الخميس، 28 مايو 2009

خريف في الربيع

لو عدينا في كام يا بختك في البوست اللي فات هنلاقيهم كتير جدا بيتهيألي لما تقراوا بوست النهاردة مش هتقولولي يا بختك خالص

كنت فرحانه ومتفائله بإمتحان الترجمة لأني بعتبر الترجمه فاكهة المواد عندنا بالرغم من ان الضكاترة بيوصلونا اننا نقول احنا مبنعرفش اي حاجه في اللغة المهم طبعا استبحس قبل الامتحانات انا متعودة عليه وضغطي دايما بينزل فكنت رايحة اللجنة النهاردة وانا مش قادرة انزل من البيت اساسا وبابا وصلني الحمد لله وبعدين دخلت اللجنة ولقيت واحدة اقل ما يقال عنها انها مراقبه ... عماله تزعق وتقول تعليمات اللجنة بغباوة وترتنا من قبل ما نبدأ اللجنة بس قولت وانا مالي ساعتين ويعدو وال... دي كانت بتراقب على لجنتا مع الأسف وكانت موصرة تطلع شنطتي بره اللجنة وانا قولتلها كل الشنط هنا وبعدين شنطتي ممكن تتسرق وفيها الموبايل المهم برضه اخدت شنطتي وحطيتها في اول المدرج بس مش بره اللجنة مع ان زميلاتي كلهم حاطين الشنط بتاعتهم جوه المدرج يعني سخافة من البداية
المهم فات نص ساعة من الامتحان وانا مركزه في الترجمه جالنا 4 مقالات مع الأقوال المأثورة فمكنش في وقت وعلشان كده في الترجمه بالذات بكتب نوتس او ملاحظات على ورقة الأسئلة علشان لما بترجم قطعه بندمج فيها وبنسى حاجات ممكن تكون مهمه في باقي الامتحان
ف الغبية جت وقالتلي امسحي كل الكلام اللي على ورقة الاسئلة قولتلها اوكي ولسه بمسك ورقة الاسئلة علشان انقل النوتس في ورقة الاجابة وامسحها من ورقة الاسئلة المراقبة الغبية اللي معاها قالتلي هاتي الورقة دي على اساس انها هتشوف مكتوب فيها ايه فلقيتها اخدتها وجابتلي ورقة تانيه واحاول افهم فيها ان ده امتحان ترجمه وان كل واحد بيترجم بالسينس بتاعه وبأسلوبه مفيش فايدة طب هاتي الورقة اكتب الملاحظات بتاعتي وامسحها بعد كده مفيش مخها جزمة قديمه قالتلي انا اخدت الورقة وخلاص مش هجيبها تاني ونظرتها ليا كلها تحدي
المهم فات ربع ساعه وخرفت اخر تخريف في القطعه اللي كنت بترجم فيها وطبعا افكاري طارت من كتر النرفزة والقهر اللي كنت فيهم
وجه سيادة مدير اللجان كل اللي عمله انه جه بص علينا والمصور اخد كام صورة ليه مع الطلبة
وقولت لمراقب لو سمحت ممكن تخلي فلانة الفلانية تيجي قاللي لجنتها مش معانا ومش هقدر انده لها فلانة دي قريبتي
المهم قضيت الامتحان وانا في التوهان ومخنوقة ومش عارفة ليه ده بيحصل معايا مع اني مبحبش المشاكل اساسا وعارفة ان كتير من المصريين لما بيمسكو سلطه بيتغابو على خلق الله فبتجنبهم
خلصت الامتحان وقولت مش هسكت انا كنت ناوية اجيب تقدير في المادة دي طبعا كده التقدير قاللي بودعك بسبب واحدة روتينية متخلفة مبتفهمش حاجه وبقت معيده ازاي مش عارفه وبعدين قولتلها على فكرة حضرتك ظلمتيني ولسه مكملتش قالتلي ايوة انا ظالمة
كنت فاكراها هتبقى انسانه متحضرة وتقوللي عملت كده ليه لقيتها غبيه فقولتلها حسبي الله ونعم الوكيل وقولت بسبب كلمتها دي هروح اشتكيها كفايه ان هي بوظت اعصابي وكمان بتستفزني وبتقوللي انها ظالمة وان ظلمها ليا عادي
رحت لمكتب عميد الكلية اللي مش بشوفه في الكلية خالص ولقيت قريبتي هناك سلمت عليها وحكيتلها على اللي حصل وكنت مش عارفة اتكلم من كتر انفعالي وهي كانت عماله تهديني وقولتلها انا هشتكي المراقبة اللي كانت بتراقب على لجنتا فقالتلي لأ الامور متوصلش لكده وبعدين هي طبقت القانون قولتلها قانون ايه اللي يخليها تعمل كده انا كاتبة اسمي على ورقة الأسئلة وقولتلها قارني الخط الموجود على ورقة الاسئلة بخطي بس لا حياة لمن تنادي وروحنا للمعيدة وقالتلها اسمعي ليدي من احسن البنات في الكلية وبتكره الغش فالغبية ردت عليها بأسلوب كله وقاحه
وفي الاخر قالتلي بتطولي لسانك عليا وبتقوليلي حسبي الله ونعم الوكيل قولتلها مرة تانية : ايوة حسبي الله ونعم الوكيل والمرة دي قدام معيدة ودكتورة
انا بجد تعبانة جدا صحيا ونفسيا هو ده اللي كان ناقصني فعلا
اول مرة اعرف ان حسبي الله ونعم الوكيل بقت شتيمة
وبجد تأكد عندي ان التعليم العالي بقى تعليم واطي وفيه كتير واطيين
واسفه على الألفاظ دي بس ده اقل كلام يتقال عن ولاد التيت دول
والغريب ان مناهجنا فيها كمية عته كبير جدا يعني ايه من خصائص الشعراء الرومانسيين انهم يبقو محششين علشان يحسو بالكلام اللي بيكتبوه
ويعني ايه يجيبولنا قصائد منيلة بنيله ل امرؤ القيس بيتكلم فيها كلام مقرف زيه
انا مبقيتش فاهمه حاجه بجد , هو في ايه؟؟؟؟؟؟؟؟؟؟؟!!!!!!!
منهم لله خلو ربيع حياتنا بقى خريف

