الجمعة، 30 يناير 2009

زيارة لطبيب الأنف والأذن وكمان الحنجرة

بصينا على اللوحة اللي مكتوب عليها اسم الدكتور بتاع الانف والاذن والحنجرة ومكتوب عليها استشاري انف واذن
وحنجرة فقلت لماما ايه ده يا ماما ده الدكتور طلع استشاري مش دكتور يعني الناس بيستشيروه بس عااااا وماما قالتلي (والله مش فاكرة قالتلي ايه) المهم يعني عرفتني ان استشاري دي حاجة كويسة يعني وبعدين راعوا اني مكنتش بسمع كويس وقتها يعني (وداني كانت مسدودة فهفتكر ازاي)
المهم طلعنا العيادة في الدور التاني وكانت العيادة بسم الله ما شاء الله زحمة لدرجة ان كان في واحد واقف عالسلم
دخلنا العيادة وماما قعدت ومكنش في مكان اقعد فيه الا كرسي كان بتاع الممرضة اللي في العيادة المهم طلعت الممرضة من اوضة الكشف
وماما دفعت كشفين ليها وليا (ماما عندها نزلة انفل وزا جامدة ربنا يشفيكي يا مامتي يا حبيبتي) انا السابقون ومامتي اللاحقون والممرضة سألتني على الاسماء قلتلها اسم مامتي واسمي قالتلي على اسمي مدام ليدي وعلى اسم مامتي انسة قولتلها العكس بس اهي بشرة خير برضه :) مش عارفة تفائلت ليه

المهم شوية كده وسألت الممرضة

انا : هو احنا هندخل امتى؟؟
الممرضة : بعد 5 كشوفات ان شاء الله
انا : وده من ايه علشان الحسد ولا ايه
الممرضة : ههههههههههه لا والله هي جت كده
ومرت ربع ساعة واحنا قاعدييييييييييين وناس داخله وناس خارجه
ومر نص ساعة واحنا برضه قاعدييييييييين

انا : الممرضة تقريبا قصدها خمس كشوفات في خمسه
ماما : هما فعلا خمس كشوفات اللي دخلوا والباقي استشارة

وفي خلال النص ساعة كان في بنتين مايعين قاعدين يتكلموا ويضحكوا بصوت عالي وانا مش طايقة نفسي من كتر الصداع اللي عندي ونفسي اقولهم بجد انتو معندكوش دم احنا في عيادة مش في نادي المهم مسكت نفسي وقولت بلاش مشاكل اصبر على بنتين السو يا يكشفو يا تجيلهم ............ تاخدهم واخيرا جت لبنت منهم مكالمة تليفون من باباها وفضل يزعقلها وانا في سري مش شمتانة بس بصراحة كنت فرحانه فيها علشان تستاهل وبعدها على طول دخلوا كشفوا ومشيوا

وانا عمالة ارتب افكاري هقول ايه للدكتور ايوة هقوله وداني مسدودة ومناخيري ملووحة وحنجرتي زهقت مني وبحب النوم اد عنيا بعد اذنك يا دكتر ياريت تكتبلي انتي نوم

وانا متأكده اني اول ما ادخل للدكتور ويسألني بتشتكي من ايه هقوله اشتكي لمين يا بيه (زي فيلم سندريلا بتاع صباح)الشكوى لغير الله مذلة






