الأحد، 26 أبريل، 2009

التاج المئوي للبرينسس ليدي

التاج ده جالي من 4 مرات من 4 مدونين وطبعا لازم اجاوبه

وهما
احساس طفلة محبة للرومانسية بس واقعية

والانجينير أحمد ابو العلا

وقبلاوي

واخويا الكبير دكتر عمرو بلو ويف

شكرا ليكم على اهدائي التاج وعلى انكم دبستوني في اجاباته ههههههههه

على فكرة البوست ده رقم 100 في مدونتي :)


اسمك؟
اسمي مين فيهم؟؟ في المدونة ولا في الكلية ولا في البيت :)
نقدر نقول lady e


المشهور بيه وسط اصحابك؟
كتير


سنك؟

ماشية في الواحد وعشرين ان شاء الله

مجال دراستك؟

أداب اللغة الإنجليزية للأسف !!
وتنمية بشرية قريب ان شاء الله


اسم مدونتك؟

طفلة مش عايزة تكبر


صورتك الرمزية فى المدونة بتعبر عن ايه؟
رمزية اخت رمزي :)
صورتي في المدونة حاليا لأني بحب اغير الصورة الرمزية دايما
هي ايد بيبي وفي ايد كبيرة حضناها والمعنى ده انا حباه جدا بحس في الصورة دي بعطف وحنان وحماية وحب
ولما بشوفها مش عارفة ليه بحس اني مطمنة

هل فكرت فى اغلاق المدونة ؟ والسبب؟
ايون وكذا مرة مش مرة واحدة وده كان استسلام لحالة نفسوية مش متظبطة
او كنت بقول ايه اللي انا بكتبه ده ؟؟


ايه رد فعلك لو حد قل ادبه فى تعليق ؟

اذا نطق السفيه فلا تجبه فخير من اجابته السكوت
لأني لو رديت هبقى نزلت للمستوى ده
وعالعموم على حسب الكلام نفسه قل ادبه في ايه بالظبط؟؟ وممكن الرد عليه واقناعه انه غلط
او ميستاهلش الرد وامسح التعليق ف على حسب الكومنت ذات نفسيها


اسوأ مدونه؟
السؤال ده جاوبت سؤال اخوه قبل كده في اول تاج حليته بس هجاوب تاني يلا ان شا الله محد حوش
اسوأ مدونة هي اللي بتعدي الخطوط الحمرا بأنها بتسب ربنا سبحانه وتعالى والأنبياء والرموز الدينية او بتهاجم المدونين والى اخره من الحاجات اللي الانسان بيشمئز لما يقرأها


هيحصل ايه للايميل بعد ماتموت؟
يعني اذا كان صاحبة الايميل اللي هي انا ماتت وقتها يبقى الايميل هيحصله ايه هيروح الديسكو مثلا؟؟
طبعا هيموت معايا ويا نعيش مع بعض حبيبي يا نموت احنا الاتنين
اوعدني نكون يا حبيبي مع بعضنا في الحالتين


اديت الباسوورد لحد قبل كدة؟
ايوة قولته لماما بس ماما نسيته عاااااااااااااااا

السفر بالنسبالك ايه؟
حياة وروح جديدة بتدخل حياتي
لما بكون مهمومة جدا وحزينة جدا او عندي مشاعر سلبيه بحب اسافر
وفي السفر 7 فوائد منها ان لو مسافر مع حد بتقدر تعرف اذا كان انسان كويس ولا لأ
و قال رسول الله صلى الله عليه وسلم :السفر قطعة من العذاب يمنع أحدكم طعامه وشرابه ونومه فإذا قضى نهمته فليعجل إلى أهله متفق عليه
واكيد لو سافرت بالطيارة على مصر للطيران هتحس ان السفر قطعه من العذاب فعلا
اما بالنسبة لأحلامي عن السفر فنفسي اسافر العالم كله بس علشان حلمي يكون واقعي
اكتر بلاد هموت واشوفها هي لبنان وانجلترا واسبانيا وان شاء الله متاكده اني هزور واحدة من البلاد دي خلال ال3 سنين اللي جايين او يمكن ازورهم كلهم ربنا يسهل هههههههههه


