الجمعة، 24 أبريل 2009

الصبر مر وكمان اليأس مر


اولا مبروووووك على التعادل بين الزمالك والأهلي علشان محدش يستهين بالزمالك تاني والاهلاويين يبطلو غرور وعارفة انكو هتسيبو البوست كله وهتمسكو في حتة ان الاهلاويين مغرورين بالنادي بتاعهم

امبارح حصلت معايا مواقف كلها اسوأ من بعض ومنها اني خرجت عن شعوري لأول مرة في الكلية
لما ضاكتور الفرنساوي المحترم خلص محاضرة مع سنة تانيه واخرنا ساعة كاملة عن معاد محاضرتنا
وطبعا مفيش مكان نقعد فيه واللي زاد وغطى ان كان في مايك في مدرج من المدرجات المايك ده كان بيصفر وصوت الصفارة ده ممكن يخلي الواحد ميسمعش تاني وخصوصا واحنا في مكان مغلق الصوت ده كان قوي لدرجة خلتني صدعت
وقلت اكيد حد من العمال هيتصرف ويطفي المايك ودخلنا محاضرتنا لقينا ال......... بيقولنا اطلعو بره
مش عايز سنة تالتة دلوقتي اصله مدرج ابوه عمركو شوفتو حد بيمضي الطلبة انهم حضرو المحاضرة؟؟؟
لما اتطردنا كده واحنا لسه داخلين لقيتني تلقائيا بقوله يخربيت غبائك بس والله كنت تعبت من انتظار المحاضرة قدام باب المدرج وتعبت من صوت المايك وفي الاخر لما طلعنا من المدرج انا اللي نزلت للمدرج اللي فيه صوت المايك الشنيع وقفلته ولا حد سأل ولا حد اهتم
وبعد ساعة تانيه من الانتظار وطلبة تخرج واحنا واقفين وطلبة تطلع واحنا واقفين لقيت كل سنة تالتة بيدخلو
المدرج فدخلت معاهم وبعد لما قعدت وسلمت ع البنوتات اللي معايا
طردنا لتاني مرة وكنت في تاني بنش ووقتها قولت بصوت عالي اكيد وصله حسبي الله ونعم الوكيل
و البنات اللي معايا في نفس البنش قالولي بنقولها كتير حسبنا الله ونعم الوكيل
فكرت وقتها امشي وطظ في المحاضرة وحسيت بكمية غضب ونرفزة وصلتني لدرجة اني هعيط
بس تماسكت وقلت اما اشوف اخرتها ايه وبعدين مش انا لوحدي اللي بيحصل معايا الهبل ده
وبعد كل ده لما دخلنا المحاضرة قالنا كلمتين وبس
مش هاحذف حاجه من المنهج المنهج كله مقرر عليكو
وطلعنا من المحاضرة والأمن بدأ يطرد الطلبة بره الكلية كالعادة علشان يقفلو الكلية
وانا مشيت على رأي ام كلثوم واثق الخطوة يمشي ملكا مليش دعوة بأمن الكلية
وروحت بكل هدوء نقلت جدول الامتحانات ولقيت منظر ورود بيضا جميلة جدا في الكلية


