الجمعة، 8 مايو، 2009

الى كتكوتي واغلى اخت وصديقة كيكي


بصي بقى يا اختي انتي عارفة انتي ايه بالنسبة لي؟؟ لو مش عارفة هقولك

انتي اغلى واحلى واجمل اخت وصديقة عرفتها في حياتي

انا مش بعرف اقول كلام جميل ورومانسي بس والله انتي فعلا قاعدة جوة قلبي ومستربعه فيه كمان وهفكرك بشوية حاجات

اولا : انتي اللي شجعتيني اني اعمل بلوج بالرغم اننا مكناش نعرف بعض بس حبيت البلوج بتاعك وعملت بلوج علشان ابقى من الأسرة الجميلة دي واتعرف عليكي - معجبة بقى مش اي حاجه-


ثانيا : في بداية البلوج بتاعي كنتي بتزوري بلوجي ومش زي اي حد بتكتبي كومنت وتمشي لأ كنتي بتعملي جو جميل من المرح والأخوة والحب وفي الوقت ده انا كنت محتاجه تشجيعك جدا ووقوفك جنبي شوفتي بقى انتي السبب في اني استمر في البلوج واصدع المدونين ببوست جديد كل ثانيه :)


ثالثا : مش بقبل حد يقوللي نونتي الا انتي لأنك مش اي حد


رابعا : كان نفسي اتعرف عليكي جدا لأني كنت حاسة انك جوهرة وانسانة معدنها ذهب وان اي حد يتشرف بمعرفتك وصداقتك ولما عرفتك لقيت انك احسن من كده كمان


خامسا : فاكرة لما اتكلمنا ودردشنا عالايميل حبينا بعض في الله وبعدين عرفنا موبايلات بعض وبدانا نبعت لبعض مسجات وانا كنت في عمان وقتها وانتي في مصر ومع ذلك كنتي بتبعتيلي مسجات كل يوم تقريبا ومتتخيليش المسجات دي كان بتحسن نفسيتي اد ايه وخصوصا لما بكون مضايقة وبتحسي بيا وتخففي عني واحنا بعيد عن بعض 5000 كيلو بس كنتي بتحسي بيا وانا كنت بحس بيكي


سادسا : فاكرة لما كنا بنستنى رمضان ولما جه رمضان كنا بنوصي بعض وبنشجع بعض على قراءة القرأن وصلاة التراويح والمسلسلات كمان :)


سابعا : فاكرة كل كلامنا وضحكنا سوى فاكرة لما كنتي جنبي في كل ازمة مريت بيها


بصي يا كيكي انا يمكن مقابلتكيش ولا مرة لكن بحبك اكتر من صديقات عرفتهم وشوفتهم لأنك بجد انسانة رائعة ودلوقتي مبقاش في صداقة بمعناها اللي احنا وصلنا ليه نادرا لما تلاقي حد بيحبك في الله

تفتكري بعد كل ده مش هتفرقي في حياتي

بجد حياتي من غيرك ملهاش لازمة وقوليلي بقى لما احنا الاتنين دلوقتي نفسويا مش متظبطين واحنا الاتنين عندنا انطحانات طب ايه؟؟
نستورد اصدقاء من بره ولا ايه

كيكي بجد انا خايفة عليكي جدا وحاسة اني متكتفة ومش عارفة اعمل حاجه ومضايقة لأنك مضايقة وخصوصا بعد اخر كومنت ليكي وكمان لما كلمتك عدي الجمايل دي المكالمة اللي عدت ال40 دقيقة نياهاهاها

واللي زاد الطين بله لما دخلت مدونتك ولقيتك كاتبة


أمانه عليكم..ربنا شاهد عليكم
امنتكم امانه لو فى يوم من الايام فلسعت..اتسممت..اتكهربت غبت فى ظروف غامضه او بمعنى اصح اتنقلت الى الرفيق الاعلى ادعولى بالرحمه وادعولى كتير اوى اوى ومش عايزة حد يعيط ويسيب كومنت اى كلام واتشقلط كدة لالالا ومحدش ينسانى ادعولى ادعولى ادعولى لمه والله ما اخليكم تتهنوه باى حلم واجى فى كوابيسكم واقولكم عووووو امانه وربنا شاهد على الى قراها

