الجمعة، 8 أغسطس 2008

رمضان يا أحب الشهور لقلبي

بجد انا محتارة كاتبه كذا موضوع في الأجنده بتاعتي وبالرغم من كده مش حابه اكتب ولا واحد منهم في المدونة دلوكيت




المهم انا قولت هكتب بقى واحاول ابعبر عن نفسي شوية

اقتراب شهر رمضان الكريم شاغل معظم تفكيري

ولقيت موضوع مستفزني جدا اليومين دول شوفتو التلفزيون واللي بيعمله فينا اعلانات كتييييييييير على مسلسلات رمضان بجد حاجه تغيظ وتخنق اشمعنا رمضان بالذات اللي بيحطوا الكم الرهيب ده من المسلسلات والبرامج فيه كنت بتفرج على برنامج الدين والحياة على قناة الحياة وفأجه الاقي سيل من المسلسلات وكلها جايه على قناة واحده وهي قناة الحياة وطبعا في رمضان ووقتها اللي بيقدم المسلسلات دي بيقول رمضان يقربنا رديت من غير ما افكر في الكلام (كده رمضان هيبهدلنا مش هيقربنا) ماما ردت عليا وقالتلي( لا فعلا رمضان كده هيقربنا بس من المعاصي انتي شوفتيه حدد وقال رمضان هيقربنا من ايه اهو قال هيقربنا وخلاص)طبعا مش هنكر اني كنت مبهورة السنين اللي فاتت بالتلفزيون في رمضان وكنت مش بقوم من قدام التلفزيون وطبعا ده كان بيأثر على مستوايا الدراسي بطريقة فظيعه بس الحمد لله قللت جدا من التلفزيون في رمضان اللي فات واكتفيت بمسلسلين كنت بشوفهم السنه اللي فاتت واحد ساعة الافطار والتاني وقت السحور لمجرد شغل الفراغ مش اكتر
واول مره احاول انتظم في صلاة التراويح وبجد هي اسم على مسمى لأني بحس ان الصلاة دي بتروح عني وبتشيل اي هموم او حزن
نفسي رمضان السنة دي يكون خير علينا ان شاء الله ونكثر من الطاعات اللي ثوابها في رمضان اكبر من ثوابها في اي وقت تاني
نفسي اختم القرأن الكريم ونفسي اجرب صلاة التهجد في الثلث الأخير من الليل


اللهم بلغنا رمضان وارزقنا حب طاعتك فيه بجد اللي بيضيع منه ثواب شهر رمضان مفيش حاجه ممكن تعوضه

هناك 18 تعليقًا:

blue-wave يقول...

اللهم بلغنا رمضان
وارزقنا فيه الغفران
وابعدنا فيه عن المسلسلات
وزدنا فيه من الحسنات
اعطنا الخير الكثير
وجنبنا الفوازير
:))))

طبيبك الخاص يقول...

وانا ضغير فى الثانويه كنت بحب التلفزيون جدا فى رمضان
لكن بصراحه لحظه خروجى من الثانويه والتحاقى بالكليه فى محافظه اخرى غير المحافظه اللى انا عايش فيها بعدت تماما عن التلفزيون
كل سنه وانت طيبه ويارب بلغنا كلنا رمضان
تحياتى

Lady E يقول...

blue-wave : ايه الكلام الجميل ده

منور البوست يا دكتر

اللهم أمين

شكرا ليك يا دكتر واسعدتني زيارتك الجميلة للبلوج

Lady E يقول...

طبيبك الخاص : هو التلفزيون بيبقى عامل زي المغناطيس ايام الثانوية العامية فعلا

وكل سنة وانتا طيب وبخير وصحة وسعادة يا دكتر

اللهم أمين ربنا يبلغنا رمضان يا رب

وشكرا للزيارة الجميلة دي

غير معرف يقول...

بصي ياستي

انا مش خايف غير من النت

علشان انا خلاص شلت الدش ةقفلت التليفزيون

عموما كل سنة وانت طيبة

حتصومي ولا زي كل سنة

ربنا معاك علي فكرة

انا سعيد بزيارتك لي وتعليقاتك الجميلة

واسف لو مش برد عليكي بسرعة نظرا لظروف العمل


بس انا بوعد بالمتابعة زي زمان

تحياتي

Lady E يقول...

afew good men : أيووون عندك حق النت ده مشكلة لوحده بس في رمضان مش بيبقى في وقت فاضي كتير للنت

وبعدين قر واعترف ازاي قدرت تستغنى عن المدعو تلفزيون واخوه الكبير الدش


وكل سنة وانتا طيب وبخير وبصحة وسلامة يا رب

وان شاء الله هصوم زي كل سنة ههههههههه

وربنا يوفقك في شغلك يا رب

شكرا للتعليق الجميل ده

وهستنى زياراتك للمدونة دائما ان شاء الله وعد الحر دين عليه

أحمد بكر يقول...

رغم انك طفله مش عاوزه تكبر لاكن بجد انتى بتميزى اوى و دماغك عجبانى
تحياتى

Lady E يقول...

بيكر(baker) : أهلا وسهلا بيك

وبعدين ده الاطفال دول اجدع ناس

وحاجة تسعدني اني انتمي لعالم الاطفال

متشكرة جدا على كلامك

وبجد لو ينفع كنت بعتهالك هدية

بس عمرك شوفت حد بيمشي من غير دماغ برضه ههههههه

شكرا على زيارتك وان شاء الله تقولي رأيك في البوستات الزيارة الجايه

tarek alghnam يقول...

