بما إنه خلاص بقى أمر واقع وبقى اسمي مع طلاب الدراسات العليا لدبلومة الترجمة الفورية والتتبعية والتحريرية وحاسة بمسؤلية كبيرة وخايفة من الخطوة دي زي أي حاجة جديدة ومجهولة بنخاف منها
إذن أهلا بيا في سنة أولى ترجمة
الدبلومة سنتين :) السنة الأولى المفروض المواد بتاعتها
1- ترجمة علمية
2- ترجمة أدبية
3- ترجمة فورية
4- لغة عربية -نحو-
5- معاجم
6- ترجمة تتبعية
7- مصطلحات قانونية وسياسية واقتصادية
لما سألت دكتر أشرف قاللي أن الترجمة التتبعية هتبقى أصعب مادة :)
أول لما عرفت بالمواد أعترضت ع اللغة العربية :) خصوصا ان اللغة العربية هندرس فيها والعياذ بالله نحو :) وأنا طول عمري بكرهه بس من صفات المترجم الناجح أنه يكون متمكن من اللغتين اللي بيترجم منها واليها إذن ف النحو شر لا بد منه وان شاء الله هذاكره وأمري لله .
طول عمري بعترض على ترجمات كتير للبرامج وللأفلام وللإعلام الأجنبي بوجه عام وللأسف وللأسف جدا كمان أن المترجمين الصهاينة من أشطر وأخبث المترجمين في العالم بيلعبوا بالكلمات لعب فظيع وبيقلبوا الحقائق لصالحهم
والإعلام العربي الأهبل بيمشي ورى ترجمتهم وبيرتكب مصائب وبلاوي في حق الحقوق العربية زي القضية الفلسطينية وغيرها :( ودي حاجة غيظاني بصراحة وليه منبقاش احنا احسن مترجمين ودي حاجة مش سهلة أكيد
علشان كده كنت بتهرب من دراسة الترجمة علشان لما اترجم وترجمتي متبقاش عاجباني يبقى عذري اني مش مترجمة :) لكن دلوقتي ادبست رسمي وبقى لازم أتعلم ومينفعش أضيع سنتين من عمري عالفاضي مع أني عارفة كويس أوي اني داخلة الدبلومة دي علشان الخطوة اللي بعدها في الدراسة بس برضه مينفعش أدخل فيها وأخرج منها زي ما سبتها
مادة الترجمة كانت أساسية 4 سنين الليسانس ودكتر الترجمة قال لنا ان أصعب حاجة الترجمة الفورية وخصوصا في المؤتمرات العالمية ومرة كان في مترجم ترجم كلمة الرئيس المصري – مش فاكرة جمال ولا السادات – سندخل عليهم وسنحاربهم ان لم نجد سلاح بالنبابيت – مفرد نبوت- فالمترجم يعمل ايه؟ مفيش حاجة اسمها نبابيت بالإنجليزي :)) فترجمها نبابيت زي ما هي والجرايد العالمية نشرت وقتها ان مصر عندها سلاح جديد اسمه نبابيت :)) مترجم ذكي :)
نيجي بقى للترجمات الغبية جداااااااااااا كنت معديه على قناة من القنوات اللي بتتاجر بالدين وكانوا مستضيفين واحد أجنبي فالضيف بيقول يجب أن نتمسك بمكانتنا بين الأمم فالمفروض ان المترجم ترجمها ازاي؟ يجب أن نتمسك بالكرسي !!!!!!!!!!!! نتمسك بالكرسي يعني ايه؟ هي دي جملة مفيدة !!
كمان في ترجمة لذيذة تنم عن ثقافة فئة من الشعب المصري كنت في كوك دور المنصورة وبقول للبنوتة اللي بتاخد الأوردر في هوت تشوكلت؟ :) قالتلي في هوت تشوكلت ساقع وفي هوت تشوكلت سخن – أنا مفهمتش بصراحة – قولتلها ازاي؟ قالتلي يعني في نوعين من الهوت تشوكلت ساقع وسخن قولتلها اذا كان هو هوت تشوكلت يبقى ساقع ازاي؟ قالتلي ما انا بقولك في نوعين ساقع وسخن :))
حاليا بقرأ كتاب Rich dad poor dad ومن كتر استمتاعي بالكتاب مش عايزة أخلصه وترجمتي المتواضعة للكتاب خلتني أندهش أن تعبيرات بنستخدمها في اللغة العربية هي هي موجود زيها بالضبط في اللغة الإنجليزية
ولذلك بقول لنفسي : ربنا يوفقك في أول خطواتك للترجمة والترجمة عايزة صبر وحب وشغف ودارسة ومجهود وطالما اختارتيها وبقيتي قدرها وبقت قدرك السنة دي واللي جاية والسنين اللي بعدها ان شاء الله – لو ليا عمر- يبقى لازم تجتهدي وتواجهي أي صعوبات هتقابليها بشجاعة وتحدي وإصرار على النجاح ومرة تانيه ربنا ينجحك ويوفقك ويعينك يا نفسي :)
نصيحة لنفسي : الشطارة مش أنك تبقي كذا حاجة في نفس الوقت الشطارة بجد انك تبدعي وتتميزي في كل حاجة بتعمليها .
ملحوظة : أنا بقيت طالبة دراسات عليا :) احساس حلو أوي بغض النظر عن ما ينتظرني من متاعب الدراسات العليا والدراسة في جامعة مصرية إقليمية منفية للمرة التانيه على التوازي .
