الاثنين، 26 سبتمبر، 2011

مواقف حصلت بجد :)

مساء الخير

قبل الثورة كنت بجري جدا على الطريق السريع وأنا مسافرة ومع ذلك مكنتش بوصل الا متأخر وبعد الثورة أنا ماشية بطيء في وسط السواقين دولا مجانين ومع ذلك وصلت بدري قبل المعاد المعتاد بساعة :) برغم ان كان ممكن نعمل 55550 حادثة بس ربنا بيسترها واحنا ماشيين ببركة دعاء الوالدين وبستر ربنا مش أكتر

بحب أوي لما تحصل لي مشكلة أضحك بعدها ودي حاجة جديدة حباها فيا :)

هس السلعوة طلعت بجد
أحمد ابن خالتي عنده كلب اسود في اسود وشبه الكلب اللي بيجي في اعلانات فودافون

الأطفال كانوا بيلعبوا معاه وفأجه سمعناهم بيصوتوا وبيصرخوا بهيستيريا قلنا اكيد الكلب عض حد المهم كانوا بيصرخوا لأن الكلب جري عليهم وكان عايز يعضهم :)
طبعا انا قولت مش هتعرض للكلب ده خالص :) لكن الحظ عارف اصحابة كنا في بيت احمد ونازلين انا وخالتي ومامتي وأحمد ماسك الكلب وبيمشي جنبه وبيلعب بالكورة
المهم مامتي وخالتي مشيو من قدام الكلب عادي جدا وأنا بمشي وراهم زيهم بالضبط لقيت الكلب بصلي وجري عليا وبيهوهو كمان قولت بس انا هتعض لا محالة والمفروض بقى الادرينالين يشتغل وأجري مثلا :) ده العادي لكن اللي حصل العكس تماما حسيت اني اتسمرت في مكاني وغمضت عيني وصرخت - زي الأطفال بالضبط- ف أحمد ربنا يسامحه هو وجوز خالتي مسكوا الكلب
المهم اني كنت بكلم كيكي وقتها ويا عيني قلبها وقع في رجليها :) معلش يا كيكتي الصديق وقت الضيق :)
طبعا فضلنا نضحك بعدها عالموقف ده
فريسة أنا ولا ايه؟ :) وقال ايه كان مسمي السلعوة دودو
الكلب ده بقى مسمينه بابسي .

امبارح ركبنا مع سواق تاكسي قولناله الكنيسة لو سمحت فبصلنا واستغرب يعني ازاي محجبات ورايحين الكنيسة؟ فقلناله رايحين لدكتور عيادته هناك فقال لنا وملقاش الا الكنيسة يعني اللي يفتح جنبها وفضل يتكلم برخامة على المسيحيين فأنا قولت بس يبقى متطرف والجدال معاه مش هيفيد واحنا نازلين من التاكسي لقيناه بيقولنا على فكرة أنا مسيحي :))) وكنت عايزة اي دليل على كلامه فلقيت صليب صغير على المراية الصغيرة اللي السواق بيشوف فيها اللي وراه :) قال لنا على فكرة انا بحب الناس تغلط في المسيحيين اللي كان راكب معايا قبلكو كنت بقوله المسيحيين يا عم مش هيدخلو الجنة وعالم مش عارف ايه وهو نازل قولتله انا مسيحي فزود لي الأجرة الضعف :)) وبعدين كلنا مصريين وكان ناقص يقول الجيش والشعب ايد واحدة
والهلال مع الصليب قشطة ومربة وحليب :)

الزمالك اليومين دول نصفنا :) ماتشين ورا بعض بيفوز فيهم :) عقبال الباقي قادر يا كريم
رحنا عند دكتور زملكاوي وكان لسه الماتش مخلصش قال لنا استنو بقى لما الماتش يخلص وقعدنا انا والدكتور زملكاويين فبنشجع الزمالك :) وفعلا الماتش خلص بفوزنا
المشكلة بقى ان الدكتور طلع بصري وأصعب شخصية لطبيب انه يكون بصري لأن البصريين مبيحبوش التفاصيل ومش عايز اللي قدامه يتكلم فكل ما أقول حاجة يقولي ألف سلامة :) لغاية لما طلعنا من العيادة وكل ما اتكلم مع حد أقوله ألف سلامة الف سلامة :)
وجبت الأدوية اللي كتبهالي واذ فجأتن الاقي الأعراض الجانبية ممكن تعمل لي مشاكل كتير ف اتصلت بيه وقال لي متقرأيش الاعراض الجانبيه وخدي الدوا لو سمحتي قولتله انا لازم اعرف هاخد ايه قبل ما اخده -وبدأت انفعل- قاللي مفيش دوا في الدنيا الا وليه أعراض جانبيه حتى الفيتامين لو اخدتيه كتير والاعراض الجانبية دي لو استخدمتي الدوا فترة طويلة وفي أخر كلامه قاللي ألف سلامة فمقدرتش مضحكش بصراحة :)

