السبت، 27 فبراير، 2010

كل الكلام مرة واحدة 2


دورت على كتاب بيت من سكر لسوزان عليوان كتير عالنت ومعرفتش أوصل له
قرأت شوية من الكتاب على موقع سوزان عليوان
http://www.suzanne-alaywan.com/
وقررت اني هدور عالكتاب في المكتبات لأن في أشعار كتير عجبتني في الكتاب ده
تاني يوم في مكتبة مبارك كانوا عاملين معرض صغير للكتب ومش عارفة ليه دائما بتبقى كتب اسمائها مكلكعة


بالصدفة رحت بصيت عالكتب وجبت كتاب وكنت خلاص ماشية ببص بين الكتب لقيت كتاب بيت من سكر مستخبي بين الكتب ، بصيت شوية للكتاب وأنا مش مصدقة اني لقيته بالسرعة دي وبجد فرحت بيه ولاحظت ان
مع ان الكتب دي معروضة من فترة الا ان محدش قرب منها مع ان في كتب قيمة جدا وأسعارها رمزية !



اتفرجت ع الفيلم الأجنبي الجميل Tooth Fairy هو فيلم كوميدي بس فيه معاني عميقة أوي والفيلم الأسبوع ده أخد المركز السابع في الأفلام الأمريكية وايراداته أكتر من 9 مليون دولار
الفيلم جميل بجد وعجبني جدا وبيقول رسالة مهمة أوي لا لقتل الأحلام والخيال والاستهانة بالطموحات
اللي هيتفرج عالفيلم هيقضي وقت جميل بجد




لو مكنتش انسانة اكيد كنت هبقى جنية طيبة بفستانها الوردي المنفوش وجناحاتها الرقيقة والعصاية السحرية والأضواء حواليها

بتحقق الأحلام الطيبة وبتسعد الأطفال وطول الوقت بترقص وبتغني مع الورد والفراشات والعصافير




عجبني 3 كليبات لهيفا مع اني مش بعتبرها مطربة لكن بتأدي كويس وبتعرف تختار الكلمات كويس
عجبني اغنياتها بابا فين ولما الشمس تروح والاغنية اللي عجباني بجد (انت تاني) كلمات والحان وكليب
بحب النوع ده من القوة الداخلية مش اللي بيقعدوا يعيطوا على قصص الحب الفاشلة
الكليب جه دلوقتي على روتانا كليب وانا بتكلم عنه :)
اما اسوأ اغنية فهي الموعد الضائع من ناحية الفكرة واللحن والكلمات كمان مش حلوة أوي
وده مش تقليل من راشد الماجد أو يارا بالعكس لأن الأتنين أصواتهم مفيش عليها خلاف لكن بجد الأغنية مملة
والكليب جميل بس برضه ممل


بيعجبني الكتب أو المدونات اللي أسلوب كتابتها راقي وبتسمو بالروح والمشاعر الإنسانية بس لفت نظري حاجة غريبة أوي ان كتير من كتب المدونين أو الكتب الشبابية متأثرين بكتاب غربيين زي ايزابيل الليندي وباولو كويلو ولاغيين شخصيتهم شوية ولغاية دلوقتي مش عارفة ده ميزة ولا عيب

وعلى النقيض في كتب مصرية أوي بس ممكن أوي تتفاجأ لما تقرأها ببعض التعبيرات والمفردات الغير راقية تماما بتوصل انها بتكون الفاظ شتيمة أو الفاظ مفيش فيها حياء والكلام ده شوفته في كتب لكتاب بحب اقرأ لهم زي بلال فضل وعمر طاهر مع انهم مش مضطرين انهم يكتبوا ب أسلوب زي ده وبرضه خالد الخميسي استخدم التعبيرات دي في كتابه تاكسي حواديت المشاوير لأن دي فعلا المفردات الحقيقة لبعض سواقين التاكسي
بس مش معنى كده اني اشوف التعبيرات والأسلوب ده في الكتابة لأن الأدب لازم يكون راقي اومال هيبقى غذاء الروح ازاي ؟!

وفي النهاية أسيبكم مع رباعية من رباعيات جاهين كنت بسمعها زمان في الراديو قبل ما اروح المدرسة

غــــــمــض عـــيـنـيـك وارقـــص بـــــخــــفــه ودلــــع


الـــــــدنــــيــا هى الــــــشــابــه وانــــــت الــــــــجــدع


تـــــــشــوف رشــــــــــاقــه خـــــــطــوتــك تـــعــبــدك

لـــــكـن انـــــت لـــو بــصــيــت لـــرجـــلـــيــك. .تــقـع

عجبى !!

please be happy



back to college

هناك 21 تعليقًا:

Lady E يقول...

هييييييييييييييه انا اول تعليق هييييييييييه :)

فراشة يقول...

وانا التعليق التاني تقريبااااااا
برضه هييييييييييه


كويس انك لقيتي الكتاب
انا برضه عجباني اشعارها ف الديوان دا ( بس مش عندي الديوان :) )

وعن اسلوب ومفردات الكتاب هم بيعتبروها عادي يعني بما انهم بيتكلموا عن واقع مثلا فده طبيعي ..مع انهم لو مكتبوهاش المعني مش هيختل

i wish u be happy
happy day

Lady E يقول...

