الاثنين، 18 أغسطس 2008

وحشتينيييييييييي يا فوفو

من أول الأسبوع وأنا مفتقدة فوفو بشكل كبير جدا أحب أعرفكم ب فوفو هي رفيقة دربي من 5 شهور تقريبا من أول لما أخدت الرخصة
فوفو هي عربيتي حبيبتي واخر اسم ليها واقرب اسم لقلبي هو اسم فوفو والاسم ده جه بعد اسمين لأن اول ما شوفتها سميتها البطيخه لأن لونها أخضر ومكعورة او مكببة (دوروا في القاموس على معنى الكلمات دي انا مش مسؤله )وبعدها سميتها الهمر علشان كنت باخد كمية تريقة رهيبة على فوفو حبيبتي علشان موديلها قديم شوية وكنت بزعل جدا فسميتها همر علشان هي بالنسبة لي همر (وهمرك العارجه تغنيك عن سؤال اللئيم) وفي الأخر جه اسم فوفو من فولكس (شبه عربية مصطفى قمر اللي بتيجي في الاعلان بتاع فيلمه الجديد وعربية احمد حلمي في ميدو مشاكل وافلام واغاني تانيه كتير) المهم هبقى احكيلكم على فوفو اكتر بعدين
النهارده حصل حاجة خلتني احمد ربنا ان فوفو مش معايا
كنا رايحين مكان نتفسح وبعدين كنا قريبين من البحر فاستأذنت بابا نروح نتعشى على البحر وبابا وافق الحمد لله
المهم نزلنا من الكتكوتة (لا الكتكوتة دي تبع بابا لكن فوفو تبعي انا) ولسه بهزر مع ماما وبتكلم معاها وفجأه سمعت صوت رعبني صرييييخ
واحدة بتصرخ بصيت ناحية الصوت لقيت عربية ربع نقل واقفة في نص الطريق بالعرض
(علما ان الطريق رايح جاي وضيق يعني ممكن جدا العربية كانت تتخبط)
المهم علشان مطولش عليكم هقولكم ايه اللي حصل بالتفصيل البوست الجاي ان شاء الله
وعلى فكرة أغنية افتكرت الجديده بتاعت محمد حماقي بتبعبر شوية عن اللي حسيت بيه
وخصوصا الكوبليه اللي بيقول ( طب ازاي في حاجات بتموت وتيجي الصدفة تحييها , وافتكرت مسكته في ايدي وايدي خلاص سايباه)
والكوبليه ده كان في بالي طول الطريق لبيتنا بعد لما شوفت اللي حصل وكمان أغنية انا وشادي لفيروز

هناك 31 تعليقًا:

blue-wave يقول...

ايه يا بنتى دا؟
احنا مافهمناش حاجه خالص
بتشوقينا يعنى؟؟؟
ماشى ماشى
مستنين البوست الجاى
بس وحياتك ماتأخريه

Lady E يقول...

blue-wave : ايه يا دكتر ايه اللي حصل
اها عندك حق انا عارفة ان النهاية مش مفهومة علشان دي مش نهاية البوست

وهو تشويق وفي نفس ذات الواقت علشان البوست كان كبير فكان هيخللي اللي يقرأه يمل ومتوصلوش الفكرة اللي عايزة اوصلها من البوست

وبجد حضرتك كده تستاهل جايزة لأن مدونين كتير شافوا البوست و خافوا يردوا على حاجه مش فاهمينها

وان شاء الله مش هأخر البوست الجاي اسبوع ان شاء الله واكتب باقي البوست :))

شكرا على اول تعليق دائما يا دكتر

غير معرف يقول...

هههههههههههههههه

حتضحك وبس
هههههههههههههههههه

☼♫♪ عمــاد الدين يــوسف ☼♫♪ يقول...

ههههههههههههههههههههه
اللـــهم ارزقني الفوفو بتاعتي واعتقني من بهدلت المواصلات قادر يا كريم
اللهم رد إليهـا فوفو الغاليه سالمــه متعمره متفوله يارب العالمين

Lady E يقول...

afew good men : ربنا يفرحك دايما

بس انا مش عارفة بتضحك على ايه؟؟

ده انا قولت واحدة كانت بتصرخ طب

هتضحك ازاي تبقى مجنونه بقى

وبرضه مش هقول ايه اللي حصل الا البوست الجاي ان شاء الله

شكرا ع التعليق مع اني مفهمتش مين اللي هيضحك بالضبط

Lady E يقول...

