الجمعة، 22 مايو 2009

حب غير مشروط



ملحوظة كلبوظة : البوست ده مش الجزء التاني خاااااااالص للبوست اللي فات نياهاهاهاهاهاها بس حسيت اني عايزة اقول الكلام ده في البوست ده قبل الجزء التاني

يااااااااااااااه يا رب اد ايه عطوف وكريم ورحمان ورحيم من كل قلبي بحبك يارب وراضية بقضائك

الكام يوم اللي فاتو كنت شايفه حياتي سودا مخططه بأسود وفيها نقط سودا ومكنتش شايفه كوباية اساسا علشان اشوف النص المليان او الفاضي فيها وكنت كل شوية بسأل نفسي ليه بزرع الورد ومش بحصد غير الأشواك اللي بتجرح فيا وليه املا الدنيا فرح ومرح وسعادة وحب وأعيش لوحدي في بحر من الدموع ومكونتش شايفه او حاسه اي حاجه حلوة بتحصل في حياتي وواقفة قدام الباب المقفول بعيط ومش بس كده لأ كمان كنت بخبط دماغي فيه مين فين ليه هه؟؟ اللينك ده لو حد عايز يعرف ايه موضوع الباب

وبعد معاناه لقيتني في وقت السحر الوقت اللي هو قبل الفجر بشوية ده وفي الفجر بناجي ربنا سبحانه وتعالى بدموعي وبفضفض ليه وبجد والله العظيم دعيت دعوتين بقلبي كنت بتمنى الدعوتين دول جدا من ربنا سبحانه وتعالى والدعوتين دول كانو بعيد اوي وصعب تحقيقهم لكن الحمد لله مفيش حاجه بعيده او صعبه على ربنا سبحانه وتعالى دعوة من الدعوتين دول كانت اننا نسافر ونغير جو وبابا كان رافض موضوع السفر ده خااااااالص لأني المفروض عندي امتحانات وكنت فاقدة الأمل في اني اطلع من الخنقة اللي كنت فيها لغاية لما فأجه بابا وافق على السفر والحمد لله سافرنا فعلا والحمد لله كان يوم مرهق بس في نفس ذات الوقت كان يوم جميل

وانا بقول الكلام ده علشان اي حد حاسس بحزن او الم او مهموم يعرف ان بعد الليل في نهار وان ربنا سبحانه وتعالى جميل اوي ورحمان اوي ورحيم اوي

والحمد لله لولا الألم والحزن اللي كنت فيهم مكنتش هقدر احس بالسلام النفسي اللي حاسة بيه حاليا ومكنتش هعرف مين الغاليين الي بيحبوني في الله ووقفو معايا في شدتي ومين اللي كنت فاهماهم غلط وكنت متخيله انهم اخواتي واصحابي بس اتخدعت فيهم للأسف والرائعين اللي بحبهم وبيحبوني في الله وحبهم ليا غير مشروط و اللي بيحبوني زي ما انا ليدي الحنونة والعصبية , الطيبة والعنيدة جدا , المرحة والنكدية احيانا

وهما (بابايا حبيبي , مامتي حبيبتي , خالتو المصرية حبيبتي ) وصبحاتي ( كيكي اللي اتخنقت من كلامي عليها في المدونة وشكلي هخنقها قريب , وانوس عاشقة الأحزان ربنا يفرج كربها , واخيرا البنوتة السكرة شيمو كتبت بوست في مدونتها علشاني ثانكيو يا شيمو نردهالك في الأفراح يا اوختشي )

عم الانجينير احمد ابو العلا : شكرا ليك لأني بفتكر الكومنتات بتاعتك في المدونة كتير وخصوصا الكومنت بتاعتك لما قولتلي وافتكري دايما ان ربنا معاكي بس كل اللي عليكي انك تندهي من جواكي "يارب"


اي كلام شكر مش هيكفيكو حقكو ربنا يباركلي فيكم ويسعدكم ويفرج كربكم والله لا يحرمني منكم ويخليكم على طول معطرين حياتي ويارب دايما منورين حياتي بوجودكم فيها

ملحوظة كلبوزة تانيه : هعمل زي بتوع التشيراما (الدراما) وهتأخر شوية عليكو في الجزء التاني من البوست اللي فات وده نظرا لأن امتحاناتي مش على الأبواب لأ حاشا لله احنا تجاوزنا مرحلة الأبواب دي الامتحانات بقت جوه البيت مش على الأبواب عاااااااااا

