الأربعاء، 30 ديسمبر 2009

إشراقة سنة جديدة

بصو بقى في البداية سموا وصلوا علشان معنديش استعداد اطلاقا ان البونية تتحسد او تتحقد واللي
مش هيعمل كده بجد هزعل منه وهعرف بس مش دلوقتي كمان شوية يوم القيامة ان شاء الله :)




يا خلاثي ع الطعامه بيقولوا انها شبهي وانا بقول مستحيل الطعامه دي مش شبهي هتجيبوا للبونيه اكتئاب من وهي مولودة :)
كنت نايمة الصبح في امان الله واذ فأجة الاقي مامتي بتقولي شيماء جابت بنوتة عقبالك يا شيما يا صبحتي يااااااارب (اتقالتلي عقبالك دي كتير النهاردة)
نزلت بالليل وجبت ورد علشان اول حاجة تشوفها النونو تبقى الورد (ده على اساس انها بتشوف يعني البيبهات بيبقى لسه حاسة البصر عندهم مش مكتملة لما بيتولدوا وبتبدأ حاسة البصر تكتمل شهر بعد شهر كل ما البيبي يكبر)
رحت لشيماء وسلمت عليها وكانوا لسه بيلبسوا النونو اللي اختاروا لها اسم مؤقت " اشراقة" عجبني الإسم مع انه صعب شوية في زماننا ومش هيتفهم بسهولة
سألوني عن اقتراحاتي في اسم للبيبي بس انا مع فكرة ان انتوا سموا بنتكو ا او ابنكوا براحتكوا دي من واجبات الأمومة والأبوبه وبعدين اقترحت قبل كده على مرات عمي انها تسمي بنوتتها مريم لأني بحب الإسم ده اوي على اسم مريم ام سيدنا عيسى وفعلا سمت بنوتتها مريم وما شاء الله مريم جايبالي صداع كل ما انام تيجي تصحيني وتندهلي بإسمي على اساس اننا اصحاب يعني:)
نرجع للنونو طبعا كان نفسي اشيلها اوي اوي بس طبعا مقولتش اني عايزة اشيلها - مكنتش عايزة ابقى خنيقه - المهم اول لما لبسوها وكلفتوها في البطانيه جابوهالي وشيلتها ويااااااااااااااااااااااااااااااااااااااه عالإحساس أول العنقود اللي هي انا على رأي جدتي الله يرحمها اني اول ما العين شافت شايلة اخر العنقود من البنوتات في عيلتنا
أول مرة اشيل بيبي لسه مولود وعمره ساعات ، شيلت قبل كده بيبي كان عمره يومين لكن بيبي عمره ساعات حاجة تانيه خااااااالص واحساس تاني احساس جميل اوي من زمان محستوش
بالرغم ان شعوري تجاه مامة البيبي وباباها -عمي واللي الناس متعرفوش انه يبقى اخو ابويا- عادي يعني ولا بحبهم ولا بكرههم بس البيبي البنوتة حاجة تانيه خاااااااااااالص حبيتها ايوة انا حبيتها مش قادرة انسى ضحكتها - مع انها لسه مضحكتش -
احساس البشرة الناعمة بتاعة البيبي وبسم الله ما شاء الله كإنها عاملة ميك اب بس ميك اب رباني مفيش احلى منه وحاجة صغنونة كده لسه مترمطتش في الحياه ولسه بريئه ورقيقة وزي الموج بتتحرك على رأي تامر ياحوستي
كنت كل ما بلمس وشها بتفتح بقها فكرتني بكارتون نيمو بالبطابيط الصغننين اللي كل ما يشوفوا سمكه يقولوا عليها اكل اكل اااااااااكل :)
ايديها صغننين اوي وبرضه شبه ايديا :) وايديها الصغننين كانوا بردانين اوي وكنت بدفيهم لها - طالعه لبنت عمها -
اكتر كلمة اتقالتي النهاردة عقبالك وعقبال ما نشلك ( هيشلوني) نياهاهاهاهاها
ع الهامش : قررت اني اروح الفرح بتاع ابن خالي ان شاء الله
مع ان عندي امتحان يوم الخميس الصبح وبعدها سفر 3 او 4 ساعات الله اعلم الطريق هيبقى عامل ازاي بس ان شاء الله يبقى فرح جميل وامري لله هلبس فستان سهرة لونه ذهبي في البرد اللي احنا فيه ده عااااااا
ان شاء الله 2010 تبقى سنة جميلة انا متفائلة ، كل سنة وكلنا في هنا

هناك 24 تعليقًا:

الشعب لابد له من حكومه تشكمه يقول...

