الجمعة، 1 مايو 2009

توهان توهان اخر توهان


دخلنا في شهر جديد الحمد لله وكمان يوم جمعه يعني ان شاء الله يبقى شهر مبارك ومش خنيق علشان امتحاناتي فيه ولا حاجه هههههههه ربنا يستر

عندي كلام كتير والغريب اني عاوزة اتكلم وفي نفس ذات الوقت اريد ان اسكت واصمت واتنح وخلاص :)

حلمت حلم من كام يوم خير اللهم اجعله خير اني كنت بشتري اسدال ابيض والاسدال ده كان عاجبني جدا وكان عاجبني استايلو كنت اول مرة اشوف اسدال قطعتين في الحلم وخالتو وماما كانو معايا وكانو معجبين بالاسدال برضه طبعا حكيت لماما على الحلم ده ومرضيتش تقولي تفسيره وقتها :) بعيد عنكو

ويوم الاربعاء اللي فات ده اكيد القاهرة ازدادت نورا لأني كنت فيها ده على اساس اني لمبة نايلون يعني :)
كنت رايحة المطار انا وخالتو علشان نستقبل مامتي لأنها كانت مسافرة وانا نجحت اني اتماسك ومقولش لحد على سفر ماما علشان محدش يقوللي يا عيني توأم ليدي مسافرة بس ايه اخر اسبوع وماما مسافرة كنت حاسة ان روحي رايحة وخصوصا ان في نفس ذات الاسبوع اتصدمت في شخصية غالية عندي وكمان الامتحانات جايه يعني كان اسبوع شلل م الاخر

اول مرة اسافر على الطريق الدولي الساحلى وماما او بابا ميكونوش معايا وخالتو دليل فاااااشل كانت بتتوهني
والحقيقة احنا متوهناش الا في قاهرة المعز لدين الله ومتوهناش اكتر الا في طريق المطار
بدل ما نروح المطار القديم روحنا المطار الجديد نياهاهاهاها وبعدين فضلنا نلف ونلفلف وكل لما نسال حد يتوهونا اكتر المهم خالتو سألت ظابط في المطار
قالتلو
نروح المطار القديم ازاي ؟؟
قال لنا : هتلفو المطار الجديد كله وبعدين هتمشو على طول ويمين في شمال في يمين في شمال في شمال في يمين هتلاقو المطار الجديد
قولتله :
مش هلاقي مقلة لب في الأخر ؟
قاللي : مين؟
قولتله : لا ولا حاجه شكرا

ومشيت انا وخالتو نقول
ولما تلقى مقلة لب تعرف بإنك توهت وضعت دي وصفة سهلة دي وصفة هايلة
ومشينا حسب الوصفة لقينا نفسينا رجعنا تااااني لنفس ذات المكان
اتاري الأرض كروية وينسون وشاي كمان
بقول لخالتو سبحااااان الله المطار القديم بقى شبه الجديد كده ليه ؟؟ وايه اللي جاب الظابط اللي سألناه هنا هو راح المطار القديم ولا ايه ؟؟ واكتشفنا اننا رجعنا لنفس ذات المكان تاني في المطار الجديد تقريبا عارفين ان هو ده المطار اللي بنسافر عليه دايما وهيسترية ضحك جت لنا انا وخالتو
خالتو : صالة الانتصار اهي
انا : انتصار مين يا خالتو؟ دي صالة الانتظااااااار عاااااا
خالتو : ايوة صحيح صالة الانتصار
انا : هو قرش فراخ كنتاكي اللي كنتي عاملاها هو اللي عمل فينا كده ههههههههه ايه التهييس اللي احنا فيه ده

وبعد لف تلت ارباع ساعة تايهين بلاد تشيلنا وبلاد تحطنا وفي كل الاتجاهات بلاقي مكتوب طريق العروبة لغاية لما كرهت العروبة ذات نفسيها
اخيرا وصلنا المطار القديم اللي مبقاش قديم وبقى مطار مز بصراحة معجبة بيه
واحتمال اغير فكرتي عن مصر للطيران علشان اسافر من المطار القديم
وطبعا لازم اركن قدام صالة 3 صول ومفيش اي مكان فاضي في الباركينج وخالتو

