الأربعاء، 21 يناير 2009

ليس كل ما يلمع ذهبا


من شوية كلمت زميلة من زميلاتي في الكلية عالايميل وقلت فرصة نراجع شوية حاجات في المادة اللي جاية المهم مراجعناش ولا حاجة
وكعادتها فضلت تقوللي مش عارفة اذاكر مش عارفة اركز وتوترني اكتر ما انا وهي اصلا دحاحة وانا متأكده من كده زي ما انا متأكده انها دخلت النت علشان تاخد هدنه شوية من المذاكرة المهم في وسط الكلام لقيتها بتقوللي :
انتي مش في اخبار مش هتتخطبي ولا لسه؟؟؟؟
واتفاجئت بسؤالها الغريب ده في الوقت ده يعني احنا في ايام امتحانات والمادة الجاية متكلكعة بالكلاكيع وانتي بتفكري في اني هتخطب ولا لسه ثم اني اصلا مش بعرف اخبي فرحي او حزني الاتنين بيظهروا عليا يعني لو كنت هتخطب كانت شافت قلوب وورد مرسومين في عنيا من غير ما اقول حاجة
المهم كلام زميلتي فكرني بشوية حاجات منها
اولا : كنت في الكلية في يوم وزميلتنا س1 بتتكلم عن الخطوبة وفرحانة بقى وبتتمنظر على الجروب اللي كانت قاعدة معاهم وبعدين قالتلهم فاكرين فلانة اتخطبت فردت بنت تانيه وقالتلها مش هي مخطوبة فردت س1 وقالتلها انتي لسه فاكرة دي سابته من زماااان واتخطبت للواد تومة
(يعني في بنات بتبدل في الخطاب وبنات تانيه مش لاقيه خطاب وفي وجهة نظري ان الفئة دي من البنات حتى لو كانوا جامعيين بيوافقوا بأي حد بشرط انه يجيب شبكه ومهر غاليين ويعمل لها فرح احسن من فرح بنت عمتها )
ثانيا : احنا كنا جروب مكون من 6 بنوتات قبل الجامعة وكل البنوتات اتخطبوا واتجوزوا ما عدا انا :) وكلهم بيحسدوني على اني متجننتش زيهم وكلهم مجمعين على انهم ضيعوا فترة جميلة من عمرهم منهم اللي مكملتش تعليمها علشان الجواز ومنهم اللي زهقت من المسؤليه ومنهم اللي حست ان عمرها اتسرق منها ..... الخ
ثالثا : وانا في تانيه ثانوي من كام سنة زميلتي وصبحتي اتخطبت وبعدين مامتها كلمتني في التليفون تعزمني على الخطوبة وقالتلي كلام مش ممكن انساه
(( متزعليش يا ليدي بكرة يجيلك اللي يحبك ويقدرك انتي بنوتة حلوة وعسولة ومثقفة .....)) وفضلت تقوللي كلام كتير على اساس اني عنست وهي بتواسيني وقفلت الخط من هنا وحكيت لماما على كلام طنط وفضلنا نضحك ونهزر على اني خلاص بقى عنست وبقى عندي 150 سنة ويلا حسن الختام
4- في الوقت اللي انا بفكر فيه انا عملت ايه في الحياة وحاسة اني ضيعت حياتي وبفكر ايه الحاجة المفيدة اللي ممكن اعملها واتعلمها وبحاول اظبط شوية حاجات في شخصيتي زي العصبية مثلا في الوقت اللي كل الناس فيه بتكلمني على موضوع العرسان والارتباط
طب وهو انا علشان يبقى ليا لازمه في الحياة لازم اتخطب دلوقتي ولا الاول اخلص دراستي واثبت ذاتي وانضج شوية فكريا وابقى فعلا مستعدة لتحمل مسؤلية الزواج وبعدها افكر بقى في الخطوبة والارتباط والجواز
5- زي ما في مضايقات وضغوط على البنات انها تتخطب في برضه ضغوط على الشباب انهم يخطبوا ويتجوزوا
يعني مجتمعنا مش سايب حد في حالة
مستنية مناقشاتكم ...