هناك 41 تعليقًا:

احساس طفلة محبة للرومانسية بس واقعية يقول...

براحة على نفسك شوية
مكنش لازم تخليهم يستفزوكى كدا
يا بنتى اغلب الناس دول بيكونوا معقدين
والتعامل معاهم بعقل البيبيهات
وحاسيين انهم يقدروا يتحكموا فيكى
بس على فكرة خوافين جدا لو حسوا انك قوية وقلتى انى عارفة حقى وان دا مش غلط
ولو غلط اثبت ونادى حد اكبر منك
ووراقتى فى ايدى لغاية لما تثبتى العكس
ورحوا شوفوا اللى بيغشوا بجد متنفذوش القوانين على اللى عايز ينجح بضمير
هيحسوا انها مشكلة وهتكبر
وهيترجعوا بغباء برضو

بصى
ركزى لو فى امتحان جاى
وابقى شوفة قريبتك دى قبل ما تدخلى اللجنة
الظاهر البلد مش هتمشى غير كدا
ومتخلهومش يستفزوكى ويحسوا انك اتهزيتى
ان شاء الله ربنا هيكرمك فى المدة دى
وغيرها بس انتى زى ما بقولك اهدى شوية

تقبلى مرورى

blue-wave يقول...

ممكن اعرف انتى زعلانه منى ليه؟؟؟
انا اللى فيا مكفينى بقى

VÖltaa يقول...