المهم فات ساعة الا عشر دقائق واخيرا دخلنا عند الدكتور (دكتور كوبارة كده وقور وما شاء الله وشه منور وشكله بيقول ان سنه اكبر من باباتي )
وقولنا السلام عليكم فرد علينا السلام وبعدين بص لماما ونفضلي خااالص وسألها بتشتكي من ايه
قلت صباحه تطنيش المهم ماما قالتله عندها ايه وفي الوقت ده وانا شايله هم هيكشف على وداني ازاي بربطة الحجاب الغريبة اللي انا عملاها دي مع انها ربطة بسيطة بس صعب تتفك
المهم كتب لماما روجيتة مليانة ادوية وليها اعادة كشف وبعدين انتبه ان في كائن بشري واسمه ليدي موجود في العيادة وفجأه لقيته بص نحيتي وابتسم وقاللي بتشتكي من ايه يا ليدي : (انا في سري ليدي كده هو احنا اصحاب ولا ايه) المهم فاكرين الكلام اللي كنت عايزة اقوله طااااااااار ولقيتني بقوله ودني مسدودة وبعد فسوة من الزمن قولتله لأني بسمع بالسماعات في وداني
الدكتور : طب وريني ودانك
انا : (في سري) وداني مين اللي تشوفها هيهات هيهات )حاولت اهوي الحجاب ولا فايدة لدرجة ان الدكتور اتدخل وقاللي انتي رابطة الرابطة دي ازاي؟؟ قولتله بالدبابيس المهم بعد عناء شاف وداني وقاللي ان وداني عايزة تتغسل
انا : (في سري برضه طب متنساش الشاور جل ) ودني اليمين ولا ودني الشمال
الدكتور : الاتنين
انا :(بإندهاش) الاتنين؟؟؟!
انا برضة : كل ده من السماعات
الدكتور : انتي بتلبسي سماعات ايه
انا : سماعات التليفون
الدكتور : ؟؟؟؟؟؟ (استغرب)
انا : أأقصد سماعات الموبايل والكمبيوتر كمان
الدكتور : السماعات ملهاش تأثير كبير هي بس بتخلي الشمع يسد الودان ومش مشكله انك تلبسي السماعات بس ابقي وطي الصوت
انا : بإبتسامه كلها هبل انا بعلي الصوت عالأخر (مش بحب اسمع اي حاجة في الهيدفون او السماعات الا والصوت اعلى حاجة)
الدكتور : الصوت العالي بيأثر على عصب السمع جدا وبيضعفه وبيعمل مشاكل انتي في غنى عنها
انا : بابا قاللي نفس الكلام برضه
وغسل وداني ولاول مرة احس ان وداني من جواها منتعشة وبتوجعني في نفس ذات الوقت والحمد لله على طول وقتيا
وداني مبقتش مسدودة وسمعت كويس المهم الدكتور سابني تاني وكلم ماما فانا بلبس الحجاب وفأجه لمحت ايييييه لمحت مكتبة مليااااااانه كتب ما شاء الله بجد وقفت قدام المكتبة ونسيت اني في عيادة اصلا ولقيت الدكتور بيقوللي : يا ليدي يا حبيبتي في مرايه هناك (ااقدر اربط الحجاب كويس يعني)
انا : ( ح ايه حبيبتي ازاي يعني التار ولا العار حد معاه سكينه اغزه بيها يا جماعه )لا انا ببص على الكتب بسم الله ما شاء الله مكتبة جميلة جدا
الدكتور : (هو قال حاجة بس انا مسمعتش بصراحة بس شكله دكتور مثقف ما شاء الله مكتبته فيها امهات الكتب الاسلامية وكتب من مكتبة الأسرة وقواميس انجليش ..الخ)
وخرجنا للريسبشن بتاع العيادة ما شاء الله كانت مليانة اكتر من الاول حتى في ناس قاعدين عالسلم من كتر الزحمة ما
شاء الله ربنا يكتر من عيانينك يا دكتر
ونستفيد من البوست ده شوية حاجات

1- محدش يستخدم القطن بتاع الأذن لانه مش بينضف الشمع بتاع االاذن بل بالعكس بيدخل الشمع جوه الودان ويتجمع لغاية لما الودان تتسد خاااالص ومحدش يقوللي اومالننضف وداننا ازاي

2- لو حد عايز يسمع بسماعات الايبود او الموبايل يبقى لفترة مش كبيرة وبصوت مش عالي وعلى فكرة كمان السماعات بتساعد على تجميع الشمع جوه الودان مما يعمل على سد الودان

3- ربنا يشفي كل مريض يا رب ويجعل كل لحظة الم وكل تعب وارهاق في ميزان حسنات كل مريض

4_ I have 2 ears the world is mine


الحمد لله دائما وابدا على نعمه


هناك 22 تعليقًا:

mohamed ghalia يقول...