موصرة اني اركن في الباركينج بتاع صالة 1 بتاعت السفر وانا راسي وبرانيط البلد مش هركن الا في الباركينج بتاع صالة 3 وصول

صورة للقاهرة من الطيارة

واخيرا لقيت مكان وركنت
وبعد شوية انتظار , لمحنا ماما وهي بتخلص اجرائات الخروج والله من غير مبالغة قلبي رفرف ولما ماما خرجت جريت عليها وحضنتها ولقيت الناس كلها بتبصلي وانا في عنيا نظرة على فكرة مش مهتمة بنظراتكو خالص
مامتي حبيبتي ووحشاني والله حسيت ان روحي رجعتلي وقولت لماما الحمد لله على السلامة نفسي افضل في حضنك كده ومسبكيش خالص بصراحة احرجت البونيه ههههههههه
وروحنا للكتكوتة الغلبانه ومشينا وكل شوية ماما تعملنا مفأجه وتقول لنا عملالكو مفاجئة وانا وخالتو فعلا كنا بنتفاجأ ماما وبابا جابلونا حاجات كنا بنفكر بس فيها يعني مطلبنهاش اصلا , بس هما حسو بينا سبحان الله
هو ده الحب الحب الشوق الشوق هههههه بيفهمونا من غير ما نتكلم

وماما قالتلي عارفة الاسدال معناه ايه في الحلم المهم عرفت ان معناه اننا هنروح الدار التانيه واحنا التلاتة
عادي علشان نونس بعضينا :)

المهم واحنا راجعين حصلت كذا حاجه منها اننا ضللنا الطريق كذا مرة وروحنا بورسعيد بدل دمياط من ناحيتين مرة من ناحية القاهرة ومرة تانيه من ناحية دمياط وطريق بورسعيد ده مكسر وانا مبحبش امشي من عليه اصلا عاااااا
وكمان كنت بمشي على 140 وماما كانت بتزعقلي عااااااا وبتقولي حرام عليكي الكتكووووتة وانا كان نفسي امشي على 200 بصراحة ولو في سرعات اكتر من كده كنت مشيت عليها بس الكتكوتة صعبت عليا

وقابلنا كذا لجنة واخيرا سألو على الرخصة حسسوني ان لها قيمة ومع كل ده كنت بقول لماما وخالتو هو الاسدال مفيش غيره هو اللي عمل فينا كده لازم احلم بيه يعني عااااا

والحمد لله الرحلة كانت جميلة وكانت هي الرحلة الاخيرة قبل الانطحانات وربنا يستر باقي من الزمن أقل من اسبوعين عااااااا

هناك 36 تعليقًا:

حسام غانم يقول...

الأرض كروية وينسون وشاي اه

حمد الله عالسلامة

الشاعر الحزين يقول...

ممكن ألحق التعليق الاول ؟؟؟

أعتقد يعنى انه التعليق الاول

أوعى تكسفينى ومش يكون الاول

عموما ان شاء الله الاول

أقرأ وأرجع بقى

الشاعر الحزين يقول...

ألف مليون حمدا لله على سلامة والدتك ووالدك

والحمد لله ان أنتوا موصلتوش الصومال فى رحلة التوهان دى

ههههههههههه

تحياتى وسلميلى على الكتكوته

عاشقه الرومانسيه يقول...

حمد الله على سلامة ماما وربنا يخليها لك يااااااااارب
وخلتوا كمان دى عسسسسل
ربنا يبارك لك فيها
وان شاء الله الامتحانات تعدى على خير

MaNoOoSh يقول...

حمد لله على سلامة ماما وبابا
والمطار فعلا بقى حاجة لظيظة مع انى مشفتوش غير مرة واحدة بس من شهرين كدة
المهم بقى مفيش كاتوه كدة وللا ببسى ولاحتى كروية؟
ربنا معاكى فى الامتحانات وقومى ذاكرى بقى شوية وسيبك من النت شوية.