بس بس
اهدى كده وروقى
ان شاء الله تنجحى فى المادة
وبتقدير كمان
بصى بقى ياستى
انا مش هناقش معاكى حكاية المراقبة والحاجات دى
لأنها بظرميطة
وبتفكرنى بمراقبة ثانوى
انتى عملتى اللى عليكى وفوضتى امرك لربنا وخلاص
بس عايز اقولك حاجة كنصيحة بعد كده يعنى من اخوكى الفاشل
بصى ياستى
اوعى تخلى حاجة توترك وانتى فى اللجنة
لو جم وقالولك قفلنا البلوج بتاعتك
اوعى تتهزلك شعرة
ارقعى بالصوت بس
ههههههه
لابجد
اوعى تتوترى
لأن ده هينسيكى المعلومات وتبقى مخك انضف من الصينى قبل وبعد واثناء غسيله
وعلشان متتوتريش
خلى اعصابك تلج
يعنى المعيدة خدت منك الورقة
بصيلها كده
وخدى الورقة التانية
وارفعى حاجب
وكملى حل ولا كأن حصل حاجة
مثلا معيدة خدت الشنطة
كلمتيها ورفضت
ارفعيلها حاجب برده
(ولو الحاجب الاولانى تعب ارفعى التانى
ولو مش بتعرفى ترفعى اللا حاجب واحد تعالى على نفسك وارفعيه كمان مرة )
وبعد كده قومى حطيها بكل بهدوء برة او على باب اللجنة

ووهكذا على هذا المنوال

لأن صدقينى انا اتعاملت مع كتير اوى من المراقبين دول
علشان تريحي نفسك
تنفضيلهم وتبقى تلاااااااجة
ولا يهمك اى كلام

على فكرة
كان عندى انا كمان امتحان النهاردة
Marketing
يلا لو شاطرة ترجميها

..

ومعلش انا طولت اوى عليكى
بس حبيت اجمد قلبك عالامتحانات الجاية

صمت المشاعر يقول...

ايه يابنتي اهدي شويه

هو انتي في قسم انجليزي زي حالاتي

وعندك موال الترجمه والكلام دا

حاسه بيكي ياختي انا بردوه قسم

انجليزي بس لسه هبدء كمان يومين

ربنا يستر ويعديها علي خير

بس روقي كدا وان شاء الله تنجحي وتجيبي فيها تقدير

♥نبع الغرام♥♪≈ يقول...

السلام عليكم



نونو

متزعليش نفسك والله ربنا على القوى يهده هده قويه

وان شاء الله ربما مش يخسرلك تعب يانونو


وبجد قلقتينى عليك

متزعليش نفسك ياقطه

قل لا يصبنا الا ما كتب الله لنا

دمتى بألف حب

اخوتك انوسه

الشعب لابد له من حكومه تشكمه يقول...

ممممممممممم طيب بما انى بعتبرك اختى الصغيره فاسمحيلى انى اقولك انك غلطانه..متبصليش كده ايوه غلطانه لانك اتعصبتى وخرجتى نفسك من التركيز لازم تعرفى تتحكمى فى اعصابك فى اوقات معينه...اخدت الورقه تاخدها ايه المشكله النوتس تتكتب تانى لانك كده بتضيعى فى وقتك انتى ,وهى من الاخر مش خسرانه حاجه ولو روحتى اشتكيتى زى مبتقولى ابسط حاجه هيقولك ان ممنوع حد يكتب على ورقه الاسأله...
بالنسبه لمشروع الدكتره انا مستغرباها جداااا بجد وخصوصا انها معيده يعنى فاهمه وعارفه كويس ان الترجمه بالذات مينفعش تتغش اصلا انا شايفه ان اللغه ككل مينفعش تتغش..ايه هتقعدى تسبلى للى جمبك حرف حرف مثلا ولو الفونتكس عندك بايظه هيقعد يقولك ايه بتقولى ايه...يعنى اللغه اكتر حاجه مينفعش فيها غش..

روقى كده وركزى فى امتحاناتك وبلاش تاخدى الامور عند مع المراقبين لان فى الاخر بتضيعى من وقتك وهم مش فارق معاهم..
روستوك روستوك يازكى ياروستوك:)

Ahmed يقول...

