الأحد، 5 أبريل 2009

الحكاية وما فيها + تحديث

مدونة جديدة ايه رأيكو تبصو عليها ؟؟ ان شاء الله تعجبكو
http://lovelycutelife.blogspot.com/ اجعل حياتك رائعة
----------------------------------------------------------------------
ملحوظة : مش هظلمكوا زي ما ظلمتوني وهطلع أحسن منكو ومش هجرح فيكو زي ما جرحتو فيا والكلام ده موجه لأتنين كنت معتقدة انهم غاليين عندي وللأسف مكنتش اتصور انهم يبقو كده ع العموم منهم لله وكويس اني اكتشفت حقيقتهم نفسي اقول كلام اكتر من كده بس هما ميستحقوش كلام اكتر من كده


-------------------------------------------
زمان وانا في تانيه اعدادي قرأت قصة عن اتنين كانوا بيتراسلوا بالرسائل المكتوبة عبر البريد المهم بدأوا يفهموا بعض اكتر وبعدين اعجبوا ببعض وبعدين شوية بشوية حبو بعض المهم قرروا انهم يتقابلوا علما ان كل حد فيهم كان في مدينة مختلفة فالبطلة وكان اسمها ماري بعتت واحدة صاحبتها من ناحية الشكل مش مقبولة او نقدر نقول مش جميلة – مع اني بكره الكلمة دي بس مضطرة استخدمها- علشان تشوف رد فعل جون اللي حبته وبعدين كانت مراقبة اللقاء بين صاحبتها وبين جون من بعيد ,
وبعدين لقت ان رد فعل جون كان رخم اوي ضحك على شكل صاحبتها في الاول وبعدين اعتذر وكان مضايق وعايز يقوم وقرر انه يشيل من دماغه اللي هو فاكرها ماري علشان هي مش حلوة او باللغة الشبابية مش مزة وبعدين وهو ماشي لمح ماري من بعيد حس ان قلبه رفرف وراح لها ببساطة لأنها جميلة واتكلمو وبعدها بفترة صاحبة ماري قالت لجون ع اللي حصل وان ماري اللي بيكلمها هي نفس ذات ماري اللي كان بيبعت لها جوابات ف جون صارح ماري بحبه واتجوزو وعاشو ف تبات ونبات وخلفو صبيان وبنات
لكن القصة دي علقت في دماغي وبقيت لا شعوريا بطبقها على اللي حواليا لو كلمت حد ع الايميل ببقى عايزة اعرف يا ترى هيحترم روحي ولا هيبقى كل فكره في شكلي مش روحي ولما روحت كورس التنمية البشرية الفكرة دي رسخت فيا اكتر اننا كائنات روحانية ليها تجربة بشرية بمعنى اننا قبل ما نتولد كنا ايه؟؟ كنا روح وبعد ما نموت برضه هنكون روح والجسد مجرد وسيلة نقدر نعبر بيها عننا لكن روحنا الأهم
حد هيقرأ الكلام ده هيقول ياااااه دي وحشة اوي _ وحشة شكلا يعني _ علشان كده بتقول الكلام ده عادي انا معنديش مشكلة ان حد يقول عليا مش حلوة وانا ميهمنيش الرأي ده وكفاية ثقتي في نفسي وكفاية ان القريبين مني واللي يعرفوني بيحبوني حتى لو كنت دراكولا
كفاية اني أكون انسانة ليها لازمة في الحياة علشان ابقى جميلة ومش مضطرة ابدا اني اغير في شكلي علشان ارضي حد المهم اني ارضي نفسي
المشكلة فعلا ان مقاييس الجمال بقت بشوية ........ عملو عمليات تجميل وبقو في نظر معظم الشباب والرجالة قمرات لكن البنوتات الي فعلا قمرات بدينهم وبروحهم وب رقتهم مبقوش يعجبو, فعلا الرجالة ماتت في الحروب !! ومعظم اللي موجودين اشباه رجال للأسف وانا بقول للأسف
المهم نرجع تاني للقصة بتاعت ماري ولنفرض اني اتحطيت في نفس ذات موقف ماري مش هتكون نهاية قصتي زي نهاية قصتها مش هتجوز البطل اللي كل همه كان شكل البطلة واضايق انها مش جميلة لما بعتتله صبحتها ولما عرف انها جميلة صارحها بحبه واتجوزها عارفين ليه لأني مش ضامنه الايام ازاي أأمن لإنسان كل همه الشكل يعني لو شكلي اتغيير لأي سبب هيرميني يعني لو كبرت شوية وملامحي اتبدلت وبانت عليا علامات السنين مش هيكرمني لكن هينساني !! عمري ما أقدر استحمل الموقف ده يبقى لأ من الاول
وبقولها
بعلو صوتي اللي مش هيحترم روحي قبل شكلي ميلزمنيش في حياتي

هناك 26 تعليقًا:

ستيته حسب الله الحمش يقول...

