ربع جرام

فاكرين من شهرين كده اتكلمت على رواية ربع جرام في البوستات دي دماغ نام ننا هو و
دعاء السكينة

اللي شاف الرواية دي هيعرف انها لسه في الأسواق وبتتباع ب50 جنيه وطبعا مش اي حد ممكن يشتريها ده غير الطبعة الخاصة اللي شوفتها في مكتبة الشروق في المطار ب 95 جنيه ما شاء الله حاجة تحبط :)
المهم انا لقيت الرواية في مكتبة مبارك عندنا وفرحت جدا وقرأتها وبجد عجبتني جدا


يااااه مش مصدقه أخيرا خلصت قراءة رواية ربع جرام 635 صفحه أول مرة اقرأ كتاب كبير كده (الكلام ده من شهر وشوية)

بجد بجد الرواية أرهقتني كانت في شنطتي في كل مكان في الكلية وفي السفر وعند خالتو حتى أيام كورس التنمية البشرية وأخدت شوية تعليقاااات كتيييييير وأشهر تعليق كان (ربع جرام؟) يعني ايه ربع جرام؟؟

فكنت بقول ربع جرام هيروين :) ودايما كنت بلمح نظرة التعجب مع نظرة يا ضنايا يا بنتي ايه اللي خلاكي تقرأي حاجات غريبة كده في عيون أي حد بيسأل

اما تعليق بابا فكان أنا بكره الرواية دي – لأني كنت بسهر في قرائتها وبقعد مع نفسوياتي كتير علشان اخلصها –

وتعليق زميلاتي في الكليه : طب خلصي كتب الكلية الفظيعه اللي ورانا الأول وبعد كده اقرئي براحتك – بصراحه عندهم حق-

وتعليق غادة لما كنا في كورس التنمية البشرية تصفحت الكتاب وقالتلي زمالة المدمنين المجهولين وقعدت تهزر فالمستر قاللي استنيها تحت وضحكنا كلنا بجد الرواية كانت من أساسياتي الأيام اللي فاتت من حوالي شهر وشوية

الرواية بدأت بتقديم الشخصيات والشخصية الأساسية صلاح اللي حكى حكايته مع المخدرات طول الروايه وفي البداية وضحوا ان المخدرات كان تأثيرها كويس عليهم وازاي بدأوا بالخمور والحشيش لغاية لما دخلوا في سكة الهيروين وكنت متغاظة في بداية الرواية ان الأبطال عايشين حياتهم وكويسين ومحدش أصلا مكتشف انهم بيتعاطوا مخدرات

في الفترة دي كنت حاسة اني عايشة مع أبطال الرواية وشايفاهم لأن لما بقرأ رواية أو أي حاجة وأكون حباها بتقمص الشخصيات واندمج في الاحداث وأعيش معاها فكنت حاسة اني هتجنن قريب :)

أكتر شخصيات أثرت فيا

طبعا شخصية صلاح (صاصا) الشخصية الرئيسية واللي الرواية بتتحكى على لسانه شخصية ذكية جذابة أنيق ومرح ودون جوان وساعات الادمان كان بيخليه دون بس من غير جوان
بدأ الادمان في سن صغير أوي بدأ بخمور وحشيش

والادمان غير طبيعته تماما وخلاه يسرق ويأذي الأشخاص اللي حواليه بس عالأقل الشخص المدمن بيبقى مريض لكن يا ترى اللي بيسرق ويأذي مشاعر غيره وهو مش مدمن عذره ايه ؟
بعد رحلة الشفاء من الادمان صلاح بقى انسان تاني رائع

رامي ريكو : زميل وصاحب صاصا ومن شلته كان مهتم أوي بنفسه وكان مدلل جدا لكن للاسف بعد الادمان اتغير تماما وبقى مبهدل وخس جدا وفي النهاية اتمسك في قضية مخدرات اتجار ودخل السجن ووالدة اللواء في الجيش مستحملش الخبر واتوفى في نفس اليوم