ألف مليون سلامة على ودانك
ربنا يحفظك من كل سوء
بس ياريت تعملى بالنصيحتين الى قولتى عليهم عشان ميحصلكيش كده تانى يا ليدى
دمتى بكل الود
دمتى فى سعادة

Lady E يقول...

mohamed ghalia : الله يسلمك من كل شر يا محمد انا الحمد لله كويسة دلوقتي لكن مامتي هي اللي عندها انفلونزا وربنا يشفيها يارب

وبالنسبة للنصيحتين هحاول اعمل بيهم

دمت بكل خير وفي حفظ الله

SHAPE YOUR LIFE (ABOALI) يقول...

رحلة موفقه يا باشا
اما عن تفاصيل الرحلة فهى ممتعة بجد وتكاد تتجسد بصفة يوميه امام اعيننا

والمعلومات المضافة قيمة ماشاء الله
انتى تعرفى انى
الشمع ده حاجة طبيعة مادام عند الحد المطلوب
فهو وسيلة دفاع طبيعة للاذن ضد الكثير من الملوثات التى فى الجو فهو يحميها من دخول الحشرات والتراب واى شيىء عالق
لذا انتى تلحظى انه مادة صمغية

بس فى حالتك نتيجة استخدام السماعات
بصوت عالى ذبذبات الصوت عملت على عمل دوامات وفجوات هوائية بين طبقاته
فبدء يثتثار ويزيد فى حجمة وكميته
وده برضوا اللى بتعملة ادوات التنظيف ام قطنه
تثير الشمع لزيادة الافراز

المهم اللى يغسل مرة يبقى هايغسل تانى

احرصى انك تغسلى كل ست شهور
وده برضوا نظافه وصيانه للودان

والف عافيه لك يا باشا ليدى

تحياتى

هانى زينهم يقول...

حمد الله ع السلامة ليكى وربنا يتمم شفا ماما ان شاء الله .
ان جيتى للحق عادات كتير غلط احنا بنعملها وعارفين انها مضرة بس بحكم الزهق والتعود ما بنعرفش نستغنى عنها .

Kiara يقول...

الف الف سلامه ليكي ولطنط يابسبس
.
بس موضوع الاستغناء عن السماعات دا بجد صعب عااااااااااااااااااااااا

romansy يقول...

الف الف سلامه عليكى وعلى ماما يا ليدى
اسلوبك جميل فى الكتابه حتى وانتى تعبانه
استفادى بقى من كلام الدكتور
وبلاش السماعات دى
او قللى منها

ان شاء الله الزياره الجايه تكون احسن بكتير

وبعدين انتى رايحه تكشفى ولا تحسدى

Ahmed يقول...

ألف سلاااااااااااامه

اه, ألف كفايه ألف, أصل ميلون دول طلعوا كتير أوي

مش عارف ليه حاسس ان الراجل الدكتور ده اتحسد حسده مايعلم بيها الا ربنا
ههههههه
بس لا لا
انت بتقولي ماشاء الله

على العموم ربنا يستر

بنوتة يقول...

السلامن عليكم
ألف ألف سلامة عليكى والحمد لله الموضوع عدى على خير
تحياتى ليكى

Hanan Said يقول...

حمد الله على سلامتك يا جميل
وان شاء الله مش تتعبي تاني
والف سلامه على والدتك
وربنا يشفيها بسرعه ان شاء الله
وسعيده جداا اني اتعرفت على مدونتك الرقيقه دي

dramaqueen يقول...

الف سلامة عليكى يا ليدى
والف سلامة على طنط

نتعلم من كدة ايه
اننا نسمع كلام الكبار
يعنى لما بابا يقول حاجة نسمعها

ربنا يعافيكى يا قمر وتبقى دايما كويسة

سمكه واحده يقول...