Lady E يقول...

حسام غانم : حد يقول على الأرض كده برضه يا حسام ليه هي قهوة ولا شوفي كوب

الله يسلمك من كل شر

وايوة كده قلبك ابيض زي البالطو اللي بتلبسه في الكلية

منور اول تعليق

Lady E يقول...

الشاعر الحزين : هو مش اول تعليق بس ممكن نقول الأول مكركر :)

الله يسلمك من كل شر يا شاعر

والحمد لله ان احنا موصلناش الصومال فعلا هههههه بس اشمعنى الصومال يعني ليه مش السودان الاول ؟؟

وعلى فكرة الكتكوتة مش بتسلم على رجاله وخصوصا لو كانو بيكتبو شعر

Lady E يقول...

عاشقه الرومانسيه : الله يسلمك من كل شر يا حبيبتي

اللهم أمين

ويااااااارب الامتحانات تعدي على خير فعلا وابقى خلصت من السنة الكبيسة دي

بجد يا دودو انتي انسانة جميييييييييلة

نورتيني

Lady E يقول...

MaNoOoSh : الله يسلمك من كل شر يا حبيبتي

الحقيقة المطارين الاتنين حلوين بس دلوقتي المطار القديم بقى احلى من المطار الجديد

وبوفيه المدونة مفتوح يا منوش اطلبي واتمني اي حاجه هتلاقيها هنا اوبن بوفيه :)

وبلاش قومي ذاكري دي عاااااا الكلمة دي بتنرفزني

نورتيني يا قمرايا

ستيتة يقول...

ده انا تهت وانا قدام الشاشة ومرحتش في حتة
حرام عليكي
عااااااااااااااااااااا
دي ليلة التوهان فعلا

وبعدين مين قال لكم تفسروا الرؤية
سبحان الله
مش يمكن كان ليها معنى مختفي تحفة
قولي خيرا لنا وشرا على اعدائنا وسيبي تؤيلها لربنا يمكن تكون حاجتين حلوين مكملين لبعض يجولك على حين غرة

حلوة غرة دي

حمد الله على سلامة ماما وربنا ميحرمكوش من بعض بوتيتا

بنجاواتى يقول...

اهلا بكم فى مصر

على فكرة السواقة على 120 بطيئة اوى

بس انتى واضح ما شاء الله انك حافظة الطرق زى اسمك

ربنا يستر وما تكونيش حافظة المواد قوى كده برضه علشان ما تطلعيش الاولى

بس انتى قلتى للظابط ش هلاقى مقلة لب فى الاخر؟
مش عارف ظباط اخر زمن مش عارفين اماكن مقالى اللب-ايه مقالى دى؟؟المهم جمع مقلة يعنى-

وبالتوفيق يا رب فى المذاكرة والامتحانات

غير معرف يقول...

حمد لله على سلامه ماما
المطار فعلا لوحده دوخه
كنتاكي بيعمل دماغ فرفشه دلوقتى
ده كان اي فرع ده علشان نفرفش شويه؟؟؟

هانى زينهم يقول...

حصلى نفس الموقف ده بالظبط وتهت يجى ساعتين بس انا كنت بالعكس كنت عايز المطار الجديد فدخلت القديم . هى بلدنا كدة ومش هتتعدل . ربنا معاكى فى الامتحانات وان شاء الله تبقى سهلة عشان تخلصى بقى .

شاب كــ طخين ـــــا يقول...

حمدلله على سلامه ماما
وكويس اوى انك عرفتى ان الأرض كرويه هههههههههه

وزى ما منوش ماقالت فين الجاتوة او اى حاجه يعنى مش ينفع كده :D

فى رعايه الله
سلام

MǿиY El-Shreef يقول...

هههههههههههههه

الف حمدلله ع سلامة مامتك

وباين ان خالتك دي زي العسل وانتي طالعالها :D

ماتغيبيش ياسكر بقى تاني

اه صحيح

ربنا معاكي ف الاكزامات

♥نبع الغرام♥♪≈ يقول...

