الجمعة، 5 يونيو 2009

انا كمــــــــــــان اتســـــــــرقت !!! + تحديـــــــــــــــــــــــــث


النهاردة كنت بكلم ماما على اني بشوف مدونات بيستخدمو فيها نفس تعبيراتي وكلامي واسلوبي في الكلام ودي حاجه ضايقتني
فماما قالتلي بالعكس دي حاجه تفرحك ان اسلوبك مؤثر وده دليل نجاحك بس انا كنت معتبرة الموضوع ده سرقة لان دي مفرداتي ودي حياتي وبعدين كلمت خالتو المصرية في نفس الموضوع قالتلي ان علشان سننا متقارب في التدوين فممكن تكون المفردات دي مشتركة ما بيننا واني مأخدش الموضوع بحساسية
المهم قرات بوستين واحد ل احساس طفلة محبة للرومانسية بس واقعية والتاني لمنوش بيتكلمو فيها عن السرقة
ولاني قولت وده مين ده اللي هيسرق افكاري فطنشت وبعدين بعد لما شوفت بوست منوش دورت على بوست من البوستات بتاعتي
ولقيت نفس ذات البوست نازل في منتدى في نفس اليوم اللي كتبته فيه بس انا كتبت البوست الساعة عشرة ونص واللي سرقته نقلت البوست الساعة 4 الا ربع http://shatawy-dj.ingoo.us/montada-f4/topic-t5804.htm
انا بجد دمي محروق اني اتسرقت ولو انها سرقة افكار بس بجد احساس وحش اوووووووووووي ومؤلم اووووووووووي ان افكاري ومشاعري تتسرق بالسهولة دي لأ ومش كده بس كمان تتنسب لحد غيري
طبعا انا لسه مبحثتش عن باقي المواضيع لما افضى بعد الامتحانات ان شاء الله واشوف ايه اللي اتسرق تاني
يا عالم ما خفي كان افظع !!!!!!!!!
--------------------------------

تحديث : في مدونين انضمو لموكب المسروقين اشمعنى هما يعني :) وده بيدل على اننا ما شاء الله مواهب فذه
كيكي اتسرق منها موضوعين الاول اسمه خبر عاااااااااااااااااااااااجل وده اللينك بتاعه
http://fokaakmeny.blogspot.com/2009/05/blog-post_13.html
وطبعا اللي سرقته مكتبتش انه منقول وبالتالي كل التعليقات كانت بتشكرها على كتابتها للموضوع طبعا حاجه تضايق وتزعل وتحرق الدم
ده لينك الموضوع المسروق :
واللي سرقت البوست ده عندها مدونة بس انا مش هكتب اللينك بتاعها
اما البوست التاني بتاع كيكي واسمه قسم يا عمدة قسم بس من غير صداع وده اللينك بتاعه
وكمان فكرت شوية ان معظم الحاجات اللي بتتسرق بتكون شعر او مواضيع ساخره فعملت سيرش على اشعار مدونة كلام من القلب
ولقيت ان في قصيدتين مسروقين من المدونة ومنشورين في منتدى اسمه اصحاب فور يو
بس الجميل اني لما فتحت المنتدى ده لقيته مش بيفتح بس النتائج بتاعت الشعر طالعه على جوجل يعني القصائد دي كانت مسروقة فعلا والقصيدتين اللي عملت عليهم سيرش وطلعو مسروقين هما حوار مع الحبيب ولون عنيكي
وكمان عاشقة الرومانسية في ليها بوستات اتسرقت
وكمان مدونة اخف دم اتسرق منها بوستات كتير
وعلى رأي أ- تامر علي كلنا اتسرقنا بس كنا رجالة ووقفنا وقفة رجالة
وارجع واقول ما خفي كان افظع !!

هناك 34 تعليقًا:

The Illusionist يقول...

