الجمعة، 22 أغسطس، 2008

طب ازاي في حاجات بتموت وتيجي الصدفة تحييها؟؟!



ملحوظة بسيطة علشان نبقى على نور البوست حزين شوية ف اللي مش عايز ينكد على نفسياته ميقرأش البوست (وقد أعذر من بعجر)
على بعد من العربية الربع نقل لقيت بنوته عمرها حوالي ما بين السنتين ل3 سنين متكومة ع الأرض (العربية خبطتها) طبعا انا حسيت اني اتشليت وانا واقفة مقدرتش اتحرك وقلبي كان هينخلع على الطفلة دي(ايوة ما احنا طفلات زي بعضينا ولازم اخاف عليها) بابا جري على الطفلة يتطمن عليها والحمد لله العناية الإلهية انقذت الطفلة هي حصل لها بعض الكدمات البسيطة ومكنتش قادرة تقف من الخضة (طبعا اذا كان انا اللي شوفتها مكنتش قادرة اتحرك اومال هي تعمل ايه) بس ان شاء الله هتخف بسرعة
المهم والد الطفلة دي اخدها وجري ع المستشفى وام الطفلة اللي انا كرهتها جرت على العربية وسابت اولادها السبعة عالبحر من غير ما تعديهم الطريق حتى والاطفال دول كلهم صغيرين (يعني مأخدتش عبرة من اللي حصل لطفلتها وكل اللي عملته انها صرخت وخلاص لكن تتعلم من الموقف لأ)
الموقف ده فتح في قلبي جرح كبير مش قادرة انساه
لمحت دموع صامتة في عيون مامتي ودموع صامتة في عنيا حاولنا نخبيها علشان منبوظش الفسحة وافتكرنا حادثة حصلت من فترة بس نهايتها كانت مختلفة
انا وبنت خالي كنا قريبين جدا في السن لبعض وكانت اطيب طفلة شوفتها في حياتي
وفي يوم جت عربية سريعة وخطفتها من الدنيا وراحت بنت خالي عند اللي خلقها (وكان عمري وعمرها وقتها 3 سنين يعني في نفس عمر الطفلة اللي شوفتها النهارده)
راحت وسابتني محتارة بدور عليها في كل طفلة اشوفها لأنها كانت أكتر من أختي, وسابتني ل ليالي كتير كنت ببكي فيها عليها وبتمنى اروح لها
وبعترف اني بجد طول حياتي هفضل مفتقداها وهفضل فاكرة ان كل الناس كانت بتخبي عليا وفاتها ما عدا ماما اللي قالتلي ان (مروة) راحت عند ربنا في الجنة وزمانها فرحانة وحياتها في الجنة جميلة وكنت بقول لماما طب انا عايزة ازورها وترد فورا وتقوللي بعد الشر عليكي(جنة وشر ازاي يعني مكنتش فاهمة وقتها )ومستحيل انسى يوم جنازتها والستات اللي لابسين اسود وقاعدين في اوضتها وحواليهم لعبها وصورها
ربنا يرحمها ويرحم موتى المسلمين اللهم أمين
ويا جماعة اي حد عنده اطفال سواء كانوا اطفاله او اطفال اسرته او اطفال الجيران او اي طفل حاولوا تاخدوا بالكم منه لأن فقدانهم رهيب وصعب جدا ومش ممكن يتنسي
ويا رب منشوفش اي مكروه في احبائنا واهلنا ولا حد من المسلمين يا رب العالمين يا رب ربنا يحمينا من الحوادث ويحمي كل المتهورين في القيادة زي حضرتي
ويا رب متعرضش لأي موقف من مواقف الحوادث بتاعت البني أدميين دي
والحمد لله ان فوفو مكنتش معايا
---------------------------------
تحديث مهم : انا حذرت في بداية البوست انه حزين ومع ذلك معظم الردود لاموني اني كتبت حاجة حزينة
وكل حد رد على البوست نسي انه كان بيبي واول لما شاف الدنيا بدأ حياته بحزن وبكاء
وكمان انا مأجبرتش حد انه يقرأ البوست
اعمل ايه اكتر من اني كتبت ملحوظة في الاول؟؟؟؟؟؟
انا بجد اضايقت لأنكم اضايقتم ولأني قرات بوستات ناس كتير وصلوني لإني اعيط ومع ذلك ملومتش عليهم ابدا
لأني عارفه ان بكتاباتهم بيحاولوا ينسوا احزانهم
انا اسفة جدا اني ضايقتكم ومش هعبر عن احزاني تاني وهحتفظ بيها لنفسي
شكرا لكل اللي ردوا ع البوست
وشكر خاص للرائع - أحمد أبو القاسم وmohamed ghalia و للقمرين كيكي وe_emy
لأني استفدت من ردودهم جدا جدا جدا

