الخميس، 7 مايو، 2009

كلام نواعم



اضطريت أسفة اعمل زيارة اجتماعية مع ماما النهاردة وخارجة مع ماما غصب عني علشان ابطل الحبسة اللي انا حبساها لنفسي دي
المهم روحنا لطنط بايرة وصبحاتها وانا مش بحب اروح لطنط بايرة علشان بتحب اوي تكلمني عن الخطوبة والجواز والعرسان طب انا في ايه ولا في ايه يعني طنط فعلا تستحق انه يطلق عليها لقب خالتي بايرة عن جدارة هي اللي مجوزة نص الجيران لبعض وقديما قالو يا بخت من وفق راسين في الحلال هيدعو عليه كل يوم

روحنا وسلمنا على طنط واتكلمنا ودردشنا وللأسف جابتلي جيلي بالكريم شانتي واتحايل عليها يا طنط والله عاملة ريجيم مش هينفع تقولي ريجيم ايه ده انتي خسيتي عن المرة اللي فاتت
كنتي حلوة كده وماليه مركزك لكن المرة دي خاسة قولتلها يارب اخس كمان وكمان يا طنط امييييييين
طنط بايرة : خليها على الله
انا : كله على الله يا طنط بس انا مش هستنى لما اتعب واعمل ريجيم غصب عني
طنط بايرة : طب بزمتك انا ولا انتي
انا : ..............................
طنط بايرة : الجيلي مبيتخنش وبعدين الريجيم مش هيبوظ من اكلة يعني
انا : قولت في سري عاااااااااااا حد يمشيني من هنا
طنط بايرة : مش هتمشو الا لما تكلي
انا : حاضر يا طنط تسلم ايدك عااااااااااا
وشوية كده وطنط بايرة جابت الصور بتاعت الفرح بتاعها وبجد ما شاء الله كانت زي القمر واللي عجبني ان العريس كان لابس بدله فاتحه مش سودا زي عرسان اليومين دول
وبعدما طنط اتأكدت ان انا كملت طبقي كله كاملا قدمت حاجات تانيه كمان وانا كنت هعيط وماما انقذتني وقالت الوقت اتأخر ولازم نروح فطنط بايرة قالتلنا ابداااااااااااااا لازم تسلمو على جارتي اللي تحت ام عمرو

نزلنا على اساس اننا هنسلم من على الباب ونمشي ف اللي حصل اننا اتخطفنا طنط ام عمرو وطنط بايرة شدونا على جوه البيت دخلنا لاقينا طنط ام عمر وطنط ام علي م الاخر امبراطورية عين وكانت قعدة نواعم وبدام قعدة نواعم يبقى الكلام هيكون كلام نواعم
وطنط بايرة بدأت الكلام بعد التحية والسلام
قالت انها مش عارفة ايه اللي بيحصل لها اليومين دول بتتكلم وهي نايمة دخل عليها جوزها وهي بتقول اه الامارات قال لها امارات ايه قالتلو اللي احنا عدينا عليها واحنا رايحين السعودية مش دبي دي في السعودية اللي اخويا بيشتغل فيها وجوزها فضل صانت ليها وبيتكلم معاها اما يشوف اخرتها ايه معاها وفضلت تتكلم وفجأه صحاها قالتله ايه هو في ايه وبيحصل لها حاجات غريبة يعني مرة
قامت تحضر العشا وهي نايمة وحطت الطاسة في التلاجة وتدور عليها في المطبخ كله مش لاقياها وبعدين قالت لما اروح اجيب بيض من التلاجه لقت الطاسة في التلاجه وحاجات كتير بتحصل لها اليومين دول مع ان معندهاش انطحانات

