محب عمره ما حب !!

شوفتو الاعلان بتاع فودافون بتاع اصحاب بلاس في واحد اسمه محب بيكلم 3 بنات وكل بنت يا حرام فاهمه انه بيحبها
وطبعا هو بيتسلى بالتلاتة , الاعلان تحسوا انه زي نكته او دمه خفيف لكن لما بفكر في فكرة الاعلان وان في شباب فعلا كده بحزن أوي
طب ليه هو انتا معندكش قلب ياللي بتعمل كده ؟؟ ازاي تحب تلاتة وتوهمهم ان كل واحدة فيهم هي فتاة احلامك واللي مش هتقدر تكمل من غيرها وازاي تبقى بتكلم واحدة منهم وتقولها كلام وتقفل معاها وتقول للتانية نفس ذات الكلام طب ليـــــــــــه ؟؟ حد يفهمني؟؟ ايه الاستفادة ؟؟ ليه الشباب متخيلين ان قلوب البنات لعبة ؟؟ يعني هو المطلوب مننا كبنات اننا نقفل على نفسنا ومننزلش نتعلم ومنفتحش النت ونعزل نفسنا عن الدنيا كلها علشان منتجرحش ؟؟ المشكلة ان ال3 بنات دول ممكن يكونو عارفين ان حبيبهم كده وكل واحدة بتمني نفسها انها هي اللي في قلبه وان باقي اللي يعرفهم مجرد اصدقاء وبتصدق كلامه وهي من جواها في حاجة رافضة في حاجة بتقولها فوقي من الوهم اللي جواكي فوقي قبل ما تصحي على بحر احزان تغرقي فيه وتموتي وانتي عايشة
يا ترى ليه الحب بقى وهم وكدبة كبيرة ؟ يا خسارتك يا حب في زمن انعدم فيه الحب والمشاعر البريئة
اسيبكم مع خاطرة كتبتها عن الحب :

لماذا يا قلبي ؟؟
انك تدري ان الحب هو سبب الشقاء
بل هو الشقاء نفسه
ولكنك تعاندني
اسمعني لن ادعك تحب مهما حدث
فلتبقى كما انت بلا ضعف , بلا عناء , بلا حب
اصمت لا نقاش ولا تقول اني قاسية
لأنك تعلم انني لست كذالك
لماذا لا تفهم ؟؟؟!
هل تريد ان ترى دموعي كل ليلة
هل تفضل ان اسهر لأكلم القمر والنجوم عن حببيبي
هل تحب أن يقسو عليا الحب ويجرحني؟
تُرى هل علمت ماذا يفعل الحب بالقلوب؟؟
انه يكسرها ويكويها بنار الشوق واللهفة
ثم سرعان ما تنخمد النيران وتخلف ورائها
رماد الدموع والحسرة والألم والندم
يا قلبي تمهل وتعقل فالحب
الحب مجنون مجنون مجنون
وإذا وجد طريقه اليك
فلن ألوم الا عليك