المنظر ده عجبني جدا بس لما صورته الصورة مطلعتش حلوة زي الحقيقة دايما الاصل احسن من الصورة واخدين بالكو ان حتى الورود حزينة علشانها في كليتنا او يمكن حزينة علشان حاسة بيا
انا متأكده ان ربنا مش هيضيعنا ومتاكده ان ربنا هيذل الشخص ده في يوم من الايام علشان ظلمه للناس
ده مفيش حد خالص بيقول كلمه حلوه فيه ؟؟؟؟ معقول يكون في ناس كده في الدنيا طب ليه؟؟
وعمري ما هنسى ان لما دخلت قسم لغة انجليزية وعرفت ان عندي فرنساوي قولتله انا مدرستش الفرنساوي في ثانوي قالي ولما انتي عارفة انك هتدرسي فرنساوي في قسم لغة انجليزية دخلتي انجليزي ليه ؟؟؟ يعني قمة الغباء في الرد انا اصلا مكنتش عارفة ان هيبقى عندي فرنساوي في انجليش
دوشتكو انا بموضوع الفرنساوي ده بس قولت يمكن لما اكتب ارتاح نفسويا شوية
لأن انا نفسيتي مدمرة وحاسة اني مكسورة اوي من جوايا وكل يوم بيعدي قلقي بيزيد
ومتأكده انه هيجيب لنا امتحان يشيب الكتكوت زي ما عمل السنة اللي فاتت
اللجنة كانت عبارة عن مشرحة مش لجنة في ناس قطعو الورقة ومشيو وناس اغمى عليهم
مفيش قدامي غير حلين اني اتوكل على ربنا سبحانه وتعالى واني اذاكر بس مع ذلك حاسة بالضعف والانكسار والوحدة لأن مفيش حد هيقدر يجتاز الامتحان ده غيري

من اصعب الحاجات على الكبار انهم بيستحملوا اختياراتهم
وانا كان قدامي كل اقسام كلية الأداب وانا اللي اخترت اللغة الانجليزية يبقى لازم استحمل واكمل
ومعملش زي الغريق اللي لما قرب يطلع على الشط تعب واستسلم مع انه كان فاضله خطوة وينجو !!


(فَصَبْرٌ جَمِيلٌ وَاللّهُ الْمُسْتَعَانُ عَلَى مَا تَصِفُونَ) سورة يوسف الأية 18

هناك 38 تعليقًا:

الشاعر الحزين يقول...

عندك حق

لازم تقولى

حسبى الله ونعم الوكيل

والله العينه دى من الدكاتره عندنا فى الكليه منها كتير

بالرغم من انى أزهر وكلية دراسات اسلاميه
يعنى المفروض يكونوا عارفين ربنا
لكن للأسف

وبرده بنقول حسبنا الله ونعم الوكيل

وأنا بحييكى جدا جدا
على ختامك الجميل للبوست
بجد ختام رائع

آيه قرانيه فعلا مريحه قوى

وعلى فكره مش هتكلم عن موضوع الاهلى والزمالك عشان ميحصلش خلاف

ولكى خالص تحياتى

MaNoOoSh يقول...

ربنا يستر والامتحان يكون سهل
والدكاترة دول فعلا حسبى الله ونعم الوكيل فيهم.. بيعقدوا اجيال كاملة
فكرتينى بدكتور كان بيدرس كيمياء وجالنا فنون جميلة يدرسلنا مادة تكنولوجيا.. تخيلى انه كان بيدرسلنا تركيبات البويات واعدادات النقاشة.. بس فضلنا وراه لغاية ما الكلية انتدبت دكتور تانى.. بس بعد دفعتنا طبعا
ربنا معاكى يا قمر وذاكرى وسيبى الباقى على ربنا

Lady E يقول...

الشاعر الحزين : حسبي الله ونعم الوكيل في كل وقت مش بس مع العينة دي من الضكاترة

وبعدين معقول موجودين في الازهر؟؟؟؟؟؟!!!!!!!!!! ربنا يكون في عونكم

واتكلم براحتك في موضوع الاهلي والزمالك ان شاء الله مش هيحصل خلاف

التعليق الاول على التوازي يا شاعر
لسه باقيلك مرة وتكسب عجلة :)

Lady E يقول...

MaNoOoSh : ههههههههههههه الامتحان يجي سهل ده من رابع المستحيلات والله انتي طيبة يا منوش

وعارفة حصل فعلا واحنا في سنة اولى زميلتنا مستحملتش الظلم ده وسابت الكلية

وبجد برافو عليكو انكو اتصرفتو وخليتو الكلية تنتدب حد تاني على الاقل الدفعة اللي بعدكو متظلمتش زيكو

نورتيني يا قمرايا وسعيدة بمتابعتك للمدونة

بنجاواتى يقول...