يبقى احنا حسدناكي في البوست اللي فات
لا ياستي ماشاء الله وربنا يفرح ايامك كلها

في نوعيه من الناس بتطبق القانون بأغبى طريقه
وفي ناس عندها ميول سياديه تحب تمارسها على خلق الله بمجرد ان يكون في ايديهم سلطه

بس انتي متوكله على الله ومش محتاجه حد تاني

في نقطه مهمه انتي ناقشتيها

نقطة مناهجنا التعليميه سواء في المدرسه او الجامعه
المشكله ان لا الطلبه ولا المدرسين ولا الدكاتره مقتنعين بالمناهج
امال مين اللي بيحطها وبيحطها كده ليه
وليه المنهج بيقعد عقود من الزمن قبل مايمسه اي تغيير او تطوير؟
لأن النظام في الأصل فاسد والكل بيحب يمشي في الساقيه من غير مايفكر يغير الواقع

انا متعاطف معاكي جدا
ربنا معاكي
انتي مش محتاجه غير انك تقولي يارب
ومتقلقيش ده العدل من صفات الله

غير معرف يقول...

:((

MaNoOoSh يقول...

الست دي فعلا مفترية وليكي حق تقوليلها حسبى الله ونعم الوكيل.. بس ملكيش حق تسمحيلها تطلعك من تركيزك فى الحل.


عموما هو التعليم العالى بقى تعليم واطي والتعليم اللى تحت العالى بردو بقى واطى.. وحسبنا الله ونعم الوكيل فى كل ظالم فى البلد دى

دعاء مواجهات يقول...

يابنتى كلنا لها بجد

انا حصلت معايا بردو من سنتين ف امتحان الليسانس بس مسكتتش طبعا ونزلتها ف الجورنال كمان

هو احنا شوية

اهدىبس ورووقى وبلاش تشتمى حد علشان متاخديش ذنوب ع الفااضى

تحياتى

dramaqueen يقول...

معلش يا ليدى
انتى قولتيها وسط كلامك
بعض الناس لما بتمسك سلطة بتتغابى لعقدة جواها
منها لله على اللى عملتوا فيكى
وصدقينى ربنا عمرة ما هيضيع تعبك
وان شاء الله تجيبى التقدير اللى انتى عايزاه

معلش ركزى فى اللى جاى
هى دنيا ولازم نستحملها ونتمنى اننا نغيرها فى يوم من الايام

القمر الساهر يقول...

انا حاسة بيك والله

بس ولا يهمك .. معلش يمكن كانت نازلة من البيت متحانقة ولا في حد مطلع عينها فطلعته عليكِ

شوفي ما تبوظيش اعصابك علشان تعرفي تركزي

واعرفي انك عملتي اللي عليك والتوفيق من ربنا

وهي رنا يسامحها ويهديها

وانا معاك انهها غلطانه وان النظام كله غلط ومافيش حسن خلق في التعامل مع الناس

لا حول ولا قوة الا بالله

بس روووووووووووقي انتي وسيبك ركزي في اللي بعد كدا

mahasen saber يقول...

ربنا يوفقك ان شاء الله

شدى حيلك فى المذاكره بس والتوفيق من عند ربنا
ان شاء الله

mahasen saber يقول...

ربنا يوفقك ان شاء الله

شدى حيلك فى المذاكره بس والتوفيق من عند ربنا
ان شاء الله

MǿиY El-Shreef يقول...

يابنتي حرام عليكي انا هتعقد من الكليه قبل ما ادخلها

ربنا يستر يااااااااارب

انتي ماتتنرفزيش اوي كده ومش هيجيلك اكتر من الي مكتوبلك

معلش بقى هي غبيه وانتي اتحسبنتي وربنا مش هيسيب حقك

معلش

ربنا يعديها معاكم ع خير

ELMASRYA - MRS WRITER يقول...