الموود بتاعك ايه ؟
دلوقتي ولا من دقيقة ولا بعد دقيقة؟؟

بتعمل ايه فى وقت فراغك ؟
على حسب الموود ساعات بقرأ
وساعات بعلي الكمبيوتر عالاخر واغني معاه ( الله يكون في عون الجيران)
وساعات تأمل اللي هو الجو بتاع العفاريت ده بخور وشمع وموسيقى هاديه وضوء خافت وتأمل
وساعات بحب ارغي مع حد قريب مني في التليفون او عالايميل
وساعات بكتب
وعندي مفرش صوف بشتغل فيه في اوقات فراغي او لما اكون مضايقة
وساعات بجيب الوان مية وارسم قلوب واشخبط شخابيط بحب الألوان جدا
وساعات بحب الميك اب وبجرب كذا شكل ليا ولو عجبني شكل الميك اب اللي عملته بصوره
وساعات بدخل المطبخ واعمل اكلة جديدة
كفاية كده بقى مع ان لسه في حاجات كتير تانيه نياهاهاهاها


الأكلة المفضلة ؟
بعشق الأكل الايطالي المكرونات والبيتزات والحاجات اللي بتتخن دي
وبحب الفراخ بكل انواعها والكبدة الاسكندراني كمان بحبها جدا والخضار السوتيه
وبحب المشويات واخيرا ساعات بحب السي فود :)


الصفات التى اخذتها من والدك؟

كتير مش عارفة اقول ايه ولا ايه
بس اللي لاحظته اني بقلد بابا في حاجات كتير تلقائيا يعني مثلا طريقة القيادة للكتكوتة بتاعته
وبقلده في كلامه احيانا حتى ماما دايما بتقولي اني اخدت معظم صفاتي من بابا

التدين والثقة بالله سبحانه وتعالى

الصفات التى اخذتها من والدتك؟
طول عمري نفسي اوصل لنص صفات ماما
مامتي انسانة اكثر من رائعة ومعقداني عاااااااااا
والسؤال ده بالذات استعنت فيه بصديقة اللي هي مامتي علشان انا احترت بصراحه واخيرا بعد نقاش توصلنا الى اني اخدت شوية حاجات من ماما وهي العقل الرزين بس مأخدتوش كله لأن بيغلب عليه العصبية والتسرع عاااااااا
وكمان حب القراءة واللغات اخدتهم من ماما
والاعتماد على الذات وقت الأزمات ) حلو السجع ده

التدين والثقة بالله سبحانه وتعالى
والالتزام بالأخلاق الفضيلة اني ماشية في الطريق الصح مش ببص يمين ولا شمال وعلى رأي المثل امشي عدل يحتار عدوك فيك
واتقال عليا معقدة علشان مش بكلم ومش بصاحب الشباب حتى زمايلي في الكلية
الحقيقة اللي بشوفه في الكلية مش علاقات زمالة لكن علاقات زبالة

لو حد عارف معقدة من ايه يقوللي ههههههههه


اكتر ست حاجات بتكرههم ؟

الفراق والوداع
الظلم
اننا في مجتمع ذكوري اغلب اللي فيه بيبصو للمرأه بصة منيلة _ اغلب مش كل_
الزحمة بكرهها جدااااااااا
حد يعرفني علشان مصلحة
غربة النفس مش شرط اكون مسافره علشان احس بالاحساس ده

اكتر ست حاجات بتحبهم ؟
صلاة الجماعة مع بابا في رمضان ونفسي اصلي صلاة الجماعة مع زوجي المنتظر ان شاء الله
بعشق الطبيعة عامة وخصوصا البحر والنيل
بحب الموسيقى الهادية والرومانسية وشوية من الاغاني الانجليش والعربي وبالمرة الفرنساوي
بحب جدا كل نظرة خوف عليا او حنيه او احساس ان حد مهتم بيا او بيخاف عليا
بحب الشوكولاته لدرجة الهوس ههههههههه
بحب ادردش مع مامتي وخالتي في ساعة سمر بالليل مش عارفة الضحك ده كله بيجي منين



شخصيتك نوعها ايه ؟
Made in Egypt
يعني ايه نوعها ايه (وش بيطلع لسانه)



لماذا دخلت عالم التدوين من الاساس؟
عااااااااااا بريئة يا بيه
حد زقني مش انا اللي دخلت عالم البحار ده هههههه
دخلت برجلي اليمين علشان افضفض واستفيد بخبرات الاخرين واتعرف بأجمل عيلة تدوينية


احلى جملة قيلت فى وصف مدونتك؟

هما كتير بصراحة كفاية ان من فترة قريبة اصدقائي واصدقاء المدونة موافقوش اني احذفها او افضل قفلاها

وخالتو المصرية حبيبتي قالتلي والمدونة بتاعتك لما اتفتحت عملت جو مبهج للمدونات كلها
ده علشان عنيكي حلوين بس يا خالتو



