الثلاثاء، 18 أكتوبر 2011

دكتور تيييييييييييييييييييييييت


للأسف كلية الطب بتخرج أي ناس وبرضه بتخرج أطباء محترمين وزي الفل منهم اطباء وطبيبات غاية في الرقي والإنسانية بس للأسف وللأسف جدا السيء هو اللي سايد

امبارح كنت مع ماما عند طبيب أو نقدر نقول معاه الشهادة ومعلقها عالحيطة وأهو الإسم ضاكطور
وبرضه نفس الضاكطور أنا روحت كشفت عنده المفروض ان الضاكطور ده طبيب قلب وباطنة
يوم لما روحت أكشف ماما كانت معايا وأنا قاعدة لمحت كاميرا في الريسبشن بتاعت العيادة لأن سيادة الضاكطور بيشوف مين اللي في العيادة عنده وبيحصل ايه في عيادته قولت كويس بيفهم في التكنولوبيا
وكمان معاه لاب توب وبيسجل فيه الحالات اللي عنده
لما دخلنا بقى خير اللهم أجعله خير دخل معانا مندوب شركة أدوية وطبعا لأن الضاكطور متخيل ان كل الناس أقل ذكاءا منه ف اتكلم مع مندوب المبيعات بالإنجليزي على أساس ان محدش فاهم هههههههههههه ف اتكلم بحرية كبيرة وده علشان ربنا يكشفه قال ايه بقى لمندوب المبيعات
قال له أنه
هيجرب الأدوية الجديدة اللي نسبة خطورتها عالية على المرضى الميؤس من حالتهم
وكرر كلامه ده أكتر من مرة علشان يأكد عليه وعلشان يأكدلي اني مش بحلم هو في حد معندوش ضمير للدرجة دي هو في طبيب يحمل شرف المهنة دي وأقسم على حماية أرواح الناس يجرب أدوية مضرة فيهم وأهو يبقى له نسبة ربح كل ما كتب الأدوية دي اكتر كل ما كسب اكتر واكتر
الضاكطور ده ومن غير ذكر أسماء اسمه محمد تقي الدين وكان نفسي يبقى ليه من اسمه نصيب يبقى عنده تقوى ودين وللأسف مشهور في دمياط وناس كتير مخدوعين فيه
المهم أنا لما سمعت حواره مع مندوب الأدوية قولت مستحيل أجيب الدوا اللي كتبهولي والحمد لله اني قررت كده
ونرجع لإمبارح روحنا إعادة كشف لأن الدوا مجابش أي مفعول مع ماما بل وتعبها أكتر
انا على ما لقيت مكان اركن وطلعت لماما العيادة لقيتها في قمة النرفزة والعصبية وضغطها بقى عالي بشكل رهيب
وجه على بالي كل الشتائم اللي في الدنيا نفسي اقولها للمدعو تقي الدين بس انا مؤدبة ومبشتمش
معاد اعادة الكشف اسبوع وفات كام يوم من الأسبوع وست المتخلفة سكرتيرة المدعو تقي الدين
قالت لماما هحجزلك المعاد وعلى فكرة حجز المعاد عنده قبلها بيومين على اساس انه رئيس جمهورية كشريستان
فماما حجزت وكان الخميس والجمعة اجازة وفاتو اليومين وروحنا فعلا واحنا حاجزين فالسكرتيرة – نفسي الأمارة بالسوء نفسي تشتمها بس انا مؤدبة ومش بشتم – قالت لماما ملكيش استشارة ولا اعادة كشف
خلاص اتأخرتي عن وقتك مع ان السكرتيرة اللي اخرت ماما وحجزتلها بعد المعاد بيومين ومقالتش انه مينفعش الاعادة بعد اسبوع فماما قالتلها يعني الحل ايه دلوقتي ؟ادفع كشف قالتلها حتى لو دفعتي كشف مش هتدخلي ولا النهاردة ولا بكرة أمي بقى اتعصبت واتنرفزت جدا وربنا لطف انه محصلهاش مشكلة صحية في الوقت ده من كتر زعلها وانفعالها مع ان في العادي مامتي هادية بس لغاية دلوقتي ضغطهامش عايز ينزل فقولت لماما عادي يعني ضاكطور سمعتي بودنك كلامه انه بيجرب أدوية جديدة في اللي معتبرهم زباين مش أرواح زعلانة ليه؟ وعلى فكرة اول لما دخلت عيادته لقيته حاطط صورته وفيها علامة شركتين أدوية مشهورين وصاحب شركة منهم سبب خراب حاجات كتير حلوة في مصر فمحستش بخير
نفس الموقف بالضبط اتكرر مع انتيمتي في نفس الوقت ولكن بطريقة تانيه عند دكتور تاني
هو الدكاترة في مصر مالهم بالضبط؟ عمالين يطالبوا بحقوقهم أوكي على عيننا وراسنا ووالله بنحترم اللي يستحق الاحترام منهم لكن المفروض تحترموا مرضاكم عالأقل ده الف باء طب

انا كتبت عن الدكتور اللي معتبر الناس فلوس واسمه محمد تقي الدين وقولت شهادتي عن كلامه وعن تصرفاته مع مرضاه اللي عايز يروح له بقى ذنبه على جنبه اللهم بلغت اللهم ف اشهد

هناك 11 تعليقًا:

P A S H A يقول...