حبيبتي توته

سلامتك من الزعل ومن القهر

ربنا هو حسبك ونعم الوكيل

ودعوة المظلوم يهتز لها العرش ويقول رب العزة سبحانه وتعالى وعزتي لأنصرنك ولو بعد حين

حقك هيجيلك لغاية عندك

بس المهم تركزي في الإختبارات الجاية

المؤمن دائما مبتلى يا حبيبة خالتو وانتي حاولتي تاخدي حقك وحسبنتي عليها مرتين

خللي التصرف ده يبرد نارك وانسي الحكاية المزعجة دي

بس بجد أنا مغلولة من الست دي وهدعي عليها أنا كمان

فعلا بيخللوا الربيع يبقى خريف وبيحولوا كل شيء مبهج للحزن والقتامة

خدي بالك من نفسك

بحبك قوي يا ست البنات

Lady E يقول...

احساس طفلة محبة للرومانسية بس واقعية : البيبز بيفهمو اكتر منهم يا احساس طفله
وللأسف انا اتعاملت معاهم على انهم ناس متحضرين وبيفهمو وعلشان ضغطي كان منخفض فكنت مش قادرة اركز كويس
على اي حال قدر الله وما شاء فعل

تسلميلي يا قمرايا وربنا يكرمك

Lady E يقول...

blue-wave : هزعل ليه؟

هو في حاجه تزعل لا سمح الله ؟؟

Lady E يقول...

Mo7ammed : ههههههههه ربنا يسعدك يا محمد الكومنت بتاعتك بجد دمها خفيف

بس صعب شوية اني احط اعصابي في تلاجة لأني عصبية شوية ومش بحب ان حد تافه وعنده عقدة نقص يحاول يتحكم فيا

وماركتينج يعني ماركتينج طبعا :)

ربنا يوفقك في المحاثبة والتسويق وكل الامتحانات ويبعد عنك المراقبين الرخمين

Lady E يقول...

صمت المشاعر : ايه ده زومل يا اهلا يا اهلا

ربنا معانا يا قمرايا

ان شاء الله خير

نورتيني

Lady E يقول...

عاشقة الأحزان : ونعم بالله يا انوس

امين يا رب

( قل لن يصيبنا الا ما كتب الله لنا ) صدق الله العظيم

دمتي في خير وسعادة يا قمر

Lady E يقول...

الشعب لابد له من حكومه تشكمه : تقريبا كنتي معانا يا شيمو وانا بتكلم مع بابا بعد الامتحان وبحكيلو برضه قاللي ...اخدت الورقه تاخدها ايه المشكله واكتبي النوتس تاني بدام كتبتيها مرة اكتبيها تاني
يا جماعه والله مفيش مشكله ااقدر اكتبها تاني بس مفيييييييييييش وقت الامتحان ساعتين بس والنوتس كانت علشان الحق وقتي ومنساش حاجات ممكن تكون مهمه وبعدين هدخل في التنمية البشرية شوية وهقولك الورقة بتاعت الأسئلة بتاعتي اخدت من روحي واتعودت عليها ولما جتلي ورقة اسئلة تانيه حسيت انها غريبه عني وملخبطاني ( ايه الرومانسية دي نياهاهاها)


///اصلا انا شايفه ان اللغه ككل مينفعش تتغش..ايه هتقعدى تسبلى للى جمبك حرف حرف مثلا ولو الفونتكس عندك بايظه هيقعد يقولك ايه بتقولى ايه...يعنى اللغه اكتر حاجه مينفعش فيها غش..///

طبعا احنا السؤال عندنا بيتجاوب من 4 ل 8 صفحات هغشش او اغش كل ده ازاااااااااي؟؟؟؟ وبعدين عيب عليكي يا شيمو فوناتيكس ايه بس اللي بايظ دي اكتر حاجه بحبها في انجليش كله والحمد لله دايما امتياز في الفوناتكس


***لان فى الاخر بتضيعى من وقتك وهم مش فارق معاهم..***

عندك حق وبجد مش هنسى النصيحة ان شاء الله لانك بجد نبهتيني لحاجه مهمه

تسلميلي يا شيمو ربنا يريح قلبك ويروق بالك اي خدعه بدعيلك بدعوة جدتك :)

Lady E يقول...

