قلبي معاكي يا دمياط

النهاردة الصبح في صباح الخير يا مصر نروح للكلام عن الأخوة الأشقاء في سوريا طيب والأخوة الأشقاء في دمياط محدش بيتكلم عنهم ليه؟ والله دمياط محافظة ومش هبالغ لو قولت أحسن محافظة في مصر من ناحية الشغل والإنتاج والسلمية احنا الدمايطة ناس مبنحبش المشاكل بس لما تموتونا أكيد مش هنسكت يعني أكتر من كده !!! الصورة اللي فوق منقولة من تويتر والشارع ده شارع بيوصل للكوبري الحديد في دمياط والكوبري حاليا مقفول وهو الكوبري العلوي

والطرق من والى وفي دمياط ورأس البر مقفولة الكلام ده كله على عهدة تويتر لأنني للأسف مش هناك وللأسف أكتر في تعتيم أعلامي كبير أوي من القنوات المصرية المحروقة بجاز اللي مبتجيبش أي حاجة بتحصل في مصر

للي مش عارف الموضوع في مصنع اسمه اجريوم ده كيماويات ناس بيقولوا أسمدة وناس بيقولوا أسمنت والمصنع ده لما النظام تييييييييييت كان موجود كان في معارضة من كل الدمايطة أنه يتبني لأنه مكانه في مكان حيوي مع الرياح وبياخد مية من البحر والنيل يعني التلوث أرض جو سما ومن كل اتجاه وفعلا ال............. فتحي البرادعي محافظ دمياط سابقا نيم الدمايطة وقال لهم المصنع مش هيتعمل وانا كفيل انه مش هيتعمل والمصنع اتعمل فعلا !!!! وفتحي البرادعي ده حكايته حكاية في دمياط بوظ كل معالمها اللي كانت مشهورة بيها زي الكباس مثلا !!- هبقى أقول هو ايه بعدين- وبعد كل ده بقى وزير اسكان في حكومة الثورة !!!!!!!!!!!!!!!!

ومش بس مصنع أجريوم في مصانع كيماوية كتير جدا في دمياط مما أدى لمصايب وبلاوي لكل الدمايطة منها موت السمك والزرع وتلوث التربة وتلوث الهواء وكتمة الهواء كمان يعني المناخ أتغير !! مش بس كده ده في مصيبة أكتر من كده ان 99% من الدمايطة بقى عندهم أمراض في الجهاز التنفسي من كتر التلوث زي حساسية الصدر والأنف والأذن والحنجرة والربو وغيرها لأن دمياط أصلا فيها كيماويات تكفي وتفيض مش ناقصين مصنع كمان !!

اللي بيحصل بقى دلوقتي من الشرطة والجيش نقلا عن تويتر هو ده العادي برضه بيتعاملوا بقوة السلاح مع شباب أعزل وفي إصابات

وتعتيم اعلامي

لصالح مين كل ده يحصل !!!!!! ما يروح المصنع في ستين داهية ناس تمرض وناس تموت ومصالح تتعطل ومرضى ميعرفوش يوصلوا للمستشفيات وطلاب ميعرفوش يروحوا كلياتهم وجامعاتهم مش فاهمه ليه كل ده وليه المجلس الموقر بتاعنا مش بيتصرف بشكل لائق ومش كده وبس بيستخدم الرصاص الحي كمان !!!!!!!!!!!!

Arch Haidy يا جماعه احب اقولكم انى عايشه فى راس البر مفيش بنزين خالص فى راس البر ولا فى أنابيب غاز خالص حتى الخضار واللوازم المعيشه بدأت تقل عند البائعين وكمان بيغلوها علينا ولا عارفين نروح شغلنا ولا الناسعارفه تروح كليتها وبعدين بجد حرام اللى بيحصلنا ده اوك انا مع منع المصنع بس مش بالطريقه دى احنا بنى ادمين برضو !! ده تعليق بنوتة عايشة في رأس البر نقلا عن فيس بوك

هو مفيش مطالب ممكن تتحق بهدوء أبدا ليه المجلس الموقر بيستنى لما كل ده يحصل مش فاهمه يارب أحمي مصر ودمياط وأهلها