راندا : طول الرواية بقول عليها غبيه جدا مش هقول عليها اكتر من كده

البوست الجاي ان شاء الله هكمل باقي الشخصيات اللي أثرت فيا من الرواية واجتماعات المدمنين المجهولين وعلاقتها بالتنمية البشرية

اعمل اييييييييييييييييييييييييييييه

مآااااااااااااسي وكوارث وبلاوي ده منهجنا السنة دي بإختصار

بدأ العد التنازلي للإمتحانات وزي النهاردة ان شاء الله هيبقى اول امتحاناتي وفي عندي امتحانات شفوي الله اعلم هيحددوها امتى بس الأكيد انها هتبقى في اول شهر واحد

يعني انا عايزة اذاكر وبعد محايلة لنفسي وتوبيخ لنفسي برضه علشان اذاكر وفيلم التجمد الفظيع في الشتا اللي احنا فيه ده

الحمد لله الحمد لله مسكت الكتاب هيييييييييييه بقالي كتير مبمسكش كتاب من كتب الكليه طيب ده تطور رائع

فتحت اول موضوع في اول chapter ما علينا اني كنت باخد الكلمات بالشبه واترجمها وتطلع غلط يعني مثلا rarely أقرأها really وهكذا

مش دي المشكلة اطلاقا المهم بعدما قرأت اول 4 سطور لقيت ان الموضوع فيه ناس فقراء والناس دول قرروا انهم يبيعوا اطفالهم لحد دلوقتي عادي بتحصل وبنسمع عنها كل يوم بيبعوا اطفالهم علشان يعلموهم صح ويربوهم مش فقراء لكن اللي حصل في المقال انهم بياخدوا الأطفال لغرض تاني خالص وهو الأكل !!!!!!!!!!!!!!!

بيبيعوا الأطفال علشاااااان يتاكلوا

يعني واحدة تقول لجوزها انا عملالك شوربة بيبي بالصلصة يا ابو بؤله

وابو بؤلة وام بؤلة وبؤلة نفسه يقعدوا كده على السفرة او الطبلية او الترابيزة او اي حاجة وياكلوا بيبي

والكلام ده مش في مصر لكن في ايرلندا في القرن ال17 بس في المقال رموا كلمه كده تحرق الدم اللي هي الكلام ده كان بيحصل من زمااااااان قبل الحضارة في بلادهم لكن دلوقتي بيحصل في بلاد العالم التالت والحدق يفهم قصد الكاتب ايه

مشكلتي اني بتأثر بالحاجات اللي بقرأها بحسها اوي وبعيش مع ابطالها ودي حاجة بتتعب اي قارئ بيعيش جوه الأحداث

طب انا اعمل ايه دلوقتي افتح كتاب الاقي فيه قصة واحد بيتعدم واحلامه ولحظات موته

كتاب تاني الاقي فيه وصف لأكل الأطفال وان الناس من فقرها باعوا الأطفال للأغنياء علشان ياكلوهم ولو اني معتقدش ان الفقر يوصل للدرجة دي

كتاب تالت عطيل وديدمونة والغيرة القاتلة والخيانة هو خانها لما صدق انها خانته وخانها لما قتلها وبين ان جريمة قتلها حادثة ووقع سقف البيت عليها بعد ما خنقها وخان نفسه لما انتحر لما عرف انها بريئة

كتاب رابع مدرسة الفضيحة "سلطة" مش عارفه مين بيحب مين ومين اتجوز مين حاسة اني تايهه بين الأبطال ومأساه برضه

كتاب خامس انعدام البرائه اطفال همجيين ومتوحشين بيحبوا مناظر الدم والدمار وبتوصل بيهم الهمجيه لأنهم يقتلوا بعض وياكلوا بعض برضه

.......... الخ

اذاكر ازاي انا كل ده الله اعلم وهستوعب كل المآسي دي ازاي الله اعلم برضه

(( اللهم لا سهل إلا ما جعلته سهلا، و أنت تجعل الحزن إذا شئت سهلا))

l'm not well

I'm not well

I can not study

my mobile phone disappear

vodafone go to hell really i hate your company

ارجوك لا تكن صديقي

قبل الموضوع : ان شاء الله هرد على باقي تعليقات البوست اللي فات انا بس لسه في حالة هدوء وتأمل مش عارفه ليه