أحمـــــــــــــد أبو العلا : لا يا انجينير متقلقش من ناحية الحسد مش بهتم بيه اوي ودايما بقرأ المعوذتين واية الكرسي

وبرضه زي شيمو تقريبا كنت معايا وانا بكلم بابا قاللي نفس الكلام بتاع تطبيق القانون بشكل غبي

والمناهج بتاعتنا فيها كلام كتير ملوش لازمة على كل النواحي مثلا في رواية روبنسون كروزو على ما اتذكر كان في مشهد بيقولو فيه ان العرب والبرتغاليين ناس همجيين واهم حاجه عندهم الحروب والدم والارهاب طب ايه فايدة اننا ندرس روايه فيها الفكر المتطرف والرأي الغبي ده عن العرب ده

ده غير روايات عن الحب المحرم ونظريات عن تعدد الألهه لكن كنت برجع واقول دي ثقافة ولازم نعرف الناس دي بتفكر ازاي بس مليت من ان مناهجنا ملهاش لازمة ومستفزة ومش مفيدة في شغلنا بعد الكلية

وبعدين تعاطفك لواحده مش كفاية يا انجينير اتبرع ولو بربع جنيه :)

وفعلا العدل من صفات الله وانا متأكده من كده

تسلم يا انجينير وربنا يكرمك

Lady E يقول...

hager za3bal : :((

:((


:((

Lady E يقول...

MaNoOoSh : هو في حد هيرضى ان حد يطلعه من تركيزه في الامتحان وهو مبسوط يا منوش؟
غصب عني لاقيتني مكنتش قادرة اركز من الموقف اللي حصل ده وعالعموم الانسان مش بيتعلم بسهولة وانا اتعلمت حاجات كتير من الموقف ده
بس اللي لسه مش قادرة افهمه ازاي في ناس كده في الدنيا ؟ وازاي اهل البونيه دي مستحملينها؟؟ الله اعلم

وللأسف بقى عندنا قلة حيلة ومفيش في ايدينا غير اننا نقول حسبنا الله ونعم الوكيل بس المفروض لما نتعرض لظلم نحاول ناخد حقنا وربنا على كل ظالم ومفتري في اي مكان في الدنيا

ربنا يبعدك عن الظلم والظالمين يا احلى منوش

Lady E يقول...

دعاء مواجهات : اهلا بيكي يا دعاء
بجد سعيدة بزيارتك الجميلة دي
واحب اوضح ان مش من طبعي اني اشتم حد
وانتي اتعرضتي لنفس الموقف واكيد حسيتي الظلم وحش اد ايه وازاي ممكن يخرج اي حد عن شعوره وانا كنت بكتب وانا منفعله شوية لأني اتظلمت
قال تعالى :
( لا يُحِبُّ اللَّهُ الْجَهْرَ بِالسُّوءِ مِنَ الْقَوْلِ إِلا مَنْ ظُلِمَ )(النساء: من الآية148)

نورتيني يا قمرايا

Lady E يقول...

dramaqueen : امين


هى دنيا ولازم نستحملها ونتمنى اننا نغيرها فى يوم من الايام

عندك حق

نورتيني يا كوين

غير معرف يقول...

اول ماشوفت اول جملتان من البوست وتحديد ناس واطيه قلت لا دخلت مدونة غلط نونتى عمرها ماتقول كدة!!!
لكن بعد ماقريت وواضح انك اول مرة تتعرضى لموقف كدة فهمت واقل كلمة تتقال تعرفى الى انتى بتقولى دة نص الى بيحصل عندى عادى انا اتعودت على الجو دة يعنى لو عندى وكتبتى على الورقة وكاتبة اسمك برضة احمدى ربنا ان الورقة متسحبتش منك على فكرة دى بتبقى تعليمات عشان مبقتش كدابة مش علطول يعنى دة بيحصل
بس لازم تهدئ وتحمدى ربنا على كل شئ
معلش ياقلبى تتعوض
وزى ما قولتى فى ناس كدة لمة تمسك السلطة!!!
ربنا يرحمنا منهم ياشيخة
الا قوليلى اية حكاية الناس المحششة الى عندك دى!!!
عوووو

blue-wave يقول...

