الاثنين، 26 يناير 2009

باركولي يا بنـــــــــوتات دخلت العشريـنـــــــــــــــات

دقات الساعة بتعلن اني دخلت مرحلة جاديدة من حياتي وبقى عندي عشريــــــــــــــــــن سنة

معقول خلاص عديت مرحلة ال teens وبقيت


twenty

بجد انا مش مصدقة اني عشت لغاية لما بقى عندي عشرين سنة

عمري ما تخيلت اني ممكن اعدي من حاجات كتير واوصل للعشرين
منها الحوادث الكتير اللي كنت بعملها بفوفو والكتكوتة والطيارات اللي كانت بتفكر تقع وانا فيهـا :) والاحباط النفساوي اللي بكون فيه ساعات واللي كافي انه يموت جمل وحاجات تانيه كتير لكن الحمد لله عشت لغاية لما بقى عندي 20 سنة

بمشي في الشوارع وأقول يااااه الشارع ده من خماشر سنة مكنش كده والبيت ده كان موجود ومازال موجود من كام سنة وفعلا الدنيا اتغيرت من ايام ما اتولدت لغاية النهاردة (حاسة اني عشت كتير اوي) :))
وبقول لماما لما ان شاء الله اكلم ولادي واقولهم انا من مواليد 1989 مش هيستوعبوا هيقولوا اني مولودة في قرن تاني
20 سنة شوفت فيها حاجات كتير واتعلمت حاجات كتير وزرت بلاد كتير وحبيت ناس كتير وفارقت ناس كتير وعدت عليا مواقف صعبة وايام صعبة وعدت عليا مواقف كنت طايرة فيها من الفرحة وايام سعيدة
مش هقول دلوقتي على اي حاجة كانت مش سعيدة في العشرين سنة اللي في حياتي علشان ده يوم مش عايزة احزن فيه ولأن الأحزان كتير أوي لدرجة اني حسيت اني أميرة الأحزان في يوم من الايام خلينا في المواقف السعيدة
من اكتر المواقف اللي كنت طايرة فيها من السعادة لما كنت عاملة بريزنتيشن بالانجليش في مسابقة بين المدارس وانا في ثانوية عامية وكنت بتكلم وبشرح افكاري بالانجليزي قبل طبعا ما اقرر اني عايزة ادرس اداب انجليش وقدرت اوصل افكاري بصورة حلوة واخدت المركز الأول بالرغم ان كان في بريزنتيشنات جامدة وكلهم كانوا بيتكلموا انجليش بطلاقة


ولما اخدت لقب الطالبة المثالية وانا في 5 ابتدائي وكنت الاعلامية اللامعة في الاذاعة المدرسية في كل المراحل الدراسية واخدت شهادات تقدير
ومع كل جايزة تفوق وشهادة تقدير كنت ببقى طايرة من الفرحة

وموقف كمان كنت طايرة فيه من السعادة لما اخدت الرخصة ياااااه مكنتش مصدقة اني حليت امتحان الكمبيوتر بتاع القيادة اخيرا وجبت 100% يعني حليت الامتحان كله صح وكمان عديت من امتحان القيادة بالعربية وبعدين تالت يوم من الامتحان رحت واخدت الرخصة واول مرة امشي على الطريق كان يوم الجمعة واول مشوار اعمله بالعربية كان للمسجد علشان نصلي الجمعة وده كان حلم من احلامي _اني اروح المسجد يوم الجمعة وانا سايقة العربية- وكنت طايرة من الفرحة لما حققته
السنة دي حاسة اني اتغيرت وحاسة ان طاقة ايجابية جت وسكنت جوايا ومخلياني شايفة الدنيا بمبي بمبي بمبي

و بعض الاقوال اللي الناس قالوهالي السنة دي
(( انتي وش الخير عليا كل ما بشوفك قبل الامتحان برتاح والامتحان بيجي سهل )) زميلتي في الكلية واسمها ام هاشم

(( مينفعش ترتبطي بأي حد لأنك مش اي حد انتي طيبة اوي وعسولة وحبوبة ومريحة (على اساس اني كنبة مثلا او مخدة ايه مريحة دي مش عارفة ) واخلاقك عالية ومؤدبة)) مرات عمي