الصورة دي امبارح بإعتبار ان النهاردة بقى 18 الوقت العصر من كوك دور راس البر من قدام اللسان

حسيت اني مخنوقة جدا ولازم اغير جو وطلعنا بعد الكلية على راس البر دايما لما بشوف البحر برتاح والجو كان مغيم جدا ومطر وبعدها ظهرت الشمس وحسيت انها دفئت روحي بعد الغيوم وبعدها مطرت تاني :)

كنت بعشق المطر بس بعد الحادثة اللي عملتها في المطر بقيت مش ببقى مرتاحه في المطر ومع الوقت رجعت احب المطر تاني

"وطموحي .. هو أن أمشي ساعاتٍ.. وساعاتٍ معكْ.تحت موسيقى المطر..وطموحي، هو أن أسمع في الهاتف صوتكْ..عندما يسكنني الحزن ...ويبكيني الضجر.." قصيدة سعاد الصباح وغناء ماجدة الرومي

بس يا وااااااااائل في ناس قاعده وبتبص علينا ( انا في حالة اذبهلال تام ) ايه اللي انتوا بتعملوه ده وكمان مش مخبوطين يوووووه مخطوبين

مامااااااااا بيمسك ايديها لأ وعايز يبوسها كمان الواد ده عبيط ولا ايه الهبل ده ايييييييييييييييه الهببببببببببببببل ده وائل خد باله واحترم نفسه

ع اللسان البحر غضبان وموجه عالي يمكن علشان عارف

فضلت تحب فيه سبع سنين وصبرت على ظروفه واستحملت كتير وجابت منه اول طفله وهو جابلها انهيار عصبي وفقدان مؤقت للنطق

هموت جوايا حزن كبير عليها ، غلطتها انها حبت من لا يستحق الحب حبت اناني

ربنا يرحمها يارب الحب خطيئتها الوحيدة مش معقول تتعذب عليها باقي حياتها

"أنا محتاجة جداً لميناء سلام وأنا متعبة من قصص العاشقين، وأخبار الغرام وأنا متعبة من ذلك العصر الذي يعتبر المرأة تمثال رخام "

"كن صديقي

ليس في الأمر انتقاص للرجولة غير أن الرجل الشرقي

لا يرضى بدورٍغير أدوار البطولة.."

مللت من الشرقي وفقدت اي امل لمعنى الصديق فهو للأسف لا يدرك معنى الصداقه بمعناها البريء النقي

- احنا اخوات

- طبعا

وبعدها

- انتي الفراشه اللي بتلون حياتي وانتي وانتي وانتي وسلام معطلكيش ده كان مجرد كلام

انتي صدقتيني اخص عليكي لعلمك انتي الغلطانه يا وحشه بقى تصدقيني برضه لأ بجد اخص عليكي

- بس احنا اتفقنا نكون اصدقاء ليه كده ليه حطمت الصداقه دي للأسف كان وهم يا خسارة !

يا خسارة صورتك في عينيا ! مكنش ليه اي لازمه انك توهمني بالحب علشان تحتفظ بصداقتي

جيت تكحلها موتتها !!!!!

ان الأوان ان تطوي صفحات الألم والغدر وتنسى

ان تنثر باقي رماده في البحر فقد تحطمت صورة الفارس النبيل

ان تحيا كأن شيء لم يكن

ان تغسل قلبها بقطرات المطر وتطهره من بقايا الأوهام

ان الأوان ان تتذكر انه لا صداقه مع شرقي ولا حتى غربي فقط لأنها شرقيه

" هقفل الباب وامشي لبعيد ، هاخد خطوات جديدة تمسح القديمة ...... دلوقتي بس هقدر امشي من تاني " رحاب بسام ارز باللبن لشخصين

