الخميس، 9 أبريل 2009

عروسة ننوسة جميلة ومفروسة :)


بغض النظر عن امتحان الفرنساوي حبيبي حبيبي اللي بعد كام ساعة - الضاكتور بذات نفسه هيمتحننا- وبغض النظر عن كل افلام الرعب اللي حظي الكميل خلاني اشوفها النهاردة لا وايه عارفين اني عندي فوبيا الدم فجايبين افلام كلها دم مناسبة تماما للفرنساوي اللي مش عارفه احفظه ههههههههه الا اني الحمد لله مبسوطة

و بجد بجد مش عارفة اقولكو ايه كلمة شكر مش كفايه ربنا يكرمكو ويسعدكو دايما يارب رفعتو من حالتي النفسوية وروحي المعدنية بتعليقاتكم الجميلة حسيت انكم واقفين جنبي وبجد انتو احلى ناس وانا بحبكم في الله ونفسي اسلم على كل واحد فيكم واديله هدية كمان :) غالبا هتبقى وردة :)
وشكر خاص شوية لمامتي حبيبتي اللي فضلت ورايا لغاية لما طلعتني من جو الاستئكاب اللي كنت فيه واللي دايما شايفاني انسانة جميلة وبإختصار انا من غيرها ولا حاجه
وشكرا كمان لأنتيختي كيكي بحبك يا بت انتي ويا رب نفضل اخوات واصدقاء ومنبقاش اعدقاء ابدا :)
ولذلك قرقرت انا ليدي الاولى اني احكيلكو على موقف كنت هكتبه في الكتاب اللي بكتب فيه بس يلا بقى انتو طلعتو جدعين معايا وانا كمان هطلع جدعه معاكو وان شا الله محد حوش هسيبكو مع مواقف لعروسة ننوسة وان شاء الله تعجبكو

كان ياما كان في قديم الزمان من اسبوعين :) روحنا للكوافيرة وهناك كان في عروسة العروسة دي كانت عثولة جدا وبتعمل مواقف ضحكتني انا وصحباتها اللي كانو معاها يعني مثلا هي رفيعة وجايبه فستان الفرح واسع شوية عليها فبدأت تجيب قطن وتحط قطن جوه الفستان علشان تملا الفستان وتقول مش نافع كده كان لاااااازم اتخن شوية قبل الفرح لغاية لما بقت شوال قطن فصحباتها قالولها حرام عليكي بقيتي لحاف وبعدين وانتي بترقصي القطن ده كله هيقع _ منك لله يا هيفا عقدتي البنات المهبوشات لا الرفيعين عاجبهم حالهم ولا التخان مبسوطين خليتيها سيلكون خااااالص _
وبعدين العروسة كانت لابسة فستان شبابيكه وبلكوناته مفتوحة وبالرغم اننا كنا العصر والجو كان معقول الا انها كانت برداااااااانه وبتكتك من البرد قولتلها من دلوقتي وانتي بردانه اومال هتعملي ايه في البرد بتاع بالليل وفعلا يوميها الجو بالليل كان لا يطاق كان فريزر حسرة عليها يا حيرة عليها حد قالها متبقاش عروسة محجبة؟؟ تستاهل
شوية وبدأت الكوافيرة تجهز شعرها وشعرها ما شاء الله كان جميل بس المشكلة ان شكل شعرها كأنها اتكهربت شعرها كان واقف
وكانت موصرة تحط عليه كريم والكوافيرة قالتلها هتبوظي شعرررررررررك قالتلها خلاص خليني منكووووووشة عاجبك كده عاااااااا
شوية والعريس اتصل بيها
العروسة : الو عملت الزينة ع العربية ولا لسه - يا تامر مينفعش كده اومال هتحط الورد عالعربية امتى - يعني ايه كمان شوية اومال هتزف في ايه وشوية وبدأت تزعق للعريس وتقريبا هو كمان اتنرفز عليها واتخانقو مع بعض في حين ان انا كنت مستغربة لسببين
اولا : شكل الموضة في عرسان اليومين دول ان يبقى اسمهم تامر عشان خطيب بنت خالتي اسمه تامر :)
والسبب التاني ان النهاردة فرحهم وبيتخانقو اومال بعد الفرح بيومين هيعملوا ايه هيضربو بعض بالنبابيت ولا ايه
ومع ذلك اخذت بالمقولة متركزش علشان متهيسش
وسرحت ومركزتش مع العروسة لكن فأجه لقيتها بتقول بقولكو ايه خلو الساعتين يعدو على خير ونفس علامة الاندهاش اترسمت على وشي تاني مرة .
الفرح بالنوسبة للعروسة دي ساعتين وعايزاهم يفوتو لكن بالنوسبة لغيرها من البنوتات الفرح والفستان الأبيض وحبيب العمر حلم جميل
ولولولولولولي وربنا يكتر من افراحنا ويبعد عننا الأحزان ويبعد عننا الشر والأشرار ويقدرلنا الخير
عقبال الجميع اللي لسه متجوزوش وانا منهم اكيد يعني :) اما المتجوزين فربنا يسعدهم ويهنيهم ويهدي سرهم
بصو بقى اللي مش متجوزين عايزاهم يحكولي متخيلين فرحهم ازاي ؟؟