قليل من اللخبطة وكثير من السعادة

ومازالت اللخبطة مستمرة في حياتي ومش بعرف انام بالليل كويس فين وفين لغاية لما اعرف انام والنوم بيحلى جدا الصبح وقت المحاضرات بتاعت الكلية وافتراضا صحيت وروحت الكلية ببقى مرهقة جدا ولا الاحلام يا عيني ع الاحلام اخر لخبطة وعاملين زحمة يعني انا اعرف ان كل الناس بتحلم حلم واحد في اليوم اما انا بقى فعندي زحمة احلام يعني حلمت امبارح كذا حلم منهم حلمين فاكراهم كويس
اول حلم كنت بكلم صبحتي عالايميل وبتتكلم انجليزي انا فاهمه كلامها بس مش فاهمه هي بتتكلم انجليزي ليه هو مين فينا اللي بيدرس انجليزي ؟ تاني حلم بقى انا مكنتش شايفة فيه ولا سامعه كويس وكنت هعمل حادثة كبيرة اوي لكن الحمد لله شفت الطريق على اخر لحظة
اخدنا في الكورس بتاع العنجليزي النهاردة رواية اسمها الطريق الى الهند طبعا بندرسها بالانجليزي المهم اني اندهشت اوي لما لقيت ان بعض المبادئ اللي اخدناها في التنمية البشرية هي مبادئ موجودة في الهندوسية زي مبدئ ان البشر كلهم كيان واحد مفيش حد فيهم احسن من حد واننا لازم نتقبل الاخر ونحبه لأن كلنا من اصل واحد والكلام ده موجود في الاسلام بس محدش بيدور وبيعرف دينه وبعدين ايه المانع اننا ناخد المفاهيم الجميلة دي ك قيم انسانية ونطبقها في حياتنا طالما مش بتتعارض مع ديننا وتقالدينا
وانا طالعة من الكورس قابلوني بنوتات من المحافظة عاملين حملة للتوعية بالنظافة قالولي انتي من المنطقة هنا قولتلهم لأ قالولي طب قوليلنا اسمك انا في سري هو في ايه ؟؟ ولقيت بنوتة تانيه بتقول للي معاها يا ستي ادهوملها وخلاص ؟؟ نعم؟؟ لقيت واحدة منهم طلعت شنط سودة وقالتلي اسمك ايه ؟؟ انا : ليدي بريييييييييييييئة معملتش حاجة يا لهوي اه ياااااانا
قالولي طب عايزين اسم جيرانك كمان ؟؟؟ وخديلهم معاكي دول وادولي شنط سودة علشان القمامة وروحت للكتكوتة وانا متنحة ومندهشة لانهم مقالوليش اي معلومات عنهم المهم ماما كانت مستنياني ولقيت معاها اكياس من دي برضه وقالتلي هما قابلوكي انتي كمان جبتي لمين قولت لماما لينا انا مكنتش هاخدهم لولا اصرارهم الغريب ماما بصت للشنط وقالتلي ما استحق ان يولد من عاش لنفسه فقط عارفين الايموشن بتاع الياهو اللي بيوقع من كتر الضحك انا عملت كده برضه اصل الموقف كان غريب بصراحة يعني هما كسلانين يطلعو البيوت وبيوزعوا الاكياس على الناس اللي ماشيين في الشارع
وبعدين فأجه ماشية في الشارع وطالعة من مفرق لقيت شاب راكب موتوسيكل واقف قدام العربية بيقول اه خبطتني اه وانا مجيتش جنبه اساسا واتخضيت حتة خضة وفجأه لقيت اللي فطسان من الضحك عارفين طلع مين طلع احمد ابن عمي دايما بيحب يعمل المقالب البايخة دي فيا
اما عن اليومين اللي فاتو فحصللي حاجات جميلة برضه منها امبارح كان في طفل عنده 3 سنين مش بيمسك ايد حد وبيحب يجري المهم روحت جنبه ومسكت ايده فمسك ايدي ومشينا نغني سوى واطفال تانيين كنا بنزورهم عندهم في البيت ف وهما بيستقبلونا حضنوني حتة حضن وقالولي بنحبك اوي يا طنط يااااااه بحب اسمع يا طنط دي من الاطفال وبحب اوي اسمع اسمي من الاطفال بحس ان اسمي جميل اوي لما بيقولوه
برضه بحاول ابص للجانب الايجابي وانسى اي حاجة مضايقاني وانسى ان الامتحان باقي عليه شهر بس يا رب أأقدر اطلع من الدوامة دي
نفسي طاقتي الايجابية ترجع تاني لان البطارية فضيت جدا

الحوار علينا حق :)

