الثلاثاء، 7 أبريل 2009

مازلت في عنق الزجاجة


واضح اني مش هطلع من عنق الزجاجة ابدا لغاية لما روحي تتحرر من الدنيا ومشاكلها
كنت فاكرة اني لما اخلص ثانوية عامية يبقى كده عديت من عنق الزجاجة لكن رحت الكلية ولقيت برضه في تحديات بتواجهني وبتحسسني بالإنكسار والانهزام وبعد الكلية شغلي برضه هيبقى فيه عنق الزجاجة حتى لو اتجوزت هيبقى كل يوم في تحدي جديد وهفضل في عنق الزجاجة
ببساطة انا تعبت والله تعبت ومش قادرة اكمل مع اني المفروض مقولش الكلام ده والمفروض ابقى متحمسة ومتفائلة بس مش عارفة مالي ولغاية امتى هفضل بالطريقة دي الله اعلم ...
* ناس كتير بيقولو عليا طفلة وانا مش بنكر ده انا فعلا طفلة ومعترفة اني شابة عايشة بروح طفله بس مش معنى كده اني اتعرض للسخرية ويستضعفوني يا ترى هفضل طفلة على طول؟؟ ويا ترى غلط اصلا اني ابقى طفلة مش عارفة
* حاسة اني مش راضية عني عايزة اغير حاجات كتير في كل حياتي ومش عارفة
حاسة ان انا مش انا مش عارفة اتكلم واعبر عن اللي جوايا ولو اتكلمت بحس اني بحدف طوب في كلامي
* اصعب شعور في الدنيا كلها شعور الفراق لما تفارق ناس بتحبهم وروحك فيهم وتحس انك بتكلمهم وبتضحك معاهم وتبص لصورتهم وتنزل دمعة من عيونك يا ترى بيحبوني زي حبي ليهم يا ترى انا في بالهم ولا الحياة اخدتهم مني تبقى هتتجن وتطمن عليهم بس للأسف متقدرش تقرب منهم لانهم بعيد اوي عنك وربنا بس اللي قادر انه يحفظهم

هناك 21 تعليقًا:

طوبه فضه وطوبه دهب يقول...

ممكن اضيف لك معلومه فى مثل بيقول من القلب للقلب رسول كنت زمان بسئل سؤالك ياترى صحابى بوحشهم بيحبونى ذى ما بحبهم اكتشفت بعدها ان كل حد بتحبيه بيكون بيحبك من اصحابك وان اى حد بيوحشك بتكونى فى نفس اللحظه وحشاه وكذلك اللى ما بتحبهمش بس امتى لما تكونى اخترتى الناس دى صح من الاول حبيبتى احنا فى الدنيا يعنى دار تعب شقاء الانتقال من مرحله لمرحله مجرد امل فى حاجه جديده لكن مش معناه تغير كامل حاولى تتاقلمى وعيشى بطبيعتك لو كنتى طفله مش هتعجبى الناس ولو كنتى خبيثه برضو مش هتعجبيهم لان الناس كده كده لا يمكن ترضيهم فعيشى حياتك كما تحبى بما يرضى الله ولا تلقى بالا لراى احد او تعليق الغير فقولى دائما انا هكذا فمن رضا فمرحبا ومن ابى فلا مرحبا

Lady E يقول...

طوبة ذهب وطوبة فضة : والله تعليقك ريح قلبي يا قمرايا ربنا يكرمك

ويا رب بجد كل الناس اللي بحبهم ووحشوني انا كمان ابقى على بالهم ووحشاهم رغم بعد المسافة

سعيدة جدا بتعليقك الجميل
وجزاكي الله خيرا

moustapha achraf يقول...

بصى اول حتة عندك فى البوست دية طبيعية و كل الناس كدة حتى بالأمارة تعالى عندى و شوفى اخر بوست...و على فكرة كلنا بيجلنا اوقات و بنبقى كدة بصى هو الوست الأخير عندى زى اخر بوست عندك و هو التعليق بتاعى


انشاء اللة خير

فتاه حالمه يقول...

انا بردو الي قلقت عليا انتي كدا رعبتيني عليكي مالك يا قمرايه بس
التحديات دي طبيعيه في حياتنا والقلق والخوف من الي بيحبونا وبنحبهم لازم يكون موجود
اما بالنسبه لموضوع انك طفله
فاكلنا اطفال صدقيني جوانا اطفال
بس مش لازم نبين طفولتنا وضعفنا لحد مش هيحس بينا لانه هيجرحنا اكيد
متبينش روحك لحد انتي عارفه انه مش هيحسك
صدقيني انا جربتها وتمنهاش لحد
وانتي طيبه والطيبين اكتر ناس بتتجرح
احفظي قلبك وخبي ضعفه جواكي
تحياتي

dramaqueen يقول...

