بفرح لما

اكون بتفرج على موبايل حبيبي وارن عليه واكتشف ان اسمي في موبايله رحيق الورد والرينج تون بتاعت رقمي عنده بدي شوفك كل يوم يا حبيبي ولا تغيب عني ولا يوم يا حبيبي

اكون قاعدة مع نفسي وحاسة بوحدة وغربة وفجأه الاقي مسج من صديقة غالية عليا بتقولي انتي ع البال ومش ممكن تتنسي بحبك اوي

لما اشوف صورتي في موبايل حبيبي برضه والاقي اسم الصورة بنتي وحبيبتي وعمري

لما بحس ان حبيبة عمري هي اختي وصحبتي وانتيمتي واخيرا مامتي

لما بشوف ضحكة هدى اللي عمرها شهرين ضحكة بريئة بتنور الدنيا وبتملاها سعادة

لما بحس ان حد بيحبني بجد مش مجرد كلام

لما بروح المدينة المنورة واحس بسكينتها وجمالها يارب ازورها تاني قريب

لما بشوف البحر واحس بعطر البحر مالي المكان حب ودفء وغموض

لما بشتري عطر جديد وانا وصبحتي بنطلع من محلات العطور كإننا ازازة برفيوم من كتر العطور اللي جربناها وبنضحك على نفسنا

لما بشوف صبحتي شيري بعد سنة كاملة غياب وكإننا مبعدناش عن بعض غير كام ساعة

لما باكل شوكولاتة :)

لما اكون بتمنى حاجه من كل قلبي والاقيها بتتحق من غير ما حتى اقول عليها

لما بكون ماشية بالكتكوتة ويلفت انتباهي فساتين السواريه والافراح بحس بفرحه غريبة لما بشوف الفساتين دي وبحس اني انا وكل بنوتة بنبقى في اللبس ده أجمل برينسسز


لما الكتكوتة بتبقى نيتها صافيه ومش عايزة تتصلح مش زي امبارح طلعت عينينا الكاوتش والبطارية كانو نايمين والبنزين خلص والزيت كان عايز يتغير حتى الام بي فور اللي مستحملة اغاني جنات عليه من اول الامتحانات كان صوته مش حلو وبيقطع واخيرا المراية الجانبية اتفشفشت يا عيني عليكي يا فشفوشة

لما بدخل قسم لعب الاطفال في اي مول


لما بمشي بسرعة على اي طريق وبخرج ايدي من شباك الكتكوتة وبحس اني طايرة

لما بسمع اغاني بحبها ولما بغني اغنية بحبها ولما بشوف افلام بحبها ولما بسرح مع كتاب بحبه ولما بتوه في سحر الكلمات لما اقرأ لحد أنا حباه
وطبعا لما بكتب حاجه بحبها

لما ادخل المطبخ واطبخ اكلة جديدة وتطلع حلوة

لما بسافر وانا في قمة احباطي وحزني وبدوب احزاني في مسافات الطريق

لما بشوف منظر السحاب والشمس والسما الزرقا والبحر من شباك الطيارة

لما بلاقي تعليق جديد عالمدونة

حاجات بسيطة بتحصل في حياتنا وبتفرحنا ويمكن كتير مش بياخدو بالهم منها

دي شوية من شوية حاجات لما بتحصل بفرح بيها
يا ترى انتو بتحسو بسعادة لما بيحصل ايه؟

باللغة العربية الفصحى

باللغة العربية الفصحى ... استيقظ وركز واصحى دي جزء من كلمات اغنية ل ايمن بهجت قمر وبتغنيها سيرين
كان ياما كان مش في قديم الزمان اوي يعني من حوالي 3 سنين قبل ما ادخل كلية الهباب قرأت المقررات بتاعت قسم لغة انجليزية وقسم اعلام عالسايت بتاع الجامعة لاني كنت محتارة جدا بينهم
و كان المفروض ندرس لاتيني ولا تغديني في سنة تالتة اللي انا فيها حاليا وبعد يومين ان شاء الله هسيبها بلا رجعة والسادة الموقرين في الجامعة قرروا انهم يلغو اللاتيني ويبدلوه بلغة الضاد اللي هي بتاعت عربي انا اخشيني الويل اذا احببتني بتاعت يوري مرقدي
او
عربي انا...... اخشيني!!!!!!!