هناك 32 تعليقًا:

lotto sweepstakes يقول...

Thanks to the owner of this blog. Ive enjoyed reading this topic.

Lady E يقول...

lotto sweepstakes : you are welcome

and I hope that you really enjoyed reading this topic

e_emy يقول...

): ):

بوست صعب اوووى
ربنا يشفيها يارب وتقوم بالسلامة
ويخليها لأهلها

وربنا يرحم مروة
ويحفظك يارب وخلى بالك من نفسك ومن فوفو

وانا معاكى والدة البنت تغيظ بجد
سايبه اطفالها حتى بعد ما طفلتها حصلتلها حادثة بجد تغيظ
ربنا يهديها ويهدينا كلنا يارب

سلام ياجميل
ربنا يكرمك

mohamed ghalia يقول...

هى الدنيا كده فيها الحزن والفرح
الضحك والدموع بس لما بنفقد أحبتنا بنتأثر قوى بس لازم الحياة تمشى الحياة مش هتقف
بجد إنتى قلبك حنون جدا ربنا يحفظك
وربنا يرحمها ويرحم موتى المسلمين ويرزقنا جميعا الجنة
كل سنة وإنتى طيبة
أنا مستنى موضوعك عن رمضان زى ما وعدتينى
تحياتى

Lady E يقول...

e_emy : اولا بحييكي على شجاعتك انك قرأتي البوست وعلقتي كمان مع ان البوست حزين شوية

تاني حاجة بجد انا اسفة على الاتنين المكشرين اللي في اول التعليق بتاعك وان شاء الله البوستات اللي جايه مش هتكون حزينة

بجد كل دعواتك جميلة زيك يا قمرايا ربنا يستجيبها يا رب

و ربنا يكرمك ويرضى عنك يارب

وبالنسبة لوالدة الطفلة كان نفسي اكلمها بس للأسف مكلمتهاش علشان كنت هنفعل عليها وعلشان مكنش فيا اعصاب اصلا

الحمد لله على كل حال وبجد سعيدة جدا جدا جدا بزيارتك الجميلة وتعليقك

كيكى يقول...

اةةةةةةةةةةةة
ربنا يرحمها يا حبيبتى ويرحمنا كلنا بجد
وماشى يا بتاعت فوفو انتى
ماشى
بقى هى الى وحشتك
اوك
عوووووووووووووووووووووووووووووو

Lady E يقول...

mohamed ghalia : أكيد اومال هي اسمها دنيا مش عليا ليه علشان الفرحة فيها معدودة أوي

الحمد لله على كل حال

ربنا يستجيب دعواتك الغالية

وجزاك الله خيرا

وان شاء الله هوفي بوعدي البوست الجاي هيكون عن رمضان انا لسه بكتب الأفكار حاليا

متشكرة جدا على الزيارة الجميلة دي

وكل سنة وحضرتك بخير وسعادة دائما

Lady E يقول...

