الخميس، 14 مايو 2009

مين فين ليه هه؟؟




فتحت الكشكول اللي كنت بكتب فيه ملاحظاتي ايام كورس التنمية البشرية ولقيتني كاتبة ملحوظة لفتت انتباهي


الفائزون يفعلون أشياء لا يفعلها الخاسرون


الفائزون لا يستسلمون والمستسلمون لا يفوزون


كلام جميل بس ايه هو الفوز اصلا؟ يعني الانسان لما يعمل ايه يبقى فاز؟


وليــــــــــــــه الصعود صعب بس النزول سهل جدا


وليـــــــــــــه النجاح شاق بس الرسوب مفيش اسهل منه


وايــــــــه معنى السعادة ؟ دايما بسأل مامتي ايه معنى السعادة ودايما بتقوللي السعادة في الرضا


بس هو في حد فينا راضي عن حياته؟؟؟ عن كل حاجه فيها ؟؟ معتقدش !!


في حكمة بتقول :


When one door of happiness closes, another one opens; but often we look so long at the closed door that we do not see the one which had been opened for us

يعني لما باب من السعادة بيتقفل في وشنا بنلاقي باب تاني من السعادة بيتفتح
بس في اغلب الأحيان بنبص على الباب المقفول كتير وعلشان كده مش بنشوف الباب التاني اللي اتفتح علشاننا
الكلام ده بالنوسبة للاجانب اكتر
احنا بقى ك عرب وشرقيين بنفضل نبص للباب اللي اتقفل في وشنا ونعيط ومش كده وبس لا كمان بنخبط دماغنا في الباب


في حاجات بتلفت النظر للقراءة وخصوصا لما تكون مكتوبة على جدران عمارة كلها مدرسين وطلبة ثانوي طالعين ونازلين بحس ان كتاباتهم فيها حكمه من الهسهس اللي هما فيه ومن ضمن الكتابات دي مكتوب


اترك الدنيا تضيق فليس في الدنيا صديق

الدنيا مثل السفينة كل من عليها غريق


واهداء عاشق ولهان من بتوع ثانوي لحبيبته : اللي هيعاكس ميشو هعوره واللي هيبص لها هخرم عينه


والجملة اللي فاتت دي بشوفها مكتوبة على كذا حيطة على جدران السلم

ايييييييه لسه في رومانسية في الدنيا


النهاردة حاسة بإحساس غريب


حاسة ان في حد بيطبطب عليا وبيقولي متزعليش ومتخافيش بكرة احسن ان شاء الله


وكلمات اغنية شاين وورد بتتردد في دماغي


I promise you


You're not alone


When the lights go out at night


When you're feeling lost inside


You're not alone


You're not alone


When your world is falling down


I will be the one around


You're not alone


You're not alone





هناك 21 تعليقًا:

ABOALI يقول...

يعنى مررت اسلم واشوف انا اول تعليق ولا لا

بس مش عاوز اعلق

مش عارف ليه
اهو غلاسه تعليقة

عاشقة الأحزان يقول...

السلام عليكم
ايه يانونا مالك فيك ايه انتى كمان
انا أهووووووو جنبك هو أنا مش كفايه عليك ياعمرى
ربنا يسعدك يارب ويطمنى عليك حبيبتى
خدى بالك من نفسك
بس على ما أعتقد كده الحاله اللى انتى فيها دى بسبب الأمتحانات ربنا يعديها على خير
دمتى بألف خير وصحه وعافيه
أختك أنوسه
بوسسه وحضن كبير
أمووووووووووووه

الشعب لابد له من حكومه تشكمه يقول...

اممممم متقلقيش الحاله دى من الامتحانات وعلى فكره للاسف انا بحس انى بعيشها كتير..
اوقات تحسى ان حياتك فاضيه واوقات تحسى ان نهايتك فى الباب اللى اتقفل مع ان اكيد قفله ده رحمه من ربنا ليكى واكيد دا خير بس هى النفس البشريه كده...

اوقات بحس اننا بنعشق الحزن,,احنا كشعب مصرى على وجه التحديد نذوب عشقا فى الحزن...وعمرنا منشوف الباب اللى اتفتح دايما نبكى على الباب المقفول

بنجاواتى يقول...