نايمة امبارح بحلم بالحوار بتاعي مع اسماء وكالعادة بدور على الجريدة مش لاقياها وفضلت ادور وامشي من محل جرايد لسوبر ماركت وبرضه مش لاقيه الجريدة المهم صحيت من النوم وقولت ان ده كان حلم وراح انساه وارتااااااح ان شاء الله هلاقي الجريدة وماما كانت بتصحيني كل 5 ثواني لغاية لما قمت من النوم غصب عني اهيء اهيء اهيء ونزلت مع ماما وروحت طريق مش طريق الكلية اصلا علشان اجيب الجريدة , وفعلا نزلت سالت على الجريدة ولقيتها هيييييييييه وجبت 3 نسخ وماما دورت على باب المدونخانة وجابت الحوار ولقيتها بتضحك فسألتها : بتضحكي على ايه يا ماما قالتلي اسماء حاطة صورة شوية اطفال حلوين وماما ربنا يخليها ليا ويكرمها قرأتلي الحوار وانا ماشية بالكتكوتة وبعدين طلعت ع الكلية وللأسف لحقت سكشن الترجمة من اوله
وطول السكشن عايزة اقرا الجرنال ومش هينفع انا قاعدة في الاول والمعيدة بتركز عليا في السكشن ده مش عارفة ليه المهم شوية وطلعنا علشان الفرنساوي حبيبي حبيبي مدرستوش في ثانوي فنطلي في الكلية ترجمة وجرامير وكلام يطير النوفوخ وارفع رأسك يا اخي لم يمضي عصر الفرنساوي بعد
الغريب ان اوائل الدفعة معاهم الفرنساوي وانا طبعا منهم :) بس انا اوائل من الاخر لأ وايه والافظع من كده ان في ناس خلصت كلية ولسه قاعدين عالفرنساوي بس , والافظع كمان ان في ناس شايلين مادة الفرنساوي بتاعت اولى وتانيه يعني هيمتحنوا امتحانين وبيدرسوا منهجين لنفس ذات المادة المهم دخلت المدرج وانا عاصرة على نفسي فدان لمون مع نص الدفعة بتاعت تالتة ومعظم دفعة تانيه وبعدين ركزت على التنفس علشان التنفس بطريقة معينة بيهدي الاعصاب بالطريقة دي ناخد نفس شهيق عميق والزفير نطلعه من الرئتين شوية شوية شوية ببطئ على رأي المستر وركزت على مبدأين بيهدوا النفسوية وفضلت اكرر جوه نفسي لليوم فقط لا تغضب لليوم فقط لا تغضب انا هاااااااااادية جدا وباردة جدا وبعدين ده تحدي وان شاء الله هنجح فيه
والضاكتور ده جزء من الكيان الواحد بتاع البشر مش انا اللي هاحسبه على ظلمه لطلابه
ربنا اللي هيحاسبه مش هو كان بيشتم في الكلية وطلابها اهي بنته دخلت نفس ذات الكلية يمهل ولا يهمل المهم بعد المحاضرة لقيت بنوتة زميلتي قاعدة في الركن البعيد الهادي وعماله تسمع في اغاني م اللي بتوجع القلب وتفقع المرارة – جديد اللي انتا بتقوله بجد طريقة مختلفة برافو قدرت تخدعني وخانني ذكائي معترفة , كان عندي سلامة نية مكنتش اصدق تلعب بيا بس انتا دخلت عليا رسمت الطيبة مع الحنية مكنش عندي شك ثانية ان في ناس كده في الدنياااا في ناس في الغش محترفة بجد طريقة مختلفة – وشوية وشغلت لو اذيتو انا لو اذيتو كان عملي زيادة عن كده ايه , ده مشفش غير حنية مني مشفش غير الخير وانا لو قاتلو حد اسهل من كده بكتير خايف لا يعرف قيمة اللي ف ايده لما يروح _ وكوكتيل كأبه قاعد قدامي قولتلها ياااااه كل ده من الفرنساوي معلش يا اوختشي معلش انا قولت مستحيل اسيبك لواحدك في الفرنساوي وجيت معاكي احسن تضلي الطريق ولا حاجة بس اعملي حسابك السنة دي ان شاء الله لا ممكن تنزل الارض ابدا فضحكت قولتلها ايوة كده روقي وسيبك من اي حاجة وبصي للجانب الايجابي للمشكلة العاطشيفية اللي انتي عايشاها دي قالتلي سمعته بوداني بيقول لصاحبتي نفس كلام اللي بيقوله ليا قولتلها ازاي يعني ما يمكن فاكر انه بيكلمك قالتلي لأ قالتلو في بداية المكالمة انا فلانة وعندي برنامج بيسجل المكالمات سمعت مكالمتهم والنهاردة لقيت رقمه في تليفونها تخيلي واغرورقت عينتينها بالدموع قولتلها برضه ربنا بيحبك عرفك انه مش مناسب ليكي وعايش دور كازنوفا ودون جوان وحتى لو اتجوزتو مكنتيش هتحسي معاه بالأمان وكل شوية كنتي هتنجرحي فمن دلوقتي احسن _ ده يوم بدري يريحني وانا بنساه ومش يمكن لو انا كملت اعيش ندمان_ مش حماقي بيقول كده ولا ايه اما بالنوسبة لصابحتك ربنا عرفك انها مش صاحبتك ومش امينة على صداقتكم وداين تدان روقي بقى واطلعي من مود في ايه بينك وبينها بتاع امال ماهر ده قالتلي ريحتي قلبي شوية ربنا يريح قلبك قولتلها ماشي يا قمر مش عارفة دي دعوة ليا ولا عليا اصل لو قلبي ارتاح هموت ههههههههههه سلام واشوفك على خير يوم السبت ان شاء الله
وروحت للكتكوتة فتحت الراديو لقيت تامر يا حوستي بيقول هغني لكل واحد حبيبتو رايحه منو واقوله الجرح واحد قلوبنا شاربه منه وانا الحقيقة بحب الاغنية دي وبعدما خلصت الاغنية جت اغنية تامر تاسوع هو انتا مين بيصدقك علشان عايزني اصدقك وارجع واسامحك من جديد من تاني وارجع اعشقك ........_ قولت يا خبر يوم اغاني الخيانة العالمي ههههههه هما عملو احتفال من ورايا ولا ايه
ونطلع من الرغي ده بحاجتين اول حاجة اني مزقططة وفرحانة بالحوار وبصراحة بقى حاجة مهمة حصلت في حياتي
واني اتكلت على خالتو تجيبلي نسخ من الجورنال ومجبتش فالحمد لله اني لقيت الجريدة هيييييييييه
شكرا يا اسماء بجد على الكلام الجميل اللي كتبتيه عني ربنا يكرمك
تاني حاجة خلينا نبقى متفائلين بالخير لأن فعلا لما بنتفائل بالخير بيحصل وصدقت المقولة بتاعت حياتك من صنع أفكارك تخليها حلوة تبقى حياتك حلوة تخليها وحشة تبقى حياطك مطينة بطين :)

شخبط شخابيط لخبط لخابيط

*اغنية عن التنمية البشرية سمعتها لما كنت في الكورس في فيديو لحفلة استلام الشهادات بتاعت مستر اسلام والاغنية دي كلماتها عمالة تتكرر وشغالة في دماغي زي ما بيقولو وكأني مشغلاها سي دي , الحقيقة كلمات الاغنية دي حماسية جدا واللي كان بيغنيها وكاتب كلماتها طلع وغنى في حلقات من برنامج دكتور ابراهيم الفقي اللي كان على قناة عين هو اسمه احمد تقريبا وصوته بسم الله ما شاء الله رائع واحساسه كمان بالاغاني اللي بيغنيها بيوصلك اوي وانتا بتسمعه ومن كلمات الاغنية على ما اتذكر يعني : مشوار الالف ميل تمشية لكن تلقى نهايته بتقرب , متقولش موش قادر حاول اوي وعافر