كيكي :هيييييييييييييييييييييه انا مش مصدقة عنتيني
امنيتي اتحققت ورجعتي أخيرا
الحمد لله على السلامة يا أحلى وأجمل كيكة في الحياة
كنت حاسة اني وحيدة بجد في غيابك ربنا ميحرمنيش منك ابدا ويباركلي فيكي
وحاولي متغيبيش تاني او تروحي سايبر عم حتاتة كتير بقى
معلش بقى سامحيني علشان البوست الكئيب ده
وبعدين فوفو دي تيجي جنبك ايه بس
انتي اللي في القلب يا حبيبتي وبعدين انتي عارفة الأر بقى
واحنا قلنا هنتكلم بالاشارة فاكره علشان الحسد
وبعدين لو قلت انك وحشتيني فالكلمة دي مش كفاية عليكي
ربنا يديم المودة والمحبة وعووووووو بتاعتك يا رب ههههههه
في حفظ الرحمان يا أغلى أخت وصديقة

الجمعاوي الاصيل يقول...

اللهم عافها واعف عنها واشفها وارحمها

ليه النكد ده بس في اول زيارة لي

أحمد أبو القاسم يقول...

أختي الفاضلة
ما عبرتي عنه هو لحن الحياة فلحن الحياة بداية ونهاية بسمه ودمعه .. لذا لا يجب علينا أن نحزن كثيرا أو نفرح كثيرا فإذا أصابنا احدهما فنصيبنا من الآخر آت لا محالة فإنها صفحات القدر .. ورغم كون الحزن والشجن أرقى المشاعر الإنسانية وأكثرها عذوبة لكن يجب أن لا تسيطر علينا فتغرقنا فيها لكن إذا ما حدث يوماً وغرقنا فيها (رغماً عنا) فلننظر إلى حيث تشرق الشمس معلنة عن فجر جديد لنتعلم الدرس الذي أراد الله أن يعلمنا إياه وهو أن الغروب لا يحول دون شروق الشمس مرة أخرى كل صباح .

رحم الله مروه وأسكنها فسيح جناته

وابدئي بنفسك وخلي (فوفو) تاخد بالها منك
وإن شاء الله ميكونش ليكم انتم الاثنين (ضحايا)

مدونة رائعة تصفحتها ووجدت أنها لعقل كبير ناضج ومشاعر طفولية عذبة

تحياتي

Lady E يقول...

الجمعاوي الاصيل :أهلا بيك

اللهم أمين

معلش بقى على النكد ده بس انا كاتبة تحذير في اول البوست انه بوست حزين شوية

ولو عايز تكسر جو الحزن شوية اقرأ باقي المدونة وان شاء الله هتلاقي ان معظم مواضيعها مش نكديه ابدا

نورت المدونة وكل رمضان وانتا بخير

كيكى يقول...

انا كرهت فوفو من قبل ما شوفها
والله اكسرهلك انتى فاهمة
!
!
ما تجبيش سيرتها تانى
شوفتى اتحسدنا
ست فوفو جت وحسدتنا
ال فوفو ال
سم كدة
ههههههههههههههههههههههه
واحشتنيى موووووووووووووووت بجد
انا بموت فيكى يا روحى يا قلبى انتى
كل سنة وانتى دايما بخير ونكون دايما مع بعض
بس من غير فوفو
اموااااااااااااااااااااااااااااة
عوووووووووووووووووووووووووو

Lady E يقول...

أحمد أبو القاسم : أهلا بيك

في البداية انا حابة أقول اني سعيدة جدا بلقب أختي اللي في اول كلام حضرتك
وده وسام ليا أنا بأعتز بيه
وبجد تعليق حضرتك أكثر من رائع وأحلى بكتير من البوست نفسه
لأن أسلوب حضرتك في التعبير راقي جدا والمفردات اللي استخدمتها من روعتها واحساسها الجميل صعب وصفها بكلام
وربنا يستجيب دعائك يا رب
حلوة الوصية دي لأن فوفو مبتسمعش الكلام وبتيجي في عز الزحمة وتعطل
ف ان شاء الله تتوصى بيا ومتعطلش تاني
اما بالنسبة للضحايا ف ياااارب ميكونش في ضحايا ابدا
((فالله خيرٌ حافظاً وهو أرحم الراحمين)) الأية(64)سورة يوسف
والحمد لله براعي ربنا في الناس بس المشكلة غالبا بتكون في تصرفات بعض الناس سواء العربيات او المشاة

وبجد متشكرة جدا على كلام حضرتك عن المدونة
دي شهادة جميلة جدا وكفاية عليا ان حضرتك اخدت من وقتك وتصفحتها
اسعدني جدا جدا تعليقك
دمت بخير دائما

Lady E يقول...