والمتجوزين عايزاهم يحكولي عن فرحهم كان شكله ايه ؟؟

واللي مش هيجاوب هياخد زيرو في الشفوي انا بقول اهو :) وقد فعزر من بعجر


هناك 36 تعليقًا:

احساس طفلة محبة للرومانسية بس واقعية يقول...

هاهاهاهاهاهاهاهاهاهاهاها
طلعت الجدعنة ليها فايدة اهى وخليتك تنزللنا بوست زى العسل
وكمان ورد لا دا احنا جدا نتجدعن على طول بقى
:)
ربنا يخلى مامتك ليك يا قمر ويخليك ليها

بس قوليلى يا ليدى هو انتى متأكد انها العروسة مش اختها وجت مكانها غلط
looooooooool

انا يوم فرحى كان الحمد لله الى حد ما متظبط كان حلم واتحقق ومن ساعة ما دخلتة ولسة عايشة فية لغاية دلوقتى
زى ما قلتى الفرح مش ساعتين دا عمر بحاله والحمد لله كنت محجبة وعادى حتى كنا فى الصيف بس مش حكاية برد وحر لا دى حكاية دين وفهم وتفاهم بين العريس والعروسة على ما اعتقد

جاوبت عشان متزعليش بس عايزة الوردة :)
عقبالك يا قمر لما تكونى احلى عروسة
وربنا يرزقك الزوج الصالح
انا معزومة و هاجى هاجى متسألنيش ازاى

تقبلى مرورى

mohamed ghalia يقول...

هههههههههههههههه
والله عمرى متخيلت شكل فرحى
بسو هو غالبا هيكون الإشهار فى المسجد
وعامة المهم اختار صح البنت الى هرتبط بيها وبعد كده مش فارقة
دمتِ فى سعادة
ومش مهم صفر الشفوى ههههههه

MǿиY El-Shreef يقول...

هههههههههه

انا بقى مره كنت عند كوافير والعريس اتخانق مع اهل العروسه ومشي وسابهم والعروسه طلعت تجري وراه استنى ياحمااااااده ههههههههه

اما بالنسبه لفرحي ..

انا لسه ماتجوزتش بس مخططاله يعني ان شاء الله

هيبقى زي افراح الاجانب :D

الصبح كده ف جاردن بتاع فندق نضيف ومحترم .. وهيبقى في ميوزيك هاديه مش هجيب فرقة وستيريو وانهارده فرحي ياجدعان :p

كمان هيبقى في لايت بوفيه (الصبح بقى) ومعازيم مش كتار اوي يادوب يعني اقرب القرايب

وبث

ياختشي ع رومانسيتي

اديني حكيتلك بقى

عقبال الكل ياقمره

قبلاوى يقول...

يعنى كده الواحد المفروض يبقى اسمه تامر عشان يتجوز

طيب كويس

منه لله تامر حسنى هو كمان مش هيفا بس

blue-wave يقول...