حسبى الله ونعم الوكيل

الحاجة اللى تفقع انه مفيش مقاييس ولا نظام ولا رقابة على حد فى الجامعات علشان يتظبطوا ويحترموا نفسهم شوية

ان شاء الله انتى عليكى تذاكرى وتاخدى بالاسباب كده وتخلى كل اللى تعرفيهم واللى ما تعرفيهمش يدعولك وربنا ييسر لك الصعب

ويا ستى علشان ما تزعليش اوى فى حاجات من دى بتحصل عندنا فى طب وشغل ديرتى وحاجة مش ظريفة برضه

والف مبروك للزمالك والمرة الجاية ان شاء الله نكسبهم بقى-خطوة بخطوة كده-

بس عاوزك ان شاء الله بعد ما تنجحى بإذن الله تروحى للدكتور وتقولى له خثئت ....سكلتك امك

وتقبلى تحياتى

احساس طفلة محبة للرومانسية بس واقعية يقول...

لا حول ولا قوة الا بالله

انا عارفة الدكاترة اللى من النوع دا رخميييييييين وغلسييييييييين وكل اين
هاهاهاهاهاها

شفتى ماتش امبارح مدحت شلبى على موديرن سبورت كان بيقول كدا على اللعيبة بتوع الزمالك
لاول مرة سهرت اتفرج على ماتش للزمالك كنت هنام لان الساعة كانت 3 وربع الفجر ساعت ما ابتدى الماتش و شفت العيال بيلعبوا فوق الممتاز
قلت لا لازم اتفرج

رغم التعادل بس هم كانوا بيلعبوا افضل ويستحقوا حتى يبدائوا بالتعادل لغاية لما يطلعوا بالزمالك تانى

الورد كان عايز يتصور من زاوية شمال شوية بس برضو حلو مناظر الطبيعة بنحس بيها اوى فى حالة الحزن او العصبية او الفرح والمرح فى الحالة العادية مش بتأخدنا اوى

يارب تعرفى تجاوبى كل اسئلة الامتحان حتى لو جة صعب وتتخرجى بقى
هاهاهاهاهاهاهاها
قصدى تروحى رابعة الا قوليلى هى كمان فيها فرنساوى ؟

تقبلى مرورى

e_emy يقول...

صح زى ماانتى قولتى
سبيها لله وذاكرى واعملى الى عليكى
وان شاء الله تعبك مش هيضيع

بالنسبه بقى للدكتور
ف عندنا منه كتير
وبرضه حسبي الله ونعم الوكيل

وربنا يستر هااااااانت

ع فكره
انا اكتشفت امبارح انى صبوره جدااا
والحمد لله مطلعش مر ووصلت للنتيجة الى عاوزاها وبجد بعد ده كله هتحسى بسعادة لان تعبك وصبرك مرحش ع الفاضى

الحمد لله ع كل حال

MǿиY El-Shreef يقول...

ايه ده هو اداب انجليش فيها فرنساوي

ده ايه الليله الجميييله دي

انا ماكنتش اعرف

وبعدين الدكتور ده ماينفعش اعملوا اي حاجه علوا صوتكم ان شالله حتى تدعوا عليه

ويابخت من بات مظلوم

وقولي بسم الله انتي وربنا هيساعدك وهيفتحلك طريقك

ربنا معاكي ياجميله

وصورة الورد تحففففففففففه

و ع فكره .. عمر التعادل مع فريق بيشابه حتى الفوز ^-*

ماتفرحوش اوي احنا كنا زي الزفت

هههههههه

سلام يا سكر

Ahmed يقول...

عشان أنا عارف انتي بتحبي الفرنساوي قد ايه (وش برء)

Ne pas être bouleversé
Vous méritez de meilleurs choix

أرمي تكالك على الله

لو كل الدكاتره عايزه تأزيكي وانتي توكلتي على ربنا, انتي عارفه النتيجه

وبعدين الدكتور ده أصلا معقد نفسيا
الأسلوب ده أسلوب ناقص جدا

على فكره هوا مسؤل أمام ربنا على اللي بيعمله ده
وممكن ربنا يبعتله اللي يذله في الدنيا

ربنا يهديه

شاب كــ طخين ـــــا يقول...

