الأحد، 16 أكتوبر، 2011

كل شيء بقضاء


من فترة وأنا ماشية في الأعصر في دمياط كنت بدور على كورس تدريب المدربين ورايحة الكلية أخلص أوراق التقديم لدبلومة الترجمة
وفجأه لمحت اعلان موجود على مكتبة مبارك سابقا ومكتبة مصر حاليا الاعلان اللي كان موجود ده مكتوب عليه منحة تدريب المحاضرين
10 مقاعد فقط للإتصال ومكتوب رقم تليفون



ف اتصلت بالرقم ففي بنوتة ردت عليا وقالتلي تفاصيل المنحة المكتوبة في الاعلان اصلا :) وقالتلي أي تفاصيل اسئلي في المكتبة :) فطلعت الدور الثاني في المكتبة وسألت
قالولي مفيش معلومات متوفرة دلوقتي المعلومات مع المستر اللي هيشرح الكورس وهيبقى موجود بكرة
تعالي بكرة ولا اقولك اتصلي بينا بكرة :) اتصلت وقالولي في انترفيو النهاردة تعالي قولتلهم ماشي
رحت مع مامتي وكان في كورس ففضلت مستنية حوالي نص ساعة تزيد او تقل لغاية لما المدرب خرج واتكلمت معاه واستفسرت عن الكورس قاللي علشان تعرفي اكتر روحي ل أية فدخلت القاعة اللي كان فيها التدريب
قولت للبنوتات يا بنات مين فيكم أية؟ :) ف أية جاتلي ف استفسرت عن المنحة فقالتلي طيب املي الأبليكشن دي
وقعدت فعلا جاوبت على أسئلة الأبليكشن وكانت صعبة بجد وبعدين المدرب قاللي الامتحان يوم الخميس الجاي الساعة 5 :) وكده عديت اول مرحلة
يوم الخميس رحت امتحن الإمتحان اتأخر نص ساعة لأن كان في ناس بيكتبوا الابليكشن :) والمستر كان في المكتبة في الدور الخامس أخر دور في كورس تاني عندهم حفلة فطلعت استأذنت منه قبل ما امتحن وقولتله اني هسافر ومش هقدر أكمل المنحة أمتحن ولا لأ قاللي نص علم أحسن من مفيش ده لو نجحتي في الامتحان :) قولتله ان شاء الله هنجح انا مش بتكلم على كده بتكلم على المنحة ممكن مقدرش اكمل فيها قاللي خلاص ممكن تكمليها لما ترجعي ان شاء الله
- أدالي أمل –

نتيجة الامتحان المدرب كتبها عالفيس الأحد بالليل يعني فضلت عايزة اعرف نتيجة الامتحان الخميس والجمعة والسبت والأحد لغاية 9 بالليل ولقيت اسمي وفرحت بس فرحتي انطفت بعدها لما شوفت الاحداث اللي بتحصل في مصر

تالت خطوة الانترفيو يوم الثلاثاء عملت انترفيو انه ايه خطتي بعد التدريب وهعمل ايه بالمنحة ؟ ونجحت في المقابلة وده يوم ماتش الزمالك وانبي اللي مشوفتوش عن تعمد والمدرب قاللي موضوع السفر ده مشكلة عالعموم ها رد عليكي الساعه 9 بالليل وفضلت مستنية هنجح ولا هفشل ولا ايه ؟ وانا بكره الانتظااااار
وبعدين بعت رسالة للمستر بفكره انه يرد عليا فقاللي حظا موفقا مش عارفه ايه واني م الأخر مقبلتش في المنحة
انا طبعا اضايقت يعني 3 خطوات عديت منهم بنجاح وضيعت اسبوع وشوية من اجازتي في مصر علشان المنحة دي وتيجي بقى اخر حاجة ومأخدش المنحة وبعدين سألت طيب ممكن أحضر وأدفع مصاريف المنحة دي؟ مش عايزة العلم يفوتني وعايزة اتعلم فعلا فالمدرب مردش عليا وقتها بقى حسيت انه مبيحترمش طلابه
واتغظت أوي وحلفت اني هعمل التدريب ده مجانا للي عايزين يتعلموا في يوم من الأيام واني هتعلم تعليم بجد في الجامعة الامريكية وربنا يقدرني وأتعلم هناك وأخد العلم من أهله الأصليين الأجانب وزعلت فعلا

