الأربعاء، 27 مايو 2009

بحب غذاء الروح وبعشق الشوكولاته





عااااااااااااا شوفتو اللي بيحصل خالتو حببتي بتاخد الشوكولاته بتاعتي مستنهزه فرصة اني ممنوعة من الشوكولاته علشان الدايت ما هي مش عارفة اني كل يوم بتخانق مع الدكتور في الحلم وبقوله الا الشوكولاااااااااااااااته عااااااااا

وقولت لخالتو انا هكتب الكلام ده عالمدونة قالتلي عاااااااااادي ولا يهمني عاااااااااااااااااا على رأي المثل عض قلبي ولا تعض شوكولاتي
اللي بيحصل ده بااااااااااااطل بااااااااااااطل



بعد الانطحان اللي فات روحنا اليكس في بلاد العجائب نيااهاهاهاها أأقصد اسكندرية
وبصراحة اسكندرية تحفففففففففه جميلة جدا جدا جدا انا حسيت اني مش في مصر من كتر نظافة وجمال اسكندرية لكن رجعت لأرض الواقع لما شوفت الزحمة وان اسكندرية زي القاهرة في الزحمة واني صعب اسوق الكتكوتة في الاتنين والحمد لله بابا هو اللي كان بيسوق مش انا طبعا اذا وجد الماء بطل التيمم
ربنا يباركلنا في عمرك يا بابتي
ويا سلام لما دخلنا على الكورنيش وريحة البحر وهواه يردو الروح وشوفت مييييين؟؟؟ شوفت الترام
ايون الترام اللي نفسي اركب فيه هو والمترو
يا ترى احساس اللي بيركب الترام او المترو ايه؟؟ في ناس هتقول ايه الناس دي في حد يتمنى يركب الترام والمترو هقولو ايوووووون انا , في مانع؟؟؟؟؟؟؟؟


وبعدين روحنا كارفور اسكندرية وبعدين بدأت احس ان عينيا بتغمض لواحديها ذاتيا وتلقائيا واني عايزة اكتب وبعدين روح اوفيليا حضرت وكتبت شوية كلمات واحنا بنتمشى في كارفور

: اد ايه كانت غبية
لما سمعت اغنيته في كارفور وكانت طايرة من السعادة
واد ايه هي غبية علشان بتضيع فرحتها وبتفتكر نفس الاغنية بس المرة دي بتفتكر جرح قلبها وبتفتكر غروره وغطرسته وانه نسيها في اكتر وقت هي كانت محتاجه ليه فيه وبتردد في نفسها كان بيني وبينك حاجه ليه ضيعتها ؟؟!! واخيرا نصيحة لأي حد شورير : عايز تكسر فرحة واحد اكسر قلبه وفي عز ما يحتاجك سيبه متبقاش جنبه عالعموم هانت مسير الأيام هتنسيها وفي وسط ما انا بكتب الكلام المش مفهوم ده
سمعت اغنية فضل شاكر فاكر
يا عيني كانو مشغلين كل الأغاني اللي تقطع القلب بتاعت فضل شاكر واللي بتساعد ان روح اوفيليا الرومانسية الحزينة تظهر عندي والغريب ان بابا وماما وخالتو لاحظو ان روح اوفيليا ظهرت عليا وبابا قاللي مين بس اللي مزعلك يخربيت اللي يزعلك المهم علشان اغير مود اوفيليا والاغاني الحزينة دورت على ركن الكتب وملقيتوش
وبعدين سألت بابا ووراني مكان ركن الكتب وفعلا روحت ركن الكتب ولقيت ايييييييه؟؟؟؟

كتب المدونات غادة وغادة ورحاب ال3 كتب موجودين في وسط كتب الكتاب المشهورين زي كتب انيس منصور وحسيت بالفخر وتخيلت ان كتابي معاهم ولقيت ما شاء الله الكتب اتطبعت كذا طبعه يعني كتاب عايزة اتجوز الطبعة الخامسة وكتاب ارز باللبن لشخصين الطبعة الرابعة وكتاب اما هذه فرقصتي انا الطبعة التالتة ومكنتش متحمسة اوي اني اجيب كتب ومشيت فعلا من عند ركن الكتب وبعدين
لقيتني برجع تاني لركن الكتب ومسكت كتاب اما هذه فرقصتي انا وسألت نفسي
اولا : يا ترى ايه اللي ممكن يخلي اي حد يشتري كتاب؟؟
ثانيا :ايه اللي ممكن يخلي حد يشتري كتابي لما اكمل كتابته ان شاء الله؟؟