ربنا يقويكى وتخلصى على خير
كل الكليات كده وكله بردو بيقول نفس الكلام الاقولتيه فى الأخر
اصبر واخلص بقى
اصبرى واحتسبى تعبك عند ربنا
وان شاء الله الأمتحان يجى كويس

_________________

ومش هعرف اعلق من غير ما اتكلم على الأهلى حته من قلبى
طبعا لازم نكون مغرورين (من له فخر كا فخرى هههههههههههه)
يعنى واخدينكم رايح جاى 5 مواسم وفاتحين على الرابع على كل الفرق مش فى مصر بس وفى افرقيا كمان يبقى ليه منغرش
امبارح بجد بجد فرحت بلاعيبه الزمالك واحد زى حازم وصبرى مواهب طالعه بسرعه الصاروخ ربنا يبعد عنهم بس
لامبلاة الزمالكاويه ويحسو انهم فى نعمه ويحافظو عليها علشان ميموتوش وهما لسه صغيرين
يا يخلصو نفسهم ويمضو للأهلى وهيعيشو اجمل ايام حياتهم

ومبروك التعادل للزمالك ههههههههه بقيتو تفرحو با التعادل معانا يبقى منغرش ليه هههههههههههههههه

دمت بكل خير
فى رعايه الله

غير معرف يقول...

هو أنتى زمالكاوية...ماااااااااااااااااااااااشى و الله لأفرجك

بس بالرغم من أنك من الأعداء بس و الله صعبتى عليا ....بس ضحكتينى أوى قبل ما أقرا الحتة بتاعة يخرب بيت غبائك كنت بقول لنفسى يخرب بيت غباء البشر إيه ده
هههههههههههههههه

توارد أفكار بس فى الشتايم بس


بجد حسبى الله و نعم الوكيل

ELMASRYA - MRS WRITER يقول...

حبيبتي الليدي الكتكوتة

والله زعلتيني جدا لما حكيتي عن الدكتور ده

ربنا يسامحه

ليه بس بيعمل ده فيكم؟هو تعجيزوخلاص؟

على العموم ولا يهمك وذاكري واجتهدي وبإذن الله ربنا هينصرك وينجحك

تفتكري يكون بيعمل كده علشان يعمل منكم طلبة ممتازين في اللغة الفرنسية؟

بس برضه هيبقى أسلوبه صعب جدا

على العموم إجمدي وماتفكريش بشكل سلبي علشان الفكرة لا ترسخ في عقلك وتأثر على طاقتك ونفسيتك

خدي بالك من نفسك وثقي في الله الذي لا يضيع أجر كل مجتهد

دمتي سالمة بحفظ الرحمن

Lady E يقول...

بنجاواتى :ده الموضوع منتشر بقى مش في كليتنا بس لأ في كل الكليات والمجالات كمان والله حاجه تزعل
وخصوصا ان الطب المفروض انه مجال مهم ومفيش فيه اختيار حياة او موت

وفعلا اللي يغيظ ان مفيش رقابة ولا حد بيحاسب الناس دول بس هيجيلهم يوم ويتحاسبو فيه وهنخلص حقنا منهم قدام ربنا سبحانه وتعالى

واكيد الف مبروك للزمالك لأنهم لعبو كويس امبارح

وانا بفكر اول لما اخد شهادة الليسانس ان شاء الله اقوله ثكلتك كل عيلتك بس برجع واقول مش عايزة اخد حقي بنفسي ربنا هو اللي هياخدلي حقي انا وغيري من اللي ظلمهم وضيع احلامهم انهم يبقو معيدين او يجيبو تقدير كويس

انا ماما يقول...