*انا حاسة ببعض اللخبطة في حياتي ومش هقول ان حياتي كلها ملخبطة لكن فيها بعض اللخبطة عارفين لما طفلة تتوه في حديقة كبييييييييرة اوي اهو انا حاسة بنفس ذات الاحساس بس مش خايفة على اد ما انا متلخبطة وحاسة اني مش فاهمه كتير من اللي حواليا

*عارفين احساس لما تكونو ماشيين مع حد في طريق واحد وفرحانين جدا وانتوا مع بعض وبعدين كل شوية تحسو ان الطريق الواحد بقى طريقين لأن كلامكم بيتفسر وبيتفهم غلط وكل كلمة الانسان ده يقولهالك تحس انك بتبعد اكتر وتمشي في طريق لواحدك اكتر وفي نفس الوقت متقدرش تروح للطريق اللي كنتو ماشيين فيه سوى تاني ؟؟

*انك تتوهم الجنة والنار والحساب والصراط اصعب تجربة ممكن الانسان يتعرضلها في حياته وده كان تمرين من التمرينات اللي اخدناها في الكورس ولما فتحنا عنينا لأننا بنقفل عنينا علشان نتوهم او نتخيل لقيت ان كلنا عيطنا وبكينا بلا استثناء حتى الشاب اللي كان معانا في المجموعة بكى معانا وفي بنوتة مستحملتش تكمل باقي الكورس ومشيت بعد التمرين متتخيلوش اد ايه الموقف صعب وده وهم ما بالكم بالحقيقة يا الله انك عفو تحب العفو فاعفو عنا
انا كنت مطمئنة في وقت كبير من التجربة مش لأني معنديش ذنوب مفيش انسان معندوش ذنوب لكن لاني متأكده ان ربنا سبحانه وتعالى رحمان ورحيم وخلقنا علشان بيحبنا مش خلقنا علشان يعذبنا لكن برضه قلبي رق وبكيت في جزء كبير من التمرين او التجربة


*خلصت الكورس بتاع التنمية البشرية واخدت الشهادة بس عندي احساس قوي ان مش دي النهاية واني ان شاء الله هكمل دراسة في المجال ده لأني حبيت الدراسة دي جدا بالرغم اني بحس انها احيانا بتجيب هسهس , الكورس اللي نجحت فيه واجتازته اسمه :
HUMAN ENERGY AND SECRETS OF INNER PEACE
او الطاقة البشرية وأسرار السلام الداخلي

حاجة جميلة جدا حصلت معايا النهاردة افتكرتها دلوقتي وانا بكتب البوست , بصيت في السما وكانت في طيور صغنونة بتتطير بشكل منظم وجميل جدا والطيور كلها مع بعضيها كونت شكل قلب 3 مرات ( ايه الرومانسية دي :)

ومهما نتعب نقول تعب الحبيب راحة

حاسة اني انسانة جديدة اول مرة اعرفها بجد
حاسة ان شمس حياتي بتشرق
حاسة اني مولودة من جديد
حاسة اني قوية بالله لأن فيا نفخه من روحه سبحانه وتعالى وحاسة اني ضعيفة لله لأني في النهاية انسانة
حاسة بقيمة الحياة بشكل رهيب لدرجة اني حاسة اني كنت ميتة قبل كده
حاسة ان ربنا سبحانه وتعالى بيحبني اوي وفضلني على كثير من عباده
حاسة اني اتعلمت حاجة عظيمة
حاسة بفرحة ان اخيرا شوفت البيبي دودو بنت عمي النهارده لأني من بداية الكورس وانا موش فاضية حتى اكتب في المدونة عارفين احساس انك تشيل بيبي لسه مولود وبشرته ناعمه ولسه جميل زي النبته الخضرا الصغنونة
بجد عن نفسي حسيته احساس رائع
حاسة بالامتنان لربنا سبحانه وتعالى انه وفقني لكورس

الHuman Resource

او التنمية البشرية
وحاسة بالامتنان لمستر اسلام انه علمنا ومبخلش علينا بأي معلومات سألناه عنها
وحاسة بالحب ناحية الجروب اللي قضيت معاهم 4 ايام كانو من اجمل ايام عمري بالرغم من الارهاق او الحزن اللي كنت بحس بيه احيانا
وحاسة ب شجن شوية وعليهم شوية حزن واستئكاب علشان اخر يوم في الكورس بكرة ان شاء الله

وحاسة بفرحة اني درست حاجة بحبها وهخلصها بكرة ان شاء الله
حاسة ان معظم البنوتات اللي هناك بقو قريبين مني بجد هفتقدهم جدا بس هي دي الحياة محطات بنقابل ناس ونودع ناس ولا ننسى اعز الناس حبايبنا ( قلبت على عبد الحليم حافظ :)
فكرت النهاردة في موضوع الفراق ده وكنت ماشية في الشارع في طريق طويل وفي ناس ماشيين وانا بعدي من جنب الناس ناس تسبقني وناس تدخل شوارع جانبيه وناس تركب مواصلات يعني الحياة مش على حال واحد
صحيح كلنا في نفس ذات الشارع لكن كل واحد ليه طريقه اللي رايحه وليه حياته
وانا راجعه امبارح من الكورس سمعت اغنية لفرقة المصريين منها مقطع بيقول ومهما نتعب نقول تعب الحبيب راحة
وانا بتعب كل التعب ده علشان حبيب واحد بس حسيت بحبه من اول يوم في عمري وامنت بالحب ده ولمسته في كل حياتي الحبيب ده هو الله سبحانه وتعالى