ليه بس
مضايقه ليه
مش قولتى قريتى موضوع منوش
طيب
اكيد قريتى الجزء بتاع
الموهبه
وانا رديت قبل كده عليه وقولت
انتى ايه اللى مضايقك
انتى اتسرقتى
ده واضح
ويزعلى جدا فعلا
لكن اولا
ده مياثرش فيكى
بالعكس
اللى سرق الموضوع اعجب كلامك لدرجه انه سرقه
ونسبه لنفسه
ولو تلاحظى اى موضوع مسروق
مش عليه غير ردين تلاته بالكتير
بس
متزعليش من السرقه الفكريه دى
طالما عندك موهبه
يبقى عادى
البحر مش هينقص لو خدنا منه
ولا ايه
ومعلش نسينا نقول
مساء الخير
و
اتفضلى الشاى معانا

احساس طفلة محبة للرومانسية بس واقعية يقول...

انا اول ما قريت العنوان ضحكت يا ليدى
قلت هو فى اية كلنا كدا ؟
كدا مطلعش تقارب فى السن والتعبيرات
كدا طلع تقارب حتى فى السرقة
كلنا طلعنا فى نفس الحكاية
ومتأخد مننا حاجات

لا بجد بقى مكنتش متخيلة ان حكاية السرقة هتكبر كدا ونلاقى كل الاعداد دى بمعدل بوست او اتنين فى كل مدونة بيزيد احيانا ويتراوح بين 10 و 20 ( الجزء دا يضايق ومحبط بس للاسف حقيقة )

بصى حطى الكود بتاع التظليل والكود اللى بيطلع رسالة يقول ممنوع النقل

مش تضايقى نفسك انا لقيت الحكاية متستحقش تعب اعصاب كدا هى متعبة فى البحث والكلام مع ادارة كل منتدى تحذف البوست من عندها

بتهيألى كدا الحل الصح لغاية لما نشوف حل للحكاية دى بس المهم منسبش حقنا ولا نبطل كتابة

تقبلى مرورى

تامر علي يقول...

كلنا اتسرقنا ... لكن كنا رجاله ووقفنا وقفة رجاله :)

ان شاء الله هنلاقي حل للموضوع ده :)

ABOALI يقول...

كله بثوابه
وصدقة منك
يمكن تنفعك فى يوم تانى
وربنا يحقق بيكى الامانى
وحرف مع حرف
الكلمات لابد تتجمع تانى
والعقول الوان
عمرها ما تنتقل لحد تانى

اه يا انانى


احسن

أحمـــــــــــــد أبو العلا يقول...

ليدي
المشكله ديه عمال اقرأها في كل المدونات
كله بيتسرق
والله انا خايف ادور على اي بوست من عندي الاقيه منشور
سعاتها هيتحرق دمي عشان انا مش لاقي طريقه لحماية الموضوع ده

انا بدور لكن الموضوع مفتوح
ربنا ينكد عليهم الناس ديه

hager za3bal يقول...

انا بقي اتسرق مني موضوع قبل كده

بس الغريبه انني مكنتش لسه نزلته عالبلوج..!

كل الحكايه انني بعتله لناس كتير من زمايلي في المجله عشان اعرف رأيهم قبل ما ابعته علي ميل المجله وينزل..

والغريبه لقيته بالصدفه وانا بقلب في جوجل.. في منتدي اسمه صوت البنات..

بس كان حظي حلو لان الموضوع نزل بعدها بكام يوم في المجله باءسمي ودخلت رديت علي البني ادمه اللي سرقته دي

حاجه بجد تحرق الدم
خصوصا لما تبقي عارفه ان اللي عمل المقلب دا فيكي حد من زمايلك..!!

واللي يغيظ اكتر ان اللي بيسرق ده مش بيكتب تحته منقول مثلا او انه مش بتاعه وبتاع فلان، لا دا بينسبه لنفسه ويقعد يكتب يارب يعجبكم وحوارات كده بجد مش عارفه بيبصوا لنفسهم ازاي :((

ELMASRYA - MRS WRITER يقول...

يا جميل ياللي مواضيعك بتتسرق

شفتي عاملة نفسي هادية ازاي ؟

هروح فوووورا أشيك على مواضيعي

ولو لقيت حد سارقها يبقى كرسي في الكلوب والوش البرتقاني أبو دخان طالع من ودانه هيبان

ممكن أقول عااااااا مقدما؟

قبلاوى يقول...