سقفك بعيد فوق في السما :)

البوست اللي فات أتمنيت الترحال :) أي السفر وطلبتها ونولتها سافرنا من صلالة لمسقط 1000 كيلو :) بحالهم بأمطارهم بعاصفة الصحراء فيهم كانت رحلة زي الفل بصراحة الحمد لله واللي زاد وغطى أن معدتي كانت بتوجعني المشكلة العويصة أني لما بضايق أو بضطر أكلم حد بطريقة عدوانية أو سخيفة بتيجي فوق دماغي وأنا اللي بتعب حتى لو اللي قدامي يستاهل ضرب النبابيت والبراطيش والقباقيب وما شابه

بمناسبة اللي يستاهلوا الضرب وبما إن الشيء بالشيء يذكر الشوية اللي أعرفهم من المصريين اللي ممكن يتقال عليهم مصريين بيفهموا نوعا ما هنا ان شاء الله هيروحوا السفارة يسجلوا اسمهم وينتخبوا أما باقي وأسفة في اللفظ -.........- اللي مصريين بالجنسية بس !! أغلبهم مش هينتخبوا ولا في دماغهم أصلا !!!!!!!!!!
إن شاء الله هروح يوم السبت السفارة المصرية اللي لقبها – وأنا عاملة نفسي نايمة- ومن موقعي هنا بقول لكل فروع سفارتنا في كل أنحاء العالم جاتكو ستين ألف نيلة متوزعة عليكم بالتساوي لأن سفارتنا بره بلدنا لو لقت مصري في مشكلة – وعن تجربة احكيلكو عليها بعدين- بتكلكع له الدنيا وبتجمعله كل الروتين وتشيله الهم ولذلك سفارتنا في الخارج زي قلتها للأسف !! وعلى فكرة هما مش خريجين سياسة وإقتصاد زي ما كتير متخيلين !!
وكمان عايزة اروح سفارة بريطانيا علشان أبقى اجندة رسمي :) علشان أحضر لرحلتي لبريطانيا ان شاء الله ويارب أخو الأمير اللي اتجوز السنة دي ميفكرش يتجوز السنة دي والجاية علشان عايزة أزور بريطانيا السنة دي جدا جدا وبجد الرحلة دي عارفة أنها هتفرق معايا كتير أوي وهتخليني فرحانة وفي أحسن حالاتي ولذلك يارب .

