السبت، 2 أغسطس 2008

البعد جرح من غير دوا

السلام عليكم






انا من عشاق فكر وافلام المخرج العملاق والكبير والعالمي : يوسف شاهين -رحمه الله- مع اني متعاملتش معاه ابدا في حياتي يعني مفيش اي هدف من البوست ده غير اني احاول اظهر بعض الحاجات اللي يمكن تكون غايبة عن ناس كتير بمعنى:

مثلا البوست اللي فات زوار كتير للمدونة معلقوش على وفاة الرائع يوسف شاهين وبعض الناس بعتتلي تلومني اني اتكلمت اساسا عن يوسف شاهين وده شيء احزنني جدا لأننا مصريين وكتير مش عارفين قيمة يوسف شاهين وكمان مش بيحبوه وبيقولوا ان اعماله مش مفهومه ايه اللي مش مفهوم فيها مش عارفه

ده غير كمان كتاب كنت لمحته من كام سنه بيهاجم يوسف شاهين وكل اللي بيحبوا فنه وابداعه

انا مش هتكلم عن رأي اي حد لأن دي حرية شخصية والابداع مش محتاج حد يشاور عليه لأنه ظاهر بس للأسف كتير جدا مش شايفينه

لكن هتكلم عن فكري ورأيي المتواضع

وهبدأ بأحب فيلم لقلبي فيلم الناصر صلاح الدين اللي اخرجه يوسف شاهين بصورة رائعة وعمل مساحة كبيرة للشخصيات والأحداث الرئيسية بعدما كانت قصة الفيلم الرئيسية هي حب عيسى ل لويزا يعني كان هيبقى اكتر مشاهد الفيلم عن قصة الحب مش عن الناصر صلاح الدين والمعارك الحربية لكن هو عدل في الفيلم لغاية لما ظهرلنا بصورته الرائعه دي

الفيلم اللي كل ما اشوفه افتخر اني مسلمة وافتخر بتاريخ الاسلام وعظمائه والرجال العظماء مش اشباه الرجال الموجودين في عصرنا حاليا (مش كلهم )

اما فيلم جميلة أبو حريد : فهو فيلم رائع واتكلم عن البطلة العظيمة جميلة اللي ضحت بحياتها علشان استقلال بلادها الجزائر
وانا درست شخصية جميلة بوحريد في المدرسة لكن مفهمتهاش وحبيتها الا لما شوفت الفيلم اللي وضح اد ايه هي كانت عظيمة واد ايه في بنات يعتمد عليهم مش زي بنات دلوقتي (مش كلهم )


وفيلم المصير : اللي اتكلم فيه عن ضياع الأندلس والاشخاص اللي تدينهم كاذب وفكرهم متطرف وفي منهم كتير جدا في اي دين اللي بيتظاهروا بالتدين والورع ويستغلوا الدين لمصالحهم الشخصية وكمان اتكلم عن ابن خلدون المفكر الاسلامي اللي عرفته لما شوفت الفيلم وان اي حد بيفكر وبيكون فكره مختلف ناس كتير بيحاولوا يموتوا فكره
وده اللي حصل وبيحصل في كل العصور واكبر دليل على كده بعض دكاترة الجامعة اللي بيحجروا على فكر الطلبة وبيخلوهم يشيلوا المادة او يشيلوا منهم التقديرات العالية لمجرد ان الطالب رأيه مختلف مع الداكتور

فيلم الأخر : اللي بيصور الطبقية والفكر المختلف بين العرب والغرب وقصة الحب الجميلة بين ادم وحنان
وبرضه المتطرفين اللي بيحاولوا يتخذوا الدين شعار لمصالحهم الشخصية

فيلم باب الحديد : فيلم جميل جدا لانسان بسيط ((قناوي) اللي كل احلامه انه يحب ويتحب والناس تحترمه ودي احلام كل الناس تقريبا و لما شوفت الفيلم تخيلت ان يوسف شاهين هو قناوي من براعته في تمثيل الدور وطبعا لاخراجه الرائع للفيلم

