الأربعاء، 2 ديسمبر 2009

ذكريات الطفولة


امبارح سمعت حدوتة أبلة فضيلة الصبح والغنوة اللي بعديها وكمان شوفت فيلم ice age بجد فيلم جميل أوي
حدوتة أبلة فضيلة كانت جزء اساسي من صباحاتي الطفولية وكنت فاكرة ابلة فضيلة هي الفنانة كريمة مختار وفضلت الفكرة دي عندي لغاية لما في يوم سألت ماما وقالتلي ان ابلة فضيلة مش كريمة مختار :)
بمجرد ما سمعت الحدوتة افتكرت البنوتة الصغنونة اللي حبيتها اوي واللي محتفظة بصورتها وهي في اولى ابتدائي في المحفظة بتاعتي
واللي لما زميلاتي في الكلية او صحباتي بيسألوني معاكي صورة ليكي بقولهم أيوة دي أنا وبوريهم الصورة دي :)
حاسة ان عمري وقف عند الفترة دي لأنها كانت من أجمل فترات حياتي
مدرسة اللغات وكل المدرسين اصحاب بابا وكلهم كانوا بيدلعوني وزميلاتي كانوا مفروسين مني :) اشمعنى انتي اللي بيدلعوكي ومهتمين بيكي كده
شيتوس والشوكولاته "شكوكو" انا كنت مسمياها كده هي شوكولاته بتبقى سايحه وبتتاكل بمعلقة صغنونة وال لوليتا في الفسحة
طابور الصبح اللي مكناش بنشوف فيه اي حاجه من طلاب ثانوي الطوال واللي كانوا بيقفوا في الطابور قدامنا
مدرسة الاعدادي اللي جنب مدرستنا ويوم الزلزال لما مدير المدرسة قال لنا ان لو حسينا بهزة الزلزال ننزل تحت الديسك وفضلت اتدرب طول اليوم ازاي انزل تحت الديسك واتخيل الطوب واقع على الديسك وواقع جنبنا ومع ذلك لما حصلت هزة ومع اننا كنا اطفال الا اننا التزمنا بأمكننا ومخفناش عكس مدرسة الاعدادي بنات اللي كانت جنبنا كلهم صرخوا وخرجوا من المدرسة وفزعونا معاهم
هما اللي كانوا اطفال مش احنا :)
حفلات المدرسة والفستان الأبيض المنفوش أبو وردة حمرا بتاعي
والحواديت اللي مستر محمد مدرس الموسيقى كان بيحكيها قبل ما نطلع على المسرح " مرة واحد صياد ضاع منه خاتم كان بيحبه
وبعدين اصطاد سمكة كبيييييييرة فتحها ملقاش الخاتم :) وبعد سنة , سنة كامله اصطاد سمكة كبيرة جدا فتح السمكة لقى جواها سمكة متوسطة وجوه السمكه المتوسطة سمكة صغيرة وجوه السمكه الصغيرة سمكة اصغر منها وبرضه الخاتم مش موجود :) "
تدريباتنا على الأغاني ورقصاتها وانا مكنتش عارفه ايدي اليمين والشمال وكنت بلخبط بينهم فقالوا لنا الايد اليمين اللي بناكل بيها وبنكتب بيها وكان معانا بنوتات بيكتبوا بإيدهم الشمال وكنا متلخبطين اخر لخبطة في البروفات
أغنية القطن قطننا طارح فوق أرضنا ولبسنا الفلاحي والمنديل ابو أويه هو اسمه كده كان شكلنا زي العسل والميك اب بتاعنا كان صعيدي ليه مش عارفه
يوم الأجازة وصلاة الجمعه وبرامج الشيخ الشعراوي
ألبوم عايدة الأيوبي و بعض أغانيها اللي كنت ناسياها واللي لما سمعتها تاني بعد طول غياب حسيت بنفس المشاعر اللي كنت بحسها وانا طفله لما بسمعها وكنت متخيله ان مفيش ناس كتير عارفين عايدة الأيوبي بس في الفترة الأخيرة لقيت فاطيما حبيبتي وشيما وأميرة بيتكلموا عنها وفي أخر كورس أخدته كنت انا وأية زميلتي بنغني أغاني عايدة الأيوبي وعلى فكرة الاغنية اللي في البلوج اهداء ليهم لأني بحبها أوي وشيما فكرتني بيها
الشوكولا و المشروب اليومي اللي كنت بتضايق منه عسل ابيض بالليمون علشان ميجيليش برد ومع ذلك كان بيجيلي برد مفيش فايده :)
انا بحب أوي الفترة دي من حياتي ولما بنقعد في الكلية انا وزميلاتي اللي كانوا في مدرسة اللغات بيبقى أحلى وقت وبنفتكر مدرستنا كانت جميلة أوي والحياه كانت جميلة أوي وان شاء الله اللي جاي جميل برضه
طول ما جوايا الذكريات الجميلة دي هفضل روح طفلة مش عايزة تكبر
يارب الأجيال الجايه يستمتعوا بطفولتهم ويعيشوها صح لأني حاسه ان الاطفال دلوقتي كبروا قبل الأوان