النهاردة وبعد 3 أيام معدتي العصبية :( كانت بتوجعني فيهم أخيرا الحمد لله معدتي خفت – يااااااااه المعدة تاج على رؤوس اللي بياكلوا :)) إضطريت أخد عصير ومشروبين بس طول يوم السفر على أمل أن معدتي تخف وخفت معدتي نوعا ما الحمد لله تاني يوم :) وجبت سنيكرز حبيبة يسري فودة وأكلتها علشان أشوف تأثيرها فعلا زي ما قال ولا ايه وهي فعلا بتشبع جدا وبتدي طاقة تكفي أسبوع حسب كلام يسري فودة :)
ونزلنا أشترينا هدايا لأصحابنا وكنا معزومين عندهم هما مصريين وطنط فضلت تقولي عملالك مفاجأه ااااااااااه من دي مفاجئة يا إيناس أااااااااااه لأ دي مش مفاجئة دول أتنين اااااااااااااااااه يا إيناس :)
- انا بصراحة أتخضيت- أصل طنط كانت بتقول أه من المعاميق !! دي كده تبقى مفاجعة مش مفاجئة
و10 دقائق طنط دخلت وسابتني مخضوضة وبقول يارب خير وسابتني كمان للأسئلة هو في إيه؟ يمكن طنط بتتكلم على بنوتتها ؟ طيب بتتكلم عنها كده ليه؟ وشوية طنط جت وأدت لماما بيبي صغنن عنده شهر وإحنا بجد اتفاجئنا على اتبسطنا كوكتيل مشاعر عسول أوي :) وبعدين طنط دخلت وجابت البيبي التاني وأدتهولي :) بسم الله ما شاء الله تؤام ربنا يبارك لهم فيهم ويشفيهم ويعافيهم ويحفظهم بجد أتبسطت أوي وصحبتي الأنتيم نطت في دماغي هي وكارين طبعا هي عارفة نفسها من غير ما أقول :)
وأخت التؤام التانية 3 سنين" رنا" طبعا البنوتة كانت مضايقة من الأطفال الجداد اللي أخدوا كل الحب والإهتمام
ومليون في المية كنت حاسة بيها :) اطفال زي بعض بقى هههههههههه أصل وأنا في سنها كانوا بيقولولي هتعملي ايه لما يجيلك أخوات يا ننوسة وكان ردي بكل عفوية وتلقائية وبراءة الأطفال في عينيا : هرميهم من الشباك :))
طبعا ناس كتير كانوا بيزعقولي فغيرت مقولتي الشهيرة وبقت هرميهم من البلكونة :) هو أنا كده حبايبي مبيقبلوش القسمة مع حد علشان كده قربت من رنا وشوية بشوية أخدت عليا وأخدت عليها ولعبنا بالمكعبات والعروسة وحضنا بعض وأتوشوشنا علشان محدش يسمعنا :) ولعبنا بتوك الشعر وقعدنا مربعين رجلينا على السرير وأتمشينا في الأوضة وكانت عايزاني أبات معاها أنا على سرير وهي على سرير وأمرها لله هتاخد أختها جنبها علشان أنام مستريجة على سرير لوحدي :) المهم لازم أقعد ونلعب سوى وكانت ماسكة فيا وسابتني أمشي بالعافية ومرضتش تبوسني علشان ماشية وسايباها :) وكمان بيبي من البيبهات كان بيعيط فشيلته وطبطبت عليه وسكت وضحك فأخته الكبيرة قالتلي أنتي بيحبوكي الأطفال :) بعدها على طول أخوها عيط :) أما أنا ونهى أختهم الكبيرة ففضلنا نتكلم عن الإنجليش والأفلام والمدرسة وحكيتلي فيلم وغنينا سوى أغنية سيلين ديون تايتانك وأتاري الفيلم ده تتوارثه الأجيال ههههههههه جيلنا كله من البنات حافظ الأغنية دي وفي كتير مش فاهمين معناها أصلا بس حافظينها وعن نفسي كنت وأنا اد نهى بحب الفيلم ده بطريقة مش طبيعية بس طبعا شوفت النسخة المسموح للأطفال بمشاهدتها منه وكمان الأغنية دي بداية حبي لأغاني سيلين من وقتها وبدأت أسمعها .
الفكرة في العزومات انها بتبقى دفا ولمة وحب ومرهقة برضه علشان بوزع طاقتي على كل أهل البيت ولازم لازم لازم أسيب لهم طاقة إيجابية في البيت ضحك وفرحة وكلام حلو ودعاء ليهم بالخير وسؤالهم عن أحوالهم وأهتمامتهم علشان كده بخرج من العزومة مرهقة وعايزة أناااااام علشان أشحن طاقتي وأرجعها تاني
ومع إني روحت العزومة بالعافية :) لكن بجد الحمد لله أستمتعت باليوم وطنط نفسها في الأكل خطير ما شاء الله عليها :) وكمان كانت عاملة لينا عزومة أهل العروسة لخطيب بنتهم مش عزومة عادية كمان ربنا يديها الصحة ويعينها ويديها كل خير هي وعمو وأطفالها .
ملحوظة : النت عندي حاليا أوحش من وحش بحاول أنشر البوست ده ومطلع عيني بقاله شوية ده أول بوست في التدوين اليومي لمدة شهر واحتمال يفضل كذا يوم لغاية لما ارجع صلالة والنت يبظبط عندي ان شاء الله

يا خسارة مجبتش العوامة

محدش قاللي وأنا في مصر ليييييييييه؟ ان هيبقى في منخفض جوي في سلطنة عمان؟ كنت عملت حسابي وجبت عوامة وكتافات أو حتى لايف جاكيت :)

الصورة اللي فوق دي صورة مستشفى النهضة في مسقط ونقلوا المرضى منها

النهاردة اليوم الثالث للأمطار المتواصلة والموضوع كده بدأ يدخل في الجد في طرق بدأت تتقطع