المهاجر : الفيلم الي عمل فوضى والناس قالوا ان رام هو سيدنا يوسف لا طبعا لو كان يوسف شاهين عايز يعمل فيلم عن سيدنا يوسف كان عمله لأنه جريء وعنيد ومبيخفش من اي شيء لكن هو بيحترم الأنبياء ومستحيل يعمل فيلم عن اي نبي من الأنبياء او يمس اي دين بأي شيء

نيجي لفيلم عودة الابن الضال : كنت بفتكر مشاهد كتير منه وخصوصا الاغاني الرائعه بتاعته اغنية عودة الابن الضال وباي باي والشارع لنا واختيار يوسف شاهين لكل الرائعين اللي في الفيلم واخراج احساسيسهم بالصورة اللي بتخلي المشاهد يتفاعل معاهم وممكن يبكي وفاكرة اني لما كنت بروح المدرسة الصبح ايام الثانويه العامه وانا بكره اصحى من النوم بدري كنت بفتكر اغنية عودة الابن الضال غناء الفنانة العظيمة : ماجدة الرومي : (ساعات أقوم الصبح قلبي حزين )
ولما اضايق من درس مش فاهماه او امتحان صعب عليا او مدرسات عندهم 5000 كلكوعه في الثانيه وكانهم بينتقموا مننا مش بيعلمونا
اصبر نفسي وافتكر : ( وارجع واقول لسه الطيور بتفن والنحلايات بتزن والطفل يدح ويرن مع ان مش كل البشر فرحانييييين )
ولما بيكون عندنا امتحانات عملي ( انا كنت علمي) ايام ثانويه عاميه برضه كنت بقول لصحباتي - ايه العمل في الوقت ده يا صديق -
وكمان يوم لما خلصت ثانويه عاميه وكنا بنودع المدرسة غنيت اغنية باي باي طول اليوم

طبعا الراحل العظيم يوسف شاهين عمل افلام كتير للأسف انا مشوفتهاش كلها لكن دي الأفلام اللي شوفتها وبحبها جدا لدرجة ان لما بيجي فيلم منهم كنت بسهر مخصوص اشوفه (ايام المدرسة) ولغاية دلوقتي لما بيجي اي فيلم منهم بنسى اي حاجه وبشوف الفيلم
طبعا في حد هيقول ان نجاح الافلام كانت بالممثلين والموسيقى وكلمات الاغاني وخصوصا في فيلم عودة الابن الضال لأن كانت كلمات الأغاني للرائع : صلاح جاهين بس لكن هقول كل ده كان ممكن يبوظ لو مكنش في اخراج قوي من العظيم يوسف شاهين

طبعا كل الكلام اللي قولته من وجهة نظري البسيطه وطبعا الكلام عن الشخصيات العظيمة عايز مجلدات مش بوست واحد وكان عندي كلام كتير جدا بس مش هطول اكتر من كده وهقولكم

( ايه العمل في الوقت ده يا صديقي غير اننا عند افتراق الطريق نبص قدامنا على شمس احلامنا نلقاها بتشق السحاب الغميق)

وداعا يوسف شاهين وداعا للموهبة اللي مش هتتكرر ابدا حتى على ايد تلامذته
وداعا لمصور اساسيات في تاريخ وحياة مصر زي جنازة جمال عبد الناصر
وداعا للانسان العنيد المقاوم والمتجدد واللي فكره سبق عصره







هناك 26 تعليقًا:

blue-wave يقول...

مش عارف اقولك ايه
بس انا مش بفهم حاجه من معظم افلامه
كلها مليانه مشاهد فاضحة وخلاص
وابرزها طبعا اسكندريه نيويورك
يلا اهو راح وحسابه هايكون عند ربنا

عروسة ننوسة يقول...

احنا فعلا بنحبه لكن المشكلة ان كتير من افلامه ما كانتش مفهومة للكثير من الناس وده اللى بيخلى الناس مش متاثرة اوى بيه لانهم للاسف ما يعرفوش قيمته الفنيه
بس بشكرك على وفاءك

مواطن مصري يقول...