واخيرا حاسة بكل الحب والامتنان والعرفان بالجميل ومشاعر تانيه حلوة متلخبطة على بعضيها تجاه مامتي وبابايا
حاسة اوي دلوقتي بكلمات اغنية براين ادامز
Bryan Adams Here I am
Here I am This is me

There's nowhere else on earth I'd rather be

Here I am It's just me and you

Tonight we make our dreams come true

It's a new world

It's a new start

It's alive with the beating of young hearts

It's a new day

It's a new plan

I've been waiting for you

Here I am

Here we are

We've just begun

And after all this time

Our time has come

Yeah here we are Still goin' strong

Right here in the place

where we belong

Oh it's a new world

It's a new start

It's alive with the beating of young hearts

It's a new day

It's a new plan

I've been waiting for you

Here I am

الحمد لله مبتهجة يا رب دايما

التنمية البشرية والسلام الداخلي

خير اللهم اجعله خير قررت أخد كورس في التنمية البشرية
الكورس لمدة 6 ايام و6 ساعات في اليوم والنهاردة كان اول يوم
طبعا في الاول كنت متوترة وحاسة اني وحيدة وغريبة ولسه مكنتش اعرف حد بس اثناء وبعد الكورس الشعور ده اتبدل تماما واتحول لسكينة وطمئنينة وهدوء داخلي
وبعدين في الاول المستر قاللي ان في ساعة تعارف
قولت في سري لو كنت اعرف ان في ساعة تعارف مكنتش جيت اهيء اهيء اهيء ليه بقى لأني كنت انطوائية نوعا ما متواتوروناش يا ناس على رأي كرومبو :)
المهم بدأنا الكورس ومستر إسلام عبد اللطيف رحب بينا وبدأنا نتعرف على الجروب احنا حوالي 12متدرب في المجموعة
الاسئلة في الاول كانت الاسم والشغل او الدراسة وليه اخترنا ندرس الكورس واهم انجاز انجزناه
المهم فضلت افكر وافكر ايه الانجاز اللي انجزته عارفين قولت ايه؟؟ قولت ان عندي مدونة عالانترنت والمدونة محبوبة وانا بكتب فيها واسلوب الكتابة بتاعي اتطور وده اهم انجاز دي الحاجة اللي جت في بالي وقتها , لقيت الكلام ده طالع من قلبي مش بقوله علشان اجي اقولكم اني قولت كده في الكورس ومش بقوله علشان اتمنظر ان عندي مدونة بقول كده علشان فعلا حاسة بكده

ولما كنت بقول اني بحبكم في الله كان احساسي بجد لكن بعد الكورس حسيت بالمعنى ده جدا وبجد بحبكو في الله وكان نفسي تكونو معايا النهاردة في الكورس علشان نستفيد كلنا

اخدنا حاجات كتير مفيدة جدا والحمد لله استفدت جدا جدا من اول محاضرة في الكورس

الحقيقة الكورس كله مهم لكن اكتر حاجة حبيتها بجد هو تقبل نفسي زي ما هي لان الانسان عبارة عن روح حولها جسد , اذا الروح اهم من الجسد وكمان لأن روح كل انسان جميلة جدا لأنها نفخة من روح الله سبحانه وتعالى وان احنا كلنا كيان واحد
وفي واجب المستر قال لنا عليه وبصراحة الواجب ده عجبني جدا واتمنى انكم تعملوه معايا
الواجب ده ركعتين توبة بيبقو قبل النوم يعني ركعتين ب نية التوبة والركعتين دول بيعملو راحة داخليه ولو حد بيعاني من الارق مع الركعتين يحاول يقرأ صفحة من القرأن الكريم مع التسبيح
وبجد الصلاة قرة العين لما نفهمها ونفهم انها روحانيه وبتنعش وتنظف الروح وتطمئن القلب هنحبها اوي وهنواظب عليها

شكرا يا مستر اسلام لأنك وافقت اني اكتب عن الكورس في مدونتي المتواضعة
وللحديث بقية ما دام في العمر بقية .....

