الأربعاء، 22 أبريل 2009

محدش فاهم حاجه !!


* لو عايز تنام كويس اضرب كوباية نيسكافيه ايام الامتحانات هتلاقي النيسكافيه احسن من احسن منوم


* اكتر حاجتين بكرهم في حياتي الانتظار والتجاهل وزمان قالو وقوع البلا ولا انتظاره


* اديها بنادول تديك طراوة ( بنادول ده دواء مسكن لو حد مش عارف يعني)

* روى الإمام البخاري رحمه الله في صحيحه معلقا مجزوما به عَنْ عَائِشَةَ رَضِيَ اللَّهُ عَنْهَا قَالَتْ سَمِعْتُ النَّبِيَّ صَلَّى اللَّهُ عَلَيْهِ وَسَلَّمَ يَقُولُ : " الأَرْوَاحُ جُنُودٌ مُجَنَّدَةٌ فَمَا تَعَارَفَ مِنْهَا ائْتَلَفَ وَمَا تَنَاكَرَ مِنْهَا اخْتَلَفَ . " صحيح البخاري : كتاب أحاديث الأنبياء : باب الأرواح جنود مجندة .

* مش كل اللي بنقابلهم في حياتنا بنرتاحلهم وبنحبهم

* نفسي اعرف ايه اللي جوه قلوب الناس كان نفسي يكون عندي الحاسة السابعة

* نفسي اعرف بكرة هيبقى عامل ازاي بيقولو بكرة بيتحدد على النهاردة بالطريقة دي يبقى مفيش بكرة

* هي ايه الحياة ؟؟

* انا في سنة تالتة والتالتة ثابته اومال ليه كل الناس حاسين اني في سنة رابعه مش فاهمه ؟عالعموم ربنا يسهل كلها شهر ان شاء الله واروح سنة الليسانس

* اعتقد ان الاحلام تستحق المعاناة علشان تحقيقها بس لو كانت احلام تستاهل وليها قيمة

* وحشتوني جدا جدا جدا واكتر انسانة وحشتني ومش هقدر اشوفها اسمها مياء كانت الملاك الحارس بتاعي وانا في تالتة ابتدائي بس للأسف رجعت بلدها وافترقنا يا ترى لسه فاكراني؟؟ لو شوفنا بعض دلوقتي مش هنعرف بعض الأيام بتغيير !!

* فاتت عشرين سنة من حياتي وانا مش راضية عن حاجات كتير في حياتي , يا ترى هحتاج كام عشرين سنة علشان احقق ذاتي وارضى عني ويا ترى العمر باقي فيه كام سنة؟؟؟

* يا ترى ليه بعض المدونين اللي المدونة بتاعتي في المفضلة عندهم بيتابعوني في صمت ؟؟؟ سؤال يطرح نفسه


* كل ما بتعلم حاجة جديدة بفهم اد ايه انا مش فاهمه اي حاجة في الدنيا
تلومني الدنيا على مدونتي التانيه http://sun-east.blogspot.com/2009/04/blog-post_21.html

هناك 38 تعليقًا:

الشاعر الحزين يقول...

أعتقد انى أول تعليق

ولو مش أول تعليق هعتبر نفسى أول تعليق

ومبروك عليا

هو كلام مش فى موضوع واحد

بس مفيد قوى ومهم جدا

وبجد جميل قوى تفكيرك بالطريقه دى

دمتى بالخير

احساس طفلة محبة للرومانسية بس واقعية يقول...

* اعتقد ان الاحلام تستحق المعاناة علشان تحقيقها بس لو كانت احلام تستاهل وليها قيمة

تقصدى ان بعد الكلام اللى انتى قلتية دا
ان ال20 سنة اللى عشتيهم مفدوكيش بحاجة

امال انا شايفة لية حكمة وعقل فى الكلام
مش الكلام دا بس لا فى كل الكلام

بعدين دا احنا لسة بنعرف الحياة عشان نقدر نكمل دورى على حد عرفتية عندو 30 سنة ولا 40 سنة ولا اكبر وعجبك تفكيرة اسألية وانت فى العشرين كان حالك اية
ساعتها هتعرفى اننا لسة بنخطط لحياتنا لسة بنبتدى عشان نقدر نكمل صح

قوليلى فاضل شهر وتخلصى الكلية خالص
طيب جميل يا بختك ربنا يوفقك بقى
هاهاهاهاهاهاهاها

ربنا يسعدك يا قمر

إيمان يقول...