المحرر الصحفي والشاعر : عمــاد الدين يوســـف : اهلا بيك

اللهم أمين بجد بهدلة المواصلات دي حاجة صعبة بس هتتنقل من بهدلة واحدة لعدة بهدلات منها بهدلة الميكانيكي ومنها بهدلة بتاع الكاوتش اللي بقى حاجة اساسية اني اعدي عليه كل يوم
ويا سلام كمان لما تروح البنزينة ومتلاقيش بنزين وبهدلات تانية كتير
واكبر بهدلة فيهم لما تيجي تطلع الرخصة لو لسه مطلعتهاش
اييييييه مش عايزة اعقدك اكتر من كده

ربنا يوعدك بفوفو بنت حلال متتعبش قلبك وجيبك معاها

شكرا على الزيارة الجميلة والدعاء الجميل

Mkjwe يقول...

الحمدلله على فوفو إنها بخير ويارب دايماً وعلطول تكون في أمن وأمان وبخير وسلامة كمان لؤؤل ,,, وفي أنتظار بقية التقرير الجميل تحياتي وأحترماتي

mohamed ghalia يقول...

أوكى فى إنتظار بقية الحكاية
كل سنة وإنتى طيبة
دمتى بود
تحياتى

Empress appy يقول...

مبروك عليكى فوفو وخلى بالك من نفسك وانتى سيقاها

funckydoctor يقول...

ده فزورة أكيد :)

كـــيــــــــارا يقول...

قمريييييييييتي ليكي تاج هديه جاوبيه

Lady E يقول...

L0vElYGh0sT14 : اهلا بيك

وبجد حسيت من كلامك انك بتتكلم على مصر مش على فوفو

فوفو مش بخير حاليا هي بتتصلح وبتتجدد بس ان شاء الله كمان شهر هتبقى كويسة الحالة مطمئنة يعني الحمد لله

شكرا على زيارتك الجميلة ونورت المدونة

Lady E يقول...

mohamed ghalia : أهلا بيك

وانا هنتظر تعليقك على باقي الحكاية البوست الجاي ان شاء الله

وكل سنة وانتا بخير وصحة وسعادة يا رب

متشكرة جدا على التهنئة الجميلة دي وربنا يبلغنا رمضان يا رب

شكرا على زيارتك الجميلة للمدونة وتعليقك الجميل

Lady E يقول...

appy: الله يبارك فيكي يا قمرايا تسلميلي

وانتي كمان خدي بالك وانتي بتسوقي بطوط

بجد سعيدة جدا بردك شكل القلوب عند بعضيها لأني بحاول اشوف اخر بوست ليكي بقالي 3 ايام وكل لما ادخل مدونتك الاقي الخلفية بس من غير اي بوستات مش عارفة في ايه
ان شاء الله المشكلة دي متستمرش كتير علشان وحشني كلامك

Lady E يقول...

funckydoctor: عاش مين شافك يا دكتر

هي مش فزورة اوي يعني

ان شاء الله تتحل البوست الجاي

كل سنة وانتا طيب

ورمضان كريم

Lady E يقول...

كيار : مش عارفة اقولك ايه يا نونا

كده تدبسيني في تاج

بس انا مقدرش ارفض هدية منك يا قمرايا

شكرا ليكي يا جميلة وكل سنة وانتي طيبة

Zanooba (Zeinab sab9n) يقول...

بس أسلوبك عجبني أوي و ربنا يخليلك فوفوو تتربى في عزك و لا يهمك أن صحابك يتريقوا على فوفو يعني طالما أنت بتحبيها مفيش رأي مهم :) و مستنية بوستك اللي جي عشان أفهم إيه اللي حصل

سلااااام

Lady E يقول...

Zanooba (Zeinab sab9n) : أسلوبك الأحلى يا قمرايا وعيونك حلوين علشان كده شوفتي المدونة حلوة
بالنسبة لفوفو فصحباتي بيحبوها ومبسوطين بيها المشكلة في تعليقات الناس اللي في الشارع وبعض الناس المحبطين
وهستنى تعليقك على البوست الجاي ان شاء الله
اوعي متجيش بجد هزعل جدا
نورتي البوست والبلوج كله يا زوزو

عروسة ننوسة يقول...

مش بيقولك حمارتك العارجة
لا انا زعلانة كنت عايزة بقية الحكاية
ميرسى ليكى كتير على سؤالك انتى اكتر من اخت

عايش... ولكن !!!! يقول...