عربيٌّ أنا أ رثيني.. شقّـي لـي قبـراًً .. و اخفينـي

ملّت من جبني .. أوردتى... غصّت بالخوف شراييني

ما عدت كما أمسى أسداً.. بـل فـأر مكسـور العيـنِ

أسلمت قيادى كخـروفٍ... أفزعـه نصـل السكيـنِ

ورضيت بأن أبقى صفراً.. أو تحت الصفـرِ بعشريـنِ

للشاعر احمد مطر

عندنا 3 اجزاء في منهج العربي هننطحن فيهم بكرة ان شاء الله
اولا : الادب في العصر الجاهلي
ثانيا: الشعر في عصر النبوة وصدر الاسلام
ثالثا: الشعر في العصر الاموي

وبكل ثقة ااقدر اقولكو ان التلت اجزاء ارخ .. احم اجمل من بعض وخصوصا بتاع العصر الجاهلي اللي فيه مين؟؟ مين؟؟
ايوة امرؤ القيس اللي انا مخنوقة منه من وانا في ثانوي بس كنت بحب اشعار ليه كلها تشاؤم

وليل كموج البحر ارخى سدوله .... علي بانواع الهموم ليبتلي
الا ايها الليل الطويل ألا انجلي .... بصبح وما الإصباح منك بأمثل

سمعت ان امرؤ القيس حامل لواء الشعراء الى النار بس لما بحثت شوية عرفت ان ده حديث ضعيف والله اعلم

اما عن اشعاره فحدث ولا حرج في ليه اشعار جميله جدا
وفي ليه اشعار المفروض مندرسهاش اصلا بس موجودة في الكتاب بتاعنا ومطلوب مننا نحفظها للأسف
منهم قصيدة اسمها مهفهفة بيضاء

ندخل على العصر الأموي : في 3 انواع من شعر الغزل منهم الغزل العذري
ومن حسن حظي اني كنت عاملة بحث عن الغزل العذري وانا في ثانوية عامية
ربنا يصبرني وانا بذاكر النوع ده من الشعر علشانه شعر يقطع القلب


ما علينا نرجع لموضوعنا جبتلكو كلام من اللي مكتوب في كتابنا العربي بتصرف

( الشعراء في الشعر ده اهتموا بوصف احوالهم النفسية في الحب ووصف عذابهم حين يشتد الحب والجوى ولكل منهم قصة حب فاجعة تنتهي بالجنون او بالموت وتموت الحبيبة إثر محبوبها , ومن الجدير بالذكر اننا نجد في شعر بعض العشاق انهم وضعو المحبوبة في مكانة عالية فهي ليست كباقي النساء بل هي ملاك او روح الحياة وجوهرها بصراحه ناس بتفهم
والملمح التاني هو المزج بين الحب والموت سواء في قصة العاشقين او في الشعر فكأن الموت هو الخلاص الوحيد من اعباء هذا الحب الفادح الذي يستهلك حياة صاحبة – اوعو حد يسمع الكلام ده ويروح ينتحر وبعدين يقول ليدي هي اللي قالت-
ومنهم وانا موافقة جدا على الرأي ده من يعتبر الحب مرضا طارئا صعب الشفاء منه
وللأسف ده المرض الوحيد اللي ملوش علاج رحماك يا ربي

اما مجنون ليلى فيرى ان الحب ابتلاء من الله ينزل بالقلب فلا يجد القلب عنه حولا او منه شفاء

خليلي لا والله لا أملك الذي ... قضى الله في ليلى ولا ما قضى ليا
قضاها لغيري وابتلاني بحبها فهلا بشيء غير ليلى ابتلانيا

اما الملمح الثالث فهو الولع بالوحدة وبالخروج من دائرة الناس لتذكر ذكريات الحبيب
وعدم تذكر اي حاجه الا الحبيب
جميل بثينة بيقول : وإن قلت ردي بعض عقلي أعش به تولت وقالت : ذلك منك بعيد

والملمح الرابع تمني العودة للطفولة حيث الحب بلا تكاليف ولا قيود

واخيرا : الرغبة في النوم لعل الأحلام تحقق للمحب لقاء يسعد فيه بعد ان عز اللقاء
وحال المجتمع دون العاشق وما يشتهي ويريد

وفي ابيات انا بحبها جدا لقيس لبنى بيقول :

وإني لأهوى النوم في غير حينه لعل لقاء في المنام يكون
تحدثـــــــــني الأحلام أني اراكم فيا ليت احلام المنام يقين

وبكده ابقى لخصت معاكم الدرس بتاع الشعر العذري في العصر الاموي

ولسه 180 صفحه باقي المنهج
حسبي الله والله العظيم عااااااااااااااااااااااااااااااااااااا

