الاثنين، 1 مارس 2010

سمعني سلام بودعك


احلى حاجة في الكلية انها بتفتح شهيتي عالكتابة وبلاقي مادة ممكن اكتب عنها علشان بعد كده ابقى افتكر ذكريات أيام الكلية وخصوصا اني اخر ترم ويارب يجعله أخر الأحزان عايزة اخلص بقى من الكلية دي بكل حاجة فيها

خلاص بقى 4 سنين اللي نقول نعيده ده لو كان بيضة وفيها كتكوت كان زمان الكتكوت في الحضانة دلوقتي ، وبعدين اصلا اول مرة أنجح اني اقعد في مكان دراسي كل الفترة دي ، دائما كنت كل سنتين بالكتير أغير المدرسة مش علشان مشاغبة لا سمح الله دي حاجة اتمناها لكن تبع شغل بابا والمكان اللي كنا بنبقى فيه

اللي مش حلو بقى اني لما بحتفل بنفسي اني نزلت الكلية يوم بعدها مش بنزل الكلية أسبوعين أيوة هذه حقيقة

قضيت ليلة غريبة بحاول اجبر نفسي اني انام بالعافية بنظام هتنامي يعني هتنامي ولما كنت بصحى كنت بقول شوية أدعية مع حسبي الله ونعم الوكيل وبنام تاني
نزلت النهاردة والجو كان برد بغلاسة ومكنتش عاملة حسابي انه هيبقى برد أوي كده ومع اني صحيت بدري على غير العادة الا اني نزلت متأخر كالعادة

مفاجعة البطارية بتاعت الكتكوتة نايمة وشده اللحاف والبطانية ما هو الجو برد حقها
في الوقت ده المطر كان لسه نازل خفيف (زي وقت الحادثة) حسيت ان ربنا بيحبني مش مستعدة أسوق في الجو ده والطرق المزحلقة وحسيت ان لو كنت رحت الكلية بالكتكوتة النهاردة اكيد كانت هتحصل حاجة مش كويسة
وكان احساس قوي اوي -وقد كان وانا راجعه من الكلية كان في حادثة كبيرة موتوسيكل خبط بنوتات أطفال جايين من المدرسة والحادثة كانت في الطريق اللي دائما بمشي منه الحمد لله غالبا احساسي مبيخيبش- ، نرجع لقبل المحاضرة تاني قلت الحمد لله واخدت تاكسي ووصلت الكلية دكتر أنور لابس بدلة جميلة وشيك أوي انا استغربت انه مش جايب عروسته معاه ما هي بدلة بالشياكة دي تنفع في الأفراح لكن خسارة في الكلية

وطبعا زي ما زميلاتي حكولي زي محاضرة الأسبوع اللي فات ان احنا كطلاب سنة رابعة فاشلين في الانجليزي والمفروض منتخرجش م الأخر محناش نافعين ، والمحاضرة كلها كان بيعلمنا الجرامر من أول وجديد وعمال يتريق علينا وعلى اخطائنا في الامتحان والبنات الهاطلة بيضحكوا وبعدين صبحتي قامت وقالت للدكتر انت بتتريق علينا ليه – عجبتني أوي- قالها مش قصدي انا قصدي اضحكوا على أخطائكوا علشان متكرروهاش يا سلاااااااام

والدكتر قال لنا ممكن نخلي المحاضرة الساعة 12 وانا قولت هيييييييييييه هنام براحتي بقى والبنات ولاد اللذينا
قالوله لأ يا دكتر 10 يا جماعة 12 قالولوا لأ 10 اه يا دفعة عايزة يتولع فيها بجاز الساعتين دول يفرقوا معايا هنام براحتي بس أقول ايه بقى ما نصهم متجوزين وعايزين يروحوا علشان يطبخوا

بعدها رحنا نشوف السكشن امتى وقابلنا مين دكتر الفرنساوي ويا حبيبي اللي يخاف من العفريت يطلعلو
حبيبي الفرنساوي حبيبي بقيت معيدة فيه 3 سنين معايا وكل سنة المنهج بيتغير فعلا وزارة التعليل