فراشة : يا صباح الورد

هتلاقي الاشعار عالموقع بتاعها يا فراشة

ما اي مفردات او مواقف مش لطيفة يقولك
ما هو ده الواقع
والحاجات دي بتحصل في الواقع
واقع ولا مش واقع ؟ :)
ومش عارفة ايه اللي وقع أصلا :)

والواقعية عمرها ما تبقى كده
أغاني تجيب تلوث سمعي
وأفلام هايفة ومفيهاش فكرة
وبرامج تجيب تخلف عقلي
لكن توصل للكتب :( يا خسارة

Thanks dear
same to you
Allah bless you

فراشة يقول...

انا بقى عايزة جناجات شبه اللى لابسينها دي ..صحيح مش هينفع اطير بيها
بس نفسي فيها وخلاص ههههههههه

انا كمان شفت كليب لما الشمس تنام عجبني حسيته هادي كدا

شكلي هحتل المدونة بما اني عمري ما عملتها وجيت بدري كدا :)

NeVeN يقول...

صباح الخير
بجد انتى فكرتينى بنفسى انا بردو بدور على كتاب ومازلت مش لاقياه
على فكرة الكتاب اللى بتكتب بأسلوب مش ظريف بتنقل للشعوب التانية فكرة مش مظبوطة عننا زى تاكسى انا ليا اصدقاء اجانب قرءوه علقو على احداث كتير فى الكتاب وفى الاخر انا اللى اتدايقت عشان حد اخد عننا فكرة مش كويسة ولو بنسبة 1 %
تحياتى

P A S H A يقول...

جميلة المقتطفات .. يا بختك بالكتاب :))

الفيلم ما شفتوش في الحقيقة !!

حلمك جميييييييل ورقيق قوي ربنا يسعدك يا رب دايماً ويجعلك مصدر فرحة للي حواليكي. اللهم آمين

هيفا .. مش باحبها

بالنسبة لموضوع أسلوب الكتابة - مجرد رأيي شخصي - أن العملية بعد الشهرة بتختلف وبيدخل فيها جزء من حسابات تجارية لصالح دور النشر والكاتب .. بإستخدام الجملة السخيفة " الجمهور عاوز كده" .. وكمان فيه نقطة .. مادة الكتاب بتفرض نفسها بالذات في الأدب الساخر !!
جزئية الكتاب المتأثرين بالكتاب الغربيين .. ممممم .. أعتقد إني لسه ما وصلتش للمرحلة اللي تخليني أقدر أفرق بسهولة بين اللي بيكتب واللي بيتملى

الرباعية طبعاً تحفة .. جاهين لا تعليق يليق به.

كل سنة وأنتِ طيبة وبألف خير إن شاء الله .

تحياتي
:))
سلام

لولا وزهراء يقول...

صباح الورد يا ارق ليدى على وجه الكره الارضيه

لفت نظرى طبعا انك تبحثى عن كتاب او ديوان ايا كان المسمى ومش عارفه تلاقيه وفى الاخر لقتيه على فكره فى ناس لو قولتى امامهم انك تبحثى عن كتاب هيستغربوا جدا جدا جدا منك ويقولوا هو لسه فى حد بيقرا عن جد احترم جدا جدا كل من يبحث عن كتاب ويقراه لاننى اشعر انه اسنان بجد فاهم الدنيا كويس لان القراءه دى من اجمل الاشياء وامتع الهواايات
فرحانه بالبوست بتاعك اوى اوى ربنا يحفظك ويوفقك وان شاء الله تحصلى على اعلى التقديرات

تقبلى الطيب الامنيات بالسعاده

لــــــــــــولا

صمت المشاعر يقول...

ازيك يا ليدي عامله ايه وايه اخبار النتيجه معاكي

حلوه اوي معني الرباعيه دي

اما بصراحه انا عمري ما قرات لسوزان عليون بس ان شاء الله اقرء ليها حاجه

دمتي بالف خير

Lady E يقول...

فراشة : وانا كمان عايزة من ده يا عم حزومبل :)

على فكرة هما في الفيلم كانوا بيطيروا بيها

تحسي ان الكليب فعلا طفولي وخيالي

المدونة مدونتك يا فراشة احتليها براحتك يا حبي :)

اي كومنت ليكي بيسعدني

نورتيني

كيكى عوووووو يقول...

وحشتينى اوى
مبترديش ليه على التليفون
ها هضربك
واعضك واقعدك على كلبيات هيفا
لحد ماتقرى وتعترفى وتردى

Lady E يقول...