والخروج ممنوع الا للضرورة ولسه مش عارفين الوضع ممكن يتطور أكتر من كده ولا لأ

المفروض ان المنخفض الجوي ده اعصار بس مبيقولوش عليه اعصار لأنه مش قوي أوي زي الاعصار وعلشان الناس متخفش

الشوارع غرقانة وكإنه فيضان وفي شوارع عادية والتلفزيون العماني قاطع برامجه العادية وبيتكلم عن المنخفض الجوي والكهرباء مقطوعة في شارعنا وده تقريبا علشان تخفيف الحمل على الكهرباء علشان متقطعش من البيوت وكمان علشان ميحصلش صعق للأطفال أو الكبار من الكهرباء مع غزارة المية

والكهرباء موجودة في الشوارع الرئيسية

قبل يومين من دلوقتي – أول يوم مطر- رحنا الهايبر وكان متوفر فيه كل حاجة أما لو الوضع استمر جايز تحصل أزمة غذائية وخصوصا ان العادات الشرائية للعمانيين والمقيمين بتزيد في حالات الطوارئ اللي زي دي بس الحمد لله غالبا مبيحصلش استغلال للوضع وارتفاع في الأسعار وخصوصا كمان أن عيد الأضحى قرب وبرضه المشتريات بتزيد من كل الناس

الأرصاد الجوية العمانية بتقول ان المنخفض الجوي هيبدأ يقل ابتدائا من يوم السبت ان شاء الله –برغم اني مستمتعة بالجو- لكن أتمنى فعلا ان المنخفض ده يروح لحال سبيله لأن كده بدأت أقلق :) وخصوصا ان في خسائر في الأرواح والممتلكات

والحمد لله أن الكهرباء والمياه والتليفونات والإنترنت موجودين ومتأثروش بالحالة الجوية زي الأعاصير اللي فاتت عالسلطنة - مناطق قليلة اتأثرت-

أي حد عايزني أدعيله بأي دعوة يقول لأني أعتقد أن الدعوات دلوقتي مستجابة في ظل الظروف الحالية والمطر المستمر ده :)

ان شاء الله خير

مطر !! :)

من أكتر الحاجات اللي فاجئتني هنا في عمان أول ما نزلت من الطيارة كان الحر المبالغ فيه الجو حر بطريقة لا تطاق طبعا بالمقارنة مع مصر

ولأني من عشاق المطر فأنا دلوقتي سعيدة جدا بالجو هنا الجو أتغير خالص في يومين وكإننا نقلنا شتاء مصر لغاية هنا والمطر من امبارح متواصل وشكل السحاب جميل أوي وصوت الرعد والبرق والأطفال جيراننا أردنيين والأردنيين بسم الله ما شاء الله بيجيبوا أطفال كتير -ربنا يباركلهم فيهم-

فالأولاد بيلعبوا مع بعض تحت البيت كورة وتحت المطر كمان :) والبنات واقفين في البلكونة مع مامتهم لابسين اسدال الصلاة وفرحانين بالمطر

حلوة الفرحة اللي بتيجي من غير معاد وحلو مشاركة الفرحة :)

الحمد لله

------------------------

ملحوظة : رجعت الأكونت بتاعي عالفيس بوك :)

مسافرة

لسه ساعات على معاد طيارتي والمفروض ان دلوقتي أكون جاهزة للسفر وبعد شوية أكون في طريقي للمطار والمفروض كمان أكون مشغولة ومش فاضية أفتح الكمبيوتر أو اللاب لكن ومن امتى الكتابة كانت بتختار الوقت المناسب؟ كلمات بتفرض نفسها علينا وتفضل تيجي لينا يمين وشمال وتقول هتكتبوني يعني هتكتبووووووني

مش عارفة تسمية الربيع العربي علشان الثورات دي صح ولا غلط لأن اللي هيقول ان احنا في ربيع يبقى بيستهبل يمكن حالة بلدنا والبلاد العربية المجاورة تتصلح مستقبلا وتعيش ربيع فعلا؟ الله أعلم