فعلا مصر فقد مخرج يوسف شاهين
بس انا مش بعتبرة ميت لائنة حي

Lady E يقول...

blue-wave: ليه بس يا دكتر مش عارف تقول ايه انا عارفه ان كلامك دايما من القلب

كلها ؟؟؟؟؟؟؟؟؟؟!!!!!!!!!!

اوكي يا دكتر حضرتك اتكلمت عن اسكندرية نيويورك وانا للأسف مشوفتش الفيلم فمش هقدر احكم عليه لكن كل الأفلام اللي شوفتها للرائع يوسف شاهين مش مليانه مشاهد فاضحه
المشاهد الفاضحه فعلا موجوده في بعض الكليبات العربية قبل الاجنبيه مش في افلام يوسف شاهين

وياريت تقوللي ايه اللي مش مفهوم في فيلم جميلة بو حريد او سيدة القطار او الناصر صلاح الدين او في جنازة عبد الناصر ...... الخ
اكيد في افلام ليه فيها رمزيه زي فيلم عودة الابن الضال بس رموز سهل فهمها مش مكلكعه للدرجة دي

اصعب كلام عليا انك قولت اهو راح

حسيت بألم من الكلمة دي

ولنفرض مثلا اني كتبت حاجه واسلوبها معجبش حضرتك وحصل اني موتت بعدها هتقول عليا يلا اهي راحت!!!!!!

على أي حال ده رأيك يا دكتر وانا بحترمه

Lady E يقول...

عروسة ننوسة : يا الف اهلا وسهلا بيكي يا احلى عروسة
لو كنت عارفه انك جايه كنت حضرت التورته التمام ومعاها احلى عصير بس علشان انا مضايقه في البوست ده فمعلش بقى هخليها نيسكافيه
عندك حق يا قمر
كلام معقول مقدرش اقول حاجه عنه
مع اني برضه مش عارفه ايه اللي مش مفهوم في افلامه لأن معظمها مش محتاج لتفكير للدرجة دي
وشكرا ليكي يا قمرايا نورتي البلوج والبوست وبجد شرفتني زيارتك الجميلة لمدونتي المتواضعه

Lady E يقول...

مواطن مصري :

أهلا بيك يا مواطن مصري نورت البلوج

وأكيد مصر والعالم كله فقد انسان جميل جدا ومخرج مبدع ورائع
واللي يضايق فعلا ان بعض المصريين والعرب مش عارفين قيمته
لكن العالم كله نعاه وكتب عنه كلام عظيم جدا
وعندك حق يوسف شاهين حي بأعماله اللي تشهد على روعته وابداعه ربنا يرحمه يا رب

شكرا لزيارتك الجميلة لمدونتي المتواضعه

appy يقول...

ربنا يرحمه
مع انى مكنتش بفهم كتير من افلامه بس عادى يا ستى فيه ناس كده طيب على الاقل نلاقى اللى يترحم علينا وده اقل حاجه

حنين.. يقول...

انا مش بحبه خالص
تقبلى مرورى
تحياتى

عصفورة من الشرق يقول...

اشكرك على البوست الرائع ده انا متفقه معك فى رايك يوسف شاهين فنان وانسان مختلف وعشان كده مش سهل ان الناس كلها تقبله لكن انا شايفه افلامه معظمها مفهوم يمكن له بعض الافلام اللى بتعتمد على الرمزيه ذى فيلم اسكندريه كمان وكمان واسكندريه ليه لكن افلامه فى مجملها رائعه يكفى انه صاحب فكر وصاحب مبدأ
الله يرحمه

فاتيما يقول...

يا ليدى
أزيك الأول
ثانساً بحييكى على البوست دا و أى بوست عن يوسف شاهين
الخلاف على قيمته كفنان و إنسان وارد
بس خلى بالك
الراجل دا شأنه شأن كل العظماء
بيحتاج وقت عشان الناس تقدر قيمته
يعنى لازم الناس تشوف الغث من الفن عشان تترحم على أفلامه الحلوة
أنا بستغرب لما حد يقول على أفلامه وحشة ؟؟
و بحترم قوى اللى يقول مبفهمش أفلامه
و بالتالى يبقى الحكم على قيمته تتاجل لحد ما تتفهم الأفلام دى
زمان مثلاً كنت بتفرج على فيلم الإختيار و أقول لروحى هوه عاوز يقول غيه
و بعدين لما كبرت شوية شفته بعين تانية و بقى الفيلم المفضل ليا
الحكاية محتاجة وقت و مزاج معين
الله يرحمه و يغفرلله اى ذنوب
أنا شايفة إنه نفع اكتر ما أذى
و يا عالم هيبقى عندنا واحد زيه تانى و لا لأ فى الزمن الاغبر اللى إحنا عايشينه دا
تحياتى يا ليدى و أحييكى تانى

كيكى يقول...