حكايات الصباح

ليست قصص ولكنها قصيرة (العنوان ده مأخوذ من كتاب عمر طاهر جر ناعم)

شعور :

الساعه 7 صباحا عندي محاضرة كمان ساعة ونص
منمتش من امبارح علشان أعرف اروح الكلية ومع ذلك مليش نفس اخطي خطوة بره باب بيتنا
حالة من الصمت بتسيطر عليا عايزة اسكت وبس مش عايزة اتكلم يمكن بكتب لكن مش عايزة اعمل اي حاجه
حاسة اني بتجمد وايدي لما بكتب في الأجنده بتبقى كتلة من التلج وحركتها بطيئة جدا
حالة من السكوت في اليقظة وحالة من الكلام في النوم وعجبي !

ضاكطور او بمعنى أصح طوووور :

رحت لضاكطور العيون وانا عيني بتوجعني بس مش أوي وبعد انتظار 3 ساعات كان نفسي اديلو بالبوكس في مناخيره
ودلوقتي بعدما استعملت القطرة الأجنبية اللي كتبهالي عيني بتوجعني اوي اوي اوووووي
ومنك لله يا فخري

الهدوم :

هي الهدوم بردانة أوي كده ليه مع انهم حاضنين بعض في الدولاب !

اصوات :

صوت فيروز وانغام وعلي الحجار وعمر خيرت وزقزقة العصافير
واحساس غريب النهاردة عايزة انزل من البيت الاقي كل الناس شفافين محدش في الشارع غيري
واسيب خصلات شعري للهواء والبرد ومش عايزة أشوف أي حد ولا حد يشوفني

ومع ذلك هنزل الكلية وهلاقي ناس كتير رايحه وجايه وهفضل لابسة الحجاب
لسه نص ساعه عالمحاضرة ومضطرة انزل بسرعه جدا
ادخل المطبخ واعمل مج قهوة بالفانيليا اتأخر اكتر عن المحاضرة

الجو بره :

افتح باب بيتنا تقابلني موجة عنيفة من البرد احضن كشكول المحاضرات والكتب واتدفى بالمج الاستانلس اللي فيه القهوة بالفانيليا اللي اكيد مش هحلق اشربها الا بعد المحاضرة

وأغير رأيي في موضوع الحجاب ده حجابي حبيبي تسلملي يارب

حنين

اعدي على بيت جدو واتخيله بيدعيلي زي كل يوم وانا نازلة الكلية - الله يرحمه -

" ر

بنا يوفقك وتنجحي وتخلصي الكلية "

" ربنا ينصفك نصفة كبيرة لغاية ما كل الناس يستغربوا ويحكوا ويتحاكوا عن نصفتك " دعوة جدو وخالة ماما الله يرحمهما

" بطلي جنان وامشي واحدة واحدة

- متأخرة يا جدو انا هطيييييييير مش همشي

- ربنا يكفيكي شر طريقك ويبعد عنك ولاد الحرام

ياه اخدتني الذكريات يا خبر ابيض اتأخرت اوي عالمحاضرة
تممت عالكوتشات ودورت الكتكوتة وقرأت الأذكار وطرت ع الكليه
الحمد لله وصلت في معادي ركنت الكتكوتة والدكتر بيركن عربيته بس هو دخل بعربيته جوه الكلية
ما شاء الله عربيته سودا موديل السنه اوباااااااا ملاكي دمياط علشان كده المحاضرة الساعه 8 ونص

في المدرج :

دخلت المدرج وبعدها بثواني دخل الدكتر وعملت مناوشات مع الشخصيات القميئة والهلامية اللي كانوا قاعدين في تاني بنش مكاني ومع اني مسالمة جدا بس ده مكاني ومبفهمش غير فيه ايووووووون بتلكك :)

الكائنات الهلامية : انتي عارفة انفلونزا الخنازير والنفس
انا : على فكرة ده مكاني اصلا وانتوا ضيوف عليه
كان نفسي اقولهم اوي انا اخدت دوش قبل ما انزل من البيت انتوا بقى بقالكم كام سنة ما اخدتوش دوش ؟ يا بتوع انفلونزا الفرافير بس بلاش الطيب احسن ومش بحب احرج حد