كلام جميييييييييل

اسلوبك بسيط جدا

لكن الكلمات وصلت القلب والعقل مباشرة

من أكتر الحاديث اللى بحب اسمعها هو الحديث الشريف اللى اخترتيه

أما بالنوسبة للصمت فالموضوع شرحه يطووووووووووووووول

بجد منوره جدا وايوه كده لعلعى يا جميل و اتحفينا ببوستاتك
السكر

SHAPE YOUR LIFE (ABOALI) يقول...

هههههههههههههههه
حلو كوكتيل الحياه اللى انتى عاملاه ده
يا ترى ده طبق ياخنى ولا

المهم
الحياه لما تمر اكيد كل شويه نعمل تقييم لما فات
فاءن ظهر اننا على طريق سالك
يبقى كله تمام نكمل
والعكس

عمل تقييم كل شويه ده شيىء صحى

وكمان الناس اللى على اليمين اللى هما بيعلقوا فى الظل
انت منهم يا ليدى
شوفى كام مرة عديتى بالصدفة عندى

ولكنى التمس ليكى العذر انتى بقى عارفه زحمة النت


كلما ارتقى الانسان فى الفكر
ايقن ان ما تعلمه فى حياته قليل
وانه لم يدرك شيىء

hasona يقول...

السلام عليكم

ده ناتج عن حديث مع النفس -وشوية فضفضة

بنادول ولا ريفو كلها طرق بلاوي بتدخل الجسم - بنحس وقتها بتحسن ويا عالم بعد كده ممكن تعمل ايه- لا نكثر منها

،،،،
أيوة فعلا مش كل اللي بنقابلهم نستريح لهم
فيه ناس نقابلها نحس اننا نعرفها من زمااااااااان قووووووي

كل ما نقرب لربنا أكتر وكل ما نعمل علي نقاء وصفاء القلب والعقل
هنلاقي الحاسة السابعة والثامنة والتاسعة كمان
وهتعرفي الطريق الي قلوب الناس وما تحمله تلك القلوب

نعم لابد أن نحلم أحلام كثيرة ونتمني تحقيقها خصوصا لو كانت ذي قيمة لدينا ولدي الناس

لابد من نظرة لحياتنا واعادة تقيمها كل فترة - وتغيرها مسارها الي الاحسن ان امكن
مش نشغل بالنا احنا باقي في عمرنا كام سنة المهم أن يكون اللي عيشناه فعلا صح وفي مجمله راضين عنه برضا ربنا سبحانه وتعالي

تحياتي

بنوتة يقول...

السلام عليكم
على فكرة كلامك فيه فلسفة عالية جدا
وتساؤلات كلنا لازم نسألها
هو طبعا مفيش حد راضى عن نفسه مية في المية
ومجدش فاهم كل حاجة
وفوق كل ذى علم عليم
بس بدال ما الواحد بيجتهد وبيسعى وبيحاول
اعتقد ان ضميرنا ممكن يرتاح
اما مسألة تالتة من رابعة مش بعيدة
يعنى كلها شهرين ونباركلك على التخرج؟!!
هههههههههههه
السنة ايللي جاية ان شاء الله
تحياتى

MǿиY El-Shreef يقول...

ايه كل الاسئله والملاحظات دي يا ليدي

انتي بتحاولي تتعبي نفسك عشان هيمرتاحه ولا ايه

ولا ده الامتحنات بتعمله

بصي ياقمره ماتشغليش دماغك بالاسئله عشان ماتتعبيش

ويمكن حجات ماتحبيش تعرفيها ولو عرفتيها تضايقي

وبعدين تعالي هنا .. انتي عرفتي ان النيسكافيه بينيم ازاي :D

الموضوع ده بجد ع فكره :))

واوعي تقولي ان العشرين سنه الي فاتوا ماوصلوكيش لحاجه .. لاني شايفه بنوتة حساسه وقلبها كبير وعقلها يوزن بلد قدامي

خلصي كليتك واعملي كل حاجه

وهتوصلي ان شا الله :)

خدي بالك منك

ستيتة يقول...