قعدت وكتبت ليسته طويلة بكل الحاجات الإيجابية اللي حصلت لي في مصر وطبعا مرضتش أكتب ليستة سلبية علشان هتبقى كبيرة اوي اكتر من اللازم !! وأول لما ابقى بعيد عن مصر هكتب ايجابياتها ان شاء الله عالمدونة

السفر قطعة من العذاب مش عارفة ليه بفتكر الجزء ده من الحديث دائما وأنا مسافرة ودائما ببدأ سفري بدعاء السفر في ناس بيقولو ان السفر على جمل هو اللي قطعة من العذاب بس انا شايفة ان كل السفر زي بعضه حتى لو كان بمكوك فضائي


لا كرامة لنبي في وطنه : ايه بقى هي الجملة دي كل مرة تيجي يوم السفر وتلح عليا أوي كده ليه؟

ان شاء الله هسافر 16 ساعة بين 4 مطارات
مطار القاهرة
ترنزيت في مطار البحرين
مطار مسقط
مطار صلالة

أول مرة أنزل القاهرة وفيها مليونية وكمان البحرين اللي برضه فيها ثورة وفيها كلام مش هينفع أقوله دلوقتي عن البحرين علشان هنزل فيها ترانزيت :) فعايزة انزل ترانزيت وأرجع عمان مش أفضل في البحرين على طول فنعدي النقطة دي دلوقتي وبعدين ابقى أقول لكم لو لسه في العمر بقية :)

النهاردة أول يوم في العشرة الأوائل من ذي الحجة والأيام دي طيبة وربنا سبحانه وتعالى أقسم بيها في قوله تعالى " والفجر وليال عشر" دي دعوة بسيطة مني اننا نصومهم ونقرأ فيهم قرأن لأن الأيام دي ربنا بيحبهم وثوابهم كبير

أستودعكم الله الذي لا تضيع ودائعه

دكتور تيييييييييييييييييييييييت

للأسف كلية الطب بتخرج أي ناس وبرضه بتخرج أطباء محترمين وزي الفل منهم اطباء وطبيبات غاية في الرقي والإنسانية بس للأسف وللأسف جدا السيء هو اللي سايد