NeVeN : صباح الورد
يسعد صباحك ومسائك
اهلا بيكي

ان شاء الله تلاقي الكتاب اللي بتدوري عليه وطالما في دماغك وعايزة تقرأيه هتلاقيه

ايوة تاكسي اترجم كمان :) يعني مبقاش محلي بس
هي المشكلة في رأيي المتواضع ان الكتابات اللي زي دي بتخلي الذوق العام ينحدر

ولو حد اخد فكرة مش مضبوطة من كتاب تبقى المشكلة عنده مش عندنا لأن كل بلد فيها طبقات والكتاب اتكلم عن طبقة سواقين التاكسي

والاجانب في ف بلدهم حاجات ممكن احنا كمان ناخد فكرة وحشة عنهم لو عرفناها


نورتيني يا قمرايا وان شاء الله تكرري الزيارة

هستناكي

Ana keda يقول...

وان تو ثرى

يا نهار ابيض بجد وحشانى اوى والله يا بنتى وبعدك عاملى جنان زى ما بيقولوا
سوزان عليوان دى حد كده واو بجد معدية بحب اختياراتك فى الكتب ودى تانى مرة تبقى بصرة بعد ربع جرام
الفيلم مشفتوش ...هتكلم عليه لما اشوفه
كويس انك هتبقى هابى عشان نازلة الكلية ربنا يسعدك يا حبيبتى

Lady E يقول...

P A S H A : تسلم ده بس من زوقك

يا بخت الكتاب بيا :)

الفيلم شوفوا على ضمانتي بجد فيلم حلو

هو مش حلم بس ده سؤال سألته لزميلاتي في الكلية لو مكنتش انسان كنت تتمنى تبقى ايه

اللهم امين شكرا على دعائك ولك مثله

دي حاجة جميلة جدا احنا نحب هيفا براحتنا لكن انتوا مينفعش تحبوها اصلا :) والحقيقة انا بحب ابداع هيفا في شغلها بغض النظر عن بعض كليباتها المش لطيفة

الجمهور عايز كده بقت بتتردد كتير اوي في اي حاجه ملهاش قيمة مع ان الجمهور مش عايز كده

وفي كتب في الأدب الساخر مفيش فيها شتيمة او اي تعبيرات مش كويسة زي كتاب اشرف توفيق مبسوطة يا مصر يعني الاسلوب ده مش شرط يفرض نفسه في كتابة الادب الساخر

الكتاب اللي بيقلدوا الكتاب الغربيين هما مش بيتملوا لكن من كتر حبهم للكتاب اللي بيقرأوا لهم ممكن يلغوا شخصيتهم ويستخدموا نفس اسلوب الكاتب في الكتابة

وحضرتك طيب وبخير وصحة وسعادة

دمت بخير

star in the sky يقول...

نحن هنا
جينا شرفنا نورنا

يا سلااااااام على الكتب هو فى احلى منها بس اللى يدور هيلاقى فعلا كتب ممتعة اووى

الفيلم شكله حلو اووى وفكرته احلى بحب الافلام اللى توصل فكرة

والكليبات افكر اشوفهم اصل مش متعودة اشوف الكليبات لاى حد على طول بسمعها بس

Lady E يقول...

لولا وزهراء : صباح العطور والبخور والزهور واي حاحه فيها اور في الأخر :) على عيونك يا أجمل لولا في الحياة

بغض النظر عن نظرة الناس اللي ربنا معاهم ويفهموا
احنا أمة اقرأ يا لولا ف ازاي أمة اقرأ لا تقرأ

تسلميلي يا لولا وليكي مثل دعائك يا قمرايا

انا اللي بجد بسعد بزيارتك انتي وزهراء

دمتم بخير

Lady E يقول...

صمت المشاعر : الحمد لله بجد واحشاني يا قمرايا

النتيجة مش ناوية تطلع دلوقتي

ان شاء الله يا حبيبتي وأكيد في أشعار ليها هتعجبك

نورتيني

Lady E يقول...

كيكى عوووووو : هههههههههه كل ده قلبك أبيض ده كفاية كليبات هيفا ما عدا ال3 كليبات اللي قولتهم ويبقى عقاب فعلا يعني

اي خدعه رغينا سوى امبارح كتيييييييير

كل ما بتوحشيني ببص للدبدوب (وش بيطلع لسانه)

Lady E يقول...

Ana keda : مرمر حبيبتي

ولا يهمك روحك معايا

وهي حبيبي النهاردة حبك عاملي بتنجان مسقعه انما ايه تاكلي صوابعك وراه :)

ايون بصرة فعلا :)

مين اللي هيبقى هابي علشان نازل الكلية انا؟ ده انا بتحايل على نفسي وبقولها بليز ابقي مبسوطة عااااااااا

خير خير كله حلو :)

Lady E يقول...

star in the sky : يا مرحبا يا مرحبا نورك غطى ع الكهربا ومشغلين شمع دلوقتي :)

بس اللي يدور عالكتب بقى

نورتيني يا ستار

P A S H A يقول...

أشكرك جداً جداً جداً

لإنك عرفتيني " سوزان عليوان"

بجد تحفة .


لك مني عميق الامتنان والشكر والتقدير

:))

سلام

Lady E يقول...

P A S H A : الشكر ليك لأنك اهتميت وبحثت وقرأت أشعارها

ربنا يكرمك ويسعد أيامك والشكر لله