حبيبتى..واحشتينى جداااااااااااااا
اييييييييييييييييييية
التحليل الرائع دة الافلام يوسف شاهين..بجد ابدعتى...يا حبيبتى...
بجد كان مخرج رائع....
الناصر صلاح الدين ولا الارض ولا هى فوضى ولا..................
المصير دى اكتر افلام لى بحبها...
الله يرحمة
انا ضايقنى اووووووووووووى
الى قالوا مشاهد فضحة وانة كمنوش بيفهموا افلامة....
بالعكس افلامة بجد الى يركز فيها هيفعم اوووووووووووووووووى...
وبغض النظر على المشاهد المهم القصة والمشاهد مش اقحام زى الافلا م اليومين دلوقتى...
يعنى مثلا سهر اليالى..بيناقش قضية مهمة اوووووووووووووى رغم انة كذا مشهد بس المجمل نحفة ولا اسرار البنات ولا اوقا ت فرغ هكذا...
دى افلام لمخرجين تانين..بس تحفة
اقصد الناظر مش القصة او المضمون
وضحت
الله يرحمة تعرفى الاليزية فى فرنسا نعى فى بيان وناس كتيرررررررررررر برة زعلوة علشانة الله يرحمة
........................
انا بقى فى ظروف عائلية وهطرا امشى وهمة معندهمش نت...
هغيب فترة هتوحشينى اووووووووووووووووووى
بجد
باى يا طفلتى...
هتوحشينى اووووووووووووووووووووى
كيكتك انتى بس
امواااااااااااااااااااااااااااة
عوووووووووووووووووووووووووووو
مش تنسى كيكة

كيكى يقول...

سورى الكتابة طلعت غلط
اقصد ان المناظر الخارجة مش هى الى بتبقى قضية الفيلم
اقصد قضية الفيلم بتبقى اهم من كدة بكتيررررررررررررررررررررررررررر
اووووووووووووووووووووووووووووووى
هتوحشينى
كفاية بقى علشان معيطش
اعااااااااااااااااااااااا
اموااااااااااااااااااااااااااااااة

طبيبك الخاص يقول...

السلام عليكم
اولا: اى انسان فى الدنيا فى عمله معرض للاخطاء..ومفيش انسان فى الكون اجمع على حب الناس ليه وقدر يقنع كل الناس بيه وبشغله وبفكره
ثانيا: المخرج الراحل يوسف شاهين كان دائما ما تحوم حول افلامه المتناقضات فهناك من يهاجم وهناك من يمدح وودا ان دل فانما يدل انه بيسيب حاله من النقاش حول اعماله
ثالثا:انا بحب له فيلم الناصر صلاح الدين دا جدا ومهما يعاد على قنوات التلفزيون بقعد اتفرج عليه وكانى بشوفه لاول مره وانا كلى فحر وعزه انى مسلم
رابعا:ربنا يرحمه ويتجاوز عن سيئاته

طبيبك الخاص يقول...

معلش نسيت اقولك ان تحليلك الموجز البسيط لافلام شاهين بيدل انك مشاهد واعى جدا بيقدر يطلع من الفيلم بمضمونه بعيدا عن بعض السقطات اللى ممكن عند بعض الناس هى شغالهم الشاغل فى الفيلم تحليلك اكثر من روعه وممكن تبقى ناقده سينمائيه هايله فعلا بون مجامله هذا ما احسسته تحياتى

Lady E يقول...

appy: الله يرحمه يا رب

وعندك حق ع الاقل نلاقي حد يترحم علينا بعد وفاتنا

دايما بتسعدني زيارتك الجميلة

Lady E يقول...