هناك 30 تعليقًا:

Unknown يقول...

هههههه
والله حلوة الطفولة
احنا طقولتنا ما عشناها وحتى شبابنا هلأ كمان ما عشناه متل باقي اطفال وشباب العالم
من انتفاضة لانتفاضة

ربنا يعطيكي طوووولة العمر ويجعل ايامك كلها فرح وسعادة وانبساط
كتير بكون سعيد لما تيجي مدونتي :$

الله ما يحرمني من تواجدك
"انا رديت على اللي بيحكي اني كافر "
بتقدري تروحي لحتى تستفيدي منه :)

Lady E يقول...

Mr.Hazem : للأسف فعلا لبنى بنوتة فلسطينية كانت زميلتي في اعدادي كانت بتحكيلنا عن اطفال فلسطين وكنا في قمة الحزن وهي بتتكلم كانت بتقول ان الاطفال في فلسطين مش بيعرفوا يناموا ومن كتر الخوف بيجيلهم امراض زي مرض السكر غير انهم مش مستمتعين بطفولتهم

وبعدين اطفال فلسطين لازم يكونوا فخورين لأنهم اشجع اطفال في العالم
اطفال بيخوفوا العدو اللي لابس حاجات كتير ومستخبي في دبابة ومع ذلك بيخاف من طفل صغير ماسك حجارة

امين يارب وليك مثل دعائك يا مستر حازم

ربنا يبارك في عمرك بلاش يعطيني طولة العمر دي :)

واكيد طبعا شوفت تعليقك عليه ومعرفش يرد بعدها لأن شكله دخل مدونة غلط

يارب تتحرر بلاد العرب والمسلمين من الظالمين ومن الحاقدين على ديننا وحبيبنا محمد صلى الله عليه وسلم

Cute Kitty **sookra يقول...

صباح الخير ياست طفله انتى
وحياتك انا كمان احلى فترات حياتى كانت وانا طفله
اما الفستان الابيض المنفوش فكانت ماما هى اللى بتعملهولى وكانت بتعملى شنط جميله اوى لدرجه انها مره عملتلى شنطه حمرا وانا فى ابتدائى وكانت فيها ورده بيضا وعجبت كل المدرسات وطلبوا منى ان اخلى ماما تعملهم زيها بس طبعا كل واحده طلبت لون مختلف
اومت انا ماكدبتش خبر وقلتلهم ايديكم بقى كل واحده على مبلغ وقدره
هههههههههههههههه
اصل انا مادويه موت
ههههههههههههه
صباحك شيكولاته

احساس طفلة محبة للرومانسية بس واقعية يقول...

" مرة واحد صياد ضاع منه خاتم كان بيحبه
وبعدين اصطاد سمكة كبيييييييرة فتحها ملقاش الخاتم :) وبعد سنة , سنة كامله اصطاد سمكة كبيرة جدا فتح السمكة لقى جواها سمكة متوسطة وجوه السمكه المتوسطة سمكة صغيرة وجوه السمكه الصغيرة سمكة اصغر منها وبرضه الخاتم مش موجود :) "

هاهاهاهاههاهاهاهاهاها
طيب من غير ضرب انا بعدى من هنا كتير صدقينى وساعات بكتب تعليق كمان بس كل مرة لازم تحصل حاجة تخلينى اقفل الصفحة وامشى او افضل فتحاها وامشى لغاية لما اجى اقفلها وانام :(
اوشكت على النزول مصر وما ادراكى بكم اللخبطة اللى الواحد فيها