اما طنط ام عمرو فعايزة تخلع جوزها علشان نده عليها وهي
مسمعتش فخاصمها علشان ازاي ينده ومتسمعوش
وبقاله اسبوع مبيكلمهاش صدق اللي قال رجالة مخهم لاسع
وبعدين قالت اااااااااه متفكرونيش بالذي راااااااح والنبي يختي كل الناس بيقولو على يوم فرحهم ليلة العمر انا بقى بقول ليلة اخر العمر
هو كان يوم اسود من اوله امي وابويا اتشاكلو مع بعض وانا قعدت اهدي فيهم خلاص يا بابا
خلاص يا ماما كل ده عشاني يكش اولع بجاز واقول في سري هسيبهم كده وهما زعلانين مع بعض
قال ايه بابا بيقول انا بنتي حلوة ومتحطش مكياج ايه المسخرة دي والكوافيرة اتأخرت وامي زعلت
وتقول بنتي لازم تحط مكياج وتعمل فورمة وابويا مش راضي المهم الكوافيرة مجتش وجابولي باروكة لبسوهالي
وابويا قعد يزعق ويقول بنتي مش قرعه علشان تلبسوها باروكه
ولا العريس ده بقى اللي حكايته حكايه كان مكسوف يلبس البدلة ويعمل فرح وزفة ويتحايلو عليه ويقولو البس البدلة وهو ابدااااااا مكنش راضي يلبس البدلة
المهم باقي الكلام تحذفه الرقابه مش هينفع اقوله خالص


وكلهم بيتفرجو على مسلسل ميرنا وخليل وكلهم مقتنعين ان مفيش رومانسية كده هي الرومانسية والحب مش موجودين الا في تركيا ولا ايه؟


ومكانوش عايزننا نروح ونفضل سهرانين معاهم للصبح
وبجد كان هيفوتني كتير لو مكنتش روحت مع مامتي
بجد كل الطنطات دول زي العسل


ملحوسة صغنونة : مش هصدعكو ببوستات تانيه دلوقتي لغاية لما اشوف هعمل ايه في امتحان الفرنساوي
واسفة اني مش قادرة اتابع كل المدونات اليومين دول
وصيتكو المدونة لو حصلي حاجه دي غلبانه

ملحوسة تانية : سمعني اغنية اشوف فيك يوم في ضاكتور حامض فرنساوي
الشيء ده موصر انه يتجاهلني وكل محاضرة يسألني هو انتي معانا؟ وحياة خالتك قال يعني مش عارفني وقال يعني انا معرفش مراته وبنته بس تصرفه بالطريقة دي بيقول انه ناوي يخليني اشيل المادة دي السنة الجاية وان شاء الله مش هسمحله بالفرصة دي وربنا معايا ومع كل الدفعات اللي ظلمها واللي مصبرني بجد كلمة قالها انسان عزيز عليا قاللي ان ربنا اقوى منه ومن كل اللي زيه بس انا اعمل اللي عليا واذاكر
وكمان اللي مصبرني اني مش هسمح لشيء زي ده انه يدمر مستقبلي ويحطم احلامي
اكتر من كده وربنا بيزيح
ربنا يوفقنا كلنا في الامتحانات وكل حد يعدي من هنا يدعيلي ويدعي لكل اللي بيمتحنو


هناك 25 تعليقًا:

الشاعر الحزين يقول...

حلوه قوى حكاية الطنطات دى

بس والله دمهم خفيف

وكويس ان أنتى عملتى حساب الرقابه فى الكلام اللى المفروض يتحذف


وربنا يعينك على الفرنساوى يارب وترجعى من باريس بألف سلامه

Lady E يقول...

الشاعر الحزين : تسلم يا شاعر

وهما فعلا دمهم خفيف جدا

امييييييين يا رب ربنا يعينني ع الفرنساوي

مسدس صغير يقول...

ليلة الجواز مش ليلة العمر زى مبيقولو
ليلة الجواز هى ليلة اخر العمر
ههههههه
حلوة
احييكى على البوست
وخللى طنط بايرة تنفع نفسها

ستيته حسب الله الحمش يقول...

ايه الجمال ده
مش ممكن الطنطات ياخدوني وسطهم في قعدات كلام الطنطات ده

انا مشفتش القعدات دي من وانا عندي 15 سنة
حصل ليها في القاهرة انقراض مفاجيء نتيجة ان الناس بتلف حوالين نفسها

شدي حيلك يا مودموازيل
اورفوار
بون وي

Bent Men ElZaman Da !! يقول...