اهمية التعليقات بالنسبالك؟

زي المية والهوا بستناها وبفرح بكل تعليق جديد وخصوصا لو كان التعليق من حد بثق في قلمه ورأيه

احلى بوست كتبته؟ ضع اللينك ثم اذكر لماذا؟
يا عمي أنا جاي أطلب اني امرمط وابهدل بنتك
http://justbabygirl.blogspot.com/2008/07/blog-post.html

و
كان هيحصل ايه ؟؟

http://justbabygirl.blogspot.com/2008/06/blog-post_28.html

اول موضوعين كتبتهم وراضيه عنهم ممكن امسح المدونة كلها واخلي الموضوعين دول
ممكن تشوفوهم وتقولولي رأيكم انا هبقى متابعاهم لو حد حب يعلق فيهم


افضل مدونة قرأتها؟
في مدونات كتير قرأتها وحبيتها بالزاف بالزاف وبرشه برشه
واكيد موجودين عندي في الفيفوريت لاني لو قلت افضل مدونة هكتب مدونات كتيييييير
وعالعموم افضل مدونة هي كل مدونة صاحبها اخد من وقته وكتب فيها احساسه وافكاره ومشاعره



افضل بوست قرأته؟

بجد بوستات كتير في كذا مدونة يعني مثلا بتعجبني بوستات دكتر ستيتة حسب الله الحمش
وبتعجبني اشعار ومواضيع وحكايات دكتر عمرو بلو ويف
وبتعجبني بوستات خالتو المصرية
وبوستات البنوتة الجميلة بسمة انور
وكمان بوستات ابو على
وبوستات احساس طفلة محبة للرومانسية بس واقعية
واخيرا بوستات الانجينير
وبوستات محمد غالية
وبوستات لجين ابو الدهب
وغيرهم والله بس دول اللي حضرو في ذهني


الشغل بالنسبالك ايه؟

حلم مصبرني على الكلية ورخامتها
حلم بحاول اوصله واحققه ان شاء الله


الانترنت بالنسبالك ايه ؟
الانترنت ده روحي روحي روحي مقدرش استغنى عنه للأسف عاااااااااا
ادمان ادمان يعني مش اي حاجه ومش بحب الانترنت لنفسه لكن بحبه علشان بيوصلني بالناس اللي بحبهم في الله
وهما كمان بيحبوني في الله

تمرر التاج ده لمين ؟


اهدي التاج
لخالتو المصرية حبيبتي
و للبنوتة الجميلة غروب
ولصحبتي الانتيم كيكي
وللبنوتة العسولة بسمة انور
وللمدون الجميل محمد غالية
ولدكتر ستيتة حسب الله الحمش



هناك 38 تعليقًا:

blue-wave يقول...

نحجز اول تعليق وبعدها ربك يسهل:))

هانى زينهم يقول...

اجابات سهلة وبسيطة ودمها خفيف . بس انتى ابتديتى المدونة امتى عشان يبقى البوست ده رقم 100 ؟
عقبال البوست رقم 1000 يا ليدى وبجد مدونتك الواحد بيرتاح فيها وبيفتكر دايما ايام حلوة اوى .

أمبارح كان عمرى عشرين يقول...

اجابات جميله ودمها خفيف اوى :D
واجمل حاجه ان شخصيتك ميدان ايجبت
دى مش موجوده فى السوق خالص ههههههه

فى رعايه الله

blue-wave يقول...

اجابات ولا اروع يا اجمل اخت
من قلبك بجد
ربنا يكرمك وتفضلى منورة البلوجر كله:)

mohamed ghalia يقول...

جميلة إجاباتك ياليدى
وإنتى بجد شخصية قلبها أبيض
ربنا يكرمك ويسعدك دايما
ودايما كده ببنا
بس اعذرينى مش هقدر أجاوب على التاج لأنى مشغول جداااااا فى مذاكرتى
وكمان بجهز فى الموضوع الى هنزله حالا
أسيبك عشان ألحق

كاتب مصري يقول...

بساطة ووضوح بدون زيف
إجابات تدخل الدماغ بسهولة
ربنا يبارك فيكي ويكرمك
اه اه منك بس يا ليدي
مش عارف مش عاوزة تشاركينا في المجلة طيب حتى مفيش وقت تنورينا في وتسيبي تعليقات
أنا بكرر الدعوة للمرة الألف عشان تشاركينا
مودتي

ELMASRYA - MRS WRITER يقول...