كيكي : لالالا الموضوع مش موضوع ولا بلاش احسن بتزعلي من سيرتها ههههههه
شوفتي بقى بتغروشي على موضوع الساحر اللي نسيتي تجيبيه معاكي صح
وكل سنة وانتي بخير وسعادة دايما يا كيكة ربنا ميحرمناش من بعض ابدا يا رب
مش هقولك نورتي لأن المدونة مدونتك يا قمرايا
دمتي بود وبخير دايما

كيكى يقول...

على فكرة....
انتى واحشنى اوووووووووووووووووووى
خير الهم ما اجعلوة خيرررررررررر
اظهار حمو الساحرررررر
بدل ما ياخد قلبى ويضربة اة اة ويلسعة بالكبريت جاب قلبك جانب قلبى
علشان كدة انتى النهاردة واحشنى كتيررررر بجد..
ام لاواحظ
ملحوظة
انا قولتلوة يحط شطة فى بقى الى ما تسماش..
1
انتى عارفها طبعا
!
انا بكرها بكرها
اوووووووووووووووووووووى
بااااااااااااااااااى
يانونتى
عووووووووووووووووووووووو

قهوة بالفانيليا - شيماء علي يقول...

البوست صعب ..
انا اتضايقت لما قريته ..
شوفي..
هي الاعمار بيد الله ..
و كل الناس بتموت لما بتستكمل رزقها في الدنيا .. سبحان الله ..
جسمي بيقشعر و الله ..
ربنا يحفظ كل الناس للي بيحبوهم يا رب..

blue-wave يقول...

يا ساتر على النكد
ليه كدا يا بنتى؟

Lady E يقول...

كيكي : القلوب عند بعضيها يا كيكة

وبعد الشر على قلبك من الضرب واللسوعة هو مش ناقص زي قلبي بالضبط
وكويس ان قلبك وقلبي مع بعضيهم اهو يونسوا بعض ويحاولوا يتعلموا ميبقاش عندهم رقة وحب لناس متستحقش الرقة والحب

وبعدين انا وحشتك النهارده بس ولا ايه ده انتي دايما واحشاني و
ربنا يحفظك وتكوني بخير دايما يا رب

وبالنسبة لفوفو فتصدقي انا معرفش
بقها ده فين هههههههههه بجد ممكن يكون هيحط الشطة في شنطة فوفو ولا في الموتور بتاعها ولا ايه المهم هو هيتصرف ههههه

وبعدين يا كيكة بتكرهي فوفو ليه بس دي بتحبك

وبجد وبجد انا سعيدة جدا بوجودك
كل لما بلاقي تعليق ليكي بترفعي من روحي المعدنية وكمان نونتي حبيت الاسم ده منك اوووووووي

سلام يا أحلى وأجمل كيكة

Lady E يقول...

قهوة بالفانيليا - شيماء علي : أهلا بيكي يا قمرايا

انا فرحانة جدا بزيارتك الجميلة دي
وان شاء الله متبقاش الزيارة الاولى والأخيرة ومضايقة في نفس ذات الوقت لأنك اضايقتي من البوست مع اني كاتبة في اول البوست تحذير انه بوست حزين بس بجد
انا اسفة جدا ان اول زيارة ليكي تكون في البوست ده

وربنا يستجيب دعائك يا رب
ومتشكرة جدا على تعليقك الجميل وزيارتك الأجمل وان شاء الله مش هعمل بوستات حزينة الفترة الجايه
دمتي بخير دايما

Lady E يقول...

blue-wave : منور يا دكتر

وانا سعيدة جدا انك موجود برغم انك مشغول جدا

وبعدين انا مهدت من البوست اللي فات ان هيكون في نكد البوست ده يعني واحدة بتصرخ واغاني حزينة هيبقى فيه نكد ولا لأ وكمان كتبت ملحوظه ان البوست ده حزين (زي اخر بوست ليك )
بس وعد ان شاء الله البوست الجاي ميبقاش نكد خاااالص

دمت بخير دايما

appy يقول...