اجابة اولا عارفاها لكن ثانيا مش عارفاها ياريت لو حد عارفها يجاوبني ويبقى له الأجر والثواب من ربنا
اولا : اللي لفت انتباهي لكتاب اما هذه فرقصتي انا
قرأت الكلام اللي مكتوب على ظهر الكتاب والكلام عجبني اوي من بدايته
( الطبخ فعل حب )
طوووووول عمري بقول كده وفورا الكتاب دخل دماغي
ولقيت التعريف بالكاتبة
غادة محمد محمود خريجة كلية الاداب قسم اللغة الانجليزية
وسع وسع وسع يعني زومل وسلام مربع ومثلث ومدور كمان لكل طلبة الكلية المظلومة كلية الأداب
كويس في امل اني اتخرج من كلية الهباب وكمان من قسم لغة انجليزية الحمد لله لقيت حد اتخرج منها
تحب الكتابة والشيكولاته وفيروز اييييييييييييه ده دي انا
انا كمااااااان بعشق الشوكولاته وفيروز والكتابه بس احيانا بحب القراءة اكتر

ده غير انها اتكلمت عن الدفا اكتر احساس بحبه واعتقد انها تقصد دفا المشاعر
الدفا ياااااه كلمة صغنونة بس احساس ميتوصفش




وكمان لفت نظري لون الكتاب انا بعشق اللون اللبني وكمان عجبني اسم الكتاب
وصورة الكتاب اتنين ماسكين ايد بعض والبنوتة ماسكه قلب اللي بتحبه واللي بيحبها كإنه وردة

واخيرا الكتاب من دار الشروق اللي عملت كتب لاشهر واحسن الكتاب
تصفحت الكتاب لقيت اسلوب غادة بجد جميل وفي كلام ليها حسيت انه عني
واخيرا جبت الكتاب اد ايه كتاب جميل مع اني مقراتوش كله بس حبيته جدا


عقبال كتابي ياااااارب لما يبقى كتاب جميل ورقيق كده

واحنا راجعين من اسكندرية ايه اللي حصل في الطريق الكتكوتة دخل في الكاوتشاية بتاعتها مسمار جميل ولطيف وفورا الكوتشاية ماتت مش نامت
مش عارفة ليه كل لما نروح اسكندرية لازم الكتكوتة يحصل لها حاجه عااااااااا


ملحوظة : صورة كارفور والكتب انا اللي مصوراهم


بكرة ان شاء الله عندي امتحان ترجمه

هناك 17 تعليقًا:

عاشقة الأحزان يقول...

السلام عليكم


احم احم

نونا

رسالتك وصلت ياقطه
معلهش بجد اصل استغربت مش متعوده منك على كده

بس غصب عنى والله يانونا انتى عارفه الحاله اللى بمر بيها

عامة حصل خير
لأنى مأقدرش ازعلى من نفسى عااااااا
عاااااااااا
اهى اهى اهى اهى اهى اهى
هههههههههه
ربنا يروق بالك يارب ويسعدك وهكلمك انهارده بس ما يكنش فى تهييس
هههههههههه
المهم البوست جميل قووى يا موزه
وعاجبنى وسعيده بيك قووى انك مبسوطه يارب تكونى مبسوطه كده على طووووول

وانا عاوزه شوكلاته عااااااا
عاااااااا
مليش دعوه
عاااااااا
ربنا معاكى فى الامتحان بتاع بكره ربنا يكرمك يارب

اتمنالك الخير من كل قلبى لانى بحبك قووى

امووووووووووووووووو
بوسه وحضن كبير

اوعا الجمبرى يعضك
هههههه
انوسه

MaNoOoSh يقول...

ان شاء الله تنشري كتابك وابقى سميه يا ستي احلي شيكولاتة
ههههههههههه
ربنا يعدي الاستمحانات دي على خير ان شاء.. وربنا معاكي يا قمر.

ELMASRYA - MRS WRITER يقول...