اما عن المقربين مني فقالوا عني :
(( انتي النور اللي بينور حياتي )) , (( انتي حنينة جدا)) ماما
(( انتي زهرتنا وريحانتنا )) بابا وانا برد عليه واقول ياسمينتنا يا بابا بلاش ريحة نتنتا دي والله انا لسه مخلصة البرفيوم
(( يا ام صوت حنين )) كيكي انتيمتي وبهديلها اغنية ومن الشباك لأرميلك حاااااااالي (شوفتو صوتي حلو ازاي نياهاهاها)

الحمد لله اني كملت العشرين ويا رب تجعلها عشرين سنة شاهدة ليا مش عليا يارب
يارب اكرمني وقربني منك ومن طاعتك لأن مفيش حياة الا بيك


كل سنة وانا طيبة :)


ونبدأ في حفلة عيد الميلاد


دي شوكولاته بيضا لعشاق الشوكولاته البيضا وانا اولهم



ودي جاتوهات صغنونة لكل المدونين اللي بيزوروا مدونتي واللي اول مرة يزوروها






وده ايس كريم في يناير ايس كريم في مدونتــــي

ودي تورتة رقيقة جدا ولونها اكتر لون بحبه جاتلي هدية من المنتدى اللي انا عضوة فيه وعازمكو عليها
على فكرة في نفس ذات اليوم كان عيد ميلاد السندريلا سعاد حسني الله يرحمها فياريت كلنا نقرأ الفاتحة على روحها

هناك 28 تعليقًا:

ستيتة يقول...

هابي بيرثداي تو يووووووووووووووو
حلوة حلويات عيد الميلاد
ذكريات ايه ياماما اللي بتحكي عنها امال انا بقى ابقى من ايام الجبرتي؟
حسيتي انك كبيرة؟
استنيلي كده عشرين سنة وبعدين نتكلم
اذا كنت انا بذات نفسي السيده ستيتة شايفة نفسي صغنونة
الكبر والصغر ده حالة نفسية بحتة حتى الشعر الابيض ولا يفرق معاها
تحياتي ياقمر وعقبال بيت العدل

e_emy يقول...

كل سنة وانتى طيبة ياجميل

وعقبال سنين كتير وتبقى فرحانه اووى بيهم كده زى انهرده (:

وانتى تستحقى الكلام الجميل ده واكتر كمان
ربنا يخليكى لكل الناس الجميلة دى ويخليكى ليهم يارب

واجازة سعيدة ان شاء الله

HaPpy BirthDay :*

Ahmed يقول...

Happy birthday
يارب تتمتعي بالعشرينات واللي بعد العشرينات كمان

moustapha achraf يقول...

كل سنة وانتى طيبة و عقبال1000 استمتعى بحياتك

Unknown يقول...

كل سنة وانتي طيبة بجد اتبسطت قوي اني قريت بوست كله مرح كده على الصبح
الحمد لله انك شفتي نسك في العشرين أخيرا أنا كمان دلوقتي كملت عشرين بس من 3 شهور وقتها كنت مسافر واتبهدلت بطريقة نستني اني كملت 20 سنة أصلا..
ربنا يجعل حياتك كلها شاهدة لكي يوم القيامة وتعيشيها في حب وخير وربنا يرزقك بواحد يقدرك يعني في مستقبل حياتك وتبقي دايما مبسوطة ةبلاش اكتئاب..
أقولك حاجة..حقدت عليكي بتعرفي تسوقي عربية أن لا..اهئ اهئ اهئ..ههههههههههه
مبحقدش طبعا ربنا يباركل كت بهزر
ربنا يوفقك يارب بجد فرحتلك عشان حسيت بجد انك فرحانة
وعقبال المليون سنة ولا عشان نبقى واقعين عققبال كمان 80سنة عشان تبقي من ذوات القرن ههههههههههه
تحياتي ومودتي لكي أختي

هانى زينهم يقول...