ماشى بس هى مش ناسبه الموضوع لنفسها

هى صحيح كانت لازم تنوه عن المصدر اللى جايبه منه الموضوع

بس دى حاجه تبسطك ان أعمالك ماليه النت

عاشقة الأحزان يقول...

السلام عليكم


وحشيتنى قووى


اخبارك ايه

بصراحه اخبارك مش كويسه وانا كمان والله الوحده زهقت يانونو ومش عارفه ايه اللى بيحصلنا ده


ربنا يستر علينا يارب

المهم طمنينى عليكى

وياريت تفتحى الميل عشان عاوزاك


سلام ياعمرى

انوسه

عاشقه الرومانسيه يقول...

ليدى
انا كمان اتسرقت
عاااااااااااااا
تعالى نقعد نعيط سوى يااختشى

Lady E يقول...

The Illusionist : اوكي قرأت الجزء بتاع الموهبة وموافقة على الجزء ده
بس ليه متأثرش ايه الفرق بين السرقة الفكرية وانك تكون جايب موبايل جديد مثلا ويتسرق منك ؟؟ نفس الاحساس المؤلم
يعني لما تقعد مع نفسك وتفكر وتكون عايش حالة معينة او متأثر بحاجه معينة وتعبر عنها وكل كلمة بتكتبها بتبقى من روحك وفي الاخر يجي حد ياخدها من غير ما يقول حتى ان الكلام ده منقول
وبعدين مش مبرر ابدا ان حد يعجبه كلامي فيسرقه وينسبه لنفسه والا كان كل واحد عجبه حاجه في الحياه سرقها !!

مساء وصباح النور
وشكرا على الشاي بس هو مفيش اورنج جوس ولا ايه؟؟ :)

MaNoOoSh يقول...

بصي يا ليدي كويس انك تحطي الموضوع المسروق.. والخخطوة الجاية انك تسجلي فى المنتدي وتكلمى الادارة وتبعتيلهم رابط موضوعك وتوضحيلهم التاريخ وكلميهم بمنتهى الذوق وان شاء الله هيحذفوا الموضوع المسروق.

MaNoOoSh يقول...

اه نسيت اقولك ربنا يعدي الامتحانات على خير ان شاء الله
وانا البوست الجاى هوضح شوية نقط مهمة للحماية وهحط أكواد الجماية ولو ان مفيش وسيلة تمنع السرقة تماما.

ايوشة يقول...

موضوع السرقة ضايقنى جدا اغلب الناس بقيت بتشتكى منه اتمنى يتحل قريب لان فى ناس بتمتنع انها تنشر حاجات جديدة بسبب الموضوع ده
بخصوص سرقة الاسلوب مش هسميها سرقة لان فعلا فى بعض المصطلحات اللى منتشرة بين الناس كلها وحتى لو حد كرر اسلوبك ده دليل انه معجب بالطريقة اللى بتكتبى بيها علشان كده اقتباسها
مرسيى لزيارتك للمدونة

اعقل مجنونه يقول...

حكاية السرقه دى منتشره اوى اليومين دول بجد لازم نعمل حاجه

Lady E يقول...

احساس طفلة محبة للرومانسية بس واقعية : معلش يا احساس طفلة
ان المصائب يجمعن المصابينا على رأي احمد شوقي

انا كمان مكنتش متخيله ان في حد يفكر يسرق حاجه من مدونتي :) بس لاقيتني مسروقه عاااااااا

بالنوسبة للاكواد اكيد هشوف موضوع الاكواد ده ان شاء الله
بس اللي عايز يسرق حاجه بيسرقها

نورتيني

Lady E يقول...

تامر علي : ههههههههههههههه

بالرغم ان انا كنت مضايقة جدا الا ان تعليقك ضحكني جدا

ومش كل سرقة زي التانية يعني مواضيعك ومواضيع دكتر ستيتة اتسرقت بأسمائكو :)

Lady E يقول...

ABOALI : احسن !!!

ماشي يا ابوعلي الله يسامحك

وعقبال مواضيعك لما تتسرق ووقتها مش هقولك احسن

Lady E يقول...