اولا حوار عنق الزجاجة احنا عرفنا ان الزجاجة كلها عنق
كل سنة فى الكليةكانوا يقولونا الترم دة هو العنق
ماهو ياما الزجاجة عنق
ياما الزجاجات كتير اوى

حوار الطفولة
ميش احلى من انك تحسى انك طفلة ببراءتك وجمالك
واللى يتريقك سيبك منه
دة غيران منك
عشان انتى روحك حلوة

طالما حاسة انك عايزة تغيرى حاجات جواكى دى بداية كويسة الخطوة الجاية انك تبطلى كلام وتبدأى فى التنفيذ صدقينى هتقدرى
الفراق
اصعب كلمة كنت ومازلت باكرهها
وباكره الظروف اللى بتجبرنا عليه

وبعدين انتى قلبتى مواجعى لانها واحشانى اوى اوى
بجد تعبانة من غيرها
مش عارفة هى قادرة ازاى تستحمل بعدنا
بس زى ما طوبة ذهب وطوبةفضة قالت
اللى بيوحشوكى انتى واحشاهم واللى بتحبيهم بيحبوكى ودى حاجة انا متاكدة منها

بالتوفيق دايما يا قمر

Bent Men ElZman Da !! يقول...

حياتنا كلها عباره عن مراحل واهداف
بنوصل لهدف عشان نقدر نكمل ونوصل للهدف اللى بعده وصلتى للثانويه العامه وحققتى هدفك فيها عشان تقدرى توصلى للكليه اللى انتى عايزاها واللى بردو عايزه تحققى هدفك فيها
اوعى تحسى ان طفولتك او احساسك انك عايشه بروح طفله ده غلط
بالعكس دى حاجه انا شايفاها صعب تبقى موجوده دلوقتى
واكيد الناس اللى انتى حباهم دول حاسين ولو جزء من حبك ليهم ده
وادام فراقك ليهم مش بأيدك يبقى مش عندك غير انك تدعيلهم ربنا يحفظهم زى ما بتعملى
وربنا يهديلك الحال يا قمر

e_emy يقول...

طفلة طفلة

بجد انتى عسل كده

متتغيريش علشان موقف حصلك ولا علشان حد
لو حاسه انك عاوزه تتغير علشانك يبقى تتغيرى بس انتى كده جميله بجد *:

بالنسبة للفراق ف ده جزء من حياتنا لازم نعرفه علشان نحس بقيمة الناس
واكيد طالما انتى فاكراهم وبتحبيهم
اكيد بيبادلوكى نفس الشعور

اتخلصى من التفكير ده
عيشى يومك

ربنا يوفقك

Ahmed يقول...

طفله ياطفله
بلاش روح الحزن ديه

العقده ديه عندي!!!

انا دايما لما بروح في مكان بالذات في الشغل بكون أصغر واحد

والمصيبه لما تتعاملي مع ناس كبار ويقولك بس انت صغير أوي


بصي لو عندك حاجات مش عجباكي في حياتك, جمعيها وحطيها هدف هدف قدامك

وانتي هتغيري اللي مش عجبك ان شاء الله

بس بلاش الحزن ده

احساس طفلة محبة للرومانسية بس واقعية يقول...

دا انتى كنتى لسة متفائلة من ام بوست

بصى عايزة اقولك ان اذا كان رأيي الناس فيك مش عجبك واذا كان بيقلوة بسخرية
يبقى حقيقى ميستهلوش صداقتك واهتمامك
وخليكى زى ما انتى بطابعتك طفلة بروح البرائة
لكن اذا كنتى انتى مش راضية عن نفسك
يبقى شوفى السبب فين وصلحية كل منا قادر على تصليح حياتة وقت ما يعرف الخطاء فين

الفراق واجب لا بد منة
على كل قلب وروح
ولكن تبقى الذكريات سعيدة فى مخيلتك فلا تتركى الحزن يفسد عليك جمال ذكرياتك

ارجعى للقرأن فكرى سيدنا محمد اتعرض لاية وصبر ازاى
فما بالك بهمومنا اللى متتعداش نقطة فى بحر من ما تعرض لة سيد الخلق

ربنا يخفف عنك خلاص وصلتى للعنق يعنى قربتى تطلعى متبصيش لتحت لحسن تقعى تانى

:)
تقبلى مرورى

MǿиY El-Shreef يقول...

بصي ياحببتي

طول ماحنا ف الدنيا دي احنا ف عنق زجاجه

لازم تواجهنا تحديات وظروف نعديها ونبقى اقوى واعلم بالدنيا والي فيها

فـ بلاش المود ده .. كده مش هيحصل غير انك تتعبي

وصدقيني ساعة ماتحسي بحد واحشك بتكوني انتي وحشاه ف نفس اللحظه

ماتزعليش نفسك ياجميله

ميرام يقول...

الاول ازيك
وواحشاني بجد بجد بجد
):
بس ايه اللي حصل
المدونة اتغيرت جذري
كانت بوستاتك كلها امل وتفاؤل واشراقات كده
(:
أغيب عنك شوية يحصل ده كللوو
لا انا من هنا ورايح مرابطة (:
بحس فيكي براءة طفلة بجد
ماتتغيرريش عشان الغلط مش عندك
خلي بالك من نفسك ياجميلة ):

mohamed ghalia يقول...