تأملات

كانت سجينة لأحلام وردية جميلة كانت تحلم وتحلم ثم تبتسم ابتسامة يفرح لها كل شيء حتى النجوم في السماء كانت تزداد تألقا ولمعانا من جمال ابتسامتها
فحينما كانت في الجامعة كانت تتخيل ان حبيبها الخيالي سيدخل من باب المدرج لكي يشجعها ويخبرها كم يحبها ويحمل في يدية باقة من الورود الجميلة يعطيها لها ويخبرها انها في باله دائما وانها اميرة قلبه
كانت حينما تطهي الطعام تفكر في حبيبها وتتخيل انه عاد من عمله ليدخل الى المنزل ويحمل معه فاكهه تحبها ويقول لها كنت بفكر فيكي فجبتلك الفاكهة اللي بتحبيها فتقول له ربنا ميحرمنيش منك يا حبيبي وانا كمان عملتلك الاكل اللي بتحبه
كانت تستمع للأغاني الرومانسية وتتخيله معها يغني لها كلمات الاغاني الحالمة الرقيقة فتطير معه وتحلق وتبتعد عن دنيا الأحزان
كانت تتمنى ان ترتدي فستان الفرح وتراه ببدلة الفرح فيراها اجمل اميرة وتراه اجمل ملاك
كانت تتمنى ان ترقص سلو معه فيُحلقان بين السحاب والنجوم في جو مليء بالرومانسية والدفء والحب
وحينما كانت تبكي كانت تتخيله يمسح دموعها ويسمعها , تشكي له الامها فيخفف عنها ويضمها فتشعر انها طفلة مدللة بين احضانه
كانت تتخيله معها في كل وقت وحين
كانت تحبه بجنون بالرغم من انها لا تعرفه لكن كانت تعشقه عملا بالمقولة عمري ما شوفته ولا قابلته وياما ياما شاغلني طيفه كانت تحلم وتمني نفسها الى ان
الى ان انهارت احلامها الوردية وذبلت الزهور واصبحت سوداء
كانت تناديه بجنون
اين انت افتقدتك تعالى الي فلقد طالت وحدتي وحزني
اين انت لماذا تأخرت اشتقت اليك
اين انت اراك في احلامي تشكو من الوحدة والحزن فلماذا لا تأتي لكي تتبد الوحدة والاحزان
وانتظرت وانتظرت وانتظرت الى ان سئمت الانتظار وذاقت المرار وادركت ان ما تحلم بيه كان مستحيل
فلقد تبدد الحنان وقتل الحب وذهبت الرحمة الى غياهب النسيان
وماتت المسكينة قبل ان يتحقق حلمها رحمها الله ورحم كثيرات مازالو يعيشون في نفس الوهم

لولولولولولي

السلام عليكم ورحمة الله وبركاته

اولا كل سنة و انتو طيبين بمناسبة المولد النبوي

*******************************************

1-انا خت الاعدادية بعديها الثانوية وصبحت جامعية وفاضلي ع التخرج مش اكتر من سنة لولولولولولولولي _ ربنا يستر وميبقوش اكتر من سنة عاااااااااااااا _ من اغنية دقو الشماسي لحليم

2- عدى النهاااااار والمغربية جاية تتخبى ورى ضهر الشجر وعشان نتوه في السكة شااااالت من لياااالينا القمر _ اه يا ايام صعبة من غير قمر اهيء اهيء اهيء_ من كلمات الابنودي وغناء حليم

3- ماشيه ع الطريق السريع وخير اللهم اجعله خير بعدي وبتجاوز مقطورة كبييييييييره ولما وصلت لنص المقطورة يعني نص المقطورة كان ماشي جنبي لقيت السواق بتاع المقطورة بيحود على عربيتنا وجاتلي هيستيريا وحطيت ايدي على الكلاكس بيييييييييييييييب بييييييييييييب بيييييييييييييييييييييييييييييييييييييييب ولما عدينا من المقطورة قولت لماما المقطورة كانت هتدوسنا يا ماما شوفتي الهنا اللي احنا فيه لولولولولولولي

4- لسه شهر على الامتحانات ومفيش الا 3 كتب اللي نزلو بس وانا مش عارفة اذاكر اييييييييي حااااااااااجة لولولولولولي غطوني وصوتو

5- ادلع يا عريس يا ابو لاسة نايلون ادلع يا عريس وعروستك نايلون شوفت الست امو فاروق هاي هاي شالت بقعة البرقوق هاي هاي اريال غسلتلي هدومي لا نقع ولا غليا _ اغنية شوعبية من اعلان اريال القديم بتيجي على بالي كتير اليومين دول_

6 - عيني بتوجعني من ايه عيني بتوجعني من ايه م الينسز اللي كنت لابساها امباااااارح نيااهاهاهاهاهاها _ اغنية شوعبية تانية انا الفت كلام فيها علشان مش عارفة الاغنية الاصلية _

7- اللي عايز يتعاقب وعربيته تدشدش وتتفشفش وتتبعتر وتتكسر ويتعصب ويتعفرت ويتبهدل ويتنيل يروووووح المحلة

المحلة طريقها مزفت بستين نيلة

8- مش انا اتمسكت بالحزام تلبس زي ما ابو علي قاللي على اساس ان الحزام ده حشيش مثلا ولا مخضروات قال ايه لجنة في المحلة ماشيين فعمين الشرطة وقفنا وقاللي الرخصة , ماما طلعت الرخصة وبعدين سأل على رخصة العربية قولتله والله بتاعتنا وشاف رخصة العربية وبعدين قاللي انتي مش لابسه الحزام ليه قولتله اصله بيضايقني ومش بعرف اتنفس منه وانا بجد مكدبتش كان عندي برد والحزام بحس انه بيكتفني اصلا بكررررررررهك يا حزاااااااااام بكرررررررهك يا حزاااااااام يا حزااااااااام بكرهك