مش قادرة اسامحـــــــــــه

ملحوظة : الخاطرة دي نتيجة مود شوية اغاني زي الفل لثومة والاغاني دي للصبر حدود , هجرتك , جددت حبك ليه ياض :) ف أي حد هيربط بيني وبين الخاطرة هيتعلق على باب المدونة

ملحوظة كمان : بالعند في اللي بيسرقو مواضيعي هكتب خواطري ولا يهمني منهم وحقي هاخده لو مكنش في الدنيا يبقى من حسناتهم

عايشة وحيدة متغربة

بدور على روحي ومستغربة

غاب النور عن حياتي

والبسمة والفرحة وضحكاتي

كل كلامي عنه وحكاياتي

ايوة كان وكان وكان

بس في لحظة قلبي على قلبو هان

مش قادرة اسامحه

بس ببكي على جرحه

هسامحه ازاي وهو اناني

بيقول بيحب وبينسى الاماني

وازاي ممكن انسى دموعي

وازاي انسى عذابي

طريقنا مش واحد

صعب اديه الامان

وهو جرح وباع وخان

يارب صبر كل حبيب

وصبر قلب جواه

دموع والم ولهيب

بقلمي طبعــــــــــــا lady E

انا كمــــــــــــان اتســـــــــرقت !!! + تحديـــــــــــــــــــــــــث

النهاردة كنت بكلم ماما على اني بشوف مدونات بيستخدمو فيها نفس تعبيراتي وكلامي واسلوبي في الكلام ودي حاجه ضايقتني

فماما قالتلي بالعكس دي حاجه تفرحك ان اسلوبك مؤثر وده دليل نجاحك بس انا كنت معتبرة الموضوع ده سرقة لان دي مفرداتي ودي حياتي وبعدين كلمت خالتو المصرية في نفس الموضوع قالتلي ان علشان سننا متقارب في التدوين فممكن تكون المفردات دي مشتركة ما بيننا واني مأخدش الموضوع بحساسية

المهم قرات بوستين واحد ل احساس طفلة محبة للرومانسية بس واقعية والتاني لمنوش بيتكلمو فيها عن السرقة

ولاني قولت وده مين ده اللي هيسرق افكاري فطنشت وبعدين بعد لما شوفت بوست منوش دورت على بوست من البوستات بتاعتي

وكان شعر واسمه
بالله عليك اعد لي قلبي + تحديث

ولقيت نفس ذات البوست نازل في منتدى في نفس اليوم اللي كتبته فيه بس انا كتبت البوست الساعة عشرة ونص واللي سرقته نقلت البوست الساعة 4 الا ربع http://shatawy-dj.ingoo.us/montada-f4/topic-t5804.htm

انا بجد دمي محروق اني اتسرقت ولو انها سرقة افكار بس بجد احساس وحش اوووووووووووي ومؤلم اووووووووووي ان افكاري ومشاعري تتسرق بالسهولة دي لأ ومش كده بس كمان تتنسب لحد غيري

طبعا انا لسه مبحثتش عن باقي المواضيع لما افضى بعد الامتحانات ان شاء الله واشوف ايه اللي اتسرق تاني

يا عالم ما خفي كان افظع !!!!!!!!!

--------------------------------

تحديث : في مدونين انضمو لموكب المسروقين اشمعنى هما يعني :) وده بيدل على اننا ما شاء الله مواهب فذه
كيكي اتسرق منها موضوعين الاول اسمه خبر عاااااااااااااااااااااااجل وده اللينك بتاعه http://fokaakmeny.blogspot.com/2009/05/blog-post_13.html

وطبعا اللي سرقته مكتبتش انه منقول وبالتالي كل التعليقات كانت بتشكرها على كتابتها للموضوع طبعا حاجه تضايق وتزعل وتحرق الدم

ده لينك الموضوع المسروق :

http://egyfilm.com/Forums/viewtopic.php?p=3073324&sid=bcdaf3318d85644bde37f04a57973b98

واللي سرقت البوست ده عندها مدونة بس انا مش هكتب اللينك بتاعها

اما البوست التاني بتاع كيكي واسمه قسم يا عمدة قسم بس من غير صداع وده اللينك بتاعه

http://fokaakmeny.blogspot.com/2008/11/blog-post_09.html

ولينك اللي سرقه : http://209.85.129.132/search?q=cache:w2lckkrWC08J:www.uosra.com/viewtopic.php%3Ff%3D9%26t%3D446%26view%3Dprevious+%D8%A8%D8%A7%D9%84%D9%84%D9%87+%D9%88%D9%85%D8%A7+%D9%84%D9%8A%D9%83%D9%89+%D8%B9%D9%84%D9%8A%D9%87+%D8%AD%D9%84%D9%81%D8%A7%D9%86+%D8%A7%D9

