الخميس، 28 أغسطس 2008

أفكار جميلة لرمضان أحلى (ان شاء الله)





بسم الله الرحمن الرحيم
رمضان جانا وفرحنا به بعد غيابه وبقاله زمااااااان

لسه فاضل كام يوم على رمضان كل سنة وانتم بألف خير وصحة وسعادة وهنا دايما يا رب
رمضان كريم علينا في كل حاجة في روحانياته وفي أمانه وفي انه بيجمع بيننا على الخير وكفاية ان الفرض فيه ثوابه أكبر من ثواب الفروض في كل الشهور وكمان الشيطان بيقيد ومبيقدرش يوسوس لنا في الشهر الجميل ده

فبالمناسبة السعيدة دي حبيت أقول لكم بعض الأفكار اللي بحاول انفذها كل رمضان واسأل مجرب نتائج الأفكار دي بتكون جميلة جدا وبناخد ثواب وفي نفس الوقت بنحس بسعادة كبيرة جدا

افكار يوم الشك (أخر يوم من شهر شعبان وليلة رمضان)

1- ليلة رمضان ننزل نشتري مجموعة فوانيس صغنونه سعر الفانوس تقريبا جنيه يعني مش مكلف أوي وناخد الفوانيس دي ونديها للأطفال اللي مفيش عندهم فانوس سواء الأطفال دول من عيلتنا او جيراننا او اي حد نعرفه (الأطفال هيفرحوا جدا بالفوانيس وخصوصا ان مش كل الناس تقدر تشتري فانوس لأطفالها)

2- ايه رأيكم اليومين دول قبل رمضان او ليلة اول يوم رمضان نجمع الاطفال اللي نعرفهم ونجهز شوية اوراق والوان وقلم ونعمل مطويات زي اللي بتتباع ونكتب في المطويات دي أذكار او نتكلم عن فضل رمضان او العبادات او نكتب تهنئة بشهر رمضان وبعد لما نخلص المطويات دي احنا ناخد عدد من النسخ والاطفال كمان كل واحد ياخد نسخة وكمان نوزع نسخ على جيراننا او ممكن لو في استطاعة مادية نشتري المطويات دي جاهزة وهي مش بتبقى غالية وناخد منها جزء ونوزع باقي المطويات على عيلتنا وجيراننا (هنقرب المسافات اوي بيننا وبين الناس وهيفرحوا بينا ونفرح بيهم)

3- انا وصحباتي بنحب جدا نشتري بخور خاص بشهر رمضان والبخور متوفر في اي محل عطور او عند العطار غالبا بحب اختار بخور بروائح منعشة زي اللافندر او التفاح الأخضر لأن العطرين دول نفاذين وبيعطروا البيت فترة كبيرة وكمان مننساش جيراننا من البخور ولو حتى الجيران القريبين لينا علشان تبقى كل بيوتنا عطرة في استقبال أجمل شهور السنة
وعلى حد علمي البسيط ان البخور او العطور (جوه البيت) بتساعد الصائم انه يصحصح ويستريح نفسيا لأن قبل المغرب والافطار مستوى السكر في الدم بيكون في أأقل نسبة ليه فالصائم ممكن يحس بإرهاق او عدم ارتياح او عصبية فالبخور او الرائحة العطرة بتقلل كل ده

وممكن ناخد ال3 حاجات دول وممكن نزود عليهم تمر مثلا او اي حاجة تانيه ونلفهم بطريقة حلوة ونوديهم لأقاربنا او اصحابنا او جيراننا

قال رسول الله صلى الله عليه وسلم (( تهــــــــــــادوا تحــــــابوا) فما بالكم لما نتهادى وفي رمضان كمان


قبل الإفطار

أولا : أهم حاجة اننا نساعد ماماتنا او الزوجة او الاخت او اي حد بيحضر الفطار
لأن تحضير الفطار بياخد وقت كبير والعبء كله بيكون على اللي بيحضر الفطار وبالتالي مبيبقاش في وقت للصلاة او لقراءة القرأن علشان الانشغال بالمطبخ فنحاول ندخل المطبخ ونساعد اللي بيحضر الفطار وعلى فكرة الكلام ده للشباب قبل البنوتات لأن كتير من الشباب بيستكبروا يدخلوا المطبخ واحب اقولهم انهم مش احسن من الرسول صلى الله عليه وسلم لأنه كان بيساعد زوجاته وكان خيرا لأهله

ثانيا : قبل الافطار نجهز الأطباق والكوبيات ونحاول اننا نرتبهم بشكل جميل سواء على السفرة او الطبلية او اي حاجة المهم انها مائدة في الأخر فلازم نخلي شكلها حلو