مين قال لك ان جون انجذب لماري وفرد دراعاته وراح في اتجاهها علشان شكلها؟

نو ابسلوتلي

جون راح للروح اللي عارف انها توأمه من قبل الزمان بزمان

بس انتي فسرتيها كده علشان التفسير ده عجبك اكتر

لما ناس تعرف اشكال بعض من الكتابة
ويلاقوا نفسهم توائم روح تأكدي ها يعرفوا بعض لو بين الف بني آدم

جون ساب صحبتها علشان مش مطبعة معاه زي تيل الفرامل الجديد "ايوه اضحكي كده"

وراح لماري شقيقة الفؤاد

كاتبه قصة على الرؤية المصرية ويهمني رأيك فيها بموضوعية

يعني موش عاوزة تجنن تحفة كول آخر حاجة

عاوزة وحشة يا ست انتي مش عجباني مكنتيش عارفة تداري ورا حيطة
يالا اللينك اهو

http://arshefroayahmg.blogspot.com/search/label/%D8%A3%D8%AF%D8%A8%D9%8A%D8%A7%D8%AA

صمت المشاعر يقول...

انا مع ستيته في كلامها

شايفه انه انجذب لماري مش علشان شكلها بس علشان حس انها تؤمه فعلا

بس عموما محبش الشخص ياخد البنت علشان شكلها بس

كلامك جميل جدا وفعلا موضوع يستحق المناقشه

هانى زينهم يقول...

اممممممممممم
موضوع مهم ومحتاج كلام كتير . بصى يا ستى صلى ع النبى عليه الصلاة والسلام .
القصة دى نفس فكرة فيلم u have a mail ل tom hankes & meg ryan .لو كنتى شفتى الفيلم ده هو بيفسر الحدوتة ببساطة . اللى بيتكلم مع حد من غير ما يشوفه طبيعى انه يبقى راسمله صورة معينة فى دماغه شكلا وموضوعا . مش هاضحك عليكى واقولك ان الشكل مش مهم لا مهم ومهم اوى كمان بس ده لما يبقى الارتباط تقليدى يعنى واحد شاف واحدة صاروخ لوحته فطبيعى انه يرتبط بيها عشان شكلها . انما فى حب من نوع تانى وده مش سهل تلاقيه وده الحب الحقيقى اللى الانسان بيدور فيه على الروح قبل الشكل وبيطمن لحد لقى فيه نصه التانى اللى بيفهمه وبيحبه وبيقدره وبيبقى عنده بالدنيا . مش لازم يكون وسيم ولا تكون امورة كفاية انهم يبقوا قابلين بعض ودى حاجة الهية ما لناش دعوة بيها . ما جمع الا لما وفق .
فى النهاية احنا مش مطلوب مننا ندلق عسل على نفسنا عشان نعجب الناس . اللى بيحبنا زى ما احنا نشيله على دماغنا وجوة عنينا .؟ واللى مش عاجبينه الله لا يجعلنا نعجبه ولا هو يعجبنا . هو يطول اصلا !! ناس مرييييضة بعيد عنك .

Lady E يقول...

ستيته حسب الله الحمش : للأسف يا دكتر القصة دي حصل زيها في الواقع وثبتت وجهة نظري وان تفسيري مكنش غلط للأسف

وانا عارفة اني مقصرة بالنوسبة للبلوج بتاعك وبالنوسبة للمجلة بس بجد نفسيتي تحت الصفر وبزعل كل القريبين مني علشان حزني وعصبيتي
ادعيلي يا دكتر وان شاء الله هشوف القصة واقولك رأيي

احساس طفلة محبة للرومانسية بس واقعية يقول...

هو فى احتمالات فى القصة بعيدة احنا ممكن منعرفهاش
يعنى ممكن يكون تفسيرك صح وممكن يكون تفسير ستيتة صح

بس فى كلتا الحالتين لو احنا اتحطينا فى الموقف هنكون اكثر معرفة وتفهم وهنقدر نحكم جون اتصرف على اساس اية

بعيدا عن القصة
عايزة اقولك ان اى حد يقول او يعمل حاجة تضيقك بهدف المضايقة او انة مش عجبة تفكيرك او كلامك مش تخلى كلامهم او فعلهم يضايقك لان هم بينسوا وبيعيشوا ومش بيعرفوا ولا بيهمهم يعرفوا كلامهم عمل اية فى الناس اللى جرحوهم او ضيقوهم

دول ناس مش تديهم اى اهتمام
لان اذا كانوا عايزين ينصحوكى فاليتفضلوا
اذا كانوا عايزين يفيدوكى فاليتفضلوا
وبرضو بأسلوب كويس

بس جرح لهدف الجرح يبقى مش يستهلوا حتى تفكيرنا

تقبلى مرورى يا روح الطفولة

مسدس صغير يقول...