وكمان فكرت شوية ان معظم الحاجات اللي بتتسرق بتكون شعر او مواضيع ساخره فعملت سيرش على اشعار مدونة كلام من القلب

ولقيت ان في قصيدتين مسروقين من المدونة ومنشورين في منتدى اسمه اصحاب فور يو

www.as7ap4you.com/vb/t252822.html

بس الجميل اني لما فتحت المنتدى ده لقيته مش بيفتح بس النتائج بتاعت الشعر طالعه على جوجل يعني القصائد دي كانت مسروقة فعلا والقصيدتين اللي عملت عليهم سيرش وطلعو مسروقين هما حوار مع الحبيب ولون عنيكي

وكمان عاشقة الرومانسية في ليها بوستات اتسرقت

وكمان مدونة اخف دم اتسرق منها بوستات كتير

وعلى رأي أ- تامر علي كلنا اتسرقنا بس كنا رجالة ووقفنا وقفة رجالة

وارجع واقول ما خفي كان افظع !!

مشـــــوارك لـــــو يطــــــــــــــــــــول

مشوارك لو يطـــــــــول .... جمد قلبك وقول همشي ومش هتعب

خطوة ورى خطــــــــوة ..... تتعب لكن تلقى نهايته بتقرب

متقولش موش قادر ...... حاول اوي وعافر

مهما الطريق يقسى ....... هتحبه في الأخر

جزء من اغنية تنمية بشرية

خريف في الربيع

لو عدينا في كام يا بختك في البوست اللي فات هنلاقيهم كتير جدا بيتهيألي لما تقراوا بوست النهاردة مش هتقولولي يا بختك خالص