النهاردة بقى كنت هروح المنصورة وحسيت اني مش عايزة اروح :) والساعه 3 الا ربع-قبل ما التدريب يبدأ بربع ساعة- لقيت سكرتيرة المدرب
بتكلمني بتقوللي ايناس تعالي يلا
قولتلها اجي فين؟
قالتلي التدريب ؟
قولتلها المنحة؟
قالتلي ايوة
- بتتكلمي بجد؟
- - ايوة يا بنتي
- ليه ايه اللي حصل المستر قاللي اني مش معاكو
- غير رأيه؟
- ليه يعني؟
- معرفش يلا بقى تعالي بسرعة
كانت مفاجعة :)
طبعا نيللي صبحتي كانت معايا خطوة بخطوة من اول ما عملت الأبليكيشن وبترفع من روحي المعنوية وقعدت تدعيلي وتقولي ربنا يوفقك ولو محضرتيش الكورس ده متزعليش ربنا شايلك الأحسن – حبيبتي يا نونو ربنا يخليكي ليا – وربنا يحقق لك اللي بتتمنيه يارب
وكمان حكيت لكيكي وفراشة وربنا يخليهم ليا الصحبة الجميلة دي ويباركلي فيهم


الكورس بقى كل يوم الأسبوع ده بدل يومين في الأسبوع الحمد لله

اتأخرت شوية على ما رحت الكورس لأني عرفت متأخر اني هروح
وفاتني التعارف والاسترخاء اللي عملوه في بداية الكورس ودخلت على سؤال محرج للغاية اتكلم على انك طفل عندك 3 سنين :) هههههههههه أد ايه فرحت بالسؤال ده وافتكرت مدونتي روح طفلة مش عايزة تكبر

هناك 20 تعليقًا:

The illusionist يقول...

magnificent

so happy for this details

mmmmmmmmmmmmmm

جميل جدا بالرز والملوخيه

عاجبنى كل حاجه لدرجه انى مش هعرف اعلق على حته معينه

AhMeD RaDy يقول...

هههههههههههههه تعرفى حظك بجد حتى السؤال كان عن الاطفال !

عموما بجد شئ ايجابى جدا وخاصة لما تنجحى فى حاجة انتى بجد عايزاها شعور رائع

بالتوفيق يارب وشيدى حيلك ولم نشوف بقى هتدى الكورس مجانا ولا هترجعى فى كلامك عشان المدرب اتصل بيكى ودخلك المنحة !!!

rona ali يقول...

سبحان الله تتقفل خلاص ثم تفتح بشكل مفاجئ

ربنا يكرمك دايما يايناس كدة ويسعدك ويوفقك

بالنسبه لسؤال المحرج فهو السؤال المناسب لشخص المناسب :):)

تحياتى لطفولتك الجميله اللي ميتشبعش منها :)

نور القمر يقول...

ههههههههههههههه شكرا لك ياقمر بوست رائع ..
مع تحياتى
نور

لـــولا وزهـــراء يقول...

ربنا يوفقك يا حبيبتي في اي مكان انتي فيه ويكتبلك الخير دايماً

لولا

نيللى يقول...

حبيبه قلبى ربنا يوفقك ولازم الأنسان يقف جنب أى أنسان ويقوله كلام أيجابى أينعم أحنا فى بينا مسافااااات لكن روح الأنسان بتجمعنا وحتى لو مش فى ايدى غير أن اتكلم مادام هنساعد بعض يبقى لازم يتقال وطول ماأنتى بتحاولى هتجحى وتوصل أن شاء الله ..وبكره تبقى مدربه أد الدنيا كلها ..
وتسلمى على كلامك الحلو ياأنوس:))

safa7_karmooz يقول...

انا لو مكانك مكنتش هروح او لو روحت هروح اهزق الراجل اللى ادى امل فى الاول ورجع سحبه ...

عشان اتلسعت من ناس كتير على شاكلته

الف مبرووووك وربنا يوفقك فيها ..

