوبر 2009

يوم من أجمل أيام حياتي


طبعا كلنا بتحصل لنا منغصات لو ركزنا فيها بنشوف اليوم كله مش لذيذ لكن المفروض نسيب الحاجات المش لذيذه تخبط دماغها في الحيطة ونركز في الحاجات الجميلة اللي حصلت في يومنا وبالتالي في عمرنا كله

النهاردة نزلت كالعادة من غير الكتكوتة علشان كانت عند الميكانيكي - ومع بابا برضه- وطبعا الانسان لما بياخد على راحة وعربية ورفاهية بيبقى متمرمط من غير العربية دي وطبعا كنت متأخره على المحاضرة بسبب المواصلات الجميلة المهم كان نفسي الاقي تاكسي وفات حوالي 3 دقايق وانا بستنى تاكسي واحد ومفيش وكأن كل التاكسيات انقرضت وطبعا كنت متغاظة ان المحاضرة المفروض بدأت وانا لسه مروحتش الكلية وفجأه لقيت 3 تكسيات وقفوا قدامي وانا أختار :) يا ربي فرحت بجد ( الحمد لله)

رحت الكلية لقيت محاضرتنا اتأجلت ساعة فرحت اكتر اني هلحق المحاضرة من أولها وكان عندي كورس تنمية بشرية في المكتبة وكده المحاضرة اتأجلت ومش هحضر الكورس في معاده لكن كان عندي يقين اني هروح الكورس من أوله وقد كان الكهرباء قطعت في المدرج – هو مدرج صغير- والجو كان حر جدا ومع ذلك المحاضرة كانت رائعة كانت محاضرة دكتر حمدي شاهين والحقيقة لولا محاضرات دكتر حمدي ودكتر اسلام اعتقد اني مكنتش هقدر اكمل في الكلية
واخدنا المحاضرة وخلصنا قبل معاد كورس التمية البشرية ب3 دقائق ولحسن حظي ان الكلية جنب المكتبة اللي فيها الكورس ووصلت الساعة 2 بالضبط في ميعادي :)

في الكورس شوفنا جزء من فيلم ل الممثل ايدي مورفي وكان بيقول لإبنه الصغير متستسلمش وخليك قوي ابنه عمره حوالي 4 او 5 سنين وبعدها جت أغنية غاية في الروعة بالانجليش طبعا عن تحقيق الأحلام وعدم الاستسلام والايمان بأحلامنا والسعي للحصول عليها
وحصلت كذا حاجة في الكورس رفعت من معنوياتي منها اننا كنا بنتقسم جروبات والمستر قسم الجروبات ومطلعتش مع زميلتي دعاء اللي قاعدة جنبي فمسكت ايدي وقالت للمستر ليدي معانا الا ليدي
يااااااااه معقول حد اتعرفت عليه امبارح ويحبك في الله كده؟ الحمد لله
ده غير اني الحمد لله استفدت كتير من الكورس ده وطورت حياتي للأحسن
رجعت من الكورس يادوب دخلت البيت وأكلت معلقتين من الغدى عالسريع وبابا قاللي يلا هننزل علشان عيد ميلاد خالتو النهاردة – خالة بابا –
وهي الكابيرة دلوقتي كل الجيل اللي قبل جيل بابا الله يرحمهم لسه بس طنط ليلى ربنا يبارك في عمرها – خالة بابايا –
وعند طنط ليلى كان هناك بناتها وأطفالهم
والأطفال هما ( جومانا ودينا وسارة وخالد ) دينا وسارة وخالد كلهم في الحضانة وطبعا مش بيروحوا الحضانة وموضوع الغاء الحضانات ده عمل ازمة عند معظم الأطفال وخلاهم زهقانين

دينا كانت كل شوية تسألني مالك بس؟ كنت بقولها عايزة أنام يا دينا
دينا : نامي
أنا : انام ازاي وانا قاعدة معاكو
دينا : عادي نامي وانتي قاعدة
انا : هو انتي بتنامي وانتي قاعدة ؟ ولا بتنامي في السرير
دينا : بنام وانا قاعدة وضحكنا احنا الاتنين
وده كان كلام دينا معايا كل 5 دقايق

واللي كان مش مخليني أكلم أي حد الا هو خالد عنده خمس سنين بس ما شاء الله متحسش انك بتكلم طفل بجد شعلة ذكاء ربنا يحميه

طول ما احنا قاعدين كان بيقوللي بصي هغنيلك ومش أي اغاني دي أغاني هو مألفها وقتيا ارتجال
في أغنية بتقول وحشتييييييني وبتوحشييييييييني يا وحشااااااني
بصي بقى انتي قرعة دي أغنية تانيه :) ودي رسالة موجهه لحبيبته الأولانيه ياسمين

