الأحد، 12 أبريل 2009

ايام وبعيشها




*امبارح دورت الكتكوتة لقيتها مش بتدور عاااااااااا اتاري البطارية نامت وشدت اللحاف والبطانية ااااااااااه يا كتكوتة وجعتي قلبي المفروض انها بتتصلح من امبارح وهروح اخدها النهاردة ان شاء الله بس وحشتني بطريقة وحشة
وعرفت قيميتها امبارح والنهاردة برغم انها تعبت نفسيا وشدت في شعرها وقالت ارحمووووووني من ليدي اللي خبطتني وبوظتني ربنا يصبرها عليا :)
وصدقت خالتو لما قالت انتي بتعاملي العربية دي معاملة وحشة اوي بحس انك بتديها بالالم وانا فعلا لما اكون زهقانة او في زحمة بضرب الدريكسيون
وماما بتقوللي طب ذنبه ايه عشانه تضربيه عملك ايه ؟؟؟؟ ربنا يستر لما البيج بوص يقرا الكلام ده

*في حد يفضل ربع ساعة او عشر دقايق مش عارف يعدي الشارع
الاجابة ايووووون انا , لما بكون ماشية سيرا على الأقدام لأني ببقى عارفة سرعة العربيات اللي ماشية وان اللي بيسوق العربية مش هيقدر يتحكم فيها ويوقفها لو عديت ولذالك بحاول استنى لغاية لما الشارع يفضى واعدي الشارع عااااااااا ولا اطفال الحضانة :)



*كنت بتكلم انا وصبحتي امبارح عالايميل وقولتلها تصدقي انا مترددة من المشاركة مع المدونين في اللقاءات واحدى الأسباب ان اكيد معظم قراء المدونة راسمينلي صورة اني طفلة بقى وبضفاير ...... الخ والحقيقة مش كده انا روحي روح طفلة
وده مكتوب في البروفايل بتاعي وفي
About me
وكمان اسم مدونتي طفلة مش عايزة تكبر بس الأكونت بتاعي
Lady e
يعني انا روحي روح طفلة بس في نفس ذات الوقت ليدي

*الخطوط داخله في بعضها عندي بين الانجلش والفرنساوي لو قررت أذاكر انجلش بتنط في عقلي الكلمات الفرنساوي ولو ذاكرت الفرنساوي بقول ايه النطق الأهبل ده وبنطق انجلش وبالطبع بتنط في دماغي الكلمات الانجلش واصلا الانجليز والفرنساويين كارهين بعض من بداية التاريخ حتى مدرسين الانجليزي والفرنساوي كارهين بعض حاجة غريبة !!
ده غير منهجنا المتخلف بتاع الترم ده نفسي في مررررررررة ترم يعدي من غير ما يجيبولنا قصة قتل والرواية المرة دي بتتكلم عن واحد قتل بنته ثم مراته قتلته وطبعا قتلت عشيقته ثم واخيرا ابنها قتلها يعني م الأخر هما عيلة اجرام احنا ماااااالناااااااااا
* فاكرين لما نزل معايا حوار في جريدة العالم اليوم تقريبا مفيش حد قرأه من المتابعين لمدونتي ولقيتني بفكر شوية في الموضوع وطبعا زعلت وقولت لو كانو مهتمين كانو قرأوا الحوار عااااا وقولت لأسماء صبحتي والصحفية اللي كتبت عن مدونتي تفتكري لو انا فعلا عملت كتابي ممكن حد ينفق وقته وفلوسه ويشتري الكتاب ويقرأه وكمان يحضر حفلة التوقيع
قالتلي اكيد اللي هيجيب الكتاب يا مجنون يا ميدمن
قولتلها لأ هيبقى مجنون لأن مفيش حاجة اسمها ميدمن :) وضحكنا بس الموضوع فعلا شاغلني لأنه موضوع مهم بالنوسبة لي

*لما ربنا بيفتحها عليا وبفكر افتح اي كتاب من كتب الكلية وطبعا مش بكمل
خمس دقايق على بعض في قرائته بفتكر اغنية الجميلة فيروز وهي بتقول
: انا كل ما بشوفك كإني بشوفك لأول مرة حبيبي
خير خير ربنا يعدي السنة دي على خير ان شاء الله
هتعدي

هناك 25 تعليقًا:

mohamed ghalia يقول...