بصي يا اختي لو كان الانتقال للرفيق الأعلى هو الحل لكل همومنا ولو كانت دوا لقلوبنا كنت هاخد اول توك توك واجيلك علشان ننتقل للرفيق الأعلى سوى لكن مش ده الحل وبعدين هو احنا عملنا ايه للدار التانيه علشان نروحها واحنا منشكحين اوي


ربنا يفك كروبنا ويوفقنا وربنا يسعدك ويروق بالك وهقولك زي ما بتقوليلي انتي غاوية تتعبي قلبي معاكي؟ فكك فكك فكك
واي خدعه بوست استثنائي ليكي يا رب يرفع من روحك المعدنية وتعرفي ان في حد بيحبك بجد يا حبيبتي

هناك 22 تعليقًا:

عاشقة الأحزان يقول...

اول تعليق ولا ايه
ههههه

عاشقة الأحزان يقول...

السلام عليكم
كلام جميل قووى وصعب فى نفس الوقت قوى قوى
يارب تدوم المحبه دى على خير
وتفضلم حبايب على طول كده يارب ويسعدكم
بس ليه اليأس ده بجد حرام والله بكيت قووى على أخر البوست
ربنا يفك كربها يارب وترجع أحسن من الاول يارب
دمتم بألف خير
تحياتى إيناس

Lady E يقول...

عاشقة الأحزان : ايون ايون يا انوس اول تعليق والف مبرووووك كسبتي معانا الجايزة الاولى

Lady E يقول...

عاشقة الأحزان : وعليكم السلام ورحمة الله وبركاته
لحظة بقه اوبجيكشن واعتراض وشجب الكلام صعب ليه عاااااا هي الكلاكيع اللي في الكتب بتاعت الكلية بتاعتي بانت في اسلوبي ولا ايه عاااااا

واللهم امين ربنا يهون غربتنا في الدنيا ويجمعنا في ظل عرشه

واليأس ده يا اختي عندنا فائض منه ممكن نصدره للدول المجاورة :)

وبعدين ليييييييه بس بكيتي اوي يا انوس دموعك غالية يا حبيبتي وعالعموم خبر سار البكاء بيريح النفس اي خدعه فوتي من هنا كل يوم وابكي براحتك او ممكن نجيب علبة مناديل ونقعد انا وانتي وكيكي نعيط سوى :)

الحياة مش مستاهلة يا قمرايا
ربنا يكرمك ويسعدك ويروق بالك
وانا بجد بفرح بوجودك وبتعليقاتك الجميلة
شكرا عل متابعتك لمدونتي المتواضعه

mimi يقول...

أجمل حاجتين في الكون هما الحب والصداقة

انعمي بالحب ... وتمتعي بالصداقة

تحياتي ...

وعلي فكرة ... كلنا أطفال ومش عاوزين نكبر...

عاشقه الرومانسيه يقول...

الصداقه عمله نادره فعلا
ربنا يديم الود بينكم يااارب
روقى ياكيكى بقى
ازاى تزعلى ومعاكى ليدى اللى بتحبك بالشكل ده؟
(:
ليدى ابقى بخرى نفسك انتى وكيكى
هتتحسدوا ياماما صدقينى انا مجربه قبل كده كتييييييييير

عاشقة الأحزان يقول...

حبيبتى
السلام عليكم
ده إيميلى بس مش هكون موجوده غير بليل وأوف لاين معلهش من تسعه كده إن شاء الله
hayatelrooh_enas@yahoo.com
منظراكى ياحبيبتى إن شاء الله وبجد عشان خاطرك بس أنا كنت محتاجه أقعد شويه كده مع نفسى بس أنتى غاليه عليا قووى والله
أختك نوسه

بنجاواتى يقول...

السلام عليكم

دى مين اللى حظها حلو علشان تلاقى حد بيحبها اوى كده

ربنا يديم المعروف وتستمر الصداقة ابد الدهر

وشكرا

Bent Men ElZaman Da !! يقول...