حلو البوست يا ليدى
اما بالنسبه للفرح
ف اعتقد انى مش هاعمل فرح اصلا

Lady E يقول...

احساس طفلة محبة للرومانسية بس واقعية : تسلمي يا قمرايا الكومنت بتاعتك هي اللي زي العسل

ههههههههههه هي تقريبا كانت بتتدرب على كيف تكون عروسة :)

اجابتك جمييييييلة جدا يا قمرايا
ربنا يسعدك ويهنيكي مع زوجك

وأمين يا رب ربنا يستجيب كل دعواتك الجميلة

وبعدين متقلقيش لو مكنتيش في مصر نيجي نعمل الفرح في اليابان :))))

كده اخدتي الدرجة النوهائية بإمتياز :)

Lady E يقول...

mohamed ghalia : في حد ميتخيلش شكل فرحه ؟؟ ابدأ تخييل شكل فرحك من النهارده بقى
ربنا يوفقك وتختار انسانة صح تبقى كل حياتك معاها سعادة وفرح

ومش هتاخد صفر في الشفوي بس هتعدي ب جيد :)

Lady E يقول...

MǿиY El-Shreef : هههههههههههه لا على كده يبقى تامر وعروسته اهون من حماده وعروسته هههههههههه
ده احنا بنشوف عجايب من العرايس والعرسان عند الكوافيرات
يا رب بس يوم فرحنا منبقاش زيهم ويبقى اسعد يوم في حياتنا

ايه الرومانسية دي ربنا يحقق حلمك وميجيش العريس يعترض عالحلم الرومانسي الجميل ده :)
بس بالطريقة دي مش هعرف احضر فرحك عاااااااا انا مش بحب اصحى بدري اساسا

وكده نقدر نقول انك اخدتي الدرجة النوهائية والامتياز بجدارة الف مبروووك :)

Lady E يقول...

قبلاوى : ايوووووون معظم العرسان اليومين دول اسمهم تامر معرفش ليه :))

ومنه لله مطرش الجرجير تامر ياحوستي فعلا

برضه مجاوبتش يا قبلاوي ولذلك هتاخد زيروووو في الشفوي نياهاهاهاها

تامر علي يقول...

وبعديييين ...مالهم اللي اسمهم تامر يعني ؟؟؟ مش اسم من اسماء البشر ولا ايه مسمعش صووووت تاني :)

-العروسه دي شكلها عروسع على ما تفرج بتحشي نفسها قطن وبتزعق ..فاكره نفسها مرتبه ولا ايه ؟

- انا فرحي مش فاكر منه حاجه من كتر فرحي جالي فقدان ذاكرة :) نبقى نعوضها في الفرح الجاي :)

Lady E يقول...

blue-wave : تسلم يا دكتر

وفعلا في ناس بيقرروا ميعملوش فرح بس في الاخر بيعملوا فرح :)

وبما ان اجابتك فيها طاقة سلبية كبيرة يا دكتر فهتاخد زيرووووو في الشفوي مع اعادة الانطحان تاني :))

Lady E يقول...

تامر علي : هههههههههههه احنا قولنا حاجة بالعكس اللي اسمهم تامر محظوظين :)

والعروسة الغلبانه هتعمل ايه عايزة تملا عين جوزها فبقت مرتبة ولحاف علشان تملا عينه وتعجبه :)

والف مبروك عالفرح ولو ان التهنئة متأخره شوية تقريبا وبعدين فرح تاني اييييييه ؟؟ انا كده هقول للمودام بتاعتك تجهز الساطور :(

والاجابة دي هتعدي بمقبوووول :)

مهندس / على درويش يقول...