كل سنة وانتى طيبة يا ليدى وعقبال 100 سنة .بس صدقينى سنك ده اجمل سن بتعيشيه قبل الجواز بقى والعيال والذى منه عشان كدة حاولى تفرحى بكل ثانية فى حياتك دلوقتى وجميلة اوى ذكرياتك اللى انتى فاكراها دى غالبا هى اللى بتفضل فى الذاكرة عن كل ذكريات العمر مش عارف ليه ؟ تعرفى انتى ؟

كيكى عوووووو يقول...

عااااااااااااااااااا
انتى قافلة الموبيل ليييييييييييييية؟؟؟
******************************
يام صوت حونين يا اختشى***
لولولولولولوولولولولوىىىىىىىىىىىىىىىىى
لولوولولىىىىىىىىىىىىىىىىىىىىىى
لوولىىىىىىىىىىىىىىىىىىىىىىى
هابى برث دااااااااااااااااااى
يانونتى ياحبيبتى
لولولوولىىىىىىىىىىىىىىىىىىىىى
لولوولوىىىىىىىىىىىىىىىىىىىىىى
يارب تكون سنه مليان نجاح وحب وتقد م عليكى..وست فوفو هانم تكون معاكى عشان انتى للاسف بتحبيها!!!
***انا فين حتة الجاتوة بتاعتى من التورتة الحقيقة الى انتوا كلتوها!!
انا عايزة نص الشيكولاتة كلواااااااا
من غير حسد ونق فاهمة؟؟
1


2

3
بيب بيب بيب بيب بيب
ورقصنى ياجدع على واحدو ونص

اية دة هرقص كدة من غير نقطة؟؟
عوووووووووووووووووووووو

شفـقــة و إحســــان يقول...

كل سنة وانتى طيبة يا قمر
وعقبال ميت مليون سنة

mohamed ghalia يقول...

كل سنة وانتى طيبة
عقبال مليون سنة
كل سنة وانتى الى طاعة الله أقرب
كل سنة وحياتك كلها سعادة وهنا وسرور
كل سنة وكل أحبابك حواليكى
دمتى بحفظ الله
سعيد إنى عودتى جت فى مناسبة حلوة زى دى
دمتى فى سعادة

حروف يقول...

كووووووووووووووووووووووووووول
سنة وانتي طيبة ياقمر
وعقبال ميت سنة يا صغنونة انتم السابقون ونحن الاحقون انا عيد ميلادي قرب وحبئا عشرين بردوا ومعزمة يااختي
دمتي بخير وزكرياتك الصغنونة

Ahmed elshebli يقول...

so cute

عاشقه الرومانسيه يقول...

كل سنه وانتى بخير وطيبه يا ارق بنوته
طبعا انا حاسه بيكى وبشعورك
لانى كنت زيك بس كان حلمى اوصل 25سنه
وادينى وصلتلها وعديتها كمان
حاولى بقى تعيشى سنك بجد
استمتعى بحياتك
عيشى واعملى اللى نفسك فيه بس فى طاعه ربنا طبعا
وان شاء الله يكون عندك 40و60و120سنه كمان
ساعتها بقى هتكونى عشتى كتير بجد
هههههههههه
اه مش عشرين وتقوليلى عايشه بقالى كتير
لسه ياحبيبتى ربنا يديكى طول العمر
ويحقق لك كل احلامك

بس انا زعلانه لانى بحب التورته الشيكولاته

عموما مش مهم اقضيها بالجاتوه

تحيــــــاتــى

غير معرف يقول...

عقبال مليوووووووووووون سنه
مش عشرين بس

كووووووووووووول سنه وانتي طيبه يا ليدي
ويااااااااارب كووووول سنه تكون احسن من اللي قبلها..

:)

ادم المصرى يقول...

اجمل سن لئجمل بنوته ربنا يج علك

فى الخير ائما كل مليون سنه اونتى بخير

وان شاء الله تكون عشرين من اجمل سنين

عمرك وتشوفى فيها اجمل زكرياتك عشان مش تتنسى

romansy يقول...

كل سنه وانتى طيبه وعقبال مليون سنه

التورته جميله قوى
تسلم ايديك

فارس القمر يقول...