رحت السوبر ماركت وانتقمت بقى جبت شوكولاتات كتير وحبيبي شيتوس بعد كده هيسموني فتاة الشوكولاته والشيتوس ، بعدها رحنا مكتبة مبارك انا وزميلاتي من اول اسبوع عاملين لينا بحث عن قصة قصيرة نختارها
دورنا في القصص والروايات ، من يوم ما دخلت الكلية نفسي اقرا كتاب واحد انجليش من اوله لأخره غير كتب الكلية وحتى كتب الكلية مش بقرأها من أولها لأخرها والغريب ان كان في روايات درسناها ومفتكرناش منها ولا كلمة الا العنوان :(((((((( خيبة والله خيبة

بعدها رحت قاعة من القاعات في المكتبة قرأت شوية في كتاب الأحاديث القدسية
ايه الروعة دي وايه الجمال ده والطمأنينة اللي حسيت بيها دي
واحد ربنا دخلة الجنة بحسنة واحدة
واحد ربنا غفرله علشان قاعد مع ناس بيذكروا ربنا بس مكنش في نيته ذكر لكن
اهل الذكر جليسهم لا يشقى

الله
معقول يا رب سبحانك انت جميل كده وبتحبنا كده اومال ليه بيخوفونا منك وكل كلامهم نار وعذاب وعقاب

انا بحبك وواثقة انك بتحبنا وخلقتنا علشان بتحبنا ومهما اتألمنا فبنتألم علشان نتعلم


ياللي بتبحث عن اله تعبده

بحث الغريق عن اي شئ ينجده

الله كريم ورحمن رحيم

احمل صفاته وانت راح توجده

وعجبي

-----------
ع الهامش : في دايرة الرحلة أيامنا ع المولى
ليلنا أيا ليلنا مرة هتحلى لنا
تميل على ميلنا في دايرة الرحلة
محمد منير

هناك 32 تعليقًا:

P A S H A يقول...

عجبني الجزء الخاص بالأحاديث القدسية حلو قوي بجد :))


تحياتي
:))
سلام

Lady E يقول...

P A S H A : ثانكيو ثانكيو لا داعي للتصفيق :)

معنى كده ان ده اكتر جزء حلو والباقي ارميه ولا ايه :)

نورت يا باشا

دمت بخير

R-H-S يقول...

انا كمان دا اخر ترم ليا في الكليه ان شاء الله يااااااااارب نخلص علي خير
انا بجد مش عاوز افتقد ايام الكليه خايف احن ليها خالص

بخصوص الحديث في قصه قريبه منه حبتين يمكن ملوش علاقه بس دماغي بقي وعاوز اقوله

كان الشيخ ابن عثيمين قاعد في درس من دروسه في الحرم فبطبيعه شرحه للدين كان بيحاور الناس اللي قاعدين بيتلقوا العلم فكان قاعد في وسطهم راجل من البدو حاجه زي كدا فالشيخ سأله سؤال فمعرفش قاله مش عارف طب انت قاعد معانا ليه
قاله والله ياشيخ انا عملت بحديث رسول الله ان مااجتمع قوم في بيت من بيوت الا يتلون كتاب الله ويتدارسونه فيما بينهم الا نزلت عليهم السكينه وغشيتهم الرحمه وذكرهم الله فيمن عنده

قام الشيخ قال هو دا الوحيد اللي فينا اللي اخد الراجل وامرهم كلهم انهم يجددوا النيه

اسف علي الاطاله
وتحياتى

فراشة يقول...

لا الحمد لله ربنا يسترها معاكي دايما يارب

وربنا يعينك ف الكليه

الذكري الحلوة بتبقى الصحاب بسسسسسس

والاحاديث القدسية بحبها جدا كان عندي كتاب فيه بعضها

ربنا يوفقك ف كل حياتك يارب

sony2000 يقول...

لو كنتي فالقاهره تبقي جنبي مانا اختك بس عربي وفأخر سنه برضه
ربنا معانا السنادي كلهم شدين حليهم علينا بس اختك بقي ادوها اجاذه وهنبتدي يوم السبت
ربنا مع الجميع ويارب يبقي ترم حلو علينا
تقبلي مروري وتحياتي

Ana keda يقول...

شدى حيلك بقى السنة دى عشان تخلصى من الدوشة دى
بس هتفتكرى الايام دى فعلا وتقولى فين ايام زمان
وماله يبنتى الشيكولاتة ده التطور الطبيعى لينا كلنا
نامى بس كويس ويا رب تعرفى تنامى كويس يا حبيبتى
خلى بالك من نفسويتك

ستيتة يقول...

