الأحد، 2 أكتوبر 2011

تاني تاني تاني


"تاني تاني تاني راجعين للكلية تاني للنار والعذاب من تاني من تااااااااااااني " عاااااااااا عااااااااا

من أول لما الحمد لله اتخرجت من كلية الهباب قسم لغة الفرنجة وأنا حلفت اني مش راجعالها تاني كطالبة
ممكن أرجعلها دكتورة في الجامعة بس :)

سنة وكام شهر فاتوا عملت فيهم بحث عن الدبلومات المختلفة في مصر والماستر في الجامعة الأمريكية وبره مصر في جامعات بريطانيا وأمريكا وطبعا اللي وصلتله أن جامعات بريطانيا جامعات عريقة لكن عايزة مصاريف مهولة خصوصا بالنسبة لبنوتة عايزة تعتمد على نفسها


لما رجعت مصر طبعا كان كل الدبلومات في القاهرة واسكندرية التقديم ليها قفل :(
وأخيرا فتحت دبلومة ترجمة تحريرية وفورية وتتبعية في كليتي المبجلة السنة دي ده الى جانب الدراسات العليا الثانية
في الأول كنت فرحانة جدا ان بقى في دبلومة في كليتي وكنت في جمهورية المنوفية وعايزة أرجع جمهورية دمياط بأسرع وقت علشان أقدم فيها لكن النهاردة بقى نزلت أرض الواقع ورجعت الكلية علشان اسأل على الدبلومة ولقيت غيري بنوتات كتير بيسألوا عنها
دكتر أشرف جاوب على كل أسئلتي وأسئلة البنوتات التانيين وعرفت أسم المواد اللي في الدبلومة
مواد مكلكعة :) وغير كده كمان نفس الدكاترة اللي كانوا بيدرسولي في تالتة ورابعة هيدرسوا الدبلومة
حد متخيل دكاترة عندهم 60 سنة فما فوق هيفهموا جيلنا ازاي؟
دكتورين اتنين بس اللي يعتبروا متميزين وكويسين وسنهم قريب من سننا هما الجيل اللي قبلنا برضه بس بيفهموا
أما باقي الدكاترة برغم انهم دكاترة لكن في الضياااااااااع وفي فرق جيلين بيننا وبينهم يعني لو قولتلهم فيس بوك أو تويتر أو ياهو هيفكروا اني بشتمهم



" أه يا ليلي أه يا ليلي ياااا حضن السهارى يا للي شوفت في عنيا الدموع وأنا دايما راجع من الامتحانات وحيد
يااااااااا ليل "

أنا دلوقتي محتارة جدا دول سنتين مش سنة واحدة ومش عايزة أجي في السنتين الاقيني شايلة مادة أو تقديري مقبول وأفضل أعيط وأقول ايه بقى اللي هيواسيني بعدما انهدت امالي
وفي نفس ذات الوقت ربنا سبحانه وتعالى هو اللي عمل الدبلومة في كليتي في التوقيت ده اللي انا بدور فيه على جامعة كويسة أدرس دبلومة فيها


ملحوظة : اللي معاهم دكتوراه مبيتعينوش في الكلية لأن مفيش وظائف أصلا – مستقبل مشرق ومتفائل-





ملحوظة تانيه : شكرا يا مانو لأنك قولتلي على موضوع دبلومة الترجمة ده من سنتين :) بس أنا لسه فاكرة تعليقك


ملحوظة تالتة : الأغنية المصاحبة أغنية موعود لعبد الحليم

هناك 14 تعليقًا:

عمرو يسرى يقول...

مادم انتى اللى عايزه هتتفوقى
وربنا يوفقك

Miss LoZa يقول...

لاااااااااا
حد يقول على كليته وحشة
لا لا لا
لا ملكيش حق
هههههههههههههههه
بصى انا رأيى تعملى استخارة وربنا هو الى هيقولك تعملى ايه بالظبط اصلا :)
بس أهم حاجة ايا كان الى هتعمليه سواء هتعملى الدبلومة او لا ,, لازم تكونى مقتنعة بيه :)

Baskouta يقول...

بصي يا جميلة
دبلومة الترجمة جميلة جدا
اه صعبة وموادها كتير بس اللي بيحب المجال اصلا هيقدر عليها
انا درستها وعارفة كم المواد الكتير اللي فيها وبقالي 5 سنين بشتغل مترجمة
كنت داخلاها وانا حابة المجال ده وكنت بتدرب في مكاتب الترجمة
فانتي لو حاباها بجد توكلي على الله وادخليها

اما بالنسبة لموضوع الدكاترة
انا كان من ضمن الدكاترة اللي بيدرسولي
دكاترة حاصلين على درجاتهم العلمية من امريكا وانجلترا في مجال الترجمة فكانت حاجة ممتعة وكان سنهم معقول لكن كمان كان في 3 مواد الدكتور بتاعهم من ايام الفراعنة وكان في فجوة كبيرة جدا في التعامل
لكن اللي عاوزة اقوله ان اصلا مش كل المواد بتعتمد على الدكتور
يعني مثلا مواد زي نظريات الترجمة واي مادة نظرية تانية دي بتحتاج دكتور يكون شاطر وبيتواصل معاكم كويس
وكمان الترجمة الفورية والتتبعية
اما الادبية والتحريرية بشكل عام فصدقيني بتعتمد على الطالب اكتر وقدرته على اكتساب مهارات بالتدريب والقراية في مجالات كتير والدكتور بيكون مجرد عامل مساعد يقول الارشادات اللي توصل الطالب لمرحلة الترجمة الاحترافية

اتمنى اكون قولت حاجة تفيدك في قرارك

تحياتي

kmhmhgfd يقول...