وعجبنى انك نويتى تتعلمى وتديه مجانا فى المستقبل...هى دى الروح بتاعت المثابرة :)

NOUR Kamal يقول...

عزيزتي انجي

بالتأكيد رضا الله عنك خلاكي تنقبلي بهيك كورس

مع اني ما فهمت الكورس عن شو؟

بس بالتأكيد موفقة..

iـــــــــــsــــــــــlــــــــــــaـــــــــm يقول...

كلام جميل جدا

بس ده يعرفك ان ربنا بجد بيحس بينا

ولكل مجتهد نصيب

ربنا يوفقك

بس ابقى اعملى المنحه مجانا عشان ده عهد بينك وبين ربنا

شمس النهار يقول...

مبروك المنحة
وان شاء الله بالنجاح
وكويس انه فكرك بالمدونة علشان تدخليها
ونعرف اخبارك ونطمن عليكي

Lady E يقول...

The illusionist : ثانكيو ثانكيو يا محمد

اشمعنى الرز والملوخية يعني ؟ :)

Lady E يقول...

AhMeD RaDy : هههههه أيون والحمد لله ان السؤال كان كده :) خفف من توتري في وسط جروب كبير مكنتش عارفه فيه غير بنوتين بس :) فالكلام قدام العدد ده كله كان صعب في البداية

الحمد لله هو فعلا ايجابي من نواحي كتير ربنا مبيخذلش اللي بيسعى ولو أجل لنا حاجات نفسنا فيها بنلاقي حاجات أحسن منها بعد كده تكون من نصيبنا :)

ههههه مبرجعش في كلامي يا أحمد حتى لو دخلت المنحة وتدريب المدربين ده محتاج مني كمان 5 سنين علشان أتعلم كويس وبعدين أعلم كويس ان شاء الله

Lady E يقول...

rona ali : الله عليكي يا رونا

فهمتي قصدي من البوست

أيون أيون

وتحياتي ليكي يا احلى رونا

Lady E يقول...

نور القمر : مش عارفة بتضحكي على ايه يا نور :) بس ربنا يسعدك

Lady E يقول...

لولا وزهراء : اللهم أمين انا وانتي يا لولا

نورتيني بعد طول غياب

Lady E يقول...

نيللي : الضفدعة الطارشه عن السلبيات اهلا بيكي اهلا بيكي :)

مش مهم المسافات يانونه المهم ان القلوب بتتلاقى ويارب نفضل عاملين دايرة نجاح مع بعضينا على طول ونشجع بعض وناخد بإيد بعض لكل حاجة حلوة

الكلام الحلو للحلوين وبس يا حبيبتي :)

نورتيني

Lady E يقول...

safa7_karmooz : فكرت زيك في الأول ومكنتش هروح او هروح احرجه في وسط الجروب وكده يبقى استفدت ايه؟

انا في اخر الكورس قولتله اني لو مكنتش اخدت الكورس كان اكيد ربنا كاتبهولي في مكان احسن ووقت احسن :)

ان شاء الله هدرسه في المستقبل لناس زي حلاتي بيحبوا العلم ونفسهم يتعلموا كويس :)

Lady E يقول...

نور كمال : مين انجي يا نور؟ :)

عزيزتي نور انا اسمي ايناس

الحمد لله ده كان توفيق من ربنا سبحانه وتعالى

لو قرأتي اول فقرة في البوست هتعرفي عن شو :)

شكرا لكلامك وانا بجد بحب اللهجة الفلسطينية جدا

Lady E يقول...

اسلام : طبعا ربنا سبحانه وتعالى بيحس بينا علشان هو اللي خلقنا بس احنا ساعات مبنفهمش هو قفل الباب ده ليه وبنفضل واقفين قدام الباب المقفول كتير

اكيد الحمد لله لكل مجتهد نصيب

اللهم امين

شكرا على نصيحتك الطيبة وان شاء الله هعمل المنحة اول ما اتمكن من معلوماتها وأقدر أدربها وافيد الناس اقصى افادة بالمعلومات دي

Lady E يقول...

شمس النهار : الله يبارك فيكي يا شموستي

اللهم امين انا وانتي وكل الناس :)

طبعا عمري ما بنساها :)

تسلملي روحك الراقية الجميلة يا شموستي

نورتيني