حبيبتي الكتكوتة الليدي

ردودك جميلة زيك

والله استمتعت بيها جدا

هروح أقرا الموضوعين اللي قلتي عليهم بإذن الله وأنا متأكده إنهم هيكونوا جامدين آخر حاجة

لتمرير التاج ليا ولعيونك هجاوب عليه

دمتي سالمة بحفظ الرحمن

بنجاواتى يقول...

السلام عليكم

اولا احييكى ع البوست الجميل ده

ثانيا بقى بتقولى:
وعندي مفرش صوف بشتغل فيه في اوقات فراغي او لما اكون مضايقة-وهو ذنبه ايه المفرش -

وكمان طلعتى صنع فى مصر -فكرتينى بفلم وش اجرام:شايف البودى بلت يا طه ..انا فكرتهم مصريين زينا-

وتقبلى تحياتى

MǿиY El-Shreef يقول...

اجابات عسوله مووووت ياليدي

بس تقريبا انا عارفه اسمك :p

ربنا يخليلك بابا وماما ياااارب

وكل تاج وانتي طيبه

MaNoOoSh يقول...

الاول مبروك على التدوينة رقم
100
وعندك حق فعلا السفر بيظهر شخصيات الناس على حقيقتها (الواحد مبيغرفش كدة غير لما يجرب السفر مع الناس)
تحياتى يا قمر واوعى تفكرى تقفلى مدونتك تانى.

ستيته حسب الله الحمش يقول...

رغم اني مريضة وايد دلوقتي بس حبيت اقول اني استمتعت بقراءة التاج ياقمر

اوعي لحسن تتعدي
طهري ردي بديتول
ههههههههههههههههههه

بحبك

الشاعر الحزين يقول...

أنا مش هقولك زى باقى الناس
اجاباتك جميله أو مش جميله
لأن مفيش اجابه بتكون جميله أو مش جميله

الإجابه بتكون على حسب وجهة نظر المجيب

لكن أقدر أقولك اجاباتك فيها نوع من المرح

يعنى تحسى وأنتى بتقرأيها ان أنتى سعيده ومبسوطه كده وعايزه تكملى للآخر

بس بجد أنتى تفوقتى فى الاختبار المئوى

وعقبال الأول بعد المائه

لكى خالص تحياتى

عاشقه الرومانسيه يقول...

نحن السابقون وانتم اللاحقون
ههههههههههههههه
سبقتك يااختشى
وجانى التاج ده

مبروك على البوست رقم 100
وعقبال البوست رقم 1000

احساس طفلة محبة للرومانسية بس واقعية يقول...

هاهاهاهاهاهاها
اجابات شقية اخر حاجة
يا ليدى مش جديد عليك يا قمر :)

بتحبى الاكل الايطالى
على فكرة بقى دا الاكل الوحيد اللى فية منه انواع كتير حلال سومة بتحبة جدا
تعالى انتى بس وملكيش دعوة
:)

هروح اقرى البوستين اللى فوق دول
تقبلى مرورى

لجين أبو الدهب يقول...

ليدى العسولة ..

اجاباتك زى العسل بجد زيك ..

والله يخليكى لما تسافرى تاخدينى معاكى اصل نفسى اسافر انجلترا اوى ..

وعلى رايك اللى جرب مصر للطيران يحرم يطلع من بيته اصلا ..

واكتر حاجة ضحتنى ده روحى روحى روحى ههههههه..

ربنا يبارك فيكى ياليدى ويرزقك كل ما تتمنى وينجحك يااااارب ..

دمتِ بخير ..

كيكى يقول...

والله طيب
**********عموما الف سلامه عليكى من الخدة وربنا يكفكى شر العربيات
سلام
عوووو

Lady E يقول...

blue-wave : تم تأكيد الحجز يا دكتر

منور اول تعليق

Lady E يقول...

هانى زينهم : معقول ده راي مستر هاني !! ده بجد ولا انا بحلم؟

ابتديت المدونة الصيف اللي فات يا مستر

شكرا على رأيك الجميل يا مستر ويارب المدونة تكون عند حسن ظنك

Lady E يقول...

أمبارح كان عمرى عشرين : تسلم يا امبارح كان عمرك عشرين :)

و طبعا ميد ان ايجيبت اومال لأ اومال طبعا :)

في حفظ الله

e_emy يقول...

عسسسسسسسسسسل

عسل ياليدى بجد

اجاباتك وطريقة جميلة

ربنا يوفقك

أحمـــــــــــــد أبو العلا يقول...