تعرفي اصلا الكلام عن الدكاترة العينة دي من الدكاترة موجود منها كتير جدا في كل كليات وجامعات مصر وان لم تكن العينة الوحيده اصلا
بجد حسبي الله ونعم الوكيل في كل دكتور فاكر نفسه ملك الطلبه في ايده
ربنا معاكي ومعانا في الامتحانات ومع كل اللي بيمتحنو ومتزعليش على اختيارك للقسم عشان اي كلية كنتي هتروحيها تاني كنتي هتلاقي فيها نفس العينة

شفـقــة و إحســــان يقول...

انا لو منك ادعى عليه ساعة فجرية
بس متزعليش واعملى اللى عليكى وثقى ان ربنا لا يضيع اجر من احسن عملا
وان ما كانش كده متبقيش فى جامعات مصر

mohamed ghalia يقول...

إنما أشكو بثى وحزنى إلى الله)
متخافيش المهم ترضى ربنا وبعدين ضميرك وتحسى إنك راضية عن نفسك
وبعد كده يحصل الى يحصل

حسام غانم يقول...

فعلا أساتذة الكلية دول

معظمهم بيبقى عنده عقد ومفاهيم غلط

وكله بيطلع عالطلبة

ربنا معاكي

blue-wave يقول...

ربنا معاكى يا ليدى يارب
وان شاء الله تقدير السنه دى هايبقى احسن تقدير جبتيه
وهافكرك
تحياتى

Lady E يقول...

احساس طفلة محبة للرومانسية بس واقعية : هههههه هما فعلا كل اين

والماتش فعلا كان جميل انا مكنتش بتابع الكورة كتير قبل كده بس تابعت الماتش ده وكان ماتش جميل وهما كانو بيلعبو كويس بس مش لدرجة فوق الممتاز

وبالنوسبة للورد فتخيلي اني بصور وامن الكلية عمالين يزعقو للطلبة اللي جوه الكلية فصورت بسرعه وعلى فكرة انا مصورة من زاوية شمال
وبالنسبة للطبيعة فأنا بعشق الطبيعة دايما في حالتي العادية او فرحانه او مخنوقة
بحس اني برتاح لما بشوف ورود وشجر وبحر وجبال ....الخ

وامين يارب ان شاء الله هحل كويس
والحمد لله سنه رابعة مفيهاش فرنساوي
كان فيها لاتيني واستبدلوه بالعربي

نورتيني يا قمرايا

Lady E يقول...

e_emy : ربنا معانا كلنا يا ايمي

ربنا يوفقنا وينصرنا ومنهم لله

نورتيني يا قمرايا

والبوست الاخير عندك رااااااائع بس انتي قافلة التعليقات عااااااا

No Fear يقول...

السلام عليكم
فصبرا جميل

Lady E يقول...

MǿиY El-Shreef : شوفتي بقى يا موني انا حذرت اهو علشان لو ناوية تدخلي كلية الهباب اللي انا فيها تبقي عارفة ان انجليش فيه فرنساوي

وفي اكتر من اني ادعي عليه في صلاة الفجر في رمضان وبعد رمضان ؟؟ منه لله وحسبنا الله ونعم الوكيل

وشهد شاهد من الاهلاوية انكو كنتو زي الزفت نياهاهااههاهاهاهاها

متزعليش المرة الجايه هتبقو كويسين مش زي الزفت

سلاموز بالموز

Lady E يقول...

أحمـــــــــــــد أبو العلا : بتكتب فرنساوي في البلوج بتاعي يا انجينير هزولت هزولت يعني عاااااااا
ماشي يا انجينير هتعلم اي لغة تانيه علشان متعرفش انا بقول ايه عااااااا

الفرنساوي ك لغة جميل لكن كدراسة وحد متخلف يشرحه وامتحانات وكده بتكره نفسك

وانا فعلا متوكلة على ربنا سبحانه وتعالى وهو حسبي ونعم الوكيل

ومش اسلوبه بس اللي ناقص هو اصلا انسان ناقص ومتأكده انه هيتذل ذل محدش شافه منه لله

شكرا على كلامك يا انجينير ومتجيبش الفرنساوي معاك تاني

Lady E يقول...