ملحوظة تانية : كان نفسي اتكلم معاكو امبارح عالايميل في لقاء المدونين عالنت بس للأسف وقتها كنت عند الدكتور انا ومامتي واتاري كل اللي بيحصل لي باد هابيتس علشان زي اي حد بحب الشوكولاته والفاست فوود ومنفضة لل هيلثي فود وللأسف اتمنعت من الشوكولاته والفاست فود عاااااااااا عااااااااا عاااااااااا ولما الدكتور عرف اني مدونة قاللي ايه ده انتي مدونة على فكرة هبلغ عنك يعني ما شاء الله سمعة المدونين بقت على رأي دكتر ستيتة فلة يا روحي ان المدونين بيعملو مشاكل

الامتحان الجاي ان شاء الله عندي حضارة بريطانيا في القرن التمناشر وعجبي !! ولسه يومين وانا لسه بقول يا هادي وسمعني أغنية ياما قالو ان القمر عالي وبعيد والشهادة مستحيل تلمسها ايد

هناك 13 تعليقًا:

كيكى عوووووو يقول...

خلاص مادام انتى اضايقتى ابقى ارمزى برمز بعد كدة او علامة تعجب!!
هفهم علطول انه انا
*************************
انا مخنوقة وبحاول ابص لاى حاجة بس المشكلة انا عارفة اية العيب الاساسى بس مش عارفة اصلحوه!!!!
كويس انك مجتيش امبارح فى اللقاء
لانه كان سمك لبن تمر هندى وكنتى هتصحى مصدعة ومودك ضارب
والمشكلة انك لحد دلوقتى مكنتيش هتعرفى انتى بتكلمى مين!!
لان كان فى ناس كتير
عموما ربنا يصلحلك الحال دايما
**ا اقولك بقى حضارة يعنى اية بالنجليزى
هاااااااااااااا
عووووووووووووو

Ahmed يقول...

ههههههه

ايه الاغنيه العجب ديه؟ الشهاده مستحيل تلمسها ايد
لأ بجد تحفه

انتي وصلتي لأجمل وقت للمناجاه
التلت الأخير من الليل

الوقت اللي الناس كلها بتكون فيه نايمه وربنا بينادي علينا لو حد عنده دعوه أو حاجه عايز يقضيها

سبحانه كل ليله والناس نايمه

بابه عمره مابيتقفل ابدا


وجودك في التدوين شئ مهم لكل اللي بيزوروكي ياليدي وغيابك كلنا بنحس بيه

دمتي بكل خير
واحكيلنا دايما عن الامتحانات

ااه بالمناسبه (انا سألت قبل كده ولسه برضه مستغرب), الحضاره في بريطانيا في القرن التمناشر؟
لهو انتوا خلصتوا كل حاجه وناقص ديه بس
ههههه

عجبي
عادي يعني كلنا درسنا كوسات في الكليات محدش كان عارف مين اللي حطها وحطها ليه اصلا

ربنا يوفقك ان شاء الله

الشعب لابد له من حكومه تشكمه يقول...

بعد الكلام ده مش قادره هعيط بجد :)
واسمى مكتوب كمان مش بقولك لازم اعيط...:)

شوفى ياقمر انا باه عندى المود التحفه اللى انتى كنتى فيه من فتره بس تقدرى تقولى مش بحب اتكلم اوى عنه...

وفعلا مفيش احسن من الصلاه هتشكى للعبد والرب موجود...؟؟؟؟

انا مبسوطه جدا انك وصلتى للنتيجه دى ومبسوطه اكتر انك خرجتى من المود..

ومعاكى ربنا باه فى القرن التمناشر بتاعك ده انا كان عندى ماده عجيبه زى دى ومن قبل ال18 كمان ولحد دلوقتى مش فاهمه ليه اصلا درسناها...
غير انهم ناس فاضيين ومعندهومش جديد ندرسه فبيرسولنا اطلال الماضى

ELMASRYA - MOSLEMA LELLAH يقول...

ههههههه

حلوة الأغنية جدا

والله ضحكتيني

ازيك يا حبيبتي

أنا سعيدة لساعدتك ويارب دايما كده على طول

كنت هخاصمك علشان دخلتي النت تاني ومش بتذاكري

بس ماقدرتش بحبك يا كتكوتة وماقدرش ماردش على موضوع ليكي

مكسوفة قوي من تصنيف حبك ليا

إنتي حطيتيني في مكانة كبيرة ليكي خالص

سعيدة بحبك ليا وثقتك فيا

خدي بالك من نفسك ولو سمحتي ذاكري

دمتي سالمة بحفظ الرحمن

بنجاواتى يقول...