وعمين الشرطة قاللي ع العموم المخالفة بخمسين جنية بس .......... وتكملة النقط دي بس انا هاخد 20 بس وطبعا هو مقالش كده ووالله لو كان قال كده كنت هدفع المخالفة احسن من الرشوة المهم مشيت ومدفعتش حاجة لولولولولولي

9- زكي يا زكي يا زكي زكي يا زكي

زكي يا زكي يا زكي زكي يا زكي لولولولولولي

هو فين الزكي ده؟؟ باشا باشا باشا باشا

حبيبي مالو مااااااالو يا هووووووووووودا _هدى_

خطفنيييي يااااالهووي كسفني يالهووووووووووووووي

الاغنية دي بفتكرها مرتين مرة وانا داخلة محاضرة داكتور زكي وهو بيشرح الشعر

ومرة تانية لما بغنيها مع خالتو ونقول يالهووووي مع بعض هع هع هع هع

خير خير دلق القهوة عالمدونة خير لولولولولولولي

فلسفة القرن التمناشر

مذاكرة ايه بس اعوذ بالله أنا اذاكر برضه ؟؟

بس الشيت اللي عليه 5 درجات ولازم يتحل ده اعمل فيه ايه اعمل فيييييييه ايه؟؟ ده فات اسبوووووع وشوية وهو معااايا ولسه اسبوع ويتسلم وبعدين ما العمل ؟؟وماذا أقول وقلمي حائر بين السطووور

ايووووووووة كده الكتاب اهو ايوة الموضوع بيتكلم عن الفلسفة في بريطانيا في القرن التمناشر

هيييييي دي الصفحة , تمام هو ده اول سطر كويس اول سطر بيتكلم عن تعريف الفلسفة حلووووووو

ايوة وتاني سطر , تاني سطر , تاااااني سطر بيتكلم عن عن عن عن ايييييييييييييييه انا مش فاااااااهمه حاجة

تالت سطر ( عنين مبرقة وخارجة لبره مع وش عامل انه فاهم بس مش فاهم ايييييييييي حاااااااجة)

كح كح كح كح يقطع الحشيش وسنينه هغير الصنف _ البرد ده مشكلــــــــــة بيخللي الواحد يكح زي بتوع الحشيش وبتوع الحشيش هما الارانب لأن الارانب هما اللي بياكلو الحشيش

باي باااااااي يا كتااااااب فلتذهب الى الشفيح قال كالتشر قال يا عم روووووووووح

اهلا اهلا بالتلافزيون وكمان فيلم رومانسي يا سلاااااام يعني الحب الحب

طيب احسن حاجة اروح اناااااام سلام خخخخخخخخخ فششششششش خخخخخخخخخ فشششششششش نياهاهاهاهاهاهاها

كلام في كلام

بيب بيب زمالك بيب بيب زمالك

زمااااااااااالك زمااااااااااااااالك اوه اوه زمااااااااااااالك زمااااااااااالك اوه اوه

زمالك يا هندسة لعب وفن مدرسة (وش بيطلع لسانه)

مبروووووووك للزمالك فوزهم على انبي امبارح واحد صفر لولولولولولولي

*************************************************

كان نفسي اكون معاكو امبارح في حفلة توقيع انا انثى عاااااااااااااااااااااااااا

بزمتكو الحفلة كان ليها طعم من غيري :)؟؟ طبعا كانت حلوة بكل اللي حضروها حتى لو انا محضرتش عااااااااااا

اصل بعيد عنكو انا والكمبيوتر والفشفوشة عيينا في يوم واحد انا جالي انفل وزا والكمبيوتر اتفيرس والفشفوشة تعبت نفسويا ويوم الثلاثاء بالذات مكنتش هقدر اسافر علشان البرد كان شادد حيله عندي ع الاخر وكنت ماشية اقول اااااااااه اهيييييييين يعني مش اه واحدة بس لأ دول 2 اه وبعدين فضلت اهييس طول اليوم وعايزة اسافر واحضر الحفلة بس مش قادرة ولما جه الوقت من 6 لغاية 9 كنت بقول لماما زمان المدونين دلوقتي فرحانين في الحفلة كان نفسي اكون معاااااااااهم عااااااااااا وبعدين حتى لو مكنتش تعبانة وجيت القاهرة من رابع المستحيلات اني ادخل بالفشفوشة جوه القاهرة العامرة هي ايوة فشفوشة لكن في القاهرة ممكن اوي تبقى فتفوتة وانا مش عايزاها توصل للمرحلة دي وعدى اليوم ومروحتش المرة دي بس اعملو حسابكو المرة الجاية ان شاء الله هحضر لو كنت في مصر وعلى فكرة يا كيارا انا كده هغتالك لأنك بتغيظيني وكاتبة عن الحفلة ف خدي بالك على نفسك بقى واحترسي من الشوريرة نياهاهاهاهاهاها

تبعا تبعا ال4 في واحد بتوع البوست اللي فات بقو صفر في واحد لأني مروحتش الكلية ومعملتش اي حاجة من 3 ايام وادي جزات اللي ميسمعشي كلمة ماما تقولها مامتي حبيبتي قالتلي الجو برد مش مهم محاضرة النهاردة قولت لماما لأاااا نو نو نو هنزل كليتي حبيبتي اهو بسبب محاضرة نزلتها في عز البرد اخدت برد و ضيعت 4 محاضرات وعليهم 2 كورس هدية