اييييييه
التاج علينا حق
c'est la vie

هههههههه
الفرنساوي هوا اللي جه لوحده انا مجبتوش معايا ولا حاجه

بصي ياستي
ومن غير مجاملات
مدوناتنا جميله لما بتنورينا (ديه حقيقه بجد)


طبعا فطست لما قرات
Made In Egypt
مهو أكيد صناعه محليه

هههههههههههه

ياريت متفكريش في قفل المدونه ديه تاني
عشان لو فكرتي, مش هتتقفل, أصل أحنا هنشيل الباب اللي انتي فرحانه بيه ده خالص
ورينا بقى هتقفليه ازاي

بتمنالك حياه سعيده وتحقيق لكل أحلامك ان شاء الله

جارة القمر يقول...

واضحة جدا...

صريحة...

طيوبة...

شفافة من الداخل


هذا مالمسته من اجاباتك لم تتصنعي بل كنتي طبيعية

رائعة وجميل جدا أسلوبك وجدت راحتي هنا

استمري
أشكركي لزيارتي

كوني بخير

Lady E يقول...

blue-wave: شكرا !!!!!

Lady E يقول...

mohamed ghalia : انا متأكده انك مشغول يا محمد ممكن تجاوب اسئلة التاج بعد الامتحانات ان شاء الله

ربنا يوفقنا جميعا

Lady E يقول...

كاتب مصري : شكرا لدعوتك يا كاتب

واحنا اتكلمنا في الموضوع ده كتير واكيد انتا عارف ان مفيش عندي وقت خالص

Lady E يقول...

ELMASRYA - MRS WRITER : تسلميلي يا خالتو يا حبيبتي

وحشتيييييييني بجد

يا رب دايما تبقي في خير وهنا وسعادة

Lady E يقول...

بنجاواتى : وعليكم السلام ورحمة الله وبركاته

تسلم يا بنجاواتي

وبعدين ذنب المفرش انه المفرش بتاعي هههههههههه هو صعبان عليك ليه؟؟

هههههههههه منورني دايما

Lady E يقول...

MǿиY El-Shreef : هههههه انتي اللي عسولة وامورة وجميلة يا موني

وانتي طيبة يا قمر

Lady E يقول...

MaNoOoSh : الله يبارك فيكي يا حبيبتي

وكله على الله

محدش عارف ايه اللي هيحصل في المدونة

بس بيني وبينك مبقاش عندي استعداد افرط فيها

Lady E يقول...

ستيته حسب الله الحمش : شفاكي الله وعافاكي يا حبيبتي

ومش هطهر ردك بديتول بدام العدوى هتيجي منك انا موافقه

سلامتك الف سلامه يا احلى دكتر

Lady E يقول...

الشاعر الحزين : هههههههههههه مش ناقصة احتبارات خاااااالص يا شاعر

كويس اني تفوقت في حاجه :)

تسلم يا شاعر

دمت في رعاية الله

Lady E يقول...

عاشقه الرومانسيه : نورتيني يا جميل

Lady E يقول...

احساس طفلة محبة للرومانسية بس واقعية : انتي بس هاتيلي الفيزا يا احساس طفلة وانا عليا التيكت :)

ربنا يباركلك في سومة يارب

Lady E يقول...

لجين أبو الدهب : لوجي حبيبتي انتي اللي عسولة وجميلة يا قمرايا

وحوشي من دلوقتي للسنة اللي بعد اللي جاية او اللي بعدها علشان رحلة انجلترا :) والله ياريت نروح سوى هتبقى احلى صحبة وعالعموم مفيش حاجه بعيدة على ربنا

اللهم أمين ربنا يستجيب ويجعل ليكي نصيب من دعائك الرائع ده يا لوجي

بحبك في الله

Lady E يقول...

كيكى : والله عارفة اني مقصرة في حقك
متزعليش مني يا حبيبتي مليش بركة الا انتي يا كتكوتتي

ويا اغلى صديقة

Lady E يقول...

e_emy : ايمي العسولة اللي قفلت التعليقات عاااااااااااا

يا بنتي بحب مدونتك وعايزة اكتب كومنتات فيها عااااااااااا اعمل ايه؟

Lady E يقول...

أحمـــــــــــــد أبو العلا : مجامل والله يا انجينير
ثانكيو على كل المجاملات دي
وقول للفرنساوي ميجيش لواحده لأني بجد مخنووووووقة منه ومجرد اني اشوف فرنساوي مكتوب بضايق

ومدوناتكم جميلة علشان روحكم جميلة

شكرا على رأيك الجميل ده يا انجينير
وربنا يستجيب دعائك ويجعل لك حظ فيه

Lady E يقول...

جارة القمر : تسلميلي يا قمرايا

انتي اللي فيكي كل الصفات الحلوة دي

نورتيني