إيه ده بقى؟

إنتي جيتي اسكندرية ومش اتصلتي بيا أقابلك؟

وقعتك لبني زي غلاف كتاب غادة

زعلانه منك جددددددددا

دي أولا

ثانيا : بإذن الله كتابك هينزل وهتشوفيه وسط كتب الأدباء الكبار وهينطبع منه نسخ كتير وطبعات كتير وهيبقى من دار الشروق بإذن الله

يا توته إنتي كتابتك جميلة وانا بإذن الله هكون أول المشترين

تصويرك جميل وأول ماشفت كارفور وركن الكتب قلبي اتنطط من مكانه علشان أنا بحب المكان ده خالص وطبعا لأنه في بلدي خطف قلبي

بالنسبة لامتحان بكره إن شاء الله تجاوبي كويس وهدعيلك يا حبيبتي

بس لازم تذاكري كويس لأن :

من طلب العلا ......يدخل كابينة واحد هههههههه

بحبك قوي قوي بس برضه زعلانه إني مش شفتك

احساس طفلة محبة للرومانسية بس واقعية يقول...

ويا سلام لما دخلنا على الكورنيش وريحة البحر وهواه يردو الروح

الله عليكى يا ليدى
الله عليكى يا اسكندرية
بحبها جدا جدا جدا
يا بختك يا بختك يا بختك

وبعدين تروحى اسكندرية وتجيلك حالة رومانسية وبعد كدا تبقى حزينة
واللهى ولا ميت اغنية اسكندرية كلها ترد الروح وتمحى اى حزن من الحياة

بس انا عارفة هى مش اسكندرية
تلاقى وانتى بتلفى فى كارفور شفتى شيكولاتة وخالتوا اشترت وانتى لا

شيفاكى بتهزى راسك اهو
شفتى مش قلتلك :p

ان شاء الله تنزلى كتاب
بس واحنا هنقوم بالواجب
ولو وزعتى معاه شيكولاته
هنقوم بالواجب تانى وتانى وتانى
هاهاهاهاهاهاهاهاها
لا بجد اللى هيخلينا نشترى الكتاب هو هو السبب اللى بيخلينا ندخل مدونتك ونتابعك يا احلى ليدى

تقبلى مرورى

تامر علي يقول...

ان شاء الله كتابك يكسر الدنيا ... وتنجحي وتحققي كل الآمال بصحبة الشيكولاته :(

تحياتي :)

أحمـــــــــــــد أبو العلا يقول...

ربنا معاكي في امتحان بكره

بستمتع بجد بحكاويكي الطبيعيه ديه

انا لسه بقول وهفضل اقول كتكوته غلبانه اوي معاكي
شكلها حمالة قسيه

ربنا يقويها ويقوكي انتي كمان

كيكى يقول...

الوان قوس قزح!!
هو الواحد ناقص عمى الوان ياشيخة!!
تعالى هنا يلى عملتيلى فضيحة على دريم وبارك وانا مرحتش اساسا روحتى حضرتك اسكندرية عااااااااااا نونا وحشة وحشة
قولى لى اولفيا دى وحياه داد بطلى تقلبى المواجع اصلك بتقلبيها على الكل
***بخصوص الكتاب هاتى اى موضوع اكلمى بى باسلوبك دة وشوفى فى ناس كتير هتحبة
بكرة عندك ترجمة هااااااااااا
مش انا كلمتك من يومين وكنتى امتحنتى
هو البوست دة بايت ولا اية؟؟
عوووووووو

Lady E يقول...

عاشقة الأحزان : وعليكم السلام ورحمة الله وبركاته

ماااااااااشي يا انوس ماشي هعديها
ومش هرغي كتير بس اعملي حسابك المرة الجايه لا ممكن تنزل الأرض ابدااااا

ربنا يكرمك يا حبيبتي ويصلحلك الأحوال ويستجيب دعواتك الجميلة ويجعل ليكي مثلها

Lady E يقول...

MaNoOoSh: هي الشوكولاته دي ورايا ورايا عااااااااااااا

تسلميلي يا منوش

ربنا يكرمك

دمتي بكل خير وسعادة

الشعب لابد له من حكومه تشكمه يقول...