اكتر حاجة بحبها في مصر قعدتنا مع بعض للفجر نتكلم ونضحك -وناكل مانجا- :)
امبارح كنا بنتفرج على برنامج كلام من القلب والحالات اللي بتتصل كلها بيقولوا ركبتهم بتخونهم ومبيقدروش يقفوا عليها
وفجأة بنت خالتي قامت قايلة ايه الركب الخاينة الغدارة بنت التيت دي هي قالت كده وانا وهي وبنت خالتي التانيه صحينا البيت كله من ضحكنا وبعدين جبنا المانجا وقعدنا نتكلم مع بعض ونضحك لغاية الفجر

أخر يوم رحت فيه كورس دكتور ابراهيم الفقي روفي بنت عمي كانت معايا في الطريق للكورس عندها سنة وكام شهر حضنتني ومسكت فيا مكنتش اعرف ان حضن الأطفال حلو أوي كده للدرجة دي بيدي حنية وحب

من يوم ما رجعت مصر وفي حاجات كتير حلوة بتحصل لي - ده بغض النظر عني صحيا - نفسي أفضل في مصر على طول لكن كل شيء بأوان وكل شيء مكتوب


هناك 25 تعليقًا:

Ramy يقول...

يارب دايماً مبسوطة

و ضحكينا معاكى (:

..............

Miss LoZa يقول...

ههههههههههههههههه موقف الكلب ده تحفة يالهوى اصلا
اما بالنسبة لموقف الدكتور فاحب اقولك
الف سلامة
هههههههههههههههههههه
اللمة حلوة جدا وبتضحك وبتأكل كمان
هههههههههههههه
مصر ماليانة حاجات حلوة بس الى يشوف اصلا :)
سلامتك يا ايناس بعد الشر عنك :)

نيللى يقول...

ربنا يبسطك ويسعدك ويفرحك مع انى زعلانه منك كل مااتصل بيكى مش بتردى وببعتلك رسايل مش بتردى ..

على عموم ربنا يسعدك ويسعد ايامك

mrmr يقول...

ههههههههه
كتير بتحصل لنا مواقف على قد ما وقتها بنتخض على قد ما نفتكرها نضحك قوى من قلبنا
ربنا يسعد قلبك

Lady E يقول...

Ramy : اللهم أمين

ربنا يسعد قلوبنا جميعا

من عيوني يا رامي :)

Lady E يقول...

Miss LoZa : من ناحية تحفة فهو كان تحفة فعلا فضل قلبي يخبط في بعضه بعدها كتير وفضلت اضحك برضه :)

ههههههههه ألف سلامة ألف سلامة

صـــــــح بس مش كل اللمة حلوة

أيون أيون وعلى رأي شيرين بس اللي مجرب وفارقها قال في الدنيا مفيش بعديها :)

الله يسلمك يا مهموهتي دعوة في وقتها :)

p.s I love you

Lady E يقول...

نيللى : نونو قبل أي كلام افتحي خط الفودافون بتاعك وقوليلي لقيتي ايه :)

هظبط أموري واستقر وأكلمك على طول ان شاء الله أرتب جدول المواعيد بس هههههههه

مستغناش عنك يا نونو وأنتي عارفه

Miss LoZa يقول...

هو انا ليه الكومنت بتاعك ليا حلو اوى كده وكل شوية ادخل اقراه ها ليه ها ؟؟
ههههههههههههههه
لا بجد عجبنى اوى :D
طيب جربى اللمة معايا ومش هتندمى
هظبطك والله اسألى مجرب
ههههههههههههههههههههه
بالنسبة لموضوع P.S i love u
رديت عليكى على الفيس وهرد هنا برده ها رخامة

P.S .. I love u too asln ♥♥ :)

مدونة رحلة حياه يقول...

السلام عليكم
اهم حاجة فى الكاتب البساطة
وانتى بارعة فيها
ربنا يبسطك كمان وكمان
دومتى بخير

sony2000 يقول...

وانا اقول مصر منوره لييييه

اتااااري:)

نيللى يقول...

فتحنا الخط ..وبث مباشر كمان ..ههههه
وبسببه نزلت بوست كمان أسمه (من شبكه فودفوان الى قلبى مباشره) ويابخت فودفوان عشان انوس فيهااااا..وعين الحسود فيها عود عشان محدش يحسدنا ..أحبك فى الله

zizi يقول...