السلام عليكم /
انا بسيب أمتحان الشوفي دا لتقدير الدكتور يعني مش لازم اكون مذاكر اووووي

المهم انا بصراحه مش عارف فرحي هيبقي عامل ازاي
كل حاجه لما تيجي في وقتها يبقي أحسن يعني لما الاقي العروسه بنت الحلال الأول ابقي أفكر في الفرح

أصل مش معقووول أفكر في الفرح قبل ما تيجي العروسه

وممكن تفكيري دا يكون غير تفكيرها او غير رأيها وفي الأخر نفركش احسن

ودا أكيد يبقي أحسن بكتير

وبعدين مالها حياة العزوبيه
ما هي دي الفل أهيه


يا رب أجابتي أخد عليها درجه كويسه
انا عارف ممكن أسقط بس ساله مش مهم
...
...
...
تحياتي

Lady E يقول...

مهندس / على درويش : وعليكم السلام ورحمة الله وبركاته

ليه مش معقول تفكر في الفرح قبل ما تلاقي العروسة يا باشمهندس ممكن لو فكرتك عن الفرح غير فكرة العروسة تلاقو حل وسط مش تفركشو
فركشت الفرح من قبل ما تلاقي العروسة :)

وفعلا مالها حياة العزوبية مفيهاش مشاكل ومسؤليه :)

ولذلك تقديرك هو جيد جدا يا باشمهندس لأن دي الطريقة اللي الكلية بتتبعها معانا الواحد يدخل الامتحان عارف انه هينجح بمقبول فجأه يلاقي جيد والمواد اللي متوقعين فيها امتياز بتبقى مقبول :) فأنا نفذت نفس الاستراتيجية في اجابتك
وابدأ فكر في فرحك يا باشمهندس وربنا يسعدك

عـاشق الاقصى يقول...

الله يكون في عونكم
جزاكي الله خيرا لكلماتك الرقيقة والمتزنة

Lady E يقول...

عاشق الاقصى : شكرا على الدعاء الجميل ده يا عاشق الاقصى
شكرا على تعليقك وان شاء الله تعمل مدونة قريبا
عجبني جدا كلامك في البروفايل

ويثبت ان الانسان اقوى من الصعاب ان اراد ان تكون له شخصيته الخاصة وان يكون انسانا فاعلا

ربنا يوفقك وجزانا الله خير وإياكم

لجين أبو الدهب يقول...

الو الو .. هل تسمعنى ؟؟

تيست فويس .. تيست فويس ..

المايك معايا ..

احم احم احكى بقى ..

بصى ياليدى هى العروسة اللى انتى شوفتيه دى متوترة بس التوتر جاب معاها اخره وزعقت للراجل هههههه

اما بالنسبة لفرحى الحمد لله رب العالمين كان حاجة كده من الاحلام ..

احكيلك من الاول بقى ياستى اليوم ده صحيت من النوم بعد كده غسلت وشى بعد كده غسلت سنانى ... D:

مش هاحكى طبعا بالتفاصيل المملة دى ..

بس الحمد لله كان منفصل اصلا البنوتات فى ناحية والرجالة الاشرار فى ناحية ..

وكان كل حبايبى حوليا وكان فى فريقة هى صحيح كانت مضروبة شوية بس اهى مشيت الموضوع شوية D:

وانا كمان انشدت وصحاباتى انشدوا لى ..

مش عارفة احكى لك ايه ولا ايه الصراحة بس هو كان جميل اوى الحمد لله والكل مان بيقول كده ..

وعقبالك ياجميل ..

دمتِ بخير ..

عـاشق الاقصى يقول...

اما عن نفسي مش هتكلم كتير
لكن اسمحيلي اهديكي الكلمتين القصيرين دول

http://3aseq-alaqsa.blogspot.com/2009/04/blog-post.html


http://forum.amrkhaled.net/showthread.php?t=235553

ويا رب يعجبوكي وجميع الاخوة والاخوات

Lady E يقول...

لجين أبو الدهب : الو الو

واحد اثنين ثلاثة حول

اسمعك بوضوح يا لوجي

فعلا كان واضح ان العروسة متوتورة بس مش لدرجة انها تزعق للعريس يعني :)

ما شاء الله بجد ربنا يسعدك ويهينيكي
فرح انتيمتي كان كده برضه وكانت كإنها ملاك في فستان الفرح ورقصنا معاها وانشدت وانشدنا ليها
اوعي يكونو انشدولك جوزناها وارتاحنا منها في تار بيني وبين النشيد ده :)
تسلميلي يا قمر وربنا يستجيب دعوتك الجميلة

وتستاهلي الدرجة النوهائية والامتياز كمان مع مرتبة ومخدة الشرف :)

دمتي بخير حبيبتي لوجي

dramaqueen يقول...