وغنى لي أغاني تانيه كتير وقبل ما نمشي من عند طنط بشوية صغيرين خالتو بتقول له هتتجوز دينا يا خالد؟ قال لها لأ أنا مش هتجوز الا المزة ؟ فخالاته قالوله مين المزة دي يا خالد قالهم رد مكنتش متوقعاه خالص : ليدي مش هتجوز غير ليدي فأنا رديت عليه وقولتله مين؟ قاللي انتي (شكل خالد عينه بتوجعه تقريبا) :)

وبابا قعد يهزر معاه ويقوله مش موافق فقال لبابا بص انا هتجوزها من غير ما توافق
وساب الكلام مع بابا وفضل يبص لي لدرجة اننا كلنا قولناله مالك يا خالد ؟ وبعدين كنت بكلم جومانا فجه خالد مسك ايدي
فأخدت ايده وقولتله شوفت بقى ايدي وايدك شبه بعض بس ايدي كبيرة شوية وايدك صغنونة
قاللي أيوة بصي بقى أنا هجيبلك فستان فرح جميل أوي وهتجوزك
قولتله : جواز كده على طول من غير خطوبة يا خلودة
قاللي : نتجوز الأول وبعدين نعمل خطوبة فضحكت

ولما جيت أمشي قام وسلم عليا وقاللي الوصايا العشر

1- انتي كده عسولة اوعي تطخني ( من التخن يعني) لكن ممكن تخسي شوية وتبقي زي جومانا

2- خدي بالك من شنطتك

3- خدي بالك من هدومك

4- خدي بالك من موبايلك

5- بصي خدي بالك من كل حاجة

وانا خارجة حدفلي بوسة في الهوا كمان ( اطفال رومانسية جدا) بيتهيألي لو كنت مخطوبة فعلا مكنش خطيبي هيبقى رومانسي كده رومانسية ممزوجة بالبرائة

الحمد لله اليوم ده كان جميل فعلا ويارب كل أيامنا تبقى جميلة بس احنا نركز عالجميل اللي فيها ونسيب أي حاجة مش جميلة

هناك 26 تعليقًا:

شوكولاتة يقول...

ربنا يجعل كل أيامك خير وفرح يارب وتلاقي عريس برومانسية براءة خالد كده يهنيكي

بحبك ياقمرايا

قبلاوى يقول...

المهم انك مبسوطه

يارب تبقى كده دايما

بس حلو خالد ده ... :D

إيمان يقول...

ههههههههه
ايده انتى جايلك عريس وبتدلعى اشبطى فيه يا بنتى خمس سنين خمس سنين مش مشكله بكره يكبر وأهو ضل راجل
بس خللى بالك من كل حاجه
حقيقى الواحد لما يقرر يبص للحياه بنظرة ايجابيه بيلاقى حاجات كتير ممكن تفرحه لكن لو طلبت معاه نكد هيلاقى اسباب كتير يعنى كان ممكن نقول فى البوست ده ان النهارده العربيه عطلانه والتاكسيات اتأخرت واتعطلتى وكمان المحاضرة اتأجلت وفضلتى على اعصابك علشان الكورس وبعدين بعد ما روحتى تعبانه معرفتيش ترتاحى علشان وراكى مشوار وكمان كنتى قاعده تعبانه ومعرفتيش تركزى ولا تنبسطى بالخروجه لا وايه خالد فضل يزن ويغنى وصدعك
بجد لو حبيتى تعيشى دور الشهيده فى اليوم ده كان هيبقى ممكن لكن انتى قررتى ان اليوم يكون جميل فبقى اليوم جميل ..سبحان الله بحس ان ربنا دايما مع المتفاءل بيسهله حاله وبيفتح نفسه على الحياه اكتر واكتر
ربنا يجعل كل ايامك سعاده وهنا

dr.w.krm يقول...

تمام ياقمر اليوم جميل بس عشان انتى جميله وعنيكى حلوة بتشوف كل شىء حلو
عارفه هى نفسيتنا هى اللى بتحدد اليوم هيمشى ازاى ..هل هنقبل اى حاجه حلوة كانت او وحشه؟ ولا هندق على الواحده
الجمال والسعاده لما بيكونوا فى الداخل بيخلونا نشوف الحياه كلها جميله

بنات مرام يقول...

مدونة جميلة
ربنا يسعدك دايما ويسعد ايامك كلها

Tamer Nabil يقول...

ربنا يوفقك ويكرمك

ويخلى كلايامك فرح وسعادة

ومش تفوتك محاضرة ابدااا


مع خالص تحياتى

ستيته حسب الله الحمش يقول...

ضحكتيني يا ليدي
وانا موحتاجة اضحك وانبسط
ربنا يخلي خلود اللي خلاكي تضحكي واحنا كمان

لو جه عريس مش رومانسي زي خالد مرفوووووووووض
واستني خالد :)

مي يقول...

انتى عارفة البوست ده يعتبر تنمية بشرية والله انتى علمتينا حاجات مخفية بس علمتينا من غير ما تظهرى ده
علمتينا نتعلم التفاؤل والامل
اما عن خلودة ده قمراية خاااالص خلى بالك من كل حاجة هههههههههههه

ربنا يحميهم يارب وتسلم ايدك يا جميلة وربنا يوفقك دايما

ساسو يقول...