هناك 21 تعليقًا:

Unknown يقول...

كفاية عنوان المدونة طفلة مش عاوزة تكبر يبقى خطوبة ايه وجواز ايه دلوقتي بلاش وجع قلب فضي دماغك لمذاكرتك ومستقبلك ولاحقين على الجواز وسنينه اسمعي كلامي لما القلب بيتشغل كل حاجة بتروح
أما من ناحية البنت زميلتك الدحيحة دي سيبك منها في ناس كتير همهم بس يعطلوا الخلق عشان ميبقوش أحسن منهم خدي بالك من مصلحتك وخليكي دايما على مبدئك ده ليس كل ما يلمع ذهب
مودتي
في انتظارك

شفـقــة و إحســــان يقول...

والله برافو عليكى طبعا انا معاكى انك تكملى تعليمك وتشتغلى وتثبتى وجودك وبعدين تفكرى فى الجواز
ومالكيش دعوة بكلام الناس لان مورهمش الا الكلام يعنى لو متجوزتيش يقولوا يا عينى متجوزتش ولو اتجوزتى واتاخرتى فى الخلفة يقولوا يا عينى مخلفتش وهكذا يعنى هيفضلوا وراكى وراكى
التعليم اهم والجواز بعدين
باى يا قمر

هانى زينهم يقول...

الله يحرق الناس وكلام الناس . من شوية مريت بظروف كدة وكتبت موضوع مشابه لده عن احوال الناس وكلامهم وفعلا اكتشفت انك عمرك ما هتعجبى الناس ويبقى مجنون اللى يمشى حياته على كلام الناس . انا اعمل اللى انا شايفه صح وبيبسطنى مادام ما باغلطش فى حد وما باتعداش على حقوق حد يبقى تانى الله يحرق الناس وكلام الناس . 1000 مرة !!
اما بالنسبة للجواز فما تستعجليش ع الهم .. هيركبك هيركبك !!وصدقينى اللى بيكلموكى كدة اصلا غيرانين منك انك لسة ما اتجوزتيش وعايزينك تتجوزى عشان تبقوا كلكوا فى الهوا سوا وساعتها هيبطلوا كلام ويكتفوا باللى الجواز عمله فيكى ويمصمصوا شفايفهم برضه ويقولوا يلا هنبقى احنا والزمن عليها !!

ابراهيم بكر يقول...

السلام عليكم
______________
هذه اول زيارة لمدونتك
ولقد لفت انتباهى اخر موضوع
وتسمحيلى اختلف معك كليا
لان اجمل شيئ للمرأة هو الزوج الصالح
مهما نالت من الدنيا
ومهما قالت عن نفسها انها سعيدة
ومهما توهم الاخرون سعادتها




الرجاء تقبل رأيى

romansy يقول...

موضوع جميل قوى
المهم الوسطيه والاعتدال فى كل شئ واننا نفكر ما ناخد اى قرار
ظروف الحطوبه معروفه اصلا
الاقتصاد مدمر
هيدوب على قد المعيشه بس

ربنا يعينا بقى

ستيتة يقول...

ليدي هانم
فيه بنات عقلها طاقق ميت فل
ايامنا كانت الأمهات ترفض ان اي حد يدخل البيت الا لما تجيبي الشهاده الكبيره وكانوا الأمهات اغلبهم تعليمهم لحد ثانوي
النهارده الأمهات جالهم ناكسة عقليه زي اللي كانت بتواسيكي وانت في تانية ثانوي دي
هل التخلف نتيجة لتعليمهم العالي؟ نو ابسلوتلي
ده تخلف عقلي وحضاري مناسب للمرحلة
ربنا يكملك بعقلك ياجميله

بنت القسام يقول...