خواطر امتحانات وكلها شهر واحد وتبقى ان شاء الله في رابعة مش سنه كاملة ولا حاجة
لو عندك الحاسة السابعة ها تدعي ربنا بإخلاص يشيلها من جواكي لأن لولا حسن ظننا بناس ميستهلوش مكنش ربنا وقانا السوء وحفظنا وكان سابنا لحاستنا السابعة تحمينا .. وما يحميش ويحفظ ويكرم غير رب العالمين .. وكمان لما تعاشري ناس ما تستاهلش وانتي بتعامليهم بما يرضي الله بتاخدي حسنات كتير على حسن الظن

الناس اللي عندك في الفيفوريت ساعات يكونوا مشغولين فيقرأوا وميعلقوش وانتي برضه بتبقي مشغولة وهم بيقدروا مشاغلك ومش بيزعلوا وعارفين غلاوتهم عندك .. ألتمس لأخيك سبعين عذرا

شدي حيلك شهر واحد والدنيا تلون ومش كل حاجة بنحققها بأهداف واضحة وصريحة .. فيه حاجات كتيرة متشالة في غيب الله أجمل من ميت حاجة خطرت لنا على بال

تحياتي

Bent Men ElZman Da !! يقول...

صحيح انا مش عارفه النسكافيه ليه وظيفته بتتغير دايما وقت الامتحانات بدل ما يكون منبه بيبقى منوم :D

فعلا الانتظار بجد ممل اوووووووى وخصوصا لو مستنيه حاجه مهمه تحصل

هههههههههههه طب والله انا افتكرتك فى سنه رابعه :$ من كتر ما حاسه انك بتقطعى فى شعرك من الكليه قولت يبقى بقالك كتير وان شاء الله يا قمر تخلصى على خير

حاسه البوست ده كأنه جمله عن كل حاجه انتى بتفكرى فيها
اختصرتى جزء من افكارك فى جمل :)

كيكى عوووووو يقول...

ممممممممممممم
وليه محدش فاهم حاجه!
!!!!!!!!
عوووووووو

بنجاواتى يقول...

السلام عليكم
تقبلى مرورى

اما عن موضوع النوم ايام الامتحانات فانا -عن تجربة- ممكن اشرب قهوة او اسمم نفسى بالتيتانوس او الاستركنين وبرضه هيجيلى نوووووم

اما عن حديث الارواح جنود مجنده فأنا بحبه جدا وتطبيقاته بتقابلنا يوميا

وتقبلى فائق احترامى

Ahmed يقول...

لأ ياليدي ده كمان بنادول ده بتاع ادمان بعيد عنك

فضفضي ياستي براحتك
لو احنا يعني مشفناش فضفضتك وسمعناكي مين يعني اللي هيعمل كده

ان شاء الله يعدي الشهر ده على خير

ان شاء الله ترضي عن حياتك
ترضي عنها لما تعرفي اواي تحسي بنشوة هدف حققتيه

blue-wave يقول...

انتى اجمل بنوته فى الدنيا
واجمل وارق اخت
بس كدا:))

شاب كــ طخين ـــــا يقول...

بوست جميل اوى ومفيد كمان اوى
خصوصا نصيحه النسكافيه :D
مدونتك جميله جدا
انا هاخد لفه فيها ياساتر

MaNoOoSh يقول...

ايام الامتحانات بيتهيئلى لو الواحد اخد حتى منشطات هينام بردو
ههههههههههههههه
وعلى فكرة زى ما ستوتة بتقولك فعلا انتى لو عندك الحاسة السابعة هتدعى ربنا انه يشيلها.. طب تخيلى كدة مثلا لو انتى بتحلمى احلام وبتتحقق هتفرحى اول كام مرة بس بعد كدة هتتخنقى وهتتمنى متحلميش تانى.
والانسان عمره ما بيحس برضى تام عن نفسه لان طبعه الطمع فى الاحسن من الخير

وبالنوسبة بقى للسؤال الاخير انا هقولك الصراحة انا فى ناس كتير عندى فى المفضلة وساعات بتحرج اعلق عندهم.. ميغركيش انا لمضة قوى صحيح بس بتكسف جدا.. وممكن ناس بردوا بتبقى مشغولة ومش بتقدر تتابع فعلا حتى الناس اللى بتحبهم.
تحياتى يا قمر

simply me يقول...

