الخميس، 16 أبريل، 2009

A new day has come أتى يوم جديد

مواعيدي اي كلام واستحق بجدارة ابقى من العالم التالت علشان مش بعرف اظبط مواعيدي دايما بروح متأخرة ربع ساعة او اكتر عن اي ميعاد عاااااا بس بحاول اظبط الموضوع ده واخلي مواعيدي دقيقة

روحت الكورس كالعادة متأخرة ومكنش ليا نفس احضر مع مجموعتي مش عارفة ليه , المهم دخلت الكورس وسلمت على السكرتيرتان
وهزرت شوية معاهم وقالولي بطلي تغيبي كتيييييير وبعدين خبطت على باب القاعة اللي المستر بيشرح فيها علشان ادخل احضر الكورس وانا مكنتش عاااايزة احضره وقتها


ودخلت قولتلهم في مكان ليا ولا مفيش؟؟ المهم تقريبا المستر لمح اني مش عايزة احضر وقاللي ايه رأيك تحضري مع المجموعة اللي جاية ؟؟ قولتله اوكي :) وفضلنا نتكلم انا والسكريتيرات ثم جت بنوتة مشغلة اغنية جنات الجديدة اسمها حب امتلاك حسيت بإعجاب بالاغنية دي وقولت للبنوتة تبعتهالي وفعلا بعتتهالي بعد عذاب تليفوني مكنش متقبل البلوتوث وبعدين المجموعة بتاعتي خلصو الكورس ودخلت اسلم عليهم
وكذا بنوتة اخدوني بالحضن وقالولي عاش مين شافك بطلي تنفيض للكورس والكلية لسه أقل من شهر عالامتحانات وانا عارفة الحقيقة دي بس الحمد لله بستهبل اخر استهبال
المهم النهاردة كان عندنا ادب كلاسيكي مسرحية اوديب ف اوديب بالانجليش مكتوبة اوديبس ففي بنت زميلتنا بتقول للمستر مين اتوبيس ده يا مستر
انا انفجرت في الضحك بصراحة حد في الدنيا ميعرفش اوديب اللي قتل ابوه واتجوز امه واولاده قتلو بعضيهم عيله اجرام برضه ههههههههه
لأ وايه كمان بتقول عليه اتوبيس مش اوديبس كل واحد وعلامه صحيح العلم نورن
بجد المجموعة التانية اللي بتيجي بعد مجموعتنا يستحقو يتكتب عنهم كتاب وانا فعلا كتبت عنهم موضوع في كتابي حبيبي بجد شوية بنات مش طبيعين في خفة دمهم
المهم سمعت شرح رواية اوديب لسوفليس ودوخت من كتر الأحداث الدموية اللي في القصة لأ وايه المستر بيحكيها مع مؤثرات صوتيه من البنوتات
يعني مثلا يقول قتل ابوه كل البنوتات يقولو يالهووووووووي
اتجوز امه وطبعا مكنش عارف في الاول انها امه كل البنوتات يقولو : الصوت بتاع شهقة الملوخية مش هعرف اكتبه هههههههههه
المهم كان في فزرورة الفزرورة دي بيقولها وحش مش بيسمح للناس انهم يدخلو مدينة ثيبس او طيبة الفزرورة دي بتقول
ايه اللي بيمشي على 4 الصبح وبيمشي الظهر على رجلتين وبيمشي في المساء على 3 ارجل ؟؟
اللي يجاوب الفزرورة دي كان بيعدي الطريق واللي مكانش بيجاوب كان الوحش بيقتله يعني اللي مش هيجاوب الفزرورة دي مش هيخرج من البلوج حي نياهاهاهاهاهاهاهاهاها بعد الكورس فضلت اسمع أغنية جنات وغيرت المووووود بتاعي اتخنقت
الكلمات بتقول

اتقالي عنه يا ريت تحاولي تحاسبني منة دة كتير بيوعد بس مبيوفيش بوعد
.............

مش فاهمة بس ازاي ولية عدت عليا وانا غلطتي ان مشاعري خلتني اندفعت


لما اتعاملت معاه بطيبة وحسن نية كانت النتيجة ان النهاردة لقتني ضعت ...... الخ

يخربيت الحب اللي بالشكل ده انا شايفة نموذج قدامي لبنوتة زميلتي في الكلية كل يوم بتتحطم بسبب الحب اللي حبته لواحد ميستاهلش
ومن كتر ما صعبت عليا واتأثرت بحالتها خايفة حد يستهين بمشاعري كده في يوم من الايام لأني عمري ما هستحمل
منهم لله الناس اللي زي دول سواء بنات او ولاد

يا ترى ليه في ناس وحشة كده؟؟ نفسي افهم هيستفيدوا ايه؟؟

المهم حبيت اغير المود رحت لصحبتي شيماء هي خريجة اداب انجليش وكانت في نفس ذات الجامعة بتاعتي وحاليا بتشتغل في صيدلية
والدوا ماثر عليها اخر تأثير المهم اتفقنا نروح راس البر سوى أيون انا من دمياط :) وفخورة اني دمياطية