طب والله عسل طنط بايره هههههههههههه
الواحد يقعد معاها هى والطنطات التانين يضحكله شويه وخلاص
ربنا معاكى يا جميله فى الفرنساوى اللى مغلبك ده
ومش تقلقى المدونه امانه فى اعناقنا :D

MǿиY El-Shreef يقول...

ياسلام ع الزيارات الحريمي دي

بتشبع ميولي ف الرغي :))

بس ايه ياعيني ده انتي عامله ريجيم وعليكي اكزام وفرنساوي كمان

ربنا يعينك

ويااااااادي ميرنا وخليل خلصنا من مهند طلعلنا ده

حاجه تغيظ :D

ربنا معاكي ياجميله

hamada يقول...

الجروب الرسمي لجريدة الصباح العربي بيت المدّونين العرب
http://www.facebook.com/group.php?gid=78080770039

أمبارح كان عمرى عشرين يقول...

هههههههههه والله دمهم زى العسل
طنط بايرة اسمها كده ليه وهومتجوزة سؤال لولبى ههههههههه\

بوست دمه خفيف اوى
دمت بكل خير
سلام

عاشقة الأحزان يقول...

بخخخخخخخخخخ
ههههههه
السلام عليكم
إذيك ياطنط
أخبارك أيه الله أكبر على قاعدات الحريم الجامده دى
ههههههههه
والله أنتى عسل
ربنا يسعدك يارب
دمتى بألف خير تحياتى لكى
إيناس

احساس طفلة محبة للرومانسية بس واقعية يقول...

القعدات اللى زى دى متتعوضش اصلا
بيكون فيها نسبة كوميديا واقعية غريبة
ولا كوميديا افلام احمد حلمى كلها

كويس ان الزيارة مفتتكيش

اهو ضحكتى شوية
وبوظتى الرجيم شويتين

هاهاهاهاهاهاهاها
تقبلى مرورى

بنجاواتى يقول...

يا سلام على قعدة الطناطيط
بتبقى كلها جلسات علمية وبيتطرقوا الى امور سياسية واقتصادية آخر حاجة

على فكرة الجيلى مش بيتخن ومش أكلة واحدة اللى هتبوظ الرجيم-ست حكيمة ...بتدى حقن-

بس فى حاجة جميلة اوى وهى ان العريس زمان كان بيلبس بدلة بيضة وشوز بيضة وكل حاجة بيضة وفى الاخر تطلع الست وتقول دى كانت ليلة سوده..ههه

نومستا

ELMASRYA - MRS WRITER يقول...

عسووووووووووووووولة

الموضوع ده كوميدي جدا والطنطات دول دمهم خفيف

كويس انك اتبسطتي بس زعلت انك بوظتي الريجيم

وبالنسبه لحامض فرنساوي ولا يهمك يا قمرايه بإذن الله هتنجحي واللي حامض فيه اللي أحمض منه يوريكي فيه يوم
( وش بيضحك قوي )

خدي بالك من نفسك وفي انتظارك بعد الإختبارات

مواااااااااااااااااه

أحمـــــــــــــد أبو العلا يقول...

هههههههههههه
قعادات النواعم ديه شكلها من كلامك انها ممتعه لدرجة أن البني آدم ممكن يروح فيها من كتر الاستمتاع
ههههههههه

لا لا منصحكيش انك تكرريها كتير حفاظا علا الصحه العامه

ربنا معاكي يارب ويكرمك في الفرنساوي وكل المواد ان شاء الله

ارمي تكالك على الله وقولي يارب
قولي يارب الراجل ده ورانا قوته علينا, يارب احفظنا بقوتك ورحمتك

وان شاء الله ربنا يوفقك

تامر علي يقول...

قاعدة حلوة أوي .... ولا تنظيم (القاعدة) .... طبعاً القعدات اللي زي دي هي سبب السمنة المفرطة المنتشرة بين أفراد الشعب :)

حامض ده شكلة عنده كلكيعه في مخه زي دكاترة كتير بس ربنا خلصنا منهم الحمدلله وعقبالك وكل الممتحنين :)
تحياتي :)

Lady E يقول...