اييييييييييه ايام وبنعيشها فعلا
انت شايلة هم الدنيا كلها ليه بس
هم المذاكرة وهم الكتاب وهم الناس شايفينك إزاى
يابنتى عيشى حياتك طبيعى خالص زى محباها
يلا اسيبك بقى عشان بجهز للموضوع الجديد

بلاش فضايح يقول...

لالا ان شاء الله السنة هتعدى على خير
وهيجيبولكوا السنة اللى جاية قصة انها حقا عائلة محترمة بدل العيلة الاجرام اللى بيدرسوهالكوا دى دة كأنهم عايزين يعلموكوا ان الجريمة لا تفيد

انما بالنسبة للكتاب اعمليه انتى بس وأنا هشترى كل النسخ ولا يكون عندك فكرة

MǿиY El-Shreef يقول...

ايه ده كتكوتك بطاريتها نامت :(

ياكبدي يابنتي :D

ربنا يرجعهالك سالمه غانمه

بالنسبه لانك تعدي الشارع

مبدأي انا اعدي وهو ويقف

مش هيقدر غير انه يقف اساسا

وبالنسبه للفرنساوي الحمدلله مادرستوش والانجليزي هنا مافيش فيه قصص

بس حلوه عيله الاجرام دي :D

مممم

كمان لو نزلتي كتاب انا هحضر حفلة توقيعه مش هشتريه بس

انتي توكلي ع الله يابنوته

ومستنيين

ELMASRYA - MRS WRITER يقول...

الليدي والبنوتة الصغنتوتة في نفس ذات الوقت شكل جنابك كده قلقانه من قرب الإمتحانات
ولا يهمك اعملي اللي عليكي وبإذن الله هتحققي نتيجة باهرة

أنا كنت بتعامل مع المواد اللي بحبها بمنتهى الإحترام للكتب بتاعتها واذاكرها في سريري والكتاب في حضني

أما المادة الغلسة كنت بتعامل معاها من علياء يعني بمنتهى الشموخ والكبرياء واذاكرها على المكتب وانا متأهبه ليها جدا ويانا يا إنتي أيتها المادة الرخمة

جربي وهتدعي لطنط المصرية

دعواتي لكي بكل الخير والتفوق والسعادة

أحبك في الله

Ahmed يقول...

ههههههههههه
الكتكوته ديه حكايتها ايه
الله يرحمك يامديحه
هههههه

كانت أصيله متعملهاش الا فوق مطلع كوبري زحمه


بصي هوا كل واحد راسم للتاني صوره معينه
بس في نفس الوقت انا مش شايف مشكله لما الواقع يختلف مع الخيال
ديه مشكله الشخص وخياله, لكن الشخصيه نفسها المفروض متشيلش هم الموضوع ده

انا مشاركتش ولا مره في أي لقاء للمدونين ومعنديش علم بلقاء قريب هنا ولا هنا
بس لو فيه لقاء ووقته مناسب ليا أعتقد أني هروح بس اعرف الناس اللي جايه اعرفهم ولا لأ

أخبار الفرنساوي ايه؟ وبعدين الفرانسيين والانجليز مشكلتهم أن الفرنسيين مناخيرهم عاليه والأنجليز باردين, يعني مالاتنين مايعلم بيهم الا ربنا


لو كتبتي كتاب, اعتقد ان ناس كتيره هتشتريه
ديه مش مجامله, بس الكتب وابداعها أهم من مجرد لقاء أو حوار

فتاه حالمه يقول...