حنين : بعيدا عن تعليقك

نورتي البلوج يا قمرايا

وبصراحه تعليقك استفزني جدا ومردتش اتسرع في الرد

لكن دي وجهة نظرك

والخلاف في الرأي لا يفسد للود قضية

شكرا لتعليقك يا حنين

Lady E يقول...

عصفورة من الشرق : الشكر ليكي يا قمرايا على زيارتك الجميلة دي

وبجد تعليقك عمل ثراء وجمال للبوست

نورتي البلوج يا قمرايا

funckydoctor يقول...

انا بحب فيلم الأرض قوى

Lady E يقول...

فاتيما : بجد انا سعيدة جا بزيارتك الجميلة دي للبلوج يا احلى فاتيما

الحمد لله انا تمام يا رب تكوني بخير

وأكيد يا فاتيما لازم تدافعي عن اي حد اسمه يوسف ههههههه
ربنا يباركلك في يوسف ابنك يا رب

بجد كلامك رائع واحلى من البوست نفسه

تسلم ايدك

وربنا يرحم يوسف شاهين ويرحمنا جميعا يا رب

وانا معاكي في كل كلمة قولتيها عن يوسف شاهين

نورتي البوست والبلوج كله يا جميلة

Lady E يقول...

كيكي : حبيبتي يا حبيبتي

بجد كنت مفتقداكي ولسه مفتقداكي جدا

وده كلام على ادي مش تحليل اوي يعني يا كيكي بس بجد انا سعيده جدا بكلامك

ومتضايقيش ولا حاجه مفيش اجماع من الناس كلها على حب شخص واحد وكمان هما مفهموش الافلام هيحبوها ازاي ؟؟

زي ما فاتيما قالت

انا معاكي في كل كلامك يا قمرايا ما عدا حاجه صغنونه فيلم سهر الليالي و اسرار البنات فيهم فكرة بس انا مش بحب اتفرج عليهم

الله يرحم يوسف شاهين وربنا يرحمنا برحمته يا رب

هتوحشيني اكتر ما انتي وحشااااااني يا احلى كيكة

ربنا يعينك ويوفقك يا رب

وترجعي قريب بقى وتنوريني تاني بجد بجد مفتقداكي جدا جدا

بجد دايما بتسعدني زيارتك للمدونه يا احلى كيكة

ومتقلقيش فهمت الكلام قبل التصحيح
اموااااااااااااااة

Lady E يقول...

طبيبك الخاص : وعليكم السلام ورحمة الله وبركاته

اكيد عندك حق و كلامك سليم فعلا

وانا بعتبر فيلم الناصر صلاح الدين من اهم واروع افلام يوسف شاهين ومن اقرب افلام يوسف شاهين لقلبي لأن زي ما قولت انه بيخلينا فعلا نفتخر ونعتز بالشخصيات الاسلاميه العظيمة اللي زي صلاح الدين

وربنا يرحم يوسف شاهين ويتجاوز عنه يا رب

ومتشكرة جدا على كلامك الجميل دي شهادة اعتز بيها

شكرا لتعليقك الرائع وزيارتك الجميلة للبلوج

Lady E يقول...

funckydoctor : فعلا فيلم الأرض فيلم رائع

(علشان كنا رجالة ووقفنا وقفة رجالة)

شكرا لزيارتك الجميلة للبوست يا دكتر

ميرام يقول...

ليدي ..
ازيك ...
بصي يافندم ...

هو محدش هيختلف في ان يوسف شاهين كان مبدع .. وليه فكر مختلف وطريقة جديده

بس في نفس الوقت هو كان بيعمل حاجات غريبه ..
ومحدش هيختلف معايا برده ان افلام كتير كانت مفسده مهما حاول يوصل فكرة معينه فيها ..
لأنه كان بيلجأ لمشاهد خارجه ..كان من الممكن انه يلمح عنها بدلا من عرضها مباشرة ..