أولاً : ألف سلامة على مامتك ربنا يشفيها ويعفو عنها
ثانياً : " طبيب يحمل شرف المهنة " الجملة دي فكرتني برواية "شرف" لـ صنع الله إبراهيم !!
ثالثاً : ده مش بس ما عندوش ضمير ! .. أبسلوتلي ! .. ده كمان غبي ومتأمر على نفسه :)
رابعاً : أنتي ليه تشتميه لوحدك لما ممكن كلنا نشتمه معاكي ؟؟
D:

تحياتي

Ramy يقول...

الدكاترة بقوا

زى الحانوتى يعتبرنا جثة للتجارب عاليها

و شركات الأدوية برضوا

طب الواحد يعمل ايه و لا يرحوا فين

ربنا ىيرحمنا

sony2000 يقول...

بجد بجد

حسبي الله ونعم الوكيل

nour alqamar يقول...

يلاللاسف بجد ربي لا يسامحه ..
شو هذا مش حراام ارواح الناس هيا غاليه مش كذه بجد حرام عليخ وحسبيا الله ونعم الوكيل
وبالشفي لامك ياغاليه
مع تحياتى
نور

rona ali يقول...

انا حاسه بمامتك اوى يا ايناس

ربنا يشفيها ويعافيها ;);)

انا ماما بقي راحت لدكتور كبد وتظبيط سكر وكدة ادالها دوا اسمه جليتازون بجانب ادويه سكر تانيه علشان يعدل السكر ومياثرش علي الكبد
المهم ياستى ماما بعد ما اخدت الدوا 6 اشهر ودة دكتور برضوا كبير ومعروف طلع الدوا امريكا مانعه لانه بيضرب في الكبد والقلب وحاجات كتير علي حساب تظبيط السكر
ولانه خطير جدآ علي اي مريض كبد
مش عايزة اقولك انا اتصدمت ازى

إيه رايك بقي
هما دوال اللي اقسموا انهم يعالجوا اي مريض

نيللي علي يقول...

بوووووووووووست فى الجوووووووووووون:)

VÖltaa يقول...

لو مكانك كنت بهدلته اول ماسمعت انه بيقول كده و عملت فضيحة ف العيادة و ابقى قابلينى لو حد راحله بعد كده

و الحل ده هيخلى ضغط ماما ينزل هوا

قلم رصاص يقول...

ألف سلامة على ماما

عجبني اوي المقلب اللي حصل له بالصدفه وهو متعمد يتكلم انجليش هههههههه حظه الهباب انك بتعملي دراسات عليا بالانجليش :)

بس اعتقد من الواجب عليكي تشهري بيه، ﻷن التشهير هنا من اجل انقاذ الأرواح.. يعني لله !

وربنا معاكم :)

NOUR Kamal يقول...

فعلا الناس اللي ما بملكوا ضمير اخلاقي أكيد حيتاجروا بأرواح وثقة ودم ومال الناس
ومش شي جديد ع فكرة، ولكن كان المفروض تسجلي كلامو مثلا وتروحي ع نقابة الدكاترة ويكون معك دليل لأنو هالناس لازم تتحاسب..

عموما كتير منيح انك نبهتي الناس وان شالله صوتك بوصل

Miss LoZa يقول...

الف سلامة على طنت
حسبى الله ونعم الوكيل اصلا فكل حد مش بيراعى ضميره فشغله
وده مش اى شغل يعنى دى ارواح ناس !
معلش يا نوستى ربنا ينتقم منه ان شاء الله

sydalany-وش مكرمش يقول...

ربنا سيشفيهالك و يسعدك
ملحوظة:
كنت راجع باستعيد ذكرياتي في المدونة و بقرا المواضيع اللي كنت كتبتها و التعليقات اللي عليها

كان احساس غريب ..استمتاع و تساؤل ملح ..بجد انا اللي كاتب الكلام ده
:)
و قررت استعيد الناس اللي كانوا متابعني و منهم حضرتك و اقولهم
نشاطي اتنقل للفيس
و دي صفحتي الخاصة هناك
http://www.facebook.com/MahmoudSamySoliman

تحياتي
وشششششششششششش