صورة من احد شوارع راس البر تصويري طبعا
المهم فعلا روحنا راس البر علما بإن الرخصة بتاعتي الحمد لله ضاعت هي والبطاقة وكارنيهات الكلية والمكتبة يعني م الاخر مبقاش في ليا اي اثبات شخصية المهم واحنا في طريق راس البر قولت لشيماء على فكرة الرخصة بتاعتي ضاعت قالتلي خير خيرهنتاخد تحري وهيصادرو العربية بسيطه :) قولتلها لا تقلقي اطلاااااااقا ربنا يستر
وشغلت
الmp4
في الكتكوتة ومعظم الاغاني اللي حطاها اغاني رومانسية حزينة لكن شيماء معجبهاش الاغاني دي
وكانت بتبحث عن اغنية روشة في الميموري لغاية لما اخيرا عثرت عليها لون شعرك ل كريم ابو زيد
وبعدين فكرنا نتغدى في كنتاكي وعلى فكرة الاكل بتاعه بشششششششششع نصيحة محدش ياكل فيه
كنتاكي مصر غير كنتاكي عمان خااااااالص
المهم متغديناش في كنتاكي طلعنا على النيل نتفرج على الهدوم ويا سلام لما تجيب هدوم مع اصحابك يااه
شعور جميييييل دايما لما بجيب هدوم مع مامتي
اللي بيعجبني مبيعجبش مامتي والعكس صحيح لكن الفيست اللي عجبني عجب شيماء برضه
المهم بعد ما شوفنا الهدوم واشترينا وشيماء طيرت فلوسها كلها
عزمت شيماء على الغدى وقولتلها المرة الجايه عليكي عاااااااااااااا

وروحنا لمطعمنا المفضل اسمه سلطانه ودردشنا مع صاحب المطعم وللأسف بنوته مكنتش موجودة وقولنالو احنا بنحب الاكل في المطعم عندك وخصوصا الكريب لكن الفاست فود دايما بيتخن واحنا للأسف بنعمل ريجيم فقالنا على فكرة بنتي اتخن منكو بكتيييييييير متأزموش نفسكو ورفع من روحنا المعدنية :) بس بجد هو انسان محترم جدا وبنته زي العسل وبعدين
طلعنا علشان نتغدى على اللسان والجو كان تحفففففففه موج البحر كان بيخبط في الصخور وبيطلع علينا
والجو كان هوا
واللسان وهو فاضي كده بيحسسني براحة نفساوية والهوا هناك نقي جدااااااا
المهم معرفناش نتغدى على اللسان عشان في قطط كتير اتلمت حوالينا وشيماء بتترعب من القطط
واضطرينا نتغدى في الكتكوتة ومعرفتش اصور اللسان من رذاذ الموج والهوا بس اللسان في الحقيقة راااااااائع وبرتاح جدا لما اروح هناك
واتكلمنا ودردشنا انا وشيماء وحقيقي بتعلم منها بس بخاف من ذكائها الزيادة عن اللزوم فهمت كتير في شخصيتي
بس لغاية دلوقتي انا مش فاهماها
ونصحتني نصائح كتير حلوة قالتلي اوعي تردي الإساءة بإساءة او
انتقام قولي بس حسبي الله ونعم الوكيل يا رب خدلي حقي من اللي ظلمني

وفعلا انا مقتنعة بكلامها لأن ربنا سبحانه وتعالى يمهل ولا يهمل

بس اللي شيماء مقدرتش تفهمني فيه اني اوكي ممكن اتعلم منها لكن بتخنق من كتر النصائح وخصوصا لما قالتلي اني اخلي ماما تبعد عن حياتي لأن في نظرها ماما بتتحكم في حياتي بس للأسف هي مش فاهمه ان ماما معاملتها ليا مش ام بتعامل بنتها بس لكن امي هي مامتي واختي وانتيمتي فطبيعي ان انتيمتي تبقى معايا دايما ويبقى معاها معظم اسراري وده مش ممكن يقلل مني بالعكس بنوتات كتير يتمنوا مامتهم تبقى صاحبتهم لكن للأسف مش بيلاقو ده


المهم جايين نطلع من راس البر ضللنا الطريق وكنا بنطلع من طريق نلاقي نفسنا في طريق تاني حاجه غريييييبه
وقعدنا نضحك ونقول ع الحلزونة ياما الحلزونة وديني ياما يا حلزونة
ايوة كنا بنضحك بس برضه كنا مرعوبين لغاية لما الحمد لله وصلنا للطريق الصح
ورجعنا تاني لدمياط وعندي امتحان فرنساوي برضه كمان كام ساعه اييييييه دنيا
بس كان يوم لذيذ بصراحه :)


هناك 13 تعليقًا:

Lady E يقول...