اولما قلتى شيماء جابت بنوته..
قلت هنهرج ولا ايييييييييييه والله مجبت حاجه لسسه :))

عقبالك ياقمر :)
انا عارفه الاحساس ده انا شيلت ولاد اخويا وهم خارجين من العمليات وشكلهم كان مقرف :)) مش بحب العيال اللى لسه مولودين ..
بس بعد كده بيباوا سكررررررررر..
عقبالك وشدى حيلك ههههه

Lady E يقول...

الشعب لابد له من شيما تشكمه : ههههههههههههههههه صباح الورد

لأ ما انا ان شاء الله على قلبك من اول الخطوبة لغاية لما تجيبي النونو ان شاء الله :)

عقبالي وعقبالك يا شيما

هههههههه رومانسية رومانسية كان شكلهم مقرف ده ايه التعبيرات الفوق الفظيعه دي

معلش بقى البيبهايه النهاردة كانت زي القمر وعسولة اوي مش مقرف (وش بيطلع لسانه)

ههههههه الكلمة الموعودة

R-H-S يقول...

مبروك وعقبالك يارب
انا بخاف اشيل العيال الصغيرين مش عارف ليه انا العب معاه وهو متشال بس مشيلوش اما انتي شكلك حونينه اوى

وايه حكايه نيمو دا انتي شكلك متأثره بيه جامد اول يوم مدسه اول يوم مدرسه

ربنا يخليها ليكوا يارب

صيدلانيه طالعه نازله يقول...

الاطفال و هما مولودين بيبقوا سبحان الله ملايكه فعلا و بتبقى مش عايزه تشيلى عينك من عليهم من كتر جمالهم
وصفك للبيبى جميل قوى و على فكره اسم اشراقه تحفه بجد
انا كمان حاقول عقبالك و ان شاء الله يكون عام سعيد عليكى طالما حيبدأ بفرح
و علينا ان شاء الله
كل سنه و انت طيبه

VÖltaa يقول...

ماشاء الله عسل

وانا عارف احساس اول العنقود اما يشيل اخر العنقود
بتبقى لحظة تاريخية
لسة حاصلالى من كام يوم
احتمال كمان شوية احط بوست عن الحكاية دى

وربنا يبارك فيها ان شاء الله

وعقبال مانشلك كلنا كده ونيجبلك شلل نصفى ولا حاجة
هههههههههههه

(Joudy) يقول...

بسم الله ما شاء الله ربنا يبارك فيها يارب ويجعل أيامها سعادة وخير

أقول عقبالك ولا بلاش بس برد عقبال كده ما نشيلك ( وش بيغمز) هههههههههه ربنا يسعدك

وكمان هتروحى الفرح بجد بجد عقبال ما نفرح لك كده يارب

طيب استنى كده إحنا كده لخبطنا قولنا نشيلك الأول نعدلها بقى نفرح بنجاحك وبعدين فرحك وبعدين نشيلك ويدينا ويديكى طولة العمر ههههههههههههههههه

دمتى بكل الخير والفرح والسعادة

مسدس صغير يقول...

اشراقة
ربنا يجعلها اشراقة سعادة دائمة لا تزول
ويبارك فيها ويحفظها من كل سؤ
مش بحسد اهوه
هههههه
ربنا يبارك فيها

Ana keda يقول...

يا خلاصى
ما شاء الله تبارك الله
جميلة اوى
احلى حاجة فى الدنيا الاطفال احساس تحفة انا اختى لما كانت هنا ولادها كانوا عاملين فيلم هندى والله من الصداع وبالذات بنت اختى الكميلة بس لما سافروا البيت فضى اوى
بس يلا بقى انتى خلصى كلية وكلو هييجى يبنتى
كل سسنة وانتى طيبة صحيح

شلاطة يقول...

مبروك يا شيما وعقبال ما نشلك
ههههههه

ليس فقيرا من يحب يقول...

بسم الله ما شاء الله الاولاد وهما لسه

مولودين بيبقى ليهم سحر مختلف

ربنا يسعدك يارب وكل سنه وانتى طيبه

ويارب السنه الجديده تكون سنه سعيده عليكى

وتحققى فيها كل احلامك وعقبالك

يااااااااااااارب

اخص عليكى يا شيما منظرهم مقرف دا

اروع حاجه شكل وريحه البيبى وهو مولود

والله رووووووعه

MaNoOoSh يقول...