عوووووووووووووووووووووووووو
صبحتي ازيكي يا قمرايه
سلامه كتكوتك يا كوكا
معلش استحملي يا حبيبتي هتقوملك بالسلامه باذن الله
بس عمليها كويس يا بنتي عشان مش تخمصك هي اه وحشه بس مريحاكي بقي ارحم من المواصلات والشارع مقولكيش
بالنسبه للكتاب اعمليها انتي بس وانا اول واحده باذن الله اجيب الكتاب حتي لو هستلف يا اختشي
هو انا عندي كام ليدي طفله
ربنا يكرمك ويفتح عليكي في المزاكرة يا قمر
ربنا يقويكي
عشان تزاكريلي الكورس كان عندي امتحان يا اختشي وكتبت ايميل ربنا يستر بقي
ربنا يكرمك
تحياتي

Lady E يقول...

mohamed ghalia : لأ ايام وانا اللي بعيشها يا محمد :)

هاخد بنصيحتك

وان شاء الله هاجي اشوف الموضوع الجديد

دمت في حفظ الرحمان

Lady E يقول...

nona : ياااااااارب تعدي على خير

وفعلا من اولى كلية وهما بيعلمونا ان الجيريمة لا تفيد لما عقدونا :)

اما بالنوسبة للكتاب فهعتبر ده وعد

ووعد الحر دين عليه :)

تعليقاتك الجميلة بتسعدني يا نونا
نورتيني

غروب يقول...

ليدي

يا بنتى سيبك من المحاضرات هبقي انا اشرحهالك

الله يخليكي فكرى بجد هبقي سعيده جداااااااااااااا لو جيتى

وبجد ممكن نبقي نذاكر سوا بعدين مهو انا كملن اداب انجليش
اما بقه ساعتين السفر ممكن تيجي براحتك جدا وتمشي بدرى برضه .. قرري بجد ولو اقتنعتى قوليلي علشان اعطيكي رقمى تكلمينى وتيجي علشان خاطرى

سي يو

غروب يقول...

ههههههههههههههه قريت البوست

روايه ايه المجرمه دى يمكن تكون عندى برضه بسانا بيموووووووووووووووووت في فيروز علشان كده لسه مش فتحت الكتب ولا شوفتها حتى لاول مره

ههههههههههههه

ربنا يستر الترم ده اااااخر استهتار

انا بس خايفه من اللغه العربيه

دايما درجاتى فيها هبببببببببببباب

والله يكون في عون العربيه

انا اااااااخر مره سوقت عربيه والحمد لله كان الترم اللى فات وكنت في جمصه وبعيد عنك وعن السامعين طلعت بالعربيه فوق الرصيف .. مع انى بسوق كويس

بس باين اتحسدت

اه والله
هههههههههههههه

بسوق والله كويس

صدقينى

ما علينا بقه بس من يومها بقعد ورا زى الجزمه والحمد لله هههههههههههههههههههههههههههههههههههه

فكرتينى بايام سودا

المهم فكرى بجد وردى عليه

يلا سلام يا قمر

♥♥♥♥♥ Jennifer™® ♥♥♥♥♥ يقول...

أحب بلوق الخاص بك...........

عاشقه الرومانسيه يقول...

حلو موضوع عيله الاجرام ده
هههههههههههههه
ركزى ياحبيبتى شويه خليكى تخلصى من المذاكره ومن الفرنساوى ومن الانجليزى والغلب ده كله

لجين أبو الدهب يقول...

شكلها كده تهاييص الصباح وما قبل الظهيرة D:

وسلامة الكتكوتة الف سلامة .. شكلها واخدة على خاطرها منك ابقى طيبى خاطرها ..

وبالنسبة لتعدة الشارع فانا بقى غيرك خالص انا كنت انزل من المواصلات اعدى على طول وصحاباتى يقولوا لى يامجنونة اقولهم انا عندى مبدأ العربية هى اللى توقفلى مش انا اللى اقف للعربية وطبعا بسبب المبدأ ده مش عايزة اقولك كمية الفرملات اللى اتفرملت عليا ولا كمية العجل اللى عدى على رجلى وكمية الشتيمة اللى اشتمتها بس عديت على خير الحمد لله ..