ممكن تضيفينى لأنى محتاج اتكلم معاكى ضرورى؟؟؟

غروب يقول...

يا لهوووووووى

معقول كل اللى كتبته ضاع

د انا كنت كاتبه يجي صفحه

بس النت علق

كنت مبعبه بكل بلاوى الامتحانات واللى حصل النهارده في امتحان التكست انلاسيز

المهم وحشانى جدا

شدي حيلك

Lady E يقول...

القمر الساهر : تسلميلي يا قمرايا

نورتيني واهلا بيكي في اول زيارة لمدونتي


وانا زرت مدونتك الجميلة بس للأسف مش عارفة اكتب كومنت لان الكمبيوتر عندي بيهيس لما بيكون في صفحه منفصله للكومنتات

ربنا يوفقك واكيد هصوت ليكي ان شاء الله بس لما اعرف طريقة التصويت هتكون ازاي بكرة ان شاء الله
وبجد فكرة البرنامج رائعة ومتميزة جدا وعجبتني جدا

Lady E يقول...

mahasen saber : حضرتك منوراني جدا جدا جدا وسعيدة جدا بالزيارة الغالية دي

Lady E يقول...

MǿиY El-Shreef : مش قصدي اني اعقدك او اعقد اي حد يا موني انا بحكي عن حاجه حاصله فعلا

ربنا يوفقك في امتحاناتك وان شاء الله متتعقديش لما تروحي الكلية

Bent Men ElZman Da !! يقول...

اهدى بس يا ليدى
هتخلى واحده زى دى تعصبك
حصلى تقريبا نفس الموقف بتاعك ده
المراقب جه خد منى ورقه الاسئله لانى كاتبه عليها رغم انى كتبت اسمى ورقم جلوسى
بس الراجل كان محترم بصراحه لما لاقانى قربت اعيط قالى اجبهالك تكتبى اللى فيها؟
مافهمش اصلا ان بيها او من غيرها الماده منيله بنيله :D
بس عموما بيبقى فى ناس معقده بالمنظر ده
تحسى انها عايشه عشان تعقد وتضايق فى اللى حواليها
والتعليم خربان من زمان دى حاجه بقت اساسى
احنا لينا الجنه والله يا بنتى :D
سيبك من الامتحان ده
وركزى فى اللى جاى
وربنا معاكى وان شاء الله تعدى على خير

blue-wave يقول...

ممكن اعرف فيه ايه بقى؟؟؟
بجد محتاج اتكلم معاكى

Lady E يقول...

ELMASRYA - MRS WRITER : خالتو حبيبتي

تسلميلي يا احلى خالتو وفعلا ربنا سبحانه وتعالى حسبنا ونعم الوكيل

وهي متستحقش حتى دعائك عليها

منها لله هي وكل اللي زيها

دمتي بسعادة و في عناية الرحمن

Lady E يقول...

كتكوتتي اللي بتدخل بغير معرف : انتي اكيد عارفة ان ده مش اسلوبي يا كيكي
وعالعموم مش هستخدم الاسلوب ده تاني ان شاء الله

وعندكو في اكاديمة القطن الدولية بيعملو كده برضه عاااااااااااا
معلش بقى خلصتي امتحانات وارتاحتي انا لسه لي 3 امتحانات عاااااااااا

وبعدين الناس المحششين دول في الكتاب وفي سايبر عم حتاته نياهاهاهاهاها

نورتيني يا كتكوتة ومتبقيش تقطعي الجوابات

Lady E يقول...

blue-wave : never

Lady E يقول...

غروب :كنت عايزة اشوف كلامك
زعقي للنت بتاعكو ده عاااااا

وانا كمان عليا تكست انلايسز بكرة ان شاء الله

وانتي كمان وحشتيني يا قمرايا

Lady E يقول...

Bent Men ElZaman Da !! : فعلا في ناس مكلكعه كتير

ومبروك مقدما عالتخرج والليسانس يا دودو

هنتخرج من تعليم خربان اد الدنيا :))

Lady E يقول...

blue-wave : ever never

that's enough