في المحاضرة :

بدأت المحاضرة والدكتر قال لنا اللي قلبه ضعيف او مكسور يطلع بره المحاضرة من دلوقتي لأن محاضرة النهاردة هتوجع وتكسر القلب فكرت اخرج فعلا من المحاضرة وخصوصا اني كنت بردانة بشكل غريب
فعلا المحاضرة كانت توجع القلب وتجيب الغثيان والدوخة من التعبيرات الدموية وجريمة زنا المحارم اللي ارتكبها اوديباس من غير ما يعرف والمصيبة انه جاب اطفال كمان والملكة امه انتحرت وهو فقأ عينيه ووضع مكانهما حجرين اهئ اهئ اهئ ما اسوأها من محاضرة منيلة بنيله معلش هي المحاضرات كده قسم ونصايب
منك لله يا شكسبير اوديباس على التوالي واثيللوا في ترم واحد عاااااااااااااااااااا عا

على الطريق :

بعد المحاضرة خرجت مع رشا علشان تشتري لجوزها ورد والبونيه ازبهلت ان معايا عربيه وسألتني بتاعت مين قولتلها بتاعت واحد صاحبي نياهاهاها مكدبتش ما هو بابا صاحبي وأخويا وباباتي وسالتني بتعرفي تسوقي كويس ولا عملتي حوادث؟ قولتلها عملت حوالي عشر او حداشر حادثة بس قالتلي هههههههههه بتهزري صح
قولتلها لا والله بتكلم بجد هتركبي ولا لأ؟ قالتلي يلا اهو نموت شهداء قولتلها خليكي متفائلة
بس بصراحة كانت اسئلتها كتير عن العربية وقالتلي نفسي انا وجوزي في عربية زي دي قولتلها يا بنت الحلال واحدة واحدة انتوا لسه بتجهزوا شقتكوا وواحدة واحدة ان شاء الله هتجيبوا عربية احسن من دي كمان انا من سنة كان معايا فوفو وكنت باخد كمية تريقة لا تتخيليها – مبحبش انا نظام الأر ده – زميلاتي بيركبوا معايا بقالهم كتير عمرهم ما علقوا على العربية ولا مرة مع اني دايما بوصلهم
جبنا الورد ووصلتها ورجعت على مكتبة مبارك مكاني المفضل ورجعت تاني رحت الكورس دووووخه والله دوخة ، اشتريت مصاصات من اللي فيهم لبانه وبائعة الحلوى انا مسمياها كده استقبلتني ب ابتسامتها الجميلة وقالتلي وحشتيني انتي فين؟ قولتلها انا اهو :) وفتحت اول مصاصة واهي حاجة تشغلني علشان منمش وانا في الطريق وعليت الام بي ثري منك لله يا ضاكطووووووووور عيني بتووووجعني ااااااه يا عيني
ووصلت العيال صحباتي وكان المفروض اخد ماما ونروح مشوار وعديت من قدام ماما ومأخدتش بالي ان ماما واقفة اصلا مستنياني كنت بناااااااام بس لما رجعت شوفت ماما

يقطع النوم وسنينه

الامتحانات قربت أوي والمراقبين هيراقبوا اربع فترات واحنا اللي هنتبهدل وهو ده التطور الطبيعي لسنه رابعة بيحتفلوا بينا

استفتاء

لا تجبر الإنسان ولا تخيّره
يكفيه ما فيه من عقل بيحيّره
اللي النهارده بيطلبه ويشتهيه
هو اللي بكره ح يشتهي يغيّره
عجبي !!