انا كمان خطاب اتنين من اصحابة اسمهم تامر
والبنات سالى ونهى

والموقف يجنن
فعلا يهلك من الضحك

اما عن فرحى
فنفسى يكون فى قاعة يكون ديكورها رقيق اوى
ومش هيكون فيه اغانى البلح والعنب والحاجات دى
وان شاء الله هاكون محجبة مش هاخلع الحجاب
وطبعا هاكون قمر وعريسى حبيبى قمرين
وهاعزم كل الناس اللى اعرفهم
يعنى يستحسن اعمل الفرح فى الاستاد

ربنا يوفقك يا قمر فى امتحاناتك

Lady E يقول...

عـاشق الاقصى : للأسف اللينكات مش راضيه تفتح معايا

بس اكيد الكلمات دي جميلة

شكرا ليك

هانى زينهم يقول...

حلو البوست اوى والاجمل منه حالتك النفسية اللى نفسى ومنى عينى تستقر يومين على بعض على حالة واحدة !!
فرحى يا ستى بسبب مرض حماتى الله يرحمها عملته فى الجامع وبعدين خدن مراتى على شقة مامتها سلمنا عليها وعيطوا شوية وبعدين اتجوزت . عاجبك كدة .

غروب يقول...

ههههههه فعزر من بعجر

ههههههههههههههه

عسلللللل

ايه العروسه المجنونه دى؟؟؟؟؟

مين صحيح قالها مش تبقي محجبه

د حتى الحجاب بيقي اشيك والله

تصدقي انى كنت كنتتتتتتتتتتت بفكر انى اكون بشعري بس اقتنعت من فتره ان رضا ربنا في اليوةم ده احسن

المهم :

ربنا يوفقك في امتحان الفرنساوى اللذيذ

تحبي اذاكرلك وتيجي بيج زيروووووو ؟؟؟؟

نياهاهاها

انا بقه يا ستو مش متجوزه بس علشان احكيلك بتخيل فرحى ازاى

فكره لذيذه جدا والله انى اعملها بوست

انا ان شاء الله هاعمل بوست اتخيل فيه فرحى وابقي شوفيه بقه

يلا سلاموووووون يا قمر

Lady E يقول...

dramaqueen : هههههههههه مش انا بقول هي دي الموضة اليومين دول ان العرسان يبقى اسمهم تامر :)

حلوة اوي الاحلام الجميلة والرومانسية دي يا كوين واحلى حاجة انك عايزة تمنعي كل اغاني الفواكه :)

متنسيش تبقي تعزميني في فرحك ان شاء الله

وتستاهلي امتياز بجد :)

صمت المشاعر يقول...

هههههههههه صحيح لما بيتخانقوا دلوقت هيعملوا ايه بعد الفرح ربنا يستررر

بصي ياستي انا اتمني فرحي ان شاء الله لو ليا عمر يبقي فرح اسلامي

في فرق اسلاميه جميله اووي فاتمني انه يبقي كدا



دمتي بكل خير وسعاده يارب ويبقي اسم عريسك تامر

مسدس صغير يقول...

بوست جميل وعقبالك

الشاعر الحزين يقول...

جميله قوى الحدوته دى

بجد حدوته جميله

لكن بالنسبه ليوم الفرح

بالنسبالى أنا أقدر أقولك

انه ان شاء الله

هيكون اليوم الذى ينتظره العالم

ويكتب عنه التاريخ من بعدى

وبدون الدخول قى تفاصيل لأن أعتقد
ان تفاصيل اليوم ده من جوايا
لا يستطيع العقل أن يترجم مدى احساس الحب الواقع فى هذا اليوم العالمى

ولكى منى كل التحيه والتقدير

عاشقه الرومانسيه يقول...