حلو كلام ماقبل الامتحانات ده
تلاقيه فلسفه جامده ودماغ

ربنا يوفقك وتوصلى لليسانس

كيكى عوووووو يقول...

نزلتى الاغنيةةةةةةةةةةةةة
عاااااااااااااااا
مش كنتى تصبرى لحد ما اتعلم
********************
بس حلوة
عوووووو

Lady E يقول...

الشاعر الحزين : مبروك عليك الفوز بالمركز الاول في التعليقات يا شاعر :)

Lady E يقول...

احساس طفلة محبة للرومانسية بس واقعية : حكمة وعقل الاتنين في نفس ذات الوقت نياهاهاهاها

اكيد العشرين سنة فادوني يا احساس طفلة مقدرش انكر بس انا كان عندي امل لما اوصل لعشرين سنة احقق حاجات كتير
لو بصيتي لحد عنده 20 سنة بس مش عربي هتلاقي حالهم غير حالنا وانا حاسة ان عندي غيره اني اكون احسن من كده وربنا ييسر يا رب ومضيعش باقي عمري

بالنوسبة لثكلية فاضلي شهر ان شاء الله واروح سنة رابعة سنة الليسانس هييييييييييييه

وربنا يسعدك ويكرمك يا قمرايا

Lady E يقول...

إيمان : ايه الكلام الكبير ده

الكلام ده على البوست اللي انا كاتباه هيييييييه تسلميلي يا ايمان يا رب

منوراني دايما

Lady E يقول...

ABOALI : أيون هو كوكتيل يا ابو علي

تخيل لما تفكر في كل التساؤلات دي واضعاف اضعافها معاها كان لازم اكتبها علشان عقلي يهدى شوية من التفكير بدل ما هو عامل زي عداد الكهربا عمال يلف بسرعة وهيجنني عاااا

وبالنسبة للتعليقات فأنا مش بفوت موضوع جديد للمدونة بتاعتك بس مش بعرف اكتب تعليق يليق بروعة المواضيع :) بجد بسم الله ما شاء الله
تاتش وود

Lady E يقول...

hasona : وعليكم السلام ورحمة الله وبركاته

والله تعليقاتك دائما رائعة ودائما بستفيد منها

جزاك الله خيرا

Lady E يقول...

بنوتة : وعليكم السلام ورحمة الله وبركاته

بنوتة الجميلة اللي مش بتحرمني من زياراتها الجميلة بجد كنتي وحشااااااني

بالنوسبة للكلام ف مكنتش اقصد ابدا ان يكون فيه فلسفه لان وانا بكتبه كنت حاسة بيه جدا ومفكرتش افلسفه

اما بالنوسبة لرابعة ف هانت يا اختي ربنا يسهل واخد الليسانس ان شاء الله

نورتيني يا قمرايا

Lady E يقول...

MǿиY El-Shreef : ههههههههههه مين دي اللي مرتاحه يا موني بتهزري طبعا

بالنوسبة للنيسكافيه ف عن تجربة يا اختي كل لما بحب اذاكر واشرب نيسكافيه لاااااااازمن ولابد انااااااام

فين البنوتة اللي شايفاها دي هههههههه انا مش شايفاها
ربنا يكرمك يا موني انتي اللي فيكي الصفات الحلوة دي واكتر يا قمرايا

نورتيني يا اهلاوية وهتتغلبو يعني هتتغلبو نياهاهاهاهاها

Lady E يقول...

ستيته حسب الله الحمش : مفيش كلام بعد كلامك يا دكتر

دايما بتقنعيني

تسلميلي يا دكتر وان شاء الله طاقتك الايجابيه في زيادة دايما

Lady E يقول...

Bent Men ElZaman Da !! : ههههههههههه سؤال يطرح نفسه
النيسكافيه وظيفته بتتغير لأننا بنبقى عايزين ننام اساسا عاااااااا

اما بالنسبة للكلية فدي تالت سنة ليا فيها عااااااااا عاااااااا وبشد في شعري فعلا

وفعلا انا اختصرت جزء من افكاري في جمل

نورتيني يا قمرايا وبجد بفرح بتعليقاتك الجميلة

Lady E يقول...