امييييييييين ياااااااااااارب

-----------------------------

مين فخري ده ؟؟؟
وبعدين من يضحك اخيرا يضحك كثيرا المهم اخر ماتش مش ال5 مواسم
وكويس ان واحد اهلاوي عرف ان الزمالك كانت بتلعب كويس وبعدين احنا الزملكاوية معندناش لا مبالاة بالعكس بنحب النادي بتاعنا جداااااا وبنشجعه حتى لو خسر
وبعدين ايوة فرحانين بالتعادل علشان النادي الاهلي مش اي نادي ده نادي قوي وجمهوره كبير يعني مش تعادل مع اي حد :)

Lady E يقول...

انا ودماغي : ههههههههههههههه هتفرجيني على فيلم ايه يا ميرو

وبعدين مش اختي الصغنونة لازم يكون في توارد افكار في حاجات كتير مش بس في الشتايم ههههههههههه

واحنا مش اعداء ولا حاجه عااااااا

يا اهلاويه

Lady E يقول...

ELMASRYA - MRS WRITER: معلش والله يا خالتو يا حبيبتي مش قصدي ازعلك بس انا خلاااااص اتخنقت فكنت لازم افضفض

وربنا يعيننا وننجح ونخلص من استبداد ضاكتور الفرنساوي ده على خير

تسلميلي يا احلى خالتو

Lady E يقول...

Pinky : تقريبا كلنا بيحصل معانا نفس الموضوع عاااااااا

ربنا يوفقنا يارب وينصفنا من الظلم ده

نورتيني يا قمرايا

Lady E يقول...

شفقة هانم واحسان بك : صحيح يا شفشوقتي لازم ابتسم علشان انا في جامعة مصرية

وانا دعيت عليه في رمضان وفي ساعة فجرية وعلى راي المثل دعوة وليه ساعة فجريه ههههههههه

نورتيني يا قمرايا وان شاء الله خير
متأكده ان ربنا سبحانه وتعالى مش هيضيعنا

Lady E يقول...

mohamed ghalia : والله فعلا يا محمد

(إنما أشكو بثى وحزنى إلى الله)

عندك حق

ربنا يوفقك

Lady E يقول...

حسام غانم : ويلكم باك يا حسام

وفعلا في اساتذه جامعة كتير مكلكعين وكلكعتهم بتتطلع على الطلبة

ربنا يهديهم

Lady E يقول...

blue-wave : امين يارب

ربنا يكرمك يا دكتر بترفع من روحي المعدنية

نورت المدونة يا دكتر وربنا يبعد عنك اي شر

Lady E يقول...

No Fear : وعليكم السلام ورحمة الله وبركاته

الصبر مفتاح الفرج

شكرا على تعليقك يا نو فير

لجين أبو الدهب يقول...

حبيبتى ليدى اللى وحشتنى جدا والنت كان عندى فاصل للاسف :(

وما تزعليش نسك والله ياجميل ..

فى دكاترة دول ربنا كتبهم عذاب بجد على الطلابة ..

وكان يطلعونا ويدخلونا وفى الاخر كله عليكى ..


تبقى لاما تشتميه وتشتمى كل حاجة فى الدنيا .. لاما تتوجهى لربنا بكل ما فى قلبك بحسبنا الله ونعم الوكيل ..

بصى احنا كان عندنا دكتور مش دكتور دكاترة بالاسلوب ده ..

وببقى والله داخلة الامتحان قبل حتى ما اشوف الورقة عندى كمية احباط واببقى داخلة الامتحان واقول عارفة انى طالعة بيها اتعب نفسى ليه ..

بس بجد ياليدى ما تخليش الانكسلر والاحباط يتملكك عن تجربة والله ..

انا فى امتحانات كنت اذاكر واقول توكلى عليك يارب اهو على الاقل لما اطلع بيها ما ازعلش واقول انا عملت اللى عليا يارب ..