وجهة نظر
بس انا شايف ان الجمال ده نسبى
يعنى احيانا اشوف واحد أمور خالث شبهى كده يتجوز وحده يععععع شبهك كده.
ههههههههههه
لا لا لا طبعا انا اللى يعععععع وانتى اللى جميلة.
هههههه
فعلا الجمال نسبى وكل واحد بيعجبه فى الانسانه اللى هيرتبط بيها حاجة معينة ممكن لو حد تانى مش هتعجبه.
ولولا اختلاف الاذواق لبارت البنات.
احييكى على البوست الجميل
من يعش فى طاعة الله يكن اجمل الناس.

DaNDoNa يقول...

اول ما قريت القصه وقبل ما تقولى رأيك فيها فى الاخر
قولت ازاى مارى تقبل انها تتجوز جون او على الاقل تقبل اعترافه بحبه ليها بعد ما اكتشفت ان يهمه شكلها مش عقلها او تفكيرها
انا يمكن شايفاها كده لان تفكيرى نفس تفكيرك تقريبا
شايفه ان لاااااااااااازم وحتماااااااا ان الناس لما تقتنع بيا تقتنع بيا عشان دماغى وتفكيرى قبل شكلى
بس عاجبنى اوووووى ثقتك فى نفسك
ودى انا شايفاها اهم حاجه
والاهم انك بترضى نفسك
لانك لو عشتى تحاولى ترضى الناس مش هتعرفى تعيشى لحظه لنفسك
البوست جامد

blue-wave يقول...

طبعاالشكل مش كل حاجه
الروح والمشاعر والأحاسيس والإنجذاب والإرتياح وطريقة التفكير وتجاذب الأرواح كل دا مهم
ولكن يبقى الشكل عامل لا يمكن اغفاله
وعموما الحكايه اولا واخيرا نصيب
اللى بيحب شكل كأنه بالظبط بيجيب اباجورة او لوحه جميله وبيعلقها
المهم الروح والتفاهم والراحه النفسيه
انك تحس انك متقدرش تعيش من غير الشخص دا
انك بتتنفسه بتعشقه بتحب كل شئ فيه
تعرفه كويس وهوا يعرفك كويس ومايكونش اى طرف فيكم مخبى اى حاجه عن التانى
تحب عيوبه قبل مميزاته
يومها بس تقول انك حبيت

MǿиY El-Shreef يقول...

انا متفقه مع ستيته

الانسان بيحص بتوأم روحه من اول مايلمحه مش اكتر

وف القصه دي حصل كده

والا ماكنتش ترضى تتجوزه من الاساس

بس الي بيحصل عندنا دلوقتي

ان شباب النت عايزين مزز يكلموهم

ماعدش في رجاله زي زمان

انتي قلتيها ماتوا ف الحروب

ماتزعليش نفسك

الكويسين عارفين انه الجمال جمال الروح والقلب

وف الدنيا في كويسين كتير

(=

لجين أبو الدهب يقول...

تمام .. تمام ..

اللى مش هايهتم بروحى ولا لازمنى ..

الجمال والمال واى شئ هاايزول مع الزمن إلا روحى وشخصيتى هايفضلوا معايا ..

واللى بيرتبط بواحدة علشان الشكل هل ده معناه انه لما يشوف واحدة تانية اجمل هايروح لها ولا لما اكبر هايسيبها ..

الاعتماد على شئ زائل ومش مستمر ..

زى اللى بيبنى عمارة كده على الهوا ..

دمتِ بخير حبيبتى ليدى ..

Blind Sniper يقول...

أنا رأى فى الموضوع دة أن البنت الى انا بحبها مش مهم الناس يقولوا حلوة و لا و حشة المهم هى فى عنية ا نا شايفها بعنية احلى و احدة علشان فى حاجات تانية بتكمل ...و على فكرة ممكن تكون واحدة حلوة بس روحها سخيفة و دمغها اسخف ....انما ممكن بردة و احدة مش فائقة الجمال و تكون بتستريحاها تبص فى و شها كدة تستريحلوا ....من الأخر المهم انا الى اشوفها حلوة مش حد تانى

mohamed ghalia يقول...

بعلو صوتي اللي مش هيحترم روحي قبل شكلي ميلزمنيش في حياتي
معاكى طبعا ياليدى
لازم الى يحب حد يحترم روحه الأل قبل شكله
ربنا يسعدك دايما

عاشقه الرومانسيه يقول...