تاخدى كابتشينو ..

صباح الخير عليكى ..

Lady E يقول...

MǿиY El-Shreef : الحمد لله رجعت بالسلامة يا موني :)

وبالنوسبة لمبدأ انا اعدي وهو يقف المبدأ ده بيفرسني لما اكون ماشية بالكتكوتة في طريق بسرعه وفجأه الاقي حد بيوقفني عشان يعدي بكل برود عااااا
وساعات لو حد مش متمكن من القيادة ممكن يدوس اللي بيعدي الطريق
ربنا يحفظك ويحميكي حاولي تغيري من المبدأ ده

وده من حسن حظك انك مدرستيش الفرنساوي

اما بالنسبة للكتاب فهستناكي ان شاء الله في حفلة التوقيع

نورتيني يا موني

Lady E يقول...

ELMASRYA - MRS WRITER : قلقانة دي كلمة قليلة يا اختي الكبيرة

انا مرعوبة لدرجة اني بدمر حياتي ومش بذاكر وعارفة ان ده تقصير مني بس بحاول اغير القلق والرعب ده واحولهم لطاقة ايجابية

بالنسبة للمذاكرة في السرير فأنا كمان كنت بحب اخد الكتاب في حضني بس كنت بنااااااام مكنتش بقدر اكمل قراءة في الكتاب فقررت ان المذاكرة هتكون في المكتب او في ال living room او اي مكان هادي على حسب المود
وكمان احيانا بحب اسمع موسيقى وانا بذاكر

جزاكي الله خيرايا حبيبتي على دعواتك الجميلة دي والله انا فعلا محتاجة ليها

وانا كمان بحبك في الله واحبك الله الذي احببتني فيه

Lady E يقول...

أحمـــــــــــــد أبو العلا : مديحة عقدتك يا انجينير الله يكون في عون اللي اشتراها :)

السبب اللي قولتله مش السبب الوحيد اني محضرتش لقاءات المدونين لكن كمان الوقت بيكون مش مناسب

اما بالنسبة للفرنساويين والانجليز ف فعلا هما الاتنين مختلفين ومبيطيقوش بعض واحنا اللي بندرس انجليزي بندرس الفرنساوي واحنا مخنوقين منه وكذالك اللي بيدرسو فرنساوي مش بيبقو حابين الانجليش طبعا مش كلهم بس اغلبيتهم

تسلم على المجاملة يا انجينير انا اسلوبي في الكتابة متواضع جدا وعلى ادي

وبالنسبة للحوار فهو كان ومازال مهم عندي ولو كان حد مهتم فعلا كان قرأه وخصوصا اني كتبت في المدونة عن الحوار قبلها ونوهت انه هينزل امتى وبالتالي اخدته مقياس على الكتاب
وعالعموم قدر الله وما شاء فعل

Lady E يقول...

فتاه حالمه : ربنا يوفقك في الكورس يا قمرايا

ولو محتاجة اي مساعدة في الانجليش اسألي المستر في الكورس نياهاهاهاهاها

انا بهزر لو تحبي نذاكر انجليش سوى معنديش مانع

نورتيني

Lady E يقول...

غروب : اجي براحتي ازااااااي ولازم اكون عندكو الساعة 9 يعني المفروض انزل من البيت من الساعة 7

وبعدين انا فعلا سايباني من المحاضرات من اول الترم ومن اول الكلية اصلا بس محاضرات بكرة ان شاء الله مهمة وهسلم الشيتات ان شاء الله عااااااا

ان شاء الله احضر اللقاء التاني

Lady E يقول...