مع احترامى الشديد لبوستاتك ومدونتك اللى حقيقى فكرها يدل على فتاه راقيه جدااا
واسمها لوحده كفاايه :)

بس ممكن اسألك سؤال هتستفيدى بايه كل ده عارفة انها مسأأله طمووح واثبات ذات وخبرة وعلم ومعرفه بس صدقينى فى الاخر ولا هتستفدى حاجة غير ان عرفتى معلومات بشوية مشغوليات جاية فى حياتك وخصوصا لو لسا بنت وقدامك زواج وحياة ليها شكل تانى

كلده هيبقا مالوش لزمة وهيتنسى
:)

Ana keda يقول...

ههههههههههههه
وحشانى اوى ع فكرة يا ليدى
بطريقة بشعة والله
وضحكتينى ربنا يعينك يا حبيبتى
بحب فيكى طموحك

نيللي علي يقول...

بصى طول ماانتى عايشه خلى عندك طموحى وعندى وعافرى ومتخفيش ..أوعى تخافى ولا تقلقى ..وأوعى توقف وتقولى هستفاد أيه ويمكن أتجوز ويمكن مانجحش ومليون يمكن ..يمكن دى بتوقف ..أنا لسه النهارده كنت قريه قصه"نايكى" اللى أسسها واحد أسمه فيليب نايت ومدربه بيل باورمان ..فيليب نايت كان نفسه يعمل حذاء رياضى فى امريكا عشان كان بيحب الجرى ومدربه ساعده وعملوا تصميم وعرضوه على شركات فى امريكا ورفضت تصميم تخيلى ..نايكى اترفض وعافر ونجح مش هكملك بقيه قصه نجحهم عشان ماطولش عليكى بس كل اللى هقولهولك كملى وتوكلى على الله ..الفشل مش انك تسقطى بعد الشر فى ماده الفشل أنه مايكونش عندك هدف او حلم تحقيقه وربنا يوفقك

nour alqamar يقول...

مساء الخير ..
شكرا لك على موضوعك وبالتوفيق لك
مع تحياتى
نور

مدونة رحلة حياه يقول...

السلام عليكم
اللى بدا طريق يكمله
قولى يارب وامشى طريقك وهتتغلبى على كل شئ
متعمليش زيى وتكسلى من اولها
دومتى بخير

د.ريان يقول...

مساء العطر سيدتي

ويارب يوفقكم

ومدونة رائعة

أسعدني المساء هنا

دمتم بكل ود

P A S H A يقول...

حلوة الصورة اللي فوق .. كتبت التعليق بدالي :)

ربنايهديكي للخير إن شاء الله

فشكووول يقول...

السلام عليكم
اول مره الاقى فيه حد كاتب على بلده مصرى للاسف .. كم كنت سعيدا لما شفت الكلمه دى عشان انا كل ما اقول يا اخوانا مصطفى كامل ما كانش عنده حق يقولوا لى لو لم اكن مصرياز....... طب يا ساده .. ماشى ما هو احنا قمنا بثوره واعظم ثوره تقريبا فى التاريخ وحالنا هو حالنا وكأننا بلد ملعونه ..
ما عليناااااااااااااااااااا

اما جامعة المنوفيه وجامعات الاقاليم عموما فانا باعتبرهم مجرد كتاتيب الشيخ اسماعيل وكل همهم انهم ياخدوا مصاريف ويشوى العيال بالكتب الجامعيه اللى ثمنها غالى ومافيهاش اى ماده علميهت .. لكن فى سبيل الدبلوم الله يكون فى عون ويقويك
تحياتى

فشكووول يقول...

على العموم رأى بسكوته يحترم

Sarah .. يقول...

انتى كنتى سبب من الاسباب اللى شجعتنى انى أقدم فى الدبلومة دى أنا كمان
لما قولتيلى عليها من سنة .. فوقتها بس فكرت فيها .. :)

انتى بس ليه خايفة من حاجة انتى لسه مبدأتيش فيها !
ليه مفترضة الاسوأ انه يحصل
الموضوع صعب شوية .. بس خليكى فاكرة كمان انه مش مستحيل .

بس الدبلومة دى أول مرة تكون فى جامعتك ولا ايه ؟!

تعرفى
أنا قبل ما أقدم فيها بدقيقة واحدة بس .. كنت فقدت الامل انى هلحق أقدم فيها السنة دى وكنت هأجلها
لان ورق التخرج بتاعى كان لسه مخلصش
بس فى ثانية ربنا سهل لى الموضوع وتم على خير .
ف انتى كمان ربنا سهلهالك ويمكن ادالك فرصة انك تستغليها عشان تحققى طموحك .

اتوكلى على ربنا بس وما تتردديش بس لسبب انك خايفة من السنتين دول
يمكن ليكى اسباب تانية تخليكى مترددة

من موقعى هذا .. بدعيلك ربنا يوفقك للخير يا ليدى .. :)

أنا متفائلة برغم صعوبة الموضوع .. شوية
فأرجوكى خليكى انتى كمان كدا .. لانك قدها .. :)

NOUR Kamal يقول...

يا ربي يوفقك
شوفي دايما الواحد بيكره يرجع لنفس المكان اللي انتهى منو

يعني بحب يغير المكان ويجدد

حلو يكون في معك أكتر من شهادة وكل شهادة بجامعة تانية خالص

بس سبحان الله الله مقدرلك تكوني فيها


توكلي ع الله وغد مشرق.. :)