امبارح كنت مع ماما عند طبيب أو نقدر نقول معاه الشهادة ومعلقها عالحيطة وأهو الإسم ضاكطور
وبرضه نفس الضاكطور أنا روحت كشفت عنده المفروض ان الضاكطور ده طبيب قلب وباطنة
يوم لما روحت أكشف ماما كانت معايا وأنا قاعدة لمحت كاميرا في الريسبشن بتاعت العيادة لأن سيادة الضاكطور بيشوف مين اللي في العيادة عنده وبيحصل ايه في عيادته قولت كويس بيفهم في التكنولوبيا
وكمان معاه لاب توب وبيسجل فيه الحالات اللي عنده
لما دخلنا بقى خير اللهم أجعله خير دخل معانا مندوب شركة أدوية وطبعا لأن الضاكطور متخيل ان كل الناس أقل ذكاءا منه ف اتكلم مع مندوب المبيعات بالإنجليزي على أساس ان محدش فاهم هههههههههههه ف اتكلم بحرية كبيرة وده علشان ربنا يكشفه قال ايه بقى لمندوب المبيعات
قال له أنه هيجرب الأدوية الجديدة اللي نسبة خطورتها عالية على المرضى الميؤس من حالتهم
وكرر كلامه ده أكتر من مرة علشان يأكد عليه وعلشان يأكدلي اني مش بحلم هو في حد معندوش ضمير للدرجة دي هو في طبيب يحمل شرف المهنة دي وأقسم على حماية أرواح الناس يجرب أدوية مضرة فيهم وأهو يبقى له نسبة ربح كل ما كتب الأدوية دي اكتر كل ما كسب اكتر واكتر
الضاكطور ده ومن غير ذكر أسماء اسمه محمد تقي الدين وكان نفسي يبقى ليه من اسمه نصيب يبقى عنده تقوى ودين وللأسف مشهور في دمياط وناس كتير مخدوعين فيه
المهم أنا لما سمعت حواره مع مندوب الأدوية قولت مستحيل أجيب الدوا اللي كتبهولي والحمد لله اني قررت كده
ونرجع لإمبارح روحنا إعادة كشف لأن الدوا مجابش أي مفعول مع ماما بل وتعبها أكتر
انا على ما لقيت مكان اركن وطلعت لماما العيادة لقيتها في قمة النرفزة والعصبية وضغطها بقى عالي بشكل رهيب
وجه على بالي كل الشتائم اللي في الدنيا نفسي اقولها للمدعو تقي الدين بس انا مؤدبة ومبشتمش
معاد اعادة الكشف اسبوع وفات كام يوم من الأسبوع وست المتخلفة سكرتيرة المدعو تقي الدين
قالت لماما هحجزلك المعاد وعلى فكرة حجز المعاد عنده قبلها بيومين على اساس انه رئيس جمهورية كشريستان
فماما حجزت وكان الخميس والجمعة اجازة وفاتو اليومين وروحنا فعلا واحنا حاجزين فالسكرتيرة – نفسي الأمارة بالسوء نفسي تشتمها بس انا مؤدبة ومش بشتم – قالت لماما ملكيش استشارة ولا اعادة كشف
خلاص اتأخرتي عن وقتك مع ان السكرتيرة اللي اخرت ماما وحجزتلها بعد المعاد بيومين ومقالتش انه مينفعش الاعادة بعد اسبوع فماما قالتلها يعني الحل ايه دلوقتي ؟ادفع كشف قالتلها حتى لو دفعتي كشف مش هتدخلي ولا النهاردة ولا بكرة أمي بقى اتعصبت واتنرفزت جدا وربنا لطف انه محصلهاش مشكلة صحية في الوقت ده من كتر زعلها وانفعالها مع ان في العادي مامتي هادية بس لغاية دلوقتي ضغطهامش عايز ينزل فقولت لماما عادي يعني ضاكطور سمعتي بودنك كلامه انه بيجرب أدوية جديدة في اللي معتبرهم زباين مش أرواح زعلانة ليه؟ وعلى فكرة اول لما دخلت عيادته لقيته حاطط صورته وفيها علامة شركتين أدوية مشهورين وصاحب شركة منهم سبب خراب حاجات كتير حلوة في مصر فمحستش بخير
نفس الموقف بالضبط اتكرر مع انتيمتي في نفس الوقت ولكن بطريقة تانيه عند دكتور تاني
هو الدكاترة في مصر مالهم بالضبط؟ عمالين يطالبوا بحقوقهم أوكي على عيننا وراسنا ووالله بنحترم اللي يستحق الاحترام منهم لكن المفروض تحترموا مرضاكم عالأقل ده الف باء طب

انا كتبت عن الدكتور اللي معتبر الناس فلوس واسمه محمد تقي الدين وقولت شهادتي عن كلامه وعن تصرفاته مع مرضاه اللي عايز يروح له بقى ذنبه على جنبه اللهم بلغت اللهم ف اشهد

كل شيء بقضاء

من فترة وأنا ماشية في الأعصر في دمياط كنت بدور على كورس تدريب المدربين ورايحة الكلية أخلص أوراق التقديم لدبلومة الترجمة
وفجأه لمحت اعلان موجود على مكتبة مبارك سابقا ومكتبة مصر حاليا الاعلان اللي كان موجود ده مكتوب عليه منحة تدريب المحاضرين
10 مقاعد فقط للإتصال ومكتوب رقم تليفون