نيجى لصور اللقاء شفتى جبتك منين
شكرا ليكى بجد انك نزلتيهم وكمان الصور اللى معاهم
صورة النيل عجبتنى اوى وسيفتها وجيت اعملها خلفية للجهاز بس لقتها صغيرة اوى

وبعدين متقريش التعليقات الرخمة اللى الشخص دا بيبعتهالك اصلا متفتحيش الرسالة اللى تجيلك بأسمة وريحى نفسك يا قمر مع الوقت يمكن يفهم انه بيضايقك حتى لو قاصدة خير الالحاح وحش

البوست بقى بتاع النهاردة جبار
انتى بتقولى يلا كل واحد يفتكر ذكريات الطفولة فى عز ما هو حاسس بالمسؤلية والدنيا بتجرى من حوالية يرجع هو لوراء دا اللى حستة فى البوست وافتكرت معاكى الكورال اللى فى المدرسة والفستان الابيض المنفوش ابو ورد بامبى واصفر صغير فى الجنب كدا
( مكنش احمر :p )

الاغانى بقى فمفيش ذكريات نهائى عندى ليها قبل البوم عمرو دياب ليلى نهارى
يمكن لفيروز فى شوية بحكم حب بابا القوى جدا ليها بس مش اكتر من كدا

الشعراوى ربنا يرحمه يوم الجمعة وكل يوم فى رمضان قبل الافطار والفيلم الاجنبى اللى يوم الجمعة الساعة 3 العصر
لو افتكرنا ذكريات الطفولة دائما مظنش هيكون فى شر فى الدنيا لا هتصاحبنا البرائة طول ما الذكريات قدمنا

دمتى بكل خير
تقبلى مرورى

Lady E يقول...

sookra : صباح ومساء الورد يا سكرة واتفقنا على روح طفلة مش طفلة والا هحرمك من الشوكولاته انتي حره :)

ما شاء الله يا سكرة ربنا يبارك في مامتك ويخليهالك يارب انا كمان ماما كانت بتعمل لي فساتين وحاجات جميلة جدا وانا طفلة وكان برضه كل اللي يشوفها يعجب بيها

هههههههههه ولا مادوية ولا حاجه اومال يعني كنتي عايزاهم يستغلوكي ولا ايه دول كل المدرسات يعني مش مدرسة ولا اتنين

مسائك شوكولاته حجم عائلي :)

Lady E يقول...

احساس طفلة محبة للرومانسية بس واقعية : هههههههههه يعني انتي عارفه ان فيها ضرب

انا مصدقاكي جدا لأن على طول بشوفك في المدونة اصلي مكشوف عني الحجاب وبعرف مين اللي دخل مدونتي :)
وعارفه انك متابعه وعلى فكرة نفس اللي بيحصل معاكي في مدونتي بيحصل معايا في مدونتك بجد :) سبحان الله المدونات عند بعضيها

تيجي بالسلامة يا حبيبتي وأكيد عارفة كم اللخبطة وضيق الوقت اللي بيكونوا قبل السفر ربنا يكون في عونك وان شاء الله بعد ال stress ده ترتاحي في مصر

انا نزلت صور اللقاء علشانك يا احساس طفلة وسعيدة انهم عجبوكي وسيفتيهم كمان وممكن تعمليها خلفيه للجهاز بس تروحي من سطح المكتب كليك يمين وبعدين properties وبعدين desktop
وبعدين position و stretch
كده الصورة هتكبر بس مش عارفه هيبقى شكلها عامل ازاي هتبقى صافية ولا لما تكبر هيبقى شكلها مش حلو عالعموم جربي

عندي احساس قوي انه مش هيضايقني تاني يا احساس طفلة وان شاء الله احساسي صح
وبعدين ازاي قصده خير وهو عارف وقاصد انه يضايق ؟ معتقدش ان قصده خير اطلاقا

احساسك مضبوط وصحيح جدا يا قمرايا
ده قصدي من البوست :)

انتي كمان كنتي في الكورال يبقى ان شاء الله هتغني معانا اغاني فيروز لما نتقابل :) وكمان فستانك كان ابيض شكل مدرساتنا كانوا متفقين على لون الفستان بس الورد مختلف :) وكمان الوردة الحمرا كانت في الجنب :)

الاغاني ف انا كنت بسمع كل الألبومات الجديدة والقديمة كمان :) فعندي ذكريات كتير مع الموسيقى عامة وبعدين كفاية فيروز لواحدها وذكريات اغانيها
وليلي نهاري ده قريب جدا لسه طالع من حوالي 5 او 6 سنين

سعيدة انك افتكرتي كل الذكريات الحلوة دي واكيد بتفتكريها مع سومه كمان ربنا يباركلك فيها ويحميها يارب

عاشقه الرومانسيه يقول...