احب اغتت عليكي واقول لك

لما تفتكري ايام الجامعة ها تلاقيها حلوة قوي
ها تلاقي نفسك اهتميتي بهواياتك قوي

انا كنت اقعد اقول لما اتخرج ان شاء الله ها اعمل واسوي وها ابقى فاضية وكيت وكيت وكيت

اكتشفت ان احسن قراءة واحسن استماع واحسن مناقشات واحسن رحلات واجدع خناقات كلها كلها كانت في الجامعة

بعدها دوامة وماشية

ربنا يكرمك وتخلصي بقى

متسوقيش في المطرة
لا مضطرة ولا مختارة
اول ما تلاقي مطرة خليكي مواصلات
وربنا يأمنك يا ليدي انتي وكل البنوتات العسولين

غير معرف يقول...

ايام الجامعة اممممممممممم

مش عارفة بصراحة لسة دى اول سنة ليا ومن اول ما دخلتها وانا عمالة اتصدم واشوف ناس بتضايقنى وتاذينى يمكن او بمعنى اصح كل اللى يهمها مصلحتها

بس بينى وبينك
ممتعة اووى الجامعة دى اصلها بتعلمنى الحياة بجد وبتخلينى اشوف حاجات جديدة والناس دى من مواقفى معاها بتعلم وببقى اقوى وافضل وبتعلم حاجات اكتر وبشوف زوايا جديدة

اما بقى بخصوص السواقة مستنية اما اكمل 18 عشان اعمل رخصة واروح اتعلم

لــــ زهــــــراء ــــولا يقول...

ليدى
انتى عارفه كل ماره اقرا لكى حاجه ابقى محتاره ياترى يا هل ترى اعلق اقول ايه
اسلوبك خفيف شيق رائع بجد
انتى شبهى فى موضوع اللغه الفرنسيه واضح انكم اصحاب اوى ;) ;) ;)

بالنسبه للاحاديث القدسيه بجد اللى يتمعن فيها يحس ان ربنا رحمته وسعت كل شئ وفعلا انا من عشاق الاحاديث القدسيه برضه
دمتى بكل خير
ربنا يوفقك فى الكليه وتخلصيها على خير ان شاء الله


زهراء

كيكى عوووووو يقول...

ربنا بكرة يكرمك وتجوزى
وتختارى المحاضرة الساعه 10
وكلى بقى شيكولاااااااااااااااااته كتيرة
عينى فيها اوووووووووووى
قوللها انها وحشااانى اوى

-_- يقول...

استفدت من المقال و من التعليقات ايضا لاني اول مرة اسمع موضوع ابن عثيمين من عايز اصحى

جزاكم الله خيرا

اقصوصه يقول...

الله يوفقك يارب

وتنجحين هالكورس

وتختمين مرحلة الدراسه الجامعيه

على خير :)

جميل جدا ان احنا نسجل ذكرياتنا

حتى نقدر نحتفظ فيها

على الامد الطويل*_*

Bent Men ElZman Da !! يقول...

ربنا يبعدك عن الحوادث ياقمر ويسترها معاكى
هو لو قولتلك ان بردو عاجبنى الجزء بتاع الاحاديث هتضربينى :)
حلوه ايام الكليه وماتتعوض
ربنا معاكى وتخلصيها على خير ان شاء الله

NeVeN يقول...

النهاردة عاوزة تخلصى الجامعة
واول ماتاخدى الاجازة وتسحبى ورقك من الجامعة هتقولى ياريت ترجع ايام الجامعة من اول سنة اولى

الاحاديث القدسية بتثير فى النفس الطمأنينة

انا بقا بأيدك فى حكاية الشيتوس هههههههه بموت فيه


ربنا يوفقك وينجحك

تحياتى

أسمعنى شكراًً يقول...

أى نعم أنا كنت هنام وأنا بقرأ البوست بس بصراحة أنتى خفيفة الظل
فى أسلوب التعبير بتاعك روعة
ويارب الترم دة يخلص على خير

Cute Kitty **sookra يقول...

ليدى اللى بتضحك علينا وتقول طفله

وحشانى بجد انا بااجى والله بس موش بسأل معلش امسحيها فى الانجليزى ماهو قريبك وعارفاه لما يقفل دماغه كده بيبقى عامل ازاى

اولا اوعى تسوقى فى المطر

ثانيا انا برده بسأل نفس السؤال ليه دايما عمالين يتكلموا عن النار كتير
دا ربنا رحيم ياناس

ديرى بالك على حالك وربنا يجعله اخر واحسن تيرم وتتخرجى زينا كده

Lady E يقول...