ماشاء الله ربنا يسعدك علطول
ويجعل كل ايامك حلوه

بـــــسمة انـــــــــور يقول...

وحشتييييييييييييينى اووووووووووووى

بـــــسمة انـــــــــور يقول...

خلى بالك انا واخده بالى انك مش بتسالى عليا بس هعديها

بـــــسمة انـــــــــور يقول...

ربنا يسعدك ويفرحك دايما علطول يا روح قلبى

أحمـــــــــــــد أبو العلا يقول...

ياعم ياعم

مين قدك
عم خالد بقلبه الأبيض الطيب بيحبك وطالب القرب

ربنا يسعدك

ياريت كل فتره نفكر كده وسط مشاكل الدنيا عن لحظات بنفرح فيها من قلبنا بجد

Bent Men ElZaman Da !! يقول...

يارب تكونى مبسوطه على طول يا جميله :)
ويارب كل يوم يبقى اجمل واجمل ان شاء الله
عسوله خالد ربنا يخليهولكوا :)

الشعب لابد له من حكومه تشكمه يقول...

ربنا يسعد قلبك يارب:) ويسعد ايامك كلها

شاب فقرى يقول...

الله يا ولاد

سبحان الله

اول مرة الاقى واحد عنده نعمة الرضا بالشكل دا

:)


بجد بجد بجد مبروك عالخطوبة لخالد :P

دورى فى الحياة هتلاقى ناس من جواها اطفال زيه كدا :)

ويارب تلاقى

واسمعى كلام خالد

ربنا يخليهم لكم يارب

تحياتى

شاب فقرى

شفـقــة و إحســــان يقول...

مبروك يا ليدى والله فرحتلك اوى وابقى باركى لخالد
ربنا يسعدك عريس على ادك وهو حد لاقى فى الزمن ده عموما انتى هتخديه تربيه وجوزك على ما تعوديه
هههههههههههههههههههه
سلامى الجامد اوى لخلودة
شفقة

rony يقول...

ده ايه العيال اللى عايزه تكبر بسرعه دى
بس احلى ما يميز الاطفال البراءة والصدق
والتلقائيه الشديده
وربنا يتمملكم على خير يا بنتى
تحياتى

كيكى عوووووو يقول...

وحشانى كتير
لسة لحد دلوقتى دماغى مش مظبطة خالص!!!
المهم
ربنا يوعدك بواحد ضعف عمر خالد وتلاقى بجد ان شاء الله
بس ع ما اظن ضعف عمر خالد مش هينفع برضة!!!
مممممممممممممممممممم
انا متغاظة منك عارفة الروايه الى انتى بتقريها دى لمة فتح معرض الكتاب كنت همووووووووووووووت واجبها لكن للاسف كانت 50 جنية وانتى عارفة انا مش بلاقى اشحن اساسا!1!
لمة اشوفك ابقى هاتيها معاكى

Lady E يقول...

شوكولاتة : وإياكي يا حبيبتي

وانا كمان بحبك جدا

Lady E يقول...

قبلاوى : الحمد لله

ربنا يكرمك

طبعا حلو مش خطيبي لازم يبقى حلو :)

Lady E يقول...

إيمان : هههههههههه كده يا ايمي :)

كل ده حصل فعلا يا ايمي بس برضه في حاجات جميلة حصلت وأخدت بالي انها حصلت وعلشان كده فرحت وحسيت ان اليوم حلو

" لكن انتى قررتى ان اليوم يكون جميل فبقى اليوم جميل ..سبحان الله بحس ان ربنا دايما مع المتفاءل بيسهله حاله وبيفتح نفسه على الحياه اكتر واكتر
ربنا يجعل كل ايامك سعاده وهنا"


صح لسانك فعلا يا ايمي هو ده اللي بيحصل مع كل الناس لما تشوف حياتها حلوة بتبقى حلوة والعكس صحيح والرسول صلى الله عليه وسلم بيقول تفائلوا بالخير تجدوه
ربنا يكرمك ولكي مثل دعائك

Lady E يقول...

dr.w.krm : تسلميلي يا قمرايا وانتي كمان جميله وعنيكى حلوة

"الجمال والسعاده لما بيكونوا فى الداخل بيخلونا نشوف الحياه كلها جميله"

أكيد كلامك رائع

نورتيني

Lady E يقول...

بنات مرام : أهلا بيكم

انتوا الأجمل

ربنا يكرمكم ويسعدكم

نورتوني

Lady E يقول...

Tamer Nabil : اللهم أمين ولك مثل دعائك

على فكرة فاتني محاضرات كتير للأسف :(

دمت بخير

Lady E يقول...

ستيته حسب الله الحمش : يارب دايما فرحانه وبتضحكي يا خالتو

أمين يارب ويخليلك عفروتو

تمام يا خالتو واستنى خالد واحط نفسي في الفريزر علشان لما يكبر نبقى أد بعض :)

نورتيني يا خالتو