اولا انا عايزه الورده بتاعتى
عااااااااااا
وبعدين بقى انا هادى لنفسى زيرووووو كبيير وتخين وحلو كده
لانى مش باتخيل الفرح لان الحقيقه ممكن تصدمنى ياليدى وما يكونش زى خيالى او الظروف تخلى مفيش فرح اصلا
هاسيبها لله
لما يجى وقتها انا راضيه باى حاجه بس اتجوز
اقفش على عريس الغافله وربنا يسهل بعدها
(:

Lady E يقول...

هانى زينهم : تسلم يا مستر
وبعدين الامنية دي صعبة انا مودية جدا او بحالات زي ما بيقولو ساعة تروح وساعة تيجي :))))

الفرح الحقيقي فرحك بعروستك وفرح عروستك بيك يا مستر وربنا يجعل حياتكم افراح وان شاء الله تفرح ب الامورة ملك

Lady E يقول...

غروب : انتي اللي عسسسسسسسسسسسسسل

تصدقي انا جه على بالي برضه في يوم من ذات الايام اني مبقاش محجبة يوم فرحي وبعدين حسيت ان كده هبقى سخيفة اوي بقى ربنا سبحانه وتعالى فرحني وفي نفس ذات الوقت أعصيه لأ طبعا وبعدين فكرت لو موتت يوميها ومكونتش محجبة هقابل ربنا وهقوله ايه؟؟

ثانيا ثااااااااانك يو على مذاكرة الفرنساوي مش ناقصة اخد فيه بيج زيرو خليه يعدي بسلام عشان اتخنققققققت منه عاااااااااااا

وان شاء الله هشوف البوست وحقوق النشل محفوظة :)

Lady E يقول...

صمت المشاعر : هههههههههه لا عريس مين اللي يبقى اسمه تامر انا مش بحب الاسم ده اصلا عالعموم هدية مني ليكي يا صمت المشاعر يارب يبقى اسم عريسك تامر نياهاهاهاها

وان شاء الله ربنا يحقق حلمك وفرحك يبقى اروع فرح

دمتي بكل خير وسعادة يا قمرايا

Lady E يقول...

مسدس صغير : ايه التعليق اللي من غير نفس ده ؟؟؟؟!!!!

مش محسوب طبعا التعليق ده
اومال لو كنت حذفت تعليقك قبل كده كنت عملت ايه يا مسدس

Lady E يقول...

الشاعر الحزين : حدوتة ؟؟؟!! طب فين ابلة فضيلة :)

لا بجد حلو تخيلك عن يوم فرحك يا شاعر

ربنا يوفقك

Lady E يقول...

عاشقه الرومانسيه : عريس الغفلة !!!!! لا واضح انك بتحبيه من قبل ما يجي يا رومانسية :)

الحلم في حد ذاته بيبقى شعور جميل حتى لو متحققش كفاية انه يبقى جواكي :)

وعندك بيج زيروووو وصلحو

غير معرف يقول...

هههههههههه
احم احم
1
2
3
ثوانى بس اتخيل شكل الفرح اوك
اولااااا لازم يكون فوق السطح بيتنا او الشارع هقرر بعدين يعنى
لازم يكون فى سندوتش جبنة رومى وواحد جبنة نستو ومربى لزوم التحليه وكشرى اكيد فى الغداء يعنى
المغنى لازم يكون بعرووووووووووووووووووور
هلبس فستان فوشيا وبادى ازرق وطرحة حمرا
ناااااقص اية تانى؟؟
يالهووووووووووووووى العريسسسسسسسس
اموااااااااة
عوووووووووووووووووووو

Lady E يقول...

غير معرف : ههههههههه ليه جو الرعب ده يا غير معروفه للكل بس طبعا معروفة ليا يا انتيختي

بزمتك يا شيخه ده منظر فرح عالعموم مش مشكلة طالما انتي العروسة هيبقى احلى فرح وطالما انا من المدعوين طبعا احم احم ههههههههههه

ربنا يسعدك يا حبيبتي ومتدخليش بغير معرف تاني بتخض :)