ربنا يخليكوا لبعض يا قمر
وكفايه والله يا كتكوته ان فى حد بيحبك كده
وربنا يهديلكم الحال يارب وتبقوا احسن :)

فتاه حالمه يقول...

ايه ده هي بنتي تعبانه وانا مش دريانه ولا ايه
لالالالالالالالالالالالالالالالالالالالالا
متخفيش كيكي بسبع ارواح واستك
هههههههههههههههههههههههههههه
ربنا يخلينا كلنا لبعض وجميل الوبست الاستنثنائي ده يا قمر
تحياتي

MǿиY El-Shreef يقول...

ربنا يخليكوا لبعض ومايرحمكوش من بعض ابدااا يااارب

جميل اوي الحب ف الله ده

والاجمل انه بين اتنين زي العسل اصلا

ربنا يفرج همكوا ويفك كربكوا وباذن الله كل حاجه هترجع احلى

سلام ياقمره

romansy يقول...

ربنا يخليكوا البعض
ان شاء الله ربنا يكرم كل من كان
وكل انسان عايش
المهم اننا نكون عارفين وومتوكلين على الله

ربنا معاها

حسام غانم يقول...

ربنا يخليكوا لبعض

لجين أبو الدهب يقول...

ربنا يفك الكرب عن الجميع .. اللهم امين ..

وبجد اتأثرت من كلامك ليها ..

حسيت بصدق مشاعرك ناحيتها ..

ما شاء الله .. تبارك الله ..

ربنا يخليكوا لبعض وما يحرمكوش من بعض ..

وركزى فى الفرنسو علشان تنجحو ..

دمتِ بخير ..

كيكى يقول...

...................
......................
........................
.......................
عووووووو

كيكى يقول...

ممممممممممممممممممم هو انا كدة قليله الذوق صح لمة ابعت..........
.......................
......................
بس ربنا اعلم ان النقط دى معناها كبير اوى ومش لاقيه كلام اوصف النقط بى
مش هقولك غير يانونتى ربنا ما يحرمنا من بعض و و و و
انتى اختى بجد
و و و و
و و و و
لا بس برخم و و و وانتى متاكدة انك كنتى فى كامل قوكى العقلية وانتى بتكتبى البوست دة!!!

عووووووووووووو

أم مالك يقول...

الله الله عى الصداقة الجميلة
واللى هى أساسا كانت محبة فى الله
والا مكنتش وصلت لهذا المستوى
فالمحبة والاخوة فى الله من اعظم الامور
ادام الله محبتكم وفرج كرب كيكى الحبيبة
ويجمعنى بكما يابناتى فى الجنة
وتقبلى اول مرور لى وليس بالاخير
ودمتى بكل خير

إيمان يقول...

يارب يفك خنقة الجميع

ويخليكم لبعض

وتنجحوا وتفرحوا وتفكوها بقه

مش كده يعنى لمو الدور شويه

فى ناس شايفين النجوم فى عز الظهر ونفسهم فى شوية مذاكره وطناش من بتوع زماااااااااااان بكره تقولوا ليت الاستمحانات تعود يوما

hager za3bal يقول...

ربنا يخليكم لبعض يااااااااااارب :)

MaNoOoSh يقول...

ربنا يوفقكم جميعا فى الامتحانات
ويديم الحب بين الجميع فى الله علطول
ويخليكى انتى وكيكي لبعضكم وتفضلوا اجمل اصحاب

قصيدة واقعية يقول...

أنا كنت بدور على صورة أختين حلوين عشان أكتب عليها كلمتين أحلى منها ولقيت كلامك عن صاحبتك وأثر فيا عشان أنا عندي صديقه كده بس إحنا شفنا بعض بأه وحكايات وروايات وذكريات واييييييه دنيا :)

قصيدة واقعية يقول...

كنت بكتب لأعز صديقه عندي ولقيتك كلامك ده في الشاشه قدامي وأثر فيا أوي بس أنا وهيا شفنا بعض وبيننا حكايات وروايات وذكريات وعلى رأي المثل: ميفهمكيش إلا اللي همه همك (المثل ده إخراجي) وشكراً :)