الف حمدالله علي سلمتك
وعلي سلامه مامتك انا كمان والله عايزه اودي ماما لانها بتشتكي من ودنها وراحت مره وخايفه تروح تاني لان ماما بتخاف جدا
ربنا يشفي مردانا ومرضي المسلمين
تحياتي
سمكه التررم

سمكه واحده يقول...

مرضانا ومرضي المسلمين
ايه مردانا دي يخاتشي عجايب حتي الكتابه مش فلحين فيها وبنلغط انا عارفه طلعنا من الكليات ازاي
بلاهم

ستيتة يقول...

ايه ده مذكرات ليدي في العيادة؟
البنت اللي قاعده تضحك .. ربك بالمرصاد
الليدي .. نسيت الكوبليه اللي ها تقوله للراجل
الدكتور بيعاكس معاكسة بريئة "بجي بطنه بجيج"
فيه حد يروح لدكتور ودان بطرحة جبس؟

سلامتك انتي والوالده الف سلامة

ادم المصرى يقول...

الف الف سلامه عليكى بجد

والف سلامه على ماما

معلش فاكم الله وعفاكم وشفا كل المسلمين ان شاء الله

Lady E يقول...

ABOALI : رحلة ؟ هو انا كنت بصييف ولا ايه يا ابوعلي ؟؟
وتكاد تتجسد كل يوم امام اعيننا ازاي ما هو حل من الاتنين يا حضرتك تعبان بعد الشر يا حضرتك دكتور بعد الشر برضه يا حضرتي مفهمتش حاجه وبعد الشر برضه

وشكرا على المعلومات الفيزيائية الجاديدة ذبذبات ودوامة وفجوات هوائية تقريبا كان في وداني محطة اذاعية وانا مش عارفه :)

لا بجد شكرا على المعلومات القيمه واتمنى كلامك ميكونش صحيح من ناحية ان اللي بيغسل ودانه مره يبقى هيغسل تاني على اساس ان الميه كانت من النيل الودن اللي تتغسل بيها لازم تتغسل بيها تاني

وربنا يعافيك ويعفو عنك يا ابوعلي

Lady E يقول...

هانى زينهم : تسلم يا مستر ربنا يستجيب منك ياااارب ويتمم شفا ماما على خير لأن انا السبب في تعبها وعلشان كده قلبي واجعني جدااااا

والعادات الغلط نقدر نبدلها بعادات صح ومره في مره هنتعود على الصح وننسى الغلط

نورت يا مستر

Lady E يقول...

كيــــــــــــارا : الله يسلمك يا حبيبتي وطبعا صعب جدا الاستغناء عن السماعه متستغنيش عنها بس ابقي وطي الصوت انا بدأت اوطي الصوت برضه

نورتيني يا قمرايتي

Lady E يقول...

romansy : الله يسلمك يا رومانسي

وبعدين عيب عليك احسد ايه بس بجد الدكتور يستاهل ان كتير من الناس بيحبوا يتعالجوا عنده ربنا يكرمه ويجعل تخفيفه عن الناس في ميزان حسناته

Lady E يقول...

Eng. Ahmed Abo El-Ella : ايه البخل ده يا انجينير انتا دافعهم من جيبك ولا ايه
طب من غير الله يسلمك هه


وبعدين بقى كده انا هحسده لييييييه بس يعني
هل جزاء الاحسان الا الاحسان مش الحسد

ربنا يكتر عيانينو وعيانينك بتوع الكمبيوتر

Lady E يقول...

بنوتة : وعليكم السلام ورحمة الله وبركاته

بيعجبني انك واخده الحياة ببساطة يا بنوتة

Lady E يقول...

حنان سعيد : الله يسلمك من كل شر يا قمرايا

وانا الاسعد اني اتعرفت على انسانة جميلة ورقيقة زيك

Lady E يقول...

يتبع ::::