كنت فرحانه ومتفائله بإمتحان الترجمة لأني بعتبر الترجمه فاكهة المواد عندنا بالرغم من ان الضكاترة بيوصلونا اننا نقول احنا مبنعرفش اي حاجه في اللغة المهم طبعا استبحس قبل الامتحانات انا متعودة عليه وضغطي دايما بينزل فكنت رايحة اللجنة النهاردة وانا مش قادرة انزل من البيت اساسا وبابا وصلني الحمد لله وبعدين دخلت اللجنة ولقيت واحدة اقل ما يقال عنها انها مراقبه ... عماله تزعق وتقول تعليمات اللجنة بغباوة وترتنا من قبل ما نبدأ اللجنة بس قولت وانا مالي ساعتين ويعدو وال... دي كانت بتراقب على لجنتا مع الأسف وكانت موصرة تطلع شنطتي بره اللجنة وانا قولتلها كل الشنط هنا وبعدين شنطتي ممكن تتسرق وفيها الموبايل المهم برضه اخدت شنطتي وحطيتها في اول المدرج بس مش بره اللجنة مع ان زميلاتي كلهم حاطين الشنط بتاعتهم جوه المدرج يعني سخافة من البداية
المهم فات نص ساعة من الامتحان وانا مركزه في الترجمه جالنا 4 مقالات مع الأقوال المأثورة فمكنش في وقت وعلشان كده في الترجمه بالذات بكتب نوتس او ملاحظات على ورقة الأسئلة علشان لما بترجم قطعه بندمج فيها وبنسى حاجات ممكن تكون مهمه في باقي الامتحان
ف الغبية جت وقالتلي امسحي كل الكلام اللي على ورقة الاسئلة قولتلها اوكي ولسه بمسك ورقة الاسئلة علشان انقل النوتس في ورقة الاجابة وامسحها من ورقة الاسئلة المراقبة الغبية اللي معاها قالتلي هاتي الورقة دي على اساس انها هتشوف مكتوب فيها ايه فلقيتها اخدتها وجابتلي ورقة تانيه واحاول افهم فيها ان ده امتحان ترجمه وان كل واحد بيترجم بالسينس بتاعه وبأسلوبه مفيش فايدة طب هاتي الورقة اكتب الملاحظات بتاعتي وامسحها بعد كده مفيش مخها جزمة قديمه قالتلي انا اخدت الورقة وخلاص مش هجيبها تاني ونظرتها ليا كلها تحدي
المهم فات ربع ساعه وخرفت اخر تخريف في القطعه اللي كنت بترجم فيها وطبعا افكاري طارت من كتر النرفزة والقهر اللي كنت فيهم
وجه سيادة مدير اللجان كل اللي عمله انه جه بص علينا والمصور اخد كام صورة ليه مع الطلبة
وقولت لمراقب لو سمحت ممكن تخلي فلانة الفلانية تيجي قاللي لجنتها مش معانا ومش هقدر انده لها فلانة دي قريبتي
المهم قضيت الامتحان وانا في التوهان ومخنوقة ومش عارفة ليه ده بيحصل معايا مع اني مبحبش المشاكل اساسا وعارفة ان كتير من المصريين لما بيمسكو سلطه بيتغابو على خلق الله فبتجنبهم
خلصت الامتحان وقولت مش هسكت انا كنت ناوية اجيب تقدير في المادة دي طبعا كده التقدير قاللي بودعك بسبب واحدة روتينية متخلفة مبتفهمش حاجه وبقت معيده ازاي مش عارفه وبعدين قولتلها على فكرة حضرتك ظلمتيني ولسه مكملتش قالتلي ايوة انا ظالمة
كنت فاكراها هتبقى انسانه متحضرة وتقوللي عملت كده ليه لقيتها غبيه فقولتلها حسبي الله ونعم الوكيل وقولت بسبب كلمتها دي هروح اشتكيها كفايه ان هي بوظت اعصابي وكمان بتستفزني وبتقوللي انها ظالمة وان ظلمها ليا عادي
رحت لمكتب عميد الكلية اللي مش بشوفه في الكلية خالص ولقيت قريبتي هناك سلمت عليها وحكيتلها على اللي حصل وكنت مش عارفة اتكلم من كتر انفعالي وهي كانت عماله تهديني وقولتلها انا هشتكي المراقبة اللي كانت بتراقب على لجنتا فقالتلي لأ الامور متوصلش لكده وبعدين هي طبقت القانون قولتلها قانون ايه اللي يخليها تعمل كده انا كاتبة اسمي على ورقة الأسئلة وقولتلها قارني الخط الموجود على ورقة الاسئلة بخطي بس لا حياة لمن تنادي وروحنا للمعيدة وقالتلها اسمعي ليدي من احسن البنات في الكلية وبتكره الغش فالغبية ردت عليها بأسلوب كله وقاحه
وفي الاخر قالتلي بتطولي لسانك عليا وبتقوليلي حسبي الله ونعم الوكيل قولتلها مرة تانية : ايوة حسبي الله ونعم الوكيل والمرة دي قدام معيدة ودكتورة
انا بجد تعبانة جدا صحيا ونفسيا هو ده اللي كان ناقصني فعلا
اول مرة اعرف ان حسبي الله ونعم الوكيل بقت شتيمة
وبجد تأكد عندي ان التعليم العالي بقى تعليم واطي وفيه كتير واطيين
واسفه على الألفاظ دي بس ده اقل كلام يتقال عن ولاد التيت دول
والغريب ان مناهجنا فيها كمية عته كبير جدا يعني ايه من خصائص الشعراء الرومانسيين انهم يبقو محششين علشان يحسو بالكلام اللي بيكتبوه
ويعني ايه يجيبولنا قصائد منيلة بنيله ل امرؤ القيس بيتكلم فيها كلام مقرف زيه
انا مبقيتش فاهمه حاجه بجد , هو في ايه؟؟؟؟؟؟؟؟؟؟؟!!!!!!!
منهم لله خلو ربيع حياتنا بقى خريف

بحب غذاء الروح وبعشق الشوكولاته

عااااااااااااا شوفتو اللي بيحصل خالتو حببتي بتاخد الشوكولاته بتاعتي مستنهزه فرصة اني ممنوعة من الشوكولاته علشان الدايت ما هي مش عارفة اني كل يوم بتخانق مع الدكتور في الحلم وبقوله الا الشوكولاااااااااااااااته عااااااااا

وقولت لخالتو انا هكتب الكلام ده عالمدونة قالتلي عاااااااااادي ولا يهمني عاااااااااااااااااا على رأي المثل عض قلبي ولا تعض شوكولاتي
اللي بيحصل ده بااااااااااااطل بااااااااااااطل

بعد الانطحان اللي فات روحنا اليكس في بلاد العجائب نيااهاهاهاها أأقصد اسكندرية
وبصراحة اسكندرية تحفففففففففه جميلة جدا جدا جدا انا حسيت اني مش في مصر من كتر نظافة وجمال اسكندرية لكن رجعت لأرض الواقع لما شوفت الزحمة وان اسكندرية زي القاهرة في الزحمة واني صعب اسوق الكتكوتة في الاتنين والحمد لله بابا هو اللي كان بيسوق مش انا طبعا اذا وجد الماء بطل التيمم ربنا يباركلنا في عمرك يا بابتي