السلام عليكم

متزعليش ومتخافيش بكرة احسن ان شاء الله

بجد والله ان شاء الله بكرة احسن

وماتنسيش ان ليكى دور فى ان بكرة يكون احسن

ربنا يرزقك الرضا والسعادة

نومستا

Pinky يقول...

ضمنت اني انا مش لوحدي في حالة الامتحانات الغريبة دي

عجبتني اوي حكمة باب السعادة دي

للامانةرومانسية زي دي انا مشفتش
اللي يعيش ياما يشوف

متزعليش ومتخافيش بكرة احسن ان شاء الله

سلام يا قمر :)

إيمان يقول...

كولكشن جمييييييييييييل

وكلمات معانيها جميله

يارب دايما تكونى متطمنه وسعيده

والحمد لله إن لسه في رومانسيه فيكى يا مصر
أيييييييييييه

حسام غانم يقول...

لا بس بغض النظر عن شاين وورد والكلام ده

أنا أحييكي على أغنية مدحت صالح دي

ده أنا فتحت كذا مدونة في كذا تاب

ولقيت الأغنية اشتغلت

قعدت أدور هي شغالة من أنهي مدونة عشان أحييها

أنا إللى أستاهل يقول...

أنتى عارفة ليه احنا دايما بنبص على الباب المقفول مع إن احنا ممكن ينفتح لينا باب احسن منه لاننا ببساطة بشر بنحس وبنشعر بنفرح ونتألم ولاننا كومة من الأحاسيس والمشاعر الملعبكة إلى العلم لسه تايه فيها فعشان كده احنا لسه بنبص على إلى فات وعشان كده الفشل سهل لان النجاح محتاج تعب ومش كلنا عندنا استعداد اننا نتعب الخلاصة ان تعليقك إلى كتبتيه فى الكشكول فاتح باب جميل من النقاش الرائع ودايما مستمرة بإذن الله

الفراغ يقول...

ليدى

اولا..ربنا معاكى ويارب يارب نطمن على امتحان الفرنساوى
ثانيا..اكيد طبعا انا اكبر منك بكتير..وشفت فى الدنيا اللى عمرك ماشفتيه واتمنى الا تريه
لكن يابنتى الايام طحنتنى وعرفت ان مافيش حاجه بتدوم لا الفرح بيدوم ولا الاحزان بتدوم ..هى كلها ايام بتعدى..بس تاكدى ان فى ابتلاء ربنا رحمه لنا..وزى مايتقولى مافيش سعاده بدون عذاب ومافيش حلاوه من غير نار
..وباب ربنا مفتوح لمن اغلق بابه بس احنا نتوجه صح لصاحب الفضل والمنه
دمتى سعيده

غير معرف يقول...

نونتى
******
اكيد بكل تاكيد بكرة احسن اقولك انا سر
انا عندى نفس احساسك والله دة ان بكرة احسن احسن بكتيرررررررررر
وربنا معايا وحاسه بخير وتفأل بس هو الشيطاااااااان ابن التيييييييييييت
الى مخلينى انام اربعة وعشرين ساعة فى اربعة وعشرين ساعة!!!
ممممممممممممم ربنا معانا كلنا ويلا بقى شدى حيلك عشان حمو الفرنساوى قرب
***الاغنية تحفةةةةةةةةةةةةةةةةةة
اموااااااااااااااااااااااااااة
***وحشتينى**

norahaty يقول...

اقول اولا يارب تنجحى ياااااارب
مش انتى بس لكن كل التلاميذ
العرب والاجانب والعجم
والفرس كمان لاجل
خاطرك وخاطر
التلامذة
المصريين.

norahaty يقول...

التدوينة حلوة اوى وخصوصاً
بتاع حاعوره ده:فعلا فعلا
فعلا وكمان
واحدة
فعلا
منتهى الرومانسية:)

تامر علي يقول...

فكرتيني بكلام الحبيبة على الحيطان ....قلب وسهمين ومكتوب تحتهم
"للذكره (مش للذكرى) الخالده"
إش إش ومشمش حب للأبد

وكمان تلاقي محفور على شجرة قلبين وسهم وحرفين (مش عارف ليه بالإنجلش) مثلاً (s) كناية عن سلعوة و (h) كناية عن حمادة ... وتلاقي رسمة دموع وقلب مكسور وحمامة طايرة ..يعني فيلم على الشجرة المسكينة :)

وواحد سواق تاكسي يكتب على عربيته ...بحبك يا انشراح ...اللي راح راح :)

تحياتي :)

احساس طفلة محبة للرومانسية بس واقعية يقول...