من غير كلام ورغي كتير موضوع ان الانسان يعمل كتاب ويبقى عليه اسمه والكتاب ده يبقى شاهد ليه او عليه لباقي عمره حاجه تخوف وحاجه مش سهلة وعلشان كده عايزة رأي قراء المدونة بكل صراحه في كتاباتي ومن غير مجاملة لأن اللي هيجاملني يبقى بيضرني لأن لسه الكتاب هيعدي على دار نشر وحاجات تانيه كتير والموضوع طلع اكبر ما كنت اتخيل وعايز شهور وشهور

وما خاب من استشار انا اخدت رأي ناس كتير رأيهم قيم جدا بره المدونة

وأي رأي يهمني جدا اني اعرفه

على فكرة انا فتحت التعليقات للغير معرف

دمتم بخير

لكن سمائك ممطرة وطريقك مسدود مسدود يا بنتي

بحب الصورة دي يا سلام لو فعلا امشي وسط السحاب

مش عارفة ليه بعد الأجازات بيكون في حالة ارهاق عامة النهاردة معظمنا كان شكلنا غريب في الكلية هي الأجازة بتريحنا وبتدينا دفعة للحياه ولا بتخلينا نرتاح وناخد ع الأجازة ؟

المهم حصلت حاجات كتير النهاردة اخترت لكم منها

خير اللهم اجعله خير خلصت الكلية وقولت أروح الشهر العقاري اسأل ممكن اسجل كتابي ومواضيعه ازاي وايه الخطوات اللي هعملها وكده من باب العلم بالشيء مش أكتر

المهم اني رايحة وجايه في طريق المحكمة اللي فيها الشهر العقاري كل يوم ومش عارفه مكانه ضللت الطريق في الأول وبعدين دخلت المحكمة ولقيت ما شاء الله كل المحاميين لابسين فورمال (رسمي فهمي نظمي ) ما شاء الله شكلهم يفرح بدل وحاجات كده بس هو محدش قال لهم ان الجرافت السودا معناها حداد؟ !!!!!! ما علينا

كان في انتخابات تقريبا لأن كان في زحمة غير طبيعية من المحاميين وواحد عمال يتكلم عن الغد المشرق البسام وقاعدين يسمعوه

المحكمة متواضعة جدا المهم دخلت اوضة كده مش مكتوب عليها اي حاجه علشان اسأل فين الشهر العقاري لقيت الموظفة نايمة
فسألت موظفين كانوا قاعدين جنب بعض هو فين الشهر العقاري قالولي هو ده قولتلهم اصل مفيش اي حاجة مكتوبة تقول ان هنا الشهر العقاري ( انا مسمياه شهر العقارب)
وسألتهم عن اني عايزة اسجل كتاب وشوفوا الحوار اللي حصل بس هوصف الأوضة الأول اللي كان قاعد فيها الموظفين

أوضة كبيرة فيها شباك واحد بيطل على مبنى تاني والأوضة مفيش فيها ابسط قواعد النظافة كلها تراب وشكل البلاط مش باين اساسا والدهانات بتاعت المكان باهتة بطريقة غريبة , انا وقفت شوية بقول الله يكون في عون الناس اللي بيشتغلوا هنا بجد حاجة صعبه يعني حاجه متشجعش عالشغل أصلا

أنا : السلام عليكم لو سمحت عايزة اعرف ممكن اعمل ايه علشان أسجل كتاب

الموظف : كتاب ؟

أنا : أيوة كتاب او مواضيع لكتاب

الموظف : كتاب ازاي يعني انتي كاتبة كتاب

أنا : أيوة

الموظف : كل الي بيحصل هنا هبل وعبط كل اللي هقدر أعمله اني اثبتلك التاريخ وخلاص عليكي وع القاهرة

أنا : القاهرة !!!!!!!!!!!!!!!!!!!!!!!!!!!!!!! اومال الشهر العقاري هنا فايدته ايه

الموظف : الشهر العقاري هنا مبيعملش حاجه للكتب كل اللي ممكن اعمله اني اثبت التاريخ وخلاص

أنا : التاريخ !

الموظف : بصي انا هقولك في مكان للكتب في القاهرة اسمه دار المصنفات الفنية في العجوزة عارفاها ؟

أنا : ....................

الموظف : طب بلاش عارفة وزارة الثقافة

أنا : ........................