السلام عليكم
جميل قووى حلمك ياحبيبتى
الحمد لله انه كان حلم
وحمدآ لله على سلامة ماما وبابا
وربنا معاكى ياحبيبتى
نصيحه ابقى اتغطى وانتى نايمه
ههههههههههههههههههه
عشان ما تحلميش تانى
بجد انتى جميله قووى
ربنا يوفقك
ويبعد عنك اى شر
تحياتى
إيناس

♥نبع الغرام♥♪≈ يقول...

وبجد انا اللى بحبك
طب طالما اسمى عجبك
ممكن تاخديه ياحبيبتى ما يغليش عليكى ياحبيبتى
ربنا ما يحرمنى منك أبدآ ياقمرايه
ونفضل أخوات كده على طوول
أختك أنوس
نوسه النوسه كونوسه
ههههههههههههههه

SHAPE YOUR LIFE (ABOALI) يقول...

والله انتى شرابات وملابس واسدال

ومصر كانت مكورة يوم ما شرفتيها

وعجبىىى

شفـقــة و إحســــان يقول...

حمدالله على سلامتهم
بس انا ماليش دعوة انا عايزة اسدال زى اللى فى الصورة
عااااااااااااااااااااااا

Bent Men ElZman Da !! يقول...

والله انتى تحفه هههههههههههههههههههههه
حلوه اوى الارض كرويه وينسون وشاى دى
وانا عماله اقول ايه العلاقه
طلعت استعابى ضعيف اوى هههههههههههه
المفروض بعد التوهان ده كله تعمليلنا خريطه بطرق المطار اكيد بقيتى خبيره فيه
الحمد الله انك خرجتى منه على خير
و حمد الله على سلامه مامتك يا قمر
وربنا معاكى فى امتحاناتك
وكل شهر وكل اسبوع وكل يوم جمعه وانتى طيبه :)

Ahmed يقول...

Lady
ازيك وحمدلله على السلامه ويارب ميكتب على حد أي فراق

بصي ياليدي

انا بس عايز أقولك تفائلي خير بالأحلام ديه
ممكن يكون الأحلام ديه ليها تفسيرات مختلفه

انا معرفش في التفسير, بس ربنا يكتبلك كل خير وتخلصي الامتحانات على خير ان شاء الله

كيكى عوووووو يقول...

نحمد الله انك وصلتى سالمة غانمة الى ارض الوطن!!!
وانك كتبتى البوست دة اصلاااا
ونبى اتغطى كوووووووووويس
عووووووووووووووووو

ELMASRYA - MRS WRITER يقول...

هههههههه

حبيبتي الليدي الكتكوتة

أولا حمدا لله على سلامة ماما حبيبتك وربنا يخليكوا لبعض يا روح قلبي ومايحرمكوش من بعض أبدا

إيه حكاية الضياع اللي كنتم فيه ده؟

وقرش الكنتاكي اللي خلاكم تهيسوا؟

هههههههههه

ربنا يسعدك ويفرح قلبك

طرقة وصفك للمشوار تححححححفه

يللا بقى يا جمله ركزي في المذاكره

هانت يا توته خلاص

موااااااااااه

moory-mero يقول...

السلام عليكم و رحمة الله و بركاته

حمد الله على سلامة ماما يا حبي وان شاء الله تفضل معاكي دايما وربنا يخليكوا لبعض يارب

وربنا يقويكي في امتحاناتك يارب

بس انا زحلانه منك عثان الثلعه دي خافى حلى نفثك عثان حايزاكي يا قمر وكل اللي بيحبك حايزك

ربنا يحفظك يا ثكل
وحثتييييييييني خالث يا قمرتي
في رعاية الله

dramaqueen يقول...

حمدالله على سلامة طنط
وربنا يوفقك فى امتحاناتك يا سكر

بجد بامووووت فى مدونتك

باحبك اوى

انا ماما يقول...

حمدلله على سلامة ماما
اهم حاجه انك لفيتي الدنيا اكيد كان حلمك تسافري كتير واديكي حققتيه
ركزي بقة في المذاكرة وربنا معاكي ومعانا وكل اللي بيمتحنو

Mony يقول...