ثالثا : خلال اليوم الرمضاني نختار فرض من فروض الصلاة ونصلي جماعة مع اهل بيتنا و بالنسبة للبنوتات مع بنات الجيران مثلا او مع صحباتنا او مع بابانا او مع اخونا الكبير او حتى ناخد الاطفال ونصلي بيهم جماعة
ويا سلام كمان لو الزوج صلى مع زوجته جماعة هيحسوا بحب كبير جدا لأن طاعة ربنا بتجمعهم
ومحدش من الشباب يقوللي ما انا بصللي في المسجد جماعة هقولو ده فرض واحد بس مش كل الفروض وتقدر تصلي جماعة براحتك في المسجد بس تبقى فرحت أهل بيتك لما صليت معاهم وحسستهم انهم مسؤلين منك وانك الامام

رابعا : احنا كشباب صعب او يكاد يكون مستحيل اننا نعمل مائدة لافطار الصائمين طب نعمل ايه
البديل اننا لو قدرنا نشتري تمر او اي عصير متوفر في البيت نوديه للمسجد علشان المصليين اللي بينتظروا المغرب يفطروا على التمر ده او العصير ونبقى اخدنا ثواب افطار صائم ولو حتى نفذنا الموضوع ده ليوم واحد بس احسن من اننا منعملش حاجة خالص


عند الافطار

1- نغتنم الفرصة وندعي على اد ما نقدر لأن الصائم ليه دعوة مستجابة وده اللي بشرنا بيه الرسول صلى الله عليه وسلم ومتنسونيش في دعائكم

2-لازم ننتظر بعض عند الافطار مش كل واحد يفطر لواحده ونحاول نكون اول حد يقدم التمر لكل اللي بيفطروا معانا (يعني يبكون احساس جميل لما يبقى اول حاجة الصائمين يفطروا عليها تبقى من ايدك وكمان نحتسب ثواب ان الموضوع ده صدقة عند ربنا سبحانه وتعالى )

3- نعجل بالافطار لما نسمع الأذان و نحاول يكون اول افطارنا على تمر ولبن (حليب) لأننا كده بنتبع السنة النبوية في الافطار وكمان الافطار كده ليه فوائد صحية كتير


في استراحة صلاة التراويح


إيه رأيكم نقضي الفترة دي في الاستغفار والتسبيح والذكر وبلاش ننم وشوفي فلانة لابسة ايه
وشوف فلان شكله عامل ازاي

وكمان ممكن نستغل الإستراحة ونبعت رسائل (مسجات) لأهلنا او اصحابنا اللي بعيد عننا
سواء هما بيصلوا في مكان تاني او مسافرين ......... الخ
يعني مثلا لو زوج يبعت لزوجته رسالة فيها أذكار او تهنئة او يقولها (( يا رب دايما متجمعين في طاعة الله ))وخصوصا ان كل واحد منهم بيصللي في مصلى يعني مش بيكونوا مع بعض في مكان واحد

وفي الأخر ربنا يبلغنا رمضان يا رب ويتقبله منا خالصا لوجهه الكريم
كل عام وانتم الى الله أقرب وعلى طاعته أدوم ولجنته أقرب

----------------------------
كلام جاديد :

كده اشطة اوي حبايبنا الحلوين اتفقوا على الا يتفقوا
وكل واحد بيصوم مع نفسه
وبما اني خارج حدود البسبوسة فرمضان عندنا يوم الثلاثاء ان شاء الله

هناك 29 تعليقًا:

Mona Shereif يقول...

انا فرحانه بجد بقرب رمضان
يارب بلغنا يارب
افكارك جميله اوى
بس عايزه اقولك
الفوانيس غلت اوووووى
ده انا صدمت يا بنتى لما رحت اشترى وطبعا ما اشترتش
لانها بقت بأغانى وحاجات مالهاش علاقه برمضان
بس عارفه نفسى فى فانوس بجد
هههههههههههههههههههههههههههههههههههههههه
لا ويكون من ابو شمعة
يارب تغسلنا يارمضان
كل سنه وانتى طيبه يا قمر

Rannon يقول...

كل سنة وانت طيبة يا جميل D:
أفكار جميلة فعلا
جزاك الله كل خير

ومستنيين الباقي :)

e_emy يقول...

افكار جميلة اوووى
ربنا يجزيكى كل خير يـــــارب

وكل سنة وانتى الى الله أقرب

تحياتى

عروسة ننوسة يقول...

كل سنة وانافكار بجد حلوة اوى وتقرب الناس من بعضها
تسلمى

blue-wave يقول...

