الاثنين، 28 يوليو، 2008

شوية كلام















في مجمع الطيور
يا رب واحد ظلمنا في دنيتك واخد براءة
ازاي براءة طب والضحايا واللي غرقوا واللي راحوا
ايه اللي خلاهم يسافروا على مركبي
اهم راحوا مطرح ما راحوا
الفين تلاتة ماتوا مش مشكلة المهم ان باقي الطيور سليمة ومش حاسه بالمصيبة
مصيبة ايه
متقولوش مصيبة الطيور ماتوا شهداء وكمان عايزين تسجنوا اللي موتهم يادي العيبة
ده حتى عمل فيهم جميل كبير
هقولك ايه يا قاضي القضاة روح منك لله
وليك يوم هتقابل اعدل العادلين وهناخد حقنا من كل ظالم اجمعين
يوم الحساب والعدل فعلا
مش يوم زي ايامنا دايما بيستهان بالطيور المسلمين والمصريين
وحسبنا الله ونعم الوكيل
ده مش شعر بس كلام جه على بالي وربنا يكون في عون الطيور واهلهم


-----------------

توفي الى رحمة الله النهاردة المخرج العظيم : يوسف شاهين
من حوالي اسبوعين وهو كان بيعاني من deep comma او غيبوبة عميقة واجهزته الحيوية كانت شغاله على اجهزة العناية المركزة كنت حاسه ان الله يرحمه كان هيتوفى بس كنت بكذب نفسي بس ده مصير كل كائن حي وسبحان الله هو من له الدوام
اول مرة اعرف ان يوسف شاهين الله يرحمه كان مسيحي ومفرقش معايا ديانته ايه لأنه كان انسان بيعشق مصر ولأنه قدم فيلم من اروع افلامه الناصر صلاح الدين فيلم رجل عظيم من عظماء الإسلام وكفايه انه وصل الافلام المصرية للعالمية وعمل فيلم من اجمل افلامه فيلم المصير واتكلم فيه عن ابن خلدون المفكر الاسلامي خسارة مصر كبيرة جدا وخسارة السينما المصرية والعالمية أكبر رحم الله المخرج الرائع /يوسف شاهين واسكنه فسيح جناته وسيظل حبه واحترامه في قلوبنا الى ان نموت

-------------------
فندق جراند حياة رجع مرة تانيه لتقديم الخمور لكن حدد مكان تناول الخمور وهو البار لكن ممنوع تقديم الخمور في المطاعم او الغرف او اي مكان في الفندق على ان العائد بتاع المشروبات دي مش هيدخل في فلوس الفندق الأصلية بس برضه اهي خطوة ايجابيه برضه ويجب علينا احترامها

هناك 8 تعليقات:

afew good men يقول...

في مجمع الطيور

لا وجود لتلك الحيوانات البذيئة

وفعلا ربنا يكون في الطيور .


ربنا يرحم الجميع

الخمور ربنا يعفينا منها جميعا

Lady E يقول...

afew good men: ربنا يستجيب دعواتك الجميلة

شكرا على زيارتك وتعليقك على البوست الحزين ده

ميرام يقول...

اصلك ماتعرفيييييش
ان اغلب الطيور دلوقتي .. بقت طيور زينة ..؟
وان طيور الزينه لازم تعيش في القفص ..؟
تخيلي ...!!
أيوة القفص ..وبالتالي كل تحركاتها محسوبه .. ححتى لو رفرفت بجناحتها ..
طيب اقولك ايه كمااان ..
ده طيور الزينه لو اتطردت من القفص .. بتمووت ..(بجد المعلومة دي)
من ناحية لأنها بتبقى متعودة على العز بقى .. والأكل بيجيلها لحد عندها .. ولأنها ماعرفتش الشقى والتعب ..زي غيرها ..
وبيقولوو .. ان الطيور التانيه بتفترسها لأنها أول مابتتطرد من القفص .. مابيبقاش ليها (ظهر) ..
عرفتي بقىى سر الحدوته ...

................

بالنسبه لجراند ..
أنا بصراحة كنت متوقعه كده بنسبة 80 في الميه ..
انه هيرجع عن قراره ..
مع اني مش عايزة اسيء الظن ..
لكن لأني سمعت ان بداية الموضوع كانت بسبب خلافات مع شركة الخمور ..
الحاجة التانيه ان اللي عايز يتوب ..
مش بس يمنع الخمور ..
لأ .. ده لازم يتخلص من كل أثارها السابقة
طب والفلووووس اللي ماشاء الله كانت رايحه جايه من ارباح الخمور دي ..

.....
حقيقي كان نفسي الموضوع يتنفذ ..
على الأقل كانت هتبقى خطوة تشجيعيه حتى لو كانت بدون هدف ديني بحت ..
بس نعمل ايه ..
يبقى انت أكيد في مصر !!


ربنا يهدينا جميعا ...

أخيرا ..
مدونتك جميله ..
أقولك حاجه ..
بلاش تكبري .. (:
تحيـــــــــــــــــاتي

كيكى يقول...