أي ثياب للمرأة في المنام ساترة تأويلها سعة الحال والبياض الدين والأخضر جودة الدين أيضاً والأسود سوء ... يعني الحلم تأويله جميل جداً :)

لكن غلط جداً حد يأوله .... لو في أي حلم (في شك) .. زي ما الدكتورة ستسته قالتلك كده تقولي الدعاء وتتفلي على يسارك فلا يضر ولو كان حلو زي كده تحكيه لأحب الناس لو كان له في التأويل وإلا بلاش منه خالص :)

حمدالله على السلامة لكم جميعاً
تحياتي :)

تامر علي يقول...

أي ثياب للمرأة في المنام ساترة تأويلها سعة الحال والبياض الدين والأخضر جودة الدين أيضاً والأسود سوء ... يعني الحلم تأويله جميل جداً :)

لكن غلط جداً حد يأوله .... لو في أي حلم (في شك) .. زي ما الدكتورة ستسته قالتلك كده تقولي الدعاء وتتفلي على يسارك فلا يضر ولو كان حلو زي كده تحكيه لأحب الناس لو كان له في التأويل وإلا بلاش منه خالص :)

حمدالله على السلامة لكم جميعاً
تحياتي :)

تامر علي يقول...

معلش (المودام ) كانت داخله باسمها وانا علقت فطلع باسمها وانا علقت تاني ... توء سفاهم عائلي يعني :)

احساس طفلة محبة للرومانسية بس واقعية يقول...

مطاااااااااار القاااااااااااهرة
اااااااااااانتى عايزة تروحى هناك ومتوهيش وتكونى كمان مش من القاهرة

دا كفاية الزحمة اللى فى الطريق بتاعة تتوه بلد

حسيت بأحساسك يا ليدى لما شفتى مامتك
عنيا دمعت لما قريت كلماتك وافتكرت المشاعر دى

ربنا ميبعدهاش عنك ولا يبعدك عنها ويخليكم لبعض

تقبلى مرورى

Enas Amen يقول...

ههههههههههه


عسل اوي يا ليدي

يا سلام لما الواحد يتوووووووه . . يا سلااااااااام

Lady E يقول...

ستيته حسب الله الحمش : ما هو من كتر ما كنا تايهين التوهة وصلتلك يا دكتر

وحاضر هقول خيرا لنا وشرا على اعدائنا

وحلو اوي تأويل الحلم بالشكل ده يا دكتر

ربنا يكرمك ويسعدك

نورتيني

Lady E يقول...

بنجاواتى : اهلا بيك يا بنجا

وعلى فكرة انا عارفة ان السواقة على 120 بطيئة علشان كده مشيت على 140 :) ولو الكتكوتة مساعداني كنت مشيت اسرع

وايه ده عرفت منين اني حافظة المواد زي الطرق واكتر !! ربنا يستر في الانطحانات

والمفروض يدو الظباط كورسات في اماكن مقالي اللب :)

دمت بخير وربنا يوفقك في امتحاناتك

Lady E يقول...

biberss222 : الله يسلمك من كل شر

كنتاكي فرع خالتو ههههههه اصل هي مرضيتش نروح اي فرع وعملته في البيت

Lady E يقول...

هانى زينهم : انتا كمان يا مستر وساعتين مش ساعة واحدة كويس ساعة ليك وساعة للمودام :) طب مفيش ساعة لملك كمان

يعني الناس كاتبين يفط ولوحات كتير معظمها مكتوب عليه العروبة هيعملو ايه اكتر من كده هيقطعو نفسيهم يعني عاااااا

ابتسم يا مستر الناس في المطار مش عارفين عمان عاصمة الاردن من عمان بالضمة سلطنة عمان يبقى هيعرفو يقولو الطريق صح !!

Lady E يقول...

أمبارح كان عمرى عشرين : الله يسلمك من كل شر يارب

وبعدين مشوفتش بوفيه البلوج ولا ايه

ده فيه كل حاجه جاتو وتورتات وحاجه ساقعه كمان :)

في رعاية الله