ليدى
هى الحياة كلها كده حتى بعد التخرج برده فيه عنق زجاجة
المهم تستمتعى بوقتك حتى فى عنق الزجاجة دى
مطولش عليكى ممكن تلاقى إجابة فى البوست الأخير ليا

صمت المشاعر يقول...

ربنا معاكي يارب ويزيح عنك الهم والحزن

moory-mero يقول...

السلام عليكم ورحمة الله وبركاته

موش هقول غير انك وحثتيني خالث مالث ومشو فاهمه اغيب ثويه اجي الاقي الكآبه دي حندكم
بت يا عثل انتي روقي بقى وهاتيلي مثاثه وبحدين يا كميلة انتي ثكل وعثل خالث واي حد يقول غير كده اضلبه عثانك

ده انتي اجمل طفلة يا قمر

يلا بقى موث في وحثتيني يا ميرو :(

في رعاية الله حبيبتي

غير معرف يقول...

سالفل
اللي فهمتة انك عاوزة ترتاحي صح
طيب يا ستنا ارتاحي
ما فيش راحة
بيقول لك
واحد فقير وطلعان عينة ومعاة ربع جنية(أصلها قديمة شوية)ما فيش غيرة
وحالتة زي الطين جعان وعطشان وبردان
لقى واحدة عرافة من اللي بتشوف البخت
بربع جنية قال اطمن واعرف امتى هرتاح
قالت لة هتقعد عشرين سنة في نفس حالتك دي قال لها وبعد كدة هرتاح قالت لة
لا هتتعود
عليكي ربع جنية

مسدس صغير يقول...

ممكن بس مش للأبد
الواحد احيانا يحدف طوب كده فعلا من غير ما يحس..

عاشقه الرومانسيه يقول...

اصعب شعور في الدنيا كلها شعور الفراق لما تفارق ناس بتحبهم وروحك فيهم
******************
اسئلينى انا عن الشعور البشع ده

Nostor Azzuro يقول...

لو كل واحد وهو عايش

عرف المعلومة دى كل الناس هترتاح :

الدنيا فانية والموت قريب جداً

لجين أبو الدهب يقول...

حبيبتى ليدى ..

هى الدنيا كلها كده عبارة عن عنق زجاجة ..

وهاتفضل طول عمرها كده علشان نشتاق للجنة ونبقى كارهنها ..

بس اهم حاجة اننا نخرج من كل عنق زجاجة واحنا ناجحين حتى لو فى شوية انكسار وشوية جروح بس نجحنا ..

ربنا يوفقك وينجحك دنيا واخرة ..

دمتِ بخير ..

كيكى عوووووو يقول...

يالهووووووووووووووووووووووووى
كل دة حصل وانا غايبة
ميييييييييييييييييييييييين يانونتى الى حشرك فى الازازة مش قولتلك متاكليش شيكولاتة كتيررررر
طب استنى بقى هكسرها على نفوخ الى حشرك
*****
نونتى حاسة بيكى ومش عارفة اكلم..وبالذات نهاية البوست!!!
اقولك زر
********
دايما كنت اسمع الناس تقول الى بعيد عن العين بعيد عن القلب
انا دايما بحس عكسهم واقول
الى بعييييييييييد عن العين قريب اوى من القلب
************************
*************************
*****************
الى فات دة شكل قلب حاولى تتخيلى وخلاااااص بقى
امواااااااااة
عووووووووووو

بحب الصراحة والوضوح أوي يا جدعان يقول...

السلام عليكم و رحمة الله و بركاته
يالهوي يا مستهوي
وربنا يابنتي انا هعيط من اللي قريته
ايه ده وليه يابنتي بما اني موش اعرفك ولسه جديده في العالم ده وشكلي اتعقدت وهبطل تدوين قبل مابتدي ههههههههه
مع اني كنت عايزة انعنش البتاعه بتاعتي بدل ما هي خرابة كده ههههههههههه
يلا اقولك حاجه فوكك يابت يا عسل من اللي مزهققك وتعالي نتمرجح في المدونه بتاعتي شويه ولا اقولك تعالي نجري فيها دي حته واسعه وبرحه هههههههههه
وهنسيكي اللي مزعلك
فوكك والله واعملي زيي صاحبي اللي يتصاحب وبيعي اللي ميستاهلش
اقولك انا موش مرتبطه هههههههههه تعالي نربتط
فهمتني غلط كاصحاب يعني هههههههههههه
يلا قولتي ايه
بس مهري غالي

حد يغششني في البتاعه بتاعتي كل يوم اقعد في جوجل اغش شويه هههههههههههههه
ولا عارفه اوصل لحل

حاجه قليلة تمنع اكتئاب بحب الصراحه هههههههه

يلا تعالي هشتناكي نجري سوا يا قمر