اتمنى انك تظلى محتفظه بروح الطفله دى جواكى حتى اخر العمر
(:

Ahmed يقول...

ياسلام ياسلام

ايه الطفوله البريئه ديه ياستي؟ ياسلام ياسلام

اللي ميعيش طفلوته, هيفوته كتير وهيعيش طول عمره حاسس ان فيه حاجه نقصاه
مش لازم يعيشها اوي يعني, بس على الاقل لما يفكر فيها يفتكر ولو مواقف حلوه

MaNoO يقول...

يااااااااااااه الطفولة حبيتها وكرهتها مش عارف ليه بشتاق ليها بس لانى طبعى بيكره الماضى مش عايز ارجعلها لا بس فاكر الحياة واوائل الطلبة ورحلات المدرسة واللب فى الفسحة واللوليتا كمان وجوليو والنوجة
أطفال الايام دى ملحقوش كلمة طفولة خلاص بجد والله جو تانى وحياة كبيرة اعتبر انه غلط عليم لانهم لازم يعيشوا كل حاجة فى وقتها بجد

يوميات شاب منوفى يقول...

الطفولة احلى فترات العمر كلها زكريات حلوة كل ما الانسان بيكبر بيتمنى يرجع ضغير وبيحس بالحنين للطفولة وشقوتها هيااااااااااااة فكرتنى بالذى مضى

صوت من مصر يقول...

مش هقولك غير اغنية بحب اسمعها
"" وفاتت سنين كتيرة وبقت الطفلة بنت كبيرة وراحت العجلة والضفيرة وحلم حياتها تكون اميرة "

مي يقول...

احلى فترة عندى الطفولة واقعد ابكى على الاطلال جنب لعبى نيهااااا
بس لسة بعيشها اصلى دلوعة البيت سااعات بس ساعات تانية اغنى والله يازمن زرعنا الشوك
بوست هايل تسلم ايديكى ياقمر

Somaya Kamal El Din يقول...

شكلى كده هنتحر بعد البوست ده

ياااااااااااه

اسؤا مرحلة عشتها كانت طفولتى ولغاية حتى الثانوى

بس حلو ان يبقى الواحد عنده ذكريات جميلة يفتكرها حت لو مكانتش ذكريات طفولة

ياااااا رب دايما مبسوطة وتحققى اللى نفسك فيه
وتفضلى دايما كده طفلة مش عاوزة تكبر

فراشة يقول...

ليدي العسووووولة قوي
ازيك يا جميلة وحشاني

ذكرياتك جميلة قوي بجد
انا طول عمري نفسي ادخل ف الكورال بس كنت بتكسف اقول ل المس ومكناش بنعمل حفلات اصلا ههههههههههههه

بس ايام جميلة قوي انا بحب طفولتى قوي
وكان نفسي افضل طفلة على طوووووول

ربنا يخلي ايامك كلها حلوة يارب

مجرد حلم صغنتوت يقول...

أحلى حاجة في الطفولة اننا مكناش شايلين هم حاجة
كنا بنعيش كل لحظة زي ما هي.. كنا سهل اوي نضحك ونفرح مش زي دلوقتي
بجد ايام مش هتتعوض
فكرتينا بالذي مضى يا ليدي :)

الشعب لابد له من حكومه تشكمه يقول...

وبعدييييييييييييييييين انتى قصداها باه...
مش عارفه اركز فى البوست خالص من الاغنيه وانتى عارفه انى بحبها اوى:(
كل متخلص اشغلها تانى ومش عارفه اقرا ولا كلمه .
اعمل فيكى ايه دلوقتى؟؟؟؟؟؟؟؟؟؟؟؟

الشعب لابد له من حكومه تشكمه يقول...