ويا سلام لما دخلنا على الكورنيش وريحة البحر وهواه يردو الروح وشوفت مييييين؟؟؟ شوفت الترام
ايون الترام اللي نفسي اركب فيه هو والمترو
يا ترى احساس اللي بيركب الترام او المترو ايه؟؟ في ناس هتقول ايه الناس دي في حد يتمنى يركب الترام والمترو هقولو ايوووووون انا , في مانع؟؟؟؟؟؟؟؟

وبعدين روحنا كارفور اسكندرية وبعدين بدأت احس ان عينيا بتغمض لواحديها ذاتيا وتلقائيا واني عايزة اكتب وبعدين روح اوفيليا حضرت وكتبت شوية كلمات واحنا بنتمشى في كارفور

: اد ايه كانت غبية
لما سمعت اغنيته في كارفور وكانت طايرة من السعادة
واد ايه هي غبية علشان بتضيع فرحتها وبتفتكر نفس الاغنية بس المرة دي بتفتكر جرح قلبها وبتفتكر غروره وغطرسته وانه نسيها في اكتر وقت هي كانت محتاجه ليه فيه وبتردد في نفسها كان بيني وبينك حاجه ليه ضيعتها ؟؟!! واخيرا نصيحة لأي حد شورير : عايز تكسر فرحة واحد اكسر قلبه وفي عز ما يحتاجك سيبه متبقاش جنبه عالعموم هانت مسير الأيام هتنسيها وفي وسط ما انا بكتب الكلام المش مفهوم ده
سمعت اغنية فضل شاكر فاكر
يا عيني كانو مشغلين كل الأغاني اللي تقطع القلب بتاعت فضل شاكر واللي بتساعد ان روح اوفيليا الرومانسية الحزينة تظهر عندي والغريب ان بابا وماما وخالتو لاحظو ان روح اوفيليا ظهرت عليا وبابا قاللي مين بس اللي مزعلك يخربيت اللي يزعلك المهم علشان اغير مود اوفيليا والاغاني الحزينة دورت على ركن الكتب وملقيتوش
وبعدين سألت بابا ووراني مكان ركن الكتب وفعلا روحت ركن الكتب ولقيت ايييييييه؟؟؟؟
كتب المدونات غادة وغادة ورحاب ال3 كتب موجودين في وسط كتب الكتاب المشهورين زي كتب انيس منصور وحسيت بالفخر وتخيلت ان كتابي معاهم ولقيت ما شاء الله الكتب اتطبعت كذا طبعه يعني كتاب عايزة اتجوز الطبعة الخامسة وكتاب ارز باللبن لشخصين الطبعة الرابعة وكتاب اما هذه فرقصتي انا الطبعة التالتة ومكنتش متحمسة اوي اني اجيب كتب ومشيت فعلا من عند ركن الكتب وبعدين
لقيتني برجع تاني لركن الكتب ومسكت كتاب اما هذه فرقصتي انا وسألت نفسي
اولا : يا ترى ايه اللي ممكن يخلي اي حد يشتري كتاب؟؟
ثانيا :ايه اللي ممكن يخلي حد يشتري كتابي لما اكمل كتابته ان شاء الله؟؟

اجابة اولا عارفاها لكن ثانيا مش عارفاها ياريت لو حد عارفها يجاوبني ويبقى له الأجر والثواب من ربنا
اولا : اللي لفت انتباهي لكتاب اما هذه فرقصتي انا
قرأت الكلام اللي مكتوب على ظهر الكتاب والكلام عجبني اوي من بدايته
( الطبخ فعل حب ) طوووووول عمري بقول كده وفورا الكتاب دخل دماغي
ولقيت التعريف بالكاتبة
غادة محمد محمود خريجة كلية الاداب قسم اللغة الانجليزية
وسع وسع وسع يعني زومل وسلام مربع ومثلث ومدور كمان لكل طلبة الكلية المظلومة كلية الأداب
كويس في امل اني اتخرج من كلية الهباب وكمان من قسم لغة انجليزية الحمد لله لقيت حد اتخرج منها
تحب الكتابة والشيكولاته وفيروز اييييييييييييه ده دي انا
انا كمااااااان بعشق الشوكولاته وفيروز والكتابه بس احيانا بحب القراءة اكتر
ده غير انها اتكلمت عن الدفا اكتر احساس بحبه واعتقد انها تقصد دفا المشاعر
الدفا ياااااه كلمة صغنونة بس احساس ميتوصفش