ما شاء الله تبارك الله
ربنا يبارك فيها
وفعلا الأطفال اللي لسة مولودين بيبقى شيلهم واللعب معاهم ليه احساس غرييييييييييييييب وممتع

وعقبال ما تشوفي ولادك ان شاء الله
كل سنة وانتى طيبة يا قمر

Cute Kitty **sookra يقول...

ايه دا
انتى هتلبسى سواريه فى البرد دا
طيب ماعلينا اكيد انشاء الله هادعيلك تتبسطو ولايهمك العروسه اللى موش واثقه فى نفسها دى وبتغير منك
هههههههههههههههه
عقبال يارب ماتيجى تقوليلنا انك اتخطبتى ونعملك فرح وبعدين تجيبى نونو وتسميها سها
هههههههههههههههه

مي يقول...

بسم الله ماشاء الله ولا حول ولا قوة الا بالله
قمررررررررررر والنبى عايزة اشيلها شوية حبة صغنين يا طنط عااااااااا ماليش دعوة
طب اديها بوسه صغننة بالنيابة عنى متخفيش اوى يا ليدى عارفاكى ما تصدقى
عقبالك يا ليدى لما تجيبى عيال حلوين كده ونلعب بيهم بقى هههههههههههه

وحشتينى ومتزعليش منى ابدااااااااا
موووووواه

منــار فايد يقول...

بسم الله ماشاء الله
عقباااااااااااااااااالك
بنوته زي العسل
واسمها جميل اوي ع فكره
ربنا يباركلهم فيها
وعقبااااااااااااالك تاني برضو


وكل سنه وانتي طيبه

بسمة انور يقول...

ماشاء الله ربنا يحميها
وكل سنة وانتى طيبة ياقمر مع انى مش مفتؤله نوهاااائى

يلا عقبالك بقى يا قمرايه

ستيتة يقول...

خلاص يا بنتي
انا خطبتها بصفتي وكينونتي العمة الشريرة ليوسف بيه كونتينر السيد
والصورة عندك علشان العروسة تعاين
طالما شبهك يبقى من عشرة الاف لمليون
ها
بصفتك بنت عمها قولتي ايه؟

فراشة يقول...

بسم الله ما شاء الله

ربنا يباركك فيها ويجعلها من حفظة القرىن الكريم يا رب

انا بحب الاطفال جدا جدا جدا فووق الوصف وفاكره يوم ما اختي ولدت بنوتتها وشلتها يدوب وهي عندها ساعه وحضنتها ف قلبي وبوست ايديها

ربنا يارب يكرمك بالزوج الصالح والذرية الصالحة وانا كمان يارب وكل بنات المسلمين

الفراشه الحائره يقول...

وحشتتتتتتتتتتتتتتتتتييييييييينى
كل بوست بيعجبنى اكتر من اللى قبليه
ممكن تشرفينى بزيارة مدونتى
http://sotmoaq.blogspot.com/

اول فيديو على صوت المعاق تنويه عن قصة نجاح بالصوت و الصوره http://sotmoaq.blogspot.com/

اول فيديو على صوت المعاق تنويه عن قصة نجاح بالصوت و الصوره

بسمه عبدالباسط يقول...

ما شاء الله ربنا يخليها ويبارك فيها

وعقبالك

فعلا فعلا أحساس شيلك لطفل مولود بيبقى مختلف وانا ياما حسيتة وجربته وبمووووووووت فيه بجد

اقصوصه يقول...

ما شالله حلوه الصعيره

عقبال ما تشيلين بنتك ان شا الله

happy new year

صوت من مصر يقول...

مبروك

Lady E يقول...

منورين يا جماعه كل بإسمه

بجد سعيدة بتعليقاتكم جميعا جمعااااااء :)

Unknown يقول...

بسم الله ما شاء الله
ربنا يخلى ويزيد ويبارك.
عقبالك ياليدى يارب
(معلش عارفة انها
اتقالتلك كتير
بس لازمــن
ولابدن
أقولها
ما ينفعش ما اقولهاش)
أما شيل ال(newly born baby)
فهذا ياحبيتى تخصصى مع اولاد اخواتى
ربنا يسعدك ويفرحك كمــان وكمان.

Unknown يقول...

يعععععع
مين هادا مش حلووووووو اوعك يكون بشبهك :P
هههههههههه
بمزح ما شاءا لله عليها اموووورة
الله يخليها الكم وما يحرمنكم منها ياااارب
وعقبال كل العذابية
والمتجوزين :P