اولا ربنا مع البنت ويا ريت كل الناس تخلى بالها
اما اللى توفت البقاء لله هى عند ربنا وده عمرها يا حبيبتى ادعى لها على طول وبس

كيكى يقول...

نونتى...
حبيبة قلبى بجد
قولى الى انتى عايزة وبراحتك دى مدونتك مش مدونة الى ماتسماش ......مش قادرة اقول اسمها بجد!
!
عبرى عن حزنك وفرحك واصرخى وقولى اللاةةةةةةةةةةةةةة من قلبك...
ما احنا بشر متقلبين المشاعر... يا نونتى ماينفعش نبقى فرحانين طولللللللللل العمر ولا حزنا
!
عبرى عن نفسك وعيشى
يعنى هتروحى تقولى لمين همك وحزنك...للى ما تسماش
!
!
الى بجد بكره تكلمى عليها.. وتقوليلى بتسالى عليها لية ما دام مش بتحبيها
علشان تعرفى بس قلبى قلب خساية ودايما مودينى فى داهية...
بكره بكره يا فوفو كل يوم تشوفى نونتى وتعقدى معها انا بحقد عليكى
يا حمو الساحر...روح حطلها شطة بسرعة وهى عند حمو الميكانيكى بسرعة

عبر ميييييييييييين قدك
وش بيغمز
ام لاواحظ
انتى دايما واحشنى بس امباااااااارح كان كتيررررررررررررررررررررررررر
واحشنى
امواااااااااااااااااااااااة
سلام يا نونتى
عوووووووووووووووووووووووو

بيكر(baker) يقول...

هو البوست حزين بس معبر لان الانسان ميقدرش يعيش منغير ما يتعلم و مبيتعلمش غير من الحزن بس المهم يتعلم
دمتى بخير

هانى زينهم يقول...

انا اللى لفت انتباهى انك كنت صغيرة قوى لما ماتت بنت خالتك دى ومع ذلك ارتبطتى بيها الارتباط ده كله
عموما والله الدنيا تحير بنفضل شاغلين دماغنا بيها ونشيل فى هموم كتير ومع ذلك ممكن الحياة تنتهى فى لحظة
سعيد بمرورى ورمضان كريم

Lady E يقول...

appy: بفرح جدا بكل مره بتزوري فيها المدونة يا حبيبتي

وبحس فعلا انك بتفهمي الغرض من البوست عكس ناس تانيه كتير مأخدوش بالهم غير من جو الحزن اللي في البوست

تسلميلي يا قمرايا وبجد انا سعيدة جدا جدا جدا بمرورك وتعليقك الرائع
وكل سنة وانتي طيبة

Lady E يقول...

كيكي : حبيبتي هنا يا ناس

انا مبسوووووووطة ومزقططة

كلامك جميل اوي اوي اوي يا كيكة وبيشجعني على الاستمرار في التدوين

اكيد انتي عارفه ان الهدف الاساسي بتاعي من البوست اني احذر من الحوادث واشجع المدونين على اهتمامهم بالاطفال لأن فقدانهم صعب

لكن للأسف كتير اخدوا الموضوع على اني بنكد عليهم بس لما فكرت في الموضوع بإجابيه لقيت ان كل اللي قالوا ان البوست صعب مع انهم يمكن مستفادوش منه بس على الاقل عرفت اوصل احساسي ليهم

وعلشان قلبك قلب خسايه وعلشان متزعليش لو يرضيكي هقول لبابا يبيع اللي متتسماش وارجع اتبهدل في المواصلات تاني
اهيء اهيء اهيء
سلام يا كيكتي يا عسولة

Lady E يقول...