كل عام وانتى بخير
وربنا يبلغك رمضان
ويغفر الذنوب والخطايا
ويجعل هذا الشهر شاهد لكى لا عليكى
تقبلى تحياتى
ودمتى بود

Lady E يقول...

طارق الغنام : اهلا بحضرتك وشيء يشرفني لما حضرتك تزور المدونة المتواضعة دي

وكل عام وحضرتك بكل خير وصحة وسعادة

دائما يا رب

ربنا يبلغنا جميعا رمضان ويجعله شهر خير علينا يا رب

أمين وربنا يا رب يستجيب دعوات حضرتك الأكثر من رائعة

جزاك الله كل خير

وبجد انا سعيدة جدا جدا بزيارة حضرتك الكريمة للمدونة لأني عرفت مدونة حضرتك القيمة وان شاء الله هتابعها

دمت بخير دائما

An Author يقول...

بجد فعلا مستفزين قوى
المشكلة دلوقتى ان الناس مش قادرين يشيلوا الربط بين رمضان و التلفزيون و الدراما من دماغهم
ربنا يهدينا جميعا

انا بقالى كام سنة مقاطعة المسلسلات و الحمدلله عدى عليا ييجى 3 رمضانات مش بتفرج فيهم على مسلسلات

Unknown يقول...

آمين
بجد حكاية التلفزيون ده
أقولك انا مش بتابعوا خالص ولا بعرف بيجي فيه ايه طول السنة وفي رمضان مش عارف بحنلو ليه
خير ربنا يهدينا جميعا ويقدرنا على صيام رمضان يارب وقيامه
مفيش حاجة من مسلسلات رمضان تستاهل إلا مسلسل باب الحارة السوري بيجي ع ام بي سي الساعة 9 يعني وقت التراويح شفتي بأه بس بيتعاد الساعة 5 الفجر و3 العصر يعني طبعا مش هضيع التراويح عشانه أشوفو ف الإعادة
كل ودي وربنا يبلغنا رمضان ويتقبله مننا يارب
تحيتي وياريت تنوريني

كـــيــــــــارا يقول...

كل سنه وانتي طيبه يازهورتي

وان شاء الله يكون خير علينا ويعوده علينا باليمن وبالبركات

ومش تزعلي مني ياعسل والله ببقي فاكره اني رديت بس عارفه بقي الدكتور وجيه مخلي دماغي مش فيا بسبب البحث ياقمر

سلاموز كيارا

Lady E يقول...

جيداء : بجد انا سعيدة جدا بتعليقك

الجميل اللي عرفني بمدونتك الرائعة

واللي منمتش بسببها امبارح من كتر التفكير في البوستات بتاعت البلوج
وبجد مواضيعك جت في وقتها واجابت عن تساؤلات كتير كنت بفكر فيها فبجد تسلم ايدك

وفعلا حاصل ربط كبير بين المسلسلات ورمضان مع ان المفروض ان الربط يكون بين العبادات وبين رمضان اقوى

ربنا يستجيب دعائك ويهدينا

ويا رب ربنا يثبتك على الطاعة ويكرمك ويسعدك يا رب

Lady E يقول...

كاتب مصري : نورت البلوج بجد

وللأسف موضوع انك بتحن للتلفزيون في رمضان ده نتيجة الاعلانات اللي بتيجي كل 5 ثواني عن المسلسلات وبرامج رمضان من قبل رمضان بشهر او اكتر

و ربنا يستجيب دعائك الجميل يا رب

وايه الاعلانات دي يا كاتب انتا مع ام بي سي ولا ايه ههههههه

مسلسل باب الحارة جاي الجزء التالت وانا حتى مش عارفه قصته كانت ايه
شوفت كذا حلقه منه بس كان فات كتير فمعرفتش افهم الاحداث اوي

بجد عجبني جدا انك مش هتفوت صلاة التراويح علشان المسلسل ربنا يكرمك يا رب ويا ريت شباب المسلمين زيك

Lady E يقول...

كيارا : وأنتي طيبة وبصحة وسعادة يا نونا

اللهم أمين

ومتقوليش كده انا عارفه انك مشغولة في البحث ربنا يوفقك

وعارفه معاناتك مع داكتور وجيه لأن عندي في الكلية نسخة معدلة شوريرة اكتر داكتور حامض
ربنا يهدينا ويهديهم

سلامنجه بالمنجه

غير معرف يقول...

حصلت مشكلة انهم حيبنو علي سطوح العمار فبوظوه قمت نزلت الدش

واتفاجأنا في البيت اننا مش مفتقدينه خالص بل بالعكس وكانه غير موجود

وخلاص نسيناه

عقبالك

انت فين من زمان

تحياتي ليكي

Lady E يقول...

afew good men : يعني زي المثل اللي بيقول رب ضارة نافعة

وفعلا بعد فترة الواحد بيتأقلم انه من غير تلفزيون وبيلاقي وقت اكبر في حياته

بس بلاش عقبالك دي لأن التلفزيون بالنسبة لي مش ضروري اوي بس برضه مقدرش استغنى عنه وكفايه اني كنت بفكر ادرس اعلام من حبي فيه

وانا موجودة ومتابعة كمان
كل سنة وانتا طيب وبصحة وسعادة دائما يا رب بمناسبة عيد ميلادك والنصف من شعبان

وكمان الف الف مليون مبروك ليك على انك الموظف المثالي

ربنا يوفقك دائما