مواقفك كلها لذيذة ومضحكة .فرفشتيني وانا في امس الحاجة للفرفشة ..

احساس طفلة محبة للرومانسية بس واقعية يقول...

مش قولتلك ليها طعم بيخطف النفس ويخلينا نتعلق بيها السئ والحلو سبحان الله ربنا يوفقك وتبقى اجازة سعيدة واحسن واحسن ان شاء الله
ادعى الزمالك يفرحنا بقى ومش تروحى للدكتور دا تانى الا لو العلاج عمل مفعول الف سلامة عليكى ربنا يتم شفائك على خير خلى بالك من نفسك شوية

AhMeD RaDy يقول...

بصى سيبك من كل دا خالص

عارفة احلى حاجة بقى !

انك زملكاوية ... بجد انتى كدا انسان طبيعى جدا جدا !

اشطة يا فندم بجد البوست حلو اوى ههههههههههه وبجد مصر بتتغير بيهم

The illusionist يقول...

بسم الله الرحمن الرحيم

طبعا بغض النظر انى مش هقول حاجه عن شبين

سكتم بكتم

ولا الكنيه

سكتمز بكتمز

ولا شاليمو والطيبات وحتحوت

ده ناقص كنتى تلفى السبع لفات بتوع شارع الاستاذ

انا كنت جنبك فى مسجد فى شارع الاستاذ يا ستى

نياهاهاهاهاهاها

مانجه

والله حاسس انى انا اللى كاتب البوست ده

وطلع بصرى وعاوزه تتكلمى معاه

افضلى باصاله هينهبل علطول

مممممممممممممممم

شوفيلك جيم ولا حاجه بدل صحتك البرديه اللى مبتخفش اصلا دى يا ستى

حرام عليكى مش كده يعنى

مش شغل ناس بتفهم ده

مهو مش عشان تقومى بالنشاطات دى تفضلى عندك برد فصول السنه الاربعه

مصر حلوه على فكره اه

وانا قولتها نصيحه

اياكم والسفر الى عمان

خليكم فى مصر

تصدقى فى الخباثه

بقالى كتير مقريتش بوستات فى مدونه لاخرها

بالعكس

انا مبقراش بوستات اصلا تقريبا فى المدونات لو كانت طويله

يلا الله يسامحك خليتينى اقرا البوست كله

سلامنجات بالايس كريمات

كنتى هاتى شاى فواكه

حلو على فكره

بيس

The illusionist يقول...

برضو مالك المدونه

هتروحى منى فين

ليكى يوم يا ظالمه

rona ali يقول...

هههههههههههههههههههه فظيعه الحته بتاعت المانجا والسهر بتفكرنى بيا واخواتى وبنت خالتى والهيستريا بتاعت اخر الليل اللي بتيجى ومتعرفيش بتضحكى اصلا علي ايه وكل بيضلع بيضحك علي حاجه غير التانى

خايفه اقولك كلمه الدكتور تتتنرفزى بقي فهقولك ديري بالك علي حالك ومصر حلوة بوجودك انتى اصلا بتسافري ليه ؟؟؟

وبوست لذيذ خالص تسلم الايادى

MaNoO يقول...

بوست مبهج وممتع هههههههههههه مش عارف ليه عايز اضحك وخلاص عليه
كلامك كله صادق ومن القلب احترامى لعفويتك فى الكلام

Lady E يقول...

mrmr : صــــح

وانتي كمان يا حبيبتي ربنا يسعد قلبك ويحلي أيامك

Lady E يقول...

لوزتي ومهموهتي : علشانك حلوة فبتشوفي كل حاجة حلوة :)

ثانكيو ثانكيو ما أنا عارفة أنااصلا اتحب يا بنتي هههههههههه

Lady E يقول...

رحلة حياة : وعليكم السلام ورحمة الله وبركاته

:) الجمال في البساطة :)

اللهم أمين ربنا يبسطنا كلنا

Lady E يقول...

سوني : هههههههههههه ليه؟

اتاري ولا بلاي ستيشن؟ :))

Lady E يقول...

نيللي : أيون والمرة التانية حرقنا الرز ههههههههه

واحلم معايا

ربنا يحقق احلامنا يارب :)

Lady E يقول...

زيزي : أسعدني جدا تعليقك

ربنا يفرح قلبك ويسعد أيامك وتفرفشي دايما

Lady E يقول...

يتبــــــــع ومحدش يزعل اني مردتش على تعليقه لأن الساعة 2 ونص صباحا وعندي كلية وانترفيو لكورس بكرة
وهرد على باقي التعليقات لما اجي ان شاء الله

تصبحو على خييييييير