ابله فضيله دى حبيبتى حبيبتى يوم الجمعه باه كانت بتيجى الساعه 9 ونص بدرى شويه وتقعد هى وشويه عيال كده وانا ابه بباه منبهره هههههههههه..
حبيبتى ابله فضيله دى تعرفى انا كنت بسمعها لحد الجامعه اه والله لحد الجامعه بس بعد متخرجت مبقتش اسمعها ليه مش عارفه:)

لوليتا ياااااااااااه بقالى كتير اوى مأكلتهاش:)يخرب عقلك فكرتينى بيها جنا كنت ناسياها.

على فكره باه انا كنت مع ماما فى المدرسه وكنت مشهوره اوىىىىىىىىىىىى وعمرى محضرت الحصه الاخيره كنت بروح ماما كوسه يابنتى:))

انتى فييييييييييييييييييييييييين؟؟؟؟؟؟؟؟؟
مش عارفه اقفشك على الميل خالص.

Lady E يقول...

عاشقه الرومانسيه : وانا كمان اتمنى :)

Maram يقول...

تصدقي انا مش فاكره من طفولتي غير اللي كنت بحبه في كي جي و اصحابي اللي كانوا في كي جي واني كنت معروفه حبتين انا واختي علشان استعراض عملناه في مسرح المدرسه وانا في اولي ابتدائي والأمهات كانوا بيقعودوا يسلموا عليا لحد سادس ابتدائي بسبب العرض ده مع انه كان عادي يعني :ى متواضعه انا ...المهم انا معاكي ان دلوقتي بقت الاطفال مش مقدرين اد ايه الطفوله حلوه ومش قادين يستنوا لحد ما يكبروا يمكن ده بسبب الحياه اللي بنعشها انها مفيهاش مكان للصغار !!!

بوست جميل اوي

Lady E يقول...

أحمـــــــــــــد أبو العلا : لأ لازم يعيش طفولته اوي يا انجينير من حق كل طفل انه يعيش طفولته لأنها المفروض بتديله دفعه لباقي مراحل حياته

Lady E يقول...

MaNoO : حلوة الذكريات دي يا مانو

وفعلا للأسف اطفال دلوقتي مش اطفال ولا كبار

Lady E يقول...

صوت من مصر : سمعت الاغنية مع اني مش بحب الاغاني الراب بس فعلا كلماتها واقعيه

Lady E يقول...

يوميات شاب منوفى : بيتمنى ترجعله تلقائيته وانه ميشيلش مسؤليات ويفرح باللعب والفسح والشوكولاته زي لما كان طفل

Lady E يقول...

مي : هههههههههه وانا كمان :)

انتي اللي هايله يا مي

نورتيني

Lady E يقول...

Somaya Kamal El Din : ليه كده بس يا سمية ؟ لو دورتي هتلاقي ولو ذكرى واحده حلوة في طفولتك

وبعدين احنا اتفقنا في روح قبل طفله

رووووووووح طفله مش طفله هناك فرق

Lady E يقول...

فراشة : وانتي كمان وحشاني يا قمرايا

عادي يا بنتي مدخلتيش في الكورال بس بعد كده بقيتي بتعزفي للكورال ايوة يا عم مين ادك :)

امين يارب واياكي

Lady E يقول...

مجرد حلم... صغنتوت : أينعم كل ده كان في طفولتنا ونفسي كل الحاجات الجميلة دي ترجع تاني

Lady E يقول...

الشعب لابد له من حكومه تشكمه : ههههههههههه ماااااااااشي ما هو ده جزائي علشان بخليكي تسمعي حاجه بتحبيها وانتي بتقرأي

Lady E يقول...

الشعب لابد له من حكومه تشكمه : ابلة فضيلة ليها اسلوب بيبهر وبيشد الاطفال بس اطفال جيلنا

يا ترى الاطفال دلوقتي بيحسوا بإيه لو سمعوا ابلة فضيلة ابقي طبقي التجربة دي على مودي :)

هههههه ايوة يا عم واسطة في المدرسة مين ادك :)

Lady E يقول...

MaraM : ايه االتواضع ده كنتي سوبر ستار في المدرسة وتقوليلي العرض كان عادي :) طب ازاي ؟

مش موضوع مش مقدرين موضوع انهم مش لاقيين اغاني وبرامج ليهم فبيتفرجوا ويسمعوا اغاني وافلام الكبار حتى لبسهم بقى شبه الكبار للأسف ضاعت الطفوله عند اطفال كتير