ف اتصلت بالرقم ففي بنوتة ردت عليا وقالتلي تفاصيل المنحة المكتوبة في الاعلان اصلا :) وقالتلي أي تفاصيل اسئلي في المكتبة :) فطلعت الدور الثاني في المكتبة وسألت
قالولي مفيش معلومات متوفرة دلوقتي المعلومات مع المستر اللي هيشرح الكورس وهيبقى موجود بكرة
تعالي بكرة ولا اقولك اتصلي بينا بكرة :) اتصلت وقالولي في انترفيو النهاردة تعالي قولتلهم ماشي
رحت مع مامتي وكان في كورس ففضلت مستنية حوالي نص ساعة تزيد او تقل لغاية لما المدرب خرج واتكلمت معاه واستفسرت عن الكورس قاللي علشان تعرفي اكتر روحي ل أية فدخلت القاعة اللي كان فيها التدريب
قولت للبنوتات يا بنات مين فيكم أية؟ :) ف أية جاتلي ف استفسرت عن المنحة فقالتلي طيب املي الأبليكشن دي
وقعدت فعلا جاوبت على أسئلة الأبليكشن وكانت صعبة بجد وبعدين المدرب قاللي الامتحان يوم الخميس الجاي الساعة 5 :) وكده عديت اول مرحلة
يوم الخميس رحت امتحن الإمتحان اتأخر نص ساعة لأن كان في ناس بيكتبوا الابليكشن :) والمستر كان في المكتبة في الدور الخامس أخر دور في كورس تاني عندهم حفلة فطلعت استأذنت منه قبل ما امتحن وقولتله اني هسافر ومش هقدر أكمل المنحة أمتحن ولا لأ قاللي نص علم أحسن من مفيش ده لو نجحتي في الامتحان :) قولتله ان شاء الله هنجح انا مش بتكلم على كده بتكلم على المنحة ممكن مقدرش اكمل فيها قاللي خلاص ممكن تكمليها لما ترجعي ان شاء الله
- أدالي أمل –

نتيجة الامتحان المدرب كتبها عالفيس الأحد بالليل يعني فضلت عايزة اعرف نتيجة الامتحان الخميس والجمعة والسبت والأحد لغاية 9 بالليل ولقيت اسمي وفرحت بس فرحتي انطفت بعدها لما شوفت الاحداث اللي بتحصل في مصر

تالت خطوة الانترفيو يوم الثلاثاء عملت انترفيو انه ايه خطتي بعد التدريب وهعمل ايه بالمنحة ؟ ونجحت في المقابلة وده يوم ماتش الزمالك وانبي اللي مشوفتوش عن تعمد والمدرب قاللي موضوع السفر ده مشكلة عالعموم ها رد عليكي الساعه 9 بالليل وفضلت مستنية هنجح ولا هفشل ولا ايه ؟ وانا بكره الانتظااااار
وبعدين بعت رسالة للمستر بفكره انه يرد عليا فقاللي حظا موفقا مش عارفه ايه واني م الأخر مقبلتش في المنحة
انا طبعا اضايقت يعني 3 خطوات عديت منهم بنجاح وضيعت اسبوع وشوية من اجازتي في مصر علشان المنحة دي وتيجي بقى اخر حاجة ومأخدش المنحة وبعدين سألت طيب ممكن أحضر وأدفع مصاريف المنحة دي؟ مش عايزة العلم يفوتني وعايزة اتعلم فعلا فالمدرب مردش عليا وقتها بقى حسيت انه مبيحترمش طلابه
واتغظت أوي وحلفت اني هعمل التدريب ده مجانا للي عايزين يتعلموا في يوم من الأيام واني هتعلم تعليم بجد في الجامعة الامريكية وربنا يقدرني وأتعلم هناك وأخد العلم من أهله الأصليين الأجانب وزعلت فعلا

النهاردة بقى كنت هروح المنصورة وحسيت اني مش عايزة اروح :) والساعه 3 الا ربع-قبل ما التدريب يبدأ بربع ساعة- لقيت سكرتيرة المدرب
بتكلمني بتقوللي ايناس تعالي يلا
قولتلها اجي فين؟
قالتلي التدريب ؟
قولتلها المنحة؟
قالتلي ايوة
- بتتكلمي بجد؟
- - ايوة يا بنتي
- ليه ايه اللي حصل المستر قاللي اني مش معاكو
- غير رأيه؟
- ليه يعني؟
- معرفش يلا بقى تعالي بسرعة
كانت مفاجعة :)
طبعا نيللي صبحتي كانت معايا خطوة بخطوة من اول ما عملت الأبليكيشن وبترفع من روحي المعنوية وقعدت تدعيلي وتقولي ربنا يوفقك ولو محضرتيش الكورس ده متزعليش ربنا شايلك الأحسن – حبيبتي يا نونو ربنا يخليكي ليا – وربنا يحقق لك اللي بتتمنيه يارب
وكمان حكيت لكيكي وفراشة وربنا يخليهم ليا الصحبة الجميلة دي ويباركلي فيهم