اللى بيتجوز واحده النهارده علشان شكلها
بكره يسيبها علشان واحده شكلها اجمل
وهكذا
الانسان اللى بالشكل ده لا يستحق حتى مجرد عناء التفكير فيه

مـجـنـووون يقول...

الجمال جمال الروح

وكل واحد ربنا جعل فيه حاجه حلوه وميزه بتميزه عن غيره من الناس

والناس بتبص للشخص الأخر حسب وجهت نظره ومش علشان ناس اي كلام تقولي
فعلا الرجالة ماتت في الحروب

ومتشليش في نفسك كده

تقبلي مروري
مجنووون

أحمـــــــــــــد أبو العلا يقول...

مين بس اللي مزعلك؟
شاوري كده وشوفي هنعمله ايه

بالنسبه لموضوع الروح والجسد ده, انا عايز اقولك حاجه
انتي مسمعتيش مقولة الأذن تعشق قبل العين أحيانا

ولو سمعتيها, صدقيها

الدنيا مش كده, مش أجساد بتتحرك
كتيييييييير في أجساد لكن بلا أرواح, بارده برود الأموات
وكتير العكس

غروب يقول...

عندك حق والله

فعلا انا ملاحظه ان معظم الناس بتهتم بالشكل اكتر

مع انى بشوف جمال الشخصيه فر روحها وخفه ظلها

تعرفى انا اكتشفت انك شبهي في كذا حاجه

اولا مجال الدراسه

ثانيا : اهتمامك بمجال التنيمه البشريه

ثالثا : السن

رابعا : البلد

اوعى تكونى انا

هههههههه

انا سعيده اوى بمعرفتك

وحاوى تقرري بجد انك تيجي اللقاء واشوفك

وممكن نبقي نرتب ونروح سوا اذا مفيش مانع او لوم مش عاوزه تروحى لوحدك

بحب الصراحة والوضوح يقول...

ايه ده ايه ده
السلام عليكم و رحمة الله وبركاته الاول
معلش دخلت على طول من غير ما اخبط بقى بس انا عماله اقرا اكتر في عالم التدوين لاني لسه جديده
بس موضوعك صعب اوي وعلى فكرة انا شفت الحاجات دي كتير وفعلا في ناس بتحب ناس لشكلها وفي ناس بتحب لروحها وشخصيتها
والنوع ده بحترمه جدا

عموما معلش بقى يا قمر وبجد اجمل حب هو اللي يكون عقل الاول وبعدين قلب

الشاعر الحزين يقول...

بما انى شاب راجل متدين والحمد لله
مقدرش أقول غير
عندك حق فى كل كلمه قولتيها

وبعد اللى أنتى قلتيه

لا تعليق

ولكى منى كل التحيه والاحترام

كاتب مصري يقول...

خليكي فاكرة انك لسة مبعتليش حاجة للمجلة وأنا محتاجك معانا في فريق التحرير
مودتي

Lady E يقول...

صمت المشاعر : ليه لأ اهو احتمال برضه

هو انا كنت معاهم يعني :)

نورتيني يا قمرايا

Lady E يقول...

هانى زينهم : عليه أفضل الصلاة والسلام

للأسف ولا مرة كملت الفيلم ده مع اني بحب قصته يعني شوفت شوية منه تخاطيف

بجد تعليقك جميل جدا يا مستر وعايزة اقول لحضرتك انه بجد اسعدني
متحرمنيش من تعليقاتك الحلوة دي يا مستر

Lady E يقول...

احساس طفلة محبة للرومانسية بس واقعية : رأيك جميل اوي يا احساس طفلة

وبعدين ايه حكاية روح الطفولة دي احنا هنحضر عفاريت ولا ايه :)

منوراني دايما بجد

Lady E يقول...

مسدس صغير : فعلا من يعش في طاعة الله يكن اجمل الناس

وبعدين مفيش انسان ربنا خلقه بيبقى يع ابدا لأن ربنا سبحانه وتعالى خلقنا في احسن تقويم

وبلاش الكومنت بالطريقة دي تاني يا مسدس انا عارفة انه هزار بس انا بضايق

دمت بخير

Lady E يقول...

DaNDoNa : هيييييييييييه اخيرا وبعد طول انتظار وكمينج سون دندونة علقت في المدونة ده حدث لازم احتفل بيه

الكومنت بتاعك هو اللي جامد يا قمرايا
نورتيــــــــــــني

Lady E يقول...

blue-wave : كلام جميل يا دكتر

بس ايه حكاية الارواح الكتير اللي في الكومنت بتاعك
شوية وهنحضر ارواح اشتاتا اشتوت :)))

بجد تعليق جميل يا دكتر

Lady E يقول...

يتبـــــــــــــــــــــــــــــــع