كيكى : ايه الاسئلة اللي بره المنهج دي يا كيكي

محدش فاهم حاجه علشان انا اللي كاتبه البوست مش فاهمه حاجه عااااااااا

SHAPE YOUR LIFE (ABOALI) يقول...

جميل موضوع الدبلوماسية فى الرد ده يا ليدى
ههههههههههههه
قال ايه مابعرفش ارد

يا انا اللى بعرف
كلنا انسان يا ست ليدى

على العموم
عشانا عليك يا كريم
والمدونه مطروحة فى البورصة
وهنيالك يا فاعل الثواب


تحياتى

Lady E يقول...

بنجاواتى : وعليكم السلام ورحمة الله وبركاته

اهلا بيك في المدونة يا بنجاواتى

طب وايه الحل ؟؟؟؟ منذاكرش ايام الامتحانات بيتهيألي الكلام ده كله جاي من العقل الباطل اللي رافض المذاكرة

ربنا يوفقنا ياااااارب وينجح كل حد بيمتحن

Lady E يقول...

أحمـــــــــــــد أبو العلا : خدعوك فقالو ان بنادول ادمان مفيش فيه اي مادة مخدرة او تساعد على الادمان
الا حاجة واحدة بس مفعوله السحري في القضاء على الألم

وبالنوسبة للفضفضة ف الله يكون في عون قراء المدونة :)

وياااااااااارب فعلا الشهر ده يعدي على خير

اما بالنسبة لحياتي فالحمد لله راضيه عنها لكن مش راضيه عن بعض الجوانب فيها وبحاول اغيرها

دمت بخير يا انجينير

ELMASRYA - MRS WRITER يقول...

حبيبتي ليدي

ممكن ماتفكريش في حاجات مش حلوة

لو سمحتي ركزي في المذاكرة وهتعدي بإذن الله وهتنجحي وتفرحي

ماتفكريش في حاجات تضايقك وتخللي مزاجك مش كويس

واوعي تشربي نسكافيه ولا قهوة أنا عملتها مره واحده في حياتي قال ايه عايزة اسهر والعلع مع اللغة الإنجليزية لكن لا تتصوري نمت ازاي وقعت على وشي وفضلت نايمة للصبح وكويس إني صحيت على رنات المنبه

فرفشي يا بسكوته هانت والله وبعد الغختبارات هتتنفسي نفس عميق وتقولي هييييييييييييييييه خلصت من الفرنساوي

ربنا يحميكي ويوفقك وينجحك نجاح باهر يا ليدي

دمتي سالمة بحفظ الرحمن

Lady E يقول...

blue-wave : يمكن :))

Lady E يقول...

أمبارح كان عمرى عشرين : يعني بعد كل الكلام الحلو ده يا ساتر هههههههه طب ليه ؟؟

Lady E يقول...

MaNoOoSh : ربنا يعينني ويعين كل اللي بيدرسو على موضوع النوم ايام الامتحانات ده

وكان نفسي يبقى عندي الحاسة السابعة علشان افهم كل حد في ف قلبه ايه ليا
افهم كل الناس مبقاش مخدوعة فمعتقدش لو كانت عندي كنت هتعب

وبالنسبة للتعليقات ف في مدونين متابعين مدونتي بس عمرهم ما قالو رأيهم فيها انا بتكلم عليهم مش على اللي متابعين مدونتي وممكن ينسو مرة وميكتبوش كومنت

سعيدة جدا بمعرفتك يا منوش
نورتيني

Lady E يقول...

Bondoka: اهلا بيكي يا قمرايا

انا بجد مقصدش انه يبقى فلسفة خااالص
دي مجرد افكار بفكر فيها

وبعدين اوصل ل لليسانس بس؟؟؟؟؟ يعني متخرجش من الكلية ولا ايه هههههه

نورتيني يا جميلة

Lady E يقول...

كيكى : هههههههههههههههه اللي يستناكي يبيع عياله اصلا يا كيكي

وثانكيو على ان ذوقي عجبك

Lady E يقول...

ABOALI : انا دبلوماسية؟؟؟؟

حاشا وكلا انا لا اقول غير الحقيقة

Lady E يقول...

ELMASRYA - MRS WRITER : خالتو حبيبتي
ربنا يخليكي ليا وميحرمنيش منك يا حبيبتي