والله افكار تحفه
ياااااااااارب بلغنا رمضان وخرجنا منه مستفيدين مش مضيعين ولا مقصرين
يااااااااااااارب

كيكى عوووووو يقول...

ياااااااااااااااااااة
كبرتى اوووووووووووى
يانونتى
اية الافكار دى
!
!
بجد جميلة ربنا يجزيكى بيها ويسعدك ويفرحك
الهم ما امين
مرتية ومنظمة
امممممممممممممممممممممممممجميلة اوووووووووى انى اعرف الصفات دى فيكى يا نونتى وبتحبى تساعدى الناس
ربنا يفرحك
انا زعلانة من حاجة واحدة
اية انا وصاحيتى دى
ها
بجد خلتينى اغير منهم
!
!
هو انا كل شوية اعدائى يزيدوا
مش كفاية فوفو علية
لااااااااااااااااااااا
كماااان اصحابك
ماااااااااااااشى
يا نونتى
رجعتنى طفلة اهو زيك وبقيت اغير
والله اخلى الساحر
يخطفهم همة وفوفو..
انتى معندكيش غير كيكة بس
فاهمة
لمة والله ازعل
ها
بااااااااااااى
يا نونتى
عوووووووووووووووووووووووو

شفـقــة و إحســــان يقول...

كل سنة وانتى طيبة

kochia يقول...

كل عام وانتم بخير

افكار حلوة اوي فعلا
جزاك الله خير

تحياتي

Lady E يقول...

sometimes: منورة البوست بجد يا قمرايا
وطبعا شهر رمضان حبيبنا وربنا يسعدنا دايما بيه يا رب
وتسلميلي يا رب على رأيك الجميل
وبعدين كل حاجه غليت جدا فلازم الفوانيس تغلى
علشان كده الفوانيس الصغنونة دي بتنقذ الموقف
وعارفة فعلا الفوانيس بتاعت الشموع دي بتبقى رووووووعه ومش غالية خالص واحلى من فوانيس الصين
انا كان عندي فانوس بشمعة وكان دايما بيلسعني هههههه
واعتقد لو قولتي لمحمد على فانوس مش هيتأخر (انا بهدي النفوس بس ) :)
بجد دعوتك جميلة جدا ويارب تغسلنا يا رمضان فعلا
وكل سنة وانتي بخير وصحة وسعادة دايما يا رب
دمتي بكل خير ورمضان كريم

Lady E يقول...

rannon : هيييييييييييييه رنون اتكلمت اخيرا
انا بكون سعيدة جدا كل مرة بتزوري المدونة فيها
وسعيدة جدا جدا بزيارتك اللي بتعليق المرة دي
وعيونك حلوين علشان شوفتي الأفكار جميلة
كل سنة وانتي بخير وصحة وسعادة وهنا دايما يا رب
وجزانا واياكي يا قمرايا
وانا فعلا كملت البوست وفي انتظارك مرة تانية ان شاء الله

Lady E يقول...

e_emy : وجودك في البوست هو الأجمل يا قمرايا
وربنا يجزيكي كل خير يا رب
ويااااارب ربنا يستجيب دعوتك الأكثر من رائعة دي ليا وليكي ولكل المسلمين يا رب
وكل سنة وانتي بخير وصحة وسعادة وهنا دايما يا رب
نورتي البوست والبلوج كله ورمضان كريم عليكي ان شاء الله

Lady E يقول...

عروسة ننوسة : مفيش أحلى من وجودك في البوست يا أحلى عروسة
وياريت فعلا كل الناس ترجع تاني تقرب من بعضها وتحب بعضها
كل سنة وانتي طيبة وبكل خير وصحة وسعادة
دمتي بخير دائما

Lady E يقول...

blue-wave : تسلم يا دكتر
تعليقك الجميل هو اللي تحفة
ويااااااااااارب ربنا يستجيب دعواتك الرائعة دي
وكل سنة وانتا بخير وصحة وسعادة وهنا
نورت البوست ورمضان كريم عليك ان شاء الله

Lady E يقول...

كيكي : حبيبيتي حبيبيتي
انا مهما كبرت صغنونة يا كيكي ناقص تقوليلي يا عروسة كمان زي ما اغلبية الشعب بيندهولي
مالها نونتي يعني :)
وبعدين انتي اللي جميلة يا قمرايتي
وربنا يجزيكي كل خير يا أحلى كيكة
وان شاء الله ربنا يستجيب منك الدعوات الجميلة دي ليا وليكي ولكل المسلمين

وعلى فكرة متتغريش مرتبة ومنظمة دي مش دايما هههههههههه
لكن مساعدة الناس موجودة الحمد لله وبتسلم عليكي :)

وبالنسبة لأنا وصحباتي انا قولت صحباتي
لكن انتي اختي وصديقتي يا كيكتي الجميلة

وبعدين انتي اصلا احلى طفلة على رأي تيمو حسني بريئة ورقيقة
وبعدين ميهونش عليكي تخلي الساحر يخطفهم لأنهم هيجننوه

كل سنة وانتي بخير وصحة وسعادة وهنا دايما ياااااااارب

كيكى عوووووو يقول...