غروب : الرواية اسمها اجمنون والجزء التاني الكترا

وتقريبا الترم ده غريب على الكل ربنا يعديه على خير

واللغة العربية اللي بندرسها غريبة اصلا ههههههه مش لغة عربية طبيعية

وايه ده بجد طلعتي عالرصيف
لا بجد بتعرفي تسوقي كويس
اهو تغيير برضه يعني هههههههه
ما هو مش اي حد ممكن يطلع عالرصيف الا المحترفين :) وانتي منهم يا قمرايا فمتزعليش

والله نفسي احضر معاكو بس الوقت مش مناسب عاااااااااااا

Lady E يقول...

♥♥♥♥♥ Jennifer™® ♥♥♥♥♥ : شكرا يا جينيفر

Lady E يقول...

عاشقه الرومانسيه : يا رب اخلص منهم يا اختي يا رب عشان خلاااااص اتخنقت وزهقت

احساس طفلة محبة للرومانسية بس واقعية يقول...

الكتكوتة كانت رحماكى صحيح انا عارفة احساسك وانتى بتعدى الشارع كنت فى مصر من 6 شهور وكنت فى نفس الموقف وانتى طبعا عارفة هنا اشارة الموشاة حتى لو مقفولة الاولوية للمشاه بس طبعا كلة بيحترم الاشارات وشكلنا اتعودنا على كدا وكان لازم حد يعدينا الشارع فى مصر :)

على فكرة
شكلنا مش لازم يتوافق معا روحنا يا ليدى الانسان مجموعة افكار واخلاق ومبادئ مش شكل وبس ومش لازم يكون زى ما تخيلناكى احنا عجبانا روحك مش شكلك :)

نيجى ببقى للكتاب
انا قريت المقال على فكرة
وصدقينى لو كنت فى مصر كنت هجيبه
وهجيب كل كتب المدونين وبزعل اوى لما القيهم شايلين الموضوعات من المدونة بعد اصدار الكتاب
وانا متشوقة انى اقراء ومش بعرف للاسف
ولو قررتى تنزلى كتاب هخليكى تشتريلى نسخة وتخليهالى عندك لغاية لما اجى

ربنا يعدى الامتحانات على خير حاولى تركزى انا هروح اقراء البوست اللى بعد دا بقى :)

تقبلى مرورى

Lady E يقول...

لجين أبو الدهب : صباح النور عالبنور

ههههههههه لا بعيد عنك تهييس اقتراب الامتحانات

وبالنوسبة لتعدية الشارع ف انتي كده بتخاطري بحياتك
ليييييييه يا لوووووووووجي مش عارفة انك غالية عليا وبحبك في الله

خدي بالك من نفسك
وربنا يحفظك

وقرش كابتشينو مقبول ثانكيو :)
انا فعلا محتاجة اشرب كابتشينو علشان الصداع الفظيع اللي حاسة بيه

دمتي بخير يا قمرايا

Lady E يقول...

احساس طفلة محبة للرومانسية بس واقعية : ههههههههه يعني مش انا بس اللي بيحصلي الموقف ده لما بعدي الشارع الحمد لله

تسلمي يا قمرايا وانا كمان عجباني روحكم وبحترمها وطالما كلنا انسان يبقى مفيش حد فينا مش جميل لأن ربنا سبحانه وتعالى خلقنا كلنا في احسن تقويم

وانا بعتلك المقال لأنك في اليابان يا احساس طفلة لكن اللي موجودين في مصر مهتموش للأسف

اما بالنوسبة للكتاب فمليش دعوة تيجي مصر وقتها وتبقي معانا في حفلة التوقيع انتي وسومة ان شاء الله

منوراني دايما يا قمرابا

Bent Men ElZman Da !! يقول...

شوفتى كتكوته زعلت منك ازاى
عشان تبطلى تضربيها :D
ترجعلك بالسلامه يارب
وبعدين عيب يعنى لما حد يفتكر ان بنت اموره زيك وعسل كده تبقى طفله وضفاير والجو ده
مهما كنتى بروح طفله بس انتى فى نفس الوقت دماغك كبيره وعاقله
مش عيب يعنى يكون جزء منك طفله وقت اللزوم
وربنا معاكى السنه دى يا قمر وتخلصى على خير ان شاء الله :)