وكمان لفت نظري لون الكتاب انا بعشق اللون اللبني وكمان عجبني اسم الكتاب
وصورة الكتاب اتنين ماسكين ايد بعض والبنوتة ماسكه قلب اللي بتحبه واللي بيحبها كإنه وردة
واخيرا الكتاب من دار الشروق اللي عملت كتب لاشهر واحسن الكتاب
تصفحت الكتاب لقيت اسلوب غادة بجد جميل وفي كلام ليها حسيت انه عني
واخيرا جبت الكتاب اد ايه كتاب جميل مع اني مقراتوش كله بس حبيته جدا

عقبال كتابي ياااااارب لما يبقى كتاب جميل ورقيق كده

واحنا راجعين من اسكندرية ايه اللي حصل في الطريق الكتكوتة دخل في الكاوتشاية بتاعتها مسمار جميل ولطيف وفورا الكوتشاية ماتت مش نامت
مش عارفة ليه كل لما نروح اسكندرية لازم الكتكوتة يحصل لها حاجه عااااااااا

ملحوظة : صورة كارفور والكتب انا اللي مصوراهم

بكرة ان شاء الله عندي امتحان ترجمه

حب ميؤس منه الجزء التاني + تحديث

تحديث : علا زميلتي جابت بيبي وسمته على اسمي يعني اسم البيبي زي اسمي بس ناقص منه حرفين طبعا علشان اسم ولد بتقوللي شوفتي بقى بحبك اد ايه سميت ابني على اسمك قالتلي الكلام ده وانا طالعه من اللجنة مهييسه
وطبعا مش هقولكو على اسم البيبي لان لو عرفتو اسم البيبي هتعرفو اسمي نياهاهاهاهاهاها

تبعا كل اللي توقعته قبل الامتحان حصل مع اختلافات بسيطة والحاجه اللي اعتقد بتحصل في لجنتنا بس في كل امتحان ان لازم بنوتات كتير يغمن عليهم ولازم برضه بنوتات يجيلهم هيستريا لما بنبقى قاعدين في مستشفى مش في لجنة امتحان




كلام قبل البوست علشان ميجليش انفجار في المخيخ الشمين وازبهلال في البؤبؤ وحول في العينتين





نفس السيناريو اللي بيتكرر كل امتحان هيحصل بعد كام ساعه ان شاء الله


الامتحان هيجي يشيب الكتكوت والمراقبين هيبقو مش طايقيننا واللي هينصفه زمانه هياخد مقبول واللي ماميته داعيه عليه هيشيل المادة


ومن خلف الأسوار احب اوجه كلمه للسادة بتوع التعليم العالي وأقول لهم يا سادة يا كرام تعليمكم عالي جدا ومحتاجين اسانسير علشان نستوعب ان اللي احنا فيه ده تعليم عالي مش واطي لا سمح الله


وشكرا لواضعي جدول الامتحانات وان شاء الله ربنا هيكرمهم بفسفس هستيري وهسهس واستبحس زي اللي كل الطلبة بتاعني منه





****************************************************



الموضوع ان بعد يومين تلاته اسبوع كدة شهر نبص نلاقي حاجات غريبه بتحصل 00

طرف من الطرفين دول يا اما مش بيرد على التليفون أو يرد بس يتكلم معاك بطريقة تخنق جدا و تحس ان كان اكرملك ان هو ما يردش عليكى أصلا بدل ما يرد و يتكلم بالطريقة دي 00 و تسأليه يقولك عادي مفيش حاجة 00تسأليه انا عملتلك حاجة ؟؟00يقولك لأ بقولك عادي عاااادي00 ويبدأ التنفيض00

المهم انك بتبقي مش فاهمة حاجة و مش عارفة ايه اللي بيحصل ده و تفضلى تعصرى في دماغك يمكن اكون قولتله حاجة زعلته و انا مش واخده بالي 00طب يمكن عملت حاجة هو مش بيحبها و برده مش واخده بالي

ايه اللي حصل ؟00 الله اعلم

000وفي البعد تبدأ تفكر ان هو من كام يوم كدة كتييييييييييييييييييييييير قالك بحبك و تفضل تكلم نفسك أيوة ده قالي بحبك أيوة ده قالي انا مقدرش اعيش من غيرك 00لأ ده اكيد لسه بيحبني 00قبل ما تنام تفتح الرسايل اللي كان باعتهالك على الموبايل اللي كاتبلك فيها انت عمري و حياتي و قلبي و روحي و 00000 و كل ده علشان تقنع في نفسك ان هو لسه بيحبك و بيفكر فيك وتقولى لنفسك الحب اللي بجد مش بيتنسي بالسرعة دي و هو قالي ان هو بيحبني بجد و قالي اني انا لا يمكن اكون لأي حد غيرك 00تؤ 0000 طيب هو ليه بيعمل معايا كدة 00ليه بيتهرب مني ؟؟00 هو ليه مش عايز يكلمني 00هو انا عملتله ايه؟؟