مش انا النهاردة ركبت ميكروباص ايووووووون ميكروباص يااااااه بقالي سنة تقريبا مركبتش ميكروباص بس ايه ده ايه الاحساس ده , احساس ان الواحد طاير واحساس الخارجين على القانون نياهاهاها الميكروباص كان بيعمل كل حاجة غلط مروريا ومع ذلك كنت مستمتعة بالركوب في الميكروباص اخيرا ببص براحتي على المحلات والفتارين والناس اللي رايحين واللي جايين يااااااااه ومفيش عصبية وخنقة من المتوسيكلات ولا الميكروباصات ولا الطريق المكسر ولا بتنرفز على حد والحياة كميلة وحبيت اتأمل بقى , تأملت في العربيات اللي ماشية لقيت ان معظم العربيات مخبوطة ده حتى في كتير منهم مخبوط خبطات صعبة يعني مش انا لوحدي بس اللي بعمل حوادث الحمد لله انها بتيجي على اد كده وبعدين لقيت بنوتة ماشية بالكتكوتة بتاعتها فكرتني بيا لما بكون قافلة الازاز ومشغلة الmp4 ومعلياه وعايشة في جو تاني وخصوصا وانا مضايقة ومخنوقة ومش بفتح الازاز حاليا الا في التقاطعات علشان اسمع التنبيه لو في عربية جايه

شوفت الكليب بتاع حماقي بتاع اغنية وافتكرت عجبتني فكرة التلج اللي في الكليب والمزة اللي في الكليب نياهاهاهاها اذا كانت هي عنيها زرقا فأنا كمان لما احب اخلي عيني زرقا بخليها زرقا هههههههههههه بس اللي معجبنيش تصوير الكليب ككل كان ممكن فكرته تبقى احلى من كده وطبعا كلمات الرائع أيمن بهجت قمر مع اني بكره اغنية ناويها اللي هو برضه كاتبها بش بجد كلمات اغانيه جميييييييييييله

شوفت كمان بريطانيا حووولمــــــــــي الكابيـــــــــــــــــر شوفتها في التلفزيون تبعا تبعا في برنامج كرافان والضيف كان الممثل الفوق الفزيع احمد عز طلع زومل معاه ليسانس اداب انجليش برضه ربنا يوعدني واخد الليسانس انا كمان

يلا سلام كفاية رغي كده

انتي جاية اشتغلي ايه ؟؟

انا بقيت الحمد لله 4 في واحد يعني احسن من الشامبو والبلسم كمان :)

الصبح طالبة جامعية كل وظيفتها انها تاخد المحاضرات وتدور على العميد تصدقو محدش من الطلبة يعرف شكل العميد ده اصلا

بقالي يومين بدور عليه ومش لاقياه _ وسمعني اغنية من حق العميد يدلع _

وبعد الكلية المفترية ببقى مودلسة ايون ببقى بعيد عنكو مدرسة انجليزي ولسه مفرحتش بكلمة ميس نونا لأن ببساطة العيال ولاد عمي بيندهولي بإسمي عااااااااااا وكمان طنط مرات عمي عايزة تجيبلي اطفال تانيين علشان ادرسلهم انجليش علشان انا قال ايه مودلسة شاطرة _ ربنا يستر والاطفال الحلوين ميخذلونيش ويجيبو درجة حلوة في الانجليش_ وعلشان بس امنع الأر ده عمل تطوعي يعني محدش يقوللي المرتب النص بالنص :)

وبعدين ببقى سواقة اي بسوق السيارة لما اروح الكلية او اخرج مع ماما واحيانا بوصل قرايبيننا او جاراتنا لدرجة اني احيانا بحس ان عربيتنا ميكروباص مش ملاكي ودي حاجة اتعلمتها من بابا ان يكون عندي ايثار شوية

اما في اوقات كتير من اليوم ببقى مدونة مركزة في التدوين وقابعة امام شاشة الكمبيوتر بتابع مدونتي اللي هي جزء من كياني وحياتي وبتابع المدونات اللي في المفضلة وبشوف مدونات جديدة

ولو في وقت بقرأ كتب دينية وكتب كوميدية ساخرة وكمان تنمية بشرية

ومن الرغي ده كله نستفيد ايه؟؟

قال رسول الله صلى الله عليه وسلم : « اغتنم خمسا قبل خمس: شبابك قبل هرمك، وصحتك قبل سقمك، وغناك قبل فقرك، وفراغك قبل شغلك، وحياتك قبل موتك » بجد نصائح عظيمة جدا ولازم فعلا ننتهز كل الفرص دي ونعمل الخير ونساعد نفسنا ونساعد الناس

وقال رسول الله صلى الله عليه وسلم: (من كان له فضل ظهر فليعد به على من لا ظهر له، ومن كان عنده فضل زاد فليعد به على من لا زاد له) ويا سلام لو كل حد خالف نفسه _ لأن النفس طبعها البخل شوية_ وعمل كده مكنش حد تعب قي دنيته