بسم الله
السلام عليكم ورحمه الله
اولا الموضوع دة منتشر اوى عل فكرة
ثانيا عادي يعني اول حاجه لازم نحدد مستقبلنا ونحط رجلينا عل اول الطريق وبعدين فكرى بقه في خطوبه وجواز
وعل فكرة التعليم عل سبيل المثال وانك تعملى ليكى مستقبل كويس وشهادة كويسه هيحفظ ليكى بعد كدة حياه اجتماعيه تمام
فالاهم ثم الاهم
ربنا يوفقك يارب ويكتبلك كل الخير
تقبلي مرورى
اختك جيلان

blue-wave يقول...

المشكله مش فى امتى
المشكله فى ازاى؟
للأسف معايير حكمنا على الأشياء اختلف جدا
كل شاب بقى عايز بنت امورة وبيضا من غير ما يشغل نفسه بأدبها واخلاقها ودينها
وكل بنت عايز شاب وسيم وطول بعرض برضه بدون اهتمام بالأخلاق
اللى عايز اقوله ان كل الأمور دى نصيب
واللى بيدور عليه بيتعب
سيبها تيجى هيا لحد عندك لوحدها
ما ربك االلى مرتبها
تحياتى

كيكى عوووووو يقول...

نونتى
*****
عاجبتنى اوى كلمة لوحبيتى هنلاقى فى عينك قلبين وورد االله**
بصى يا حبيبتى
************
فاكرة قصة جحا وابنه والحمار فاكرها صح؟؟؟
هما الناس كدة يحبوا يلتو ويعجنوا كتير فكك
ربك لمة يريد الاهم دلوقتى اساسا
الدراسة والنضوج الفكرى والفلسفى واثبات ذاتك
اختشى فكك وسيبك من صاحبتك انا روحت فين
ادرسلك انجيلزى بتاع عم حتاتة بتاع السيبر قوليلى اية بس مضايقك وانا اظبطك!!
بس لامواخدة اتينن جنية وربع فى الحصة مش عشان احنا اصحاب هتستغتلينى يعنى!!
*******************
نونتى بجد وحشتينى ومعيش رصيييد
عاااااااااااااا
ذكرى كويس ونبى
عوووووووووووووووووو

arsenalwy يقول...

والله انا فرحان اوى انى شايف بنت بتقول الكلام ده

طبعا تخلصى وتثبتى نفسك وبعدين هتتخطبى هتتخطبى

سعدت برأيك

Lady E يقول...

كاتب مصري : هقول ايه بقى يا كاتب الناس مش عارفين اني طفلة مش عايزة تكبر
وبالنسبة لزميلتي الدحيحة فمن كتر ما قابلت ناس كده في الدراسة فهمت اسلوبهم ومبقتش اصدقهم مهما قالوا خلاص

دت بسعادة وفي حفظ الرحمان

Lady E يقول...

شفقة هانم واحسان بك : يا رافعة معنوياتي يا شفشوقتي يا حبيبتي
وعندك حق كلام الناس لا بيقدم ولا يأخر كلام الناس ملامة وحيرة مش اكتر واييييييه بس خلاص
قوليلي بقى كتابك هينزل امتى علشان عايزة اقرأه في الاجازة
ربنا يسعدك
دمتي في حفظ الرحمان

Lady E يقول...

هانى زينهم : كلام سليم يا مستر
اما بالنسبة للجواز ف الهم هيركبني ليه هو مش لاقي مواصلات يركبها ولا ايه :)
الناس عمرها ما بتسيب حد في حاله
وزي ما قالت شفقة هانم الناس موراهمش الا الكلام

وانا دورت على البوست اللي حضرتك كتبته عن الموضوع ده بس ملقيتهوش؟؟

دمت في حفظ الرحمان من غير هموم يا مستر

Lady E يقول...

hinger: وعليكم السلام ورحمة الله وبركاته

مفيش اختلاف كليا ولا حاجة ده هو نفس رأيي انا مش هعمل اضراب عن الزواج بس كل شيء مناسب في وقته
وعلشان استاهل بجد زوج صالح يبقى لازم انا كمان اتعلم ازاي ابقى زوجة صالحة

شكرا لمرورك دمت في حفظ الرحمان

Lady E يقول...

romansy : ربنا يعينكم ويعيننا ويعين الجميع يا رومانسي
خليها على الله

دمت في حفظ الرحمان

Lady E يقول...