وبعد فترة تبدأ بقة تحس ان هو باعك خلاص

00شويه و ترجعى برده تقنعى في نفسك ان هو عمره ما هينساكي لانك بتفتكرى كل كلمه قالهالك لما وعدك بان هو عمره ما حايسيبك في يوم من الأيام و مفيش حاجة ممكن تفرقنا عن بعض الا الموت و لما قالي0000000 و لما قالي000000و لما قالي0000000و تقول هو لسه بيحبني انا متأكده من اللي انا بقوله ده و ترجع تقول طيب هو ليه بيعمل معايا كدة انا محتاجه له أوي و ساعتها بعد فترة كبيرة ممكن تكون اسبوعين تلاته أربعة من عذاب متواصل تحصل حاجة من التلاته



أخيرا حايرد عليكى و يقولك ان الموضوع انتهى بالنسبالي و لما تيجي تسأليه عن السبب يقولك كلام يدل على ان هو 00000000سوري يعني (عبيط) أصله حايقولك (أصل 00000آآآآآه 0000 كدة000 انا مش مرتاح 000أصل انا اتغيرت واتضح اننا لازم نكون اخوات ... أصل انت000 كدة بقة و خلاص !!!!!!!)و يسكت 000

يا اما ** حايكبر و يضربلك الطرشه و انت لو عندك مخ حاتفهمي

أو يبعتلك مرسال يقولك الموضوع انتهى بالنسباله و هو طبعا مش حاييجي بنفسه يقولك علشان هو طيب و ما يقدرش يقولك كدة في وشك علشان ما يقدرش يجرح مشاعرك و لما تسأل المرسال عن السبب يقولك (ما اعرفش حاجة و الله) و بينهي اجابته بكلمه و الله علشان ما ترغيش و ما تسألش كتير ده انا حلفتلك يعني بترغي في ايه؟ قال هو يعني فارق معاه حلفان

00ساعتها هتحسي ان كل حاجة راحت منك00أغلى حاجة انت كنت عايشلها اختفت روحك طلعت منك و تحسي انك اديتي قلبك لواحد ما يستاهلش هتحسي ان قلبك مات و تحسي ان كل اللي حواليك كدابين و مفيش حب في الدنيا خلاص كل الناس كدابه و محدش يستاهل و تفضلي تقول انا مش هحب تاني و تبصي تلاقي دموعك غصب عنك عماله تنزل و مش بعيد تتعبي لدرجة انك تدخلي المستشفى من نفسيتك اللي بقت تحت الصفر و كل دقيقة تعدي تلاقي نفسك تقول هو الخسران و بعدين ننتقل لمرحله تشغيل الأغاني الكئيبه و تديها (غدار خليتني احبك 00على شويه 00سابني و راح) و طول ما انتي بتسمعي عماله تقولي هو الخسران و بعدين تنزلي تشتري شرايط فيديو افلام كئيبه و تتفرجي عليها و قلبك يتقطع و تفضلي تعيطي و تقولي هو الخسران هو الخسران قلب لو لف الدنيا كلها مش حايلاقي قلب يحبه زي قلبي 00هو الخسران حنيه لا يمكن حد حايديهاله قدي 00هو الخسران حضن لو لف الدنيا كلها مش حايلاقي لا أدفى و لا أحن و لا أأمن منه00 هو الخسران 00000000هو الخسران 000000000هو الخسران0000لازم تحسى ان هو ما يستاهلش منك كل اللي بتعمليه ف نفسك ده 00انتي لازم تعرفي انك بتقطعي في نفسك و هو نايم مرتاح و بيصحى يشغل أغنيه (كعبو كعبو 00حبيبي و انا الاعبه) و بيتفسح و بيهرج و مش بعيد يكون عايش حياته مع حد تاني غيرك 00حطى لنفسك شعار أغنيه (ريح بالك 00بتاعت تامر)
ريح بالك و انسى اللي نسيك عيش ليك لياليك مش ده يا قلبي اللي بنتمناه

وده كان الجزء التاني من بوست
حب غير مشروط وحب ميؤس منه + تحديث

وطبعا الكلام ده منقول بتصرف من موضوع قرأته بس مش فاكرة مين اللي كان كاتبه

الحياة دقائق وثواني

دقات قلب المرء قائلة له ... ان الحياة دقائق وثواني

ياه لو الوقت يقف شوية