مسدس صغير : طنط بايرة زي العسل بجد
ومتقلقش يا مسدس هي نافعة نفسها بس انا سميتها طنط بايرة علشان زي خالتي بايرة اللي بتيجي في التلفزيون وبتشتغل خاطبة لكن بجد هي انسانة جميلة

Lady E يقول...

ستيته حسب الله الحمش : تنوري قعدة كلام الطنطات يا دكتر

وانا برضه من زمااااان جدا محضرتش قعدة الطنطات مع بعضيهم

Bonne nuit

J'aime

Lady E يقول...

Bent Men ElZaman Da !! : ههههههه هما فعلا طنطات زي العسل

وانا عارفة ان ورايا بنوتات :)

تسلميلي يا قمرايا
منوراني دايما

Lady E يقول...

MǿиY El-Shreef: ايه ده طب مجيتيش معانا ليه يا موني ؟؟ :)

وبعدين يا اختي مفيش رومانسية في الدنيا اساسا فمش هنشوفها كمان في مسلسل ومش هنسمعها في اغاني عااااااا

Lady E يقول...

أمبارح كان عمرى عشرين : هههههههههه طنط بايرة انا اللي سميتها كده علشان زي طنط بايرة اللي بتيجي في التلفزيون وبتجيب عرسان للبنوتات
وهي متجوزة ومن زمااااااان كمان وانا قولت في البوست اني شوفت الصور بتاعت الفرح بتاعها يبقى متجوزة ولا كانت في حفلة تنكرية :)

وبعدين بتعقد لما بتقولي بوست دمه خفيف لأن بوستاتك هي اللي دمها خفيف جدا بجد مفيش وجه مقارنه

Lady E يقول...

عاشقة الأحزان : عاااااااا متخضتش على فكرة

وعليكم السلام ورحمة الله وبركاته

الحمد لله يا طنط ايناس كل اللي يجيبو ربنا كويس

وكانت قعدة جميلة كانت ناقصاكي بجد :)

ربنا يكرمك ويسعدك

Lady E يقول...

احساس طفلة محبة للرومانسية بس واقعية : فعلا يا احساس طفلة انا مكنتش متخيلة كمية الضحك اللي ضحكناها

وبالنسبة للريجيم متفكرنيش عاااااااا

واوكي هتقبل مرورك ومش هديلك مخالفة

Lady E يقول...

بنجاواتى : فعلا سياسية واقتصادية وملوخية كمان :)

وهبقى اسألها في موضوع الحقن ده :)

هههههههه والعريس دلوقتي بيوفر على نفسه و من اولها بيلبس اسود في اسود

ربنا يوفقك ويعينك في امتحاناتك يا دكتر

نومستا

Lady E يقول...

ELMASRYA - MRS WRITER : تسلميلي يا خالتو

وانا كمان زعلت اني بوظت الريجيم عاااااا مش هبوظه تاني

هههههههه امين يارب

وحشتيييييييييني جدا يا خالتو وهتوحشيني اكتر يارب تبقي بخير وصحة وسعادة

Lady E يقول...

أحمـــــــــــــد أبو العلا : ههههههه لازم تتكرر تاني يا انجينير
حد يسيب الطنطات العسل دول وهو الهسهس موجود فمش مشكلة لما يزودوه شوية

واللي انا واثقة منه ان ربنا هيورينا قوته على كل ظالم مش بس حامض
وحسبنا الله ونعم الوكيل

ربنا يكرمك يا انجينير ويباركلك في البرامج بتاعتك يااااااارب

Lady E يقول...

تامر علي : ايه ده عرفت منين ؟؟ انتا كنت معانا ولا ايه :)
وبعدين بلاااش تنظيم القاعده دي علشان الناس اللي هناك ميجوش يقفلولنا البلوج عاااااا

وحامض عنده كوكتيل كلاكيع مش كلكيعه واحدة وده بشهادة كل اللي يعرفوه الحمد لله

ربنا يوفقنا
وربنا يكرمك يا تامر ياارب