عووووووووووووووووووووووو انا جيت اتخديتى...................
اييييييييييييييييييييييية بجد الكلام الجامد دة....
انتى عديتى الكبارى من زماااااااااان
هههههههههههههههههههههه
خمسة عليكى....كل دة بسبب انك بطلتى تشربى اللبن
ههههههههههههههههههههههه
مش هقول غير حسبى الله ونعمة الوكيل
وربنا يرحمك يا جو
ومسيحى مسلم يهودى اى ديانة مش بتفرق
المهم ان يكون انسان.......
.........................
وبالنسبة للفندق مش فارق معايا
لاتى بطلت اشرب شاى بالبن سكر زيادة من زماااان
تسلمى
امواااااااااااااااااااة
عوووووووووووووووووووووووو

Lady E يقول...

ميرام : يا ألف مليون مرحبا بيكي يا قمر

عرفت سر الحدوتة يا قمرايا

بس للأسف طيور الزينة الفقر طحنها ومحدش سائل فيها وبرضه مش عارفه تخرج من القفص او متخيلة انها هتموت لو خرجت طب ما تجرب حتى لو ماتت احسن من حبستها في القفص
هي مش عارفه ان اللي بيرزق هو ربنا سبحانه وتعالى
وشكرا ع المعلومة بجد اول مره اعرفها لأن كنت بكره اشوف طير من طيور الزينه في القفص وكان بيبقى نفسي اطيرهم زيهم زي باقي الطيور

///////////

بالنسبة لجراند حياة
هو مرجعش عن قراره كله بدليل انه مش هيدخل فلوس الخمر ( الكتير جدا) مع فلوس الفندق وحدد مكان الخمور في بار الفندق بس
اما الفلوس اللي كانت من ارباح الخمور
فالله اعلم مالك الفندق عمل فيها ايه

وبجد ده قرار محترم لأن معظم الفنادق الكبيرة دخلها الاساسي والكبير بيكون من الخمور

وبجد انا كمان كان نفسي الموضوع ده يتنفذ
بس هنعمل ايه عالاقل اهو عمل خطوة ايجابيه وان شاء الله يقدر يلغي الخمور خالص

وعلى فكرة موضوع انه يرجع الخمور مكنش له علاقه بمصر ولا بالسياحه
على حسب معلوماتي من قناة الحياة ان الشركة العالمية للفندق هي اللي اتخذت القرار والا الفندق كان هيتحول من 5 نجوم لنجمتين
-------
اللهم أمين ربنا يهدينا كلنا

-------------

عيونك اللي حلوين علشان كده شوفتي المدونة جميلة
بجد ردك في البوست وزيارتك للمدونة هي اللي جميلة جدا واسعدتني جدا
نورتي البلوج يا قمرايا وان شاء الله تزوريني دايما البلوج بلوجك

Lady E يقول...

كيكى: هييييييييه سبتي فرح الواد ابراهيم وجيتي الموضوع الكئيب ده يا كيكة

متحرمش منك ابدا يا قمرايا

ههههههههههههههههههه مين اللي فتن عليا وقال اني مش بشرب لبن لالالالا متصدقيهوش وعلب جهينة وبخيره و.....الخ اصلهم كتير تشهد اني بشرب لبن بالشوكولاته ههههههههههه


عندك حق مفيش قدامنا غير حسبي الله ونعم الوكيل


وفعلا اي ديانة مش بتفرق المهم يكون انسان بس انا كنت متلخبطه لان يوسف شاهين الله يرحمه قدم اعمال سينمائيه اسلاميه زي الناصر صلاح الدين والفيلم ده من اروع الافلام اللي بحبها جدا


وبالنسبة للفندق كنتي معتبراه نكته من الاول ومقولتليش يا كيكه بس عرفت من مصادري الصوحفيه الخاصه
وكويس انك بطلتي شاي بلبن سكر زيادة هيبقى انتي و او تي في ههههههههه
غيري لنسكافي احلى

نورتي البوست يا احلى كيكة
يوووووووه بنسى قصدي يا ام ابراهيم

blue-wave يقول...

بجد اسلوب رائع فى مناقشة قشيه حساسه
واقصد بذلك مجمع الطيور
اما بالنسبة لجراند ف الرجوع فى القرار كان متوقع
ولسه استنى كمان مزيد من التراجع
تحياتى

Lady E يقول...

blue-wave : اولا شكرا للتعليق يا دكتر

بالنسبة للقضيه فأنا كنت كاتبة كلام تاني خالص عنها بس للأسف الكمبيوتر فصل فجأه وضاع كل اللي كنت بكتبه ولأن الموضوع استفزني بطريقة كبيرة فكتبت تاني بس عن مجمع الطيور وطبعا هو مجرد كلام مش مرتب ومش هيوصل لكتابات حضرتك
ودي شهادة اعتز بيها ان حضرتك تقول على اسلوبي البسيط رائع

بالنسبة لجراند فمش متوقعة ابدا ان هيكون في تراجع تاني اكتر من كده

نورت البوست والبلوج يا دكتر شكرا على زيارتك الجميلةاللي بتعليق المره دي