اوعدنا يارب بفوفو ولا توتو ولا سوسو حتى اى حاجه ترحمنا من بهدلة المواصلات هههههههههههههه
يارب يرجعلك فوفو بس ابقى خدى بالك وانتى سايقه وذاكرى قانون المرور الجديد هههههه
تحياتى
علاء

e_emy يقول...

اممممممممممم

ايه التشويق دا
عموما مستنين البوست بسسسسسسرعة

والف مبروك على فوفو اكيد عشرة عمر بقه
ربنا يقومهالك بالسلامة


سلام ياجميل
تحياتى

كـــيــــــــارا يقول...

قمرررررررررر


ليكي تاج تاني عندي

كده بقوا تاجين جااااااااوبي

عصفورة من الشرق يقول...

كده بردوا يا بنوته بجد شوقتينى اعرف حكاية فوفو والست اللى بتصرخ فى نص الطريق واخيرآ لمسة ايد مين وشادى ايه
انا كده بردها لك تعليق مش مفهوم ذى البوست بتاعك ههههههههه

Lady E يقول...

عروسة ننوسة : وانا بقول البلوج نوره زايد ليه اتاري أحلى عروسة ننوسة هنا وأكيد عندك حق فوفو المفسوسة (كاوتشها مفيش فيه هوا) تغنيك عن سؤال اللئيم
وانا مقدرش على زعلك يا قمرايا وهنشر الجزء التاني حالا دلوقتي ان شاء الله
والحمد لله اني اطمنت عليكي
وبجد سعيدة جدا وفخورة بكلامك انك بتعتبريني أكتر من أخت لأنه شعوري انا كمان
ربنا يديم الود والمحبة دايما يارب
ومنتظرة كتابك يا كاتبتنا الجميلة

Lady E يقول...

عايش ولكن (علاء): أهلا بيك
مين سوسو وتوتو دول تعرفهم ولا ايه انا مش عارفاهم ههههه
ربنا يوعدك بفوفو تبقى زي فوفو بتاعتي كل يوم عند الميكانيكي وبتاع الكاوتش
أمين وانا لسه مجربتش امشي بيها من يوم قانون المرور الجديد علشان كانو هيخدوها امن ونتانة
بس ان شاء الله تتصلح وتبقى كويسة
شكرا على زيارتك الجميلة للبلوج

Lady E يقول...

e_emy

من عنتيني يا ايمي ان شاء الله هنشر الجزء التاني دلوقتي

الله يبارك فيكي يا قمرايا وفعلا هي عشرة سنة وخمس شهور وشوية

أمين يا رب

تسلمي يا قمر على زيارتك الجميلة دي
وهستنى ردك ع البوست الجاي ان شاء الله

Lady E يقول...

كيارا: والله دايما منوراني يا قمرايا

تاج تاني طب مينفعش اتبرع بيه لحد محتاجه
اصلي هلبس الاتنين ازاي يعني ههههههه

ماشي يا نونا هدية مقبولة بس اسمحيلي هأجل الاجابة عليه شوية

Lady E يقول...

عصفورة من الشرق :ههههههههههههههههههههه
بجد بجد انتي عسولة جدا يا عصفورة انا وشادي اغنية فيروز
وافتكرت اغنية حماقي الجديده وهتعرفي ليه اتكلمت عنهم البوست الجاي ان شاء الله
وان شاء الله هنشر البوست الجاي دلوقتي واللي هيحل اللغز ده
انا عندي كام عصفورة من الشرق يعني هي واحدة بس
تعليقك بجد بجد جميل جدا واسعدني جدا يا قمرايا
وعلى فكرة فهمته هييييييييه

nonni يقول...

ايه ده انا المفروض اسمى البوست ده انه الحلقة الاولى فى مسلسلمن مسلسلات رمضان اللى جاية على اساس انى مفهمتش و هستنى الحلقة التانية بس متتاخريش علينا .

Lady E يقول...

nonni : اسمك جميل جدا جدا

ايون مسلسل واقعي من جزئين بس
مش 30 حلقة
وكمان احنا قبل رمضان :)
كل سنة وانتي طيبة
وانا فعلا نشرت البوست التاني اول لما تدخلي عالمدونة ان شاء الله هتشوفيه يا قمرايا
هو انا ااقدر اتأخر عليكو برضه

نورتي البوست والمدونة يا نوني وان شاء الله الجزء التاني يعجبك

نيللي علي يقول...

ماحكتليش أنتى على فوفو ده خاااااااااااالص