عاوز اصحي : ربنا يوفقك وينجحك وان شاء الله هنخلص على خير

انا بقى مش هفتقد أيام الكلية نوهائيا لأن كلها سنتين ان شاء الله وأرجع لها تاني علشان الماستر :)

وازاي الموقف ملوش علاقة بالحديث بالعكس ده موقف جميل بجد هو أنا مفهمتش نهايته أوي "اللي اخد الراجل وامرهم كلهم انهم يجددوا النيه "

اللي فهمته ان الشيخ رحب بالشخص ده علشان الكلام اللي قاله عن نيته وقال لكل الموجودين يجددوا النية لأن الشخص ده ذكرهم بفضل العلم والذكر

ومفيش اطالة ولا حاجة اكتب براحتك

===============

في حاجتين أحب أقولهم كمان هما عتاب وشكر

نبدأ بالعتاب
أول حاجة لما قولتلي أوضح الكلام اللي بكتبه لما قلت بربرق ، بيتهيألي مش من حق حد أنه يفرض عليا أوضح اللي بكتبه ومش مطلوب مني أشرح كلامي كمان بس لما بتكون في حاجة غامضة بوضحها بس مش هشرح

تاني حاجة شكرا
انت اتكلمت في مدونتك عن كتاب السر the secretوانا جبته من النت وقرأت شوية فيه بجد الكتاب رااائع وأنا درست كلام مكمل ليه في التنمية البشرية law of attraction
فبجد شكرا ليك لأني عرفت عن الكتاب من مدونتك

Lady E يقول...

فراشة : الحمد لله يا فراشة كلنا ماشيين بستر ربنا سبحانه وتعالى

تسلمي يا قمرايا ربنا يعينك في الدبلومة

كلنا بنحب الأحاديث القدسية

ربنا يسعدك ويفرح قلبك يا صبحتي

نورتيني

R-H-S يقول...

لو ثبتي ان انا قولت وضحي كلامك هدفعلك جنيه ونص كاش
انا قولت يعني ايه كلمه بربرق؟

معذره انتي متسرعه في احكامك علي الناس.
ياريت متزعليش

Lady E يقول...

sony2000 : ربنا يوفقك ويعينك وينجحك يارب

انا دلوقتي اتلخبطت لانك كاتبة في البروفايل كلية تجارة انا كنت فاكراكي في كلية الأداب

ان شاء الله ترم سعيد وهيكون ترم حلو لأنه أخر ترم :)

نورتيني

Lady E يقول...

Ana keda : ربنا ييسر الأمور يا مرمر

الذكريات الجميلة هي اللي بتخلي الانسان يستمر ويحب الحياة ويشتغل بأمل

أكيد هفتكر الأيام دي بالخير وهفتكر حاجات كتير حلوة فيها

بس الحياة مراحل وكل مرحلة ليها حلاوتها ، زي الكتاب فصول كل فصل بيكمل التاني وكل فصل أحلى م الأول :)

الشوكولاتة دي روحي روحي روحي :)

وانتي كمان خلي بالك من نفسوياتك وربنا يحفظك يا حبي

نورتيني

Lady E يقول...

ستيته حسب الله الحمش : خالتو حبيبتي

قولي كل اللي تحبيه أنا أصلا بحبك وبحب كل كلامك

أكيد عندك حق في موضوع الهوايات فعلا اهتميت بيها بس مش أوي لأن مفيش حاجة تشجع في جامعتناأو كليتنا وهي بمعنى أصح مش الكلية اللي يتبكي عليها وأفتقدها ، لما بمشي جنبها دلوقتي مش بحس بأي حنين ليها الله اعلم بعد كده هيبقى احساسي ايه
بس لازم يكون في برضة حتة احساس بالمكان اللي قضيت فيه 4 سنين الا شهرين :)

اهو انا كنت بقول لما اروح الجامعة هطلع كل الرحلات ومروحتش ولا رحلة لأن مواعيدهم مكنتش مناسباني :( عااااا

امين ياااااارب وأخلص من الفرنساوي على وجه الخصوص

مش للدرجة دي يا خالتو بس الجو والناس والعربيات بيبقوا مش طبيعين في المطر ده اللي بيقلق ومبقتش أخاف من السواقة في المطر زي الأول لأن ليا عمر ومكتوب وربنا سبحانه وتعالى انقذني من حادثة كنت هموت فيها لا محالة
فأنا مش قلقانة والحمد لله

Lady E يقول...

star in the sky : مش هقولك غير ان التاريخ بيعيد نفسه


انا كنت كده في أولى كلية برضه

ربنا يعينك ويوفقك في حياتك ويجمعك بصحبة خير ويسعد أيامك

نورتيني

Lady E يقول...