طفله مش عاوزةتكبر وخلاص كبرت وبقت عروسه وعنها 20 سنه كل سنه انتى بخير يارب وعقبال عيد ميلادك اللى تشفى فيه احفادك تحبيهم ويحبوكى

وتحققى كل اللى نفسك فيه

تحياتى لك وعيد ميلاد سعيد

كيكى عوووووو يقول...

كل سنة وانتى طيبة تانى وتالت
بيب بيب بيب
عوووووووو

Lady E يقول...

ستيته حسب الله الحمش : بجد وانا بكتب البوست حضرت كنتي في بالي علشان موضوع حسيت اني كبيرة ده كنت متأكده ان حضرتك هتعلقي عليه :)
وكل سنة وحضرتك طيبة وبخير
وفعلا الكبر والصغر حالة نفسوية
وانا لسه طفله مش عايزة تكبر ومش هتغير

بجد نورتيني و فرحانة جدا بزياراتك الجميلة لمدونتي المتواضعة

Lady E يقول...

e_emy : وانتي طيبة وبخير يا قمريا

وبالنوسبة للكلام الجميل فأنا حسيت بالندم اني كتبته عاااااااا

نورتيني يا قمر بجد

وقوليلي خلصتي انطحانات ولا لسه
بالتوفيق يااااارب

Lady E يقول...

Eng. Ahmed Abo El-Ella : امين يارب

دمت بخير

Lady E يقول...

Blind Sniper : وانتا طيب وبخير

و1000 كتير اوي لو من غير الاصفار يبقى احسن :)

Lady E يقول...

كاتب مصري : وانتا طيب وبخير

وبالنوسبة لعيد ميلادك فكل سنة وانتا طيب مع انها جت متأخرة شوية

ربنا يستجيب دعواتك الجميلة

وعلى فكرة انا كمان يوم عيد ميلادي وتاني يوم اتنكدت برضه زي مثلا ان العربية باااااظت باااااااااظت ومفيش امل انها تتصلح دلوقتي وكذا حاجه تانيه حاولت تنكد عليا بس انا تجاهلت كل ده وان شاء الله مكملش قرن انتا كده بتدعي عليا مش ليا عاااا

Lady E يقول...

هانى زينهم : وكل سنة وحضرتك طيب اكيد يا مستر ان سن العشرينات ده سن جميل
وبالنسبة للذكريات لأنها مرتبطة معايا بتعب وقلق يعني مثلا مأخدتش رخصة القيادة على طول اول مرة منجحتش واستنيت 3 شهور كنت مخنوقة فيهم وتاني مرة منمتش قبل الامتحان بكام يوم وحاجات تانيه كتير فطبيعي لما انجح افرح بنجاحي وطبيعي لما الانسان بيتعب في حاجة وبيبذل فيها مجهود وينجح صعب ان الذكرى دي تروح من ذاكرته

Lady E يقول...

كيكى : حبيبتي حبيبتي كان فاصل شحن وانا كنت مقضيه اليوم نووووووم

وبالنوسبة للتورتة فحقك محفوظ يا باشا نص التورتايه زي ما اتفقنا هبعتهالك بالبلوتوث او في ايميل لا تقلقي خاااااالص

وعندك احلى نقوط لأحلى كيكي وانا كمان هرقص معاكي :) عيد ميلادي بقى

Lady E يقول...

شفقة هانم واحسان بك : وانتي طيبة يا حبيبتي وميت مليون سنة ايه بس هو انا هخلل كفاية ان الواحد شاف العشرين هننهب يعني ولا ايه :)

Lady E يقول...

هاجي تاني علشان اكمل الرد على باقي التعليقات الجميلة

Lady E يقول...

mohamed ghalia : وكل سنة وانتا طيب وبخير يا محمد
ربنا يتقبل ويستجيب دعواتك ويبقى لك نصيب منها

Lady E يقول...

حروف (دلو مرة ثانية وجرح ثاني سابقا) : وانتي طيبة وبخير يا حبيبتي

وان شاء الله عيد ميلاد سعيد وسنة جاديدة كميلة عليكي يا قمرايا