الموظف : يبقى مش عارفاها هي المصنفات دي اللي هتفيدك هي في العجوزة والعجوزة في الجيزة على كورنيش النيل طبعا

أنا : وليه الشهر العقاري هنا مش بيسجل حاجه انا بسمع انهم بيسجلوا الخواطر او الأشعار او أي حاجه مكتوبة في القاهرة عادي

الموظف : اول مرة اسمع الموضوع ده

أنا : يعني الحل اني اروح القاهره :(

الموظف التاني : بصي ممكن تروحي رأس البر الشهر العقاري هناك هيسجلوا لك عنوان كل حاجه كاتباها في الكتاب

انا : وخلاص هنفجر عنوان طب والعنوان هيفيد بإيه ما ممكن الفكرة اصلا تتسرق انا عايزة أسجل الأفكار علشان حقوق الملكية الفكرية

الموظف : وهو في حد بيسرق الأفكار

أنا : في سري ياااااااااااااااااااااارب صبرني أيوة في ناس بتسرق الأفكار وبتنسبها لنفسها

الموظف : خلاص يبقى تروحي القاهرة

أنا : متشكرة جدا

وخرجت من المحكمة وانا مش شايفة قدامي وجوايا دموع مخنوقة يعني علشان أسجل الكتاب بس لازم اروح القاهرة اومال دار النشر بقى وباقي الخطوات هعمل فيها ايه

روحت الكتكوتة وفتحت الام بي ثري لقيت انغام بتقول دلوقتي أحسن - اني اعرف ان الطريق مكلكع دلوقتي احسن - ولسه هتنزل دموعي جت الأغنية اللي بعدها انغام برضه مهزومة ضعيفة مليش طموح قلت نيفر نيفر نيفر نيفر ناجحة وقوية وطموحة خير ان شاء الله

وفي الوقت اللي بحس ان الحياه فيه جايه اوي على احلامي ونفس السؤال بيجي في بالي هو ليه كل ما أقرب من تحقيق أحلامي الاقيها بتبعد عني يعني خلاص همسكها الاقيها طلعت تجري وتلاشت عن الأنظار
بفتكر حولم الله يرحمه لكن سمائك ممطرة وطريقك مسدود مسدود بس انا مش هستسلم ويا انا يا السفارة في قلب العمارة :) قاهرة قاهرة وانا هخاف يعني ولا ايه

وزي ما الموسيقار عمار الشريعي بيقول : في دنيتنا المجروحة ملناش الا الأحلام وانا اخدت الجملة دي وعدلتها وخليتها

في دنيتنا المجروحة ملناش الا الأحلام يمكن في يوم نقدر نحققها

ومفيش حياة من غير أمل وأميرة وإيمان :)

أقول ولا بلاش :)

بعد الانتخة والأجازة لابد ولا مفر ان يكون عندنا امتحانات شفوي طول الأسبوع الجاي

بالنسبة للبوست اللي فات قبل ما أقول بطلب الأمان :) طيب اقول ولا لأ

أقول ولا لأ ؟

يلا هقول وأمري لله حبايبي الحلوين اللي بيدرس English Art لازم ولا بد ولا مفر انه مياخدش الكلام بمعنى واحد يعني لازم يحلل الكلام ويفصصه ويفهمه ويعرف ما وراء الكلام ويستنتج كذا معنى ويطلع للقصة القصيرة او المقال أكثر من معنى وبكدا المقال او القصة بتكون ثرية

ودي اسمها الكتابة الرمزية أخت رمزي :) وحيث ان عندي امتحانات فقلت اجرب الأسلوب الرمزي ده البوست اللي فات وانا بكتب الموضوع بيبقى عندي كذا معنى بفكر فيه غير المعنى الواضح والصريح اللي كل اللي قرأوا البوست اللي فات فهموه

ولو فكرتوا في البوست اللي فات ومأخدتهوش زي ما هو ظاهر بالضبط هتلاقوا معاني جديدة :)