انتى ابعدى الاحباط والانكسار واتقوى كده بالله وهاتنجحى بتقدير كمان والله ان شاء الله ..

وبلاش تخبيط فى الاهلاوية علشان ما نزعليش من بعتينا .. ها من بعتينا ..

ولو اتغرينا لينا حق يااوختى ما نتغرش ليه ناقصنا بطولات ولا ناقصنا دورى .. هههههه

ربنا يجعلك من الناجحين ويوفقك ..

دمتِ بخير ..

* على فكرة كلمات فاروق جويدة دى أعشقها ..

Unknown يقول...

ربنا يوفقك ويبعد عنك الضيق والزعل ويزيدك صبر وصلابة وقوة أصل في بلدنا دي لازم تكوني قوية وإلا خلاص مش هيبقالك وزن

اتحملي بأه هو نظام جامعات مصر كلها كده ..تقولي ايه بأه .. الأهلم والمهم انك تكوني راضية ومأقلمة نفسك ع الجو ده وأي حاجة تحصل تدايقك تحتسبيها عند ربنا
وكان الله بالسر عليما..

وحشتني مدونتك قوي ونفسي انك تشاركينا في المجلة بس مش عارف انتي مش موافقة ليه المجلة الحمد لله نجحت مبدئيا ونقلتها على موقع خاص بيها كمان
ياريت تنوريني وتشاركينا بأه..
ده اللينك الجديد
roaua.com
منتظرك

♥نبع الغرام♥♪≈ يقول...

السلام عليكم
بجد فعلآ حسبى الله ونعمه الوكيل وربنا يصبركم
معلهش الصبر جميل
دمتى بألف خير
تحياتى

غروب يقول...

ازيك يا نونو

وحشتينى اوى

معلش يا بنتى كلنا لها

بجد القسم بتاعنا دهار والضكاتره بيفتروا علينا اوى

ده في القاهره نفسها مش بيدرسوا والله لا الكم ولا الكيف بتاعنا ده

علشان كده معظم الكفاءات بتبقي من خريجي المنصوره

بس انا يا بنتى كنت فكراكى في رابعه ادى

طلعتى في تالته ؟؟؟؟؟؟؟

كمان انا مش عارفه انتى مهتمه بالمحاضرات اللى تصدع دى ليه

انا مش بحضر والحمد لله بجيب تقدير المهم بس نفهم الدكتور عاوز ايه في الورقه بلاش وجع دماغ

يلا معلش شكلى طولت
المهم شدى حيلك وربنا معانا

Lady E يقول...

لجين أبو الدهب : هييييييييييييييه

منورة يا لوجي والله انا والبلوج كنا مفتقدينك جداااااااا

وهو ده اللي انا بعمله التوكل على الله وحسبنا الله ونعم الوكيل

وبعدين هو حد يقدر يخبط في الاهلاوية برضه يا لوجي هههههههههه

وبعدين اشعار فاروق جويدة ميختلفش عليها اتنين ذوقك رااائع بجد

نورتيني يا حبيبتي

moory-mero يقول...

السلام عليكم و رحمة الله و بركاته

ياااااااااااه كأني بقرأ ايام دراستي وخنقتي من الدكاترة ده انا شفت اكتر من كده وخصوصا اني بسافر من محافظة لمحافظة موش مقيمة كمان بس لأن موش بعرف كلمة صبر وخلقي ضيق وعصبية خالث مالث بفرغ شحنتي في اللي بيتعبني حتى لو روحي في ايده ومفيش حد اثلا بياخد الروح غير ربنا

انا كان لازم محاضراتي موش سكاشن بث لاء والمحاضرات كمان كله يمضي فيها حضور والغايب يتعد له 3 مرات غياب وحرمان من الامتحان فكرتيني بايام ما يعلم بيها الا ربنا بس صدقني موش تخافي ارمي حمولك على ربنا وان شاء الله موفقة

ولو ع الفرنساوي تعالي ازاكرهولك يا قمر .. احم احم

في رعاية الله