ستيته حسب الله الحمش : ههههههه بجد كلامك جميل فعلا في تخلف عقلي وحضاري عند أغلبية الناس مش بس بعض الامهات
بس الحمد لله ان مامتي زي الامهات اللي حضرتك اتكلمتي عنهم وبتقوللي الشهادة الاول

نورتيني يا قمرايا
دمتي في حفظ الرحمان

Lady E يقول...

Bent el-Qassam : وعليكم السلام ورحمة الله وبركاته

هو ده الكلام الصح وياريت بنات كتير يفكروا كده

ربنا يتقبل دعواتك الرائعة ليا وليكي ولبنات المسلمين
نورتيني يا جيلان
دمتي في حفظ الرحمان

Lady E يقول...

blue-wave : وأكيد المشكله في امتى برضه

وان العريس او العروسة يختاروا بعض على اساس انهم مرتاحين لبعض وان العروسة امورة والعريس وسيم دي حاجة مش حرام بشرط انها متتعارضش مع الاخلاق والدين

قال رسول الله صلى الله عليه وسلم : : "تنكح المرأة لأربع: لمالها ولحسبها ولجمالها ولدينها فاظفر بذات الدين تربت يداك"


وفعلا كل شيء قسمة ونصيب
وانا مش بدور على حاجة ومقتنعة ان كل انسان مش بياخد غير نصيبه والمكتوب ليه

Lady E يقول...

كيكى : عارفاكي يا كيكي شكلك عايز القلب والورد يا اهلاويه
واكيد فاكره قصة جحا والحمار
اما بالنسبة للانجليش ف نو يا كتكوتي نو متدرسيش الانجليش في في حارة الانجليشيين :)

فاكرة الدايل اب بلاش اسيحلك بقى عالنت :) وعموما هعملك تخفيض وهخلي الحصة ب اتنين جنيه الا ربع

سلام يا كتكوتتي وبلاش تختفي كل شوية

Lady E يقول...

arsenalwy: وانا فرحانة جدا اني اشوف ولد بيحترم الكلام ده

شكرا ليك

Mona Shereif يقول...

بالنسبة لزميلتك
عاااااااااادى خالص
ده ياما كان بيحصل ايام المذاكرة دى
ههههههههههههههههههه والله ورجعتينى لايام
كانت وقتها وحشه اوى بس دلوقتى بفتقدها
اما بالنسبة للخطوبة وكده
انتى صح
افتكرت ايام ثانوى وكنا سألنا مدرس الانجليزى على كلمة خطوبه يعنى ايه بالانجليزى
فقالها لنا
وبعدين سألنا هو فيه حاجه يا بنات خطوبه يعنى ولا كده؟ لسه بدرى عليكم دى مسئوليه و.. و... و...
واقولك انا حاجه بقى
احساس انك تكونى بنت ده جميل اوى
لما تخلصى دراستك وتشوفى الدنيا ماشيه ازاى وتحتكى بالحياة من خلال شغلك ده هيخليكى اد المسئوليه
والله يا ليدى من فتره كده قابلت بنتين كانوا زمايل اختى -اللى اصغر منى- فى اعدادى كانوا متجوزين ودلوقتى مطلقات
تخيلى بقى لما واحده عندها 20 او 21 سنة ومطلقة!!!!
الحمد لله رب العالمين على كل حال وربنا بجد ييسر الحال