الحمد لله ان الكرب انفرج

وربنا معاكى فى الامتحانات

الحضارة البريطانية فى القرن 18 سهلة على فكرة :P

يا رب يديم عليكى نعمة السلام النفسى

تحياتى

مسدس صغير يقول...

لأن تحب الله فتلك منة عظيمة منه
اما أن يحبك الله فلن تكفيك الدنيا فرحا.
فحب الله للعبد خلود فى الجنة بلا عذاب
نسأل الله حبه وحب من يحبه وحب كل شئ يقربنا الى حبه.

MaNoOoSh يقول...

الحمد لله انك ارتحتى من الخنقة شوية.. ويارب الخنقة تروح خالص ومتجيش تانى ابدا.

ربنا يوفقك فى الامتحانات يا ليدى.. وذاكري كويس بقى لحسن القرن التمناشر دة حاجة خنقة اصلا.. انا كنت باخده فى تاريخ الفن بس فى اوروبا كلها وكان حاجة خنيقة قوووووووووووي.
ربنا معاكي يا قمر

VÖltaa يقول...

"انتبه !!!!!!!!!

انا شيلت الموديريشن من على الكومنتات

وياريت اللي معاه شوكولاته يطلع بره البلوج عااااااااااا "


ياااه
لو مكنتيش تحلفى
خلاص
هاكل انا المورو اللى كنت هجيبهالك


ربنا معاكى فى الحضارة البريطانية
وربنا معايا انا بكرة فى المحاثبة *_*

Lady E يقول...

كيكى : يا حجه انتي اللي اضايقتي مش انا وبعدين رمزي مين ده

وبعدين بدام عارفة الحاجه اللي مضايقاكي ومطنشه انك تصلحيها يبقى انتي بتدلعي لانك سيباها تخنقك وهتفضل تخنقك طول ما انتي سايباها

والدكاترة النفساويين بيقولو :
فور ان تبدأ فى حل تلك المشكله التى تضايقك ستجد ان شعورك بالاكتئاب قد اصبح اقل حده و ذلك لان المشاعر ما هى الا وسيله يستخدمها عقلك لتنبيهك بمشكله معينه. فور ان تبدا بحل تلك المشكله يجد عقلك انه لا احتياج لجعلك تشعر بذلك الشعور مره أخرى و بالتالى يذهبه عنك.

وربنا يصلحلك الأحوال يا كتكوتة
وقوليلي حضارة يعني ايه بالانجليزي ههههه
ربنا يبعد عنك الخنقة ويوفقك في الامتحانات يا كتكوتة

blue-wave يقول...

طمنينى عليكى
انتى كويسه؟؟

Lady E يقول...

أحمـــــــــــــد أبو العلا : فعلا التلت الأخير من الليل وقت كلنا بننساه

والباب اللي مش بيتقفل ابدا في وش حد هو باب ربنا سبحانه وتعالى

وشكرا على المجاملة يا انجينير

وبالنوسبة للسؤال بتاع الحضارة ف اللي ملوش ماضي ملوش حاضر يا انجينير
واحنا بندرس بريطانيا من اول سنة اولى درسنا القرن ال13 و 14 وفي سنة تانيه درسنا الحضارة في القرن ال15 وال16 والسنة دي درسنا الحضارة في القرن ال17 وال18 وهو ده التطور الطبيعي للحاجه الساقعه ههههههه هي مادة خنيقه بس ليها لازمة
وفي حاجات كتير كانت بتحصل في بريطانيا في القرن ال18 ودلوقتي بتحصل في مصر فالواحد بيحس ان في امل ان مصر توصل للحضارة بتاعت انجلترا

ربنا يكرمك يا انجينير وشكرا ليك

Lady E يقول...

الشعب لابد له من حكومه تشكمه : ههههههههه لأ لأ متعيطيش يا شيمو مش معايا مناديل

وانا هتبسط لما تخرجي من المود ده حد طايل انه خلص كلية يا بنتي عقباااااااالي يا رب

نورتيني يا قمرايا واخرجي من الموووووود
امشي يا مووووووود امشي يا موووووود امشي

♥نبع الغرام♥♪≈ يقول...

السلام عليكم
حبيبتى ربنا يبارك فيك
ومتشكره ليكى على سؤالك عنى
ويارب يطمنى عليك يارب
وان شاء الله موفقه
اختك أنوسه