Blind Sniper: هههههههههه شكرا على النصيحة بس انا لما بقدم الساعة 10 دقائق بكسل اكتر علشان معتمدة ان الساعة متقدمة :)

هانى زينهم يقول...

ليه بشع ؟؟ كل ما انزل وسط اللد باكل فيه وعمرى ما جانى الاحساس ده . جايز القعدة فى وسط البلد مختلفة او المكان ارقى انما الاكل زى الفل ماله ؟

MǿиY El-Shreef يقول...

اللللللله

ياحظك يابنتي اليوم ماشاء الله جامد جامد

اااااااه يالا بقى يا شهور عدي عشان انزل جامعه بقى بدل الكُن الي انا محبوسه فيها دي

عااااااااا

بجد نسيت ايام الشقاوه هنا

وراس البر (وش احمر وهيدمع خلاص)

ااااااااااه حبيبتي وفلذه كبدي وروحي وكل حاجه

بموووووووووووت فيها

ماكنتش اصيف الا ف راس البر عااااااا

المره الجايه خديني معاك ماشي :D

ربنا معاكي ف الامتحان ياسكر

و ع فكره نصيحة تقديم الساعه دي هااايله :D

سلام

ستيته حسب الله الحمش يقول...

حلوة قصص بكيزة في الادغال
واكتر حاجة ضحكتني قصة أوديب بالموسيقى التصويرية وشهقة الملوخية

قومي ذاكري بالتي هي احسن
خلاص 3 اسابيع وكل عام وانتم بخير
تحياتي

غروب يقول...

هههههههههه

بجد يوم جميل

وهسمع اغنيه جنات حالا لان واضح انها حلوه

dramaqueen يقول...

وااااااااااااااااو
اليوم تحفة

بصى سات الواحد بيتخنق من كتر النصايح بس انتى عارفة انها بتعمل كدة عشان بتحبك وخاية عليكى يبقى اسمعيها وخدى اللى هيفيدك بجد

اما صداقتك لمامتك فدى حاجة حلوة اوى ياريتنى كنت كدة
ربنا يخليكوا لبعض

Lady E يقول...

هانى زينهم :اللي جربو كنتاكي مصر مجربوش فرع وسط البلد يا مستر بس جربو اكل كذا فرع وقالولي بلاش كنتاكي الاكل بتاعه مش حلو مع انه من المطاعم اللي بحب اكل فيها في عمان

بالهنا والشفا يا مستر

Lady E يقول...

MǿиY El-Shreef : اها جينا للأر يا موني هههههههههههههه

خلصي انتي بس ثانوية عامة وانزلي مصر وان شاء الله نتقابل لما تيجي راس البر ونتفسح براحتنا :)

وانا اصلا كده مش هروح راس البر تاني الا بعد الامتحانات مع انها قريبة مني عااااااا

ربنا يوفقك يا قمرايا وتنوري مصر قريب

Lady E يقول...

ستيته حسب الله الحمش : لا يا دكتر دي قصة ليدي وشيماء مش بكيزة :)

وحاضر يا دكتر هذاكر عاااااااااااااااا

Lady E يقول...

غروب : جنات اغانيها متميزة اصلا

اسمعيها وقوليلي رأيك بس انا بحذرك من الاستئكاب اللي هتحسي بيه بعد ما تسمعي الاغنيه عااااااااا

تامر علي يقول...

ايه ده كل ده في يوم واحد ؟؟ دا أنا نفسي مفتكرش اني عملت الرحلات دي كلها في يوم واحد :)

نصيحة : متديش ودنك لحد ... لا تثقي في حد بسهولة مهما انبهرت به

مش قصدي صحبتك ..لكن أقصد طريقة تفكيرك ... المفروض ان خبراتنا ناخدها من تجاربنا مشكلة معظمنا انه بياخد خبراته من انطباعاته
فرق كبير جداً :)

تحياتي

Lady E يقول...

dramaqueen : النصيحة ممكن الانسان يتقبلها لكن مش 100 نصيحة في نفس ذات الوقت يعني متحسسنيش اني بيبي ومش عارفة اي حاجه وهي عارفه كل حاجه
بس برضه شكرا ليها لأن مش اي حد ممكن ينصح اليومين دول

اما بالنسبة لصداقتي انا وماما ف للأسف بيفسروها غلط اني مليش شخصية او ان ماما بتتدخل في حياتي والحقيقة مش كده

نورتيني يا كوين وربنا يكرمك يا قمرايا

Lady E يقول...

تامر علي : كلامك سليم يا تامر

وانا بفكر في الكلام واخد اللي يناسبني واسيب اللي مش بيناسبني ومعنديش ثقة عمياء في اي حد اعرفه في حدود وخطوط محدش بيقدر يعديها واللي بيعديها بيخرج بره حياتي