المهم ,,,
هو دلوقتي بين ايدين ربنا .,,
والحكم عليه مبقاش لينا ..
حسناته ليه .. وسيئاته عليه ..
وكفايه اننا نذكر محاسن موتانا ..
ربنا يرحمه ..
ويهدينا جميعا ..
................
خارج التعليق :
تحليلك ممتاز ..
وماتغيبيش علينا ..

تحيـــــــــــــــــاتي

BOOOOOOOOOOCY يقول...

اسفة ان تكون زيارتى الاولى تكون انى مختلفة جدا معاكى
انا شايفة ان يوسف شاهين دة مجرد مخرج قذر
وربنا ريحنا منة ومن شرة
لانى بعترض على اى مشهد اغراء
وفى الاخر يقول اصل المشهد بيخدم الدراما
وانا مش شايفة انة كان لة اى قيمة
لو كان مخرج محترم كان يقدر يقدم افلام كويسة ونضيفة جدا وكان يخلى افلامة فيها مبادىء

لان التلفزيون والسينما بتوصل لكل الناس وطبعا دة بياثر فى الاطفال والشباب لما اوريهم مشهد فية عرى ودة حصل من خلال افلام كتير هو قدمها دة لو مكانش فى كل افلامة
ازاى تكون فى افلام بالمنظر دة
وفى الاخر تطلعوا بية السما لية انا مش فاهمة
لكن افلامة اللى ماحدش يقدر يختلف عنها فيلم جميلة بوحريد والناصر صلاح الدين كانوا فوق ممتازين
سورى لو تعليقى ضايقك بس دة رايي الخاص والاختلاف ف الراى لا يفسد للود قضية

Lady E يقول...

ميرام : الحمد لله تمام يفندم
يا رب تكوني بخير يا قمرايا

وانا متفقة معاكي في أول نقطة

وتاني نقطة انا الحقيقة مش فاهماها لأنك بتعممي الكلام ده على كتير من افلامه ومذكرتيش امثلة
بصراحه انا مشوفتش فيلم للمبدع يوسف شاهين فيها مشاهد زي بعض الافلام الحديثة او الاجنبيه او كتير من الفيديو كليبات

وأكيد عندك حق كل انسان هيتحاسب لواحديه
وربنا يا رب يستجيب دعواتك الجميلة

متشكرة جدا على زيارتك الجميلة دي يا قمرايا

واسفة اني اتأخرت في الرد على تعليقك علشان لسه شايفاه النهاره بس

ومنتظرة بوست جديد ليكي وحشتني كتاباتك الرائعة

Lady E يقول...

BOOOOOOOOOOCY : الاختلاف في الرأي لا يفسد للود قضية أكيد وانا قولت في اول بوست اكتبه على المدونة اني برحب بالنقد البناء بس اسفة جدا اني اقولك ان معظم كلامك تجريح مش نقد

وانا كنت همسح التعليق بس حبيت ارد على كلامك ولأني فهمت من المدونة بتاعتك انك انسانة جميلة غير الصورة اللي اخدتها عنك لما قرأت التعليق

[quote]السلم والثعبان _ البرىء _بنات وسط البلد_اوقات فراغ[/quote]

ده اقتباس لبعض الافلام اللي بتحبيها
تفتكري الافلام دي مفيش فيها الفاظ خارجة ولا مشاهد خارجة برضه
طبعا فيها
اوكي اوقات فراغ بيقدم فكرة عن الشباب وحياتهم مع انه في حاجات خارجة كتير واهمها الالفاظ
لكن الفيلمين التانيين مع احترامي لكل اللي اشتغلوا فيهم ملهمش لازمه
وخصوصا بنات وسط البلد لانه فيلم مش عايزة اقول كلمة جامده هقول فيلم مش كويس
ياريت تطبقي كلامك على الافلام اللي بتحبي تشوفيها

وفي اخر كلامك بتقولي ان المبدع و المخرج العظيم يوسف شاهين ليه فيلمين محدش يقدر يختلف عليهم طب ازاي بقى بتوصفيه وبتوصفي اللي بيحبوا فنه بالكلام اللي قولتيه في الاول

عالعموم شكرا لزيارتك يا بوسي
وكان نفسي اول تعارف بيننا ميكونش كده