يانهاااااااااااااااار
لسة مردتيش علية
والله كنت هخش اناااااام
بس قلت ام شوف نونتى قالتلى ايييييييييية
مااااااااااشى
يانونتى

Lady E يقول...

شفقة هانم واحسان بك : هيييييييييييه اخيرا القمرين شفقة هانم واحسان بك عندي في المدونة
وكمان كتبوا تعليق انا فرحاااااااااانه جدا بيكم
كل سنة وانتم طيبين وبخير وصحة وسعادة وهنا دايما يااااااارب
نورتوني وسعيدة جدا بزيارتكم ورمضان كريم عليكم ان شاء الله

Lady E يقول...

kochia : أهلا بيكي يا قمرايا
انا سعيدة جدا بأول زيارة ليكي للمدونة وان شاء الله متكونش الأخيرة
كل سنة وانتي طيبة وبخير وصحة وسعادة دايما ياااارب
وجزانا واياكي يا جميلة ومرورك بالمدونة هو اللي فعلا جميل
دمتي بكل خير

كيكى عوووووو يقول...

يانهااااااااااااار
ظلمتك يارروحى
قلبى
فوفو السبب بقى
والله
والله
اتحسدنا
بمووووووووووووووووووووووت
فيكى
بجد
اطلعى برة كلمينى على الشات بوكس

كلام حسام يقول...

رمضان كريم وما تلعبيش بالفانوس في الشارع

غير معرف يقول...

افكار حلوه زيك
بس ماليش دعوه انا عايزة فانووووووس
عايزه فانوووووس
:D :D :D

كل سنه وانتي طيبه
رمضان كريم

Lady E يقول...

كيكي : شوفتي ظلمتيني ازاي

لولا انك وحشااااااني جدا كنت ندهتلك ابلة ظاظا

ربنا ميحرمنيش منك ابدا يا أحلى وأجمل كيكي في حياتي

Lady E يقول...

شملولي بن سحلولي : أهلا بحضرتك

وكل سنة وحضرتك بخير وصحة وسعادة يااااااارب

وحاضر مش هلعب بالفانوس في الشارع

هلعب بيه في الكلية بس

نورت البوست والمدونة كلها

Lady E يقول...

hager za3bal : تسلمي يا قمرايا

انتي اللي عيونك حلوين علشان شوفتي الأفكار حلوة

وانا كمان عايزة فانوووووووس

بصي بقى احنا ندور على حد يتبرع ويجبلنا فانوس

كل سنة وانتي بخير وصحة وسعادة دايما يارب

وان شاء الله رمضان كريم عليكي وعلينا

غير معرف يقول...

افار جميلة

كل سنة وانتي طيبة

رمضان كريم

Lady E يقول...

afew good men : مرورك بالمدونة هو الأجمل


كل سنة وحضرتك بخير وصحة وسعادة دايما يا رب

وان شاء اله رمضان يكون كريم علينا وعليك

هانى زينهم يقول...

افكار جميلة يا ريت نقدر على ربعها .
كل سنة وانت طيبة

Lady E يقول...

هانى زينهم : منور يا مستر

تعليق حضرتك هو اللي جميل

وهي افكار بسيطه سهل تنفيذها بس حضرتك حاول تجربها وهتلاقي انها مش هتاخد وقت من حضرتك بس هتحس بعدها بسعادة كبيرة جدا وفي نفس الوقت هتاخد ثواب

وكل سنة وحضرتك بخير وفي صحة وسعادة وهنا يا رب

مصراوى يقول...

كل عام وانتى بخير هاااااااااااى انا اول مرة اعلق عندك فى هذة المدونى الجميلة بس فى حاجة انتى نسيتى الى احنة فى رمضان لانك قلتى فى البوست الى رمضان فاضل علية ايام تحياتى على فكرة انا اول مرة اعلق عندك ومش هتبقا اخر مرة انشاء الله بس متنسيش زيارت مدونتى وكتابت الرئى لانى بهتم براى الصدقاء اكتر من رايى

Lady E يقول...

عالم الحب : أهلا بيك

احنا فعلا في رمضان كل سنة وانتا طيب

بس انا كاتبة البوست قبل رمضان

شكرا لزيارتك الجميلة