لولا وزهراء : ولا يهمك يا زهراء مش أول مرة يوصلني التعليق ده :)

انا يكفيني انك بتتابعيني ولو اني بحب تعليقاتك لأنها بتعبر عن شخصية بجد جميلة وجذابة وجديرة بالاحترام

الفرنساوي حبيبي حبيبي والله لغة جميلة وان شاء الله الموضوع مفيهوش هزار السنة دي هنجح يعني هنجح بإذن الله

الاحاديث القدسية مش ممكن حد يختلف على جمالها وروعتها

ربنا يكرمك ويرضى عليكي ويبارك في عمرك

نورتيني يا زوزو

Lady E يقول...

كيكى عوووووو : وانتي كمان يا اختي :)

والله الشوكولاته دي مشكلة ومش عارفة ابطلها

ع العموم هي بتسلم عليكي وبتهديلك تحياتها الحارة وبتقولك هتشوفك قريب

وعند امه يا ادهم وعو عو عو :)

وحشتيييييييييني من عندنا لعندكو

Lady E يقول...

Sharm : وجزاك مثله يا شارم

رفعت من روحي المعنوية

ربنا يكرمك

Lady E يقول...

اقصوصه : تسلمي يا أقصوصة

ليكي مثل دعائك يا قمرايا

نورتيني

Lady E يقول...

Bent Men ElZaman Da : ربنا يبعدها عننا ويسترها معانا كلنا يارب

ههههههههه فين العصاية ، هات الفلكة يا جابر :) كلنا حابين الجزء ده يا دودو

اللهم أمين

ربنا يسعدك ويفرح قلبك

نورتيني

Lady E يقول...

NeVeN : تفتكري؟ الحياة مراحل ومش بتقف عند مرحلة واحدة

الأحاديث القدسية بتحسسنا بجمال وروعة الدنيا وبتطمننا وبتطبطب على أرواحنا

وعندك 2 شيتوس لأحلى نوفا :)

وليكي مثل دعائك يا قمرايا

نورتيني

Lady E يقول...

أسمعنى شكراَ : كويس ان عندك الشجاعة الأدبية انك تقول انك كنت هتنام وانت بتقرأ البوست :) لو منك كنت همشي من غير تعليق

تسلم ع المجاملة

واللهم أمين

ونصيحة صغنونة أي بوست تحس انك هتنام وانت بتقرأه يبقى بوست ممل ومتقرأوش أحسن

Lady E يقول...

Cute Kitty **sookra : هيييييييه العروسة جت هيييييييه

ههههههه لأ يا سكرة لا تقلقي انا روحي روح طفلة مش هتكبر مهما عمري كبر

ولا قريبي ولا أعرفه :) مش بيقولو الانجليزي سيبك منه :)

ربنا كريم

نورتيني يا سكرة وابقي اسألي وبلاش طناش

ربنا يتمم لك على خير ولازم تعزميني عالفرح يا عروستنا

Lady E يقول...

عاوز اصحي : طالما فيها جنيه ونص لازم أوضح ده مبلغ مهم ممكن يخليني أكوم مستقبلي :)

بقي هو دا البربرق وانا فاكره فستان ولا حاجه بتتلبس ابقي "وضحي "حتي انا استنيت تردي مردتيش عندك وفضلت حيران
علي العموم شكرا

ده ردك في مدونتك على تعليقي وطبعا ملاحظ كلمة وضحي

هههههههههههههه شكرا ع الملحوظة بس انت أثبت العكس أنا محكمتش عليك ولا بحكم على اي حد اطلاقا

بس انت اللي حكمت بإني متسرعة في حكمي على الناس

يبقى مين فينا اللي بيحكم

على أي حال نورت وهستنى الجنيه ونص كاش :)