شدى حيلك ياكميله فى الامتحان والترجمه دى سينس على حسب سينسك باللغه هترجمى:)
انا هسارف اليك ان شاء الله الجمعه 5-6 هشوف اللى بتحكى عليه ده اصلى خلاص هموت واغير جو وولو لقيت باه اغانى النكد شغاله مش هقولك هعمل فيهم ايه اصلها تكئب الواحد اللى مش عاوز يكتئب اصلا...
وان شاء الله تنزلى احلى كتاب واكون اول حد يشتريه:)

الشعب لابد له من حكومه تشكمه يقول...

اه نسيت اقولك انا باكل شيكولا فى نفس ذات اللحظه اللى بكتبلك فيها وباكلها عااااااااااتى جدااااااااااا:)

لجين أبو الدهب يقول...

ليدى حبيبتى روحى قلبى اللى بموت فى بوستاتتها وافتقدتها جدا ..

الاول بجد بشكرك من كل قلبك على دعائك ليا وياريت يستمر بالله عليكى ..

وتانى حاجة طبعا يابنتى اسكندرية جميلة جدا .. من وجهة نظرى احسن محافظة على وجه مصر نظافة وتنظيم ومش زحمة زى القاهرة ..

وعلى فكرة الترام ده اخد من رقات على راى اللى بيقولوا كنت فى الكلية بركبه يوميا ولو تشوفنى كل مرة وانا بركبه كأنى بركبه اول مرة .. بحب اركبه جدا بحس انى اشوف حكايات كتير فى وشوش الناس هو والمترو لان برده بركب المترو كتير ..

ربنا يوفقك ياحبيبتى وطمنينا عنك عملتى ايه فى الامتحانات ؟؟

دمتِ بخير ..

Lady E يقول...

ELMASRYA - MRS WRITER : يا كزوفي يا كزوفي

بجد يا خالتو كان نفسي اشوفك جدا وماما وخالتو كانو موصرين انهم يكلموكي ونتقابل في كارفور بس انا عارفه ان حضرتك مشغولة وكان الوقت متأخر وكمان انا كنت مرهقه جدا يوميها وروح اوفيليا حضرت وبقيت مضايقة جدا وحسيت اني مخنوقة وانا في كارفور

ثانيا : يارب
انا بحترم دار الشروق جدا وحلو التفاؤل ده يا خالتو
وكتاباتي جميلة لانك بتشوفيها بعيونك الحلوين
وان شاء الله حضرتك هتكوني من اول المتهادين مش المشترين نياهاهاهاها
كفاية عليا ان حضرتك ان شاء الله هتشرفيني في حفلة التوقيع وهتقرأي كتابي (احلى حاجه اني بتكلم وكإن حفلة التوقيع بكره :) )

والحمد الله انا متفائله بإمتحان بكرة ان شاء الله خير وكمان هتدعيلي يبقى ضمنت جيد جدا ان شاء الله ربنا يخليكي ليا ياارب

والعلا مش بترد على التليفون ههههههههه تقريبا نايمة

بحبك جدا جدا جدا يا احلى خالتو
ومع ان خالتي سومة متغاظة اني بقولك يا خالتو بس برضه هفضل اقولك يا خالتو ويا احلى خالتو كمان

hager za3bal يقول...

اولا
ربنا معاكي ياااارب في امتحانك

ثانيا بقي
يا بختك انا هموت واسااااااافر

وعقبالك ياجميل لما كتابك يتحط وسط المشاهير كدا ونفتخر بيكي بقي



بس ماليش دعوه

انا كمان عايزه شوكولاته :((

مسدس صغير يقول...

اسكندرية فعلا عروس البحر الابيض والاحمر والاخضر
جمييييييلة جدا

بالتوفيق فى الامتحان ان شاء الله

عاشقه الرومانسيه يقول...

اتااااااااارى اسكندريه كانت منوره
فاتنى كتير انى مش شفتك ياقمر
المره الجايه تعملى حسابك انك تبلغينى
لازم نتقابل
فاهمه ولا لأ
(:

Mo7ammed يقول...

ماشى ياسيدى عالناس اللى راحو كارفور
وبعدين حبكت روح اسمها ايه دى تيجيلك دلوقتى
كانت تستنى اما تروحى ^_^

رحلة جميلة
ولو عايزة تشوفى بقى رحلة على النقيض وكلها شباب

اتفضلى

http://highvoltaa.blogspot.com/2009/05/blog-post.html

مع السلامة