أحمـــــــــــــد أبو العلا : واضح ان رد فعلك اختلف لما لاقيت مواضيع مسروقة ليك يا انجينير :)

اتحرق دمك واضايقت وفي نفس الوقت ضحكت

MǿиY El-Shreef يقول...

والله مافي الا ربنا هو الي هيحلها

اتحسبني واتحسبي وخير ان شاء الله

ماتحرقيش دمك انتي بس

ربنا معاكي ياحبيبي

Lady E يقول...

hager za3bal : يااااااااه يا هاجر

صعب اوي لما حد من زمايلك اللي عارفاهم والمفروض واثقة فيهم يسرق موضوعك

واكيد فعلا حرقة الدم بتزيد لما يكون حد تعرفيه هو اللي عمل المقلب ده فيكي

انا كمان نفسي افهم بيحسو بإيه وبيبصو لنفسهم ازاي

قلبي معاكي يا هاجر

Lady E يقول...

ELMASRYA - MRS WRITER : شوفتي يا خالتو بعدما اتكلمنا على طوووول عرفت ان موضوع من مواضيعي اتسرقو

ياريت تطمنيني يا خالتو في مواضيع اتسرقت من عندك ولا لأ

عاااااااااااااا و عاااااااااا كمان مرة

Lady E يقول...

قبلاوى : مين اللي قال ان هي مش ناسبة الموضوع لنفسها يا قبلاوي

انتا لما بتكتب حاجه في مدونتك مثلا مش لازم تكتب انها بقلمك علشان نفهم انها بتاعتك لكن بمجرد انك كتبت موضوع بنفهم انه موضوعك ولا ايه

واوكي كنت هفرح لو كانت قالت منقول من مدونة فلانة اللي هي انا لكن كده تبقى سرقة !

Lady E يقول...

عاشقة الأحزان : وعليكم السلام ورحمة الله وبركاته

وانتي كمان بتوحشيني يا انوس

منوراني دايما

Lady E يقول...

عاشقه الرومانسيه : ااااه يا قلبي

حتى انتي كمان يا عاشقة معلش هي تقريبا حاجة ماشية في الجو وبتصيب المدونين عاااااا

Lady E يقول...

MaNoOoSh حصل يا منوش وبلغت ان ده موضوع مخالف ولسه هبلغ الادارة انهم ع الاقل يكتبو انه منقول من مدونتي او يحذفو الموضوع

Lady E يقول...

MaNoOoSh : امييييييييييين ياااااارب

هتابع البوست الجاي ان شاء الله يا منوش

ولو ان مفيش حاجه بتمنع السرقة الا الضمير

لاسع افندى يقول...

الحرامى بيسرق الحاجه اللى ليها قيمه وتستاهل


تحياتى

Lady E يقول...

ايوشة : السرقة بقت حاجه مشتركة بين المدونين معظمنا اتسرقت المواضيع بتاعتنا للاسف

نورتيني يا قمرايا

Lady E يقول...

اعقل مجنونه : اكيد هنوصل لحل ان شاء الله

Lady E يقول...

MǿиY El-Shreef : خلاص يا موني هحرق دمي عالفاضي ليه

ميستاهلوش حتى اتحسبن

وربنا معاكي يا حبيبتي

Lady E يقول...

لاسع افندى : بس برضه ده مش مبرر للسرقة

mahasen saber يقول...

اه صدقتى يا ليدى ما سرق كان اوجع

اكتر شئ يألم فعلا انك تتسرقى ما باللك لو السرقه دى جت فى حاجه بتكون طالعه منك زى افكارك واحاسيسك

ربنا يقطع فكر كل سارق لافكار او مشاعر حد

ها ايه رايك فى الدعوه دى
قولى امين

حاجه تنئط هو احنا ناقصيين سرقه

Lady E يقول...

mahasen saber : كل سنة وحضرتك بخير وصحة وسعادة ولو انها متأخرة شوية

--------------------------
ما سرق كان اوجع فعلا :)

ومش هقول امين واحدة لأ هقول

امين وامين وامين كمان مع اني اعتقد ان اللي بيسرق ده معندوش افكار اصلا

وما هو علشان احنا مش ناقصين سرقة فالسرقة وصلت للافكار كمان !

رفعتي من روحي المعدنية بزيارتك الجميلة