هاني زينهم : أهلا بيك
فعلا انا كنت صغيرة جدا وقتها بس كانت حياتي مرتبطة بحياة بنت خالي جدا وكانت تعتبر اختي
وحسيت بوحدة كبيرة بعد وفاتها الله يرحمها
وعلى حد معلوماتي البسيطة ان ذاكرة الطفل طويلة المدى وبتستمر طول
العمر علشان كده الانسان مبيقدرش ينسى اشخاص كانوا في حياته وكان بيبحبهم وهو طفل
وبجد كلامك فيه حكمه كبيره جدا عن الدنيا وكل لما الدنيا تضايقني هقرأ كلماتك الجميلة عن الحياة
سعيدة جدا بزيارتك الجميلة للمدونة
وكل سنة وانتا طيب وبصحة وسعادة دايما يا رب

Lady E يقول...

بيكر : نورت المدونة مرة تانيه

وكفاية انك من طرف كيكي حبيبتي علشان

ارحب بيك واعزمك على نيسكافيه كمان

على حساب كيكي

وبجد كلامك جميل جدا وياريت فعلا نتعلم

شكرا ليك ودمت بخير

انا ودماغي يقول...

الله يرحم مروة و يشفى البنوتة اللى أتخبطت و يهدى أمها يا رب

فعلا اليومين دول بالذات بنسمع عن حوادث كتير للأطفال سببها الأساسى إهمال الأهالى و كان اللى معاهم دول مش اطفال عايشين على الفطرة و مش فاهمين حاجة و عايزين اللى يفهمهم و يكون جنبهم


البوست برغم حزنه إلا أنه جميل و معبر و المدونة زى العسل ربنا يوفقك و كل سنة و أنتى طيبة

Sometimes يقول...

يارب ارحم كل موتى المسلمين يارب
ويارب اهدينا كلنا ونقدر نحافظ على النعمة دى
مدونتك لذيذة اوى
وعجبنى موضوع
يا عمي أنا جاي أطلب اني امرمط وابهدل بنتك
مش عارفة ليه زعلانه اوى من اللى بيحصل اليومين دول
اسمع عن حالات طلاق كتير ومشاكل وبهدله
ربنا يستر
كل سنه وانتى طيبه يا جميلة

Lady E يقول...

انا ودماغي : أهلا بيكي يا قمرايا

ربنا يستجيب منك دعواتك الجميلة
وأكيد عندك حق وانا سعيدة جدا ان الفكرة وصلتلك

كل سنة وانتي طيبة وبخير وسعادة وهنا ورمضان كريم عليكي ان شاء الله

والف الف مبروووووك على دخولك الجامعة

ربنا يوفقك

ومتشكرة جدا على كلامك الجميل اللي اسعدني جدا يا قمرايا

Lady E يقول...

Sometimes :أهلا أهلا بيكي يا قمرايا
انا سعيدة بوجودك سعادة كبيرة جدا وخصوصا اني بدرس اداب انجليش برضه
:)

اللهم أمين ربنا يستجيب دعواتك الجميلة يا رب
وبجد انا فرحانة جدا برأيك ودي شهادة اعتز بيها
وكفاية جدا عليا انك اخدتي من وقتك وقرأتي مواضيع المدونة

وعيونك حلوين علشان كده شوفتي الموضوع حلو
ومتزعليش ولا حاجة للأسف الطلاق دلوقتي كتير من الازواج شايفينه حاجه بسيطه
ولو اتكلمت عن الطلاق ده عايزله بوست لوحده
ربنا يكرمك وان شاء الله ربنا يسعدك مع محمد زوجك في الدنيا وفي الجنة
وكل سنة وانتي بخير وسعادة وصحة وهنا دايما يا رب