الكورس بقى كل يوم الأسبوع ده بدل يومين في الأسبوع الحمد لله

اتأخرت شوية على ما رحت الكورس لأني عرفت متأخر اني هروح وفاتني التعارف والاسترخاء اللي عملوه في بداية الكورس ودخلت على سؤال محرج للغاية اتكلم على انك طفل عندك 3 سنين :) هههههههههه أد ايه فرحت بالسؤال ده وافتكرت مدونتي روح طفلة مش عايزة تكبر

ربك بكرة يعدلها في أوانها

دع الحزن ينتقص من روحها ما شاء فلقد هبت عليها عواصف ماضية جعلتها تتعلم أن تذهب بحزنها الى مداه فلا يستطيع إيقافه أحد ولو حاول

ضحايا بلادها المتكررين بطرق مختلفة يذكرها بالعراق ويخيفها كطفلة عاصرت الحرب في بيروت

أحلامها المخنوقة

حب ضائع

حقوق تائهة

تشعر أحيانا أن السعادة والحب ضلا طريقهم إليها وأصبح الحزن يريحها أحيانا بقدر ما يؤلمها ويؤرق منامها

نكبات الوطن وجراحه تذكرها بنكبات وجراح روحها

وبرغم إحاطة الظلام بالحاضر والمستقبل تمشي فيه بثقة وتحمل شمعة نورها ضئيل تتفائل بها وتؤمن إيمانا عميقا بأن ربك بكرة يعدلها في أوانها .

--------------------------------

ع الهامش : شكرا يا نيللي ع الصورة :)

تالت يوم حداد على مصر

أنا مصرية زملكاوية وأعلن احتجاجي واعتراضي عن عدم تأجيل ماتش الزمالك النهاردة ودي جليطة وقلة ذوق وعدم احترام لمشاعر المصريين والنهاردة تالت يوم حداد على الضحايا اللي ماتوا في أحداث أول امبارح

نفس الأسلوب القذر اللي كان بيتبع قبل كده أيام غرق العبارة ومشاكل الحضري وماتشات الأهلي ومفيش احترام لمشاعر أي حد وأنا كزملكاوية مش هتفرج على الماتش وميهمنيش لو الزمالك فاز في وسط المصايب اللي مالية مصر وقمة الغباء ان بعض الأهلاوية النهاردة بيقولوا رايحين نتفرج ع الماتش علشان نشمت في الزمالك !!!!

من ناحية في عنصرية ففي عنصرية في مصر بين أطراف كتير مش بس الديانات المختلفة وطول عمر المسؤلين مخوفننا من بعض كمسلمين ومسيحيين بس الأحداث الأخيرة ملهاش علاقة بالمسلمين ولا بالإسلام لا من بعيد ولا من قريب ومش هفضل أقول ديني دين السلام ورحمة للعالمين مش بس للمسلمين وحدهم تعبت من كتر ما التهم بتترمى عالإسلام

مستحيل المسيحيين المصريين يضربوا الجيش ولو -افتراض 1%-حصل ف هما اتهد ليهم كنيسة في بلدهم حد فاهم ده يعني ايه؟ يعني دار عبادة اتهدم بدون وجه حق مخالف مش مخالف مش موضوعنا وكان في 100 حل غير هدم المبنى اللي اخواتنا بيصلوا لربنا فيه

اللي حصل بإجماع كل أصدقائي وصديقاتي تدبير الفلول وشوية الحرامية اللي في السجن ولسه معاهم فلوس ونفوذ وعايزين مصر تشيط ويلهونا دلوقتي عن محاكمتهم وعن بناء مصر بس بإذن الله ربنا مش هينولهم اللي في بالهم

أنا حزينة وموجوعة زيي زي باقي المصريين البقاء لله وربنا يعدي الأيام دي على خير