تاني حاجة على اعتبار اني قولت اول حاجة انا مش عارفة ليه مش برتاح للقاهرة زحمة ودوشة ولما بروح بالكتكوتة بحس ان شوية وهيجيلي انهيار عصبي مع اني مش بدخل وسط البلد والأماكن الزحمة يمكن اسكندرية زحمة بس فيها حبيبي البحر فمش بحس بالغربة لكن القاهره بحس انها غريبه هي بعد الساعه 1 بتكون ساحرة وبتبدأ الزحمة تقل لكن لسه خوفي من القاهرة زي ما هو وخصوصا لما بشوف عربيات الاسعاف اللي مش عارفه توصل للمستشفى من كتر الزحمة والحقيقة انا سميتها عربية الاتلاف لأن المريض بيتلف لغاية لما يروح المستشفى ويكمل تلف هناك :(

تالت حاجة بفرح أوي وبحس ببهجت :) لما اسمع كلام المدونين عن مدونتي

كلام خالتو ستيتة حبيبتي اللي بجد بجد نفسي اقابلها جدا لما قالتلي بحب اقرأ كلامك وحاجات تانيه كتير :)

كلام سومة لما قالتلي على فكرة انتي بتكتبي حلو أوي يا خبر ابيض انا حالتي وقتها اني كنت تعبانه جدا ونايمه بعد ما سمعت الكلمتين دول حسيت ان شوية وهطير في السما لأن نبرة صوتها مكنش فيها مجامله لكن كلام بجد

خالتو المصرية حبيبتي هي بقى لها كتير مش بتدخل المدونات بس برضه بحب رأيها جدا في أي حاجه بكتبها

وأخيرا أميرة كل ما بنتكلم بتفاجئني انها فاكرة بوست من المدونة وبتقتبس حاجات منها وبتقولهالي :) هيييييييه مع ان برضه قبل كده قالتلي انها مش بتحب المدونات اللي بيكون فيها يوميات :) ده على اساس اني بكتب شهريات مش يوميات

بجد بجد شعور جميل لما تلاقي حد مهتم بكلامك يمكن وأكيد ميكونش أحلى كلام ولا انا كاتبة بمعنى الكلمة انا بس بحب الكتابه ومن غير التشجيع ده اعتقد اني مكنتش هقدر استمر وعلشان كده بجد شكرا

نهاية الدنيا + تحديث

تحديث : يا جماعه انا مقولتش اطلاقا ان صحبتي مريضة نفسيه ومستحيل اسمح لحد انه يقول عليها كده

هي كل الموضوع انها في حالة حزن ومش قادرة تكمل حياتها وتفرح وده تعريف الاكتئاب

دموع لساعات متواصله وصداع ويأس واحباط وخوف وملل ولا مبالاه ومش عايزة تشوف حد ولا تكلم حد ولا تذاكر ولا تخرج ولا حتى بقت بتفرح من أي حاجه

وبصفتي صحبتها الانتيخ حاولت اطلعها من المود 100 مرة ومعرفتش طب اعمل ايه ؟ اعمل ايه قرأت شوية عن الاكتئاب وأدوية الإكتئاب وعرفت الأتي :-





التأثيرات الجانبيه لأدوية الإكتئاب أفظع من الإكتئاب نفسه ده غير ان الدوا تأثيره مش بيظهر الا بعد اسبوع او اكتر من استخدامه :(



الأعراض الجانبية للإكتئاب

ميل للنوم

تفكير بالانتحار

قلة تركيز

اضطرابات القلب واضطرابات هضمية وادمان للدواء ....الخ

يبقى كده اللي يجيله اكتئاب من الدنيا وبلاويها يقعد ساكت ومكتئب وخلاص ويفكر في طريقه يعدي بيها الوقت ويهدر ايامه يوم ورى التاني

انا اسفة يا صاحبتي مش عارفة اعمل ايه اول مرة احس ان انسانة غالية عليا ومش عارفة اساعدها

وسلامتها ام حسن م العين وم الحسد وسلامتك يا حسن من رمش اللي حسد

وسكر حلوة الدنيا وتجيب السكر