لسة فى رومانسية
ولسة فى حب
ولسة فى حد على طول جنبنا

حالة من السلام الداخلى تقريبا
بنحاور فيها المنطق ويحاول يقنعنا
بس احنا بنرفض نستسلملها

تحسى انك عايزة تكون سعيدة وراضية
وحياتك سلسة بس برضو لسة فى خوف من بكرة

يمكن زى اللى قابلى ما قالوا حالة امتحانات بس عامة ربنا يرزقك السعادة والراحة والرضا التام
واكيد فى حد جنبك :)

تقبلى مرورى

أحمـــــــــــــد أبو العلا يقول...

زمان كانوا بيكتبوا على ورق الشجر
دلوقتي على الجدران
هوا ده التطور الطبيعي للرومانسيه

ان شاء الله بكره احسن
ان شاء الله بكره أسهل
ان شاء الله بكره ربنا هيسهل كل عسير

ياريت تطمنينا بكره

وافتكري دايما ان ربنا معاكي بس كل اللي عليكي انك تندهي من جواكي "يارب"

ELMASRYA - MRS WRITER يقول...

حبيبتي العسولة

إنتي كاتبة شوية حكم تحححححححفة

عجبتني الحكمة الإنجليزية وعجبني تحليلك بين استعمال العرب والأجانب ليها

والأغنية روعة

شكرا لاختيارك ليها كلك زوق ورقة يا كوكو

شدي حيلك في الفرنساوس ويارب يعدي على خير

بحبك قوي

e_emy يقول...

عسسسسسسل ياليدى بجد

كلامك كله حاسه انه بيتكلم عنى

تفتكرى زى ماالناس بتقول علشان الامتحانات ):

ربنا يستر..

يارب بكره يبقى احسن
ويارب تبقى راضيه عن نفسك وحياتك
ويارب تبقى سعيدة ياااااااارب

ع فكرة انا كمان بحب الشيكولاته *:

سسسسسسسلام يا قمرايا ;)

Bent Men ElZaman Da !! يقول...

اهى السعاده دى بالذات اللى ماينفعش تتحدد من شخص للتانى
كل شخص فكره السعاده او الحاجات اللى بتسعده بتختلف

احنا احسسسن ناس تفضل عايشه على الماضى
الماضى تقريبا بيشكل فى حياتنا نسبه اكبر من الحاضر عشان كده بنفضل باصيين للباب المقفول اكتر من المفتوح

طب والله الواد بتاع ميشو ده جدع
على الاقل خد موقف وكتب شعار وتحذير لكل اللى هيقرب من ميشو يا ويله يا سواد ليله هههههههههه

ومش تقلقى ان شاء الله بكره يكون احسن وفيه خير ليكى اكتر من قبل كده
ربنا يوفقك :)

MaNoOoSh يقول...

ان شاء الله بكرة احسن
وربنا فعلا عمره ما قفل باب على مؤمن الا وفتح له باب تانى.. واحنا المفروض اى باب يتقفل منقعدش نبكي عليه كتير


بس انا اؤيد على فكرة الاخ اللى بيقول ان اللي يعاكس ميشو هقتله.. لان ثبت علميا ان معاكسة ميشو مضره للصحة وتسبب الوفاه
ههههههههههههه
تحياتى يا قمر

hasona يقول...

السلام عليكم

لأن الرسوب والفشل لا يحتاج منك أن تفعل شيئا - انما دائما تبحث عن علل وأسباب

،،،،
ولأن في معظم الاوقات بتكون في أيدينا مفاتيح السعادة ونسينها ولكننا نجري وراء مفاتيح الهم والغم والنكد والحزن
ونرثي حظنا وانه لا توجد سعادة أو فرحة في حياتنا
وكأننا لا نملك شئ
ونتنازل عن تلك مفاتيح السعادة وقد لا نراها أو نشعر بها
،،،،
بركه أحسن طالما نتفائل ونحب ونعيش ونحلم ونعمل علي تحقيق أحلامنا

akeed يقول...

ان شاء الله القادم افضل بس لو نظرتى الى الخلف فيكون فقط لتدارك الاخطاء السابقة والنظر دائما للامام للجد و المثابرة


تحياتى